رواية دار الايتام البارت الثاني والعشرون 22 بقلم أميرة أسامة
رواية دار الايتام الفصل الثاني والعشرون 22
في صباح يوم جديد ملئ بالنشاط والحيويه صحيو البنات علي صوت خبط ورزع
عشق..واقفه في طرقه طويله بين الاوض تخبط علي كل باب واحده فيهم اصحوو يلااا مفيش نوم يلا قوموا
فتحت زهره الباب بنوم في ايه يابنتي القلق ده عالصبح
عشق..اصحو يلا انا صحيت
زهره..ياسلام ياست عشق هانم عشان جنابك صحيتي تقلقي اهلنا كده حرام عليكي يامفتريه انهرده اجازه
عشق..مش فاهمه يعني هو عشان اجازه تفضلو نايمين حضرتك قومو يلا مفيش نوم
فتحت نور الباب ممكن اعرف ايه الازعاج ده عالصبح في ايه مالك
عشق حاطه ايدها في وسطها زي الاطفال انا صحيت لازم تصحو
نور..لا والله وده من ايه ان شاء الله انتي صحيتي اصحي براحتك انما احنا لسه عايزين ننام حرام عليكي اتقي الله
فتحت تمارا هي كمان الباب بغضب في ايه منك ليها عالصبح صباحكم زي وشكم
زهره..اهي جاتلك اللي هتروقك
عشق..بثقه ولا تقدر
تمارا..بت انتي ايه الازعاج ده عالصبح في ايه الساعه 9 نص
عشق..ايوه مش فاهمه هتفضلو نايمين لحد امته انهرده الجمعه يعني قومو خدو شاور نحضر الفطار نشغل قرأن
تمارا..انتي جايه انهرده يوم اجازتنا تحققي احلامك بت انتي انا داخله انام لو جيتي جمب الباب هقتلك
عشق..اي واحده هتدخل فيكم مش هسيبها وهفضل اخبط عالباب اذا كان عاجبكم
تمارا..بت انتي انتي شاربه ايه عالصبح مالك كده صاحيه عندك شويه نشاط عايزه تخرجيهم علينا
عشق..بترجي والنبي اصحو بقي انا صاحيه مبسوطه وعندي طاقه كده عشان هنخرج بجد ده يعتبر المره الاولي اللي هنخرج فيها مع بعض قومو بقي متبقوش رخمين
نور..يعني هو احنا لو نمنا شويه هيحصل حاجه عادي بردو هنخرج ولله بس عالاقل نبقي فايقين لو خرجنا مش نايمين علي نفسنا يابنتي احنا نايمين الساعه 2ونص
عشق..انا قولت اللي عندي خلاص مفيش نوم يعني مفيش نوم
تمارا..ده اخر كلام عندك
عشق..بترقب ايون
تمارا..ورايا يابنات جريت تمارا وزهره ونور ورا عشق فضلت تجري وتصوت وتضحك وهما وراهالحد ما مسكتها تمارا وفضلو يضربو فيها بضحك ويجرو ورا بعض كأنهم عيال صغيره
بعد وقت من الضحك والهزار نامو كلهم عالارض
عشق..بس بس خلاص والنبي مش قادره الله يخربيت اللي يزعلكم مش قادره اخد نفسي من الجري منكم لله
تمارا..عشان تحرمي ادينا خرجنا منك الطاقه اللي لبستك عالصبح
عشق..بتريقه لبستني ايه هي عفريت
زهره..ظريفه
قامو اعدو وربعو رجليهم
نور..قوليلي بقي ياست عشق مالك عالصبح ده انتي كمان صاحيه واخده شاور ومظبطه نفسك في ايه للنشاط ده كله
عشق..والله ما في بس بجد مبسوطه اننا هنخرج انتي عارفه ان انا والعيال دي اول مره هنخرج سوا انا افتكر اخر مره خرجنا سوا كانت في ابتدائي ورحنا رحله لجنينه الحيوانات
تمارا..بضحك انتي لسه فاكره كانت ايام الله لا يرجعها
زهره..يااااه ده احنا فعلا مخرجناش بقالنا زمن خصوصا ان المره دي اصلا كنا اطفال حوالي 9سنين او 10
نور..ليه طيب ماانتو في جامعه واحده مخرجتوش مع بعض يوم كده وانتو كبار
عشق..لا خالص ولا مره اتقابلنا مع بعض في الجامعه هما في مكان وانا مكان تاني خالص وبعدين مكناش بنروح كتير غير لوفي سكاشن عملي نجيب ورق واللي كانت بتجيب ورق كانت بتجيب للكل حنان ربنا يهديها ويسامحها مكنتش بترضي تودينا مع بعض
تمارا..بغضب ربنا ياخدها
عشق..متدعيش علي حد حرام
تمارا..مدعيش طب ده انا لو اطول اولع فيها هولع
زهره..صراحه لا تطاق بالمره عشان كده متجوزتش
تمارا..ودي مين دي اللي يبص في وشها والله ده يبقي راجل امه داعيه عليه هي دي تتعاشر
نور..ماهي واحده بالاخلاق والطريقه دي اكيد مش هتتجوز طبعا ويمكن اصلا هي كانت كده معاكو عشان متجوزتش معقده يعني
تمارا..لا واحنا ماشاء الله حياتنا كانت وردي اوي عشان تطلع عقدها علينا
نور..بضحك والنبي انتي عسل ياتوتي
تمارا..بس ياشيخه دي ورتنا ايام اسود من وش امها
ضحكو البنات علي تمارا
عشق..لنور قوليلي يانور عامله ايه مع نوح
نور..من ناحيه ايه
تمارا..شوفي البت قال من ناحيه ايه اكيد مش فالشغل
نور..عادي يعني هيكون في ايه مفيش حاجه هو بيتعامل عادي زي ما بتشوفوه بس مش عارفه ليه حاسه بطريقته انه في حاجه غريبه
زهره..ازاي يانور
نور..طريقته عموما معايا خصوصا من يوم ما شوفنا الزفت اللي اسمه سامر عند الجامعه وامبارح لما جه مع اخته الشركه
زهره..فعلا انا حسيته وشه اتغير
نور..ايوه وطول اليوم كان كويس بمجرد ما شافه قلب وكان مركز معاه لما فضل سامر يبص عليا وبعدين بيتعصب كتير يأعد يقولي ملكيش دعوه بيه مشوفكيش بتكلميه وحجات زي كده
تمار..بغمزه بيغير ولا ايه
احمر وش نور بلاش رخامه
تمارا..والله ما برخم بس هو فعلا كده شكله بيغير خصوصا ان زهره اول يوم كانت معاكي ليه مقالش لزهره نفس اللي قالهولك
زهره..طب ما يمكن عشان هو يعرف نور اكتر
تمارا..لا ياشيخه ايه يابت الذكاء ده طب ماهما كلهم يعرفو نور ومع ذلك خدونا كلنا نعيش فالشقه وقلقانين علينا زي ما هما قالقانين علي نور
عشق..تمارا عندها حق هو شكله بيغير بس بردو يانور خليكي تقيله وفنفس الوقت استني كل يوم بيعدي بيحصل حاجه واكيد هتعرفي منها اذا كان بيبادلك نفس الشعور او لا بس من هنا لحد ما تتأكدي انتي اتعاملي معاه انه مجرد معرفه مجرد مدير فهماني متخليهوش يحس بحبك عشان لو مش بيحبك ميلعبش بيكي بصي انا مش بدي الامان لاي حد مش معني كلامي انه وحش لا خالص بس الشيطان وحش ومحدش يعرف نوايا الناس وبعدين عشان متتوجعيش يانور لو طلع مش بيبادلك نفس الشعور وانتي حسستيه بشعورك ساعتها وجعك هيبقي الضعف اولا انه مش بيحبك زي ما بتحبيه ثانيا انه عرف انك بتحبيه وساعتها مش هتقدري تتعاملي معاه خالص وهتخسريه كاصديق واخ ومدير لان بيتهيألي مش هتقدري تكوني معاه في مكان شغل واحد لو عرف حقيقه شعورك ورفضه كرامتك مش هتسمحلك فهماني يانور عيشي كل لحظه حلوه بينك وبين نفسك اتبسطي بخوفه عليكي بغيرته بكل ده بس خليه يحس انه مش في بالك خليه هو اللي يبقي بيجري وراكي
نور..عندك حق كلامك جميل اوي ياعشق
تمارا..فعلا ياعشق انتي صح
زهره..طب قوليلنا بقي ياحلوه انتي ايه حكايتك
تمارا..انا حكايه ايه
زهره..لاوالله هتستعبطي حكايتك مع جاسر
تمارا..بارتباك انا لا ليه في ايه خالص مفيش
عشق..بخبث لا ياشيخه ده الكهربه اللي مسكتك دي لوحدها كفيله تأكد احساسنا
تمارا..احساسنا لا والله وكمان بتحسو من ورايا
عشق..انطقي يابت في ايه احنا بقالنا كتير مش بنتكلم ولا نحكي حاجه انتي كمان مش طبيعيه نظراتك طريقتك عياطك امبارح عليه
تمارا.. بصدمه انا لا خالص عادي يعني اتخضيت
عشق..والله اتخضيتي؟اصلكم مشوفتوهاش يابنات امبارح وهي داخله هجم زي القطر علي المكتب عند ليل سرعتنا
زهره..حصل ايه
عشق..حضرتك دي دخلت هجم عالمكتب وشاهي السكرتيره منظرها مسخره وهي بتحاول تجري عشان توقفها فتحت من غير ما تخبط والله كنت خايفه عليها من ليل
نور..ياخربيتك ده كويس انو مقتلكيش
تمارا..بصو انتو مكبرين الحوار اوي يعني عادي كل الحكايه اني اتخضيت بجد لما اغم عليه وجريت بسرعه عشان حد يلحقه
عشق..طب عيني في عينك كده
تمارا..وهي بتبتسم باحراج وبتبعد عنيها عنهم
عشق..اهو شفتوا الجواب بان من عن انه
تمارا..بت انتي بقولك ايه مالك صاحيه فايقه وعايزه تعمليني الحفله بتاعتك
عشق..طب خليكي صريحه معايا وانا معملش عليكي حفله
زهره..انا مش مصدقه ان دي عشق اصلا يابنات والله انتي اللي مش طبيعيه وشاكه في امرك
تمارا..طب والله صح يابت يازهره انا كمان شاكه
عشق..انا اتلمي يابت وبعدين انتي عيزاها تهرب اهي مسكت في كلامك عشان منعرفش نقررها
تمارا..عايزه ايه مني سبيني في حالي يابت انتي
عشق..وماله حالك ياحزينه انطقي
تمارا..طيب انا هحكيلكم بس مش عايزه اي تعليق ولا اي اعتراض ومنك انتي بالذات لا تقولي صح ولاغلط ولا اي حاجه اناعارفه الصح والغلط والحلال والحرام وكله والله ياست الشيخه بس بجد انا هموت واحكي ومش قالقني غيرك
عشق..مش قولتلكم في حاجه عيييب وبعدين انا قلقاكي عشان بنصحك تصدقي انا غلطانه ومش هعبر حد فيكم بعد كده
تمارا..مش كده والله بس انا متلغبطه لوحدي مش ناقصه لغبطه
عشق..طب احكي ياستي واحنا سامعينك
تمارا..خدت نفس طويل وكملت بنبره حزن ايوه بحبه ياعشق
عشق و زهره و نور بصوا لبعض
تمارا..وهو كمان بيحبني واعترفلي بده امبارح
عشق.بصدمه انتي بتقولي ايه ياتمارا طب انتي حبتيه ليها ميت سبب لاكن هو ايه السبب اللي عنده ده خاطب !
تمارا..عارفه انه متزفت بس ده اللي حصل
عشق..وحصل امته وازاي ده
تمارا..انا هحكيلكم كل موقف حصل قبل كده من يوم ما شوفته لحد امبارح بس محدش يقاطعني
وابتدت تمارا تحكيلهم عن كل موقف حصل بينهم باثتسناء انه قرب منها
عن نظراته كلامه غيرته عليها من هادي كل حاجه حصلت فالسفر كل موقف حصل فالشركه موقفه لما هايدي اول مره شافته وأد ايه كان مضايق انها شافته واعتذر موقفه لتاني مره لما الروچ كان طابع علي خده موقف الطياره لما كان بيحاول يهديها ويطمنها لحد امبارح اللي حصل واعترافه بالحب ليها
بعد وقت طويل من الكلام
تمارا..ده كل اللي حصل
زهره..شكله بيحيك ياتمارا بجد
نور..ايه ده الله بجد ده باين جدا واصلا انا ملاحظه طريقته ونظراته جدا فالاول كنت قلقانه احسن يكون بيلعب بيكي خصوصا انه خاطب بس الوقت اتأكدت انه بيحبك
زهره..بس كده في حاجه تقلق يا بنات مش ملاحظين تصميم ليل اننا نسيب البيت واننا نسيب الشغل ونشتغل معاهم وتصميمه ان محدش ينزل غير لو عرفهم والوقت جاسر بيقول ان في حاجه مش هيقدر يقولها الوقت
عشق..ده اللي قالقني يازهره حاسه ان في حاجه اكبر بكتير مننا
نور..هيكون في ايه بس متقلقونيش ان شاء الله مفيش
عشق..سرحت وهي بتتكلم ونسيت نفسها ربنا يستر انا اللي مطمني وجود ليل معانا
زهره..الله الله ده شكل الكل وقع وانا مش واخده بالي بس اخر حاجه كنت اتخيلها عشق هانم اللي شكلها وقعت في غرام سي ليل
عشق..انتبهت عاللي قالته وحست ان اتكشف امرها ايه انتي عبيطه لاخالص انا بس بقول انه بيخاف علينا وبيحمينا مش اكتر
تمارا..لا ياشيخه علي اساس ان انتي مش معجبه طب اكدبي عادي بس عنيكي فضحاكي علي فكره مشوفتيش نفسك امبارح ولا ايه ياموزتي لما قال انهم جايين معانا وهو لا
عشق..علي فكره بقي مفيش الكلام ده وانتو رخميين وانا مش هتكلم معاكو وجت تقوم مسكتها تمارا اعدي هنا مش هتهربي اعترفي يابت
عشق..والله مافي حاجه اعترف بايه
تمارا..طب احلفي كده
عشق سكتت ومره واحده عيونها دمعت باحراج
وابتدت تعيط انا معملتش حاجه غلط والله انا حاولت التزم بكل حاجه نصحتكم بيها بس الموضوع كان اكبر بكتير مني معرفش حصل ازاي بس انا بحاول الغي اي تفكير جالي بحاول مجبش عيني في عينه بحاول مفكرش فيه بحاول الغي قلبي ومخليهوش يدق بحاول استني النصيب اللي ربنا يبعتهولي من غير ما اغضبه
تمارا..بس بس بس في ايه يابنتي احنا بنهزر معاكي وبعدين انتي ليه محسساني انك عملتي جريمه
نور..ايوه ياعشق احنا متفقين ان الحب مش عيب ولا غلط
زهره..اهدي ياعشق ليه الكلام ده وهو ايه اللي بتحاولي تلغي قلبك الحياه من غير حب مينفعش تتعاش ازاي نعيش مع حد مش بنحبه وكونك انك تحبي ده مش جريمه
تمارا..عشق حبيبتي انتي مش بتعملي حاجه غلط طول مانتي محافظه علي نفسك يبقي ايه اللي يمنع وانتي عقلك كبير يعني عمرك ما هتعملي حاجه غلط ولا حاجه وحشه بالعكس انتي ديما بتنصحينا يعني اكيد هتعملي مع نفسك بنصيحتك لينا
عشق..بدموع بس انا خايفه اوي الاحساس اللي انا فيه ده اول مره بحسه علي اد ما هو مخليني مبسوطه بس خايفه اكون بغضب ربنا
تمارا..لا ياعشق مش بتغضبيه وبعدين انتي ديما كنتي بتنصحينا وكنتي شايفه انك هتعملي كده بس ده لانك مكنتيش جربتي الحب والوقت انتي جربيته صدقيني ياعشق الحب حلو جدا بيخليكي حاسه انك عايشه بجد والشعور اللي انتي حساه ومخوفك ده طبيعي لانك اول مره تجربيه امسحي دموعك دي بقي ياعبيطه وافرحي واتبسطي وعيشي اللحظه وانسي الايام اللي فاتت احنا خرجنا للدنيا بجد يوم ما خرجنا من الدار ابتدينا حياه جديده متضيعهاش من ايدك
عشق..مسحت دموعها بس صدقوني هو مفيش حاجه ده بس مجرد احساس مني اكيد لو كان في حاجه كنت حكيتلكم والله
زهره..بسخرية يعني عامله المندبه دي عشان شعور منك
عشق..وهي بتضحك خليكي في نفسك
نور..طب وانتي يازهره؟
زهره..لا يا اختي اطمني انا مفيش حاجه بيني وبين ادم
تمارا..ومين جاب سيره ادم ولا علي راسك بطحه
زهره..وهي بتضحك هيكون مين يعني غيره ما انتو علقتو التلت شباب مفاضلش غير ادم ايه هندخل نعلقهم كلهم مش منطقي خالص
ضحكو البنات وسمعو اذان الضهر
عشق..ياخبر الضهر اذن احنا بنرغي كل ده.
تمارا..طب قومو يلا جهزو نفسكم ونفطر قبل ما يجو
قاموا البنات بسرعه خدو الشاور بتاعهم ولبسو وبعد مده اعلن الشباب عن وصولهم ونزلوا البنات
جاسر وادم ونوح كانوا واقفين تحت البيت
حست عشق انها اضايقت عشان ليل مجاش بس حاولت تبان طبيعيه
جاسر..صباح الخير
البنات..صباح النور
جاسر..ايه يلا جاهزين
عشق..اه جاهزين معلش هنتعبكم معانا
جاسر..متقوليش كده ياعشق بلاش عبط بعيدا عن الشغل احنا كلنا صحاب ولا ايه
عشق..ده شرف لينا يامست
جاسر..باااس متكمليش ابوس ايدك لسه بقول اصحاب تقولي مستر
نوح..احنا ناخدهم نوديهم في صحرا ونسبهم هناك عشان يحرمو
نور..بضحك انا مقولتش مليش دعوه
نوح..لا انتي مؤدبه
نور..صحيح هو مستر ليل مش جاي
نوح..مستر ليل لا دي تترمي معاهم في الصحرا
ضحكو البنات علي نوح
ادم..طب ايه يلا بقي هنفضل واقفين
جاسر. يلا اركبوا
عشق..كانت هتتجنن انهم مقالوش فين ليل وكملو كلامهم
فتح جاسر الباب لتمارا وركبت
نور..ركبت مع نوح
وقفت زهره وعشق ادم..يلا تعالو اركبو معايا
راحت عشق معاهم بعد ما حست ان زهره وادم مفيش بينهم حاجه يعني مش هتبقي عزول
واتحركت العربيات
بعد. مده وصلو مول كبير اوي
نزلو بعد ما ركنو العربييات ودخلو جوه المول
اعدو في كافيه
عشق..ايه احنا مش هنقوم ولا ايه
تمارا..طب ايه يلا انتو اللي اعدتو
جاسر..بصو لو تحبو نكون معاكو اوك..مش عاؤزين وحابين تكونو مع نفسكم هنستناكم هنا عشان تكونو براحتكم ايه بصو البنات لبعض بأحراج
جاسر..يبقي تمام هنستناكم هنا اوك المهم بعد اذنكم انتو الاربعه متسبوش بعض اي مكان حد فيكم عايز يدخله الباقي معاه واحنا كل شويه هنكلمكم نعرف انتو فين وفأنهي دور تمام
عشق..تمام
جاسر..عشق انا هعتمد عليكي فالحته دي ياريت متسبيش حد فيهم ممكن
تمارا برفعه حاجب اشمعني عشق وبعدين ليه محسسني ان في حد هيخطفنا
جاسر..بجديه انتي سمعتي اللي قولته صح
تمارا..صح
جاسر..يبقي يتنفذ بالحرف وإلا هنيجي معاكم ومش هتبقوا عارفين تاخدو راحتكم
تمارا..لاخلاص حاضر
نوح..بتريقه ماكان من الاول لازم يتحول
تمارا..ضحكت تمارا
عشق..طب يلا بقي
جاسر..استنو يابنات
طلع من جيبه كرديت لكل واحده فيهم اتفضلوا
عشق..ايه ده؟
جاسر..دي فيزا كارد ياعشق فيها فلوس لكل واحده فيكم
عشق..بس احنا معانا فلوس اسفه ياجاسر انا مش هاخد
جاسر..عشق انا مش بديكي عشان حاجه دي فيزا اي موظف فالشركه بياخدها بيكون فيها مبلغ من الشركه يعني حوافز وحجات زي كده بس مقدما وبعدين انا مالي دي من ليل مش مني ودي لاي حد مش ليكو مخصوص
عشق..ماشي ياجاسر بس صدقني انا مش هينفع اخدها
جاسر..عشق انا مش بديهالك عشان انتو نازلين تشتروا حجات ياستي عادي خديها ومتجبيش بيها حاجه بس اصلا كده كده هتاخدوها ليل بس امبارح نسي يديهالكم لما تعبت واتلخم مش اكتر امسكي بقي يلا
خد ادم من ايد جاسر واحده واداها لزهره يلا بلاش رغي اخلصو مسكتها زهره باحراج
جاسر..مد ايده لتمارا
فضلت تمارا تبص علي ايده باحراج
جاسر..وهو رافع حواجبه اخلصيييي
خدتها تمارا بسرعه من ايده اول ما سمعت صوته
جاسر..امسكي يانور
نوح..هزلها دماغها خدتها نور من ايد جاسر
جاسر..امسكي ياعشق
عشق..معلش اعفيني انا بعد اذنك ياجاسر ولو فعلا لازم اخدها يبقي خليني اخدها فالشركه مش هنا
جاسر..وهتفرق ايه بس ياعشق
عشق..هتفرق بالنسبالي صدقني معلش ياجاسر ممكن
جاسر..بقله حيله اوك ياعشق زي ما تحبي
عشق..بابتسامه شكرا
يلا يابنات
جاسر..متنسوش اللي قولتلكم عليه وخلو بالكم من موبايلاتكم
مشيو البنات في جوله سعيده بالنسبالهم
وابتدت رحلتهم فالمكان وفضلو يدخلو من محل ويخرجو من محل يجيبو حجات ويتفرجو علي حجات حاجه تعجبهم وحاجه لا كانو مبسوطين جدا وكأنهم اطفال صغيره
اما عند الشباب فا كانو اعدين فالكافيه يتكلمو ويهزرو وكل شويه يتصلو بيهم يطمنو انهم كويسين ويقفلو
بعد مده وصل اخيرا البيج بوص بتاعهم كان لابس سويت شيرت اسود ولابس علي دماغه الزنط وبنطلون رياضي اسود وكوتشي ابيض كان شكله مختلف تماما عن لبسه الرسمي طول الوقت ويجنن
جاسر..ايه ده ليل جه اهو
نوح..فين اه اهو شوفته
قرب ليل لحد عندهم
ليل..ايه الاخبار شد كرسي واعد
جاسر..تمام طمني انت عملت ايه فالمشوار
ليل..بحزن ظاهر علي ملامحه كمل بسخريه وابتسامه بسيطه زي ما توقعت بالظبط
جاسر..طب وبعدين
ليل..ولا قبلين اللعب الفتره الجايه هيبقي عالمكشوف والكل هياخد نصيبه بس نصيبهم للاسف هياخدوه مني
ادم..مش عايزك تضايق نفسك ياليل
ليل..بالعكس مين قال اني مضايق انايمكن اكون مضايق اكتر من نفسي بس عادي الواحد عايش عشان يتعلم وانا الدرس اللي باخده بذاكره كويس
جاسر..عادي ياصاحبي المهم انك ديما بخير
نوح..بحزن علي حال اخوه انت تستاهل احسن حاجه فالدنيا ياليل مش عايزك تكون زعلان بالله عليك
ليل..مالك ياض من امته واخوك بيزعل علي حاجه رماها
انت مش عارف اخوك ولا ايه انا يمكن بس مستغرب اللي حاصل لانه ابعد كتير من اني افكر انه يحصل بس اهو حصل يبقي ايه نعيط لاخالص نقف ونديله تحيه كمان ونستقبله بصدر مفتوح والشاطر هو اللي يعيط فالاخر
المهم هما البنات فين
جاسر..لسه بيلفو
ليل..اطمنتو عليهم
ادم..اه كل شويه نكلمهم متقلقش
ليل..ادتهم الكرديت ياجاسر
جاسر..اه بس
ليل..ايه عشق مرضتش صح
جاسر..بصدمه ايش عرفك
ليل..كنت متوقع
نوح..اشمعني بقي
ليل..عشان هي عنيده جدا واكيد فكرت اني بديهالها عشان تقدر تشتري اللي هي عيزاه
جاسر..والله حاولت اسألهم بس هي مرضيتش ابدا
ليل..طب كلمهم كده شوفهم فين
كلمهم جاسر بس مكنوش بيردو
جاسر..تمارا مش بترد
ليل..جرب تاني وانتو جربو اي حد
ادم..ولا زهره بترد
نوح..ايوه يانور
نور..ايوه يانوح
نوح..انتو تمام
نور...بارتباك ايوه اا احنا
نوح..في ايه
نور..احنا مش لاقيين عشق
نوح..ايه انتوا في انهي دور
ليل..وقف من غير ما يعرف في ايه بس كان حاسس ان قلبه هيخرج من جسمه من كتر الخوف
نوح..طب خليكو مكانكم جايين حالا
ليل..في ايه
جاسر..حد في حاجه
نوح..بتقول مش لاقيين عشق
ليل برعب نعممم جري بسرعه وهما ورا ادم دفع الحساب وجري يلحقهم
طلعو فوق للدور اللي فيه البنات
اتفاجئو البنات من وجود ليل
ليل..فين عشق
تمارا..بقلق معرفش دي لسه من كام دقيقه كانت معانا دخلنا المحل ده مع بعض وهي كانت ورانا فضلنا نتفرج ومش مركزين اصلا لما جينا نخرج من المحل انتبهنا انها مش معانا
ليل..خليكو هنا متتحركوش ادم خليك معاهم جاسر انت ونوح اقلبو المول بسرعه
زهره..بدموع هو في ايه ليه القلق ده كله ما يمكن تكون بتتفرج في محل تاني
ادم..متخافيش يازهره هنلاقيها
فضل نوح يلف بسرعه جوه المحلات وجاسر يدور تحت وليل يلف فالادوار كل واحد فيهم في ناحيه
وفجأه..لمحها ليل من بعيد واقفه بضهرها حط ايده علي قلبه ووقف وهو موطي ساند ايده علي ركبه وبياخد نفسه بسرعه
مسك موبايله كلم جاسر
جاسر..ايه لقتها
ليل..اه يا جاسر كلم نوح وروحو للبنات طمنوهم انا جايلكم اهو
قفل موبايله ومشي بخطوات بطيئه وهو بيحاول يلقط نفسه بصعوبه وصل ورا ضهرها وطي راسه عليها وهمس في ودنها اعمل فيكي ايه انا الوقت
عشق..بخضه لفت بسرعه
عشق.همست باسمه بابتسامه ليل انت هنا اقصد يعني
ليل..هو انا مش قولت تفضلو مع بعض مش جاسر بلغكم محدش يسيب التاني صح
عشق..بارتباك انا مقصدش بس يعني هما فالمحل الناحيه التانيه انا عارفه فين والله بس كنت بتفرج ورجعالهم علي بال ما يخلصو
ليل..بابتسامه قلقتيني عليكي
عشق..اسفه مكنتش اقصد بس انا لسه سيباهم مفيش عشر دقايق والله انت جيت ازاي
ليل..انا اصلا كنت جاي كان عندي مشوار خلصته وجيت
ولسه مرتاحتش عرفت ان البنات مش لاقينك جيت ادور عليكي
عشق..باحراج ووشها احمر انا كويسه واسفه بجد
ليل..متتأسفيش خلاص حصل خير المهم انك كويسه بس قوليلي بقي واقفه عندك بتعملي ايه
عشق..انا لا عادي كنت ماشيه
ليل..بس انا جيت لقيتك واقفه بتتفرجي ايه عجبك وبص علي مكان مكانت بتتفرج
عشق..باحراج انا بتفرج عادي
ليل..اممم يعني سبتي المول كله وجيتي ادام محل فساتين الفرح دي عشان عادي
عشق..عادي يعني لفت نظري مش اكتر وبعدين انا اتفرجت علي محلات تانيه يعني اشمعني ده اللي حضرتك علقت عليه
ليل..اصلي مشوفتكيش بتتفرجي وسرحانه غير عالفستان الجميل ده
عشق..بارتباك طب انا لازم اروحلهم هما اكيد قلقانين عليا وبتمشي بارتباك كانت هتخبط في شابين ماشين شدها ليل من كتفها لورا قبل ما تلمسهم
ليل..اسف ياشباب
الشباب..ولا يهمك
ليل..بابتسامه مش تخلي بالك
عشق..حاضر
ليل..عشق
عشق..نعم
ليل..مدلها ايده اتفضلي
عشق انا قولت لجاسر اني مش هاخدها غير فالشركه وعلي فكره انا معايا فلوس اقدر اجيب اللي محتاجاه وحتي لو الفلوس مكفتش مش هشتري غير علي اد اللي معايا
وقف ليل وهو مبتسم وساكت
عشق..بتضحك علي ايه
ليل..علي عندك
عشق..انا عنيده
ليل..جدا وعلي فكره هتاخديها ياعشق
عشق..لا مش هاخدها
ليل..حتي لو قولتلك اني بجد هضايق لو مخدتيهاش
عشق..سكتت بس انا بجد مش محتجاها
ليل..عادي بس انا عايزك تاخديها ممكن
عشق..وهي بتاخد نفس
ليل..عشان خاطري ياعشق خدي مني
عشق..ضربات قلبها كانت بتتسارع جواها ونبرته وهو بيترجاها خلتها استسلمت
هزت عشق دماغها قرب ليل منها الكرديت خدتها من ايده
ومشيت جمبه راحو لصحابهم
بعد ما اطمنو عليها وليل قال كانت بتتمشي
ادم..طب بقول ايه انا جعان ما تيجو ناكل وبعدين نكمل
ليل..تمام يلا بينا
جاسر..اه يلا انا كمان هموت من الجوع
راحو مع بعض عشان يتغدوا ولكن
- تابع الفصل التالي عبر الرابط: "رواية دار الايتام" اضغط على أسم الرواية