رواية وقعت فى العشق الفصل الثاني بقلم أمل السقا
رواية وقعت فى العشق الفصل الثاني
مع طلوع شمس يوم جديد.
عز: عشق يا عشق يا انسه عشق اصحي ياما عايزك في موضوع مهم
عشق: يا عز بقا بطل رخامه فيه حد يصحي حد الصبح
عز: أومال بيصحوهم امته بعد الضهر؟
عشق: اممم امشي بقا
عز: يا بنتي فوقي بقا بابا قالي انك رايحه شغل صح ولا ايه؟
عشق "وهي بتنط من مكانها وبتلف حوالين نفسها": أحيه ده انا نسيت دول هيرفدوني من قبل ما يقبلوني حتى فين الجذمه فين شنطتي فين دبابيسي هترفاااااد
عز" وهو بيضحك على اخره ": يا بنتي اهدي شويه وبعدين ده علي اساس انك هتروحي كده؟ انجزي يلا صلي والبسي وهوصلك معايا لحد الشركه.
عشق" وهي بتدخل الحمام ": خلاص اشطا عشر دقايق وهكون جاهزة مش هتأخر.
...... بعد ساعه إلا عشر دقايق
عشق: يلا بينا يا زيزو
عز: كل ده عشر دقايق يا مفتريه بتعملي ايه كل ده ابقي قابليني لو وافقوا يبصوا ف وشك حتى؟ بس ايه الحلاوه دي يا بت قمر قمر يعني" بغمزة "
عشق: معلش بقا كنت بصلي وبجهز نفسي وبعدين انا حلوة طول عمري ياسطا
عز: يا شيخه تباً لتواضعك ده.
عشق: بااااس يا زيزو الف شكر نزلني هنا بقا ومتنساش اني مش عايزة حد يعرف اني تبع مراد البدوي هه.
عز: تمام يا شوشو بابا قالي مع اني مش فاهم ايه الحلو ف كده بس براحتك، المهم خلي بالك من نفسك تمام؟
عشق: تمام يا حبيبي فى حفظ الله.
عز: في حفظ الله.
زياد فى مكتبه: أوه ده انا نسيت موبايلي فى العربيه هنزل اجيبه
نرمين "سكرتيرة زياد وبت سمجه قوى ودلوعه كده": استاذ زياد حضرتك رايح فين؟
زياد بحده من طريقتها: وانتي مالك؟ وبعدين انتي من امته بتسألي رايح فين ولا كده؟ متنسيش نفسك يا نرمين وخليكي فى شغلك احسن وياريت توسعي لبسك ده شويه وتطوليه احنا مش فى كباريه هنا" قالها وهو بيبصلها بقرف من فوق لتحت "وسابها ونزل
عشق وهي بتمشي بسرعه كبيره: يارب المدير تكون عربيته عطلت يارب، يارب تكون راحة عليه نومه ويتأخر يارب يارب
" تليفونها رن فتحته وردت وهي بتبص وراها ومش واخده بالها من اللي بيقفل باب عربيته وبيتكلم فى التليفون وهوب راحت خابطه فيه والتليفون وقع منه "
عشق: ايه يا اخ ما تفتح الله
زياد: انتى متخلفه يا بت انتى دا انتي اللي خبطتي فيا هو فيه حد بيمشي بضهره!
عشق بعصبيه: على فكره انا ممشتش بضهري انت اللي ماشي بجنبك ايه قلة الزوق دي؟
زياد: أنا قليل الزوق برضو؟! تصدقي لولا انك بنت كان زمان ليا معاكى تصرف تاني بس انتي واحده غبيه وانا مش هضيع وقت معاكي. وسابها ومشى وهي بتوبخ نفسها عشان هي عارفه انها غلطانه بس هي طبعاً عنيده وبتحب تقاوح.
عشق بعد ما وصلت للسكرتيره
نرمين: انتى عايزه مين يا بطه؟
عشق: بطه فى عينك يا بعيده بلبس الرقاصات ده
نرمين: انتى بتقولى ايه؟
عشق: ولا حاجه انا عندي انترڤيو دلوقتي مع استاذ زياد ممكن أدخل؟
نرمين: ثواني ودخلت لزياد وبعدين خرجت لعشق وهي بتدلع: اتفضلي استاذ زياد مستنيكي.
عشق: طب انتي مالك في ايه ما تثبتي كده ولا انتي جسمك عنده كهربا زياده فبيعمل ڤيبراشن لوحده!
وسابتها ومشت حتى من غير ما تشوف تعابير وشها اللي احمرت من الغيظ.
عشق: السلام عليكم ورحمة الله وبركاته
حضرتك انا جايه وطالبه اشتغل في شركه حضرتك واتمنى حضرتك مترفضش طلبي لاني بجد محتاجه الشغل ده ضروري جدا جدا جدا وهبقي منونه ليك قوى لو قبلتني هنا انا سمعت كلام كتيير كويس فى حق شركاتكم عشان كده لقيتها فرصه مناسبه اني انال الشرف اني اكون من اعضاء الشركه الجامده دي قصدي الكبيره دي اللي ليها سيط فى كل مكان قصدي ليها مكانتها يعني وكده هو حضرتك مش بتتكلم ليه؟
زياد:........
عشق: طب حضرتك مديني ضهرك ليه؟طب حضرتك سامعني طيب؟ هو انت بتحضر عفاريت ولا ايه؟ يا ماماااااااا
زياد: عفاريت لما ينططوكي يا بعيده روحي من أول ما دخلتي لوك لوك لوك لوك لوك ايه مبتفصليش؟!
عشق "بخوف": هو انت المدير احيه عليا"بصوت واطي"
زياد: ايوه انا المدير ايه مش عاجبك ولا حاجه
عشق: لأ طبعاً ده انت حتي قمر قصدي يعني حليوه قوي تؤ تؤ قصدي شيك يعني وكده يووووه كلك زوق
زياد: تمام اناقبلتك هنا من هنا ورايح هتبقي المساعدة بتاعتي بس هحطك شويه تحت التدريب عشان تفهمي الشغل
عشق: حضرتك مشوفتش ال cv حتى؟ زياد: ميلزمنيش فى حاجه "ابتسم بخبث وقال لنفسه ده انا هوريكي ايام سودة على بجاحتك معايا تحت"
زياد : انتى اسمك ايه صحيح؟
عشق: عشق اسمي عشق
زياد: طب والله اسمك خساره فى لسانك اللي عايز قطعه ده؟
عشق: نعم؟ بتقول حاجه حضرتك
زياد: لأ مبقولش ثم امسك الهاتف وقال
عمي عبده معلش عايزك شويه فى مكتبي
ثم ااغلق الخط
وقال: اتفضلي اقعدي لحد عمي عبده ما ييجي عشان يوريكي المكتب ويفهمك النظام وعلى فكره انا أهم حاجه عندي النظام والالتزام فاهمه
عشق: يعني اجي علي الساعه كام كده مثلا؟
زياد: سبعه تيجي علي الساعه سبعه
عشق بشهقه: سبعه ازاي ده انا بنام سبعه اصلا؟ ما تخليها عشره طيب والنبي.
زياد: انتى هتفاصلي معايا من اولها انا قولت سبعه يعني سبعه وان اتأخرتي يبقى ذنبك علي جنبك مفهوم؟
عشق:.......
زياد بصوت عالي: مفهووووووووم؟
عشق بخضه: خلاص خلاص مفهوم مفهوم أنا ايه اللي كان جابني اصلا ما كنت مرزوعه فى البيت لازم اعمل فيها هتلر يعني!
زياد: بتقولي حاجه؟
عشق: ل. لا لأ مبقولش لأ
زياد: خلاص اتفضلي وهتلاقي عمي عبده بره وهيوصلك للمكتب
عشق: تمام عن اذنك وخرجت.
زياد فى نفسه " بت مستفزة صحيح بس حلوة الصراحه وعيونها تهبل ولبسها محترم كفايه انها محجبه "تنهّد وقال ايه يا زياد انت هتتوه ولا ايه لأ صحصح كده ده انت لازم تعلمها درس فى الاخلاق دا لسانها اطول من برج ايڤل.
*معلومه يا جماعه انا ف بداية الفصل قولت باباها طبطب على ضهرها وحط ايده على شعرها لأنها كانت في البيت فمش هتلبس طرحه فى البيت يعني انما هي محجبه اصلا تمام كده؟
يتبع الفصل الفصل الثالث اضغط هنا
- الفهرس يحتوي على جميع فصول الرواية كاملة :"رواية وقعت فى العشق" اضغط على اسم الرواية