رواية أصبحت أسيرته بقلم سمسم الكاتبة سماح نجيب كاملة جميع الفصول عبر دليل الروايات
رواية أصبحت أسيرته الفصل الأول
فى منزل هادىء يخيم عليه الحب والمودة بين افراده
زينب.. تالين اصحى بقى يا حبيبتى
تالين بنوم.. خمس دقايق بس ياماما
زينب.. يلا يا حبيبتى بلاش كسل هتتاخرى على جامعتك
تالين.. حاضر هقوم اهو
زينب....يلا بسرعة على ما الفطار يجهز
تالين....حاضر
فاقت تلك الجميلة من نومها وصلت فرضها وتجهزت لذهابها الى الكلية فهى طالبة بالسنة النهائية بكلية التربية
تالين....صباح الخير يا زوزو
زينب....صباح النور يا قلب زوزو
تالين....بابا فين
زبنب....بيلبس علشان يروح الشغل
تالين....بسام صحى ولا لسه نايم
زينب....روحى صحيه مش راضى يقوم
دخلت تالين غرفة اخيها الذى يصغرها ب3سنوات
تالين.....بسام اصحى يلا
بسام.....مش عايز اقوم
تالين..... بقولك قوم دا انت لسه اول سنة فى الكلية ومقضيها نوم
بسام..... انا فاشل يا ستى سبينى انام
تالين.....هتقوم ولا ادلق عليك مايه
بسام.....خلاص قايم ياقمر انتى ايه الصباح العسل ده
تالين.....مش مرتحالك عايز ايه
بسام.....ولا حاجة يا قلبى
تالين.....قلبك يبقى كده عايز فلوس
بسام.....اوعى تفهمينى صح
تالين.....عيب دا اللى ربى خير من اللى اشترى
بسام.....اللى ربى بتاع مربى
تالين.....بس ويلا بقى
خرجت تالين من غرفة اخيها ورأت والدها
تالين...... صباح الخير يا بابا
جلال.....صباح النور يا قلب بابا انا مش عارف لما تتجوزى مين هيصبح عليا الصباح العسل ده
تالين....... متخافش هتلاقينى كل يوم جيالك اصبح عليك
جلال.....بقى كده الواد مروان ياخد حبيبة قلبى منى
بسام.....اه متفكرنيش كل ما افتكر ان اختى القمر دى قربت تتجوز ببقى نفس اغز مروان هههههه
تالين.....تغزه طب اعملها كده
جلال..... الصراحة احنا مش متخيلين البيت هيبقى من غيرك عامل ازاى
زينب.....يلا بقى افطروا ومش كل شوية تتكلموا فى الموضوع ده
تالين.....عايزة تسربينى انتى يا زوزو
زينب......اخص عليكى دا انتى بنتى حبيبتى
تالين.....سلام بقى علشان الحق محاضراتى
......فى الجامعة
سمر.....دا انتى مواعيدك زفت سيبانى كل ده لوحدى
تالين.....جتلك اهو يا جميل روق
سمر.....يلا احنا احسن ما الدكتور يروقنا
بعد انتهاء المحاضرات
تالين.....سمر تيجى معايا مروان جاى علشان هنروح نشترى شوية حاجات للشقة
سمر..... لاء مش جاية اصل خطيبك مبنزلوش من زور ولا انا كمان
تالين.....بس يابت دا عسل
سمر.....عسل اسود
تالين.....على دماغك يا سمر
سمر.....بحبك وانت متنرفز ياقمر
عادت تالين الى منزلها واستعدت للقاء خطيبها مروان
مروان.....جاهزة يا تالين
تالين.....ايوة
مروان.....عن اذنك ياعمى انا هخرج انا وتالين علشان نتفرج على الموبيليا
جلال.....ماشى متتأخروش وخدوا بسام معاكم
خرج مروان وتالين وبسام كان مروان يريد الخروج بمفرده مع خطيبته ولكن والدها يصر على خروج اخيها معها
مروان.....ماتروح تشرب عصير يا بسام
بسام..... شكرا مبحبوش
مروان....طب كل لب
بسام.....مبكلهوش
مروان..... وبعدين فيه ده
بسام.....ريح دماغك مش هتعرف توزعنى اصل انا بطبيعتى غتت
مروان .....لاء ماهو واضح
تالين.....وبعدين يلا علشان نتفرج على الموبيليا
مروان.....ماما قالتى على محل حلو اوى
تالين....هى ليه مامتك مصرة انها تخترلنا كل حاجة حتى الوان الشقة هى اللى اخترتها وانا سكت علشان معملش مشاكل
مروان......وماله ذوق ماما
تالين......هو انا هتجوزك انت ولا هتجوز امك
مروان ....انتى عارفة انا مقدرش ازعل ماما
بسام بهمس لتالين......مقولتلك ده ابن امه مصدقتنيش
تالين.....بس بقى علشان انا على اخرى
مروان.....بتقولوا ايه
تالين....ولا حاجة يلا بينا
قامت تالين باختيار غرفة نوم
مروان.....لاء ماما مبتحبش اللون ده
بسام......الله يخرب بيت امك
تالين....والله هى هتبقى اوضتى انا ولا بتاعتها هى
بس خلاص انا قفلت من المشوار يلا نروح
بسام.....يلا يا اختى ياحبيبتى نلحق نتفرج على المسلسل الكورى تصبح على خير يا مروان وابقى سلميلى على امك
انا مش عارف انتى سكتاله ليه
تالين.....بس هو قلبه طيب
بسام.....قلبك ابيض يا اختى يلا نطلع ننام
كان ميعاد زفاف مروان وتالين بعد انتهاء تالين من دراستها الجامعية
.......
فى احد الايام
عاد بسام الى المنزل فى حالة يرثى لها من الخوف والقلق ولاحظت تالين ذلك فذهبت الى غرفته
تالين...... بسام مالك فى ايه
بسام.....ها مفيش
تالين..... لاء بجد فى ايه مال وشك اصفر ليه كده
بسام.....فى مصيبة يا تالين وهروح فى داهية
تالين.....مصيبة ايه يا ابنى انطق وقعت قلبى
بسام.....الموضوع حصل من سنة كنت انا ونادر صاحبى راكبين العربية بتاعته والفرامل كانت بايظة فخبطنا ولد احنا افتكرنا انه اتعور وخلاص ونادر جرى بالعربية ولما محصلش حاجة افتكرنا انها كانت حاجة بسيطة وزمانه بقى كويس بس اكتشفنا ان الولد ده مات وابوه فضل يدور على اللى عمل كده لحد ما وصل لنادر فهو قالى انه مصر يخلينا نتحبس ونادر سافر لاخوه بره وهرب وانا مش عارف اعمل ايه والله العظيم هو اللى كان سايق وانا اللى دلوقتى هروح فى الرجلين بسببه
كانت تالين تستمع لاخيها بعيون متسعة من الصدمة
تالين......وهتعمل ايه دلوقتى لو بابا وماما عرفوا هيروحوا فيها هما مش لازم يعرفوا على ما نشوف حل
بسام ببكاء.....مش عارف يا تالين مستقبلى هيضيع
تالين....قول لابو الولد انك ملكش ذنب وانك مكنتش انت اللى سايق
بسام.....مظنش انه هيسمعنى دا طلع راجل صاحب نفوذ وواصل اوى يعنى انا خلاص ضيعت ومستقبلى راح
تالين.....احنا لازم نشوف حل بس هنعمل ايه دلوقتى
بسام.... مش عارف انا حاسس انى جالى شلل فى التفكير
تالين.....اسمه ايه ابو الولد ده يا بسام
بسام....عايزة تعرفى ليه
تالين.....يمكن اروح افهمه انك ملكش ذنب و ان انت برىء
بسام......نادر قالى ان اسمه چواد النصراوى
تالين.....خلاص انا هحاول اروح اقابله ونشوف حل
حصلت تالين على عنوان والد الطفل وذهبت الى لقاءه وكانت تدعو الله ان يوفقها فى مهمتها وان تقنع هذا الرجل ببراءة أخيها
.......
فى قصر چواد النصراوى
تالين....لو سمحت عايزة اقابل چواد بيه ضرورى
الخادم.....اتفضلى حضرتك وانا هديله خبر حالا
دخلت تالين الى غرفة المكتب يتملكها القلق والخوف من هذه المقابلة فماذا سيحدث إذا رفض الاستماع إليها فهى ستفعل المستحيل من اجل حماية اخيها وحماية مستقبله
...........
انفتح باب الغرفة ودخل رجل ذو ملامح صارمة وبرغم من وسامته الى ان تعبيرات وجهه تنطق بالقسوة والقوة
احست تالين بجفاف فى حلقها
تالين.....حضرتك انا جاية اقابل چواد بيه هو يبقى والدك
وانتى عايزة تقابليه ليه فى حاجة
تالين....فى موضوع مهم عايزة اكلمه فيه
خير موضوع ايه اتفضلى قولى
تالين...لاء لازم اتكلم معاه فيه شخصيا
قوليلى وانا هبقى اقوله كل اللى انتى عوزاه
تالين.....حضرتك لازم هو اللى يسمعنى
اعتبريه سامعك
تالين بنرفزة....وبعدين بقى ما تقولى هو فين وتخلصنى إيه ده
هو انتى جاية تعلى صوتك عليا هنا فى بيتى
تالين.....ما هو انت مش راضى تناديلى چواد بيه والدك ومصر انت اللى تعرف عيزاه ليه
ماهو انا ابقى چواد بيه والدى واللى حضرتك عايزة تتكلمى معاه
انصدمت تالين فكانت تتوقع ان يكون چواد فى الخمسينات من عمره ولكن من يقف امامها شاب ربما فى بداية الثلاثينات
تالين...هو هو حضرتك چواد بيه
چواد.....ايوه انا خير يا آنسة كنتى عيزانى فى ايه
تالين..
أصبحت أسيرته الفصل الثاني
تالين.....هو هو حضرتك چواد بيه
چواد.... ايوة انا خير يا آنسة كنتى عيزانى فى ايه
تالين....انا انا
چواد.....انتى ايه
تالين....اصل اصل
چواد....هو فى ايه انتى جاية تفقدى الذاكرة هنا
تالين.....انا بس مش عارفة ابدأ منين
چواد....من اى حاجة بس بسرعة علشان انا مش فاضى
تالين....الصراحة انا ابقى اخت شاب من الشابين اللي انت بدور عليهم
چواد.....انتى بتقولى ايه
تالين....ايوة بس انا جاية لحضرتك علشان اقولك اخويا برىء وملوش ذنب دا صاحبه الندل اللى عمل كده وهرب
ازداد قسمات وجهه قساوة لدى سماعه هذا الكلام
چواد....وانتى عندك الجرأة انك تقوليلى الكلام ده
تالين.....علشان انا اخويا برىء
چواد.....وانا ايه اللى ياكدلى ان الكلام ده صحيح احب اعرفك ان اللى كان السبب فى موت ابنى مش هرحمه
تالين....والله حضرتك اخويا اصلا مبيعرفش يسوق
چواد.....شىء ميخصنيش مش كان موجود فى العربية اللى كانت السبب فى موت ابنى
تالين.....بس كده حرام شاب زيه ومستقبله يضيع بسبب حاجة هو معملهاش
چواد.....دا بقى هيبقى شغل النيابة تعرف هو مظلوم ولا لاء
تالين......ارجوك بلاش النيابة دا بابا عنده القلب لو عرف هيموت فيها
اثناء تحدثهم دخلت شابة جميلة ترتدى ثياب تكشف اكثر مما تستر
تالين فى سرها....استغفر الله العظيم
چواد.....فى ايه يا ديما
ديما.... جيدو حبيبى كنت فين كنت بدور عليك
چواد بغيظ.....قولتلك 100مرة بلاش الاسم الرخم اللى انتى بتقوليه ده انا مش طفل فى الحضانة
ديما.....حبيبى بطل عصبية بقى وتعالى معايا
چواد....انتى مش شايفة انى مش فاضى
ديما.....طب هتيجى معايا اغير عربيتى
چواد.....انتى فكرانى البادى جارد بتاعك
ديما.....مش هتبطل قسوة بقى يا جيدو
چواد.....ديما
ديما.....نعم يا عيون ديما
چواد.....اطلعى برا
ديما....متوحش بس بموت فيك
كانت تالين تتابع الموقف كانها تشاهد التليفزيون
تالين فى سرها.....هى فقرة العشق الممنوع دى مش هتخلص
چواد....اطلعى برا يا ديما وتانى مرة بلاش لبسك المستفز ده
ديما.....ماله دا احدث موضة
چواد.....صبرنى يا رب
تالين....لو سمحت بقى يا استاذ جيدو عايزين نخلص موضوعنا
چواد..... انتى قولتى ايه
تالين.....سورى بس اتلغبطت
چواد....طب حضرتك نكمل كلامنا بعدين علشان مش فاضى
تالين..... امتى يعنى
چواد.....بعد اسبوع
تالين.....ايه اسبوع كده كتير
چواد....ده الميعاد اللى فاضى فيه مع السلامة يا آنسة
خرجت تالين يتملكها شعور بالاحباط
.......
فى منزل تالين
بسام....عملتى ايه ياتالين طمنينى
تالين.....ولا حاجة كنا بنتكلم دخلت واحدة باينها مراته فضلت تتدلع وتتمايص ومخلصناش
بسام.....وبعدين
تالين.....لسه هروح له تانى بعد اسبوع
بسام.....انا لسه هستنى اسبوع بحاله دا انا بموت كل دقيقة من التفكير
تالين.....طب اعمل ايه يا بسام فى مصارع الثيران اللى قابلته ده
بسام.....مصارع الثيران مين
تالين.....اللى اسمه چواد ده اصلك مشوفتوش
بسام....احنا مش فيه دلوقتى احنا فى المصيبة اللى احنا فيها
تالين.....مفيش قدامنا غير ان احنا نصبر على الاسبوع ما يخلص
........
فى الجامعة
سمر.....تاليييين
تالين....فى ايه يا سمر
سمر....بقالى شوية بكلمك وانتى فى عالم تانى
تالين......معلش يا سمر اصل دماغى مشغولة
سمر.....دا كله علشان الاستاذ مروان
تالين.....انتى ما تصدقى تيجى سيرة مروان علشان تشتمى هتبقى انتى وبسام
سمر..... والله عنده نظر الواد بسام ده
تالين..... بسام شكله كده هيلبسنى فى حيطة
سمر......حيطة ايه هو فى ايه بالزبط
تالين.....مفيش انا هروح
سمر.... والمحاضرات اللى عندنا
تالين.... مش قادرة اقعد انا ماشية سلام
سمر.....مع السلامة
.......
فى المنزل
جلال.....مالك يا تالين اليومين دول سرحانة ومش مركزة
تالين....مفيش بس امتحانات الترم قربت وانت عارف رهبة الامتحانات
جلال....وانت يا بسام عندك رهبة امتحان
زينب.....انا مش عارفة هما مالهم اليومين دول مش عوايدهم
بسام....اه ما انت عارف يابابا بقى الامتحانات ومشاكلها
زينب.....من امتى يا بسام دا انت بتروح الامتحانات وترجع فى قمة انبساطك سواء حليت ولا محليتش
بسام....ما هو انا ناوى التزم بقى فى الجامعة
جلال..... ربنا يهديك
زينب.....هو مروان خطيبك جاى النهاردة يا تالين
تالين....ها بتقولى ايه يا ماما
زينب....لا حول ولا قوة الا بالله انتوا ايه اللى جرالكم
تالين.....مفيش يا ماما انتى بتسألى على مروان
زينب....ايوه
تالين.....زمانه جاى
جلال....انتوا عملتوا ايه فى الموبيليا
تالين.....ولا حاجة لسه مخترنهاش
حضر مروان و معه والدته المدعوة عزيزة
عزيزة من غير نفس.....ازيك يا تالين يا حبيبتى
تالين....الحمد لله يا طنط اخبارك ايه
عزيزة.....الحمد لله
مروان....ازيك يا تالين
تالين....تمام الحمد لله نورتونا
عزيزة....مش هتيجى تختارى الموبليا يا تالين
تالين....ماهو لما اخترت يا طنط معجبتش ابنك
عزيزة....اه مروان قالى على لونها بس لونها مش حلو
تالين..... والله يا طنط
عزيزة....اه يا حبيبتى مش حلو انا هاجى معاكم علشان اختار معاكم
احست تالين با ان اعصابها على وشك الانفجار
تالين.....مش دلوقتى يا طنط امتحاناتى قربت ومش فاضية
عزيزة.....وهتعملى ايه بالشهادة ما انتى هتقعدى فى البيت
تالين.....مين اللى قال كده بعد دراستى دى كلها والاخر اقعد فى البيت
مروان.....ماهو يا تالين انا عايز اريحك ومتتعبيش
تالين....انا اللى اقرر اللى يناسبنى مش اى حد تانى
بعد مغادرة مروان ووالدته
بسام....وبعدين يا تالين هتفضلى تستحملى عمايله هو وامه لحد امتى
تالين.....سيبك منهم دلوقتى علشان انا مش فايقلهم عايزين نخلص من مشكلتك انت الاول
بسام....انا اسف يا تالين على انى ورطتك معايا فى الموضوع
تالين....بطل عبط انت اخويا اللى مش هسمح لاى حد ان يلمس شعره منه
بسام....ربنا يخليكى ليا
تالين.....على العموم هانت كلها يومين ونعرف هو قرر ايه
......
بعد انتهاء اليومين
ذهبت تالين مرة اخرى الى قصر چواد النصراوى
تالين.....يارب ساعدنى يارب
دخلت تالين الى غرفة المكتب التى سبق ان دخلتها فى المرة السابقة ولكنه تأخر فى المجىء
تالين.....وبعدين فى حرقة الاعصاب دى بقى انا بقالى ساعة قاعدة
انفتح الباب ولكن وجدت تالين القادم الشابة المدعوة ديما
ديما.....انتى مين
تالين.....انا جاية معايا ميعاد مع چواد بيه
ديما.....ميعاد بخصوص ايه
تالين....دى حاجة بينى وبينه
ديما....وانا عايزة اعرف
سمعت ديما صوت چواد
چواد....مش قالتلك موضوع بينى وبينها
ديما....سورى يا بيبى
چواد....يلا اخرجى برا
ديما بدلع.....مش هتبطل قسوتك دى ابدا
تالين فى سرها.....دى باين عليها من النوع اللى بيحب التهزيء
چواد....قولت برا ياديما وانتى عارفة مبحبش اكرر كلامى
ديما.... خلاص يا قاسى خارجة
بعد خروج ديما
چواد....اهلا يا آنسة هو انتى اسمك ايه صحيح
تالين....اسمى تالين
چواد.....اه انتى كنتى جاية بخصوص ان اتنازل عن حبس اخوكى
تالين.....ايوة لانه والله مظلوم
چواد....قولتيلى بقى انه مظلوم
تالين.....ايوة وملوش ذنب
چواد....انا عندى استعداد اتنازل بس بشرط
تالين....شرط ايه حضرتك لو هقدر على تنفيذه هنفذه طبعا
چواد.....من ناحية هتقدرى فانتى هتقدرى
تالين.....ايه شرطك اتفضل قول
چواد.....عايز ابن بدل ابنى اللى مات
تالين.....وانا اجيبه ازاى ده يعنى
چواد...انك تتجوزينى
تالين بصدمة ......انت بتقول ايه
چواد....بقولك تتجوزينى وتخلفيلى ولد بدل اللى مات
تالين... يتبع الفصل الثالث اضغط هنا