رواية فتاة فى زمن قاسي الفصل العشرون 20 بقلم دودو محمد
 |
| فتاة فى زمن قاسي بقلم دودو محمد |
فتاة فى زمن قاسي الفصل العشرون 20
فى الشركه
نزلت مريم من الشركه وهى متغاظه من معاملة عبدالرحمن ليها ركبت العربيه بتاعتها وشغلتها لاقتها مش عايزه تشتغل خبطت عليها بغيظ وقالت
مريم :- بعصبيه هى نقصاكى انتى كمان هوف بقى هو يوم باين من أوله واتنهدت ونزلت من العربيه وراحت علشان توقف تاكسى بس افتكرت أنها نزلت من غير فلوس خبطت على دماغها وقالت غبيه ما اخدش فلوس معايا ليه وانا نازله هروح ازاى دلوقتى بقى ومراد روح هو كمان وقعدت على حرف عربيتها وقالت شكلى هبات هنا لصبح وقعدت تاكل فى ضوافيرها وتهز فى رجليها بغيظ وفى الوقت ده نزل عبدالرحمن من فوق وشاف مريم واقفه بصلها بقرف ومشى وسابها
عبدالرحمن :- بقرف بنى ادمه مستفزه
مريم :- اعمل ايه دلوقتى مش قدامى غير المستفز ده راحت عنده وقالت انت
عبدالرحمن :- بصلها بقرف وقال ليا أسمى تنادينى بيه
مريم :- والله انا ميشرفنيش اجيب اسمك على لسانى
عبدالرحمن :- امشى بت بدل ما اديكى قلمين يظبطوكى ولسه هيمشى
مريم :- على فكره انت متقدرش تمد ايدك عليا علشان لو فكرت هقطعهالك
عبدالرحمن :- انتى عايزه منى ايه جايه ورايا ليه
مريم :- دعكت ايديها فى بعض وقالت تروحنى
عبدالرحمن :- نعم يا اختى
مريم :- ايه العربيه عطلت ومش معايا فلوس اروح
عبدالرحمن :- وانا مالى ما تولعى جايه ليا انا ليه
مريم :- انت بنى أدم قليل الذوق وانا غلطانه أن جيت ليك اصلا ومشيت وسابته
عبدالرحمن :- بصلها بقرف وركب عربيته ومشى بيها
مريم :- بغيظ اعمل انا ايه دلوقتى واتفاجئت بعربية عبدالرحمن بتوقف قصادها
عبدالرحمن :- اركبى
مريم :- بصت ليه بغيظ وقالت مش عايزه منك حاجه
عبدالرحمن :- انا لو مشيت المرادى مش هرجعلك تانى انتى حره هتركبى ولا لاء
مريم :- بصت ليه بغيظ وراحت تفتح الباب وراه علشان تركب
عبدالرحمن :- والله انا مش سواق الهانم اتفضلى اركبى قدام
مريم :- بصوت واطى غتت وقفلت الباب وراه وركبت جمبه
عبدالرحمن :- انا معملتش كده علشانك فاهمه انا بس لسه فاكر خير امك وابوكى علينا إنما لو عليكى كنت سيبتك مرميه فى الشارع ولا سألت فيكى
مريم :- خلاص عرفنا ممكن تمشى بقى
عبدالرحمن :- اتكلمى عدل بدل ما اعدلك
مريم :- والله هى دى طريقة كلامى وانا حره فيها
عبدالرحمن :- بصلها بغيظ وشغل العربيه وطلع يجرى بيها
مريم :- انت غبى قلل السرعه شويه
عبدالرحمن :- والله عربيتى وانا حر فيها
مريم :- يا بنى أدم هنعمل حادثه
عبدالرحمن :- والله انتى وحظك ليكى عمر هتعيشى ملكيش يبقى الله يرحمك
مريم :- انت بتهزر قلل السرعه ارجوك
عبدالرحمن :- زود السرعه اكتر
مريم :- خافت وصرخت ومسكت فى دراعه جامد
عبدالرحمن :- اول ما شاف مريم عملت كده وقف العربيه فاجئه ومريم وقعت فى حضنه
مريم :- اتصدمت ورفعت راسها وبصت ليه بكسوف وبعدت عنه بسرعه وقالت ا.ا.انت غبى ك.ك.كنت هتموتنا
عبدالرحمن :- اتوتر لما وقعت فى حضنه وقال ل.ل.لمى لسانك وبعدين متخافيش على عمرك يا اختى كلنا هنموت
مريم :- بغيظ انا غلطانه أن ركبت معاك
عبدالرحمن :- مش عجبك انزلى
مريم :- قد ايه انت واحد حقير بتستغل الظروف علشان عارف ان انا محتاجه ليك
عبدالرحمن :- من بعد ما عندكم ناسيه كنتى بتعملى معانا ايه ولا افكرك
مريم :- بصت ليه بغيظ ومردتش عليه
عبدالرحمن :- شغل العربيه بغيظ ومشى بيها وصلها لحد البيت
مريم :- نزلت من غير ولا كلمه ولسه هتطلع
عبدالرحمن :- العفو متشكرنيش علشان وصلتك
مريم :- بصت ليه بغيظ وطلعت تجرى على فوق
عبدالرحمن :- ابتسم وشغل العربيه وروح على الفيلا بتاعتهم
**
فى فيلا علياء
فى اوضت سمر
كانت نايمه على سريرها ووشها كله بيجيب عرق ونفسها سريع كأنها بتجرى من حد ودموعها نازله منها وبتصرخ وتقول
سمر :- ابعد عنى متلمسنيش ابعدوا عنى كلكم حرام عليكم سبونى محدش يقرب منى
وفى الوقت ده دخلت مياده تطمن عليها وشافتها فى الحاله دى قلقت عليها وقعدت جمبها على السرير وخبطت على وشها وقالت سمر ردى عليا يا سمر
سمر :- قامت مفزوعه واترمت فى حضن مياده وهى جسمها كله بيتنفض من الخوف وقالت انا قتلته قتلته
مياده :- بأستغراب قتلتى مين يا سمر
سمر :- بعدت عن حضن مياده وقالت ها د.د.ده كان كابوس
مياده :- اتنهدت وقالت فيكى ايه بس يا سمر عمرى ما شوفتك فى الحاله دى
سمر :- بوجع ودموع مفيش بس موت عمر مأثر فيا شويه
مياده :- انا حاسه اللى فيكى ده بعيد عن موت عمر خالص
سمر :- رجعت شعرها لوراه وقالت انا كويسه يا مياده انتى بس مزودها شويه
مياده :- ياريت تكونى انتى فعلا كويسه وان احساسى ده خوف عليكى مش اكتر
سمر :- بصت ليها بوجع وبصت الاتجاه التانى
مياده :- عمومآ يا سمر انا موجوده فى اى وقت محتاجه تتكلمى فيه ومستعده اسمعك واساعدك فى كل مشاكلك اهم حاجه تخرجى من الحاله دى وترجعى سمر بتاعة زمان الفرفوشه القويه
سمر :- ابتسمت ليها والدموع فى عينيها وقالت ربنا يخليكى ليا
مياده :- ابتسمت ليها وقالت وميحرمنيش منك انتى وأخواتك يارب وقامت وقفت وقالت شويه وهاجى اطمن عليكى
سمر :- ماشى
مياده :- خرجت من الاوضه وقفلت الباب وراها
سمر :- بصت على مياده وهى ماشيه واتنهدت بوجع وفى الوقت ده تليفونها رن بتبص فيه لاقتها انجى اتنهدت وردت عليها وقالت ايوه يا انجى
انجى :- فينك انا خلصت شغل
سمر :- انا فى البيت ينفع تيجى ليا
انجى :- اتنهدت وقالت قوليلى العنوان
سمر :- قالت ليها العنوان وقالت ياريت متتأخريش عليا انا محتاجه وجودك جمبى اوى يا انجى
انجى :- مسافة السكه باى وقفلت السكه معاها
سمر :- قامت بصعوبه من على السرير ودخلت الحمام تاخد شاور
**
عند انجى وهيثم
كان هيثم متعصب وبيزعق لانجى وبيقول
هيثم :- تانى يا انجى سمر محرمتيش من اللى عملته معاكى زمان والمعاملة اللى كانت بتعاملها ليكى نسيتى شادى اللى بسببها ساب البلد ومن ساعتها مرجعش
انجى :- اهدا يا هيثم سمر اللى انت بتتكلم عليها دى مبقتش موجوده اللى كلمتنى دى سمر تانيه خالص شكلها واقعه فى مشكله كبيره ومحتاجه وجودى جمبها
هيثم :- والله يعنى هى متعرفكيش غير ساعة ما تكون واقعه فى مشكله واول ما تتحل هترجع انيل من الاول وبكره تقولى هيثم قالى
انجى :- حتى لو رجعت زى الاول مش مشكله المهم انها وقت ما احتاجتنى وقفت جمبها
هيثم :- بعصبيه انا مش عارف انتى بتفكرى ازاى بس
انجى :- خلاص يا هيثم علشان خاطرى سبنى اعمل اللى يريحنى وحياتى عندك
هيثم :- اتنهد وقال ماشى يا انجى لما نشوف اخرتها معاكى ومع اللى اسمها سمر دى ايه وشغل العربيه وراح يوصلها عند سمر
**
فى فيلا أدم
كانت ملك قاعده فى حضن ادم على السرير وبتشرب السيجاره وماسكه الكاس فى ايديها وادم ماسك الكاس فى أيده وقال
أدم :- انا مش عارف ليه مش قادر اعمل اللى قولتيلى عليه ده اول مره ابقى مش عايز أذى حد
ملك :- انت بس علشان متأثر بموت اخوك بس صدقنى مرات اخوك تستاهل كل اللى هيحصل فيها ده علشان واحده طماعه
أدم :- بس اخويا وصانى عليها يا ملك
ملك :- ما هى كانت واكله بعقله حلاوه وخليته كتب ليها الشركه والفيلا ليها وهى عمرها كانت تحلم تعيش عيشه زى دى اسمع كلامى بس اللى زيها لازم نخلص منها علشان واحده طماعه وبصت لفوق اوى دى مش سهله عرفت تلعب كويس اوى على اخوك
أدم :- اتنهد وشرب من الكاس وقال عندك حق
ملك :- اخدت نفس من السيجاره بتاعتها ونفخت دخانه فى الهوا وقالت ايوه كده انت أدم حبيبى اللى انا اعرفه بس قبل ما تعمل اى حاجه لازم تصلح علاقتك بيها علشان يوم ما يحصل حاجه محدش يوجه التهمه ليك
أدم :- ازاى
ملك :- يعنى تروح تزورها فى الفيلا وتسأل عليها وعلى بنت اخوك وتعرفها أن اللى حصل منك فى. الشركه ده كان غصب عنك علشان اعصابك تعبانه من ساعة ما سمعت خبر موت اخوك وافضل زورها فتره وبعد كده ننفذ ونخلص منها هى واللى فى بطنها
أدم :- يخربيت دماغك السم دى ده ابليس بيرفع ليكى القبعه والله
ملك :- ضحكت بدلع وقالت تربيتك يا بوص
أدم :- اخد من ايديها السيجاره والكاس وحطهم جمبه وقرب منها باسها و(.......)
**
فى المقابر
كانت علياء قاعده جمب قبر عمر وبتعيط ومشيت ايديها على القبر وقالت
علياء :- اااه يا حبيبى واحشتنى اوى الدنيا بقت وحشه من غيرك حاسه بفراغ كبير اوى فى حياتى وانت مش موجود فيها واحشتنى ضحكتك كلامك ليا لما اكون مضايقه ضمتك ليا اللى كانت بتنسينى الدنيا بحالها واتنهدت بوجع وقالت ياريت كنت اخدنى معاك يا عمر ليه سيبتنى لوحدى موجوعه من فراقك يارب ارحمه وصبر قلبى على فراقه وحطت راسها على القبر وقعدت تعيط وفى الوقت ده حسيت بأيد على كتفها رفعت راسها لفوق وقالت انت ايه جابك هنا
مراد :- جيت ازور عمر من ساعة ما رجعت مصر وانا مجتش ليه سألت على قبره وجيت
علياء :- ملكش دعوه بقبر جوزى قبره اشرف مليون مره من أن واحد زيك يجى فيه
مراد :- عمر قبل ما يكون جوزك فهو كان زى اخويا يا علياء
علياء :- انت ازاى كده مخادع وغشاش بالطريقه دى بتعرف تكدب وتمثل بكل سهوله وتقنع الناس بكدبك ده
مراد :- اتنهد بوجع وقال انا ولا كداب ولا مخادع يا علياء انتى متربيه معايا وعارفه أن انا مش كده
علياء :- للاسف انخدعت فيك زى ما الناس كلها مخدوعه فيك صح التمثيل ده موهبه وانت موهوب بدرجة امتياز
مراد :- بعصبيه اسمعينى بقى من يوم اللى حصل ده وانا سايبك تتكلمى ولا مره حاولت اقطعك بس خلاص لازم تسمعينى وتعرفى الحقيقه بقى كفايه ظلم فيا انا مش وحش ولا عمرى كنت وحش لا معاكى ولا مع غيرك اليوم اللى حصل فيه وقطع كلامه لما لاقه علياء اغمى عليها طلع يجرى عليها وخبط على وشها بخوف ولهفه وقال علياء ردى عليا ارجوكى ودموعه نزلت منه وقال بصوت عالى عليااااااااااااء وقام وقف وشالها وطلع يجرى بيها على المستشفى وبعد وقت وصلوا ونزل من العربيه وشال علياء وبص لسواق وقال خليك هنا متتحركش ودخل يجرى بيها حطها فى اوضت الكشف ودخل الدكتور يكشف عليها وخرج مراد بره ووقف وهو قلقان على علياء وبعد وقت خرج الدكتور وراح عنده مراد وقال بخوف خير يا دكتور
الدكتور :- متقلقش ضغطها واطى شويه من قلة الاكل وعلشان هى حامل سبب ليه ضعف عمومآ انا علقت ليها محلول واول ما يخلص تقدر تمشى
مراد :- بأرتياح شكرآ يا دكتور
الدكتور :- العفو وسابه ومشى
مراد :- اتنهد ودخل عندها وقال عامله ايه دلوقتى
علياء :- زفت طول ما انت قدامى مش هبقى كويسه
مراد :- انا لو بعدى عنك هيريحك هبعد علشان اهم حاجه عندى راحتك بس نفسى تسمعينى لو مره واحده تعرفى الحقيقه وانا اوعدك عمرى ما هضيقك تانى
علياء :- انت هتبعد بمزاجك أو غصب عنك يا مراد مفيش حاجه هتغير رأى فيك انت واحد عديم الشرف والاخلاق دى حقيقتك اللى الناس كلها متعرفهاش انا بس اللى عارفه الحقيقه المره دى علشان انا اللى اتحرقت بنارك اتفضل اطلع بره احسن ودينى احبسك ومعايا كل حاجه تثبت انك مجرم ومغتصب
مراد :- بصلها بأستغراب وقال ازاى يعنى
علياء :- يوم اللى حصل خليت الدكتور اثبت الحاله عنده وعمل ليا كل التحاليل اللى تثبت انك انت المجرم
مراد :- وعمر كان عارف ان انا
علياء :- لاء طبعآ عمر لو كان يعرف أن انت اللى عملت فيا كده كان زمانك مرمى فى الشارع زى الكلاب
مراد :- قرب منها وقال انا مستعد اتعاقب واتحبس لو ده اللى هيخليكى تسامحينى وتسمعى منى الحقيقه
علياء :- ابعد عنى أنا مستحيل اسامحك يا مراد انت واحد مجرم فاهم مجرم واتفضل اطلع بره مش طايقه اشوفك قصادى
مراد :- اتنهد وقال انا عارف ان اللى حصل منى ده صعب وانك اتعذبتى بسببى كتير انا اسف يا علياء
علياء :- ابتسمت وقالت اسف ؟! ليه هو انت خبطنى فى كتفى وانت ماشى ولا دوست على رجلى غصب عنك انت عارف انت عملت فيا ايه انت اغتصبتنى يا مراد خسرتنى شرفى اللى كان معنديش غيره وبكل بجاحه جاى تقولى انا اسف تعال ادبحك بسكينه بارده واقولك انا اسفه ولا افقعلك عيونك واقولك اسفه ولا ادوس عليك بعربيتى وادهسك فى الارض وانزل اقولك انا اسفه كل ده ميجيش ربع اللى انت عملته فيا انت قتلتنى وبعد ما قتلتنى قطعتنى قطع صغيره ورمت كل حته منى فى بلد شكل قعد سنين الم اشلائى من كل حته شويه وبعد ما جمعت نفسى وبدأت اعيش طبيعى وانسى رجعت تانى وشوفتك وكل حته جمعتها رجعت ضاعت تانى منى كل ما بشوفك بحس نفس الاحساس كأن اللى حصل من اربع سنين بيحصلى تانى دلوقتى وبعد كل ده راجع تقولى انا اسف انا عمرى ما هسامحك على اللى انت عملته فيا ولا على المعاناة اللى شوفتها علشان اقدر اعيش طبيعى زى كل الناس المغتصبه دى مش مجرد خسرت شرفها وخلاص لاء دى خسرت شرفها ونفسها خسرت ثقتها بنفسها وبالناس بتنسى معنى الضحكه من القلب بتعيش وهى حاسه انها نكره فى وسط الناس بتحس بالنقص فى نفسها انا مهما اقولك على احساسى ايه مش هقدر اوصفلك؛ قد كل دمعه نزلت من عيونى بسببك بكرهك يا مراد بكرهك
مراد :- كان بيسمع كلام علياء ودموعه نازله منه اتنهد بوجع وبصلها بحسره وخرج يجرى من الاوضه وقعد فى الارض زى الطفل الصغير وقعد يعيط ويضرب فى نفسه ويقول غبى غبى غبى وضم رجله عند صدره وحط راسه عليها وقعد يعيط
علياء :- اول ما خرج مراد قعدت تعيط وتفتكر اللى حصل فيها من مراد
**
فى فيلا علياء
وصلت انجى الفيلا وبصت لهيثم وقالت
انجى :- هتمشى ولا هتوقف
هيثم :- هروح اقعد فى اى كافيه هنا لحد ما تخلصى وترنى عليا
انجى :- اوك ونزلت ولسه هتمشى
هيثم :- انجى
انجى :- بصت ليه وقالت نعم
هيثم :- بلاش الطيبه الزياده بتاعتك معاها
انجى :- حاضر
هيثم :- خلى عندك شخصيه قصادها علشان تعرف ان انتى انجى مش بتاعة زمان
انجى :- خلاص بقى يا هيثم فهمت والله
هيثم :- انتى ولا فهمتى ولا حاجه وبقره قدامى روحى يا انجى يلا
انجى :- ضحكت وقالت ماشى باى ودخلت رنة الجرس وفتحت ليها مياده اول ما شافتها قالت
مياده :- انجى ياااااه فينك يا بنتى من زمان وسلمت عليها
انجى :- اهو موجوده بس سمر بقى كانت نهت صدقتنا من زمان من ايام الجامعه
مياده :- سمر دلوقتى اتغيرت خالص يا انجى
انجى :- حسيت بكده لما كلمتنى النهارده
مياده :- انا عارفه انك طيبه واصلك طيب واول ما كلمتك متأخرتيش عليها رغم كل اللى عملته فيكى
انجى :- ربنا يعلم انا كنت بحب سمر قد ايه كنت بعتبرها اختى وزياده والله
مياده :- صادقه يا حبيبتى اطلعى ليها فوق الاوضه اللى على ايدك الشمال
انجى :- اوك عن اذنك وسابتها وطلعت عند اوضت سمر وخبطت على الباب ودخلت لاقت سمر قاعده على السرير وضمه رجليها عند صدرها والدموع فى عينيها قلقت عليها وطلعت تجرى عليها وحضنتها وقالت سمر مالك عامله كده ليه
سمر :- مسكت فيها اكتر وقعدت تعيط
انجى :- دموعها نزلت وقالت أهدى يا سمر فيكى ايه بس
سمر :- بعدت عنها وقالت انا واقعه فى مصيبه سوده يا انجى ومش عارفه اعمل ايه
انجى :- قولى يا سمر عملتى ايه طول عمرك تصرفاتك طايشه ومش بتقبلى النصيحه من حد اتكلمى يا سمر
سمر :- حكت ليها كل حاجه وكانت منهاره وعماله تعيط
انجى :- بصدمه يا نهارى انتى ازاى تعملى حاجه زى كده ده كان واضح اوى أنه بيستغلك ياريت كان استغلك فى الفلوس بس ياريت
سمر :- مش عارفه اعمل ايه فى اللى فى بطنى ده ولا الدكتور اللى قتلته بقيت زانيه وقاتله انا ضعت يا انجى وانتهيت
انجى :- انتى متأكده أن الدكتور ده مات
سمر :- معرفش انا سيبته سايح فى دمه وجريت
انجى :- ممكن يكون عايش ومماتش ولو عايش مش هيروح يبلغ لأن اللى زى ده هيخاف هيقول انتى ضربتيه ليه لو بلغ شغله هينكشف وهيروح فى داهيه المهم دلوقتى الحمل كلها شهرين تلاته وبطنك تكبر والفضيحه تبان كانت دماغك فين بس لما عملتى حاجه زى كده
سمر :- بدموع مش عارفه أنزله ازاى انا خايفه حد من اخواتى يعرف عايزه أنزله من غير ما حد يحس
انجى :- المشكله ان اكتر الدكاتره اللى بيشتغلوا فى موضوع الإجهاض ده وبالذات للى زيك بتبقى عينيهم زايغه وأيديهم طويله
سمر :- ما انا لازم أنزله بأى طريقه يا انجى لازم
انجى :- قامت وقفت وقالت مش عارفه دماغى وقفت بجد طيب حتى لو نزلتى البيبى من غير ما حد يحس هتعملى ايه لو جالك عريس ما دى فضيحه برضه
سمر :- مش عايزه اتجوز ولا اتنيل اهم حاجه انزل اللى فى بطنى ده
انجى :- طيب بصى خلينى الاول أتأكد أن الدكتور ده عايش ولا لاء وبعد كده هفكرك تنزلى البيبى ازاى
سمر :- بسرعه يا انجى
انجى :- حاضر والله
سمر :- هو شادى لسه مرجعش
انجى :- لاء من يوم اللى حصل سافر ومرجعش مصر تانى هو اتجوز ومعاه فريد عنده شهرين
سمر :- بوجع اه ربنا يسعده
انجى :- انا همشى دلوقتى وهكلمك اول ما اروح ماشى
سمر :- مسكت ايديها وقالت انجى بالله عليكى اوعى تتخلى عنى
انجى :- مش انا يا سمر اللى تعمل كده ومعاكى انتى بالذات يلا باى وسابتها ومشيت
سمر :- قعدت على السرير ودموعها نزلت منها وقالت يارب الدكتور يطلع عايش يارب
**
فى شقة عبده
دخل مهند من الباب لاقه عندهم ناس استغرب ودخل وقال
مهند :- السلام عليكم
الكل :- وعليكم السلام ورحمة الله وبركاته
حكمت :- تعال يا ابنى سلم على خالتك ساميه وبنتها انهار
مهند :- سلم عليهم وراح قعد جمب مريم وقال مين دول
مريم :- بتريقه دى خالتك ساميه وبنتها انهار
مهند :- انهار مين بس دى انهيار يا اما
مريم :- ضحكت وقالت فيه حد يقول كده على عروسته
مهند :- عروسته؟! تقصدى ايه
مريم :- بضحك ماما ناويه تخطبها ليك البس يا معلم
مهند :- على جثتى قال انهار قال
حكمت :- طيب تعالى يا ساميه يا اختى عايزه اتكلم معاكى فى موضوع وقامت وقفت وقالت تعالى يا مريم
مهند :- مسك فى مريم وقال لاء سبيها محرم
حكمت :- ضحكت وقالت يوه كتك ايه يا ولا وشدت مريم وقالت قومى اتحركى وقربت من مهند وقالت اتكلم مع البت كويس وسابتهم ومشيت
مهند :- بصوت واطى يا اما انتى يا حاجه وداس على أسنانه وقال ماشى يا اما بدبسينى
انهار:- احم احم
مهند :- ايه عايزه مايه
انهار :- سكرآ
مهند :- قولتى ايه
انهار :- سكرآ
مهند :- سكرآ صلاة النبى احسن
انهار :- خالتى حكمت بتقول انك معاك سهاده فنون جميله
مهند :- جميله انتحرت وماتت محروقه
انهار :- ضحكت وقالت دمك خفيف اوى على فكره
مهند :- سكرآ
انهار :- طيب ليه مستغلتس بسهادك
مهند :- ابوس ايدك متقوليش اى كلمه فيها شين خالص
انهار :- ليه بس
مهند :- انتى مش حاسه بأى اختلاف فى الحروف خالص
انهار :- لاء خالص
مهند :- وكمان حوله منك للى اكلت دراع جوزها يا اما
انهار :- استاذ مهند
مهند :- اممممم
انهار :- ايه اكتر حاجه عجبتك فيا
مهند :- نعم وانا اعرفك منين علشان اعرف ايه احلى حاجه فيكى
انهار :- يعنى قصدى ک سكل عام
مهند :- مقبوله
انهار :- بجد يعنى عجبتك
مهند :- نهار مش فايت بصى انا مقولتش كده انا كنت بجبر بخاطرك وخلاص
انهار :- عاااااااا يعنى انت سايفنى وحسه عاااااا
مهند :- سد انتى ايه مركبه زماره فى زورك
انهار :- انا مس بعجب حد كل السباب سيفانى وحسه عااااااا
مهند :- مش مهم تعجبى حد المهم انتى تكونى واثقه فى نفسك وحابه شخصيتك ده هينعكس على الناس وهتشوفك حلوه زى ما انتى شايفه نفسك
انهار :- سكرآ يا استاذ مهند على كلامك الجميل ده
مهند :- العفو
انهار :- نرجع لموضوعنا اسمعنا انا اللى اختارتها من بين البنات كلها
مهند :- وربنا ما حصل واللى قالك الكلام ده كداب
انهار :- امك
مهند :- وليه الغلط ده بقى
انهار :- مس قصدى والله انا قصدى امك اللى قالت الكلام ده
مهند :- ااااااامى يا عينى على الأم وحنان الام
انهار :- ها رد عليا
مهند :- امك
انهار :- نعم ؟!
مهند :- خدى امك ومع السلامه اصل انا بنام بدرى
انهار :- بصوت عالى قالت ماماااااااااا
ساميه وحكمت ومريم جم يجروا
حكمت :- فيه ايه يا بنتى
انهار :- ابنك يا خالتى بيطردنا من بيتكم
حكمت :- تلاقيه ميقصدش وانتى فهمتى غلط
مهند :- وربنا انا اقصد وهى فهمت صح
ساميه :- كده يا حكمت برضه
مهند :- خدى بنتك انهيار دى ومع الف سلامه معندناش رجاله للجواز
ساميه :- وربنا ما انا قاعده دقيقه واحده فى البيت ده يلا يا بت واخدت بنتها ومشيت
مهند :- بتريقه انهيار متسبنيش يا انهيار اهئ اهئ اهئ
حكمت :- ضربته على كتفه وقالت وليك عين تهزر
مهند :- لاء انا ليا عينين
مريم :- ده انت خساره فيك انهار هو فيه فى جمال انهيار وحلاوة انهيار وطعامة انهيار
حكمت :- بتتريقوا مالها البت ما زى الفل اهى ده انت ربنا هيولع فيك علشان رفست النعمه برجليك
مهند :- انتوا هتلغبطونى ليه بقى هى اسمها انهيار ولا نعمه
مريم :- ههه ظريف كانت لايقه عليك اوى الصراحه
حكمت :- انا فاهمه اللى فى دماغك يا مهند ومبقاش انا لو مكنتش جوزتك
مهند :- انهار يا ماما يعنى اخرتى انهار انا ارجع للحشيش ارحم وربنا دى حوله يا اما بتكلمنى وبتبص لكرسى اللى جمبى
مريم :- بضحك همووووووت وربنا
حكمت :- ماشى يا مهند يا انا يا انت ودخلت الاوضه
مهند :- بغنى يا انا يا انا يا انت وبكره اوريك بعدك غلطه هتشوفها بعنيك
مريم :- ايوه بقى حلاوتك يا جامد
مهند :- بصوت انهار سكرآ
وقعدوا الاتنين يضحكوا مع بعض.. يتبع الفصل 21 اضغط هنا