رواية الحقيقة المخفية البارت السادس 6 بقلم ملك محمد
رواية الحقيقة المخفية الفصل السادس 6
انتهت نور من الطعام واخذها يزن ليعرفها بطاقم الخدم
الشباب يقف واحد تلو الآخر
يزن : دا سليم _ ودا مروان _ ودا شهاب _ ودا احمد ..
وظل يعرفها بجميع الطاقم حتى انتهى منهم جميعاً ثم قال لهم جميعاً
: دا نور بأذن الله هيجتاز الإختبار وهينضم لينا قريب انا عايز تحترموه وتعاملوه بلطف ومش علشان هو وشه بيبي فيس تستهروا فيه او حد يزعله
ثم ابتسم ونظر لنور قائلا
: واحنا مع الوقت هنخليه ينشف شويه ويطلعله عضلات كمان ولا اي يانور
نور : انا لو فضلت وسطكوا كتير مش هيطلعلي عضلات دا هيطلعلي كرش
ضحك الجميع على رده
يزن بسرعه : شششش الصوت
احد الشباب وهو يكتم ضحكته : واضح ان دمه خفيف كمان وشكلنا هنتطرد بسببه
نور بتعجب وصوت منخفض: هو الضحك ممنوع هنا
يزن : الضحك والصوت العالي والكلام بدون ضروره بص الفيلا دي لازم تكون هاديه ع طول احنا بنتكلم بالهمس
نور بعفويه : طب لما هو مش عايز حد يتكلم مبيعينش ناس خرس ويريح نفسه ليه
الشباب ضحكوا جميعاً
يزن : ششششش يلا كل واحد ع شغله
احد الشباب بضحك : قولتلك هنطرد بسببه كلنا
يزن : اطمن بكرا يتعود
ذهبوا الشباب جميعاً لعملهم
يزن اجلس نور ليخبرها عن طريقة الإختبار التي ستبدأه غدا
يزن : بص اهم حاجه متتوترش دا اختبار بسيط وكلنا عدينا منه بسهوله كل الحكايه أن ساهر بيه بيكون عايز يعرف هل هتقدر تستحمل قوانينه او لا
نور بإطمئان : طيب كويس وانا إن شاء الله انا قدها
______بقلم ملك محمد_____
" نهار يوم جديد"
الساعه السابعه صباحاً تقف نور على باب غرفة ساهر بيه وفي احدى يداها بدلته التي سوف يرتديها وف اليد الآخرى الحذاء الخاص به وتنتظر حتى يرن الجرس
نور وهي تحدث نفسها : بقالي ساعه واقفه ع باب الأوضه المغرور داه هيصحى امتى بقى
فجأه يرن الجرس
تدخل نور بسرعه وفي يدها ملابسه وحذائه قائله
: صباح الخير يا... اهؤ اهؤ
تفاجئت نور بساهر يرتدي بنطالاً فقط والجزء العلوي من جسده عاري تماماً
ساهر بجديه وهو يلعب ضغط ع الأرض : حضرتلي الحمام
نور اغمضت عيناها وذهبت بإتجاه السرير حتى تضع ملابسه قائله
: كل حاجه جاهزه يافندم
ثم حاولت الخروج من الغرفه وهي مغمضه عيناها
ساهر لم ينظر لها انتهى من اللتمرين ووقف من ع الأرض متجهاً نحو الحمام
واذا بنور تتعثر بإحدى الأشياء الموجوده بالغرفه وتقع عليه وفجأه اصبحت بين ذراعيه
فتحت عينها بصدمه وجدت نفسها في حضنه
شعر ساهر بالإشمئزاز فدفعها بعيداً قائلا بجديه
: خد بالك من كل خطوه بتخطيها جوا الفيلا هنا لأن الغلطه بحساب
ثم تركها ومضى
نور إلتقطت انفاسها ووضعت يدها ع قلبها الذي ينبض بشده من شدة الأحراج قائله بيأس
: واضح ان الأختبار سهل اوي
ساهر بعصبيه : انت يازفت يلي اسمك نور
نور ركضت نحوه بسرعه قائله
: تحت امر حضرتك يافندم
ساهر بعصبيه : مفروض طول مدة الأختبار لما امشي تمشي ورايا خطوتي هي خطوتك فاهم
نور : انا اسف يافندم مش هتتكرر تاني
ساهر وهو يشير على مرآة الحمام : ممكن تفهمني اي القرف داه
نور بتعجب وهي تنظر للمرآه بتمعن : معلش يعني انا مش فاهمه فين القرف بالظبط
ساهر امسك برأسها ودفعها نحو المرآه قائلا
: بص كويس ف الحته دي هتلاقي وسخ على شكل متوازي مستطيلات ابعاده 4ملى و6ملي ليه 12حرف و8 رؤوس و24 زاويه قائمه
نور ( دماغها عملت Error زينا بالظبط ) دققت النظر فوجدت جزء بسيط جداً تقريبا لا يرى الا بالعين المجرده متسخاً
ردت قائله بذهول هو دا متوازي المستطيلات ال حضرتك قدرت تشوف ابعاده
ساهر : ايوا انت ناسى انك بتتعامل مع مهندس
نور بسخريه :طب بما إنك مهندس ماتستغل متوازي المستطيلات ال حضرتك شوفته داه وتعمله مشروع حمام سباحه للنمل صدقني هيبقى تحفه
ساهر بجديه : انت بتهزر واضح انك مش عايز تشتغل
نور بلهفه : لا لا خلاص يافندم انا اسف
ثم ابتسمت ابتسامه مصطنعه ومدت يدها وبكم قميصها قامت بمسح المرآه
وقالت : اطمن يافندم تمت ازالة مشروع حمام السباحه ال على مراية حضرتك لأنه تقريباً مكنش مترخص
ثم خرجت من الحمام قائله بصوت منخفض
: معقوله يكون المهندسين كلهم متوحدين بالشكل داه صه
وقف ساهر يستوعب مافعلته نور ثم ابتسم من طريقة كلاماها
اثناء جلوسه في حوض الاستحمام ظل يتزكر حينما سقطت بين زراعيه ف الغرفه وهي مغمضه عينها
ثم ضرب رأسه بيده قائلا : اي ال انا بفكر فيه داه
شاب مقزز اوي وشبه البنات فعلا
نور كانت تقف خارج الحمام وتمسك له المنشفه الخاصه به
خرج ساهر من الحمام وهو يلف منشفه حول خصره وينتظر نور ان تضع المنشفه التي بيدها على كتفه
نور بتوتر ظلت مغمضه عيناها وترفع المنشفه لأعلى بيدها
ساهر وقف بعيداً ينظر عليها بتعجب اقترب منها وحرك يده حول وجهها لكنها كانت مغمضه بشده
ثم طرقع اصابعه امام وجهها
نور فتحت عينها بهلع وجدته يقف امامها فلم تجد حل سوا وضع المنشفه على رأسها والإختباء بداخلها
ساهر ازاح المنشفه من على وجهها ببطئ
نور كانت مغمضه عيناها وملامحمها يبدو عليها الخوف
ساهر بدأ يرتابه الشك وقال بتعجب : هو في اي بالظبط انت مكسوف مني !
نور بإرتباك : انا اسف يافندم
ثم همت لوضع المنشفه على جسد ساهر لكنه رفض ذلك واخذها منها ووضعها ع جسده بنفسه وذهب لغرفة النوم ليرتدي ملابسه
ذهبت نور وراءه لكن ساهر اخبرها ان تبقى بالخارج حتى يرتدي ملابسه
نور تقف خارج الغرفه الخاصه بساهر تلف حول نفسها ويتملكها الرعب خوفاً من ان تطرد من العمل بسبب تصرفاتها الغبي
ارتدى ساهر ملابسه وخرج من الغرفه وهو في قمة الأناقه
لحقت به نور وركضت ورائه
ساهر جلس على طاولة الإفطار
نور بلهفه غرفت الطعام ووضعته امامه
بدأ تناول الطعام وانتهى ثم ذهب لعمله ولم ينطق بكلمه
آتى يزن بسرعه بعدما خرج ساهر من الفيلا قائلا
: ها طمني كل حاجه ماشيه تمام
نور بيأس وإحباط: حاسس اني عكيت الدنيا اوي
يزن بإبتسامه : متقلقش ساهر بيه رغم انه بيظهر متعجرف ومغرور بس قلبه طيب
نور : قلبه طيب اي بس وبعدين فضلت تقولي اختبار سهل اوي وف الآخر الاقيه بيقولي على متوازي مستطيلات على المرايه دا انسان متوحد
يزن بضحك : هو كدا لازم يختبر قوة ملاحظتك
نور بإحباط جلست على طاولة الطعام وبدأت الأكل وهي تقول : بلا قوة ملاحظه بلا زفت
يزن بذهول : انت بتعمل اي قوم كل جوه ف المطبخ
نور بتعجب والأكل في فمها : اشمعنا يعني
يزن : ممنوع الخدم يقعدوا ع السفره ساهر بيه لو عرف احتمال يقتلنا ويعلقنا على باب الفيلا للعبره
نور بصدمه وهي تبتلع الطعام: زي قطز ما قتل الرسل بتوع المغول وعلق راسهم على باب القصر
يزن بضحك : بالظبط كدا
نور بضحك أيضاً وهي تأكل : خليه يعملها انا كدا كدا هتعلق على حبل المشنقه يمكن لما تيجي منه ارحم
زين بتعجب : مشنقة اي !
نور بتوتر : ها لا بهزر هو انت مبتهزرش
زين بضحك : لا بهزر عادي المهم ممكن تقوم تاكل جوه بقى
نور امسكت بقطعه من الخبز ووضعتها في طبق الجبن قائله
: تمام يلا هاخد دي معايا تسليني لحد جوه
يزن بضحك :واضح انك بتحب الأكل جداً
____بقلم #Malak_mohamed ______
ف النادي الرياضي
إنتهت لارا كعاداتها من تدريب الأطفال وظلت تلتفت يميناً ويساراً تنتظر قدوم عمر لكنه لم يأتي
جلست على الأرض بإحباط قائله
: كنت عارفه انه مش هيجي اديني علقت نفسي بحبال دايبه
ثم قالت لنفسها : واي يعني ميجيش هو انا وبيني وبينه اي يعني هه
وحملت حقيبتها ومضت
بعد خروجها بدقائق قليله يدخل عمر النادي وهو يركض وينظر عليها ف الأنحاء لكن لم يجدها
ضرب الحائط بيده قائلا
: كنت عارف انها مش هتستناني علشان انا مفرقش معاها
ثم تنهد وألتقط انفاسه وخرج
اثناء خروجه يجدها تجلس على المقعد ف الجهه الآخرى من الشارع وتتلفت يميناً ويساراً
(لارا لم تذهب بل قررت انتظاره ف الخارج)
ابتسم عمر حينها واشترى اثنان من المثلجات من المحل المجاور (ف الجو كان حار جداً )
اقترب منها وجلس بجانبها وقال لها وهو يعطيها الأيس كريم
: شكلك مستنيه حد
لارا بتعجب وذهول أمسكت منه الأيس كريم قائله : هاه
ثم قالت بضحكه تدراي بها احراجها
: لا انا مش مستنيه حد ولا حاجه انا بس قولت اقعد شويه هنا هروح بدري اعمل اي
عمر بإبتسامه وهو يأكل الأيس كريم الخاص به
: مستنتنيش ف النادي ليه
لارا بعصبيه : وانت اتأخرت عليا ليه
ثم قالت بهدوء : اقصد انا قولت انك مش هتيجي واكيد مشغول وكدا
عمر بإبتسامه ونظرة هيام: انا كل يوم بقول مش هاجي بس معرفش لحد دلوقتي اي ال بيجبني
اقولك حاجه انا اتعودت اشوفك كل يوم وشكلي مش هقدر ابطل احب اشوفك
لارا بخجل وتوتر : الجو حر هنا اوي
عمر بإبتسامه : عارفه الجو حر ليه
لارا بتعجب: ليه!
عمر : عشان احنا ف الصيف
لارا نكزته في كتفه بضحك قائله : لا ذكي اوي ونبيه
عمر بضحك امسك بكتفه قائلا بتمثيل
: ايدك تقيله ياكابتن بلاش الهزار بالإيد انا مش أدك
لارا وهي تأكل الأيس كريم : مش عايز تتدرب بقى ولا انت نسيت انت بتيجي هنا كل يوم ليه
عمر وهو يأكل أيضاً: لا منستش ولا حاجه بس خدي بالك أنا شاطر وبتعلم بسرعه
لارا بتعجب : طب مادي حاجه حلوه
عمر : حلوه بالنسبالك ممكن انما بالنسبالي مش هلاقي حجه اشوفك بيها بعد كدا
لارا بخجل : انا بقول نتمشى شويه الجو حر هنا اوي
عمر بإبتسامه: انا بقول كدا بردو
_________
اثناء سيرهم معاً
عمر : لارا ممكن اسألك سؤال
لارا : اتفضل
عمر : انتي ليه مبتحبيش الشرطه
لارا بعصبيه : متجبش اسمهم على لسانك تاني لأنهم أشبهه بالقذاره
عمر بتعجب : ليه كل الكره داه ممكن افهم
لارا بتنهيده : تفهم اي ولا اي للأسف في كلام كتير يتقال وف نفس الوقت مقدرش أقوله
عمر : واضح انك لسه مش واثقه فيا
لارا بضحكة إحباط : انت مجرد شخص معرفتي بيه سطحيه هثق فيه ازاي
عمر : مانا قولتلك قبل كدا اعتبريني إستثناء
لارا بضحكه : مانا معتبراك كدا فعلاً انا عمري ماسمحت لحد يقتحم حياتي زي ماانت عملت
عمر بإبتسامه: وانا مبسوط بكدا وصدقيني لو فضفضتي ليا مش هخليكي تندمي
لارا بتفكير : تمام وانا هثق فيك ثقه عمياء
عمر : تحبي نقعد ف اي مكان وتتكلمي براحتك
____بقلم ملك محمد_______
"نعود معاً للقاهره"
في ڤيلا والد ساهر تجلس والدته (ناديه) مع والده (عزت) وأخيه ( مازن) وابنة عمه ( نيڤين)
عزت بغضب : يعني اي الأستاذ مش عايز يتجوز هو مش شايف اني كبرت ف السن ونفسي أشيلي حفيد قبل مااموت
ناديه : بعد الشر عليك ياعزت متقولش كدا
مازن : ماتجوزني انا الأول انا موافق
عزت بغضب: مش لما تتخرج ياحيوان من الجامعه الأول نبقى نتكلم عن الجواز انا مش عارف انا ربنا رزقني بواحد متوحد والتاني فاشل اكيد عملت ذنب ف حياتي كبير علشان كدا بتعاقب بيكوا
نيڤين : ياعمي والله عملت كل ال اقدر عليه وهو بردو رافض يتقبلني
عزت بغضب: يمكن مبيحبكيش مجربتوش تبعتوله بنت تانيه
نيڤين بصدمه : اي ياعمي الإحراج داه
ناديه : رافض تماماً يعرف اي بنت
مازن بضحك : مايمكن شا*
الجميع نظر له بذهول
مازن بخوف: بهزر بهزر
عزت وقف من مكانه قائلا ً بعزم وإصرار
: خلاص طالما هو مش موافق يتجوز انا هجوزه غصب عنه إنتهى
_________
ف المكتب يأتي إتصال من نڤين لساهر
نيڤين : النهارده رأس السنه ممكن تخرج معايا
ساهر : لا وانتي عارفه مبهتمش بالحاجات دي
نيڤين : عشان خاطري اعملها مره واحده بس
ساهر : لا
نيڤين بعصبيه : ع فكره بقى والدك خد قرار جوازك ابقى وريني هتهرب ازاي
ساهر : كويس لما ينفذه عرفيني
نيڤين أغلقت الهاتف بغضب
___________
"في ڤيلا ساهر "
يزن يتحدث مع نور قائلاً
: فاضل دقايق وساهر بيه يرجع من الشركه اول حاجه هتعملها هتروح وراه اوضته تسحب الجاكيت من عليه وتعلقه وتجهزله الحمام وتديله الهدوم ال هيلبسها ف البيت وتنزل معاه على سفرة الأكل
نور برعب : يارب تعدي المهمه دي على خير
يزن بإبتسامه : هتعدي اطمن بس انت اجمد كدا
نور جلست على الكرسي تنتظر قدوم ساهر وهي تضع يدها تحت خديها
يزن ينظر لها وتدور في رأسه أسئله كثيره
جلس بجانبها قائلاً
نور هو انت مبيطلعلكش دقن ابدا ولا اي
نور بإرتباك : ها لا اصل
يزن بتعجب : اصل اي
نور بتوتر : انا بحلقها اول بأول هههه
يزن : بس .....
يقاطعهم دخول ساهر بيه للڤيلا
نور تترك يزن وتركض نحو يزن بلهفه قائله
: حمدالله ع السلامه يافندم
ساهر صعد لغرفته ولم ينطق بكلمه ونور كانت تلحق به
دخل الغرفه نور وقفت وراءه بسرعه وخلعت الجاكيت وعلقته قائله
: الحمام جاهز يافندم
ساهر لم ينطق بكلمه ودخل الحمام استحم وخرج
نور كانت تقف ف الغرفه تمسك بملابسه حينما رآته قادماً نحوها والمنشفه حول خصره
اغمضت عيناها بسرعه
ساهر بسخريه : انت خايف تتفتن بيا ولا اي
نور وهي مغمضه عيناها وتمد الملابس له بيدها
: هتفتن بحضرتك ليه انا بغمض عيني احتراماً ليك مش أكتر
ساهر ارتدى ملابسه قائلا
: فتح عينك انا لبست
نور فتحت عينها بفرح فإذا بها تراه يرتدي بنطالاً فقط
ادارت وجهها للجهه الآخرى بصدمه قائله
: لما حضرتك بتفضل قالع كدا بتشتري هدوم ليه
ساهر : تعرف انك الخادم الوحيد ال لسانه طويل ومعرفش ساكتلك ليه
نور بإرتباك : انا اسف يافندم إذا كنت بتجاوز حدودي
ساهر وهو يقف امام المرآه
: مفيش حد يقدر يتجاوز حدوده معايا انا سايبك بمزاجي
نور بسخريه وصوت منخفض : مغرور اوي
نزل ساهر ليتناول العشاء وركضت نور خلفه
وقفت على الطاوله تناوله كل ما يطلبه
تحاول جاهده إشاحة بصرها عنه
انتهى ساهر من طعامه قائلاً
: القهوه تجيلي ع اوضة الرسم
تذهب نور مسرعه تحضر له القهوه وتأخذها للغرفه
يجلس ساهر امام لوحته ويقوم بالرسم
تدخل نور وفي يدها القهوه وأثناء سيرها ترا من نافذة الغرفه مفرقعات ناريه تضيئ السماء
تضع القهوه بطريقه همجيه على الطاوله امام ساهر وتذهب مسرعه نحو الشرفه لتقف وتنظر على المفرقعات بلهفه وحب
وقف ساهر من مكانه واتجه نحوها
نور والإبتسامه تملأ وجهها.
: واوووو اي المنظر الجميل داه
ساهر بتعجب ينظر للسماء وينظر نحوها
نور : انت محظوظ اوي علشان بتقدر تشوف المنظر داه اول كل سنه
ساهر وهو ينظر للسماء : تعرف ان دي اول مره اخد بالي من المنظر الحلو داه
نور وعيناها تلمع كحبة الؤلؤ وتنظر للسماء بشوق ولهفه : مش كل حاجه الفلوس منظر زي داه كفيل يخليني سعيد للسنه الجايه
ساهر ينظر لها بتمعن ولم ينطق بكلمه
ثم قالت بعفويه : تعرف في خرافه بتقول ان الساعه 12 في بداية السنه الجديده لو دقت وفي اتنين مجتمعين مع بعض هيحبو بعض
يتبع الفصل السابع اضغط هنا