رواية حكاية قمر البارت السادس 6 بقلم ياسمين علي
رواية حكاية قمر الفصل السادس 6
قمر سمعت اللي حصل لابوها وان هو مات وهي كانت عايشة وعندها امل يجي ف يوم وتشوفوا .. وكانت هتعيط اتملكت أعصابها
قمر : وحضرتك عاوز مني ايه دلوقتي
احمد : كل حاجة بتقول ان انتي البنت دي .. بس اللي مستغربوا ان عبد الحميد مقاليش ان عنده بنت تالتة .. عاوز افهم فتون دي بنت مين وازاي اختك
قمر سرحت : فتون تبقا ....
احمد : تبقا بنت مين ؟
قمر : معرفش
احمد : متعرفيش ازاي
قمر : صدقني معرفش اهلها مين ..
احمد : انا مش فاهم حاجة
قمر : من حوالي ٧ سنين .. كنت شغالة ف بيت كبير .. وف يوم صاحبة البيت اتهمتني اني سرقتها وطردتني من الشغل .. والشغل دا كان بنسبالي كل شئ .. بقيت ماشية ف الشارع اعيط ع حالي وع الظلم اللي حصلي .. وافكر هصرف ازاي ع ليل .. هاكلها منين دا مصدر رزقي الوحيد الشغل .. رجلي جابتني لحد جامع .. دخلت اصلي وادعي ربنا ان يكرمني ويظهر الحقيقة .. ويقدرني واصرف ع اختي خرجت وانا عندي امل كبير اوي ف ربنا .. لقيت بنت صغيرة لسه مولودة و بتعيط بحرقة .. لقيت نفسي بجري عليها باخدها ف حضني .. حسيت ان ربنا بعتهالي تطبطب عليا واطبطب عليها .. صعبت عليا رميتها ف الشارع .. خدتها البيت غيرتلها وجبتلها لبن ... ونمت وسلمت امري لله.. تاني يوم ربنا ظهر الحقيقة وصاحبة البيت كلمتني واعتذرتلي ورجعتني الشغل .. فرحت وقولت دي وش الخير عليا ..
احمد : طيب ومودتهاش ملجأ ليه ؟
قمر : كنت هعمل كدا والله .. بس مقدرتش استغني عنها .. مكنتش هرتاح لما احطها ف ملجأ وامشي واسيبها .. مش عارفة مين الجبروت اللي رميت بنتها ف الشارع ومشيت .. دانا اللي لا من لحمي ولا دمي مقدرتش استغني عنها !!
احمد : ازاي سجلتيها وطلعتلها شهادة ميلاد
قمر بتوتر : بصراحة خليت واحد معرفة شغال ف السجل المدني .. هو اللي يعملهالي حكيتله الحكاية واترجيته .. صعبت عليه انا و البنت عملهالي
احمد : يعني انا كان معايا حق لما قولت انك بنت عبد الحميد
قمر بضيق : أيوة للاسف انا بنت الراجل دا
احمد : آخر مرة شوفتوا فيها كان ندمان
قمر : وهيفيد بايه الندم بعد اللي حصلنا بسببه .. ربنا يرحمه ويسامحه
احمد : وانتي هتسامحيه !
قمر : اسمحه ! ع ايه ولا ع ايه .. انا شوفت كتير منه .. مهما كان ايه اللي حكهولك دا 1 % من اللي عملوا فيا وانا صغيرة ..
احمد : كلنا بشر وبنغلط .. وهو ندم ع اللي عمله وحس بغلطه .. هو محتاج منك تسامحيه بس
قمر : غلط عن غلط يفرق يااستاذ احمد .. عن اذنك .. اه صح ياريت اللي حكيته محدش يعرفه
احمد : اكيد مش هقول .. استني خدي الأمانة بتاعتك
قمر : امانة ايه ؟
احمد : عبد الحميد سايبلك الورق دا .. كل حاجة تخص املاكه
قمر : بس انا مش عاوزة حاجة منه
احمد : دي امانة عندي من سنين .. ياريت تاخديها علشان تريحيني .. الواحد مش ضامن عمره ..
قمر : بس
احمد : مبسش خديها مني واللي عاوزة تعمليه فيها اعمليه .. بس ابقا اديتك امانتك .. اتفضلي
قمر خدت الورق ومشيت
_____________________________
كنزي واقفة بتعيط برا وحازم طالع شافها
حازم : انتي لسه بتعيطي .. خلاص حصل خير ..
كنزي بعياط : اهئ اهئ بيعايروني ويقولو عليا خايبة .. وماما بتنصر ام أربعة واربعين عليا وانا والله ماكان قصدي محدش مصدق ليه .. انا غلطانة اني جيت هنا انا كنت عايشة مع عمتي ... اهئ اهئ حتي عمتي كانت تقول عليا فاشلة ... يارب ريحني من الناس دي بقا .. انا غلطانة اني جيت الدنيا اصلا
حازم : دانا غلطان اني جيت هنا .. دا كان يوم ازرق لما قولت اشوف زين .. انتي ايه مبتفصليش .. قنواتك الدمعية مبتتعبش .. مبتصدعيش طيب .. في ايه مش كدا ياماما ..
كنزي بعياط اكتر : اعااا وانت كمان بتقول عليا كدا .. كلكم متفقين عليا اهئ اهئ .. انا همشي من هنا كمان .. اروح فين بس ياربي اهئ اهئ *ومشيت تعيط وتكلم نفسها*
حازم باستغراب : لا دي مش طبيعيةة !!
_______________________________
زين رايح جاي .. وقمر نازلة ماسكة الورق وسرحانة
زين : قمرر
قمر ماشية سرحانة و مش سامعة
زين راح شدها من ايدها جامد : انا مش بكلمك .. ردي عليا
قمر زقته : انت ازاي تشدني كدا ..
زين : بنادي عليكي مبترديش
قمر : وانت تنادي عليا ليه اصلا !! .. ابعد عن طريقي
زين : ايه الورق اللي ف ايدك دا
قمر بعصبية : وانت مالك ياخي .. حاشر نفسك ليه
زين : انتي هنا في بيتي .. ولازم اعرف ايه اللي ف ايدك دا .. وريني
قمر بعدت الورق عنه : قولتلك مالكش دعوة ..
زين بعصبية وبيشد الورق : ورريني ايه الورق دااا بقولك
الورق وقع ف الأرض .. زين نزل يجيبوا بسرعة ..
والكل جه ع صوتهم
زين بابتسامة: الللله .. شيك ب 10 مليون جنية باسمك وياتري بقا دا لييه !!!
قمر اتصدمت
احمد : ايييه بيحصل هنا !!
زين : كويس انك نزلت .. عاوز افهم ايه داا
احمد : وطي صوتك وانت بتكلمني ..
زين بعصبية : انا عاااوز افهمم الأول ايه دااا
احمد : دا ميخصكش .. اديها حاجتها .. واتفضل روح ع شغلك
زين : شغل ايه بقا .. وانت جايب واحدة من الشارع تديها حقنا..
احمد : اخررررس .. انت مش فاهم حاجة ..
زين بعصبية : فاااااهمني
احمد : طول مانت متعصب كدا مش هفهمك .. اديها حاجتها .. وبليل نتكلم
"زين رمي الشيك ف وش قمر ومشي وهو متعصب "
قمر لمت الورق والكل بيبصلها وبتحاول تداري نفسها من عيونهم .. وخرجت برا الفيلا خالص وانفجرت من العياط
__________________________________
زين وصل الشركة متعصب والموظفين و اقفين كلها بيبصولو
سهر بصيت للموظفين : كل واحد يركز ف شغله ممكن
.. وراحت ورا زين ع مكتبه
سهر : خير يازين مالك ؟
زين بعصبية: لو سمحتي يا سهر اخرجي
سهر : اهدي طيب قولي في ايه بس
زين بعصبية اكتر : بقولك اخرررجيييي
سهر خرجت وهي بتعيط
_____________________________
وليد : ايه يااسر فينك
اسر : انا لسه مخلص آخر محاضرة اهي .. هبعتهالكم
وليد : مبسوط يعني بقرارك دا
اسر : اه مبسوط .. مش هناخد منها حاجة تاني
وليد : طيب انت روحت النهاردة.. مين هيروح بكرا
اسر : صافي
وليد : انت بتلبسها
اسر : اه بصراحة .. مش هي مبسوطة ان ليل مبقتش صاحبتنا .. تشرب بقا
وليد : مافيش غيركم مبسوطين .. انما انا والبت الغلبانة التانية مش موافقين ع القرار دا ..
اسر : لا والله .. هترجع ف كلامك
وليد : لا ياحبيبي انا من الأول قولت مش هحضر .. الليلة دي انا براها
اسر : بقا كدا .. طب مالكش محاضرات عندي بقا
وليد بيضحك : ولا يفرق معايا .. اروح اخدها من لولو
اسر : طب غور يلا بقا .. سلام سلام
__________________________________
#حكاية_قمر 🌜💕
#بقلم_ياسمين_علي ••
قمر رجعت من برا وبتمسح دموعها .. شافت كريم قاعد وباصصلها راحتله تقعد معاه .. وهو عمل نفسه بيرسم ومش مركز معاها
قمر : انا اتفقت معاك اني لما اتخنق هحكيلك صح
كريم مردش
قمر عيطت : انا متضايقة اوي اوي .. ليه اخوك بيعاملني كدا مع ان والله بحاول متقابلش معاه .. بس هو مصمم يحشر مناخيره ف كل حاجة.. لحد ما هيخليني اكسرهالو ف مرة ..
*كريم ضحك من غير صوت*
قمر ابتسمت : ضحكتك حلوة ياكريم .. عارف انت اكتر حد ارتحتله ف البيت دا .. واقدر احكيلك أي حاجة وانا ضامنة انك مش هتتكلم ..
كريم ساكت
قمر : طيب انت كمان ارتحتلي .. ولا شبه بوز الأخص اخوك .. اللي لما يشوفني يركبه ميت عفريت .. مش عارفة حاطت نقره من نقري ليه .. كأني مرات ابوه .. لا داهية يكون فاكر ابوه كان عاوز يتجوزني !!!
*كريم قام وسابها ومشي يضحك ع كلامها*
قمر : يوووة انت رايح فين .. ماتستنا انا مخلصتش فضفضة ..
_______________________________
زين راح ع مكتب سهر
زين : ممكن ادخل
سهر بتمسح دموعها : اتفضل
زين : احم احم انا جاي اعتذر ع الي حصل .. انا بس كنت متعصب شوية
سهر : محصلش حاجة .. انا اللي مكنش المفروض اتدخل ف خصوصيتك
زين : مش دي الفكرة .. بس انا كنت عاوز ابقا لوحدي
سهر : حقك .. انا اللي اسفة
زين : متعتذريش .. انا اللي المفروض اعتذر
انتي مالكيش ذنب ف اللي حصل علشان اتعصب عليكي .. هي اللي المفروض اطلع كل عصبيتي عليها واكسر دماغها
سهر باستغراب : هي مين
زين : واحدة من الشارع .. بابا جابها تعيش معانا هي وأخواتها
سهر : لا واحدة واحدة علشان مش فاهمة .. اونكل احمد جايب ناس من الشارع تعيش معاكم فهمني ازاي
زين : هحكيلك ..
_________________________________
قمر داخلة براحة تخبي الورق من غير ما حد يشوفها
تونة : بتعملي ايييه
قمر اتخضت : يخربيتك طلعتي منين انتي
تونة بتضحك : كنت قعدة مستنياكي .. لقيتك داخلة تتسحبي روحت استخبيت علشان افجعك .. فجعتك صح
قمر : انتي قطعتي خلفي ياشيخة
تونة : المهم كنت بتخبي ايه بقا
قمر : كنت.. كنت بشيل ورق ليل شكلها كانت بتذاكر ونسيته قولت اشيلهولها
تونة : امممم طب واللي يشيل ورق ليل يدخل يتسحب ليه بقا ياست قمر
قمر : روحي نامي يا تونة
تونة ضيقت عينها : اظاهر ان ف سر كبييير اوي .. بس ع مين ..
قمر : روحي نامي يابت
تونة : ماشي ياقمر .. *وشاورت بصوبعها الاتنين ع عين قمر * ... عيني عليكي خليبالك
قمر مستغربة وبتكلم نفسها : يلهوي 7 سنين ايه دانا اللي عندي سبع سنين مش هي
__________________________________
احمد : نجلاء زين جه ولا لسه
نجلاء : اه من نص ساعة ودخل ع اوضته
احمد : كويس .. عاوزك تبعتي عايدة للولاد علشان ينزلوا يتعشوا كلهم .. وتنبهه عليهم ينزلوا علشان عايز اتكلم معاهم
نجلاء : حاضر
________________________________
فاروق : ممكن ادخل
صافي : اتفضل يابابا
فاروق : بنتي حبيبتي مبتنزلش تقعد معايا ليه .. من ساعة ما جيت من السفر مشوفتكيش
صافي : والله يابابا مشغولة .. اصل بقيت اروح الكلية
فاروق : ع كدا بتحضري المحاضرات
صافي : اه طبعا مبفوتش محاضرة .. اصل ناوية اخد السنادي جد .. علشان ع الاجازة كدا اسر يجي يخطبني
فاروق : بجد .. هو قالك كدا
صافي : لا هو مقالهاش بطريقة مباشرة .. بس حسيت ان هو عاوز ينجح السنادي اوي .. إحساسي ان ف خطوة هتحصل بينا بعد النجاح دا .. ادعيلي يابابا
فاروق : يارب يابنتي .. انا مش عاوز حاجة غير اشوفك فرحانة .. تعالي ف حضن بابا
سهر داخلت فجأة : صافي انا كنت عاوزة . ..
فاروق : انتي جيتي .. عملتي اللي قولتلك عليه
سهر : هعملوا
فاروق : يعني اقتنعتني دلوقتي بكلامي
سهر : مقتنعتش بحاجة ..بس اهو امر زي أي أمر كنت باخده منك
فاروق : جدعة وعارفة مصلحتك ..
صافي : كنتي عايزة حاجة يا سهر
سهر : لا كنت هطمن عليكي .. عن اذنكم
صافي : بابا انت ليه بتعاملها كدا .. دي سهر طيبة اوي
فاروق : مالكيش دعوة انتي يا صافي بالشغل .. احنا اخوات وفاهمين بعض
صافي : ماشي .. انا هنام بقا تصبح ع خير
فاروق : وانتي من اهله ياحبيبتي
__________________________________
الكل قاعد ع السفرة .. وزين قاعد مش طايق نفسه
احمد : انا جمعتكم كلكم علشان عاوز اوضحلكم حاجات .. مش عاوز حد فيكم ينساها
نور : اتفضل يابابي
اسر : خير يابابا
احمد موجه كلامه لزين : اولا البيت دا بيتي .. مش من حق أي حد غيري يقول مين يقعد ومين يمشي .. او اي حد يتدخل ف حاجة متخصهوش
زين : ولو الحاجة دي تخصه !!!!
احمد : قولت متخصهوش يبقا متخصهوش
اسر : اهدوا ياجماعة هو في ايه انا مش فاهم !!
زين : اقولك ياحبيبي في ايه .. ابوك كتب شيك للست زفتة اللي اجبرنا ع وجودها معانا هنا .. ب 10 مليون جنية
اسر : اييه ؟؟؟
احمد بعصبية : انا مكتبتش لحد حاجة .. دي فلوسها
زين : لا والله واحدة كانت عايشة ف حارة .. تمتلك المبلغ دا ازاي
احمد : اللي بتتكلم عنها دي وتغلط فيها دي تبقا بنت صاحبي .. والفلوس دي ابوها كان سايبهالها هي وأخواتها معايا .. وكنت بدور عليها والصدفة خلتني اوصلها .. فهمت بقا
زين : وانا ايه اللي يخليني اصدق
احمد : الشيك اللي انت مسكته كان بتاريخ قديم .. لو كنت ركزت كنت عرفت قبل ماتحكم ع البنت وتظن فيها وتتهمها بالباطل ..
اسر بفرحة : يعني ليل تبقا بنت صاحبك ..
الكل بصله
اسر : اقصد ليل وقمر وكلهم يعني
نور : بابي هو دا عبد الحميد صاحبك اللي كنت حكيتلي عنه زمان ؟
احمد : اه يانور هو .. شوفتي الصدف .. تبقا عايشة معايا ومعرفهاش
نور : الحمدالله .. كدا بقوا من اهلنا
احمد : اه يانور واستحالة ارجعهم الحارة دي تاني .. وانت ساكت ليه دلوقتي
زين : معنديش حاجة اقولها
احمد : بس انا عندي .. انت لازم تروح تعتذرلها علي اللي قولتو الصبح
زين : مش هعتذر لحد انا . . عاوزني اشوفها نازلة بشيك من مكتبك .. واسكت
احمد : اه تسكت .. طلما مش فاهم يبقا تسكت .. مش تجرح ف الناس وخلاص .. ويكون ف علمك من هنا ورايح تعاملهم باحترام
زين : مش هتعامل معاهم اصلا .. عن اذنكم
احمد : يكون احسن بردك
نور : بابي متنساش ان عيد ميلادي كمان يومين يعني مش عاوزة شغل اليوم دا ماشي
احمد: ودي حاجة تتنسي بردك يا حبيبتي.. متقلقيش مش هنزل شغل اليوم دا .. علشان خاطر عيونك
نور حضنت احمد : ربنا يخليك ليا يااحلي بابي ف الدنيا .. انا هطلع بقا علشان اكلم صحابي .. وانت يا اسر اعزم وليد وصافي وسارة
اسر : حاضر هعزمهم .. وانتي ابقا اعزمي قمر وليل وتونة
نور : دول مش محتاجين عزومة اصلا .. رجعت تاني خطوتين .. غريبة يعني انت مهتم اوي بيهم كدا مع انك متعاملتش معاهم ؟
اسر بتوتر : عادي مش ضيوف عندنا .. لازم نهتم بيهم ولا ايه يابابا
احمد بمكر : اكيد طبعا .. وبص لنور وضحك
اسر : ممم طب انا اطلع انام احسن .. تصبحوا ع خيير
______________________________
ليل : قمر .. قمر .. اصحي
قمر بنوم : هي الساعة بقيت كام
ليل : الساعة ١٢
قمر : انا نمت كل دا ازاي.. وانتي مصحتنيش
ليل : كان شكلك تعبان قولت اسيبك نايمة .. المهم دلوقتي انا عاوزة المصروف علشان راحة الكلية
قمر : البوك عندك خدي اللي عاوزة .. هي فين البت تونة
ليل : قعدة برا تقريبا
قمر : اما اقوم اشوفها.. احسن دي متقعدش ف حتة غير وتجبلي مصيبة فيها ..
ليل : طيب انا راحة الكلية سلام
قمر : خليبالك من نفسك
ليل : حاضر
_____________________________
نور : عم خليل .. عم خليل .. تعالي ساعدني
خليل : تحت امرك ياست نور
نور : خد الحاجات دي طلعها اوضتي
خليل : حاضر ياست نور
تونة جاية تجري ع نور : الله ايه كل الحاجات دي يانور .. انتي هتعملي فرح ولا ايه
نور : لا مش فرح دا عيد ميلادي بكرا
تونة نطت وسقفت : هييييييه .. اخيرا الفرحة هتدخل بيتكم الكئيب دا
نور بتضحك : طيب يا تونة مش هتساعديني بقا .. دانا عملالك مفاجأة حلوة اوي
تونة : موفجأة ايه موفجأة ايييه
نور : تعالي ورايا وهقولك
تونة : ف ديلك اهو
قمر : بت ياتوونة .. راحة فين
نور : هتيجي معايا ..
تونة : هطلع اشوف الموفجأة
قمر : مفاجأة ايه
نور : هتعرفي لما تنزل
قمر : مابلاش تدخل الفيلا علشان محدش يضايق
نور : متقلقيش زين مش جوا .. مافيش ف الفيلا غير كريم واهو قاعد بيرسم هناك اهو وأسر نايم .. يعني مش هتحصل مشكلة
تونة : ونبي يااقمر سبيني اشوف الموفجأة .. ونبيييي ونبييي
قمر : خلاص ياتوونة بطلي زن .. روحي
تونة : هيييييييه .. وطلعت تجري ع فوق
قمر : شوفي البت مصدقت
نور : متقلقيش عليها ياقمر .. تونة غلاوتها من غلاوة كريم .. وانا كان نفسي من زمان ف اخت صغيرة .. بس محصلش نصيب
قمر : ان شاءالله ياحبيبتي نفرح بيكي .. وتجبلنا انتي البنت ..
نور : ان شاءالله .. صح بكرا عيد ميلادي طبعا هتكوني موجودة
قمر : اعذريني يانور انا مش هينفع احضر .. انتي شوفتي اللي حصل امبارح وانا بصراحة مش طايقة ابص ف خلقة اخوكي
نور : والله بابي دافع عنك وجبلك حقك وطلب منه يعتذرلك .. بس طبعا زين دماغه ناشفة ومبيعتذرش
قمر : انا لا عاوزة منه اعتذار ولا أي كلام بيني وبينه اصلا ..
نور : طيب والعيد ميلاد
قمر : ليل وتونة هيحضروا بس ونبي ياختي اعذريني انا ومتزعليش مني ..
نور : ماشي ياقمر هسيبك ع راحتك
تونة طلعت من بلكونة أوضة نور : ماتخلصونا بقا ف الليلة دي عاوزة اشوف الموفجأة
نور بتضحك : طالعة اهو متزعليش نفسك
تونة : روحي يا قمر الله يسهلك وسبيها تطلع
قمر : ماشي يام لسان طويل ..
نور : انا هطلع بقا قبل ماتنزل تضربنا .. عاوزة حاجة
قمر : لا ياحبيبتي سلامتك
____________________________
#حكاية_قمر 🌜💕
#بقلم_ياسمين_علي ••
ليل خلصت محاضرات وبتدور ع حد تديهالوا .. لمحت صافي قعدة
ليل : ييييه هو مافيش غير البومة دي .. هروحلها وامري لله
ليل : ازيك ياصافي
صافي بعدم اهتمام : اهلا
ليل : دي المحاضرات بتاعت النهاردة .. علشان امبارح ...
صافي قطعت كلامها : مالهاش لزوم خلاص مش محتاجنها
ليل : مش فاهمة ؟
صافي : ايه الصعب ف اللي قولتو .. بقول مش محتاجين منك محاضرات سهلة اهي
ليل : دا من امتا .. ومين قال كدا اصلا
صافي : من امتا من يومين .. مين قال كدا بقا ف هو اسر .. بصراحة كدا قال ان هو مش حبك ومش عاوز واحدة غريبة تدخل الشلة وكلام كتير قالوا عنك .. مش عاوزة اقولو علشان متضايقيش .. ف وفري ع نفسك المحاضرات دي مش محتاجنها
"ليل اتغاظت من كلامها وحبيت تحرق دمها هي كمان "
ليل بابتسامة : اسر هو قال كدا .. بصراحة مش مصدقة كلامك
صافي : ومتصدقيش ليه ان شاءالله ..
ليل : لا ولا حاجة .. ع العموم انا لما اشوفوا النهاردة هبقا اسألوا .. سلام ياحبيبتي
صافي : استني عندك .. تشوفي فين.. انتو هتخرجوا مع بعض !!!!
ليل : مين جاب سيرة الخروج دلوقتي
صافي : اومال ايه لما تشوفي دا
ليل : اشوفوا ف الفيلا هيكون فين يعني .. ايه دا هو اسر مقالكيش اننا عايشين مع بعض ف نفس الفيلا ؟ ازاي ينسا يقولك
صافي بعصبية : فيلا ايه .. انتي عايشة مع اسر .. انتي واحدة كدابةة
ليل : تؤ تؤ وهكدب ليه بس .. اونكل احمد يعرفنا وجبنا نعيش عنده ف الفيلا .. انتي اتضايقتي ولا ايه .. لو عاوزني اكلم اونكل احمد تيجي تعيشي معانا انا موافقة .. بس هدي اعصابك
صافي بعصبية : غوررري من وشي
ليل بابتسامة : انا كدا كدا كنت ماشية انتي اللي وقفتيني .. يلا بااااي
"صافي بعصبية قلبت الطربيزة و مشيت و الناس واقفة تتفرج "
_________________________________
#حكاية_قمر 🌜💕
#بقلم_ياسمين_علي ••
_________________________________
نور : انا جيت اهو يا تونة
تونة : اخيرا .. ها فين الموفجأة بقا ها
نور بتدور ف الكياس : استني ..
تونة : ها
نور : اهم .. ( فساتين أشكالها مختلفة وشيك اوي لتونة ) بصي ايه رايك ف دول
تونة برقت عينها : الللله كل دوول علشانني .. دول حلوينن اووووي اووي .. هاتي البسهم
نور : استني بس .. مش المفروض تاخدي شاور حلو كدا ونظبط شعرنا الجميل دا وبعدين نلبس الفساتين دي
تونة : يعني عاوزني علشان اللبس الفستان .. استحما واسرح الاتنين
نور : اه الاتنين
تونة : لا ياستي يفتح الله .. مش عاوزة
نور : استني بس يا تونة . . مش انا اتفقت معاكي
تونة : انا مبتفقش ع الحاجات اللي تفرهد دي
نور : فرهدة ايه بس يا تونة استني .. دادة نجلااء يادادة
كنزي : ايه يانور ف حاجة
نور : دادة نجلاء فين
كنزي : خرجت تشتري حاجات . . لو محتاجة حاجة اعملها انا
نور : عاوزكي تساعدي تونة وهي بتاخد شاور
تونة :.. نور انا مش عاوزة الموفجأة خلاص خديها انتي ياكنزي
نور : لا يا تونة دي ليكي انتي . . مفاجأة كنزي هتاخدها هي كمان ..
تونة : ايه هتحميها هي كمان .. هو العيد جه ولا ايه
نور بتضحك: اه عيد ميلادي بكرا
تونة : طب ياستي استحمي انتي احنا مالنا
نور : لا انتي كمان لو بتحبيني روحي مع كنزي ع الحمام يلا
تونة : ماشي يانور علشان خاطرك .. وقربت من كنزي بصوت واطي .. عارفة لو الماية جت عليا هفقعلك عينك
كنزي : ياماما لا ونبي يانور استني ماما لما تيجي تحميها هي
نور : وبعدين بقا يا تونة يلا بلاش دلع
تونة بتتصنع الزعل : حاضر .. حاضر
_______________________________
موبايل اسر بيرن
اسر بنوم : أيوة ياصافي في حاجة
صافي بعصبية : انت ازاي متقوليش ان ليل عايشة معاك
اسر : اتكلمي عدل بس الأول .. وانتي عرفتي منين
صافي: كل اللي همك عرفت منين ومش همك النار اللي جوايا.. بقا هي عايشة معاك . . وعامل قدامنا انك مش طايقها
اسر : علشان دي الحقيقة
صافي : لا والله وطلما مش طايقها .. سايبها ف البيت ليه .. حالا تطرد من عندك حالا
اسر : والله بابا هو اللي جايبها ومش هيطردها علشاني
صافي : وهو باباك يعرفها منين اصلا وايه حكايتها
اسر : ليل تبقا بنت صاحب بابا وفي مشكلة ف بيتهم وبابا جابهم عندنا.. ( مرداش يقولها ع حاجة تخص ليل علشان صافي متمسكهاش عليها )
صافي : تمام يااسر .. يبقا انت اللي تروح تقعد عند وليد لحد ماتغور
اسر : انتي هتحكمي عليا اقعد فين ..
صافي بعصبية : اه هحكم عليك .. علشان انت بتاعي انا يااسر مش هسيبك ليها
اسر : انتي اتجننتي رسمي.. لما تعقلي وتفهمي اللي بتقوليه ابقا كلميني .. سلام
صافي بعصبية حدفت الموبايل كسرته : مااشي ياليل .. انا هوريكي
_____________________________
"فقرة حُما تونة "
تونة : اوعي بقا كفاية كدا
كنزي : انا لسه عملت حاجة
تونة : خلاص ياستي انا رجعت ف كلامي مش عاوزة
كنزي : انا هقوم انادي ع نور
تونة : خلاص خلاص اقعدي .. يباي عليكي بت
كنزي : أيوة كدا
تونة : اعملي وانتي ساكتة بدل مااغرقك ف البانيو دا
كنزي: انا ايه الي خلاني اتدخل ماكانت نور استنت ماما
تونة : حظك تقعي فيا .. اخلصي بقا يلا
__________
" فقرة الشعر "
تونة لابسة بورنص ع قدها وقعدة كنزي ماسكة شعرها
تونة : اي اي برااحة شوية يابت انتي
نور : براحة عليها ياكنزي
كنزي: والله يانور براحة بس هي شعرها مكلكع خالص .. انتي مبتسرحهوش
تونة : ماهي دي التسريحة ياجاهلة .. اي متشديش والله هلفلك اكلك قلم
كنزي : لالا دي لسانها طويل اوي يانور .. خدي اعملي شعرها انتي
نور : معلش ياكنزي كملي جميلك .. وانتي يا تونة احترمي كنزي علشان هي أكبر منك
تونة : طب خليها متشدش طيب
كنزي : مش هشد اهو ... كدا كويس
تونة : اه خلصي يلا
_______
" تونة لبست و سرحت شعرها وبقا شكلها حلو اوي "
كنزي : اخييررراا ..
نور بفرحة: ايه رايك يا تونة
تونة بصة ف المرايا وفرحانة وبتلف بالفستان : شكلي حلو اووي .. انا مبسوطة وراحت حضنت نور وباستها وحضنت كنزي وطلعت تجري بالفستان في الفيلا
وكنزي ونور بيتفرجوا عليها وفرحانين لفرحتها
تونة نازلة تجري ع السلم شافت نجلاء
تونة راحت عليها : بصي يانوجة كنزي عملتلي ايه ..
نجلاء : بجد كنزي اللي عملت كدا .. شكلك حلو اوي يا تونة .. اوعي تبهدلي هدومك بقا
تونة : مش هبهدلها خالص .. وطلعت تجري ع برا وهي طايرة بالفستان
__________________________________
اسر : أيوة ياسي زفت
وليد : ايه دا مالك يابني
اسر : بقا احكيلك حاجة .. تروح تقول لصافي عليها ما هو انا غلطان اني حكيتلك حاجة اصلا
وليد : حاجة ايه دي والله ماقولت حاجة
اسر : اومال عرفت منين ان ليل عندي
وليد : والله يابني ماقولتلها حاجة
اسر : ولا قولت لسارة .. ممكن تكون قالتلها
وليد : سارة ايه لا طبعا مقولتش لحد
اسر : اومال عرفت منين !!!
وليد : تفتكر قابلت ليل وقالتلها
اسر : اه صح دول كانوا ف الكلية النهاردة . . يبقا هي ليل .. طيب اقفل وانا هشوف الموضوع دا .. سلام
وليد : سلام
____________________________
تونة بتخبط .. قمر فتحت
قمر بفرحة : ايه الحلاوة دي يابت يا تونة
تونة بتلف : بصي بصي الفيونكة اللي ف الفستان حلوة ازاي
ليل : اش اش اش ايه الشياكة دي كلها يابت .. معرفتكيش
تونة : دا اقل حاجة عندي .. انا محبتش ازود ف الحلاوة لاحسن اكل الجو منك
قمر بتضحك : لا انتي كدا كلتي الجو مننا كلنا
ليل : هتاخد قلم ف نفسها كدا
تونة مسكت الفستان و بتغني : لولا الملامة ياولا لولا الملامةةة .. لافرد جناحي ع الولا زي الحمامة
ليل : ولا مين اللي تفرضي جناحك عليه
تونة : واطششيرر وارفرف ف الفطااار
ليل : فطااار !!!! اسكتي خالص متغنيش
قمر : بس يا ليل سبيها . . غني يا تونة
تونة : وكفااايييعع عووومرري كففااية عوووومرري كفاااايةة عووومرري .. كففااية عومررري ... كفاااااايه عووومرري
ليل : الشريط سف ولا ايه
قمر بتضحك : باينه كدا
تونة : يوة مش فاكرة الباقي .. غني معايا ياقمر
قمر : لا قمر مين اللي تغني
ليل : أيوة ياقمر غني انتي .. ارحم من الجعورة دي
تونة : هرزعك قلم
ليل : خلاص انا اسفة ياستي .. يلا ياقمر غني انتي
قمر : لا غنوا انتو وانا قعدة اسمعكم
ليل : طيب ابدئي انتي واحنا هنغني معاكي
تونة : أيوة أيوة ونبي يلا ياقمر
قمر : خلاص ماشي متزنوش
_
قمر بدءت تغني :
لولا الملامه يا هوى لولا الملامه ... لافرد جناحي عالهوا زي اليمامه
ليل وتونة : لولا الملامه يا هوى لولا الملامه ... لافرد جناحي عالهوا زي اليمامه
قمر : واطير وارفرف بالفضا
... واهرب من الدنيا الفضا
وكفايه عمري .. كفايه عمري اللي انقضى
وانا بخاف الملامه .. وانا بخاف الملامه
وآه من الملامه
---
" زين معدي وسمع الصوت وقرب يشوف مين بيغني "
قمر : سالوني كتير .. سالوني كتير سالوني سالوني عليه
ليل وتونة : بتحبيه ..؟
قمر : ايوا ايو وهنكر ليه ..
ليل وتونة : لييه
قمر : بصولي ملام .. وقالولي كلام جراح
ليل وتونة : اااااه اااه
قمر : فرشولي الارض .. فرشولي الارض دموع .. والشمس جراح
كل دا كله عاشان حبيت
.. ولا عاشان قلت انا حبيت
" زين واقف بيسمع ومستغرب الرقة ف الغني والصوت دا طالع ازاي من قمر "
لولا الملامه يا هوى لولا الملامه
لافرد جناحي عالهوا زي اليمامه
واطير وارفرف بالفضا ..واهرب من الدنيا الفضا
وكفايه عمري .. كفايه عمري اللي انقضى
وانا بخاف الملامه .. وانا بخاف الملامه
وآه من الملامه
---
تونة بتسقف جامد وليل بتصفر : أيوة ياست قولييي كمان قولي
ليل : عظمة ع عظمة والله
قمر بتضحك : بس هتفضحونا اسكتوا .. انا هروح مشوار بسرعة واجي
ليل : ع فين يافنانة
قمر : عيد ميلاد نور بكرا هروح اجبلها هدية .. مش هتأخر
لسه بتخرج .. زين استخبي بسرعة علشان متشفهوش .. اطمن انها مشيت بيطلع .. لقي كريم ف وشه ورافع حاجبه
زين بارتباك : انا.. انا كنت جاي لقيت
كريم ابتسم و راح يكمل رسم
زين : اوووف امشي بسرعة قبل ماحد تاني يشوفني
________________________________
اسر بعت رسالة ل ليل
( عاوز اشوفك ضروري .. اطلعي مستنيكي )
ليل ابتسمت و فهمت ان صافي اتعاركت معاه
تونة : متضحكيني معاكي كدا ياليل ..
ليل : تونة انا هطلع اتمشي برا مش هتأخر متتحركيش
تونة : راحة ع فين كدا ان شاءالله ..
ليل : اتفرجي ع التلفزيون وانتي ساكتة .. يلا بااي
تونة ضيقت عينها : بتخبي عليا .. ماشي والله لأعرف وافضحك .. وقامت راحت وراها
________________________________
ليل : افندم
اسر : انتي شوفتي صافي انهاردة
ليل : كنت متوقعة انك عاوزني علشان كدا
اسر : يعني انتي اللي قولتلها انك عايشة معايا
ليل : اه قولتلها فيه حاجة !
اسر بيتعمد يضايقها : وعلي كدا بقا قولتلها كمان انك تبقا منين وجاية تعيشي هنا ليه ؟
*ضحك* ولا تكوني كدبتي عليها وقولتي ان احمد الالفي يبقا عمك انتي .. وبيشاور عليها من فوق لتحت
ليل اتعصبت : انت واحد ...
تونة : اللله الللله .. بقا هو دا اللي بيضحكك ياهانم
اسر : بضحكها !!
ليل حطيت ايدها ع بوق تونة : اسكتي .. انتي ايه جابك ورايا
تونة عضتها : جاية علشان اقفشك متلبسة انتي والموز دا .. انا مكنتش مرتحالك.. قدااامي ع جوا امشي .. دانتي ليلتك سودة قدااامي
" ليل مشيت مع تونة قبل ماتفضحها وأسر واقف بيضحك ع اللي تونة عملته ف ليل وانقذته قبل ما ليل تنفجر فيه "
__________________________________
سهر : مسا الخير ياهدي
هدي : مسا النور
سهر : ايه الصوت دا جاي منين
هدي : من اوضه صافي .. شكلها متعاركة مع اسر ومبهدلة الدنيا فوق .. انا تعبت معاها
سهر : طيب اهدي انا هطلع اشوفها
" صافي قعدة متغاظة ومتعصبة ف الأوضة وعمالة تكسر ف الحاجة "
سهر : في ايه ياصافي مالك
صافي : اطلعوووا برررا ... مش عاوزة اشوف حد ..
سهر : فهميني طب حصل ايه ..ونحل الموضوع
صافي : مافيش حل .. انا هموتت نفسي .. سبيني واخررجي بقولك
سهر : ياصافي طيب اهدي .. انا سهر حبيبتك هعملك اللي عاوزة .. بس فهميني اسر عمل اييه بس
صافي بعياط : بيحب غيري .. ومش بس كدا دا جابها تعيش معاه ف الفيلا .. انا هتجنن منه
سهر : مين دي اللي جابها تعيش معاه .. وازاي اونكل احمد يوافق
صافي : اونكل احمد نفسه هو اللي جابها .. بيقولي بنت صاحبه .. انا ماليش دعوة يا سهر البت دي لاااازم تمشييي اتصرفي
سهر : انتي متأكدة ان اونكل احمد هو اللي جابها
صافي بعصبية : هو دا كل اللي همك ..
سهر بتربط كلامها بكلام زين : ماهو لو اللي ف دماغي صح .. يبقا مالكيش حق تزعلي خالص
صافي : هو ايه اللي ف دماغك بقا
سهر : هحكيلك ياستي
_____________________________
تونة : قدااامي.. ان ما فضحكتك .. ياليل مبقاش انا تونة
ليل : تونة انتي فاهمة غلط .. دا كان بيعزمني ع عيد ميلاد نور
تونة مسكتها من شعرها: بتكدبي تااانييي .. دانا سمعكم بوداني دول ..
ليل : خلاص يا تونة ياحبيبتي مش هتتكرر تاني .. مش هتقولي لحد طبعا
تونة : حد واحد .. دانا همشي احكي للكل واحط التوابل بتاعتي كمان
ليل : لا ونبي بلاش توابلك لاحسن تطلعيني متجوزة عرفي .. طيب نتفق
تونة : ولو ولو لازم افضحك
ليل : هجبلك شيكولاتة كبيرررة اوي فيها مكسرات . .
تونة : بالفستق والبنتق ؟
ليل : أيوة بالحاجات دي .. ها قولتي ايه
تونة : اديني شوية كدا اقلبها ف دماغي
ليل : ماشي ياستي بس المهم متتكلميش
تونة مدت ايدها : بوسي
ليل : نعم ياختي
تونة : انا قايمة اقولهم انك حامل
ليل مسكتها : ايييه لااااا .. هاتي * باست ايدها * اهو اهو .. ابوس رجلك كمان
تونة : لا كفاية بوس .. قومي حطيلي اكل
ليل : ربنا ع الظالم
تونة : بتقولي حاجة
ليل : لا بكح ..
_______________________________
صافي بفرحة : بتهززززاريي يعني ليل دي فقيرة ..
سهر : دي من مستنقع يابنتي .. وزين بيحكيلي قد ايه اختها بيئة اووي .. انتي ازاي تتغاظي من واحدة زي دي
صافي : مكنتش اعرف.. ميبانش عليها .. وأسر كمان كدب عليا وال ايه بنت صاحب بابا
سهر : لا طبعا دا اونكل احمد جابهم عنده شفقة كدا ... انتي عارفة طيب
صافي : طب انا عاوزة افضحها و اخليها تحرم تقرب من حاجة بتاعتي
سهر : بكرا عيد ميلاد نور .. ظبطيها براحتك ..
صافي : وانتي ساعديني يا سهر ونبي ..
سهر : انا اساعدك ..
صافي : اه نجيب مناخيرها الأرض ونعرفها مقامها
سهر : موافقة بس عندي شرط صغير خالص لو نفذتيه .. هساعدك
صافي : ايه هو
سهر بتتصنع الزعل : تكلمي فاروق تقوليلوا يخليني هنا .. يرضيكي ياصافي اترمي هناك لوحدي .. اعيش ازاي من غيركم .. انا روحي فيكم ..
صافي : بس كدا حالا .. يابابااا .. يابابا
سهر : استني طب ...
فاروق : في ايه ياحبيبت بابا
صافي : بابا ونبي خلي سهر عايشة معانا هنا . . متسفرهاش برا .. وحضنت سهر انا مقدرش استغني عنها.. علشان خاطري
فاروق : طيب وشركاتنا اللي برا
صافي : بيعها تجيب حد يديرها أي حاجة .. بس سهر متمشيش
فاروق : علشان خاطر عيونك مش هسفرها .. اي اومر تاني يا حبيبت بابا
صافي : متشكرة اووووي يابابا .. ها يا سهر مبسوطة
سهر مستغربة سرعة قراره .. ابتسمت: طبعا طبعا ياحبيبتي .. هو انا اطول افضل عايشة معاكم
صافي غمزتلها : ع اتفقنا بقا
سهر بتتصنع الابتسامة : اكيد ياحبيبتي . . اسيبكم انا بقا
خرجت وقفت ورا الباب بصه عليهم والغضب ماليها : بقا حتة مفعوصة زي دي مصيري يتغير بقرار منها !!! لسه زي مانت ياافاروق .. حسابك تقل اووي معايا .. بكرا ادفعك تمن كل حاجة عملتها معايااا .. هدوقك من نفس الكاس يافااروق .. لاززم تدوق يافاروق لازم
ياتري ايه اللي فاروق عملوا مع سهر خلي جواها كل الكرهه دا من ناحيته ؟
يتبع الفصل السابع اضغط هنا