رواية حياة فرحات كاملة بقلم الكاتب المصري اسلام احمد عبدالعزيز عبر دليل الروايات للقراءة والتحميل pdf
رواية حياة فرحات الفصل الأول
فرحات كان شخصية ضعيفة جدا ومترددة دايما وكان مصاب بحالة نفسية ...ومعندوش ثقة في نفسه ..وده بسبب اهله اللي دايما مصدرلينه سلبياته وبيسموا بدنه وبيقهروه بكلامهم اللي زي الرصاص. ..وفي اعتقادهم ان كده هيكون افضل وهيتغير ....لكن مع صدمات الحياة ومع قسوتهم في كلامهم وردود افعالهم جعلته شخص الي حد ما قاسي وميهموش حاجة و ميهموش روحه ذات نفسها .
فرحات رجع من المعهد الفني الصحي بامبابة ...كان شعبة تمريض ....كان في الفرقة الاولي من المعهد لكن شكله يبان عليه انه في التلاتينات .
فرحات دخل ع والده ووالدته بعد اما اخوه فاتحله الباب : السلام عليكم
والده : عليكم السلام ...
فرحات قلع الكوتشي بتاعه ورمي شنتطته ع الكنبة
والدته : ايه مالك مخنوق ليه ؟
فرحات بابتسامة : لا مش مخنوق ولا حاجة عادي
والدته : طب يلا عشان ابوك رايح فرح صاحبه
..بنته فرحها النهاردة وانت هتروح معاه
فرحات كان من النوع اللي بيكره التجمعات والافراح والمناسبات : لا انا مش فايق النهاردة اروح في حتة وبعدين انا مش بحب اروح افراح وانتوا عارفين من زمان .
والده : يابني مش انت الكبير بتاعي يعني المفروض تكون معايا في اي مكان اروحه ...امال كبير اسم بس
فرحات بنفاذ صبر : انا مش عاوز اروح افراح ياجدعان وبعدين حضرتك رايح تتخانق مثلا وانا مش عاوز اجي ..😅
والدته : انت اهبل يابني ...امال ياخد يوسف اخوك اللي اصغر منك .
فرحات : وفيها ايه ماياخده يا جدعان انا مش عارف في ايه لده كله ؟؟!!!
والده : روح يابني ...روح انت عمرك ماهتتغير ولا هتسترجل....مش تقول ماشي يا بابا انا معاك في اي حاجة احس ان ابني راجل .
فرحات بصله باستغراب وابتسامة وبعدها راح اوضته وهو بيدخن (مش سجاير ها 😅) ومتعصب جدا.
بعدها بساعة .
والدته : يابني ابوك رايح في مكان لازم تروح معاه ..خليييك هيخلي يوسف يبقا كبير عليك ..و هيبقا ملكش لزمة ..
فرحات : استغفر الله العظيم ....حضرتك انا مش فارق معايا ان كان يوسف يروح او كبير او لا انا مش في دماغي ده كله ولا بغير من كده ...ده اخويا يعني اتمناله انه يكون احسن مني .
والدته : يعني برضوا هو هو متغيرناااش ...براحتك يابني اعمل اللي انت عايزه ...مفيش فايدة فيك .
فرحات مستغرب اللي بيعملوه ...لان الموضوع بالنسبة له حرية شخصية ..ومش مستاهل ده كله ..
بعدها بساعة ...
والده : هتيجي يابني ولا مش هتيجي ؟؟!!
فرحات بعد تنهيدة : هاجي
فرحات لبس بدلة سودة وتحتها تيشرت اسود فخم
ووالده لبس بدلة وكرفتة وقميص وقمة الاناقة في الاتنين .
يوسف نزل مسح العربية ...وبعدها طلع وهو زعلان انه مراحش معاهم .
والده : انا نفسي افهم ايه المشكلة عندك في انك تروح اي فرح او مصيف او اي مكان ...ليه حاطط عقدة لكل حاجة ..ايه العقدة اصلا
فرحات : مفيش عقدة بس انا طبعي كده مش بحب اروح المناسبات ولا الحاجات ديه تماما ..انا جيت معاك ..عشان خاطرك بس .
والده : صدقني يابني هتندم هتندم اشد الندم ع عدم سمعان كلامنا ده ...يابني انا وانا قدك كنت اتمني ان حد يودينا افراح ومصايف وتجمعات ...انا مستغربك والله
فرحات سكت وبعدها بدا يغير هو الموضوع ويعرف هو رايح فين بالظبط ومين صاحبه ومين بنته وكده ...وشوية هزروا وكده لحد اما وصلوا قاعة الافراح
فرحات ووالده دخلوا القاعة ....
العميد عصمت : اهلا اهلا احمد بيه
والده : اهلا عصمت باشا ...والف مبروك وربنا يتممها ع خير .
عصمت : ابنك ده ؟؟
فرحات سلم عليه ...والده : اها ابني الكبير
عصمت : عقباله اما تفرح بيه ...اتفضلوا اقعدوا معانا في الترابيزة اللي قدام ..هي المدام مجتش ليه ؟
والده : والله هي تعبانة جدا ومقدرتش تيجي
عصمت : الف سلامة عليها
والد فرحات كان في الجيش وكان رتبته رائد لكن تقاعد وكذلك العميد عصمت .
والد فرحات راح مع عصمت يسلم ع العروسة والعريس ..وفرحات واقف قدامهم ومش عارف يعمل ايه يروح يسلم ولا يعقد ولا يعمل ايه بالظبط
فضل متردد لحد اما والده شاورله
فرحات سلم ع العريس بايده وباركله ...
فرحات راح ناحية العروسة وحط ايده ع صدره وانحني وهي مدت ايديها ع اعتقادها انه هيسلم عليها ..وبعدها سحبت ايديها واسلام حس انه حرجها وبعدين راح يعقد جنب والده في الترابيزة اللي فيها عصمت و زوجته ...
فرحات مضطرب شوية وافتكر حد عزيز عليه كان بينه وبينه علاقة حب قديمة لكن مرت عليه كشعور غريب وفرحات تجاهله .....
في بنت دخلت القاعة وبتسلم ع اصحابها تقريبا او قرايبها ..فرحات بص عليها وبعدها هي لفت وشها .
فرحات اتفزع وفضل يبصلها جامد وبعدها طلع التلفوم بتاعه وعمل نفسه مشغول بيه وهو مضطرب جدا و حاسس انه عايز يهرب ويمشي ...شعور بيقوله انها هيا ....قربت شوية وراحت للعروسة والعريس
عصمت : ديه بنتي الصغيرة بقا حياة
والده : ماشاء الله ربنا يحفظها وعقبالها
فرحات عامل نفسه متجاهل ...بس هي قربت ناحية الترابيزة
حياة بابتسامة: اهلا عاملين ايه ؟!
عصمت : يابنتي سلمي ع الناس😂😂 ده عمك احمد وده ابنه فرحات
حياة بابتسامة ومدت ايديها : اها معلش ازيك ياعمو 😅
مدت ايديها لفرحات : ازيك
فرحات بيبصلها جامد ومش مصدق ...مركز ع عينيها وبيبص ع وشها كأن فيه لوحة خرافية مرسومة
حياة بابتسامة: طب هتسلم ولا ايه 😅؟
فرحات سلم عليها باطراف صوابعه
وبعدها جت بنت عمتها وابن عمها واخوها وملوا الترابيزة
اصحاب العريس خدوه ووقفوا في دايرة كبيرة في نص القاعة وبداوا يرقصوا ويشيلوه ..ع الاغاني والمهرجانات اللي فرحات كان بيكرهها جدا
بص فرحات مكنش مركز خالص مع اي حاجة غير حياة بس كان عامل نفسه متجاهل وبيبص كل فترة ع تلفونه
حياة : هو مين فيكوا بيعرف يرقص رقصة التانجو ...اكيد مفيش حد ؟!🤔
كل اللي في الترابيزة سكتوا وبعدها
فرحات : انا بعرف ولكن ولا المكان المناسب ولا في مساحة متاحة لده
كله بصله ...حياة : طب انت اتعلمتها من مين ورقصتها قبل كده ولا لا ؟؟
فرحات : اتعلمتها من كذا فيلم او فيديوهات تعليم الرقصة ديه ...رقصتها مع مين بقا ..فانا رقصتها مع اخويا يوسف
كله سكت وبعدها ضحكوا كلهم
حياة : طب تعالي ...وانا هعلمك وهشوفك بتعرف فعلا ولا لا بس اول مرة اقابل حد مهتم بالرقصة ديه 😅☺
حياة قامت وكلمت العريس وفرحات واقف بعيد
حياة بتشاور ع فرحات فالعريس بصله واصحابه كمان ...فرحات كان بيتخض او بيضطرب لما كذا حد بيبصله بس هو كان مركز معاها فمكنش شايف غيرها في القاعة ...
اصحاب العريس قعدوا مكانهم والعريس قعد جنب عروسته
العروسة : هي اختي هتعمل ايه ومين اللي معاها ده ؟؟
العريس : بصي والله انت اكتر واحدة عارفة هبل وجنون اختك ...فربنا يستر
حياة فرحات الفصل الثاني
اسراء : مممم وعملت ايه بعد كده ؟؟ عرفت ترقص ؟
فرحات : اها ...يعني هي قالت عليا محترف بعدها 😅...بصي ....هي كانت شعرها مموج وجميل وعينيها جميلة جدا ...ولابسة فستان بمبي طويل وكان روعة عليها .
اسراء ابتسمت : طب ليه كنت بتصبلها كتير وكنت مركز معاها ومضطرب ؟؟
فرحات سكت شوية : كانت شبه صورة طبق الاصل من واحدة كنت بحبها زمان وسيبنا بعض .
حياة : تعالي
فرحات راحلها ووقف هي و هو ع الدايرة الكبيرة ...
حياة : هتعرف ترقص ولا هتفضحنا 🙂؟
فرحات بص لعينيها كتير وهما قريبين من بعض ...
حياة باستغراب : هو في اي يابني ....مالك انت تعبان ولا حاجة ؟!
فرحات لف وشه الناحية التانية واتنهد وبعدها قالها : خلاص مفيش حاجة شغلي موسيقي التانجو
حياة بصوت عالي : موسيقي التانجوو
فرحات حاول يخرج من اوهامه وكل الشعور اللي حاسس بيه ويحط كل حاجة وراااه وميشوفش غيرها بس في القاعة مع ان والده مسببله اضطراب دايما وبيخليه مش واثق في نفسه وخايف ...كانه طفل
الموسيقي اشتغلت وبداوا الاتنين يرقصوا فرحات مسك ايديها وهي خدت ايده وحطيتها ع وسطها وهو غمض عينه للحظات وبعدها اتنهد تاني ... وهي حطت ايدها ع كتفه وبداوا يرقصوا وهو بدا ينسي كل حاجة ويتحرك ويرقص تلقائي وببراعة كأن مفيش غيرهم في المكان و ويوديها ويجيبها ويلفها ويقربها ناحيته و ينزلها ع دراعه ويبص في عينها للحظات ويقومها تاني وهكذا وحركة الرجل ..وكان ساعتها شعور فرحات مش طبيعي فرحة ممزوجة بخوف واضطراب .
خلصوا الرقصة ع انها حطيت ايديها ع كتفه وهو قربها ناحيته وفضل يبصلها وبعدها سابها ونزل من الدايرة ..لان مفيش حد سقف ...بعد لحظات بنت عمتها سقفت وبعدين اخوها وبعدين الكل سقف وفرحات راح قعد ع طول جنب والده ع الترابيزة
والده مش مصدق اللي عمله ده ...مش مصدق ان ابنه بيعرف يرقص اصلا ...لان فرحات بيكره الرقص من صغره وبيشوفه حاجة هايفة ومتخلفة .....بس تقريبا كان قصده ع الرقص البلدي 😂.
حياة جت قعدت ضحكت : لا طلع محترف 😅😅
كله ضحك وبعدها بشوية
ابن عمها : فرحات ...متقوم بينا نتمشي بره شوية
فرحات : ماشي مفيش مشاكل ..اتفضل
فرحات ماشي مع ابن عمها وحاسس انه هيقوله حاجة بسبب حياة ...بالاضافة انه كان بيكلم معاها كتير طول مهو قاعد حتي من اول مادخلوا القاعة .
ابن عمها : ايه الابداع ده ...برافو عليك جدا 👏
فرحات بابتسامة : متشكر جدا
ابن عمها : اتكلمتوا في حاجة بقا ؟
فرحات : مش فاهم
ابن عمها : الاول انا نسيت اعرفك بنفسي انا اسمي حازم ..صاحب شركة استيراد وتصدير هنا في العاشر ....وطبعا ديه صاحبها والدي الله يرحمه وخدتها انا .
فرحات : اها ..الله يرحمه وربنا يسعدك ....بس برضوا معرفتش في حاجة ؟؟
حازم : لا مفيش حاجة ...هو انت مضايق من الهوا هنا ...ده حتي احسن من الكتمة جوه 😅
فرحات ابتسم: ماشي ...بس اقصد حضرتك عايزني في حاجة مهمة يعني ؟
حازم بيطلع سيجارة : الصراحة اها ...انت تعرف حياة منين ؟!
فرحات : معرفهاش انا لسه اول مرة اقابلها النهاردة وبعدين معرفتش غير اسمها بس وده من والدها العميد عصمت
حياة وبنت عمتها خرجوا من القاعة ووقفوا بعيد وبيتكلموا ...
حازم بص عليهم وفرحات كمان : مممم ماشي ...بس يعني حاول ملكش دعوة بيها وهي لو كلمتك صدها ...ديه مجنونة ..بتحب ع نفسها ففكك منها
فرحات رفع حواجبه وبصله بغضب : حضرتك تقصد اي بالظبط انا مليش علاقة بحد ان كان بيحب ولا مش بيحب انا جاي هنا عشان الاصول مش اكتر ومع والدي ...ايه دخل كلامك ده دلوقتي ؟؟
حازم : اهدي ع نفسك بس كده في ايه ...انا بس بقولك احسن تقع ...وانا خايف عليك
فرحات : متشكر ...حاجة تاني ؟
حازم : لا ...ورمي السيجارة ودخل جوه القاعة
فرحات فضل بره ...دماغه عمالة تودي وتجيب ...فرحات مش عايز يدخل في مووايل وحوارات ...مع انه بيحب ده ...بيحب العناد والتحدي والمغامرة و انه يعمل يطبق اللي في خياله في الواقع ....بس فرحات قال لنفسه : اهدي ...ملوش اي لزمة اللي بتقوله ده ...وسيبك من اللي قاله ...ومتتعلقش بحد ..ده مجرد لقاء وصدفة و هيروحوا لحالهم ...ربنا لو كاتبلك خير فيها ....هتكسبها ...مش كاتبلك خلاص ..فمتعلقش نفسك بحد .
انت واقف كده ليه هنا ؟! ...حياة راحت لفرحات
فرحات : ايه ...لا عادي ..واقف بشم هوا عادي
حياة سكتت شوية : هو حازم قالك حاجة ؟؟
فرحات : لا ...عادي كان حابب يتعرف عليا بس
بس هو انتم مخطبوين او بينكم علاقة ؟!
حياة باستغراب : لا خالص ...هو قالك حاجة ؟!
فرحات : لا بس بسأل بس
حياة : يابني قول قالك حاجة ؟؟
فرحات مضطرب : لا مقليش حاجة ..وبعد اذنك ..انا داخل القاعة
حياة : ماشي .
فرحات دخل قعد جنب والده ..وبعدها بشوية كلهم دخلوا وقعدوا ....وفي الشوية دول فرحات كان هيتجنن كان عايزها تفضل قدامه ..ومش عايزها تغيب كتير ...و حاسس انه زعلها لما سابها ودخل ...كذا شعور وكذا تفكير بيدور في عقل فرحات وقلبه خايف ومضطرب لحد اما حياة رجعت ..بدا يهدأ خالص ومش مركز غير معاها هيا ....
اسراء : انت حبتها ؟؟
فرحات : ساعتها ممكن يكون اعجاب او ...عشان شبه الحب القديم 😅
اسراء : انت كده عايز تنساها بديه ولا ايه ؟
فرحات : لا ...انا ساعتها كنت مضطرب وكنت محتاج وقت اصلا افكر انا اعمل ايه ولا هفكر ازاي .
الفرح خلص وكله روح ..ومفضلش غير فرحات ووالده و حياة و عصمت و حازم و اخو حياة طارق و بنت عمتها نسرين .....والعريس والعروسة طلعوا شقتهم والباقي مروح خلاص
حياة بتكلم نسرين ....و فرحات ماشي جنب والده والعميد عصمت ..وطارق وحازم مع بعض .
شوية ...فرحات لقي حد بيخبط ع ضهره
نسرين : معلش عايزاك في حاجة ☺
فرحات بصلها : اتفضلي في ايه ؟
نسرين : تعالي ....
فرحات راح معاها وحياة راحت لوالدها عصمت
بعدها والد فرحات خده وروحوا البيت
والده بهزار : من امتا ياااد وانت بترقص !!
ده انا كنت بتحايل عليك ترقص وانت لالا لا الرقص ده هيافة ...اشمعنا دلوقتي
فرحات ابتسم: لا عادي انا بحب رقصة التانجو اصلا
والده : كنت مقضيها انت 😅
فرحات طلع و مسك تلفونه بعد اما الكل نام
وطلع ورقة من جيبه فيها رقم كده
كتبه وكان متاكد انه بتاع حياة وهي اديتها لنسرين عشان طارق وحازم ميحسوش بحاجة
حازم : هو انت اديتي ايه للواد اللي كان معانا ده ؟
نسرين : واد مين ؟
حازم : فرحات
نسرين : مديتلوش حاجة ...وبعدين ده باين عليه غلبان وعبيط خالص ...انا بس كنت بقوله يبعد عن حياة ...عشان انت مشوفتش كان مركز معاها ازاي طول الفرح
حازم : طب كويس
فرحات كتب الرقم ع الtruecaller وطلع باسم حياة عصمت
فرحات : كان شعوري ساعتها ...فرحة مش طبيعية لكن ...كنت بقول انا هدخل حرب جديدة وهعلق نفسي بيها وانا حرمت اني اعلق نفسي بحد ....بس للاسف بعد تفكير كتيير ..مقدرتش ..بس اللي قدرت اعمله هو اني احفظ الرقم ومكلمهاش ولا واتس ولا فون .
اسراء : تفتكر هي كانت بتحبك ؟
فرحات بابتسامة عريضة : هنشوف .
حياة فرحات الفصل الثالث
فرحات سجل اسمها ع تلفونه ..
Hayat Farahat ❤
فرحات شاف صورة الواتس بتاعها حاطة صورة الجميلة ...من كرتون الجميلة والوحش
فرحات قال لنفسه بسخرية : اكيد الوحش يبقا حازم 🙂😅
فرحات راح في النوم ....
قوم قوم الحقني خدني منهم ...
فرحات قام وشافها وعمالة تبعد عنه وهو بيجري عليها عشان يمسك ايديها
اسراء : ابعد عنها يا فرحااات ...ديه مش كويسة
والده : يابني ابعد اياك تلمسها ...هتضييع
حازم بيعمر مسدسه : لو لمستها او قربت منها هقتلك
نسرين: اجري يافرحات ...الحقها هتضيع منك
طارق بيبصله بسخرية ...
حياة : متسبنيش 😢
فرحات جري ...
حازم : 💥💥 رصاصتين
.......
فرحات قام مفزوع من الكابوس ده
والدته : ايه يابني ده كله نوم ؟؟!!!
فرحات استغفر ربنا وهدي شوية : هي الساعة كام ؟
يوسف : الساعة بقت ٣ العصر يعم اصحي .
فرحات قام والكابوس بيتكرر في خياله ...غسل وشه وراح قعد عند الشبابيك المفتوحة لوحده ع الكنبة ..
فرحات : كان جوايا ساعتها شعورين صعاب جدااا ...
شعور بيوحي بخيبة الامل ...وبيقولي انت لو دخلت العلاقة هيحصل زي اللي قبلها ..انت اللي هتضحي بكل حاجة وفي الاخر هي مش هتعمل حاجة ...انت ممكن تتعلق اها وتحبها بس اياك تعترفلها بده ..لانه ببساطة مفيش دليل ع الحب ده ...الحب افعال مش كلام ...فاحسنلك ..تتعامل معاها عادي خااالص وبكل برود ...حاول تبقا قاسي لانك لو معملتش كده هتكون زي اللي قبلها ...وشعور تاني بيقولي خش العلاقة وغامر وحبها وهي اكيد دورت عليك اهو ...يعني شارياك ...فمن الافضل انك تحاول ولو فشلت خلاص مفيش مشاكل ..وبعدين انت لسه متعرفهاش عشان تتعلق بيها ...
اسراء : طب مشيت ورا انهي شعور فيهم ...وبعدين في فرق اللي فاتت كنت انت اللي بدور عليها ...ديه هي اللي بتدور عليك
فرحات بابتسامة : لا ...للاسف اللي فاتت هي اللي علقتني بيها ...وبعدها انا اللي دورت عليها ...بصي انا اتعلمت ..اني معترفش لحد بحبي ..ايا كان ...لان بعدها تلقائي هيعرف انك موجود علطول ..هيعرف انك ملهوف عليه ...فانا من الافضل اني اصبر شوية او كتيير ....مشيت ورا ايه بقا ده اللي هقوله دلوقتي .
والدته : انت قاعد كده ليه يابني لوحدك ...تعالي اعقد معانا ..
فرحات : سبوني شوية مع نفسي ولما افوق هجي اعقد معاكوا .
والدته : ماشي يابني ...انت عملت ايه امبارح بقا 😅 ...
فرحات ابتسم: لا عادي ده اقل حاجة عندي
والدته : ماشي يعم
فرحات فتح تلفونه وبيبص ع الواتس بتاعها ....لقي الصورة اتشالت ...اتخض شوية ...وبعدها ابتسم وقال : شوف قلبك عمل فيك ايه خلاك تفكر انها عملتلك بلوك من غير متكلمك ولا تظهر عندها اساسا ...اهدي كدا ووازن الامور ...
بعدها بشوية ...
يوسف : تعالي يابني جهز معانا الاكل
فرحات : هو انا بقيت ابن الكل دلوقتي 🙂
فرحات قام وحط التلفون في جيبه ...وراح يجهز الاكل معاهم وصبح ع والده وبعدها قعد في جنب كده قدام والده
رقم غريب بيتصل ....
فرحات كتم الصوت وراح بعيد عند اوضته ...ومتحير يفتح ولا لا ..
فرحات مستني الصوت اللي هيرد عليه
المتصل : الو ...ايوه فرحات معايا ؟
فرحات قلبه انقبض وبيدق جامد ...بس عقله مستغرب ايه اللي بيحصل ده : ايوه ..مين ؟
المتصل : انا نسرين يابني مش انت اديتني رقمك امبارح .
فرحات هدي شوية وابتسم : هو في ايه حتي انت مفكراني ابنك .
نسرين مستغربة : بتقول ايه ؟!
فرحات بيتكلم بصوت واطي لانه خايف حد يسمعه ...مش بيعرف يتكلم في التلفون طول ما والده ووالدته موجودين : ايوه ...في حاجة ؟
نسرين : مالك في ايه ...انت بتوشوني ؟؟ متعلي صوتك
فرحات : مينفعش هيجتلوني
نسرين ضحكت وفرحات غصب عنه صباعه شغل مكبر الصوت
فرحات اتخض بعدها واتفزع وقفل السكة بسرعة ..وبدا ينهج وخايف وفي نفس الوقت عايز يضحك من اللي حصل وفي نفس الوقت حس ان ممكن مشكلة تحصل بسبب انه قفل في وشها السكة .
يوسف بغموض : انت بتعمل ايه هنا ؟!
فرحات وشه محمر : مفيش حاجة
يوسف : امال ايه اللي سمعته ده ؟! بتسطرشني ؟!!
فرحات : لا والله بس في فيديو كنت بتفرج عليه
يوسف : استغفر الله العظيم ..فيديو ايه هقول لابووووك
فرحات : يانهار ابييض ...يعم هقولك كل حاجة بس ناكل الاول
والده : ايه يابني كنت بتعمل ايه كل ده ؟؟!
فرحات : مفيش في واحد صاحبي اتصل بيا
والده : صاحبك برضوا ..؟!
فرحات متماسك: اها
كلهم كلوا وخلصوا وفي اللي نام وفرحات صاحي ومتحير يدخل يكلمها ولا يكلم نسرين ؟!
فرحات : ازيك
فرحات بعت الرسالة وهو عارف انه بكده هيفتح ع نفسه حرب نفسية وعاطفية ملهاش اول من اخر .
اسراء : مفكرتش قبل ماتبعت ؟
فرحات : نعم !!! ..ده مفيش لحظة عدت مفكرتش فيها بس كل اما افتكر حاجة من القديم اخااف تتكرر مع ديه ..لان كده يبقا معملناش حاجة وهنتعب ع الفاضي .
اسراء : لا ...انت اللي كنت غلطان في العلاقة الاولي اصلا .
الساعة ١٠ فرحات فتح الواتس
حياة : مين ؟
حياة فرحات الفصل الرابع
اسراء : ثانية بس ....انت اديت رقمك لنسرين مش كده وهي اديتك ورقة فيها رقم حياة ...طب ليه هي مديتش رقمك لحياة وخلصته ؟؟
فرحات : لا ....حياة كانت عارفة بكل حاجة ..بس كانت عايز تعرف شخصيتي من بعيد يعني ...كانت عايزة تشوف ان كنت عاوزها وعاوز اعرفها ولا مجرد صدفة ووقت وخلاص ولا انا مرتبط ولا ايه بالظبط ومن ناحية تانية تعرف معاملتي من كلامي مع نسرين
نسرين اتصلت : مهو من الادب والذوق ان حضرتك تقفل في وشي
فرحات : لا والله غصب عني ...والدتي تعبت وروحت الحقها .فقفلت التلفون .
نسرين : اها ...الف سلامة طب هي كويسة دلوقتي ؟
فرحات : اها تمام الحمدلله ...فرحات عايزها تقفل عشان يرد ع حياة ..
نسرين : طب انت كلمتها ؟!
فرحات : كلمت مين ؟
نسرين : انت ايه يعم ؟؟ ...حياة مالك ؟
فرحات : اها بعتلها رسالة
نسرين : قولتلها ايه بقا ؟
فرحات : ليه ؟
نسرين : عادي عشان اعرف وبعدين ..ديه مش سهل تتعامل معاها هي مش جريئة زي مانت متخيل ...بس .. هو موضوع طويل ابقا احكيلك عليه ..بس هي ردت ولا لسه ؟
فرحات : لو قفلتي هعرف ردت ولا لا ؟
نسرين : ماشي ...سلام
حياة : مييين ؟
؟؟؟
شكلك بتعاكس ...وانا مش فاضية للاشكال اللي زيك ..بلوك
كل الرسايل ديه اتبعتت وفرحات بيكلم نسرين
فرحات ساعتها حس انه مش عارف يعمل ايه ...يعني كده خلاص ...اتصدق احسن برضوا بلا حب بلا زفت هي لو عايزاك هتكلمك وبعدين هي عارفة اني اللي بكلمها ..طب ليه عملت بلوك ؟؟
نسرين: ايوه ياحياة ...كلمتيه ؟؟/😃
حياة : لا هو بعتلي ازيك وبعدها بعتله كذا رسالة بقول فيها مين فمردش وعمل seen فعملتله بلوك
نسرين بانفعااال : انت متخلفة يابت انت... ايه اللي عملتيه ده ممكن افهم ليه ده ؟؟؟
اها وانا كمان عايز افهم ليه ده ...ليه بقا مكلموش بعض ها ليه ؟؟ ....حازم دخل فجأة وفي ايده كوباية شاي وطبق بسكويت وكحك
نسرين اتصدمت : حياة اقفلي دلوقتي .
حازم : ليه بس تقفل ...كملوا كلام ...انا كده كده مخلصتش لسه الشاي ...انا لما باكل مبسمعش حاجة ...كملوا كملوا
حياة عرفت ان حازم عرف انهم بيوصلوا لفرحات
نسرين : انا مش فاهم انت عايز ايه ؟
حازم مردش
نسرين : مترد
حازم مردش
نسرين : عفكرة حياة مش بتحبك
حازم : بس انا شايل منك ...بقا تكدبي ع اخوكي وتقولي انك بتبعدي الواد فراخااات ده عن حياة ...وكنت لسه بقول قد ايه انت اخت عظيمة الاقيكي بتقربيهم من بعض ...لا زعلان منك اووي الصراحة ..وشرب الشاي
نسرين مش عارفة تعمل ايه : بص ...انت عايز ايه ؟
حازم : قسما بالله يا نسرين ...لو عرفت انهم بيكلموا بعض وانت بتقربي منهم انا هوريكي ايام سودة لانك انت السبب. ..تمام ؟؟
نسرين سكتت ودخلت اوضتها
نسرين كانت شخصية طيبة جدا ...لكن شيطانة في نفس الوقت لو حد استفزها ...او ضايقها ...كانت لونها قمحاوي وشعرها ناعم جدا .
اما حازم ..فكان شعره بيحب يصبغه ابيض دايما وبيلبس نضارة نظر ...وكان مليان شوية .
فرحات اتصل بنسرين ...نسرين كنسلت عليه
وبعتتله رسالة عالواتس : كلمني عالساعة ٢ كده ...متبعتش اي حاجة دلوقتي ولا تتصل
فرحات شاف الرسالة ...وكان كل شوية يدخل ع رقم حياة وكأنه مستني انها تفك البلوك ...
اسراء : وفكيته ولا ايه اللي حصل وعملت ايه مع نسرين ؟
فرحات : نسرين☺ ...نسرين كانت الامل اللي بتسند عليه دايما تقريبا نقذتني في مواضع كتير و ساعدتني كتيير جدا ...كنت بقول لنفسي دايما ان اي علاقة فيها طرف تالت بتفشل ...لكن المرة ديه ديه الحاجة الوحيدة اللي تقدر توصلني لحياة وتعرفني بكل صغيرة وكبيرة خصوصا انهم اصحاب جدا وقد بعض في السن
اسراء : هما كانوا عارفين سنك ؟؟
فرحات ابتسم: اهي ديه المصيبة اللي كان احتمال اقع فيها وتضيعلي كل اللي بعمله ...لاني هما معتقدين اني كبير ...وانا معرفش سنهم
اسراء : مسالتش نسرين ليه ؟؟
فرحات : الساعة ٢ بقا
الساعة ١:٣٠ ..
نسرين : في حاجة ولا ايه كنت بتتصل ليه ؟
فرحات : كنت عايز اتكلم معاكي في حاجة ...هي عملتلي بلوك ده علاجه ايه ؟!
نسرين : 😅😂 علاجه ايه
بص انت عايز تكلمها ولا لا ؟
فرحات فكر شوية قبل مايبعت ومش عارف يقول ايه : عايز اكلمها اعرفها عادي
نسرين : مش فاهمة ..يعني عايز تكلمها ليه ؟
فرحات بدأ يتظاهر انها مش فارقة معاه : اولا انت اللي اديتيني رقمها .. يعني هي اللي عايزة تكلمني ...ومعني انها عملت بلوك يبقا كده بتلعب معايا بقا ؟
نسرين : انت عرفتها الاول انت مين ؟
فرحات : لا ما الله يباركلك انت اتصلتي بيا ساعتها
نسرين : اهاااااا ...طب خلاص انا هتصرف
فرحات : طب ممكن اعرف هتعملي ايه ؟
نسرين : ملكش دعوة بقا انا هقولها انك كنت بتكلمني .
فرحات : طب هي مش هتزعل ؟
نسرين : تزعل ليه ؟
فرحات : اني كلمتك يعني
نسرين : انت عسل يا فرحات 🙂
خش نام واستغطي كويس ...اهااا نسيت اقولك ..هي قالتلي عفكرة انك عبيط خالص ...تبقا اجمد شوية كده ☺😅 ....انت بتشرب سجاير ؟!
فرحات : لا طبعا ولا اي حاجة
نسرين : لا هي بتحب اللي بيشربوا سجاير جدا ....وخلي بالك هي بتحب الروشيين فظبط شعرك الغريب ده ...وانا هكلمهالك وممكن اخليكوا تتفقوا ع معاد تتقابلوا فيه مع بعض اشطا ؟!
فرحات : ماشي ...بس انا مش فاهم كلامك كويس يعني ايه بتحب اللي بيشربوا سجاير وشعري ماله وفي كلام غريب قولتليه ده ليه وازاي ممكن افهم ؟!
نسرين اتصدمت : حاااازم انت ماسك تلفوني بتعمل بيه اييييه ؟! يتبع الفصل الخامس اضغط هنا