رواية حكاية قمر البارت العاشر 10 بقلم ياسمين علي
رواية حكاية قمر الفصل العاشر 10
سائر : نور .. انا مش مصدق .. اخيرا اتصلتي
نور : عامل ايه ياسائر
سائر : انا بقيت كويس ..اول لما سمعت صوتك
نور : انا بتصل بيك علشان اقولك اني فكرت ف اللي اتكلمنا فيه آخر مرة
سائر : نور لو سمحتي متستعجليش وخدي وقتك ومتتسرعيش انا والله بحبك وعاوزك ومش هبعد عنك تاني و ....
نور فرحت من كلامه : انا كنت عاوزة اقولك اني موافقة ياسائر
سائر بفرحة : بجد يانور
نور : اه بجد .. بس عندي شرط
سائر : انا هنفذ اي حاجة تطلبيها مني قولي
نور : انا وانت هنعيش هنا ومش هنسافر
سائر : اييه !! ايه اللي بتقوليه دا يانور
نور : زي ماسمعت ياسائر .. انا مش هسافر بعد الجواز .. انا هفضل هنا وسط اهلي ومش هسيبهم
سائر : يانور انتي عارفة اني مش عاوز اكون هنا
نور : بس دي مش مشكلتي انا ياسائر ..
سائر : يعني ايه مش مشكلتك يانور .. اومال ازاي بتحبيني
نور : بحبك اه بس مش هسيب اهلي علشانك .. وبعدين ترجع انت ف لحظة تسبني
سائر : كلامك دا يدل ع انك مش واثقة فيا يانور
نور : دي الحقيقة
سائر : اومال وافقتي ازاي وانتي مش واثقة فيا
نور : عندي امل انك ترجعلي ثقتي فيك تاني
سائر : ووجودي هنا هو دا اللي هيرجعلك الثقة تاني ؟
نور : وجودك هنا علشاني هو اللي هيخليني ارجع اثق فيك تاني ياسائر
سائر : ماشي يانور انا مش هسافر علشانك ..
نور فرحت ومردتش
سائر : سكتي ليه
نور : ممم مافيش كنت هتكلم اهو
سائر : طب انا هروح اكلم بابا علشان نحدد معاد مع اونكل احمد
نور : لالالا طبعا .. مش دلوقتي
سائر باستغراب : ليه مش دلوقتي
نور : لما احس انك فعلا هتستحمل تقعد هنا .. بعدين ناخد الخطوة دي
سائر : انتي شايفة كدا
نور : اه اه طبعا
الباب خبط
نور : ادخل
عايدة : العشا جاهز ياهانم
نور : طيب ياعايدة انزلي وانا جاية وراكي
عايدة : حاضر ياهانم
نور : انا لازم اقفل ياسائر دلوقتي
سائر : ماشي يانور بس كلامنا مخلصش لسه
نور : ماشي بعدين هكلمك .. باي باي
__________________________
قمر عمالة تلف حوالين ليل
ليل : في ايه ياقمر مش عارفة اركز منك
قمر : لا انا كنت جاية اقولك لو عاوزة اعملك سندوتشات ولا حاجة
ليل : لا ياستي شكرا مش عاوزة
قمر : طب كوباية شاي بلبن
ليل : مبحبهوش اصلا
قمر : طب اعملك حبة شاي سادة
ليل : مش عاوزة ياقمر الله
قمر : طيب من غير ماتتعصبي خلاص .. الحق عليا
ليل : مش هتعصب اهو .. اتفضلي
قمر رجعت خطوتين : انا بس كنت عاوزة اتكلم معاكي حبة
ليل : هي مش باينلها مذاكرة انهاردة .. اتفضلي ياقمر عاوزة ايه
قمر : كنت عاوزة اقولك عاملة ايه ف كليتك .. اوعي يكون حد بيضايقك
ليل : لا انا كويسة
قمر : هو انتي وكنزي الصبح روحتوا مع بعض الكلية
ليل : اه
قمر : مين وصلكم
ليل بتوتر : اسر .. بس انا مكنتش هركب .. هي كنزي اللي اصرت
قمر : اه صح فكرتيني بكنزي مش انا كلمت نجلاء
ليل : قالتلك ايه
قمر : شاكة ان في حد ف دماغها
ليل : كل دا علشان رفضت العريس يعني
قمر : مش عارفة دي امها اللي بتقول مش انا
ليل : الله اعلم
قمر بخبث : تفتكري يكون الواد اسر اللي ف دماغها
ليل وشها اتقلب : لا طبعا مستحيل
قمر : مستحيل ليه يعني
ليل : اسر مش بيحبها طبعا
قمر بصتلها
ليل : ولا هي كمان مش بتحبه
قمر : وانتي عرفتي منين
ليل بتوتر : مجرد توقع عادي .. كنزي أكبر من اسر ومظنش تفكر فيه يعني
قمر : تصدقي عندك حق .. راحت عن بالي ازاي دي .. طيب اما اقوم انا بقا اشوف البت تونة نامت ولالا
ليل : اه روحي شوفيها
قمر : يلا تصبحي ع خير
ليل : وانتي من اهله
قمر خرجت
ليل بتكلم نفسها : يارب استر و ماتكونش لاحظت حاجة
________________________
نور نازلة ع السلم وع وشها الابتسامة
احمد : ايه يانور اتأخرتي ليه هي عايدة مقالتلكيش تنزلي
نور : لا يابابي قالتلي وانا نزلت وراها علطول
اسر : اهو زين جه كمان حماته بتحبه
زين : ريحة الاكل تجنن
احمد : عملت ايه ف الشغل
زين وهو بيأكل : كله تمام .. والشحنة هتتسلم كمان يومين .. ممكن تسبني اركز ف الاكل اللذيذ دا
احمد : الف هنا
اسر : دوقني الورق عنب دا كدا يا زين .. شكله يفتح النفس
زين : لا طعمه احلي من شكله بكتير
نور : فعلا الاكل حلو اوي انهاردة وفي اصناف مختلفة ..
كريم بيأكل وهو مبتسم وعارف سبب حلاوة الاكل ايه
اسر : عايدة عاملة عظمة انهاردة.. لازم نشكرها
احمد : الاكل ده مش نفس عايدة
نور : يمكن دادة نجلاء ساعدتها
اسر : انا بقول نجبها نسألها علشان نعرف هنشكر مين ....
احمد : عاااايددة يااعااايدة
زين مش موقف اكل : انا عن نفسي مش فارق معايا مين عمل الاكل . . انا ميت من الجوع اصلا ومصدقت اكلة حلوة زي دي
عايدة : خير يابيه في حاجة
زين : عايدة حقيقي تسلم ايدك .. انا هأكل صوابعي من جمال الاكل
عايدة : صحة وهنا ع قلبك يا زين بيه .. بس الحقيقة مش انا اللي عاملة الاكل
نور : شوفتوا زي مانا قولت يبقا دادة نجلاء مافيش غيرها
عايدة : لا نجلاء معملتش حاجة هي كمان
احمد : اومال مين !!
زين : يبقا اكيد الاكل جاهز
عايدة : بصراحة الست قمر هي اللي عملت الاكل انهاردة
الكل : ايييه
زين شرق واسر عمال يخبطله ع ضهره : انت كويس يازين
احمد : ازاي يا عايدة الكلام دا .. اومال انتي هنا بتعملي ايه
عايدة : والله يابيه هي اللي صممت .. حتي أسأل الست نجلاء
زين : يبقا اكيد حطت سم ف الاكل علشان تخلص مني
احمد : ايه الكلام اللي بتقولو دا يا زين
زين : انت مش سامع دي بتقولك صممت
عايدة : لا يابيه سم ايه الي تحطه .. دي كلت منه قدام عيني وانا اكلت و الست نجلاء كلت .. كلنا أكلنا وزي الفل اهو
احمد : طب روحي انتي يا عايدة .. وتاني مرة الموضوع دا ميتكررش
عايدة : اللي تشوفوا يابيه عن اذنك
احمد : مش عيب اللي قولتوا ع قمر دا يا زين قدام عايدة
زين : طيب قولي دي ايه يدخلها المطبخ اكيد ف سبب
اسر : والله ياريت تدخل كل يوم .. دا نفسها حلو اوي
زين : اه مانت ليك حق تطبلها
نور : غريبة يا زين دانت كنت شوية وهتاكل دراعنا
زين : الكلام دا قبل مااعرف مين اللي عمل الاكل ..
نور : ومالها قمر يعني ..
زين : اسمها لوحده يسد النفس .. انا طالع
اسر : مش هتكمل اكل
زين : شبعت
اسر : احسن بردك
_____________________________
مر الايام ع أبطالنا منهم االي حياته عادية زي زين وقمر مازالوا واخدين موقف من بعض وبيحاولوا ميتقابلوش أو يكون ف بينهم كلام .. ومنهم اللي حياته كويسة جدا زي اسر وليل اتقربوا من بعض جدا بس لسه معترفوش لبعض بحبهم .. ونور وسائر راجعوا زي الأول واحسن ... اما بنسبة لحازم كان مشغول طول الفترة دي ف شغله وف نفس الوقت بيفكر ف كنزي بس مش عارف ياخد قرار وكنزي مركزة ف دراستها و آخر سنة ليها .. ومنهم اللي مدمر زي صافي تعالوا نشوف حصل فيها ايه !
________________________________
صافي منهارة : انا هتجنن .. ازاي اسر يبعد عني كل الفترة دييي ميحاولش يطمن عليا حتي ... انا خلاص حياتي وقفت من غيره .. كل دا بسببها خدته مني
سهر : اهدي ياصافي ياحبيبتي مش كدا .. هيحصلك حاجة
صافي : اهدي ازاي انا خلاص اتدمرت .. اسر كان كل حاجة بنسبالي ... دا مبقاش طايق يبص ف وشي حتي ..
سهر : طيب سيبي الموضوع عليا وانا هحله
صافي : تحليه !! انتي السبب اصلا انتي اللي خلتيه مش طايقني
سهر : الحق عليا اني كنت بجبلك حقك من الجربوعة دي .. ياستي انا غلطانة اصلا انا قايمة اعملي اللي تعمليه
صافي : لالا متسبنيش انا اسفة يا سهر والله .. انا مش عارفة انا مالي بقيت عصبية دايما ونفسيتي وحشة
سهر : انتي بتاخدي الدوا اللي عطيتهولك
صافي : اه كنت باخده بس خلص .. هو اللي كان بيهديني .. لما انزل هبقا اجيبوا
سهر : لالا لا لالا .. تجبيه منين
صافي : في ايه يا سهر . . اجيبوا من الصيدلية طبعا مالك
سهر : لا اصل العلاج دا بيجيلي مخصوص من برا .. مش موجود منه هنا .. انتي متتعبيش نفسك خالص .. انا هجبهولك .. بصي استني .. انا لسه جيلي نوع تاني احسن من اللي اديتهولك ميت مرة انا جربتوا .. خدي ياحبيبتي العلبة اهي دا هيريحك جدا .. ولما يخلص قوليلي وانا هجبلك غيره متشغليش بالك
صافي حضنتها : ياحبيبتي انا متشكرة اوي يا سهر ع وقفتك جنبي .. واسفة تاني اني اتعصبت عليكي متزعليش مني
سهر : ازعل منك انتي ... دانتي اختي الصغيرة وحبيبتي ... عمري ماازعل منك ابدا
صافي : ربنا يخليكي ليا يا سهر
سهر بابتسامة : يارب ياحبيبتي
______________________
سارة : وليد عامل ايه .. غريبة يعني جيت الكلية مش عادتك
وليد : امشي يعني
سارة : لالا طبعا خليك .. تعالي اقعد معايا .. اصل مافيش حد جه النهاردة غيري
وليد : صافي مجتش ولا ايه
سارة : معرفش عنها حاجة من وقت خناقتها مع ليل ... و بكلمها مش بترد
وليد ماسك الموبايل ومش مركز معاها : مممم ماشي انا هبقا اكلمها اشوفها
سارة : ماشي .. بقولك ايه ماتيجي نفطر انا لسه مفطرتش وجعانة جدا
وليد : .....
سارة : وليد انت سامعني !!
وليد بيبص حواليه : اه اه معاكي .. بسس
سارة : بتدور ع ايه
وليد : بدور علي ... اه اهيي جت و شاور بايده وهو مبتسم
" سارة بتلف تبص لقيت بنت جاية "
هنا : هاااي ليدو عامل ايه ..
وليد : انا زي الفل والله
هنا : اخيرا جيت الكلية
وليد : والله انا جاي مخصوص علشانك .. لو اعرف انك قمر كدا كنت جيت من زمان
هنا : يابكاش .. بصيت لسارة .. سوري مخدتش بالي انك واقفة ..
سارة : ولا يهمك
هنا : طب ايه مش تعرفنا
وليد : دي سارة .. حكيتلك قبل كدا عن سارة وصافي واسر هما أقرب ناس ليا عشرة عمر اصحاب واخوات كدا
سارة بضيق : اه اخوات وأصحاب
وليد : طب ايه هنفضل وقفين كدا .. تعالي نروح نقعد ف مكان
هنا : اه ياريت يلا .. تيجي معانا ياسارة ولا عندك محاضرات
سارة : اه عندي محاضرات روحوا انتو
هنا : طيب .. اتشرفت بمعرفتك .. يلا بينا يا وليد
وليد : يلا ..
____________________________________
قمر قعدة لوحدها وبتفكر : وبعدين ياقمر هتفضلي عايشة عند الناس كدا وانتي معاكي اللي يعيشك انتي واخواتك ... لالا بس انا مش عاوزة حاجة منه هو راح وسابنا من زمان اوي وقدرنا نعيش من غيره هو وفلوسه .. انتي بتقولي ايه بس انتي نسيتي انتي سيبتي دراستك و اشتغلتي وتعبتي قد ايه علشان تأكلي اخواتك بس وف الاخر كله راح منك ف ثانية .. هترجعي كل دا ازاي هتشتغلي من اول وجديد ولا هتمدي ايدك للناس .. مش من حقك ترفضي الفلوس دي .. دا حق ليل كمان .. متحرمهاش منه ..
قمر بصوت مسموع: يااارب ساعدني ودلني ع الصح
طلعت الورق والحاجات اللي ابوها سابهم ليها وبتقلب فيهم لقيت ظرف صغير فتحته "جواب من ابوها " :" بنتي الغالية قمر .. اكتب لكِ هذا الجواب واعلم مدي كرهك الشديد لي بسبب ما فعلته معكم ... كم اتمني ان اقول هذا الكلام امامكم واعتذر علي ما فعلته .. اعلم ان الاعتذار لا يوفيكم حقكم .. كم اشتاق لكم و اتمني ان يعود بي الزمن .. لا اريد منكم سوا المسامحة علي ما فعلته ... احبك كثيرا ابنتي الغالية قمر "
قمر قفلت الجواب وغمضت عينها وبدءت تعيط وتفتكر كل اللي شافتوا من ابوها اللي عملوا فيها وف امها وقد ايه كان قاسي عليها لانها اتولدت بنت مش ولد زي ماكان عايز ..
قمر : اسامح ازاي يارب .. مش قادرة انسا صعب صعب
تونة : قمرر انتي بتكلمي نفسك
قمر فاقت : تونة انتي هنا من امتا
تونة : من ساعة صعب صعبب .. اتجنيتي و بتتكلمي مع نفسك
قمر : لا يا تونة انا بكلم ربنا
تونة : هو فين ربنا .. هو كان هنا
قمر : ربنا ف كل مكان يا تونة موجود سامعنا وشايفنا .. لما بكون مخنوقة افضل اتكلم كدا وهو يسمعني ويساعدني
تونة : بجد ياقمر يعني انا ممكن اكلمه
قمر : أيوة طبعا ياحبيبتي
تونة بفرحة : ماشي
قمر : تحبي بقا احطلك تأكلي
تونة : اه اه انا جعانة اوي
قمر : عنيا ليكي .. اشيل الحاجات دي بس واحطلك .. عملالك كفتة تستاهل بقك
تونة : هيييييييه
______________________________
سارة داخلة بيتها وهي زعلانة من اللي حصل
نادر : سارة انتي جيتي ياحبيبتي
سارة : أيوة يابابا
نادر : كنت عايز اتكلم معاكي
سارة : ممكن نأجل الكلام علشان تعبانة وعاوزة ارتاح
نادر : لا ياسارة لازم تعرفي اني قريب هسافر عندي شغل برا وهقعد فترة طويلة هناك
سارة : وانا ايه المطلوب مني
نادر : المطلوب منك انك تسافري لوالدتك ف اسكندرية لحد ماارجع
سارة : اسافر لماما .. انت يابابا اللي بتطلب مني كدا
نادر : اه ياسارة .. انا مش هطمن عليكي وانتي هنا لوحدك
سارة : طب ودراستي وحياتي
نادر : بسيطة تنقلي اسكندرية
سارة : بسيطة ازاي يعني !!! انا مش هنقل حاجة انا هفضل هنا
نادر بعصبية : وانا مش موافق مش همشي واسيبك هنا لوحدك
سارة : خلاص متمشيش
نادر : يا سلام يعني عايزني اضيع فرصة الشغل من ايدي علشان اقعد جنبك
سارة بتعيط : مانت كدا بتضيع حياتي وصحابي مني وكل حاجة
نادر : هما فين صحابك دول ياسارة .. مبشوفش حد منهم .. دايما انتي معاهم وهما مش معاكي وعلطول لوحدك .. اسمعي الكلام وروحي عيشي مع مامتك واختك ف اسكندرية .. هما دول اللي يستاهلوا تكوني معاهم بس .. فكري كويس ياسارة
سارة دخلت ع اوضتها من غير ماترد وقعدت تعيط كل حاجة ضدها هي فعلا عايشة لوحدها مالهاش حد .. حتي اللي هي موجودة علشانه هنا مش سأل فيها مبقتش عارفة تعمل ايه !!
______________________________
في الشركة
السكرتيرة : الأستاذ حازم مستني حضرتك برا
زين : دخلي بسرعة
حازم دخل سلم عليه وحضنه
زين : ايه يابني الغيبة دي كلها فينك
حازم : الشغل كان حاطط عليا جامد
زين : تشرب ايه
حازم : ولا اي حاجة انا جاي اتكلم معاك شوية
زين : خير ياحازم اتكلم
حازم : انا شكلي وقعت يا زين
زين : وقعت ازاي
حازم : قصدي حبيت يعني
زين : لا متقولش اخيرا ياراجل .. دي مين دي بقا اللي وقعتك
حازم : حد انت تعرفه
زين : مين !!
حازم : كنزي
زين : بجد دا من امتا
حازم : من وقت ما قلبت عليا العصير وانا بفكر فيها
زين : علشان كدا بقا كل شوية داخل طالع علينا.. وانا اللي فاكر انك بتيجي علشاني اتاريك عينك ع البت
حازم : بصراحة اه .. مع ان شخصية كنزي دي مكنتش ف بالي خالص ولا عمري فكرت ف شخصية كدا .. لا ومختلفة عني نهائي اللي هو لو حد كان حكالي عنها من غير مااشوفها كنت استحالة حتي افكر فيها . . بس مش عارف
زين : العب .. دانت واقع ع الاخر بقا .. طب هي ايه رأيها
حازم : بتحبني
زين : انتو اتكلمتوا واعترفتوا لبعض بقا .. وانا آخر من يعلم
حازم : لا والله دانا سمعتها صدفة بس هي متعرفش مشاعري ناحيتها
زين : طيب ماتتقدملها مستني ايه
حازم : ضغط الشغل عليا الفترة دي جامد .. بس مش سايبة تفكيري.. وخصوصا ان متقدملها عريس تاني وامها هتغصبها عليه
زين : دادة نجلاء تعمل كدا مستحيل
حازم : لا هتعمل كدا علشان شاكة فينا وحاسة بحاجة غريبة عندها حق انا لازم اخد خطوة ف الموضوع دا و ...
*التليفون رن
زين : استنا ياحازم .. أيوة.. طيب دخليه .. ماشي
حازم : فيه ايه
زين : حماك عاوزني
سامح دخل
سامح : ازيك يا حازم عامل ايه
حازم : الحمدالله انا كويس
زين : خير يا عم سامح
سامح : الأستاذ احمد مستنيك ف مكتبه
زين : طيب قوله عندي شوية حاجات كدا هعملها واروحله
سامح : ماشي يابني .. عن اذنك
موبايل سامح رن .
سامح : أيوة ياختي عاملة ايه .. والعيال عاملين ايه .. لامؤخذة يااستاذ زين
زين : خد راحتك يا عم سامح
روحية : انا بخير الحمدالله ياسامح والعيال زي الفل .. انا بتصل بس علشان اعرف ردك ف الموضوع اللي كلمتك فيه
سامح : موضوع ايه ياروحية
روحية : يووة ياسامح انت نسيت .. موضوع جواز كنزي
سامح : اه اه افتكرت .. والله لسه البت مردتش عليا
روحية : يعني ايه الكلام دا .. دا خالد خلص جيشه ونزل ومستني الرد علشان يجيلك
سامح : خالد خلص جيشه
حازم رفع حاجبه
زين بصوت واطي : مالك في ايه
حازم : خالد دا العريس
زين : طيب الحق نفسك بقا الواد خلص جيشه وممكن يجي ف اي وقت
حازم : انت شايف كدا
زين : أيوة طبعا يلا
سامح : طيب ياروحية خلاص هكلمها تاني واعرف ردها واقولك .. سلميلي ع جوزك والعيال.. يلا سلام ياحبيبتي سلام
.. معلش يا زين يابني صدعتكم
زين : لا صدعتنا ايه دا خير ما عملت
سامح : ها !
زين : اقصد انك تتكلم هنا احسن ماتتكلم برا
سامح : أيوة أيوة فهمتك .. يلا اسيبكم انا بقا
زين زق حازم : عم سامح استنا بس حازم كان عاوزك ف موضوع مهم
سامح : خير يابني اتفضل
حازم متوتر : انا ياعمي كنت عاوز اطلب ايد بنتك كنزي
سامح : بنتي كنزي
حازم : اه
سامح : بس يابني دا في واحد متقدملها قبلك
حازم قلب وشه
زين اتدخل بسرعة : بس يا عم سامح .. كنزي لسه مقالتش رأيها
سامح : أيوة صح كنزي لسه مقالتش رأيها . . الله انت عرفت منين يا زين
زين : احم احم .. ماهو حضرتك لسه قايل دلوقتي .. انا من رأي انت تسأل كنزي وتخيارها بين حازم والعريس التاني دا
سامح : حاضر هعمل كدا بس لو البت موافقتش عليك يااستاذ حازم .. احنا هنفضل حبايب
حازم ابتسم : طبعا طبعا .. انت أسألها بس انهاردة ورد عليا
سامح : ماشي يابني واللي ربنا عايزه هيكون .. يلا عن اذنكم
زين : اتفضل
حازم : يلا يا زين استأذن انا كمان
زين : خلاص خدت مصلحتك وماشي
حازم ضحك : لا والله بس انا لسه هرجع الشغل تاني
زين : ماشي ياحازم ربنا معاك
__________________________
نور : سائر عامل ايه ... وحشتني
سائر : وانتي كمان والله .. انا لسه مخلص شغل وداخل البيت اهو ..
نور : ياحبيبي ربنا معاك .. اونكل فاروق عامل ايه وصافي
سائر : كويسين .. نور كنت عاوز اكلمك ف موضوع مهم
نور : خير ياسائر اتكلم
صوت صريخ من بعيد
نور : ايه الصوت دا عندك
سائر : مش عارف اقفلي دلوقتي يانور.. أشوف في ايه
نور : ابقا طمني ياسائر ونبي
سائر : ماشي سلام سلام
طلع يجري ع فوق
هدي طالعة من اوضتها مفجوعة : الصوت دا جاي منين ياسائر
سائر بتوتر : مش عارف . . تقريبا عند صافي
هدي : صافي يلا نشوفها بسرررعةةة
دخلوا الأوضة.. وصافي عمالة تكسر ف الحاجة وتصرخ وهما مصدومين
هدي : صااافي
سائر : ايييه اللي بتعملييه دا يامجنونة
صافي بعصبية : ابعدددووواا عنننييي .. اخرجوووا مش عاوزة اشوف حد .. انا بكرهكواا ابعدوا عني .. انا مش عاوزكم
هدي بتقرب منها : اهدي ياحبيبتي بس
صافي بعصبية : ابعدييي عني متقربيييش
هدي : حاضر حاضر بس اهدي بس فاهمينا مالك
سائر : حبيبتي عرفيني بس مين مضايقك ... وانا هاخدلك حقك بس اهدي علشان خاطري
صافي بدءت تعيط : انا لوحدييي ..
سائر : مين قال كدا احنا جنبك اهو
صافي : انا مش عاوزكم انتو .. انا عاوزة هو
هدي : هو مين
صافي : اسر .. بس اسر بيكرهني .. اسر بعد عني علشان مش بيحبني .. خدته مني .. سابني علشانها .. *صرخت جامد* سااابني علشااانهااا
هدي : اهدييي بس مين قال ان هو سابك .. انتي مش قولتيلي ان هو زعلان منك بسبب اللي عملتيه .. هو هينسا الزعل ويرجع يكلمك
صافي : مش هيكلمني .. مش عاوز يشوفني خلاص اسر ضاااع منيي
سائر : انا مش فاهم حاجة
هدي : استني ياسائر .. اسمعيني يا صافي ياحبيبتي .. انا عاوزكي تهدي دلوقتي .. اسر مضاعش ياما زعلتوا من بعض عادي .. اوعدك ان هو هيكلمك بس انا عاوزكي تهدي
صافي : بجد ياماما هيكلمني بجد
هدي : أيوة ياحبيبتي علشان خاطري اهدي
صافي : امتا امتا قوليلي هيكلمني امتا
هدي : بكرا
صافي : بجد بجد بكرا .. *مسكت المهدأ اللي سهر اديتهولها وخدت منه واحدة* .. انا كدا ههدا وهبقا كويسة وهنام علشان اصحا القيني بكرا واسر يكلمني .. بجد ياماما هيكلمني
هدي : أيوة ياحبيبتي .. نامي وارتاحي دلوقتي
صافي : حاضر .. يلا اخرجوا علشان انام يلا
هدي : يلا ياسائر
سائر خرج : انا عاوز افهم .. ايه موضوع اسر دا .. وازاي تعمل كدا ف نفسها علشانه
هدي : صافي متعلقة باسر من زمان ياسائر .. صحوبيتهم قلبت معاها بحب ..
سائر : وهي اللي بتعملوا دا حب .. دا جنان
هدي : معاك حق بس هي اول مرة يحصلها كدا .. علطول بيتخانقوا عادي .. اول مرة اشوفها ف الحالة دي
سائر : طب وانتي هتعملي ايه .. ازاي تعشميها ان هو هيكلمها بكرا .. ممكن ميكلمهاش
هدي : متقلقش انا هتصرف
سائر : هتعملي ايه يعني فهميني
هدي : هروحله
__________________________
سامح : السلام عليكم
نجلاء : وعليكم السلام .. سامح جاي بدري يعني
سامح : الأستاذ احمد خلص شغل بدري
نجلاء : طيب ياخويا احضرلك العشا
سامح : لا استني عايزك
نجلاء: خير ياسامح
سامح : خالد خلص جيشه ومستني ردنا
نجلاء : قولو موافقين طبعا
سامح : هي كنزي وافقت
نجلاء : اه وافقت
كنزي خرجت من الأوضة: لا يابابا انا موافقتش ع حد
نجلاء : انتي بتتصنتي علينا يا كنزي
كنزي : أيوة ياماما بتصنت .. طلما الموضوع ليه علاقة بمستقبلي
سامح : استني يا نجلاء دا مش وقته .. بنتك بتقول مش موافقة
نجلاء : هي مش عارفة مصلحتها فين
سامح : بس مش دا اللي اتفقنا عليه يانجلاء.. وبتكذبي عليا تقولي البت موافقة
نجلاء : انا اسفة ياخويا بس غصب عني .. الفرصة متتعوضش
سامح : فرصة ايه يانجلاء وهو آخر راجل يعني .. قولتلك البت الف واحد يتمناها
كنزي : ريحوا نفسكم انا مش موافقة لا عليه ولا ع غيره . . ومش عاوزة اتجوز اصلا .. انا عاوزة اقعد معاكم .. انتو زهقتوا مني ولا ايه
سامح : لا ياحبيبتي تنوريني هو انا ليا غيرك .. وكدا يبقا انا خدت منك ردين مش رد واحد
نجلاء : ردين ايه
سامح : اصل كنزي جالها عريس تاني انهاردة
نجلاء بفرحة : بجدد ياسامح
كنزي : يلاهوووي هو انا خلصت من الاول لما تجبلي التاني .. *طلعت فوق الكنبة* اسمعوووني بقا انتو الاتنين.. دا قرار منييي اهو وانا بكامل قوايا العقلية ..ومش هسمح لحد يفرض عليا الجواز سامعة يانوجا
نجلاء : سامعة ياختي اقعدي جنبي ياموكوسة .. بدل ماتتجوزي وتجيبلك شوية عيال كدا
كنزي : انا مش هتجوززز ياماما.. مش هتجوز.. مش هتجوز . . مش عاوزة اتجوز ياستي مش عاوزة
سامح : خلاص انزلي من فوق لتقعي ... وتعالي اتصليلي بالراجل دا اكلمه اقولو انك مش موافقة
كنزي : ايوةة مش موافقة ومش هوافق .. يعرفني منين هو علشان يتقدملي .. اتصل بيه واشتمه كمان
سامح : لا عيب يا كنزي هو الراجل عمل ايه يعني .. خدي الموبايل اهو طلعيلي اسمه عبال مااغير هدومي علشان هو مستني ردي انهاردة
كنزي : مستعجل اوي بسلامته ... دانا لو اعرفه بس همسكه افشفش دماغه .. صح يابابا هو اسمه ايه
سامح : الأستاذ حازم
نجلاء وكنزي : حازم ميين !!!!
سامح : الأستاذ حازم صاحب زين .. متعرفهوش ولا ايه
كنزي بصدمة : الظابط حازم
سامح : أيوة هو دا
كنزي : اييييه
نجلاء : هيهي .. قلبي عندك يانوسة ياحبيبتي .. انا اقوم احضر العشاء
كنزي : استني ياماما انتي راحة فين.. ساعديني ونبي اتصرفي
نجلاء : انا مالي ياختي مش عملتي فيها خفاش وطيرتي ع الكنبة .. ومش عاوزة اتجوز يابابا .. انا عاوزة اقعد جنبكم ... اشربي بقا
كنزي : لالا مانا مكنتش اعرف ان هو حازم دا .. ونبي ياماما ساعديني .. قولي لبابا اني موافقة
نجلاء : لا مش هيصدقني .. مش انتي كدبتيني قدامه .. مش هقدر اتدخل قوليلو انتي
كنزي : استني بس ياماما انتي راحة فين وسيباني
نجلاء : مش فضيالك ياحبيبتي
كنزي : لا لا افضيلي مش انتي عاوزة تفرحي بيا ..
نجلاء : ابقا افرح بنجاحك بقا ياكوكو
كنزي : لالا افرحي بجوازي احلي
نجلاء : مالك يابت ماتنشفي كدا .. هو الواد دا واكل عقلك للدرجة
كنزي : بحبه ياماما .. انشالله يخليني ليكي لتساعديني..
نجلاء : انتي كدا بتدعي عليا
كنزي : اهئ اهئ اهئ ليه كدا بس انوجة .. دانا بنتك
نجلاء : طب اسكتي خلاص ابوكي جاي
كنزي : يعني هتساعديني
نجلاء : اسكتي يابت اسكتي
سامح : ها طلعتي الرقم
نجلاء : بقولك ايه ياسامح .. انا شايفة ان الواد كويس .. منديلوا فرصة كدا يجي وتتكلموا
سامح : فرصة ايه يانجلاء .. البت رافضة هو عافية
نجلاء بصت لكنزي : انا عملت اللي عليا .. اقوم احضر الاكل بقا
كنزي مسكت فيها : لالالالا .. انتي راحة فين بس وسيباني
سامح : في ايه يا كنزي .. انتي موافقة ع كلام امك دا
كنزي بتلقائية : أيوة أيوة
سامح بصلها
كنزي : قصدي ان ماما عندها حق .. ووطيت رأسها ف الارض
نجلاء : ملاك ياحبيبتي وبتتكسفي ملاك
سامح : يعني اكلمه اقولو ايه
نجلاء : قولو ان يجي هو واهله نتعرف كدا عليهم ونتكلم .. واللي فيه الخير يقدمه ربنا
سامح : خلاص ماشي طلما كنزي موافقة . . انا هطلع اكلمه برا علشان الشبكة
كنزي اول لما سامح خرج فضلت تتنطط وهي فرحانة .. هيييييه .. هييييه
نجلاء : اتهدي يابت في ايه
كنزي : فرحانة ياماما فرحانة
نجلاء : عارفة لو عملتي الحركات المتخلفة دي قدام الناس .. هبوظلك الجوازة .. تقعدي عاقلة وراسية كدا
كنزي : لالا ونبي متبوظهاش .. حاضر مش هتسمعيلي صوت
نجلاء : أيوة كدا تبقا بنتي حبيبتي .. تعالي تعالي ف حضني ..
كنزي حضنتها : مبسوطة ياماما
نجلاء : أيوة طبعا .. طلما طلع راجل كدا واتقدم .. مش صرمحة وكلام فارغ .. كدا انا احبه
____________________________
سامح : أيوة يااستاذ حازم .. أيوة سامعني
حازم : أيوة ياعمي سامعك..
سامح : طيب احنا منتظرينك انت وأسرتك كدا تنورونا
حازم بفرحة : يعني موافق
سامح : لالا احنا هنقعد قعدة تعارف كدا.. علشان البت كمان تعرفك .. ولو وافقت انا مش هعترض
حازم : اكيد هتوافق
سامح : ايه
حازم : بقول ان شاءالله توافق ..
سامح : ماشي ياحبيبي شوف يوم كدا وقولي
حازم : بكرا ان شاءالله
سامح : بالسرعة دي
حازم : اه اصل انا واخد اجازة بكرا
سامح : تنورنا ف اي وقت ياحازم يابني .. يلا اسيبك انا بقا تشوف اللي وراك.. سلام
حازم بفرحة : سلام ياعمي
فريال : بتكلم مين يا حازم.. وايه الغرحة دي فرحني معاك
حازم : هفرحك ياست الكل .. بكرا باذن الله هنروح نتقدم للبنت اللي بحبها
فريال : بجد يا حازم بتتكلم جد .. اوعا تكون بتضحك عليا
حازم : بجد والله ياماما .. لسه قافل مع باباها
فريال : لولولولولولولولولوليييييييي
حازم : أيوة بقا
فريال : دانا الفرحة مش سيعااني والله مش مصدقة انك خلاص هتتجوز
حازم : لا اتجوز ايه دي قعدة كلام بس
فريال : وان شاءالله تكمل وتبقا جواز
حازم : يارب ياماما يارب
_________________________
اليوم التالي ■
احمد : زين ع فين كدا
زين : عندي مشوار يابابا
احمد : انت مش هتقعد ف القعدة مع صاحبك
زين : اه طبعا هقعد معاهم .. هو مشوار سريع وهاجي .. انت كمان هتقعد صح
احمد : أيوة يابني كنزي زي نور اختك بنسبالي
زين : ماشي يابابا انا هروح بقا علشان متأخرش
احمد : ماشي يا زين
عايدة : الست هدي تحت يابيه وعاوزة تشوف اسر
احمد : هدي عاوزة اسر ف ايه
عايدة : معرفش والله يابيه
احمد : طيب روحي صحي اسر وانزلي شوفيها تشرب ايه .. ولو نور صاحية خليها تنزل تقعد معاها لحد مااسر ينزلها
عايدة : حاضر يابيه
__________________________
قمر وليل وتونة داخلين ل كنزي
قمر : لولولولولولولييي الف الف مبررروك ياحبيبتي
كنزي : حضنتها الله يبارك فيكي ياقمر
ليل : والله يابت كنت شاكة فيكم من يوم القسم
كنزي : بس ونبي لاحسن ماما تسمعك وتقلب عليا تاني
قمر : لا تقلب عليكي ايه بس دانتي عروسة ..
نجلاء : منورنا والله ياحباييي
قمر : دا نورك يانوجة .. قوليلي بقا بتعملي ايه واساعدك
نجلاء : لا انا عملت كل حاجة والله .. روحوا بس مع كنزي شوفوها هتلبس ايه وظبطوها احسن دي لابخة
كنزي : بقا كدا ياماما
نجلاء : لالا دي عسل
قمر : مش عاوزين نزعل عروستنا بقا
ليل : يلا من غير كلام كتير قدامي ع جوا
_____________________________
نور : عاملة ايه ياطنط هدي
هدي : الحمدالله ياحبيبتي انا كويسة .. انتي اخبارك ايه
نور : انا كويسة ياطنط .. اسر زمانه نازل دلوقتي .. اهو نزل
اسر : اهلا وسهلا اهلا .. ازاي حضرتك
هدي : انا بخير ياحبيبي .. معلش جيت فجأة كدا
نور : لا ياطنط تنوري ف اي وقت .. انا هسيبكم بقا
هدي: ماتخليكي ياحبيبتي
نور : معلش ياطنط بس علشان عندنا عروسة وكدا هروحلها بقا
هدي : عقبالك ياحبيبتي
نور : يارب ياطنط .. يلا عن اذنكم
اسر : اتفضلي ..
هدي : طبعا بتسأل نفسك ايه سر الزيارة دي
اسر : بالظبط.. خير
هدي : انا جيالك بخصوص صافي يااسر
اسر قلب وشه : انا الموضوع بنسبالي انتهي .. انتهي ايه هو مكنش في موضوع من اصله .. وكويس أن حضرتك جيتي يمكن تفهميني وتحاولي تفهمي صافي .. اني مافيش بيني وبينها اي حاجة
هدي : فاهمة يااسر .. بس انت مش عارف حالة صافي اتدهورت ازاي ... مش لازم يكون في بينكم حب .. بس ع الاقل انتو كنتوا اصحاب وعشرة عمر .. متسبهاش واقف جنبها .. والله العظيم انا لو مكنش حالتها وحشة مكنتش جيت لحد عندك .. بس انا حاولت معاها .. واخوها حاول هي مش هتتحسن غير لما ترجع تكلمها
اسر سكت
___________________________
نور : انا جيت
نجلاء : نورتي ياحبيبتي ..
تونة : ايه اللي ف ايدك دا يانور
نور : دا هدية بسيطة لكوكي ..
كنزي : هدية ليا بجد .. وريني كدا الله حلو اوي بصي ياماما الفستان حلو ازاي
نجلاء : ليه كلفتي نفسك بس يانور
نور : هو انا هلقي اعز ولا اغلي منكم يادادة
تونة : ااه يابت يا كنزي انتي وقعتي الواد يالئيمة .. جالك كلامي يانوجة .. تونة متقولش حاجة وتطلع غلط ابدا
ليل : لا ياشيخة
نجلاء بتضحك: اه والله تونة كان ليها نظرة للمستقبل
ليل : ليه ساحرة
تونة : مش سحر ولا حاجة . . بس البت كنزي كانت بتسابلو وحاجات كدا مش قادرة اتكلم
ليل كتمت بوقها : اسكتي يخربيتك .. انتي بتقولي ايه
تونة : بقول الحقيقة اكدب يعني
ليل : لا تنقطينا بسكاتك ..
قمر : ايه رايك يا تونة تطلعي تلعبي برا لحد مانخلص
تونة : لا مش طالعة
نور : ع فكرة كريم قاعد برا بيرسم
تونة : بجد كريم برا
ليل : شوفي البت وبجاحتها
تونة : مالكيش دعوة انتي .. قمر حبيبتي ممكن اطلع اقعد مع كريم
قمر : روحي ياحبيبتي .. بس متزعليهوش ماشي
تونة : حاضر حاضر .. وطلعت تجري
صوت حاجة انكسرت
قمر : ياساتر يارب ايه دا
كنزي : الصوت دا عند ماما
نور : تعالوا نشوفها طيب
قمر : في ايه يانجلاء خير
نجلاء بتعيط : بطلع طقم الكاسات من النيش اتكسر كله
كنزي : انتي كويسة طيب ياماما
نجلاء بتعيط : ف داهية انا المهم الطقم .. كله اتكسر طقم جوازي اتكسر بسببك يافقر انتي
كنزي : يوة وانا مالي انا
نجلاء : اسكتي انا متغاظة منك
قمر : استهدي بالله بس يانجلاء وانا هروح اجبلك غيره
نور : وتروحي ليه بس احنا عايشين مع بعض ولله واللي محتاجينه خدوه من الفيلا .. انتو اصحاب بيت
قمر : خلاص ياليل روحي هاتي الكاسات من الفيلا وانا هلم اللي اتكسر دا .. وانتي يانور حطي ميكاب لكنزي مافيش وقت زمان الناس جاية
ليل : ماشي انا هروح مش هتأخر
نور : يلا ياكنزي
قمر : صلي ع النبي بقا يانوجة
نجلاء : عليه افضل الصلاة والسلام
_________________________
هدي : ع اتفقنا يا اسر
اسر : حاضر هعمل كدا ومش هكسفك .. بس لازم تحاولي تفهميها ان انا وهي مافيش حاجة بينا
هدي : حاضر ياحبيبي بس هي ترجع زي الأول وهكلمها .. شكرا اوي يااسر .. واسفة اني ازعجتك
اسر : لا ولا يهمك انتي تيجي ف اي وقت تنوري
هدي : متشكرة اوي ياحبيبي .. يلا استأذن انا بقا
اسر : اتفضلي هوصلك
هدي ماشية واسر معاها وليل خارجة من المطبخ بالكاسات ... اتقابلوا ليل واقفة بصالها ومصدومة الكاسات وقعت من ايدها
..
اسر طلع يجري عليها : ليل انتي كويسةة
هدي : ليل !!!
___________________________
ياتري ايه سبب صدمة ليل لما شافت هدي .. معقول هيكون في سر ورا هدي .. هنعرف ف الأجزاء الجاية تابعوا..
يتبع الفصل الحادي عشر 11 اضغط هنا