رواية كحل عرب الفصل السادس والثلاثون 36 بقلم زينب ماجد
رواية كحل عرب الحلقة السادسة والثلاثون 36 (خذلة اخو)
كَلنالك تحذّر ناوراك الذيب
داعيت الضواري وأمّنت بيها
يمصدكَ الاوهام امن البخت حفّاظ
يا حظ .. يا بخت .. لو چرخ سركَيها
(عريان السيد خلف)
اثنين تلاوم اعليه .. و رجال ماشي بدربه ..
ويا ما دججوه .. و هو صاح : ءهلا ولكم بوووووووووويه
ساعة السمعوا حس الزلمه ، ذبو سرحان من اديكم و شردوا ، ركض الزلمة وراهم لجنهم مسرعين ، هدهم ورجع لسرحان ، لكاه فاك عيونه .. وايده اعلى جرحه
وصرخ الزلمه : انا اخوك .. خايب هاذ ابن الشيخ مطر ، خايبن ءهلاه ءهلااااااااه يهالوادم الحكوا اعلينا ابن الشيخ تصااااااااوب
يصرخ و يشيل بيه ، و فزع الديرة اعلى حسه ، تراكضوله شالوه اعلى جتافهم و خذوه للمضمد .. دكدكو بيته و طلعوه خاطر يداويه .
وناس راحو لبيت الشيخ خبروا القصر ، فزعت ازلام القصر بسياراتهم للمضمد لكو سرحان فاقد و المضمد يداوي بيه . كال الهم : اخذو للمستشفى بسرعة الخنجر داش بجسمة و الزوم فحص ومعاينة طبية ياله خياط .
خذوا سرحان وركضوا بيه للمستشفى ..
زناد تسودن .. ياهو الدج اخوي ..
وكف بنص المضيف و حط البيارغ ورفع الرايات و كال الهم ما تنزل الراية الا وناخذ حك اخونا .
لم عمامه و كال الهم: ما اريدن ابوي يعرف بالخبر من كون صحته ما تحمل ، بس لزوم اندور الديرة بيت بيت و صريفة صريفة خاطر نعرف ياهو التطاول اعلى ال ضاحي .
رحيم : السموحة يبو ياسر لجن الوكت موش وكت جعدة مضيف ، سرحان بالمستشفى وما وياه غير حميد و خنجر و جم زلمة من ازلامنا ، و الزوم وكفتكم انت و عمامك ..
زناد : الثار يا عمي .. ما اهدن ثار اخوي و ما يهنالي بال الا و اكص راس التعدى اعلى اخوي .. تريدني اوكف وياه بالمستشفى و جتاله يسرح و يمرررح
صاحو الزلم : لا والله ، حجيك صح .. لزوم ندور الدج سريحان .
خنجر : ها حميد
- ولك يخنيجر كلي شعمل ، سووها و جتلوه .. خايب حيل ما ظل بيه .
- ساعة الكالولي دجو سرحان اجيت اعلى عمى عيني ، ما وجدت دربي و اهيس صدري فرغ اعلى صويحبي ، ياهو الدجه ياهو بس كلي هساعه والله اروحن احزن بلعومه و بلعوم الخلفوه .. وانعلهم شلع هالكواو*يد.
حميد : كلت اله تحذر يسرحان بويه كالي لا ادير بال ، و هاي هو مكابل الموت بسبة استهانته .
- ياهو التشك بيه داج اصويحبي ؟
- سرحان من تسبب بطرد الشيخة و اخذ المشيخة و انكتبت الوصية ، انا كلت الولد راح
- جا غير تكلي يا هم ، زناد يو الشيخة ، ااخذ اعليها لمة كاولية اخليهن يدشن اعليها ويجرجرنها و يجتلنها وانعل ابيها والله .
- حجي هاذ يخنجر ، خلنا ندعي الله يكومه لينا بالسلامة و ساعتها نعرف شنحجي.
الشيخ مريض و بفراشه و ما يدري عن سرحان شي ، ومن يطلبه .. يكلوله طلع لبغداد و ضموا اعليه سالفة دج سرحان .
داوو وخيطوا جرحه و طلعوه بردهة ، لجن ٥ ايام و حالته تسوء ما تتحسن ..
هدية : دايخة و اهيس ارويحتي هشة ، منين ما اميل تفتر بيه الدنيا و جن ارد اطيحن .. الشغل ليفوك راسي لا اكدر اعلى الكعدة .. ولا يرضون ارتاح ، من يطر الفجر ليما تغيب الشمس اعلى فرد وكفة بين الكاع وشغل البيت .
كلش كرهت الاكل و يو شميت ريحة الدهن الحر تضيك نفسي ، و اكومن اذبن معدتي كلها .. لجن اهيس روحي تطلع و انا اذب البطني ..
مدري شمالني
كلت يوم و يومين واطيبن لجن حالتي طالت و صالي اسبوع اعلى هالحال، ايدي ما تاخذ شغل .. وجسمي اهيسنه بايد كلش ، اطني وسادة و كلي نامي .
كطعت الاكل فرد مرة .. من كون اكلهم اكثر شي دهن حر و شكر .. نتريك ونتغدا و نتعشى بيهن حتى التحتومة .. نسويها خميعة و كلها دهن حر ..
كامت روحي تشتهي التمن عنبر و اعليه زعفران .. مرة ودتلنا منه ثواب اعلى روح ابوها .. وعمي حط الصحن جدامه و اكل .. وما عزم وحيد وكال (ياهو اليريد ،يو تشتهون ؟) و حطه و اچله وانا ارويحتي لابت اعلى ريحته .
تمنيت اكله بس محد يسوي و ظليت اتحسر ..
هنوب دش عمي ويطلع من جيبه جرزات و ياكل ، و عيني طاحت اعلى لوزايه ملحة بيده ، ما كدريت اسكت و كلت اله : عمي اطني هاي الجبير شو جني اشتهيتها.
حجه : جا انا شنهي الاكله و ما تشتهونه .. ياهي هاي ؟
- اي
شالها مصه ونطاها ليه و كال: هاج اكليها
خاب كتله : عمي شني .. ما اريدنها
- عليش ؟
- لا بالعافية اجلها ان جنت رايدها
- موش انت طلبتيها
- لا ما اريدنها بعد بالعافية .
- جا شنهي تكشين مني .
- لا ما اكشن بس ما عدت اشتهيها .
- جا اكليها
بالله هاذ شكلله .. خذيتها من ايده ، كضيتها و هيسيت البلل مال حلكة اعليها .. وانا روحي لابت كمت من مچاني اركض و اذبن البطني كله .
و هو ينعل بااهلي و يكلهم : بت حويكم الخايس تكش مني، خايبة انت و اهلج تروحون فدوة لنعالي .. خله خله ابوج صاير خادم لال ضاحي هالنواقيص ذول النغولة .
حجه وياه ابنه : صكد يكولون داجين سرحان خنجر ابطه و ظهره
ناصر : يطبه هرش عسنه بالموت ياهو مالتنا ..
هدية : اصطكيت بمجاني .. وانا توني مزوعه .. اختنك ابلعومي السؤال .. ارد انشدنهم يا سرحان ... هواي يو وحيد ما اعرفنه .. معكول ..سرحان دجوه .
كمت منهم من مجاني بساع .. ويا ما كمت ماعت ارويحتي ، و انسحنت روحي .
همن اعليه نسوان حماي يشيلن بيه و يذبن الماي اعلى وجهي .. صحيت اعلى روحي و هن ملتمات فوك راسي : جا شمالج طحتي دكومي .
اعاين بيهن ارد افرزن دماغي
كعدت اعلى حيلي ، و دنجيت خاطر اركد .. طرى اعلى بالي سرحان .. نشغيت و هميت اعلى حجرتي .. دفنت روحي بنص الفراش وطكيت بجي و معدتي غدة لهاب من القهر .. كمت اهوع لجن مامش ابطني اكل و اذبن و ارتاح .. انتهيت
والنهاني خبر سرحان .. جن روحي مزوهرة .. اريد اعرف علومه شنهي ، صكد مدجوج يو يجذبون اعليه.
دش فلاح الظهرية .. انا ابجي بس من هيسيته دش الحجرة ، صميت روحي و حسيت دموعي وكمت ليه : ها الله يساعدك
- هلا .. شمالهن عيونج غاديات حمر ؟
- ما بياش شي ، بس تعرف صالي اسبوع موش طوسة و دوخت الراس ما جاي تفج عني .
- بس هاي .
- اي ، اكللك .. انا من يوم العرسيت ولليوم ما داشه بيت اهلي و اشتاكيت لامي .. خلني اروحن ليهم اشوفنهم .
- مامش روحة اجعدي .
- سويعتين ما اطول .
- كلت مامش .
- انا تعبيت اهلك يردون شغل ليل و نهار وانا حيل ما ظل بيه .
- اي و شتريدين يشيخة اجيبلج خدامة تخدمج ، يو تريدين انا اخدمنج ؟
- ما اريدن تخدمني ولا اريدن احد يخدمني، رايدة بس انامن .. وامك تريدنا نمش فد شويه للكاع نحوش بالكاع .
- اي حكها جا شني كاعدة
- جا انت موش راح تنام
- انا زلمة تعبان و اريد انامن عدي طلعة العصر للمضيف .
- جا مكضيها طلعات و انا المكضيتها شغل مريضة تكلي شعدج تنامين ، وعلي تعبت حس بيه، احسبني حيوان و اعطف اعليه ما يصير هيج وعلي روحي طكت .
لف راسه و نام .. درت و انا ابجي
جا هسه منين اعرف اخبار سرحان .. ياهو اليجيبلي علومه ، يربي وعلي راح اطكن من القهر .
اعلى بجيتي .. و اندكت الباب كمت كالو : ياله امشينا العمة تصيح .
توزرت بعباتي و طلعت وياهن . لجن حيل ما بيه اوجد ، كضيت وحيد ودربيته لهلي خاطر يصيحلي جمارة من بيت اهلي .. تجيني اوصيها .
راح ابن حماي و انا كضيت وكتي ابجي .. اجت مرت حماي : اكلج جا فلاح ليهسه نايم، اخوته يردون يروحون كعدي، يااا ، شمالج موش احجي وياج .
- ما ادري عن سرحان انا راسي يوجعني و حيل مابيه كالي انامن شواي واكعد .
- يا سرحان ؟
- ياهو الجاب طاري سرحان انا جاي كتلج فلاح
- لا كتيلي سرحان
- متوهمة
هزت راسها وردت للبيت دكت الباب اعلى فلاح كعدته و كالتله : دياله خوية كوم .. الزلم مناطره شنهي سالفتك انت ومرتك انت متوث نوم و مرتك اعيونها وارمة و تبجي و تكلي ما ادري عن سرحان .
فلاح : سرحان شنهي ؟
- جا غير هي تكلي سرحان عودينه فلاح .. ظاله تغلط بالاسماء و اطلعني وهمانة .
حجتها هو كض شطفته و طلع من بي اهله وراح للكاع ، كضها من راسها و جابها الدرب كله يدك اعلى راسها و هي تصيح : شمالك ، هدني وعلي راسي يوجعني دهدني ..
- دخل نوصل غاد وانا اعلمج وجع الراس شلونه يالعاشكة ..
دخلني البيت و تولاني رفسات و يصيح : الكح... تبجين اعلى سرحان موووووو ، من اكلج شمالج تكليلي راسج وطلع ابجاج كله اعلى كوا**ج
جاي يجتل بيه واهله يكلوله: حيل دكها بعد خاطر اتوب هالمصاحبة العايبة .. دشت جمارة وشافت هدوة تنكتل و هاي تسودنت
كضتلها حديدة طويله مال باب و جيبيها اعلى راسه و تكله : منعول الوالدييييييييين اطك اخيتيييييييي
جابته اعلى هامته وهو يضرب بهدوة، ركضت اعليها ام فليح .. رادت اطكها .. كضت الحديدة و تكللها : ولجن بنات حاكم الكح... ولج بكد فردة النعال و اطكين ابنيييي
الدم كام يجري من راسه .. وهو كض جمارة .. هدوة و شافت كضو اخيتها كامت حطت روح بروح .. عضت فلاح و فلتت اختها من اديهم .
جمارة طكتها ركضة لبيت اهلها .. هدوة طاحت بيها .. ما تهيس الطك منين يجيها
جمارة : يممممممممممه يمممممه يمممممه
- هاااا ولج
- يمه الحكي طكو هديوة وطكوني يمممممه
- يااااع ، ياهو الطك اهديوة ؟
- يمه فليح ابو اللثك يممممممم كومي كومي ..
كواغد كامت من مكانها بهمة ، ولاله شدة احزامها و كالتلها : عمة وياج اهدن .
صاحت كواغد : جميرة يمه ركضي فزعي اخيج ستار من الكهوة و كليلة اخيتنا انطكت افزع لينا .
جمارة : خوووووش يمه
وطكتها ركضه
كواغد : ياله امشينا يلويله
لاله : خايبين اهل يسرى العوجان جايينكم .
- جا بعدنا ما واصلين
- جاي ادرب روحي عمة
- عفية ابت اخيي ، ياله عمة شدي الهمة
ومشن بحيل صدر اعلى كاع ال ثجيل ، دفعت الباب و صحت : خايبين وينم الغمااااان وينهم .. ها يالكواوييييييييي** هاااا .. اعوينة ابيكم .. اطكوووووون اهديوة
طلعت الها مرت ناصر : ياهمه الكوااااااوي*** ولج
- انعل ابيك لابو ثجيل لابو اصلكم لابو البزركم لابو اليوم الشفت ببه هالوجوه الزفرة ، اطلعولي بتي لا والزهرة اسويلكم عرس هنا و المن السلف كله اعليكم طلعوها ياله .
كامت مرت ناصر تصيح و تحاول اطلعها .. و لاله فلتت من عمتها كضتها مرت حما هدية و كالتلها : جا البيت موش فالتو وداشه .
- جا بتنا الفالتو واطكونا ، دولي لا انعل ابيج .
دفعتها منها و صاحت : خايبة هديووووة وينج
كربت ام فلاح و هي تغلط و تتجاوز و تدفع بكواغد خاطر تطلع و تكلها : مامش بت الج ياله منا
كواغد : تدفع بيه وتكلي مامش لج بت .. عاينيت بكتاري ولني اربي طشت حديد هاكداتها و اتناوشه و اطكنه بيها ، ورفستها برجلي التمن علي جزهن زنابير ..
هاي الاجتها رفسه و هاي الجريتها من راسها داوريت بيها وطريتها ..
دشت لاله اعلى اعلى هديوة ولن تلكه البت مسحونه روحها و ذابينها بالحجرة مزوركة .. شالتها لاله .. وصاح ستار : هااا يمه ياهو الطك اخيتي
صاحت لاله : خايب ستير تلاحك لخيتك مزوركينها اهل يسرى العوووووووجة
صرخت كواغد : بتي يمه ، ولج هديوة يمه اكعدي ، خايبة اهديووووة
ستار شالها اعلى اجتافه وركض بيها و كواغد انهدت بيهم غلط و فشار اعليهم و اعلى ال ثجيل بخويطهم ..
وداها للمضمد كعدها و نطاها حبوب وجع راس ، و عالج جروحها و ردها للبيت .. عاف هدية بالبيت وراح البيته المكعد بيه يسرى ، كضها زوركها و اكتلها ازود من جتلت هدية و اخذ بناتك منها و جرها لاهلها و ذبها .
شافه ناصر جاتل يسرى و هو تسودن .. ضاربه راشدي .. ستار كاله : يجيك ابوي و حسابكم وياه ، بتكم عدكم و اخيتي ابيتنا و انعل اليوم الاكشر الشفناكم بيه .
راد يهم عليه ابن عمه الجبير ، هادهم وراجع ..
رد للبيت ، كواغد حاطة هدية بحضنها ، و هدوة تبجي ،كابلها : عليش جتلوج
- كتله راسي يوجعني صالي اسبوع خلني بس اناملي ساعة و اطلع للكاع لا فليح رضى ولا امه و غصب الا اروحن .. كمت احوشن و ابجي و هو تسودن يكلي تبجين اعلى سرحان تولاني جتل ما هيسيت روحي الا طايحة ولاله فوك راسي
لاله : اطلكي و خلي ستير يطلك يسرى العوجة .. ونخلص من شوفهم .
ستار وانا هم راح تطلكها و انعل ابيها .
جسومة : لا تستعجل حبوبه تاني ابوك ياله تصرف .
كواغد : شماله راسج يوجعج
- ما اعرف صالي اسبوع اعلى هالحالة الوجع ما فاكني.
- خافنج حبلى ولج ؟
- لا يمه لا تكولينها اعليج العباس ، اطكن واموتن غير .
ستار : انا اروحن .. يمه انت ولاله عينجن اعلى البنيات خص هاي نجيوة بعدها زغيرة
- يو عايفها عد امها يا يمه ، هس انا منين اجيبن وحيد يرضعها .
- يو تموت الفرخة ما اردن يسرى ، خلها عد اهلها .
لاله : مرت اخوي عدها بت وترضع .. نمش و نخلي البت عدها و ترضعها .. شنهي تذلنا بسدرها ختولي.
كواغد.: ضكرتيني بمرت اخيج جا هاهيه ختولي يسرى .
راديون : شلونك يخنجر
- هلا يبعد امي وابوي ، شلونج بويه ؟
- كواكه ، لجن شايلة بكلبي اعليك
- انا موش ناسي ولا انا الهادج .. وحك عيونج كل يله طرواج يسامرني .. لجن انا مطي وعد لاخيج ما اواعدنج .. عبن انا رايدج بالحلال .
- بس انا ولهت اعلى شوفتك .. ايامي اكضيها بخيالي ارسمنك .. صار ثلث سنين ، ليمنتها نظل هيج يخنجر ، العمر يمشي و كلما مشى امي و اهلي زادو بملحتهم اعليه ..
- جاي ابني بالحجرة و هايطلع بيدي اذبنه بنيان ، متاني اخلص و انصب اخشاب تليك ابت الشيخ خاطر اخطبنج من اخيج يتوسطلي يم ابوج .
- يو بس فراش انا ما اريدن اكثر .. بس خل ننجمع يخنجر .
- جا انا اتمنى اخذنج باجر بس هذا شرط اخوج .. جا شبيدي بعد .
- سرحان شلونه بالمستشفى ، الشيخ لساه ما يدري بحالته .
- جاي يدارونه الدكاترة و بحيل الله يكوم و يبز عيون عدوينه .
- تعرف ياهم الطكوه .
- يو حجيت ازعلنج وانا ما احمل زعلج.
- احجي ؟
- مامش غير خالج و امج يو زناد
- خالي تبين ردي لجن ليش تتهمون امي ، بكل كصه و حطيتوها ؟
- شفتي ؟ كتلج انا ما رايد ازعلنج
- انا ما زعلت انا جاي انشد
- كل السمعتيه عن امج صحيح ، الصدكتيه و الصعب تصديكه .. هاي الحقيقة ..
- الله وحده يعلم الحك وين .
- والنعم بالله .
- كالو كمت تصلي
- موش صلاة تامة لجن نطكطك ، يوم اصليها ومرات انساها .
- بس كونك صليت هاي كافيه .
- بودي اغازلنج غزل ما يخطر على البال لجن جلمتي ويا اخيج مانعتني و يو ما طالبتني انت و اخافن تزعلين جا ما اجيت .
- يا وعد وانا مشتعل كلبي وله .. سهت عنهم و طلعت للبستان و اجيتك
- ويو نشدوج ؟
- يو نشدتني امي اكللها جنت بالقصر و يو نشدوني اهل القصر اكولن جنت يم امي .
ضحك و كم طريجة وياها .. شوي و هدها ورد للمستشفى ..
لثاني يوم .. هدية ما صاحية طريح وسادة ما تكدر تشيل ايدها .. مشتها امها كوة و اخذتها بعربانة للجدة .. فحصتها .. كالت الها : حامل البت .
هدية : ساعة الكالتلي حامل ضاكت الدنيا بعيني .. يعني راح اخلف من فليح يعني راح انلزك بيه طول عمري و اكضي حياتي وياه بالاه و الونة .
رديت للبيت ما حاجيت احد كثر ما تضايكت حتى امي ما كالتلي بالمبارك اعلى كثر ما شافتني منقهرة .
سبع ايام و طلع سرحان من المستشفى .. ردوه للقصر و كلهم محاوطينه و زناد اعلى راسه يكله : حكك ما يضيع و اجيبنه الك من حلك الذيب.
سرحان : صار سبع ايام اعلى طيحتي يزناد و ما طلعت جتالي .
- ما هاد ثارك يخوي .. ثارك ثاري و ما اهدنا .. انت استراح و خلني ادورنه .. وين يروح لو حدر الكاع هم اطلعنه .
الشيخ : شني هاذ الحس العالي ؟
- جابو سرحان يشيخ
- جا سرحان وين جان ؟
- بالمستشفى
- شنهييييي ، من يمتى وليدي بالمستشفى ؟
حجاها و كام اعلى حيله .. و لشته ترجف من المرض ، عاونته الخدامة .. ما رضى تسنده .. تجى ايده اعلى العوجية و طلع .
وصل حجرة سرحان و الكل واكف ، انهد بيهم رزايل : شفتوني طحت و استغفلتوني ، اخيكم يطيح و محد يكلي ، شنهي جاهل عدكم انا
تلكاه زناد و هو يحب راسه .. و سرحان سند جرحه و كعدله ، كضاه و كاله : ياهو التجرأ و دجاك .. ياهو اليتعدى اعلى ولدي .
زناد : اظنن الكاولية يا بويه من كونهم يحومون اعلينا من يوم شردت كريم ، شرد النذل و هد بلواه اعلى روسنا .. و هالطاح بيها سرحان .
الشيخ : اظنن يردي ، اخيك ايام و هو طايح و تكلي اظنن .. المثلك هسه نابش الديرة و مطلع جتالة اخوك و تكلي اظنن
- بويه بس اعصابك اهم شي عدنا صحتك .. انا ما قصريت الديرة كلها حققيت وياها . مامش و الزلمة الشافهم يطكونه ما شايف وجوهم .
سرحان : الطكني بويه ما راح ينلكي ، انطر فد ١٦ سنة يالة تعرف ياهو الطكني
زناد : شكصدك يسرحان .
- سلامتك خوية ابو ياسر ، ياريت تهدوني .. تعبان و مالي خلك احجي احد
فرغة و الحجرة و الشيخ كاعد اعلى سكملي جدا سرحان و متجي ايده اعلى العوجيه : ياهو جتالك يسرحان .
- ما رايد اظلم بخت وحيد من كونهم كثرو عدويني بويه .. لجن انا ما رايد اوهدن الوادم بحكي .. الله ما عايفني و لا عايف حكي اسلمهم بيده .. و اخذ حذري منا و جاي .
- شلون جتلوك ؟
- طلعيت الفجر مثل كل يوم و هيسيت اثنين وراي ويا ما انداريت دفعوني و تولنوني دج .
- ما بطليت درب الشيط يسرحان بويه .
- يو حيل بيه كمت هسه اروحن ، اذا ما اكعد اعلى الشط و اختلي بروحي غاد اختنك و ما اكومن اطيك ايامي .
- والتالي يسرحان
- الله الوالي .. شنهي شصاير بالبلد .. جانا رئيس جديد
- اي احمد حسن البكر استقال و استلم السلطة صدام حسين .
- الراح ريس و الاجا ريس .. احنا ما مستفادين شي .. خيرهم الزعيم و جتلوه بديهم .. شنترجى بعد من جتالته .
- صدام زلمة شديد و ينخاف منه .. خص صعوده للحكم اجا عكب انقلاب الحكم بأيران .. من حكم ملكي لحكم جمهوري ، بولاية فقيه .. هالسالفة ما تبشر بخير
- واحنا شلنا خص بثورة ايران ؟
- وادمنا اعلى نياتهم بويه و الثورة دينية و اهلنا اهل حمية بس انخاهم يفزعون ... وللدين و المذهب يذبون ارواحهم ...
- الله كريم .. هو العراق يا بويه ما يصفى من مصيبة لمصيبه .. نشوف وين توصل والله الحافظ .
- ارتاح انت ، و انا امش لحجرتي ، الكعدة تتعبني .
مشت ايام و سرحان بده يتحسن ..
و هدية يسوء حالها .. كامت بالليل يصعب عليها النوم الكوابيس ما يفاركنها و عودها يذبل كلما جاله .
حاكم تعارك ويا اخوته و ما رضه بته ترد بعد من كون طاكينها .. واموتينها جوع و كايل الهم ( بتكم عدكم و بتنا عدنا )
كواغد من عرفت بهديوة تتنسى و مشتهية تمن زعفران . كامت كل يوم تركب الها التمن و تحط كبالها و توكل ابتها .. هلبت ترد عافيتها وهدية بالنازل صارت تخوف اعلى كثر ما الحباله والمرض داكها ..
صارت خيط من الضعف و جوا العيون سوود .. وكل يومها نايمة يو كاعدة ما تكوى اعلى الكومة ، لجن سرحان ما غاب من بالها .. تتمنى تكدر تتكوى و تكوم وتعرف اخبارة و ما تكدر تنشد
كضت جمارة و كالت الها تروحين البيت الشيخ تنشدين الحارس اعلى حال سرحان و تردين .
جلجول ما جذبت خبر كضت انعالها و طكتها ركضه للقصر مالت الشيخ .. كالت للحارس امي ودتني اعلى راديون .
دخلها .. حجت ويا بت زناد : حجرة عمي سرحان وينها ؟
- ثيييج
- اوكفي هنا اروحن اشوفنه و اردن ماشي
- اي
تسرسحت .. و فكت باب حجرة سرحان ما لكته .. جا هاذ وينه
كضتها بشرى : ياهي انت بت كواغد ؟
- اي امي دزتني تريد تمن
-تمنيش التريده امج ؟
-ما ادري نسيت ، اروحن انشدنها و اردن .
طلعت و سألت الحارس : عمي سرحان وينه
- بالمضيف .. عليش
- شعليك
عافته ومشت للمضيف لكت خنجر واكف اعلى باب المضيف ، كربت منه و اشرتله دنك ليها : سرحان زين
- انت اهديوة بت حاكم مو ؟
- شعليك انت ، جاوب
ضحك ، و صاح : سرحااان كوووم رايدينك .
سرحان كوة كاعد .. كال : ما بيه اعلى الكومة .. جرحي ياذيني
دخل راسه : طارش من السمرة جانا .. وين اليدلي هوانا ..
فهمه سرحان بساع فز اعله حيله : شنهي ؟
امش غاد اخت هدوة جاية تنشد اعليك
- وينها
مشى لكاها واكفة ورا المضيف ضحك للها : هلا بهالطارش
- هدوة ودتني انشد عنك الحارس ، بس انا كلت انشدنك احسن . شلونك
ضحك : انا كواك .. هي شلون علومها ؟
- مريضة كلش
- عليش ؟
- فليح ابو اللثك جاتلها و رحنا جبناها .. مزوركها تزورك
- يعني ردت لبيت ابوج ؟
- اي و تبجي
- عليش تبجي
- عبنها حبلى و هي ما تريد تخلف من فليح ابو اللثك .
وكف اعلى حيله . اخذ نفس قوي وذب حسرة قهر : وهسه شنهي حالها ؟
- اشتهت تمن .. وامي طبخت الها لجن تريد بعد لوز امي دورت مامش حتى انا افتريت السلف مامش لوز .. و هي تريد لوز .
- انا اوصيها اعلى لوز ، بس يو جبته تكدرين تاخذينه الها بس ما تكليلها سرحان الجابه
- اي اكللها انا جبته واجذب اعليها .. جا اكدر
ابتسم : عفيه بالسباعية .. ياله امشي وانا اوكفلج باجر من تردين للمدرسة و اخذي اللوز .
- جا خوش .. باي باي
ضحك : باي باي بويه باي باي .
مشت جمارة كالت لهديوة : يجذبون عليج انا شفته و حجيت وياه كلشي ما بيه
- يااا حجيتي وياه
- جا شني اعاين عليه
- كون كتيله هدوة ودتني انشد عنك
- لاااااااا ما كتله .. رحت انشدنه عن بت زناد .
- اي خوش عفية ، بس متاكدة ما بيه شي
- جا شني اجذب اعليح وعلي يمشي جنه حصان
- انجبي طايحة الحظ لا تغلطين اعليه
- جا ما اجيبلج لوز باجر ظلي
- وياهو عاتب عليج تجيبيلي ، ياله كومي .
- خوووش .
كامت جلجول .. ولثاني يوم مشت لسرحان .. جايب الها كونية زغيرة مالت لوز : خاب شكل لهلي هاذ منين جبته
- راح اخلي خنجر يحطه اعلى الباب مالكم .. و انت صيحي امج و كليلها يمه هاي كونية و خلها تجرها
- ها خوش .
شال الكونية خنجر وحطها اعلى باب بيت حاكم و مشى .. ركضت جمارة : يمممه يمه يمه يمه
- وغمه
- هاي كونية اعلى بابنا مدري ياهو الذابها
- كونيتيش ولج ؟
- جا غير تروحين و تشوفينها شني اشمنها؟
ركضت كواغد جرت الكونية .. ودخلتها للبيت تفتحها ولنها كونية مالت لوز .. صرخت كواغد : ياع شني هاي
جمارة : ااااااااالله لوووووز ، خب هديوووووووة ، ولج زمينه الحولة تعاااااي .. تعالو شوفو .. لوز لوز
كواغد : انجبي حرام نمد ادينا اعليهيمكنه مالت ناس ومضيعينه
- لا يمه وعلي النه
- ولج لا تحلفين ، وهدي من ايدج .. خلنا نرده
- لا يمممممه شني هو كال الكم
- ياهو الكال ؟
- مامش احد بس هو النا
كضتها من اذنها : تحجين يو اوجر العطاب و اطفي اعلى اذنج جميرة
- يمه هديوة ودتني انشد عن سرحان و انا رحت نشدته و هو نشدني عنها و كتله فليح طاكها و زعلانه عدنا و حبلى ومشتهية لوز وودالها كونية ، وعلي يمه ما اجذب
كضتلها النعال و تولتها : وازت صايرة مرسال ولج ، ما تكولين اخيتي معرسة وبراسها زلمه شلوووون تروحين تنشديلها .
ولج هديوووة ، هديوووة
هدية سوت روحها مالومة حتى امها ما اطكها .. بس وكفت ترزل بيها .. جمارة راحت جابت صينية و جرت الكونية و ذبت اللوز بيه
والتمو كلهم ياكلون .. وهدوة كامت اعلى حيلها : شني جا غير ماتي
شالت كواغد النعال و نيشنته اعليها. و صاحت : ام المصايب .. كبل اشواي سويتي روحج مواته ويامن يعينج .. هساع اطالبين بلوز ولج .
وادهدت و سوتلها مجال كعدن و تبلنها لوز تبل و ظل ٣ارباع الكونية بعد .. ضمتها كواغد لهديوة كلما اشتهت .. حطتلها بكاسة ..
وراحت لسرحان كالتله : شكثر فلوس الكونية .
سرحان : جاية تنشدين عني و عن احوالي ، يو عن الكونية
- جا يمه انا دوم انشد عنك و علي لجن ..
- ادري .. انا ما احب اعتب .. لجن اليحب يعتب .. و انا اودنكم يا ام ستار .
- ما تنفع بعد يوليدي .. الله يجبر بخواطر الوادم وينسينا الصار .
- ام ستار انا رايدج بالقصر
- موش حيلي الاولي
- وان جان .. انا ما رايد منج شغل لجن رايد منج تفتحين عيونج بالقصر و انت تعرفين اموره . من كون ام ادريس ويا الخاتون غاد .. و سليمة شردت
- الا صكد بايكة القصر
- لهساع ما لكيناها لجن فلم هاذ من افلام الشيخة مامش غيرها .. هسه شكلتي .
- يرد حاكم و انشدنه واخبرنك .
ردت و نشدت حاكم .. كال الها : لا انت مو بحاجة شغل و عدج كاع ..
حاولت وياه و ما رضى ترد للقصر .
من بعد فترة اجت المرة اللاكاها بالامام اسمها ام سالم .. وصلت المضيف و تنشد عن واحد اسمه سرحان
كالو الها وصلتي .. دلوها اعلى سرحان رحب بيها ووصى خنجر يامنلها حجرة بالبستان .. و شغل ابنها بالكاع فلاح وتكفل علاج ابنها الثاني .. و هي طلب منها تشتغل بالقصر ..
فترة شهرين .. وواحد من ازلام المضيف نطا بته لسالم ابن الحجية .. و صار سالم فلاح بالمضيف وواحد من زلام سرحان ..
مرت فترة ٧ شهور ..
الشيخ طلب منه يتعايش ويا مرته .. ويمشي الامور بينهم و بالفعل استسلم للواقع و تقبلها كزوجة شرعية و البكلبه بكلبه .
حبلت مرة ثانية و عليها ٤ شهور ..
و هدوة هاذ شهرها .. ولليوم ما رادة لرجلها ..
اجت ناس مشاية لرجعتها مو حبا بيها ، بس يسرى دكت اعلى الرجعه .. بس هدية مريضة ليومها فحاكم ما رايد يضغط عليها .. تاكل اكلتهم و تشرب شربتها عليش رادة لرجلها و طلايب اهله .
صح ما غاصبينها اعلى رده و عايفينها براحتها بس جلمة طلاك ممنوعة عدهم .. المرة التطلك عدهم هاي مو زينة ومحد يكربها بعد و عار اعلى اهلها .. فما حاطين جلمة الطلاك اعلى بالهم ساكتين اعلى السالفة.
كاطع سمعو بيه طالع للكويت و هاد العراق ..
و الشيخة ساكنة ابيتها و محد من القصر كاربها
و الخاتون مريضة ابغداد .. واخوتها وولد اخوتها محاوطينها .
ايمان على كعدتها ويا عمتها واخوتها رايحين راجعين على الخاتون تحسنت علاقتهم بأيمان .. خصوصا حاكم زلمة صاحب ملكه و ما يكش بوجهم لو اجو .. حسبو نسيبهم ورضوا بزواجتهم .
سرحان متحاذر بعد دجة اعداه ليه .
و خنجر فاتحة بخطبة راديون .. كاله احجيلك ويا الشيخ .. حجه ويا الشيخ .. الشيخ اول مرة عارض .. بس سرحان اسبوع و هو يحجي براسه خاطر يرضى ..
لما رضى الشيخ واقتنع بعد ما شاف راديون ساكته وسكوتها علامة رضا .. ما راد يعطل قسمته
الشيخة عارضت زواجها و كالت : بتي ما تاخذ خنجر .
وزناد هم رفض ..
سرحان ما اهتم .. كال ما دام الشيخ رضا اعتبرها صارت الك .. انصب الاخشاب و تعال كبع و اخذ .
بهالاثناء .. اجت دعوة من مجلس شيوخ ووجهاء عشائر الفرات الاوسط .. عقد اجتماع للشيوخ بخصوص وضع البلد ..
الشيخة اطه الرخصة السرحان يمشي ينوب عنه بمجلس الشيوخ .. زناد حيل تضايكك .. حتى اخوة الشيخ حجوا ويا الشيخ .. ان سرحان بابة حضر عاش ابغداد و ما تربى اعلى طبايعنا .. ولا كربه ويا الدين ولا عرف ويا اصول العشاير ، شنهي خليته يروح .
وظلو يلومون الشيخ .. الشيخ متعصب و كايم يصيح وانتم شنهو تناقشون قراراتي و انا اعرف ياهو الينوب عني و سرحان ابني الجبير و هو اليمثلني ..
متعارك وياهم و طالعين زعلانين من القصر ..
بهالوقت سرحان ما جان موجود .. تعنى للنجف و حضر مجلس الشيوخ غاد .
جان المجلس يناقش حركة الشارع و تعاطفه مع ثورة خميني .. صدام متخوف تعاطف جنوب ووسط العراق مع ثورة ايران .. فجاي يناقشون موقف العشاير من هاي الاوضاع ..
واتفقوا ان رايهم يبقى من راي اية الله ابو القاسم الخوئي ( المرجع الاعظم ان ذاك )
رد سرحان من مجلس الشيووخ و كعد ويا ابوه ، لكاه تعبانة حالته كلش و هو عصبي و يذم باخوته و شلون يناقشون قراراته .
ظل يهدي بيه و يحجيله على على قرارات الشيوخ
- شنهي قراراتهم ؟
- الجنوب و الوسط رهن اشارة مرجعية النجف .. وصدام متخوف من تمادي الشارع و تعاطيه مع الثورة الاسلامية في ايران، نزل عند مرجعية ابو القاسم الخوئي و طلب من عندة فتوى يسقط بيها شرعية ثورة خميني و يحرم مساندة الثورة بس المرجع رفض يصدر فتوى ضد روح الله الخميني بس بنفس الوقت ما ساند الثورة .. فالشيوخ ارتات ان يكون حفظ دم اولاد عشيرتنا اوجب .. ويكون موقفنا محايد لا مع الثورة ولا ضدها .
- صدام ما راح يتفرج ولا راح يضل ساكت
- تعاطف الشارع مع الثورة متزايد وبس الله الستار .
- لا تستبعد يشن حرب حتى يوقف تمادي الشارع مع ثورة خميني .
- مستحيل ، الحرب بهالوكت ممكن يقمع .. بس حرب
- اسمع بويه صدام ما راح يتردد يقمع العراق كله يو تطلب الامر .. ومو بعيدة يشن حرب على ايران بحجة من الحجج .. انت شيخ عشيرة و موش شيخ دين بالك ثم بالك توكف ضد صدام ..وكتها تكتب اعليك و اعلى اهلك و عشيرتك الموت .. وبالك توكف وياه .. وابعد عن الحزب الاسلامي صدام ملاحكهم وراح يحطهم حجة لقمع كل واحد يكرب منهم .
- بويه هي مال حزب .. تعرفني انا لا موهدن روحي بسوالف دين ولا هم يحزنون .. ومال غرض بكل هالامور .. واجبي عشيرتي و حفظها .. لا الي غرض بصدام ولا بخميني ولا بحزب الدعوة .
كمت من ابوي و انا بالي مشغول .. و متخوف حيل يو صدام سواها و اعلن حرب .. كمت اجيبنها منا اروحن منا ... و افكر
طلعت للمضيف خاطر احجي ويا عمامي اعلى زعلتهم ويا ابوي ولنهم .. يكبون بوجهي جني وحيد من عدوينهم موش ابن اخيهم و صافين ويا زناد ..
درت عنهم .. و زعلتهم البيه مكفيني اروحن ادور رضاهم .
ثاني يوم الشيخ طاح و توهدن ... ركضنا بيه للمستشفى .. تعودنا بهالشهور يطيح و نركض بيه يحطوله مغذي و ينطونا دوه تستقر حالته ويرد .
اخذناه و تلاكفوه الدكاترة من ادينا ..
دخلوه .. وانا و زناد واكفين واحد يترادم بالاخر .. وجه الشيخ ما يطمن .. طيحته هاي تخوف .. امش وانا ادعيله
طلع الدكتور تراكضنا ليه : ها دكتور .. بشر ؟
- البقاء في حياتكم المريض انتقال الى رحمة الله
صرخ سرحان و زناد و كامو يبجون بصوت عالي ، و الدنيا انكلبت اعلى المستشفى .. و بسرعة البرق وصل الخبر للسلف ( الشيخ مات )
انكلب السلف كلاب .. الدنيا كلها التمت
كواغد اجت وهدية وبطنها هاكداتها فزعت . و بيت شمخي بخويطهم زلم و نسوان .. و الدنيا كلها التمت بالقصر
بنات الشيخ من مرته الاولى اجن.. و الشيخة ملوك شكت زيجها اعلى الشيخ و تلطم دم اعلى الشيخ
جابوا التابوت للبيت والناس طاحت اعلى تابوته كلها تصرخ و تبجي .. بناته ملخن الشعر و شكن ثيابهن ..
سرحان حاط شماغه اعلى وجهه ويبجي .
وهدية اول شوفها اله بعد شهور من عرسها واكفة بالزاوية تعاينله و تبجي ..
شال راسه لمحها
. و دنك منها وطلب من النسوان يبتعدن خاطر يشيلون التابوت من القصر .
رادو يشلونه تحزمت كواغد وشالت اديها و صاحت: هااااا يشيال النعش هااااا ..
شااااااايل وين يل منك يهابون
وشايل وين يل منك يهابون
ايدج وياي ايدج وشايل وين ...
حزينة الدار واولادك يونون .. و شايل وين ...
ويشيال النعش ريض شواي .. وشايل وي ....
خل نعاتب المهيوب بهداي .. و شايل وين ...
شايل هيبيتي ويا سدرة حماي .. وشايل وين ....
ويا دار خلافك حزنانة
يا دار خلافك حزنانة
تنشد و النسوان اعلى لطمتها و الزلم انطوهن ظهورهم .. ليما كملن موادع ويا التابوت شالو النعش و الصريخ طلع من كل صوب .. زلم و نسوان بجت اعليه .
وناس ما تنعرف منين اجت .. شوارع قبطت بتشييعه و كلها تبجي ..
شالو و النسوان ردن للقصر .. واولاده و اهل عشيرته طلعو بيه لوادي السلام .. دفنوه بصف ابوه ضاحي و جده جلوب .. بمكبرتهم .
والفاتحة انصبت بنص السلف .. و الناس من المحافظات تجي .. شيوخ و عشاير و كل عشيرة تجي بعراضة و هوسات ورباطات .. تذكر فضايلهم و تهوس بمدحهم و يدخلون الفاتحة .
ردوا من النجف بالليل ..
وكفوا بالمضيف .. لنص الليل و الفاتحة ما تفك ..
لثاني يوم .. اجت عراضه طلع سرحان و زناد و عمامهم استقبلو العراضة .. ( اشهد يالجدكم ابيض تاريخه )
ويهوسون لولد الشيخ ..
وكف عم سرحان يردهم بهوسه .. بالعراضه و صاح
كفو يبن المضيف العامره دلاله ....اييييه
يفزع لو يجيه دخيل جتاله ...... اييييه
يبن الدله والمكوار والفاله ..... اييييه
يالتنشد وين لوانه
ها يالتنشد وين الوانا
زامط وصيح الشيخ زناد
وهوست الزلم كلها و صاحت ( زامط و صيح الشيخ زناد ) وتقدم زناد و رافعلهم ايده و سلم اله عمه عكال ابو الشيخ
سرحان واكف متصنم من موقفهم هاذ
رحيم : شجاي يصير ؟
حميد :شنهي هاي ؟
خنجر جر اسلاحه وتقدم ... كضه سرحان
والناس تصيح ( يالتنشد وين الوانا زامط و صيح الشيخ زناد ) يتبع الحلقة 37 اضغط هنا