رواية هكذا يكون الحب البارت الرابع 4 بقلم ايمان جمال
رواية هكذا يكون الحب الفصل الرابع 4
مهاب واخته وصلوا الڤيلا، وصافي نزلت من العربية بس مهاب لا
صافي: ايه دا انت مش هتدخل معايا؟
مهاب: لا ياحبيبتي انا رايح لباسم المعرض
صافي: ماشي يا أبيه
صافي دخلت الڤيلا ومهاب مشي
عبدالحميد كان قاعد هو والبنات واولاده وزوجاتهم في مدخل الڤيلا
عبدالحميد: امال مهاب فين ياصافي؟
صافي: وصلني وراح لباسم المعرض ياجدو
عبدالحميد: ماشي ياحبيبتي......وبص لفيروز: تعالي اعرفك على فيروز
صافي بإبتسامة حلوة زينت وشها: اسمك حلو اوي
فيروز بإبتسامة: انتي احلى
صافي قعدت معاهم وفيروز كانت فرحانة في وسطهم
سراج لفيروز: انتي عايشة لوحدك يابنتي؟
فيروز بحزن: ايوا ياعمي، بابا وماما اتوفوا من تلات سنين وانا من ساعتها لوحدي
ايمن: مش مخطوبة؟
فيروز بخجل: لا ياعمي لسة
وفاء: عارفة يافيروز حبيت فيكي ايه اول ماشفتك؟
فيروز: ايه ياطنط؟
وفاء: حجابك
البنات بصوا لبعض.....وخلود اتكلمت: يعني احنا وحشين كدا يافوفا
وفاء: لا ياحبيبتي مش وحشين انتوا ماشاء الله عليكم ملتزمين بالصلاة والدين وكل حاجة الا الحجاب.....وحجاب البنت فرض وواجب في الدين الاسلامي احنا محبناش نضغط عليكم عشان عارفين ان لازم تقتنعوا بيه الاول
شروق: نوعدك ياماما اننا هنلبسه بس نكون مستعدين للخطوة دي
ليلى: ربنا يهديكم يابنات
صافي: عارفين انا كنت عاوزة البس الحجاب من زمان بس كنت مستنية اما انزل مصر الاول
فيروز: بصي ياصافي قبل ماتاخدي القرار تكوني عارفة كويس ان القرار دا له احكام وشروط يعني مثلا تلتزمي بلبس الحجاب يعني شعرك مش يبان ادام اي حد ولد يعني مثلا ادام ابن خالك لا ابن عمك لا.....عمك وخالك اه لكن ولد غريب عنك لا غير لو كان جوزك ومحلل ليكي
عبدالحميد سامع كلامها ومعجب بيها اوووووي وكبرت في نظره
سراج بإعجاب: ربنا يحميكي يابنتي
وفاء: انتي بعد كدا تيجي هنا على طول
فيروز: حاضر ياطنط
ليلى: بصي يافيروز البنات وكل اللي هنا مش بيقولوا كلمة طنط دي ممكن تقولي لينا لولا وفوفا
فيروز بإحراج: لا ازاي ماينفعش طبعا
عبدالحميد: لا ينفع هما اصلا مش بيحبوا كلمة طنط ولا ماما عشان مايحسوش نفسهم كبروا
وفاء: اه احنا لسة شباب
ايمن ضحك: واضح
ليلى: ماشي يا ايمن ماشي
الكل ضحك وكانوا فرحانين
* في معرض العربيات *
مهاب دخل المكتب وباسم قاعد فاتح اللاب وبيتفرج على حاجة واول ماشاف مهاب قفل شاشة اللاب
مهاب بشك: انت قفلت اللاب ليه؟
باسم بتوتر: ها..عادي لاقيتك جيت قفلته
مهاب رفع حاجبه🤨: امممممم ياراجل
باسم: عاوز ايه يامهاب
مهاب قعد: انت بتحبها؟
باسم بتوتر: هي مين؟
مهاب: باسم بلاش لف ودوران وتعالى معايا دوغري
باسم اتنهد: مش عارف يامهاب
مهاب: يعني ايه مش عارف؟
باسم: يعني مش عارف حبي ليها دا حب اخوات ولا حب حبيب لحبيبته صدقني مش عارف يامهاب
مهاب مسك اللاب: طب وريني كنت بتتفرج على ايه
مهاب فتح شاشة اللاب وشاف ملف بإسم (خلود) وفيه كل صوارها
مهاب بصله: وتقولي مش عارف حبي ليها ايه
باسم ساكت ومش بيرد
مهاب قفل اللاب وبص لباسم: بص ياباسم اللي انا شايفه انك بتحبها حب عشاق مش حب اخوات خالص......وانت اللي بتكابر
باسم: مش بكابر يامهاب والله بس انا مش عاوز اقول حاجة وانا مش متأكد منها لازم احس ان حبي ليها دا حب عشاق مش اخواتي
مهاب قام: ماشي ياباسم
باسم: انت رايح فين؟
مهاب: رايح الڤيلا عند بابا
باسم: انت كنت جاي ليه؟
مهاب قرب منه: دا معرضي على فكرة ذيك
باسم ضحك: ياعم عارف بس انت مش بتجي هنا غير لما اقولك تعالى ومش دايما بتيجي من نفسك
مهاب ابتسم: كنت جاي عشان اعرف انت مخبي عني ايه
باسم ابتسم: مقدرش اصلا اخبي حاجة عنك وانت عارف كدا كويس
مهاب: ماشي ياسيدي وفكر وابقى قولي نويت تعمل ايه
باسم: ماشي
مهاب خرج وركب عربيته ورجع الڤيلا عند جده مهاب، وصل ونزل من العربية والحرس اخد منه مفتاح العربية يركنها، مهاب(الجد) وفايز ابنه وناني وريماس قاعدين بيتكلموا
مهاب دخل: مساء الخير
الكل: مساء النور
ريماس قربت منه: مهاب ممكن نخرج سوا النهاردة؟
مهاب بصلها: مش فاضي ياريماس
مهاب(الجد): مش فاضي ليه؟
مهاب(الصغير): هخرج مع اصحابي
مهاب(الجد): بس دي خطيبتك
مهاب(الصغير) بصله بغضب وحاول يتمالك اعصابه: ريماس اختي وبس
ريماس اضايقت من كلمة 'اختي' والدموع اتجمعت في عنيها: انا طالعة اوضتي.......وبصت لمهاب: انا اسفة يامهاب بس حتى لو كنت بتعتبرني كأخت ليك كنت على الاقل تخرج معايا
ريماس سابتهم وطلعت ومهاب حاسس انه قاسي اوي معاها وحاسس ان قلبها طيب عكس مامتها وقرر يطلع وراها يتكلم معاها
مهاب طلع عند اوضتها وخبط وهي فتحت
ريماس بإستغراب: مهاب!
مهاب: ممكن اتكلم معاكي شوية؟
ريماس: طبعا تعالى ادخل
مهاب دخل بس ساب باب الاوضة مفتوح وقعد على كرسي جمب السرير وهي على السرير
مهاب: ممكن ماتزعليش مني؟
ريماس: انا مش زعلانة منك يامهاب
مهاب: امال ليه دموعك دي؟
ريماس: عشان بحبك
مهاب بهدوء: مش يمكن الحب اللي جواكي ليا دا حب اخوات وبس
ريماس بتهز دماغها بلأ
مهاب: بصي ياريماس، ممكن الحب دا حب اخوات ذي ما انا بحبك كأخت وانتي مش حاسة بدا
ريماس بحزن واضح: بس انا عاوزة اكون معاك
مهاب: ومين قالك اني مش معاكي انا جمبك ومعاكي في اي وقت تحتاجيني فيه بس كأخ
ريماس زعلت وبصت في الارض: ماشي
مهاب مضايق انها زعلانة وحب يفرحها: مش كنتي عاوزة تخرجي؟
ريماس بصتله: ايوا
مهاب: طب يالا اجهزي ونخرج سوا
ريماس فرحت جدا ومهاب فرحان انها فرحت وقرر انه يقربها منه
مهاب دخل اوضته واخد دش وغير هدومه ونزل اخد ريماس وخرج وكلم باسم قبل ماينزل من اوضته وقاله يجيب البنات النادي ويأكد على صافي انها ماتقولش ادام ريماس انها اخته
وبعد شوية مهاب وريماس وصلوا النادي، ومهاب ركن عربيته ودخلوا سوا
ريماس: خلينا قاعدين جمب ال Pool (حمام السباحة)
مهاب: ماشي
وقعدوا جمب حمام السباحة وشوية وباسم والبنات وصلوا بعد ماوصلوا فيروز بيتها
باسم شاف مهاب وريماس قاعدين جمب حمام السباحة: يالا يابنات هما قاعدين هناك اهم
راحوا عندهم ومهاب اخد باسم بعيد عنهم
مهاب: كويس انك جيت
باسم: في ايه؟
مهاب: انا خارج غصب عني مع ريماس عشان مش عاوز ازعلها
باسم: طب يالا نروح نقعد معاهم
مهاب وباسم قعدوا وصافي عاوزة تنزل حمام السباحة بس مش بتعرف تعوم، صافي قاعدة جمب مهاب وبتهمسله: عاوزة انزل الـpool (حمام السباحة) يا أبيه
مهاب: انزلي ياحبيبتي
صافي: بس مش بعرف اعوم
مهاب ضحك: هنزل معاكي
صافي فرحت اوي وقامت هي والبنات يلبسوا مايو اسلامي وريماس مستغربة من قرب صافي من مهاب
ريماس: هي عندها كام سنة يامهاب؟
مهاب: ١٨ سنة
ريماس: يعني في ثانوية عامة؟
مهاب: ايوا
ريماس: مش هي كانت مسافرة؟
مهاب: اه وورقها اتنقل في مدرسة هنا
ريماس: اه ماشي
شوية والبنات لبسوا ومهاب وباسم غيروا هدومهم في اوضة اللبس الخاصة بالنادي ولبسوا كل واحد فيهم شورت بس وريماس رفضت تنزل الماية بس مضايقة من قرب صافي من مهاب؛ لأن مهاب شايل صافي في الماية عشان مش بتعرف تعوم
ريماس مسكت فونها واخدت كام صورة ليهم
صافي: انا فرحانة اوي يا أبيه
مهاب باسها: يارب دايما ياقلب أبيه
باسم قرب منهم: خف شوية عشان ريماس شكلها مش مطمني
مهاب بص على ريماس وبص لباسم: مايمهنيش
خلود وشروق جمب بعض بيتكلموا
خلود: مش كانت فيروز جات معانا تغير جو
شروق: ما انتي شفتي بنفسك رفضت ازاي
خلود: ماتعرفيش اخبار عن نتيجة الترم الاول؟
شروق: المفروض انها بانت في الكنترول وهروح بكرة اشوفها
خلود: خلاص هروح معاكي انا كمان وبالمرة اشوف نتيجتي
شروق: خلاص ماشي ونقول لفيروز وتروح معانا
********
نيجي لڤيلا مهاب العمري، قاعد في الجنينة وبيتكلم في التليفون
مهاب(الجد): يعني هي كانت عنده النهاردة؟
.....: ايوا ياباشا
مهاب(الجد): تمام انا عاوزك تتابعها واوعى تاخد بالها ان في حد ماشي وراها
.......: حاضر ماتقلقش
مهاب(الجد): عاوزك كمان تعرفلي مين اللي مع مهاب الفترة دي، هو بيقول انها بنت خالته بس حاسس بحاجة غريبة
.......: حاضر ياباشا كل حاجة هتكون عندك خلال يومين
مهاب(الجد) خلص المكالمة وبيكلم نفسه: ياترى مين دي يامهاب......بس مش دا المهم الوقتي المهم هي البت اللي شغالة عند عبدالحميد
*********
فيروز قاعدة في بيتها وبترن على ضياء وبيكنسل عليها
ضياء قاعد فوق ومعاه سلمى زميلته في الشغل
سلمى بدلع: فرحت اوي لما وافقت اني اجيلك
ضياء بيقرب منها: قولت عشان نكون على راحتنا
سلمى بدلع اكتر: وعشان كدا انا جيت
ضياء قرب منها وللاسف خان فيروز معاها (ماهو واحد ذي دا اكيد الخيانة في دمه)
فيروز باردوا بترن عليه وهو مش بيرد
فيروز لنفسها: رد بقى ياضياء...ياترى انت فوق ولا بارة
وفضلت تفكر انها تطلعله بس في الآخر قالت لا ماينفعش (جدعة يابت)
شوية وتليفونها رن وكانت فاكراه ضياء بس كانت شروق
فيروز: الو ياشوشو
شروق: جهزي نفسك بكرة عشان نروح نشوف النتيجة
فيروز: انا هكون في الشغل ابقي شوفيهالي انتي
شروق: لا هتيجي معايا وبعدين هستأذنلك من جدو
فيروز: لا ياشروق انا مش عاوزة كدا وبعدين انا خايفة اروح اجيبها
شروق: يابنتي خايفة ايه انتي ماشاء الله عليكي كل سنة بتجيبي تقدير امتياز وبتكوني الأولى
فيروز: يارب السنادي كمان اكون كدا
شروق: ان شاء الله
فيروز: شوفيهالي انتي ياشوشو عشان خاطري
شروق: ماشي ياحبيبتي خلاص هشوفها انا وهقولك
فيروز: ماشي ياقلبي......انتوا لسة بارة ولا ايه؟
شروق: ايوا مش كنتي جيتي معانا
فيروز: لا ياستي كدا حلو وبعدين لو كنتي انتي وخلود وريماس كنت وافقت لكن انتوا خارجين مع اخوكي وابن عمتك فخلاص
شروق: خلاص احنا فيها بكرة بعد الشغل وبعد مانطمن على النتيجة نروح النادي
فيروز: ماشي موافقة
شروق خلصت مع فيروز وخلود كانت لسة في الماية هي وباسم بس بعيد عنها ومهاب قاعد على كرسي حمام السباحة ومركز مع باسم، ومهاب بيصفرله وباسم بصله بغضب ومهاب ضحك عليه
باسم قرب منه وهو لسة في الماية: ماتبطل رخامة ياعم انت
مهاب: ماتروح ياعم جمبها
باسم: لا يامهاب المرة اللي فاتت قالتلي امشي المرادي بقى هتقولي ايه
مهاب: مش بقولك بتحبها
باسم بصله بغضب وكمل سباحة وقرب من خلود: امشي ولا عاوزة تفضلي لوحدك
خلود بصتله: لو انت عاوز تفضل افضل
باسم قرب منها: ليه بقيتي بعيدة من اخر مرة اتكلمتي معايا فيها؟
خلود: بحاول احافظ على كرامتي
باسم مضايق انها زعلانة منه: بس انا ما هنتش كرامتك ياخلود
خلود بصتله بحزن: لا ياباسم اهانتها من غير قصد وكمان وجعت قلبي.....وسكتت شوية: بس عادي ياباسم خلاص حصل خير
خلود خلصت كلامها وبعدت عنه وخرجت من حمام السباحة وهو واقف مكانه مضايق، وبعد شوية طلع وقعد معاهم
بعد شوية مهاب رجع ريماس الڤيلا وراح عند جده عبدالحميد في الڤيلا وقعد معاهم وكانوا فرحانين
_ في المساء_
مهاب طلع اوضته واتوضى وصلى العشا وقعد يقرأ قرآن وصوته حلو جدا في تلاوة القرآن
فيروز في بيتها خلصت صلاتها وقعدت تقرأ الورد القرآني وشوية وجرس الباب رن، وظبطت حجابها وقامت تفتح وكان ضياء
فيروز بحزن: لسة فاكرني
ضياء: حقك عليا، بس كنت مشغول ( ياكداااااااااب بصوت البت الافريقية اللي كانت في فيلم افريكانو😂)
فيروز: ماشي ياضياء
ضياء: انا كنت عاوز اقولك ان خلاص بجهز ورق السفر والاسبوع اللي جاي هسافر
فيروز دموعها نزلت غصب عنها: يعني هتسيبني؟
ضياء: ماقولتلك يافيروزتي انا بعمل كدا عشانا
فيروز بدموع: ليه مش عاوز تفضل هنا ونكمل بعض
ضياء: قولتلك ماينفعش
فيروز بحزن كبير: ماشي ياضياء
ضياء: هتستنيني؟
فيروز بصتله: هو انا ليا غيرك عشان اكون لغيرك؟
ضياء بخبث: ولا عمرك هتكوني لغيري
فيروز استغربت من كلامه بس قالت عادي وبصتله وسكتت
ضياء: مش هتخليني اشرب معاكي شاي قبل ما اسافر؟
فيروز بصتله: مش قولنا ماينفعش
ضياء: مرة بس ياقلبي وبعدها هقعد سنة من غير ماتشوفيني
فيروز وافقت وبحسن نية: ماشي
ضياء بخبث: لما اعرف اليوم اللي هسافر فيه، نبقى نقعد
فيروز: ماشي ياضياء
ضياء نزل وهي دخلت وقفلت الباب وفضلت تعيط جامد عشان هتكون لوحدها وصلت ركعتين وفضلت تدعي ربها
تاني يوم الصبح، شروق وخلود راحوا الجامعة والنتيجة ظهرت وكل واحدة فيهم نجحت بتقدير خلود وشروق بتقدير جيد وفيروز بإمتياز (ذي كل سنة)، وشروق قررت انها تروح ليها الشركة وتفرحها، بعد شوية شروق وخلود وصلوا الشركة وطلعوا
شروق وهي عاملة زعلانة: فيروز النتيجة ظهرت
فيروز بقلق: انتي زعلانة ليه هي وحشة؟
شروق بفرحة: يابنتي إمتياز طبعا ذي كل ترم
فيروز بفرحة حضنت شروق: خضتيني حرام عليكي
شروق: سلامتك من الخضة ياقلبي
خلود: مبروك ياصاحبة الامتياز
فيروز ضحكت: ايه الاسم دا
خلود: اكتر اسم لايق عليكي
فيروز فرحانة اوي وعبدالحميد كان خارج من مكتبه واتفاجئ بالبنات
عبدالحميد: خير يابنات؟
شروق: نجحنا ياجدو وبتقدير كمان
عبدالحميد بفرحة: مبروك ياحبايبي......وبص لفيروز: انتي عملتي ايه يافيروز؟
فيروز كانت لسة هترد بس خلود ردت: دي ياجدو اسمها صاحبة الامتياز واحنا جيد
عبدالحميد بفرحة بيهم: مبروك يابنات ويالا بينا نحتفل
الشركة كلها بتباركلهم وفرحانين بيهم
فؤاد قرب من فيروز: مبروك يافيروز
فيروز بإبتسامة: الله يبارك فيك يافؤاد
فيروز بعدت عن الكل ورنت على ضياء ورد عليها
ضياء: الو
فيروز بفرحة: ضياء انا نجحت
ضياء: مبروك ياقلبي نجحتي بتقدير؟
فيروز: اه إمتياز
ضياء: مبروك يافيروزتي
فيروز: الله يبارك فيك
فيروز خلصت المكالمة وعبدالحميد قرر انه ياخد البنات ويتغدوا سوا وكلم ريماس في الڤيلا وطلب من السواق يروح يجيبها
عبدالحميد: عاوزين تروحوا فين؟
شروق وفيروز في صوت واحد: مطعم 7Sky
عبدالحميد: اشمعنا المطعم دا؟
شروق: مكانا المفضل ياجدو
عبدالحميد: موافق يالا
عبدالحميد اخد البنات ومشي ووصلوا المطعم وبعت السواق يجيب صافي، وبعد شوية جات
خلود: الله ياجدو بقالنا كتير ماخرجناش كدا
عبدالحميد: ان شااء الله هنخرج كدا على طول
فيروز: ايه رأيك في المطعم يامستر عبدالحميد؟
عبدالحميد: بصي بقى اسمي جدو وبس
فيروز بإحراج: ازاي بس ماينفعش
عبدالحميد: ها انا مش بعيد كلامي
فيروز: حاضر ياجدو
عبدالحميد: ايوا كدا
ريماس: انتي جميلة اوي يافيروز
فيروز بصتلها وابتسمت: انتي اجمل ياحبيبتي
خلود ماسكة تليفونها وعاوزة تكلم باسم تقولوا انها نجحت وتفرحوا ذي كل سنة بس مترددة وفيروز لاحظت دا
فيروز: كلميه ياخلود
خلود: قلقانة
فيروز: كلميه يابنتي وبعدين انتي كدا كدا بتكلميه كل سنة بعد النتيجة
خلود اقتنعت بكلام فيروز وقامت تكلم باسم في التليفون وباسم رد بسرعة
باسم: مبروك
خلود بإستغراب: عرفت منين؟
باسم: كنت عندك في الكلية وعرفت
خلود بفرحة: يعني انت كنت رايح تشوف نتيجتي؟
باسم: ايوا ونجحتي ذي كل سنة مبروك
خلود بفرحة: الله يبارك فيك
باسم سامع صوت الهوا حواليها وكأنها في مكان جمب البحر: انتي عالبحر؟
خلود: احنا في مطعم جمب البحر والقلعة
باسم: مع مين؟
خلود: مع جدو والبنات
باسم: طب اجي؟
خلود بفرحة: تعالى
باسم: خلاص ابعتيلي العنوان في رسالة
خلود: حاضر
خلود قفلت مع باسم وكانت فرحانة وراحت قعدت مع جدها والبنات
شروق بتهمسلها: قالك ايه مفرحك كدا؟
خلود: باسم جاي
شروق: بجد
خلود: اه والله
وبعد شوية باسم وصل وقعد معاهم
عبدالحميد: ماجبتش مهاب معاك ليه؟
باسم: رنيت عليه كتير ماردش فأكيد عامل تليفونه صامت
شروق: اكيد في اجتماع
صافي لجدها: جدو ممكن اتكلم معاك شوية؟
عبدالحميد: طبعاً ياقلبي
عبدالحميد اخد ريماس ونزلوا عند البحر
عبدالحميد: خير ياحبيبتي؟
صافي: عاوزة بابا يعرف بوجودي
عبدالحميد بهدوء: مش مهاب قال نستنى شوية؟
صافي: ايوا ياجدو بس كان نفسي يعرف اني بنته لما رحت الشركة مع مهاب نظراته ليا كلها حب وشوق وحنية
عبدالحميد: انا عارف انه هيحبك وانه طيب وحنين ومتأكد كمان انه مستغرب الشبه اللي بينك وبين امك الله يرحمها
صافي: ايوا ياجدو انا لاحظت كدا باردوا حتى جدو مهاب باردوا لاقيته مستغرب وسأل مهاب عني
عبدالحميد: بصي ياريماس احنا نستنى شوية لحد مايجي الوقت المناسب
صافي: ماشي ياجدو
عبدالحميد: يالا نروح للبنات
رجعوا واتغدوا كلهم سوا وباسم بيسرق نظرات لخلود وفيروز ملاحظة دا وحست ان باسم بيحبها بس قالت انها مش هتقولها غير لما تتأكد عشان مش تديها امل عالفاضي
عدا اسبوعين والعام الدراسي التاني بدأ والبنات رجعوا الكلية، ومهاب لسة ماتقابلش مع فيروز ومهاب(الجد) لسة بيتابع فيروز، وضياء سفره اتأجل وهيسافر بعد اسبوع، وفيروز خلاص معاها المرتب واخيرا صاحب البيت وافق انها تدفع الفلوس على مرتين
_ في الجامعة_
شروق وفيروز قاعدين في كافيه الكلية وعندهم محاضرة بعد ساعة
شروق: ضياء ناوي يعمل ايه؟
فيروز اتنهدت: ولا اي حاجة هيسافر سنة وهيجي نتجوز
شروق: تفتكري هيوفي بوعده؟
فيروز: تصدقيني لو قولتلك اني مابقتش فارقة، انا موجودة معاه ذي مش موجودة ساعات بيكون حلو معايا وساعات لا
شروق: انتي بتحبيه اوي يافيروز ودا غلط
فيروز اتنهدت واتكلمت بحزن: اعمل ايه ياشروق غصب عني ماليش غيره وانا حبيته اوي
شروق: عارفة بدعيلك بإيه بإن ربنا يرزقك بواحد احسن منه وارجل منه
فيروز بغضب: بتدعي عليا يارخمة
شروق ضحكت: دا انا بدعيلك
فيروز: ماشي يارخمة يالا ناكل عشان المحاضرة هتبتدي
نيجي لخلود قاعدة في الكلية بتاعتها في الكافيه وولد زميلها قرب منها
وائل: صباح الخير
خلود بإبتسامة: صباح الخير ياوائل
وائل: قاعدة لوحدك ليه؟
خلود: ابدا البنات قاموا يطلبوا الاكل
وائل: ممكن اقعد معاكوا
خلود: اه يا ابني عادي ما احنا زمايل
.........: لا حلو اوي اللي بيحصل دا
خلود بصت على صاحب الصوت وكان باسم
خلود بفرحة: باسم
باسم بغضب وبيبص لوائل: دا مين؟
خلود: دا وائل زميلنا
وائل: انا وائل الشهاوي زميل خلود
باسم بيضغط على سنانه: اهلا
وائل استأذن ومشي وباسم واقف بغضب ومضايق
باسم: انتي ازاي تسمحيله يقعد معاكي؟
خلود بإستغراب: وفيها ايه يعني دا زميلي
باسم: يعني انتي شايفاها عادي؟
خلود: اها عادي
باسم: ماشي عالعموم انا كنت جايلك عشان جبتلك الجدول بتاعك......خرج ورقة من جيبه: اهو
خلود اخدت الجدول منه وسابها ومشي، خلود مستغربة من تصرفاته بس قالت عادي دا حب اخوات وقعدت وبعد شوية دخلت المحاضرة
نرجع لفيروز وشروق خلصوا المحاضرة والمعيد الجديد نده على فيروز
فيروز: ايوا يادكتور
احمد: انتي فيروز الاولى على الدفعة مش كدا؟
فيروز: اه
احمد: ماشاء الله عليكي...وان شااء الله ليكي مستقبل كويس
فيروز: شكرا اوي لحضرتك
احمد: ربنا يوفقك
فيروز: يارب
(دكتور احمد: معيد جديد عنده ٢٥ سنة كان متفوق في دراسته وعشان كدا بقى معيد اول ماتخرج على طول، شاب محترم جدا وعيونه خضرا وشعره بني غامق وبشرته بيضا، وطويل)
احمد مشي وشروق بتغمز لفيروز
شروق: شكله وقع
فيروز: بس يارخمة هو يعني قالي ايه
شروق: اممممم مش يمكن هو عمل حجة الامتياز دي وانك الاولى عالدفعة في التلات السنين اللي فاتوا عشان يفتح كلام معاكي
فيروز: بس ياماما ويالا عشان هروح الشركة
فيروز راحت الشركة وفؤاد شافها
فؤاد: فيروز
فيروز: في حاجة يافؤاد؟
فؤاد: كنت عاوز اسألك عن يومك النهاردة في الجامعة كان عامل ازاي؟
فيروز: كان حلو اوي الحمدلله
فؤاد: يارب دايما يارب......لو احتاجتي اي حاجة انا موجود
فيروز: شكرا يافؤاد ربنا يخليك
فيروز دخلت لعبدالحميد: مساء الخير
عبدالحميد: مساء الورد
فيروز ابتسمت: جاهز عشان الاجتماع كمان نص ساعة
عبدالحميد: اه جاهز بس قلقان
فيروز: طول ماحضرتك معاك الحق ماتقلقش.....وبعدين اللي اسمه مهاب العمري دي تلاقيه كان بيهدد بس بالكلام وخلاص
عبدالحميد بتنهيدة: مهاب طلاما صمم انه ياخد المناقصة يبقى هياخدها
فيروز: بس هو محاولش يعمل حاجة تانية من ساعة اخر مرة لما طلب مني الملف
عبدالحميد: دا اللي قالقني لان انا اكتر واحد عارفه
فيروز: سلم امرك لله ياجدو
عبدالحميد ابتسم: بحب كلامك اوي ليا وانك بتطمنيني
فيروز ابتسمت: انا اللي بحبك اوي بجد وبحمد ربنا على حضرتك وانك اعتبرتني ذي احفادك
عبدالحميد: انتي بنت طيبة ومحترمة وعشان كدا اعتبرتك حفيدتي
مهاب خبط ودخل وهما قاعدين يتكلموا
عبدالحميد: حبيبي تعالى
مهاب دخل وهو مضايق وما اخدش باله من فيروز: بص عشان انا اتخنقت اللي اسمه مهاب دا انا زهقت منه
عبدالحميد بص لفيروز: اطلبي واحد ليمون يافيروز وسبينا شوية
فيروز: حاضر
فيروز خرجت وسابتهم ومهاب قاعد مضايق
عبدالحميد: ممكن تهدى وتقولي ايه حصل؟
مهاب بغضب: كل اما يشوفني يقولي عاوزك تتجوز
عبدالحميد: عنده حق
مهاب بسله: جدو والنبي بلاش كدا
عبدالحميد: ليه بس يامهاب، انا فعلا عاوز افرح بيك
مهاب وقف: انا همشي احسن
عبدالحميد: اقعد يامهاب انا بتكلم معاك مش بتخانق
مهاب: اقعد ليه ياجدو عشان اسمع نفس الكلام اللي هو بيقولوا؟
عبدالحميد: لا يامهاب انا مش هقولك ذيه بس عاوزك تشوف نفسك وحياتك....انت مقضي كل وقتك شغل وبس
مهاب: يعني ياجدو انا لاقيت البنت اللي تخطف قلبي وقولت لا
عبدالحميد: والله هتلاقيها ان شاء الله
مهاب: يبقى خلاص لما الاقيها هتجوز
عبدالحميد: ماشي ياحبيبي
شوية والساعي دخل بالليمون
عبدالحميد: اشرب الليمون وروق دمك
مهاب: هو اللي يعيش مع مهاب يشوف روقان
عبدالحميد: باردوا مش ناوي تقوله ياجدو
مهاب: لا يعني لا
عبدالحميد: ماشي يامهاب
الاسبوع عدا خلاص وضياء هيسافر بكرة، لبس ونزل لفيروز رن جرس الباب وهي فتحت
ضياء: مسائو فل
فيروز بإبتسامة هادية: مساء الخير
ضياء: ها هتسبيني واقف عالباب كدا؟
فيروز سمحتله يدخل: ادخل
ضياء دخل وقعد في البلكونة وفيروز عملت الشاي
ضياء: فيروزتي هاتيلي كوباية ماية
فيروز: حاضر
فيروز دخلت تجيب الماية وبعد شوية خرجت وقعدت مع ضياء وبيشربوا الشاي وفضلوا سهرانين سوا
نيجي لمهاب سهران في الجنينة لوحده وصافي جات قعدت جمبه
صافي: مالك يا أبيه؟
مهاب: مافيش ياقلبي....قوليلي عاملة ايه في مذاكرتك؟
صافي: الحمدلله والمدرسين هنا كويسين اوي
مهاب: ذاكري كويس عشان تجيبي مجموع كويس
صافي: حاضر ويالا عشان تطلع تنام
مهاب ابتسم: ماشي
تاني يوم الصبح، عند فيروز صحيت من النوم وكانت الصدمة...
يتبع الفصل الخامس 5 عبر الرابط التالي: "رواية هكذا يكون الحب" اضغط على أسم الرواية