رواية كارينغتون 2059 البارت السادس 6 بقلم لينا بسيوني
رواية كارينغتون 2059 الفصل السادس 6
الحلقة السادسة بعنوان " سيد الغابة "
لطيف جرى بعيد.
نادينا عليه فقالنا :
أرنب... أرنب!
وسابنا واختفى فى الغابة
اتلفت ورايا لاقيت رضوان بيسرح بعيد
ناديت عليه و روحت وراه، وصلت عنده ومسكت ايده فلاقيت نورا بتقرب علينا وفى ايديها فطر (مشروم) رفعتها فى السما وقالت فى انتصار :
ييس شوفوا لاقيت اي...
مكملتش الجملة رجلها خبطت فى حبل مشدود واتكعبلت فيه بعدها اتفأجإنا بشبكة تحت ورق الشجر بتتلم من تحتنا وبتملنا فى بعض ، رفعتنا كلنا فوق وشعلقتنا فى شجرة .
نورا قالت:
فخ..!!
بصيت حواليا فشوفت اكتر من سهم منطلق فى اتجاه شبكة الفخ اللى وقعنا فيها.
السهام كلها عدت من جنب الشبكة من غير ما تصيب حد , سهم واحد بس خدش دراعى .
أتالمت وبصيت حواليا علشان أشوف مصدر السهام لكن ماشوفتش حاجة وكأنها انطلقت من الفراغ !
نادينا بصوت عالى وأحنا بنستنجد :
يالطيف !! يالطيف
لكن لطيف ماردش علينا .
نورا طلعت سكينة من اللى معاها ولسه هتقطع الشبكة , أتفاجأنا بطفل ميعديش ال 8 سنين واقف بلبوص تحت الشبكة بيبص علينا وأحنا متشعلقين و لما لاقانا التفتنا ناحيته , جرى بسرعة بعيد عن الشبكة .
ناديت عليه :
ولا ... أنت ياله !!
مردش عليا وأنطلق فى الغابة لحد ما أختفى .
نورا كملت قطع فى الشبكة بالسكينة لحد ما أتقطعت فاترزعنا على الأرض و كل واحد مسك حته من جسمه وهو بيتألم.
سمعنا صوت صويت ورجلين بتدب على الأرض .
اتلفتنا حوالينا و مالحقناش نقوم اتفأجئنا بمجموعة من الستات بيحاوطونا من كل ناحية.
كانوا حالقين شعرهم زيرو و ماسكين رماح وأقواس من الخشب!
قربوا علينا و واحدة منهم دراعها مقطوع سألتنا بدون مقدمات :
أنتوا تبع مين ؟!! الامير ولا الذئاب ؟
قولتلها :
لا دول ولا دول , أحنا تبع نفسنا ...
وشوشوا بعض وهما بيبصوا على السلاح اللى على كتفى.
نزلت السلاح من على كتفى فكلهم وجههوا رماحهم وشدوا أقواسهم فى أتجاهى .
قولتلهم وانا رافع أيدى باستسلام :
احنا مش جايين نأذى حد احنا رايحين الصعيد وكنا معديين فى الغابة.
ورميت السلاح قدامهم .
ام دراع مقطوع قربت بحذر، اخدت السلاح ورجعت لورا تانى.
واحدة جنبها قالت :
أحنا ناخدهم للسيد وهو اللى يقرر نقتلهم ولا لآ..
كلهم هزوا رأسهم بالتأكيد.
قربوا علينا ، ربطونا بالحبال من أيدينا ومشونا وراهم وسط الغابة.
نورا كانت بتردد بصوت عالى و بطريقة التسبيح عشان محدش ياخد باله انها بتنادى :
يالطيف ... يالطيف ... يالطيف
رضوان كان ماشى مبتسم وبيقول :
ستات... قرعة!!
فضلنا ماشيين وراهم لحد ما وصلنا لكوخ كبير معمول من الخشب ومتغطى بورق الشجر .
ام دراع سبقت زمايلها , قربت من الكوخ وخبطت بأيقاع 3 خبطات ورجعت مكانها تانى جنب زمايلها.
شوية وباب الكوخ أتفتح برتابة شديدة وخرج منه راجل أربعينى عينه بيضاء وماسك فى ايده عصاية خشب .
أول ما خرج من باب الكوخ كل الستات أنحنوا فى تبجيل وأحترام , ام دراع قالت :
أحنا أسفين لو أزعجناك ياسيد الغابة , بس لاقينا دول فى الغابة ومنعرفش تبع مين!!! شكلهم جماعة جديدة .
مشى برتابة وهو بيخبط عصايته فى الأرض لحد ما وصلنا.
شمشم فينا واحد واحد بعد كده ادانا ضهره ومشى ناحية الكوخ لحد ما وصل للباب , خبط باب الكوخ خبطتين بعصايته بعدها دخل وقفل الباب وراه!
نورا مايلت ناحيتى وقالت :
هو ده معناه ايه ؟ والزفت لطيف ده فين !!
قطعت كلامها لما شوفنا مجموعة من الستات اللى واقفين بيقربوا علينا.
نورا قالت بصوت عالى :
يالطيــــــــــــــف... انت فين يخربيتك!!!
قولتلهم بتهديد :
ست انتى منك لها ابعدوا عننا.
ام دراع قالت :
السيد امر اننا نطلق سراحكم وكمان نكرمكم.
قولتلها :
اى نوع من انواع الكرم لامؤخذة؟ ما ممكن تكرمونا دى يعنى تموتونا !
قالتلى وهى مبتسمة :
لا نكرمكم يعنى نأكلكم ونشربكم... السيد خبط خبطتين على الباب.. الخبطة الاولى يعنى نأمنكم لحد ما تخرجوا من الغابة والتانية يعنى نأكلكم ونشربكم.
نورا التقطت انفاسها وقالت :
اخيرا لاقينا ناس طيبين!! .. افرح يا مروان افرح يا رضوان هـنأ...
مكملتش جملتها وسمعنا طلقتين نار اضربوا ورانا.
اتلفتنا كلنا على ضرب النار لاقينا لطيف بيتمطوح زى السكرانين ،ضرب رصاصتين فى الهوا وقال بلسان تقيل :
ابعدوا عن مروان واخوه الاهبل و بت الفقرية دول تبعى اى حاجة هتقربلهم هموتها .. هو ايه ده!!! هم دول ستات قرع ولا رجالة بصدور!! ابعد ياد يا رضوان ابعد ياد يا مروان ابعد ياد لحاجة من دول تلوشك.
و ضرب رصاصة عدت من جنب دراع واحدة من الستات خدشته ورشقت فى شجرة .
الستات هجموا على لطيف اللى ادى ضهره ليهم وحاول يجرى لكن اتشنكل و وقع على الارض , رأسه اتخبطت واغمى عليه .
لطيف فاق لقى نفسه مرمى فى حفرة غويطة،
نادى عليا وعلى نورا فطلينا عليه من الحفرة , قولتله :
الله يخربيتك ايه اللى هببته ده !!!
قال وهو ماسك رأسه من الصداع :
هببت ايه.!! . الحق عليا انى جيت ادافع عنكم من الحاجات اللى كانت حواليكم...
نورا قالتله :
انت كنت فين ده كله ؟
قال :
جريت ورا الارنب محصلتش... عينى وقعت على بتاع من اللى بيتاكل ده .
نورا فلتت منها ضحكة وقالت :
سكان الغابة قالولنا انك تقريبا اكلت فطر سحرى وده اللى سبب عندك الهلوسة وخلاك تعمل الهبل اللى انت عملته ده .
.
رضوان قال بنمطية :
الفطر السحرى أو المعروف بالمخدر، هو نبات برى يحتوى على مادة السيلوسيبين وهو مركب ذو تأثير نفسى ويسبب الهلوسة، حيث تعتبر السيلوسيبين واحد من المركبات المعروفة التى تؤثر على المزاج،.
قولت للطيف :
الستات كانوا حالفين يقطعوك بعد اللى عملته ده لولا سيد الغابة اللى اتوسطناله عشان يعفو عنك.
لطيف خبط رأسه وهو بيقول :
سكان غابة مين وسيد مين !!! و هتطلعونى امتى من الحفرة دى!!
قولتله :
على حسب انت فايق ولا هتطلع تعمل مشاكل.
قالى :
يا عم انا فايق وعاقل وكل حاجة بس الدنيا والعالم كله بقوا مجانين .. طلعونى من هنا ولافونى سلاحى عشان ده عهدة .
نورا راحت جابت حبل ودلدلته وهى بتقول :
مش ملاحظ ان اننا من اول ما عرفناك واحنا عمالين نطلعك من حُفر .
لطيف مسك الحبل وتسلقه برشاقة وهو بيقول :
معرفة فقر وناس فقر وياريتكم ما طلعتونى من الحفرة الاولانية.
نورا قالتله :
اخلص واطلع عشان تقريبا جهزوا الأكل.
نط بره الحفرة وقال بحماس :
اكل !!! فين !!
شاورتله على مكان تحت شجرة كبيرة حضروه لينا عشان نأكل فيه.
لطيف اول ما شاف الاكل قال :
ايه ده !! انارب.
وراح مشمر وهجم على الاكل وهجمنا معاه.
قعدنا ناكل كلنا بشراهة فى الأرانب عدا رضوان اللى وقف بعيد ومرضاش يأكل.
نورا قالتله :
تعالا الحق الاوكازيون يا رضوان مش هنلاقى أكل بعد كده.
رضوان رد عليها وقال :
شكرا رضوان مش جعان رضوان عايز ينام
رضوان قعد تحت الشجرة وراح فى نوم عميق.
بعد ما اكلنا وشربنا دخلت علينا ام دراع وقالت :
ها ايه رايكم فى الفيران ..
قولنالها :
فيران ايه ؟!
شاورت على الأكل وقالت:
دى .. اللى انتوا اكلتوها !! تعرف ان أنثى الفأر بتنتج اكتر من 50 فأر فى
لطيف قال:
لا يختى معرفش ويارتنى ما عرفت.. هى مالها قلبت على الصين كده ليه!!
نورا لفت ورا الشجرة وحطت صوابعها فى بوقها فى محاولة لافراغ معدتها .
وانا قعدت اتفتف بقرف.
ام دراع بصتلنا بأستغراب كأننا بنى أدمين مش طبيعين و
لفت ظهرها وقالت :
سيد الغابة بيطلب منكم تحضروا احتفال الاضحية قبل ما تسيبوا الغابة.
قولنا فى صوت واحد :
اضحية ايه ؟!!
قالت :
لما تيجوا هتفهموا.
مشينا وراها فودتنا عند مكان متجمعين فيه الستات على شكل دائرة وبيضربوا رماحهم فى الارض بحماس .
فى وسطهم سيد الغابة قاعد على كرسى وفى ايده سكينة، جنب ايده اليمين ست وجنب ايده الشمال ست تانية، عينيهم متغمية وايديهم متكتفة من ورا !
قربنا من الجمع ووقفنا متناحين مش فاهمين حاجة كنا بنسمع همهمات مصاحبة لصوت الرماح وهى بتخبط فى الارض.
اتفجأنا وبدون مقدمات بسيد الغابة بيمسك رأس واحدة من اللى واقفين جنبه وبيقطع رقبتها بالسكينة!
نورا صرخت لاأرديا وقالتله :
انت بتعمل ايييه ؟!!
محدش التفت لها و فضلوا مكملين فى شعائرهم الغريبة.
سيد الغابة مسك رأس البنت التانية وقطع رقبتها هى كمان.
نورا اخترقت صفوف الستات و اتحركت ناحيته وقالتله :
انت قاتل... انت مجرم زى اللى بره.
أم دراع مسكت ايد نورا وقالت :
انتى ازاى تتطاولى على سيد الغابة .. سيد الغابة بيحمينا كلنا.
نورا قالتلها :
قصدك بيقتلكم كلكم .. وبعدين ايه الطقوس الغريبة اللى عاملينها دى !! انتوا عبدة شيطان ولا ايه !!
قالتلها :
اصل اللى ميعرفش ..انا نفسى انول الشرف ده ولو سألتى اى واحدة من اللى موجودين هتقولك انها نفسها تنول الشرف ده .. الاتنين اللى ماتوا دول ماتوا عشان احنا نعيش .
نورا شاورت على سيد الغابة وقالت :
اوعوا يكون المشعوذ ده اقنعكم انه بيتقرب بالتضحية دى للطبيعة او للغابة عشان تحميكم اصل انا عارفة الخزعبلات دى كويس .
ام دراع قالت :
لا الجثث دى بقدمها تضحية للذئاب اكلى لحوم البشر.
بصت على دراعها المقطوع و سرحت وهى بتقول :
اخر مرة الذئاب اصطادوا فيها من الغابة قتلوا 10 مننا وكانت مذبحة.
لحد ما سيد الغابة وصل لحل مع قائدهم انه يبعتله اضحيتين فى ميعاد الصيد بتاعهم ومن رحمة سيد الغابة بينا انه ميبعتناش احياء عشان ميغتصبوناش بيبعتنا جثث عشان يكلونا بس.
نورا قالتلها :
ما انتوا كدا كدا هتخلصوا!!
قالت :
عارفين ان احنا هنخلص بس سيد الغابة بيدينا فرصة نعيش فترة أطول.
نورا وجهت كلامها لسيد الغابة وقالت :
طب ما تقاوموا على الاقل تبقوا حاولتوا وانتوا بتموتوا بدل ما تموتوا من الخذى والذل او اهربوا.
ام دراع ردت عليها وقالت :
نهرب فين!!! الغابة أأمن مكان عيشنا فيه..ويكفى ان احنا عاملين اتفاقية مع أخطر جماعة بتحكم.
.
قربت من نورا لما لاقيتها هتولعها وضغطت على ايدها وانا بقولها بصوت واطى :
واحنا مالنا يا ستى يلا بينا انتى ناسية ان لينا تار مع الذئاب.. يلا يا نورا.
قالت :
احنا مالنا ازاى استنا انت ...
ووجهت الكلام ليهم وقالت بنبرة قائد :
ما انتوا شاطرين اهو وبتعرفوا تعملوا افخاخ ومعاكم اسلحة انتوا كل اللى محتاجينه خطة وشجاعة وتفككوا من الراجل ده.
وشاورت على سيد الغابة.
قولتلها :
الله يخربيتك ده الراجل الوحيد اللى سابنا عايشين .
لطيف اكد على كلامى وقال :
ما تسكتى يا بت الفقرية انتى هتقلبى جماعته عليه ليه ..
وشاور لسيد الغابة وقال :
لامؤخذة يا سى السيد عيلة وغلطت انتوا حرين يا جماعة على وضعكم لحد ما تخلصوا.. هنتكل على الله احنا بس لافونا حتتين السلاح عشان دول عُهدة .
لطيف قطع كلامه لما سمعنا صوت العواء , سيد الغابة قام من مكانه فسمعت واحدة من الستات بتقول :
وقت التسليم.. الذئاب على وصول
الستات اتحركوا فى خلية منظمة، لموا جثث البنتين اللى دبحهم سيد الغابة فى شباك و علقوها على شجرة معينة ووقفوا صف فى انتظار الذئاب.
نورا كانت بتجرى وراهم وهم بيتحركوا وبتقولهم :
يا جماعة انتوا رايحين فين احنا لازم نقاوم.
لطيف كان بيحلق عليهم وبيقولهم :
لافونا حتتين السلاح خلونا نمشى من المورستان ده.
اما انا فرجعت تحت الشجرة عشان اصحى رضوان.
اخدت وقت كبير على ما صحيت رضوان , بعد ما صحيته اخدته فى ايده ورجعت لنورا ولطيف عشان نلحق نهرب قبل ما الذئاب يوصلوا.
اتصدمت باللى شوفته.
ابو عضلات اللى هرب من الافاعى واقف ومعاه 10 اشخاص اول ما شافنى انا ورضوان شاور علينا وقال :
والاتنين دول كمان ..واعتبروا ده عربون الاتفاق الجديد مع القائد الجديد ومن المرة الجاية الاضحية هتبقى 3 مش 2.
- يتبع الفصل السابع 7 عبر الرابط التالي: "رواية كارينغتون 2059 كاملة" اضغط على أسم الرواية