رواية كحل عرب الفصل الخامسة والأربعون 45 للكاتبة زينب ماجد
رواية كحل عرب الحلقة الخامسة والأربعون 45 (التجنيد الألزامي)
عايش بنارين انا نار الجفه ونار الشماته
وانتي تدرين الوكت يردف علي بمكسراته
حطني دوارة كطف للظيم وانفرت رحاته
لا نهار اريحني ولا ليلي ليل الناس اباته
(عريان السيد خلف )
راديون : سكتت وعزت بروحي اتوسل اكثر وانا المغصوبه اعليه و مالي ذنب بشي .. اتوسلت جني انا الجناية ولا جن انا الضحية ، كمت من عده .. درت وجهي و مشيت.
لميت اغريضاتي ولفيتهن كوار ..
وكلت له : الأريدنه شغيلة بس
دارلي بعيونه و عاين علي .. حجيت : ما اريدن واحد من اهلك يوصلني ، و ياريت تودي اعلى وحيد من اهلي يجي ليه ياخذني .
- و شنهي الأسباب ؟
- اسبابها بدليلي و ما اريد وحيد من اهلك يزتني .
- صيحيلي سعاد
طلعت من الحجرة صحت سعاد ورديت .. اجت وراي ، وكفت : ها خوية كول
- صيحيلي ضرغام ابن نعمة .
-- اي
مشت صاحت اله ، كاله : تمش لبيت سرحان و تكله يجي ياخذ اخته .
- عدهم فاتحة عمي وما اظنن يترك فاتحته ويجي .
- فاتحتة منهو العد بيت سرحان
- امه يكولون .
- ردحة ماتت
راديون : الخاتون البغدادية الربته ابغداد .
- سعاد
- كول خوية
- اخذيها بحجرتج و خليها تنام عدج ، ليما تفض فاتحتهم امس .. يجون ياخذونها .
راديون : اذا ما رايدني اظلن بحجرتي .. ودي على اهلي ، ما انامن عد احد .
- سمعتي سعاد ؟
- امشي وياي ياله.
- ما اطلع .. و اليريد يطلعني خله يودي اعلى اهلي .
جسام : فوك شينج و تراددين .. اطلعي مني موش طايك شوفتج .. يااااااله عني .
- ما طلعت مني الشينة خاطر تعيبني .
- لا تراددييين.
- جا لا تحجي وياي هيج من كون ما تريدني اترادد .
- كبل شواي تتوسلين .. و هساعج السانج ما يكصه السيف .
- شفت الحجي المرهدن موش لكل واحد يلوك .
- اطلعي من عدي ما اريدن اشوفنج ، حيل ما بييييه اطلعي.
- وكت اليجون اهلي انا الما ارضى بظلتي هنا ، و ان ما اجو ما اتزحزح من مچاني ، خوووش .
حجيتها و مشيت كعدت اعلى السكملي و لميت روحي وانداريت عنهم ، و سعاد تكله : هدها ليما يجون اهلها وياخذونها .
دشت نجمة و حجت : سعاااد ابوج رايدج امشي ليه شوفي شيريد .
طلعت سعاد من الحجرة واتكربت نجمة من جسام و اهي تنشده : شنهو الصاير ومودي اعلى وليد نعمة يرد هاي ..
- ما صاير شي ، انا ما اريدنها عدي .
- مامش وحيد يطرد مرته باول ايام عرسه يو ما شايف منها الشين.
- يما اريدنها و بس خلوني بحالي و طلعو رايد انامن.
عافته و مشت و هو غمض عيونه و ما فتحاهن .. ظليت جويعدة بمچاني و احاجي زماني .. مدري اعلى ظليمتي ساعة الغصبوني اعلى ابن ال ثجيل مدري اعلى هضيمتي و انا العفت ولفي و حركت افاده و افادي .
....
سلطان : شنهو الرادة منج جسام
-رايد يردها و هي ظلت ترادده
- اي ؟
- يكللها فوك شينج تراددين .. و هي تكله ما طلعت مني الشينة .
- بياضها جذابي ، والله اعلم شعاملين بحال جسام هالراد وما طايكها .. ورايد رجعتها و يخاف يشهد اعليها.
نجمة " جا هسه شنسوي
- يو بس جسام يحط ايده بيدي ، و يعاوني اعليهم لا جا خذيت حكي و حكه و حك ابونا فوك احكوكنا .
- جسام يخاف الله وهل ما يحجي .
- سكته هاي موش بصالحنا ، اجزم اعليهم هم ورى حريجة كاعنا .. و هم ورا جتلته و حالته هاي ، و شوف شعاملين و مخلينه يسكت و يتجفى شرهم .. لجن ما اسكت ال ضاحي انا ردادهم .
كام من مجانه .. وراح لحجرة جسام .. نايم اندار لراديون و حجه : شعدج راكدة هنا ؟
راديون : ناطرة اهلي واروحن .
- مامش نطرة ... جاااااسم
- ما اروحن ويا وحيد منكم لا ما يجون اهلي ما اطلع منا.
جاسم : ها بويه .
- اخذ هاي وذبها اعلى اهلها. ، ياله ما اريدن اشونها ابيت ، و اسمع هاااااا .. بنص الفاتحة وخلي الكل يشهد بت ال ضاحي رديناها ... ياله .
راديون : اليطلعني منا ، هل يطلعني جثة ، طلعة ما اطلع .
عد ما صيحيت و حجيت هالحجاية ، فك عينه جسام : هاااا بويه ؟
-نام و استراح و احسابك طويل يجسام .
جاسم : يمه جيبيها و خلني اصعدها و اوديها لاهلها.
راديون : تكربيت من السرير و كلت له روحه ما اروحن الا وحيد من اهلي يردني .
جسام : هدها بويه ، انا اردنها باجر بس استراح ..
سلطان : وكت التستراح الي وياج حجي جثير ، اخذها يجاسم .
راديون : ما جان غلطان جدي ضاحي ساعة الأخذ مجان اخوه دواي و حط اعكال المشيخة اعلى راسه ، من كون العكال يلوك لزلامه، و الزلم التتكاوة اعلى مرة موش زلام .
ويا ما حجيت و طكاني جاسم بجف اعلى خدي ، و هو يصرخ : صمي حلكج وللللللللللج
صحت بيه : طك ، بطكتك هاي لا تظن تنكص مني بكثر ما تحط من عكالك .. لجن موش صوجكم صوج اخوي الرضا يناسب امثالكم .
كضاني من راسي ، فز جسام من مجانه و هو يكله هدها ، هد من ايدك .. خلي اردنها .
سلطان : مجانك يجسام ، نجمممممة
- امر يشيخ
- الطالت بلسانها جدامنا .. اريد السانها .
جرني جاسم من راسي ودفعني اعليها ، جرني جسام و صاح : بسكم و العباس حيلي مهدود .. موش طايك احد .. هدوني انا وياها نتصافى ، اردنها اخليها ، انا الاحكم بامرها .
سلطان : مالك حكم بظل ابووووووك ولك ، اخذيها نجمة
كامت تجر بيه نجمة ، و هو يسحبني و حطني وراه و كال الها : اطيني ملابسي خلوني امش اوديها ما اخليها .
ظل يتصايح وياه ابوه و اخوه .. ليما ارتفع الصياح دشو اخوته البقية و ظلو يسحبون بأبوهم و سلطان يغلط اعلى ابنه .. حط ايده اعلى الميز و هو كاض ظهرة و كوه يجر النفس ، و يصرخ من صدره .
ليما شافه سلطان متأذي طلع عنه و كال الهم : شيلو اخوكم و اخذو للمستشفى .
و جسام واكف يكح و يصيح من صدرة .. اندار عليه و هو يزمخ : لمي اغراضج ياااااااله ، خلي اخلص .
سكتت و ظليت واكفة ابمجاني ما تحركت ، اندار و صاح :احاجيج انا يو احجي ويا الحااااااايط
- كلت لك .. طلعة منا ما اطلع ويا وحيد منكم ، يجون اهلي ياخذوني غير اعلى خير ما ياخذوني ، هاذ مجاني وما اتزحزح .
- لا تدولبيني .. راح اخذنج بنفسي و اكللهم البت مغصوبة علي ما اريدنها .. غير هاذ الحجي ما احجي ان جنتي خايفة الفضيحة امشي وياي يو خذوج اهلج تنعابين .. لجن انا الراح اخذج ..
- ولون انت خذيتني ، ابوك شراي شرور و ما راح يخليني بحالي يو ما فضحني .
جرني و هو يصيح : امشي عااااااد
سحبني من ايدي و حاط ايده اعلى صدرة و كوة يتكوى اعلى المشي .
بدل الدشداشة .. و طلع و هو حاط ايده اعلى ظهري ، وكف سلطان و كاله : موش انت التخذها ، اخوتك ياخذونها .
- رحمة لوالديك بويه ابعدني عن صراعاتك ويا ال ضاحي ، انا موش طرف بيها .
جاسم : شنهي موش طرف وانت وليد ثجيل يالرررردي .
- دام انا من ثجيل وهي من ضاحي عليش خذيتوها ان ما نهيتو هالعدادة اعلى حك .. بسكم وعلي تعبت من ملاواكم تعبت .
سلطان : ما دماك رايد تردها لزوم الردة الها اسباب ، وسالفة مغصوبة لا تحجيها من كون ردتها تضرها ما تنفعها و اهي بروحها ما رايدة ترد .. تكعد و تحجيلي اسبابك شنهي خاطر اخليك تردها .
كعد سلطان و حط اديه اعلى عكازته و كال الهم : ناطر جوابك
جسام : بويه جسمي مالوم ومالي خلك الحجي ...
- جساااااام
جاسم : عليش خايف تحجي ، تكعد انت وياها و اطي اسبابك لابوي .
تكرب جسام و اتجى وكعد و كال الهم : انا ساعة الاخذتها شرطت اعلى الملجة رضاها .. وكالتلي هي ما مغصوبة لجن من خذيتها واهي تبجي و البت مخطوبة لغيري كبلي و ليلتنا تمت اعلى غصب .. ما رايد اوهدن روحي ويا مرة مغصوبة اعليه .
سلطان : هاذ الكلام ما تحجيه الي يجسام وهاي موش اسباب .. مامش مرة ترد بيام عرسها حتى يو جانت مغصوبة ، الا يو جانت معيوبه .
جسام : هاذ العدي الصدكتو و الما صدكتو انا ما بياش حيل ازود بشرحي لاسبابي .
جاسم : شو تحجي معلك ويانا ، ابوووووك هاذ احجي عدل لا اديرن فجك .
جسام : انا ما مقلل مم احترام ابوي و حاشى لجن انا مرييييييض ، ظهري مفشوك و انتم مامش احد بيكم وياي .
سلطان : جا خوش .. خل تحط ايدها اعلى القران و ايدك وياها و احلفوا اعلى كلامكم .. ان جانت هاي اسبابكم .
جابت نجمة القران و حطته كبالي .. ما خفت ولا ترددت و حطيت ايدي اعلى القران و كلت الهم : وحك هاذ كتاب الله الكريم .. و حك من انزله و اعليمن نزل .. انا برية ورايتي بيضة
سكتو ... وكام جسام كبل لا يكله ابوه احلف ، دار وجهه لراديون و كال الها : ياله .
وطلع من البيت .
سلطان طلب من جاسم يتبع جسام .. و صعدت ورى ، وصلوني لبيت كريم .. نزلت البيت مامش احد بيه ، حجه جسام : ظلي هنا و احنا رايحين للفاتحة .
طلع جسام و اخوه للفاتحة ، دشوا قروا الفاتحة و سلموا اعلى الناس .. جاسم راد يحجي جسام سكته و كال : تجيني خاطر نطلعو
ويا ما كام ، كام وياه سرحان و هو يوصله و يرحب بيه و تكرب اعليه زناد.، حجه جسام : عز الله مصابكم ، و ولون جان الوكت موش وكته انتم معزايين و انا هاي حالتي .
زناد : جا شنهي الصار وياك ؟
حجه سرحان : سمعيت مدعوم سيارة ، حيل انغهرنا اعليك ، الله شاهد انت زلمة اصيل و على الراس و جيتك هاي غالية يبن العم .
جاسم : الله يعزكم لجن احنا ما نعرف الا كبل ساعتين هو مدعوم .. انت شلون عرفت
جسام الحجي موش وكته انا جاي ...... قاطعة سرحان
- اكاطعنك بخير بس جواب اعلى سؤال اخيّك .. الجلمة ما تنظم .. خاصة يو النسوان يو كعدن بفاتحة ما يخلن سالفة و ما يكولنها و امي بنيتكم و اهلها جويعدين داخل .. كبل شواي كالتلي اعلى الخبر من كون جنا مشدوها عكولنا اعلى فكدانا
تنهد جسام و هو يندار لزناد : ابو ياسر البت صارت ابيتك ، و الساعة هي جويعد ااعلى عتاب دارك ، ومثل ما طبينا بالمعروف نطلع بالمعروف .
زناد : شنهي الاسباب ؟
جسام : ما اريدن اطولن بالاسباب بس يكفي اكللكم البت مغصوبة و من ساعة الاخذتها ليجاي تسجب، مامش نصيب .
سرحان : من رخصة ابو ياسر و اخيك جاسم .. طالبنك بحجوة
سحب جسام و راح غاد من الفاتحة ووكف : انا خذيت منك جلمة والزلمة ما يرد بجلمته
- الجلمة اطيتها كبل لا اعرف بحرجة الديوان و المحصول .
- و هاي شجابها اعلى هاي ؟
- ابو مأمون انا اعرفنك زلمة و النعم منك لجن لا تغشم نفسك بسوايات خنجر ، سكتي اعلى عملته بس خاطر ما افضخ السالفة والا انا زلمة ابن عشاير اهدن اهلي اعلى خنيجر ومامش غيرك يتهم بسواياته .. و اخيتك تنفضح سبة عملته و هالساكت وما حجيت لعمامي .
- هه انت جاي تحجي بموضوع لا انا ولا اخيتي النا ايد بيه و تلومنا ؟ ... انا خذيت الجلمة منك تالي يصبح الصبح تردها .. ولون انا ما جنت اظنن يطلع ازود من هاذ من ال ثجيل .. رايتك بيضة .
- انت شنهي جاي تعابيني بهلي ؟
- انا خذيت منك جلمة تردها اعلى اي اساس ؟
- اختك عاشكة يسرحان .
حجاها و دنك و هو يكض جرحه و يتأوه ، وكف سرحان يتنهد ؛ ما اريدن اتعبنك .. لجن البت مغصوبة موش عاشكة و ساعة النخطبت و هي بنت احلام و ايام ويا الخاطبها .. من انغصبت اعلى غيره شتظن منها ؟ على كلاً ، رايتك بيضة و ما كصريت و جزاك الله الف خير ، والله يشافي جرحك .
حجاها و هو يصيح جاسم خاطر يجي يتچي اخيه ، وصل يم زناد : ها ؟
- محد عمى اعلينا غيرك بعلي يو ما الفاتحة الا احطن و ابيس ابطنك .
- خايب احترم لا وعلي اخربط وجهك
- اذلف من وجهي لا ابتلي بساعتك .. امش .
ابتعد سرحان منه وزناد مشى عنه و هو كاض اعصابه ، تكرب عمه ينشده .. و ظل يحجي وياه
زناد مشى لامه خذاها ورد للبيت ، ساعة الدش و كض راديون ابتلش بيها .. كضاها كضيان و يصرخ :ويا منهو مطينه روسنا ولج .. تالي عكلنا نتوسل بال ثجيل خاطر يستسترون اعلينا من حدر عمايلج ، يو ما الفضيحة اجيبنها ليه جا حطيت الجيلة بنص راسج و خلصت منج ..
وظل يجتل بيها الى ان خواها و طلع من البيت .. خلص الفاتحة سرحان بليل و مر ليها ، ساعة اللكاها مجتولة .. خذاها عده بالبيت .
ال ثجيل شيعوا اعليها الفضيحة .. و جلمة بت ردت لهلها بأول ايام عرسها .. كافية تخل الوادم تزيد بحجيهم .
راديون قفلت اعلى روحها ما طلعت الباب .. لا الها عين ويا اخوتها و لا الها تبرير تدافع بيه عن نفسها ، صكت اعلى روحها و بس تبجي .
خنجر موش احسن حال منها .. مامش غير المشروب اليواسي اعلى بلواه .. ساعة وكته البطل بيده و يشرب و اليكله بسك يبتلش بيه .
كام اعلى حجرته البناها الراديون كلها حركها ..
وكعد اعلى الدرب يعاين نارها .. ليما فزوا الناس تخمد بيها و هو كاعد اعلى كتر يعاين .
كربت منه جلجول و الجنطة اعلى ظهرها جاية من المدرسة : عمي عممممممممي بيتك احترك كوووم .
- روحي منا بويه .
- شمااااالك عاين هاذ بيتكم والله .
ما رد عليها و كعد يعاين من ابعيد ركضت هي ويا الناس تطفي وياهم ، ليما طفى البيت ، ردت اعليه : عمي طفيناها .
ما رد عليها : شني شو ما تحجي .
- ولج ولي عني .. امشي .
- عليش اطرد جا فوك ما طفيت بيتك
وتهز بيدها .
اندار الها : كربي
- شرايد
- اتكدرين تروحين لبيت سرحان
- اي جا اكدر
- اريدنج تروحين و تعرفيلي الاخبار شنهي و تردين .
- ام سرحان هاي عمة مرت ابوي ماتت
- موش هيج اخبار .. انا اريدن تعرفيلي اخبار راديون
- يا عرست وردوها .
- ياهو الردها ؟
-جا اعرفهم .. انا جنت ويا هديوة جويعدة كاضة بنيتها بالفاتحة و امنية تبجي ، هي دومها تبجي بس موش مثل اميدي ابو صماخ الجبير لا انا بت اهديوة احبنها من عبن .....
- انعل ابوج لابو هديوة لابو بنيتها .. احجيلي غيرهن
- عمي شمالك شو بيك طفكة ؟
- اسمعي اريدن تعرفيلي اخبار راديون غاد و يو عرفتي اطيج فلوس
- جا شني انا مجدية ، امي يوميه تطيني فلوس و اشتري مصغول و بسكت وعلج ابو النيوة .. بس اميدي ابو اصماخ ما اطي وياي من عبني ما احبنه .
- انت شايفة هاي العودة
- شمالها ؟
- راح اجسرنها اعلى راسج وراس اميدي .. انا جاي اكللج اريدن اخبار راديون ..
- عمي انا جاي احجيلك و انت تسكت بيه وتغلط علي شمالك ؟
- راديون وينها
- ابيت سرحان
-عليش ؟
- ما اعرف لجن انا من كضيت امنية و هديوة تحجي وياها .. ردت اتصنت الهن بس امنية جانت تبجي .
- خاب وعلي اطكج جلاق انعل راعيج .. امشي منا لا اذبن كل بلاوي بيج .
- عمي لا تزعل بس انت مسودن ، اطفي بيتك وما تكلي مشكورة ، واحجيلك و تغلط علي شني ؟
كضاها من هدومها : ولج تمشين منا يو ابتلي بيج
- ااااااااي ، هدومي هدها
- امشيييييي
- بس وعلي ما اكللك عليش بجت ، وانا اليوم راح اروحن ويا امي نقرا عدهم و ما اكللك شمالها ، دصطبرلي .
كضها من علباتها و جراها ليه : تروحين و تعرفيلي كل الاخبار و تردين و يو ما رديتي اكضنج اكطعنج تكطع .
- جا ما اخافن .
- انا يو صاحيلج جا تفرغيتلج .. امشي عني .
عافها و دفعها خاطر تمشي منها ، و هي تفرك بركبتها .. مشت ليغاد .. و حجت : صكد تضكرت هي جانت تبجي لين رادينها ورجلها ما يريدها .. ما تحبك ما تحبك . حلللللللل
وعيبت عليه و طكتها ركضة
ظل صافن وراها ، وكام من مجانه مشى ، لاكاه اخوه : حجرتك ياهو الحركها .
- انا الوجيتها
- تسودنت انت شمالك ، بسك فاض الغيض منك ، بسسسس .
هده و مشى عنه ، راح كعد بالجول و مجابل روحه ، و جلمات جلجول براسه ساعة الكالت تبجي اعلى زلمتها ..
كام من مجانه و راح لحميد ينشده عن راديون ، كاله : ردوها ويكولون مغصوبة و جسام ما رضى بيها، لجن ال ثجيل يكولون معيوبه ومالها بياض .
- والحك وين ؟
- الله وحده يعلم الحك لجن حوبتك ما تعدتها و هل طلعت بيها ، شد حيلك و اوكف اعلى اجدامك و هد عنك العرك تراك ضيعيت روحك .
- ما اهدنه ليما ابرد كلبي بزناد
- ازناد الشيخ و انا جاعد بمضيفه ، شنهي انت ما تفكر بيه ما تحسب اليه احساب .
-ساعة اليثكلن اعليك فعايلي اتبرى مني .
- بسك فاض بيه الصبر منك ، كلنا ها يابو علي و تحسن و صار ادمي و اشتغل ، رديت لعوايدك عليش .
عافه و مشى كعد بالكهوة مالت ستار ، السوالف بالكهوة شكال صدام و شحجت ايران .. و التجنيد الالزامي جاي يطبقه صدام اعلى الكل .. حتى شياب جاي يحشر للجيش ، و يضنون صدام جاي يمهد لحرب ويا ايران .
دشت جمارة للبيت و هي تدردم .. وهديوة حاطة الطشت و تغسل بهديمات بتها ، حجت : هااا خير شمالج تدردمين جنج عجوز ماكو عشاها .
- هاذ خنيجر بالعباس اغم
- عليش
مدت ايدها و هي تعدد : حرك حجرته و غلط علي و على ابوي و عليج ، و جتلني فوكاها
- مسيجين
- انا المسيجينة .. كضاني من علباتي اصابيعه خشن ابزردومي .
- وانت شعدج رايحه ليه ؟
- جا غير طفيت بيته و كلت اكلله .. يريدني اشتغله مرسال لراديون ، شحجت و شكالت
- هو وصاج ؟
- لا توصلين شي ، هدي ولا ادخلين روحج بينهم .
- اكلج صكد هي راديون اطلكت ؟
- اي
- يعني من جانت تبجي اول امس لين تطلكت .. تريد ترد للزلمة موش صكد
- اي
- تحبه ؟
- اكلج انت ياهو مالتج تنشدين ، تحجين سوالف اكبر من صماخج و تحشرين روحج بسوالف الكبار ، استجني و دشي داخل ياله .
- شحجينا شمالج وياي .
- كومي شيلي امنية ياله ، كاعد اتبكبك و انا جاي اغسل ياله .
طبت شالت امنية و اجت يمها : جا امي و حبوبتي وين ؟
- هن و مرت ستير بالكاع جاي يشتغلن .
ظلت شايلة امنية و تفكر .. ما هدالها بال ، خلت هدية تكمل غسلها و تاخذ بتها طري الدرب وروحي للقصر ، دشت بحجة (امي تريد جاي )
مشت بشرى تحطلها و هي زركت لحجرة راديون ، دكت الباب ما سمعت رد ، فكتها و ظلت تعاين من الباب راديون حاطة ايدها اعلى خدها و صافنة .
تكربت منها : شلونج عمة
اندارت الها راديون : هلا عمة
شاورتها : نشدني عنج خنيجر ورادني اعرف علومج
عاينت الها: وينه ؟
- حرك البيت ماله و كاض البطل و يشرب ، طكاني و غلط على ابوي و على هديوة و على اميدي ، و انا عيبيت عليه لجن ....... قاطعتها
- وينه ؟
- شني عمه انا ادري وينه ، لاكيته بالشارع .
- تروحين ليه و تكليله .. لا لا تكليله شي ، هدي .
- جا هسه انا شكولن .
- لا تكولين شي .
- بكيفج
كامت منها وطلعت ، اطتها بشرى جيس الجاي ، خذتها وركضت ادور على خنيجر ، لما كربت اعلى الكهوة مالت ستار ، ضمضمت روحها خوفن لا يشوفها ستار و يكصبها .
وكفت من ابعيد اتأشر ليه لجن هو مشدوه البال ، كضتلها حجارة و طرتها اعليه .. وكصت براس واحد شايب ، كام و ظل يصيح و يحجي و يدور براسه .
- جا هسه هاذ شلون اصيحنه ؟
مدت راسها من الحايط و صاحت : خنجررررررررررر.
وضمت راسها .. سمع خنجر واحد يندهه و كام من مجانه يدور ياهو الصاحه
طلع يدور منا ومنا .. مدت راسها : شنييييي
دارلها و مشى ليها : وبلابوش شعدج لفيتي .
- موش انت الكتلي روحي لراديون .
- رحتي ؟
- اي دكيت الباب طلعتلي بشرى كتلها امي تريد جاي بس انا جذب امي ما موديتني لجن رحت .......قاطعها
- اختصري .. شفتيها ؟
- جا غير جاي احجي شبلاك ؟
- خايبة اكضن راسج هاذ المصلبخ اطخنه بالحايط ، مردتي افادي و انت تذربنين براسي احجيي
- وعلي ما احجي
- جا خوش تعاي خل اوديج لستار
كضها و جرها ... نكزت : لا لا لا ... احجي احجي لا تكل الستار يجتلني والله .
- ياله احجي
- كتلها جنجر نشدني عنج بس هي ما رضت تكلي هدي و عوفي خله يولي .
- هي كالتلج خله يولي ؟
- جا انا ما اجذب .
- خوش ، روحي ياله
- جا كول مشكورة ، حب راسي و اتعذر مني .
- عدي نعال قياس ٤٤ اخلي يحب راسج يو تمشين مني ؟
- وعلي موصوجك .. هم زين ما تحبك ..
عيبت عليه و شردت .
ردت للبيت كضتها كواغد من اذانها : وين تخورين ولج ، من رديت من المدرسة وليجاي و انت ما لافيه ، وييييين جنتي.
- يمه رحت اعاون هاي جيرانه عجوز وما بيها حيل تكوم كشيت الها البيت و رديت ، شمالج وياي .
- ياهي هاي ؟
- وحدة غادي مسيجينة يمه وانا انكسر خاطري اعليها و رحت اعاوننها.
- ويو طلعت السالفة جذب
- جا انا ما اجذب .
هدتها و كالت الها : لا اطلعين بعد و يو طلعتي احش اجدامج .
- خوش يمه .
للعصر مشت كواغد لبيت سرحان و حجت وياها بشرى و كالت الها : وديت الجاي بيد جميرة جابته ليج
- يا جاي هاذ ؟
- موش جميرة اجت لينا كبل شواي و كالت امي تريد جاي .
- هااا اي اي لجن موش انا ، تلاكين اهديوة ودتها ، بس اروحن اردنلج الجاي
- يا ام ستار تردينه عليش انت عزيزة و البيت بيتج
- الله يسلمج يمه .
ردت للبيت كضت جلجول و ابتلشت بيها ...
من بعد ٤ ايام .. و امتد الامن بالسلف .. صاروا ياخذون شكو زلمة بالسلف و يجبرونه اعلى التجنيد الالزامي للجيش .
حاكم تجند
و ستار ..
وكريم ..
و فلاح ...
و اخوة كواغد
ازلام جثيرة من السلف .. تجندت الزامي بالجيش العراقي ... وزج صدام شباب العراق للجيش و جند ما يقارب ٨٠٠ الف عراقي .. استعداد للحرب .
جان راي الشيوخ بهالوضع محايد .. لا ساندوا صدام بالحرب .. ولا طلعوا ضده .. ولا منعو ولد عشيرتهم من الجيش .. كون صدام كان يقمع اي قوة توكف كدامه حق كان ام باطل .. فخوفا على ابناء عشيرتهم من التهجير .. سكتو و ظلوا محايدين بمواقفهم .
خنجر اصطنعله عاهه و سوا روحه ايده بيها خلل .. وما يجوزله السلاح .. فعفوه من التجنيد .. رغم الفحص اثبت ان ايده صحيحه بس هو تلاعب عليهم ويعرفونه وراه شلة شقاوات .. كتبله عفو من التجنيد ..
للشقاواة و العصابجية جان معاملة اخرى عند حزب البعث .. جانوا يكسبونهم كون هم شلة نكرية و الناس تهابهم .. فيستغلونهم لمهمات سرية للحزب ، بتواصل غير مباشر .
بس خنجر جان بعيد عن حزب البعث ، وما يعترف باحد لا حزب ولا ريس ولا عشيرة .. كل همه زناد .. يحوم اعلى زناد و يتوعدله .
ليما حرك جماعته .. تسبكوله اعلى الطريق العام .. و كضوه شلة شقاوجية .. سلبو سيارته .. وتوله سجين .. الاولى بصدره و الاخرى بصفاحه .. وطكوه ليما زركوه و ذبوه بالدرب و خذوا السيارة و شردوا بيها .
لاكينه ناس اعلى الدرب شايلينا و مسعفين بيه للمستشفى ، يوم كامل بالعملية و اهله ما يدرون عنه .
عمامه و عشيرته كلهم ظلو يدورون اعليه من كونه مفقود .. سرحان وعمامه ما خلو مجان ما دوروه بيه .. و الديرة كايمة كاعدة اعلى فكدت زناد .
اندكت الباب اعلى بيت حاكم ، طلعت كواغد تصيح : ياهوووو ياهوووووو .
ناصر : انا انا
فكت الباب : اجبل الخير ، سلامات
- جا مامش جلمة هلا
- عكب عملتكم ابتي ناطرين مني جلمة هلا .
مرت ناصر : جا الاصول هيج تكول
- الاصول ويا اليعرفون الاصول ، لجن ما اريدن ادشن بخطيتكم و اطلع عد الله كاطعة رحم ... هلا
وفكت ليهم الباب دش ناصر و هو يكللها : والله و متفضلة اعلينا بت شمخي .
- شرايدين ؟
- لينا بت عدكم و جايين نشوفها .
- يا صلوات اعلى محمد وال محمد .. صكد تضكرتو عدكم بت ، جا يرادلها بخت .
- ربني وانا اوليد اهلي ، بتنا يو لاله ؟
- حياكم دشو وشوفوها جا مانعيكم احنا ، حياكم .
دخلتهم جوا و صاحت : يممممه هديوة جيبي البت خاطر يشوفونها عمامها.
طلعت هدية و هي تلف بشيلتها ، عاينت عليهم : عليش تشوفونها شرايدين منها
مرت ناصر : جا بحلكج عظم مثل امج ما تكدرين تسلمين كبل لا تحجين .
- مامش سلام اعليكم و بتي ما اجيبنها .
كواغد : جيبيها يمه و خلهم يشوفونها .. ياله بتي
- يممممه .... قاطعتها
- امشي و جيبيها يمه .
- دشيت شلت البت و انا كلبي لاعب من جيتهم .. شعجب وشنجب اجو يشوفونها . كل عالمدة ساكتين اعليها و هسه جايين ؟
هذيتها و طلعت و حطيتها بحضن عمي ، شالها و حباها و هو يكول : شو هاي سمينه شتوكلونها حصو
كواغد : بچد جدها حاكم الله يحفظه و يخلي اعلى راسها و راس امها .. عبنها بت هديوة العزيزة .
مرت ناصر : و بت فليح شنهي نسيتي
- توج ضكرتيني بت فليح ، من عبنه بس بالاسم ابوها كل خير ما بيه .
ناصر : سوالف الكطع لا تحجين يكواغد
- انا الاحجي بيهن و يو فعايلكم الحجتهن ؟
- مصارين البطن تتعارك و ترد تشتغل فرد شغل و يردون اعلى مايهم و هاي الحياة جا شنهي تريدينها كلها ايام عز .
- يا عز هاذ اليطلع منكم
- الزلمة انجتل و اخذ جزاته و احنا سكتنا و ما حجينا و هساعه رايد مريته و بنيته يردن ليه .
- مامش الكم مرة عدنا ، و البت هاي ربيبتنا و بنيتنا ، مثل ما نسيتوها امس انسوها اليوم و هدو امها تعيش بحال سبيلها .
مرت ناصر : المرة مالها غير زلمتها و يو نطكت موش اول مرة تنطك ، الزلمة يجتل ويطك و يحط وحدة و اثنين و ما ينعاب ، العيب اعلى المرة التهد بيتها و ترضى تجابل اهلها و هي عزبة ، شنهي كعدتها ؟
كواغد : كعدة هنيا ولا زلمة اغم يطين عيشتها .
- ابني موش اغم
- لا علي العباس اغم و ما بيه خير ولونه بيه خير ما شال بت نفاس وطكها .. هاي هم مرة و تتحمل ؟
ناصر : الله يعين حاكم شلون حاملج اعلى السانج ، يفتهم ساعة الجاب البغدادية و حطها اعليج و جابلها من كون انت ما تتجابلين و بتج اعليج .. من حدر وكاحتجن ويا الزلم و مراددجن .. ما يحويجن زلمة وتنهجرن .
- دامها بتي مهجورة عليش جااينها ؟ هي راضية بهجرها ..و ان جان اعليه .. انت وال ثجيلك بخويطهم تروحون فدوة للذيال شيلتي ..
مرت ناصر : جا من كون احنا نروح لذيال شيلتج ، خلي شيلتج اعلى راسج و بتج عدج و بتنا عدنا
هدية : يا بت هاي التاخذونها .. توكم ضكرتو عدكم بت
كمت من مجاني و هميت اخذ بتي من ايدها ، جرتها عمتي و تكلي : ما الج بت يو ما رديتي ، البنية عدنا و ساعة التريدين بنيتج .. تردين لرجلج و تجابلينها .
- ابنكم ما اريدنا و يو يظل يوم من عمري ما ارضى اردن ليه .
- جا ظلي جابلي اهلج و انسي عدج بت
وكفت بوجهم كواغد و كالتلهم : رحبيت بيكم حسب الاصول ، و الاصول تكول تنطرون راعي البيت يرد ياله تاخذون من بيته و تطلعون .
ناصر : ساعة الناخذها بته احجي بالاصول ، البت بتنا و مردها لينا و حاكم ماله جلمة اعلينا .
رادت تسحبها منهم .. ما رضوا .. سحبو البت و طلعوا .. هدية فكدت اعلى بتها ، كامت ادك و تلطم و تصرخ
- بتي يمه اريدنها ، كتلج ما اطلعنها .. بتيييي يمه
- جا غير يو ابوج موجود و اهدنه اعليهم ، انا هسه ياهو الاحشمنه و يروح يجيبها لينا .. كليلي
- اريدن بتي يمه ، اموتن يو ما ردت لحضني الليلة .
جمارة : انا اروحن ليهم و ابوكنها .
- شتبوكين منها اسكتي ، خلني اعرف شتصرف
- يمه بتي ، اااااااخ يمه بتي ... راحت من ادييييييه يمه
وكامت تلطم اعىى راسها و تصرخ و كواغد و لاله يكضن بيها و جميرة تهدد ليما طاحت هدية و انسحت روحها .
كضتها كواغد و شالتها بعربانه مالت مطي و مشت بيها للمضمد .. قاسلها الضغط و كاللها هبوط .. اطاها دوا وردن للبيت .. و هدوة فاكدة اعلى بتها و تبجي ..
راديون ساعة السمعت هدية طايحة و هاذ حالها ، بلغت ردحة : عمه انا رايحة لبيت كواغد
- وين رايحة عمه و الناس عينها اعليج ، واخيج مامش علم منه و اخوج مدوهن بالدواره اعليه .. اكعدي
- اخيي مالي غرض بيه و يو مات ما اكولن الله يرحمه .. و كعدت البيت يا عمة ضاكت صدري ، خليني امش لهديوة اجابلنها و افضى بهمي ويا همها .
- جا يو ما عيب من الناس انا اخذنج لجن الناس رايحة راده اعلينا ، خليها يومين و نروح ليهم انا وياج .
- راح اتبوش و امش محد يعرفني ، بس اريدن اشتمن هوى الله و افضي البدليلي راح اطكن من الكعدة .
كوة قنعيت عمتي اطلع من القصر ، تبوشت و اخذت ياسر ابن زناد .. و طلعت من البستان و مشيت من البستان ليما وصلت للشارع ، طلعت امشي اعلى الشط .
اهيس بروحي ضايعة و ضيعيت كلشي .. لا ولف و لا ابو .. حتى امي و اخوي باعوني برخص و اطوني الناس ما رحموني و طلعوا اثام جدي براسي .
مشيت لبيت حاكم من كونه كله حريم ومامش زلمه .. خاطر اخذ راحتي ويا هديوة و اعلى نعاوي عمتي ام ستار .
وصلت للبيت .. دكيت الباب و دشيت ، تلكتني عمة كواغد و لاله .. دشيت لهديوة و كعدت وياها .. كسرت خاطري و اهي تشكي و تبجي اعلى ابنيتها ، ظليت مجابلتها و ابجي .
ظليت عدهم لليل ماخذة راحتي .. عمة كواغد ما رضت اردن للبيت وكالت : يو نشدو عنج انا اكللهم عطليتها
كاعدين بالليل تونا كفينا العشا و جاي نسوي جاي ، و انا واكفة بالبيت ماخذة راحتي .. و اسولف ويا لاله و هي تحضر بالجاي .. اندكت الباب و طلعت عمتي كواغد ..
انا جويعدة بالمطبخ .. و المطبخ يصير وجهه اعلى الهول ، يو ردت تطلع منه لزوم تدش الهول خاطر تمشي للحوش يو لاي حجرة بالبيت .
سمعت حس سلطان و هو يحجي : انا موش فاضي لهالسوالف .. و ناصر حكه .
كمت اعلى حيلي و مشيت اتلبد منهم و صرت اعلى صفحة .. دش سلطان وولده جاسم و جسام وياه .
كعدوا بالهول و كواغد تحجي : حاكم و ستار تجندوا ومامش احد عدي ، شلون احشم اخوتي اعلى ولد اخوك ؟
سلطان : سهلة سهلة امش لبيت ناصر و نشوف وين تصل ، جايج وينه .
كواغد : لاله يمه ، جايجن .
سلطان : يمتى التحق ستار و حاكم .
- ستار كبل اسبوع .. و حاكم كبل ٤ ايام .
- انا نص ولدي تجندوا .. جسام و جاسم مخلصين خدمتهم .. بعد شننطر من صدام .
كواغد : صدام موش سالفتي ، سالفتي عد ناصر ، البت ما ترضى ترد .. و فليح موش ابيته ، شنهي ردتها ؟
- انا احجي وياهم لجن الحك الهم .. بتهم و حكهم .
- يا حك هاااذ ، جاعد ابيتي و ما اريدن اطولن بالحجي ، يو ما شك كصت البت ساعة الجابتها ، حجاية الحك عليش ما تحجونها .
اغتاض سلطان من حجايتها ، وانا واكفة استمع ليهم ، شالت لاله الصينية، وكفت و كلت الها ؛ هدي من ايدج انا اخذها
- يا دية عيب وعلي
- مامش عيب ، رايدة اغيضنهم بدشتي اعليهم .. هدي
لفيت شيلتي اعلى نص شعري ، و خذيت صينية الجاي من ايد لاله و دشيت اعليهم بلا سلام ، سلطان يحجي ويا علاة حسه ، ساعة الشافني ، سكت : بت ضويحي هنا ؟
سكتت كواغد و هي مغتاضة ، لا جاوبيته ولا رديت ، حطيت الجاي جدامه ، و حطيت الصينية جدام جسام و جاسم .. عاينيت لجسام و هو يعدل كعدته و متفاجئ بوجودي .
ما كدر يسيطر اعلى السانه ، و حجه : شعدج هنا ؟
ما رديت عليه ، عفت الصينية و طلعت برا .. هد الجاي و تبعني ليبرا : تعاي جاي
عاينت اعليه و انا امشي للحب ، شلت الغلك .. و درت ليه : شرايد
- شعندج هنا ؟
- عليش تنشد و انت ياهو و ابررلك جيتي ؟
تكرب : لهساع ما خلصت عدة طلاكج و لهساعج اعلى ذمتي ، عدلي فجج و احجي عدل .
- هد فجي بمجانه و رد اكعد بكتر ابوك ولا تطلع عن شوره ... وامش عني .....يتبع
يتبع الفصل السادس والأربعون اضغط هنا