رواية نصف جناني الاخر البارت الواحد والعشرون 21 بقلم ايزيس
رواية نصف جناني الاخر الفصل الواحد والعشرون 21
واخيرا ظهر خالد اللي سمع كل حاجة بس انصدم من المشهد المرعب اللي شافه
اربع معتز واربعه هنا .........
خالد ...انتوا مين بالظبط
كلهم ...احنا عصابة اللهو الخفي ههههههههه
وشالوا كلهم الأقنعة طبعا الشباب كانوا أسر وشادي وزياد وأحمد
والبنات كانوا هنا وياسمين وندي وشيري
خالد بص لهم باستفهام ومش فاهم حاجة بس انصدم لما شاف هنا اتحرك ناحيتها ببطء وبعدين حضنها وقال ..
هنا انتي عايشة وما انتحرتيش
هنا بخجل...أنا آسفة يا بابا خالد عشان خبينا عليك الحقيقة
خالد باس راسها ..اهم حاجة انك بخير
أسر شده هنا من حضن خالد ...ايه يا عم خالد انت ما صدقت ولا ايه
خالد... دي بنتي يا غبي
أسر...كلهم بيقولوا. كده
الكل فضل يضحك وبعدين خالد قال
...ممكن حد يفهمني ايه اللي انا سمعته دا
أسر ..يلا يا رجالة شيلوا معايا ريا وسكينة دول وبعدها هافهمك كل حاجة يا بابا
وفعلا شالوا جيجي وصافي وبدأوا يفوقوهم
صافي فاقت وفضلت تصرخ . ابعدوا عني ابعدوا عني ماحدش يلمسني أنا مش عايزة اموت ههههههههه أنا صافي هانم يا كلاب
وبعدين عيطت ..أنا ما موتش حد ابعدوا عني
أما جيجي فاقت وفضلت تعيط وما اتكلمتش ولا كلمة
خالد ...شادي اتصل علي مستشفي الأمراض العقلية واضح أن صافي مش طبيعية ..
أسر...احنا اتصلنا ع البوليس وهما اللي هيتصرفوا معاهم
جيجي جريت علي خالد ...اونكل خالد ابوس ايدك أنا ما قتلتش معتز هو اللي وقف قدامي فجأة بالعربية
خالد كان حزين لانه هو اللي ربي جيجي مع أولاده
خالد ...أنا هابعت وراكي محامي يا جيجي ولو الأدلة أثبتت انك بريئة هتخرجي وتأكدي اني مش هسيبك ..
الشرطة وصلت واخدت جيجي وصافي حولوها علي المصحة العقلية
وبعدها قعد خالد حزين
أسر حكي لوالده كل اللي حصل
خالد بحزن ...أنا اسف يا أسر يا ابني لاني ماكنتش بصدقك زمان لما كنت بتقولي إن صافي بتعاملك وحش انت واختك سامحني بس هي بجد كانت راسمة دور الطيبة ..أنا بجد اتصدمت فيها .
أسر ...خلاص يا بابا أنا مش زعلان منك الحمد لله انك اكتشفتها علي حقيقتها .
ياسمين ..بس أسر ما كانش يسكت يا بابا كل المقالب والحوارات الغريبة اللي كانت بتحصل في البيت كان أسر هو المسؤول عنها فاكر يا أسر لما ربطت الحبل في السلم وتنت صافي وقعت كانت رقبتها هتتكسر
أسر وياسمين ضربه كفوفهم في بعض وفضلوا يضحكوا
ندي وشيري وأحمد زياد ضحكوا وقالوا ..فعلا هنا واسر وجهان لعملة واحدة انتوا زي بعض بالظبط
أسر حضن هنا ...لا هنا هي النص الحلو اللي ف حياتي
هنا همست ف ودن أسر ...وانت نص جناني التاني
&&&&&&&&&&
تاني يوم في الجامعة
الكل مندمج في التحضيرات لمشروع التخرج والتفاعلات
هنا همست...بت يا ندي نفسي الكاكا
ندي ...يادي ام الكاكا اللي انتي بتحبيها يا بنتي متهيألي أنتي الوحيدة اللي الكاكا فاكهتك المفضلة
هنا ...يا بنتي بتوحم نفسي فيها انتي ماعندكيش دم
ندي بخبث ...بقلك ايه شايفة مشهد العشق المفقوع دا روحي بوظي اللحظة عليهم
هنا بصت لقيت شيري بتشرح الخطوات لزياد وبتبتسم وهو مركز جدا في الخطوات ومش واخد باله
شيري بابتسامة ...ها فهمت يا زياد
زياد ...اممم يعني فهمت..ماكنتش عارف انك شاطرة كده
شيري...شكرا😊
هنا ...زياد زياد ...نفسي في الكاكا
زياد...نعم كاكا وانا اجيبها منين دي ..علي العموم نخلص بس المشروع واجيبلك
بعد ربع ساعة
هنا ...زياد نفسي ف التين الشوكي ..وانت رايح تجيب الكاكا هاتلي معاك
زياد...يا بنتي هو أنا الخدامة الفلبينية اللي جوزك جبهالك يا رتني ما قلتله انا تحت امرها
هنا...بقلك ايه جوزي بياخد باله من شركتك وبيخلصلك شغلك فأنت بقي لازم تشوف طلبات مراته صح
زياد ...تمام ..بس اطلبي حاجات معقولة مش تين شوكي وحاجات غريبة
هنا...تمام أنا عطشانة روح هاتلي مية
شيري بغيظ...تصدقي انتي باردة
هنا...من بعض ما عندكم ..وضحكت هي وندي وغمزوا لبعض
بعد فترة وصل أسر عشان ياخد هنا
أسر ...حبيبي اخبارك خلصتي مشروعك
هنا بزعل ...اممم
أسر ...زعلانة ليه يا روحي حد زعلك
هنا...العيال الرخمين دول رخموا عليا وبيقولولي يا مفجوعة (شاورت علي ندي وشيري وزياد )
أسر مسك خدها ...هما بيغيروا منك
زياد .... اسألها احنا قلنا كده ليه ..الست هانم اكلت ٦سندوتشات ماك
هنا...احم كنت جعانة أنا والبيبي
أسر ابتسم ...بالهنا والشفا يا قلبي فكك منهم ركزي معايا
أخدها وطلعوا ع الشركة
بعد فترة هنا وصلت الشركة واول ما دخلت المعمل بتاعها حست انها مضايقة لما افتكرت الحاجات اللي مرت بيها من اخر مرة راحت فيها الشركة
فضلت تبص ف كل مكان بضيق وتوتر وفجأة لقيت ازازة البرفيوم اللي كانت هتعملها مفاجاة لأسر واقعة ع الأرض مسكتها وبصت فيها شوية ولمست كلمة بيبي بصوابعها وبعدين قررت ترميها
بصت م الشباك رفعت أيدها ولسة هترمي حد جي من ورا مسك أيدها ووقفها
هنا اتخضت و لفت بسرعة وقالت... أسر
أسر مسك البرفيوم وابتسم ...ليه كنتي هترميها
هنا ...بتفكرني بحاجة وحشة
أسر باس إيدها ... أن شاء الله مافيش حاجة وحشة هتحصل تاني ..بس مش عايز اشوف نظرة الخوف دي في عينيكي
ودي أنا هاحتفظ بيها عشان هتكون اول هدية للبيبي بتاعنا
هنا حطت راسها علي صدر أسر ...أسر أنا كنت مستهترة اوي وما كنتش بخاف بس بجد دلوقتي انا بقيت اخاف لاني عرفت أن مش كل الناس طيبة
أسر مسد علي ضهرها ...حتي لو فيه ناس شريرة يا هنا بس عمره الشر ما هينتصر علي الخير ..ولازم تعرفي أنه اللي بيتقي ربنا ربنا بيحفظه وبيطلعه من كل ضيق
هنا ... بجد انا محظوظة لاني مراتك
أسر ابتسم لها... يعني خلاص مافيش زين الجارحي تاني
هنا...تؤ تؤ في أسر المسيري وبس
&&&&&&&&&&&&
شادي ...عمي أنا طالب ايد ياسمين
خالد ...والله يا شادي انت عارف انك زي اسر ابني لاني انا اللي مربيك بعد ما والدتك ووالدتك الله يرحمهم ما ماتوا بس طبعا لازم اخد رأيها
شادي بكل ثقة ..وماله يا عمي ناخد رأيها
خالد...ايدا اخد رأيها قدامك كده عادي افرض هترفض شكلك هيبقي عامل ازاي
شادي بنفس الثقة...ناديها انت بس ومالكش دعوة بشكلي
خالد نادي ياسمين اللي كانت مكسوفة
خالد...ياسمين شادي ابن عمك متقدملك وعايز يعرف رأيك
ياسمين بابتسامة مخلوطة بكسوف ..اللي تشوفه يا بابا
خالد حس أن الناس دي متفقة مع بعضها وبتحب بعض ..ابتسم...قولوا كده دانتوا متفقين بقي
شادي...اومال يا عمي هو انت من سنة كام يعني معقول نكون عايشين في بيت واحد وتتفاجئ هي اني هاخطبها ما اكيد اخدت رأيها
خالد ضحك ...شباب اخر زمن
شادي ..المهم بقي يا عمي احنا مش محتاجين ندرس بعض ولا خطوبة ولا الكلام دا هي بس تخلص امتحانات ونتجوز علي طول تمام
خالد ....تمام يا ابني خير البر عاجله
مبروك يا اولاد
أسر وهنا وصلوا الفيلا ...مبروك علي ايه بقي مش تفرحونا معاكم
شادي ...اخيرا هتفرح بيا ..
أسر بص لياسمين .....موافقة ع الواد دا ولا بابا غصبك علي ابن اخوه
شادي...ليه يا ابني هو أنا قلة دانا اشرف اي حد والبنات هتموت وترتبط بيا
هنا ....اللهم يزيدك تواضع يا شوشو
شادي ..بت انتي ايه شوشو دي شايفاني رقاصة قدامك
هنا ...أنا الحق عليا اللي بدلعك
ياسمين ...نفسي مرة انتوا الاتنين تقعدوا عاقلين وماتتخانقوش
أسر ...أنا هحللك المشكلة ..مسك ايد هنا وجرها وراه وطلع فوق علي جناحهم
مرت الايام وهنا انهمكت في امتحاناتها
واسر بيدير شغله وشغل زياد
وشادي بيجهز لفرحه هو وياسمين وبيحط اللمسات الأخيرة علي شقتهم
احمد كمان بيجهز لفرحه هو وندي
شيري كل يوم بتحب زياد اكتر م اليوم اللي قبله لأنها حبت جدا شخصيته الطيبة الجديدة عليها
وفي يوم
أسر وهنا و خالد وشادي وياسمين قاعدين
بالليل بيدردشوا و يضحكوا وكل واحد بيقول موقف مضحك حصل معاه
وفجأة
كلهم بصوا ناحية الباب
خالد ...جيجي
كانت داخلة مكسوفة ووشها ف الأرض
أسر وقف وقال بحدة ...انتي ليكي عين تيجي هنا تاني بابا طلق اختك وهي اتجننت عايزة مننا ايه تاني
جيجي عيطت وكانت هاتمشي
خالد... استني يا بنتي اولا مبروك ع البرأة ثانيا .انتي صحيح غلطتي بس انا مش هقدر انسي اني ربيتك زي اولادي بالظبط ..بس انا اسف اني اقولك اني فقدت الثقة فيكي وف صافي عشان كده أنا مش هاقدر استأمنك ف بيتي ف فكرت اني هاديكي شقة وهاصرف عليكي بس اقبلها عايزك في كلمتين في المكتب
دخل خالد وجيجي الكتب
خالد ...ممكن اعرف انتي حامل ازاي ومين ابو الطفل دا
جيجي عيطت ...أنا هاحكيلك كل حاجة يا اونكل
وحكت جيجي كل حاجة لخالد
خالد بص لها بحزن علي حالها وقال في نفسه ..يعني ابو الطفل مات ومافيش اي ارتباط رسمي أنا لازم اتصرف
خالد...ماتقلقيش يا جيجي أنا هاتصرف خدي مفاتيح الشقة اهي وانا مش هسيبك
جيجي انهارت ..أنا بجد ندمانة ع اللي عملته بس صدقني يا اونكل كل اللي عملته دا بس لاني بحب أسر وكان نفسي هو كمان يحبني
خالد ...اللي حصل حصل بقي ..بس علي فكرة أسر ما فكرش فيكي لأنك كنتي بتعرضي نفسك عليه طول الوقت صدقيني الراجل بيحب البنت المحترمة اللي بتصون نفسها مش اللي بتعرض نفسها سلعة للي يسوا واللي مايسواش ..ياريت تتعلمي من تجربتك دي وتبدأي حياتك من جديد وتقربي من ربنا يمكن ربنا يغفر لك ويسامحك
جيجي كانت بتعيط و ما كانتش بترد لأنها متأكدة أن كل كلمة قالها خالد كانت صح
خرجت بعد شوية ومشيت علي طول
الكل كان مستغرب بس احترموا خصوصية خالد وجيجي وما حدش سأله
جيجي راحت شقتها الجديدة وفضلت تفكر تنزل البيبي ولا تخليه لغاية ما نامت
&&&&&&&&&&&
أسر الفضول كان هيقتله عشان يعرف ايه اللي حصل بين جيجي وخالد وقالوا ايه
ساب هنا نايمة وراح عند بابا
خالد حكي لأسر كل حاجة واسر أنصدم وحمد ربنا أنه حفظ مراته
راح أوضته وحضن هنا جامد لدرجة خلتها صحيت
هنا ... أسر انت لسة صاحي
أسر كان باصص لهنا وساكت لدرجة قلقتها
هنا ...أسر مالك ساكت ليه في حاجة حصلت
أسر ضمها وغمض عينيه ..ربنا يحفظك ليا ديما .. تقلقيش مافيش حاجة أنا كويس يلا بقي كملي نومك
&&&&&&&&&&
مر حوالي شهر الامتحانات خلصت
وجيجي بتحاول تأقلم نفسها علي حياتها الجديدة وفي يوم كانت نايمة وفجأة
واحد يدخل اوضة نومها رافع عليها المسدس وهي لسة خارجة م الشاور
جيجي اتخضت ووو
- تابع الفصل التالي عبر الرابط: "رواية نصف جناني الاخر" اضغط على أسم الرواية