رواية كارينغتون 2059 البارت التاسع 9 بقلم لينا بسيوني
رواية كارينغتون 2059 الفصل التاسع 9
الفصل التاسع بعنوان " وليمة"
تنويه هام:
الحلقة تحتوى على مشاهد قد تكون عنيفة بالنسبة للبعض لذا وجب التنويه.
السماء كان مغطيها الدخان الأسود و اشجار الغابة كانت لسه بتتحرق .
اتحركنا مع بعض وفضلنا ننادى :
يا رضوان .. يا رضوان .. يا رضوان.
لحد ما الليل دخل علينا من غير مانلاقيه
لطيف قال :
محتاجين نرجع المصنع تانى نجيب اى حاجة ننور بيها عشان نكمل تدوير بليل غير اننا محتاجين نريح شويه عشان يبقى عندنا طاقة نكمل ...
نورا وافقت على كلامه ،ربتوا الاتنين على كتفى ورجعنا على المصنع .
روحنا المصنع وأول ما دخلنا من الباب اتصدمنا باللى شفناه..
نورا صرخت، أنا دورت وشى الناحية التانية ولطيف فضل متسمر مكانه، قال و هو مصدوم :
الملاعين... دبحوهم !!
اتفاجأنا بباب المصنع بيتفتح من وراء وبيتدفق منه مجموعة من الذئاب.
ثبتونا ، جردونا من السلاح ورفعوا علينا سكاكينهم وسنجهم.
فضلوا مثبتنا لحد ما دخل شاب طويل حليق الذقن. لابس بدلة طراز قديم جداا مخططة باللون الأبيض .
بص علينا.
اتفأجأنا بابو عضلات بيظهر من بين رجالته وهو رابط دراعه اللى كان راشق فيه السهم.
قال وهو بيتنطط من الفرحة :
مش قولتلك يا قائد هيرجعوا .. هم دول يا قائد جيار بس ناقصين واحد.. الساحر .. هم دول اللى قتلوا القائد غريب وهم دول حسب كلام الحريم اللى عملوا النار اللى حرقت..
جيار قطع كلامه وقاله بأندهاش وهو بيشاور علينا :
دول !!! عيلين صغيرين وبنت بشخة!!
نورا انفعلت وقالتله وهى بتفرفس من السكين اللى على رقبتها :
اهو انت اللى بشخه..
القائد قرب منها , حط صباعه على رأسها ونغزها فى رأسها اكتر من مرة وهو بيقول:
انتوا !!! انتوا اللى قتلتوا اخويا وحرقتوا اكتر من نص رجالتى !!
لف حوالينا وفجأة ضحك بسخرية وقال :
انا حقيقى مش مصدق !!
شاور على رؤؤس الستات المتقطعة ومرمية على أرضية المصنع وقال :
انا سيبت رؤؤسهم هنا واخدت اجسادهم عشان تطبخ.
سكت شويه وقال :
على فكرة انتوا اللى سرعتوا موتهم.. انتوا اللى حرضتوهم على المقاومة.... انا قريت مرة كتاب مش فاكر اسمه ايه .. تقريبا الجوع الالهى .. مش متذكر .. كان بيتكلم عن تجارب مجرمين اكلوا لحوم ضحايهم .. حد قرا حاجة زى كده؟!
بصينا لبعض ومحدش رد عليه , سمعت لطيف بيقول بهمس :
يا وقعة مربربة، شكلنا وقعنا مع سفاح مخبول!!
القائد كمل كلامه وقال :
الكتاب بيقول ان اطعم حته فى الجسم البشرى هى الصدر والفخد .. بس أنا عندى رأى تانى، انا بحب الكتف.
ادانا ظهره وقال :
لو اى حد مكانى متهور والانتقام عميه هيقتلكم انما انا غير.. انا عندى رؤية ورؤيتى بتقول ان اللى يستحق يعيش هو الاذكى والقوى..
انتوا اثرتوا فضولى لما عبرتوا المتاهة واثرتوه اكتر لما صنعتوا السلاح اللى فتك برجالتى رغم انكم مجرد 3 أشخاص. انا هعقد معاكم صفقة مقابل حياتكم.
شاور بصباعه لرجالته فنزلوا سكاكينهم من على رقبتنا.
قرب مننا ونزل على رجل واحدة وبص فى عنينا واحد واحد بعدها رجع ركز فى عنين نورا، ضحك بهسترية وسقف بقوة وهو بيقول :
واااو انا اراهن ان انتى العقل المدبر يا ام شخة.
قام وقف وراح ناحية ابو عضلات حط ايده على كتفه وقال :
دراعى اليمين قالى ان كان معاكم ساحر حول الشبك لتعابين وخلى التعابين تهاجمه هو واللى معاه .. انا مش مصدق الكلام ده ما هى مش معقولة برضه
ابو عضلات قاله :
ابدا يا قائد صدقنى كان معاهم عيل ساحر حتى كان باين عليه انه اهبل ..
القائد قطع كلامه ووجه لينا السؤال :
فين صاحبكم الساحر الأهبل اللى بيقول عليه ؟!! ..
لطيف رد و قاله :
رضوان تاه مننا فى الغابة .
جيار قال وهو بيضغط على مخارج الحروف :
اممممممم... اتحرق فى الغابة ..
لف حوالينا تانى وقال :
على العموم انتوا هتنفذوا اللى هقولكم عليه.. أنا قررت تعيشوا عبيد عندى.
قال الجملة واتفأجأنا بيهم بيثبتونا وبيكلبشونا بكلبشات شكلها غريب من أيدينا ورقبتنا متوصلة ببعضها بجنازير .
حطونا فى شبك و جرجرونا بعيد شوية عن المصنع فلمحنا عربية نقل من اللى بيشتغلوا بالبنزين .
جيار قال لرجالته :
ارموهم فى صندوق العربية.
رمونا فى صندوق العربية مع بواقى جثث ستات الغابة اللى دبحوهم فى مصنع الصابون .
نورا انهارت من العياط لما شافت منظر الجثث اللى من غير رؤوس ومترصصة فوق بعض فى صندوق العربية
لطيف خبى وشه و هو بيندب حظه ..
وانا كنت مفصول عن العالم اللى حواليا كل تفكيرى كان فى رضون واللى بنسبة كبيرة مات و حتى لو لسه عايش هيموت .
اخدونا معاهم للمعسكر بتاعهم، اول بيت اتقابلنا فيه أنا ونورا .
جرجرونا معاهم لحد سطح البيت، القائد شاور علينا و قالهم :
حطوهم هنا خليهم يشوفوا تحضيرات الوليمة بنفسهم.
نزل على الأرض على رجل واحدة قدمنا وقال :
انا عايزكم تشوفوا بعينكم المصير اللى أنا رحمتكم منه.
وقف وادنا ظهره , كمل كلامه وقال :
استمتعوا عشان بعد الوليمة هنبدأ الشغل .
نورا كانت فى حالة صدمة , شاردة تماما وعينيها متحجرة.
لطيف غمض عينه وفضل يدعى ويستغفر عن كل ذنوبه.
اما انا كنت عينى عليهم وهم بيحضروا كل التحضيرات بس مكنتش شايفه، سرحت فى جدى اللى اتأكل ورضوان اللى معرفش عنه حاجة.
عدت الساعات الحال ده، الذئاب سووا اللحم على النار بعدها اتجمعوا على الوليمة , اكلوا , ضحكوا وقهقهوا.
القائد قرب علينا ورمى حته من لحم الستات اللى بيكلوه قدمنا وقال :
خدوا جربوا .. ولا انتوا اخدتوا على اكل ورق الشجر والفيران!! .. العالم اتغير واحنا كمان لازم نتغير ونرجع لفطرتنا الوحشة... على فكرة اللحم البشرى ادمان لو جربتوه مش هتقدروا تبطلوه...
مفيش اكل هنا غيره هتكلوه غصب عنكم لانى محتاجكم بكامل طاقتكم علشان تصنعولى السلاح انا حضرت البنزين والصابون زى ما قائدة الستات حاكتلى.. الدور عليكم تطبخولنا الطبخة وبكميات ..
اصلى بفكر احكم العالم .. قصدى اللى باقى من العالم وفى الحالات دى لازم يكون معاك سلاح فتاك..
لطيف قطع كلامه وقاله :
مخطرش على بالك سؤال ؟!! لما البنى آدمين تخلص هتكلوا ايه؟ !!!
رد عليه وقاله بسخرية :
هنأكل بعض ..
لطيف قاله :
انتوا كلكم مخابيل.
القائد قرب منه وقاله بجدية :
البشر لسه كتير .. القليل هو الاكل بتاعكم... فى فيران كتير لسه مخرجتش من جحورها.. شكلك جعان .. هوه ه هوه ه هوه عينك جات على اللحمة .. بتفكر؟!
قرب قطعة اللحم من لطيف وهو بيقول :
كُل .. جرب ... اللحم بيدى القوة ..
لطيف قاله :
انا مستعد أكل بس عارف هأكل ايه ؟!!.. هأكل كبدك يا مخبول، محدش فينا هيعمل اللى انت عايزه ومحدش فينا هيعملك اسلحة .. موتنا احسن .
نورا خرجت عن صمتها وقطعت كلام لطيف وقالت بخوف حسيته مصطنع :
لا لا انا مش عايزة اموت احنا هنفذ اللى أنت عايزه .. على فكرة رضوان مش ساحر انا الساحرة انا اللى علمته واقدر اعلمك انت كمان .
جيار بصلها وقرب منها وقال :
انا قولت برضه ان انتى العقل المدبر... عينيكى فيها شرارة غريبة
نورا ردت وقالت :
هعلمك كل حاجة بس بشرط تحررنا من الكلابشات دى.
قالها :
أنتوا ملكمش شروط.. انتوا عبيد تنفذوا اللى أأمر بيه بس.. بعد الطبخة نشوف موضوع السحر بس قبل الطبخ لازم تأكلوا من اللحمة دى إجبار.
نورا قالتله :
استحالة..
مد ايده وشدها من شعرها بقوة، فصرخت
قالها :
جيار ميتقلهوش استحالة .. جيار يتقاله حاضر , انتوا نسيتوا ان انتوا عبيد ولا ايه !! ها هتأكلوا من اللحمة دى ولا اختار واحد منكم ادبحوا وتأكلوا منه .. اجبار برضه .
قال جملته وشاور على اتنين من اللى معاه فقربوا علينا
وفتحوا بوقنا وحطوا اللحمة وزقوه فى زورنا بالغصب بعدها سبونا ومشيوا من المكان .
فضلنا طول اللبل بنحاول نفرغ اللحم اللى دخل زورنا ومعدتنا.
تانى يوم طلعونا فى الجنينة بتاعت البيت و بدأوا تحضيرات عجينة النابالم.
نورا اصرت انها تشرح وقت التحضير عشان ميخدوش سر الخلطة ويقتلونا .
كنا واقفين على رجلينا ، رجلينا كانت متحررة لكن ايدينا لسه متكلبشة برقبتنا وحركتها محدودة .
حضروا لنورا اكتر من جردل معدن عشان تختار المناسب منهم.
نورا اختارت جردل كبير جدا للماية وكان فاضل جردلين ، جردل صغير خالص وجردل متوسط، نورا اختارت الجردل الصغير خالص !
استغربت من اختيار نورا وقولتلها :
لا ازاى مش..
قاطعتنى وقالت :
هو الجردل الصغير حلو هنحط فيه البنزين ونحطه فى جردل المايه الكبير اللى بيغلى انا عايزة فراغ كبير ما بين الجردلين.
لطيف دخل فى الحوار وقالها :
الفراغ خط..
نغزته فمكملش جملته وهز رأسه بالتفهم وقال :
ايوا صح يا نورا عندك حق.
انا ولطيف فهمنا نورا بتفكر فى ايه اى حركة غلط فى جردل البنزين البنزين هيشم النار وينفجر فينا كلنا...
نورا قررت تنفذ عملية انتحارية!!
حطوا الجردل الكبير اللى فيه الماية على النار وصابوا البنزين فى الجردل الصغير واستنوا لحد المايه ما تغلى بعدها حطوا جردل البنزين فى الماية المغلية .
نورا قالتلهم :
ابشروا الصابون ودوبوه كويس جدااا فى البنزين.
و مسكت العصاية عشان تعلمهم ازاى يقلبوا،
مكنتش عارفة تحرك ايديها كويس من الكلبشات اللى مكتفاها فقالت للقائد يحررها.
القائد رفض وقالها :
اشرحى هتعملى ايه بالضبط وانا هعمله.
قالتله :
براحتك !!
اخد من ايديها العصاية وهى رجعت خطوتين لورا ووقفت جنبنا.
لطيف قالها بهمس :
احنا قريبين من النار يعنى هننفجر.. هنتشوى معاهم.
نورا قالتله :
نعيش يوم واحد بكرامة ولا عمر كامل فى ذل!! .. بأختصار يا نعيش عيشة فل يانموت احنا الكل.
غمضت عينى وانتظرت الانفجار اللى هيحصل....
لكن محصلش حاجة...
فتحت عينى وبصيت على جردل النابالم لاقيت القائد بيقلب فيه برفق وحذر شديد وجردل البنزين ثابت جدا فوق الماية.
بصلنا وهو بيقول :
طبعا البنزين لو شم النار هيولع فينا كلنا!!
لطيف قال بهمس :
يابن الحقيرة..
نورا بصت للفراغ بخيبة أمل..
القائد جرب العجينة فى سور البيت فانفجرت وهدت جزء من السور .
سقف بحرارة وعوى بهسترية فعوت باقى رجال الذئاب وراه.
قالنا :
برافو برافو
وشاور على نورا و قال :
ندخل بقى فى موضوع السحر .
اتمشى فى الجنينة و شد شبكة من وسط الشبك الكتير اللى مالى المكان ، رمى الشبكة قدام نورا وقال :
ورينى ازاى هتحوليها لتعابين.
قالتله :
هو انا لو فى ايدى احولها لتعابين كان هيبقى ده حالى دلوقتى!!! . انا فاقدة قدرتى على ممارسة السحر انا لو بمارس السحر كان زمانى نفختكم.. كل اللى اقدر اعمله دلوقتى انى اعلم.
قهقه من الضحك وقال:
خزعبلات نابعة من ثقة طفلة بشخة... خلينا نتسلى ونجرب
نادى على ابو عضلات وقاله :
اعمل اللى هتقولهولك بالضبط.
نورا بصتله بأستغراب وقالت:
هو مش أنت اللى هتتعلم .
قالها :
انتى مفكرانى عبيط مش ممكن تطلعى فعلا ساحرة وتخلينى اقول حاجة العن بيها نفسي .
ابو عضلات رجع لورا وهو مقلق.
القائد شده لقدام وقاله :
اعمل اللى بقولك عليه والا هعتبرك كداب.
ابو عضلات ردد وعمل اللى قالته نورا وهو مقلق ومغلوب على أمره و فضل ينفخ فى عقد الشبكة وهو بيردد فى الكلمات ورا نورا
محصلش حاجة..
نورا قالت :
الموضوع مش بالسهولة دى لازم يكون عندك طاقة كونية وحاسس بقوة الكلمات اللى بتقولها او حد من اجدادك ساحر أو متوحد مع الطبيعة كراهب مش مجرم سافك للدماء واكل لحوم بشر!!
القائد قال :
امممم يعنى مبقاش ليكوا لازمة.. هنا وشفاء
وشاور اللى حواليه فقربوا علينا بسكاكينهم .
فجأة حسينا بهزة غريبة فى الأرض بعدها اتذهلنا كلنا من اللى حصل!!!
- يتبع الفصل العاشر 10 والأخير عبر الرابط التالي: "رواية كارينغتون 2059 كاملة" اضغط على أسم الرواية