رواية اللطيم البارت الثاني 2 بقلم هنا سلامة
رواية اللطيم الفصل الثاني 2
ليل كان واقف مش مستوعب ! القدر بيلعب لعبه معاه و هدف اللعبه واحد ! هدف القدر انه ميروحش لزمايله ! شالها و قعدها على الكنبه و بدأ يفوقها بلطف و هو مركز في هدوء ملامحها و قصتها الجميله و بشرتها القمحيه و رموشها الطويلة، كان عاوزها تفضل كده لفترة لحد ما يتاملها براحته ! لكن وسط تامله فاقت و قالت : ماما.. ماما.. انا فين ؟
ليل بهدوء : متخفيش انا ليل فاروق اللطيم، مامتك مالها ؟ اية الي جابك كده ؟ مشيتي في الشارع كده ازاي !
قالت بعياط : انا اخت عامر، ماما مفيده مغم عليها يا ابيه انا مش عارفه اتصرف اعمل ايه، عامر كان هو الي بيتصرف
ليل : هي مش والدتكم !!!
قالت بعياط : لا ماما ماتت و مفيده دي خالتنا بس هي الي ربيتني انا و عامر، لأن ماما كانت متجوزه راجل زباله و بتاع ستات و لما ماتت حاول.. حاول.. حاول.. هيء هيء
انفطرت في العياط و كملت : لولا عامر جيه في الوقت المناسب كان زمانه مادد ايده عليا بطريقه تضيع شرفي.. هيء هيء
كانت بتتشحتف و تعيط زي الأطفال و بتمسح في كم قميصها دموعها ببراءة، كان ليل مش طايق نفسه و عاوز يخنق الراجل ده بمجرد انه قرب منها !
أدالها كوبايه مايه و قال : بس يا لوزه بس.. خدي اشربي
ابتسمت و اخدت المايه و قالت : لوزه ؟!!
ليل بحب : اصل اي بنوته حلوه زيك كده و تبقى أصغر مني بقولها يا لوزه
شربت رشفه و قالت : طيب يلا يا ابيه ليل عشان ماما مفيده و النبي و النبي
ابتسم و قال : متخفيش هي عندها السكر ؟
سيلين : و الضغط و القلب يا ابيه
ضحك و قال : ما شاء الله ده عندها عشروميه مرض ! يلا بينا
سيلين : يلا
ليل : استني.. استني دقيقة بس
دخل لاوضه اخته و اتسحب و جاب دريس طويل باكمام دانتيل لونه رصاصي و خرج
سيلين عقدت حاجبها و قالت : ايه ده ؟
ليل : ده فستان غيري في التواليت لأن مش هينفع تنزلي بالقميص في الشارع و انا معاكي الناس تفهمنا غلط
قالت بغيظ : هو حريمي !!
قال بجدية : امال رجالي ؟! ده فستان بقول
اخدته و هي مش طايقه نفسها و دخلت التواليت و لبسته و خرجت و كان حمزه بيلعب مع ليل
ليل : يلا نام بقى يا حبيبي
بص حمزه ناحية باب التواليت إلى اتفتح و طلعت
منه سيلين و قال بهمس : ليل دي جامده اوي ده الفستان ده عليها احلى من ماما
ليل بجدية : حمزه جبت جامده دي منين !!
حمزة ببراءة : بابا بيقولها على الممثلات و قالي معناها يعني بنت جميله و رقيقه
ليل بهدوء : طيب لما اجي هفهمك يا حبيبي، ها يا لوزه خلصتي ؟
ابتسمت بغيظ و هي باصه لحمزه و قالت : اها يا ابيه
مسك ايديها و قال : طيب يلا بينا
نزل بيها و هو حاسس تجاها شعور جميل، هو مش حب؛ بس هو خايف عليها، غيران أن حد يشوف الملامح دي غيره ! ركبوا العربية و راح لبيت خالتها و طلعوا و بدأ يفوق خالتها و ادالها الدواء بتاعها لحد ما نامت و سيلين كانت دخلت تعمله شيء سخن يدفيه، دخلت المطبخ و وقفت قدام النار قالت بصوت عالي عشان يسمعها من بره : ابيه تاكل ؟ اعملك شوربة لسان عصفور مع خالتو ؟
دخل المطبخ و قال : بلاش ابيه دي الفرق بيني و بينك ٧ سنين مش اكتر، المهم بقى انت بتعرفي تعملي شوربة لسان عصفور ؟
سيلين بثقة : طبعاً يا ليل
سرح في اسمه و هو طالع منها و قال بحب : اعمليلي يا سيلين
ابتسمت و قالت : اوكيه..
وقفت قدام النار و هي بتحمر الشعريه و شعرها الأسود على جمب و هو واقف بيتخيلها في مطبخ بيتهم و بطنها كبيره و هو واقف بيساعدها ...
خلصت و غرفتله و قعدوا في المطبخ ياكلوا سوا و هو بيتكلم معاها عن مامورياته
سيلين : واو يعني انت باباك انت و هاله من الصعيد ؟
ابتسم و قال : اها.. مصدومه ليه ؟
سيلين : اصلك معندكش شنب مثلاً أو لابس عمه أو بتتكلم بأسلوب همجي
ليل بهدوء : همجي !! مين قالك ان الصعايدة همجيين !! الصعايدة دول اجدع و احسن ناس، انت لو روحتي الصعيد و ملكيش بيت أو أي حد هناك يشيلوكي فوق الأرض شيل و احسن ضيافة و اكل و عادات كمان، السينما هي الي بتجيب أن الصعيد عباره عن طار مش اكتر بس احنا بقى خير و عز و أراضي و حب و دفاء و صفا في كل بيت
سيلين : انت اتديقت مني ؟ انا اسفه و الله مقصدش بس عارف انا مصدقاك في كل كلمه عارف ليه ؟
غسل ايده و قال و هو بيقفل الحنفية : ليه ؟
سيلين : عشان انت صعيدي و فيك كل المميزات
إلى انت قولتها عنهم مش مجرد كلام ...
ليل : كل مكان هتلاقي فيه الحلو و الوحش مينفعش
تعممي مش عشان قبلتي واحد من بني سويف مثلا
وحش يبقى كل بني سويف وحشين .. فهمتي يا لوزه ؟
ابتسمت و قالت : فهمت .. اعملك شاي ؟
ليل : مينفعش الساعة بقت ٤ الفجر و الوقت جري و مينفعش أفضل هنا اكتر من كده.. عموماً لو عوزتي حاجه كلميني رقمي بقى معاكي..
باسها من راسها و قال : سلام يا لوزه
ابتسمت و حطت ايديها مكان قبلته و قالت بهمس : سلام يا قلب لوزه
صباح تاني يوم ...
صحى ليل من النوم و دخلت جدته تصحيه زي كل يوم و هي بتهمس : ليل.. ليل حبيبي اصحى
اتقلب و قال : عاوز انام يا سيلين اقفلي النور
جدته باستغراب : سيلين ؟
قال و هو تايه : شعرك حلو اوي يا حبيبت ليل انت.. تعالي في حضني كملي نومك
جدته هزته جامد و قالت بعصبيه : ليل ! انت يا ولد
صحى ليل مخضوض و قال : ايه يا تيته.. بسم الله الرحمن الرحيم في ايه ؟
جدته بغمزه : انت بتحب من ورا تيته يا ولد ؟
بلع ريقه و قال : لا و الله أبداً، لو سمحت اقفلي الباب و النور عاوز انام
جدته : طيب و لو قولتلك أن فيه ضيفه جت و إسمها سيلين هتصحى ؟
قام من على السرير و قال بقلق : هي كويسه ؟
جدته : اه يا حبيبي زي الفل.. جت أدت اختك فستانها و حكت إلى حصل امبارح و قالت قد ايه انت كنت راجل و شهم معاها
ليل بثقة : انا راجل و شهم مع الكل ده شيء عادي يعني .. المهم انا هروح لها دلوقتي هي و خالتها اطمن على حاله خالتها
جدته بغمزه : خالتها برده ؟
ليل : و ماله و عليها هي كمان
جدته بضحك : بجح زي ابوك الله يرحمه، طيب يلا عشان متتاخرش عليها برده
ليل بضحك : انت عاوزه ايه يا زوزو ؟
جدته : عاوزه افرح بيك يا حبيب زوزو و بعدين البنت اللهم بارك قمر ١٤ و أخلاق و ذوق و طيبه
و تربية عظيمه
ليل : أن شاء الله تبقى من نصيبي يا حجه بس ادعيلي
جدته بحب : يا رب يا حبيبي يا رب 💙
لبس شيميز اسود و بنطلون اسود و نزل راح لسيلين و خالتها
في بيت سيلين
سيلين بعياط : لو سمحت يا خالتو اطلعي انا تعبانه
دلوقتي.. هيء هيء
خالتها : طيب ليل ضايقك لما روحتي ؟
عيطت اكتر و قالت : لو سمحت سيبيني دلوقتي و النبي سيبيني .. هيء هيء ..
كانت بتعيط و تتشحتف و هي حاسه ان روحها بتتسحب و قالت : ليه حبيته ! يا ربي ليه اتعلقت بيه ! هيء هيء هيء ...
جيه ليل و قال : صباح الفل يا ست الكل
خالتها بجديه : ليل انت دايقت سيلين ؟!!
ليل بصدمه : دايقتها !! انا مقبلتهاش اصلاً انا كنت نايم، في ايه طيب ؟
خالتها : معرفش و الله يا ابني هي منهارة من ساعه ما جت من بره
ليل بقلق : هي فين ؟
خالتها بحزن على حالة سيلين : في اوضتها يا ليل يا ابني ...
دخل ليل الاوضه لسيلين و قعد جمبها و هي منهارة و قال : طيب مالك ؟ لوزه اهدي
بصتله بحزن و قالت : انا تعبانه دلوقتي يا ابيه ..
قال بعصبيه : ابيه تاني ! مش قولتلك انا اسمي ليل.. ايه يا سيلين في ايه ؟
عيطت اكتر و بعدت عنه براحه و هي بتبص على ايده و قالت : مفيش يا ليل.. تعبانه بس
ليل بحب : بصي انا مبعرفش أهون على حد بكلام الحقيقه، تخدي حضن ؟
عياطها زاد و بعدت اكتر و قالت : لو سمحت ملكش دعوه بيا.. انا الولد الي بحبه عمل مشكلة معايا عشان انا كنت معاك امبارح، مع اني حلفتله انك زي اخويا
بس هو مصدقش !!!
الكلام كان نازل زي الصعقه على ليل ! ليل إلى عمره ما حب و لا كان لطيف مع بنت غير اخته و جدته، عمره ما قال لوزه دي لحد اصلاً ! سلم لسيلين قلبه في يوم واحد أقل من ٢٤ ساعه ! عرض عليها تاخد حضن و هو مبيعملش كده أبداً مع أي حد غير جدته و بس ! حس انه كان غبي ! بنت زي دي صغيره في السن هتبص لواحد بتقوله يا ابيه !!!
اخد نفس عميق و قال : انا اسف ليكي يا انسه سيلين، مكنتش اعرف انك مرتبطه، يا ريت تاخدي بالك من نفسك يا انسه، اسف لأي مشكلة انا عملتها ليكي.. فعلاً اسف
" و يا قلبي حالف تكون مكسور و متطلعش منصور، حالف تكون غرقان في بحر حبها و انت متعرفش العوم، حالف تجرحني و لا تفرحني" بقلمي 💛
" سأظل انا و قلبي وحيدين وسط المطر، فلا يوجد معطف ليدفينا، مزقته آخر مره و هي تصارحني بعدم حبها لي !" بقلمي 💛
- تابع الفصل التالي عبر الرابط: "رواية اللطيم" اضغط على أسم الرواية