رواية حما وتلت سلايف الفصل الثالث بقلم مي علي
رواية حما وتلت سلايف الفصل الثالث
نزل جدي بالعصايه علي جسمها وهاتك يا ضرب
وهي تصرخ
- بقي انتي نسيتي نفسك يابنت علوان وبقي ليكي حس بيطلع ف البيت وتمدي ايدك علي حريم ولادي
وفضل يضرب لما جابت دم
جريت امي عليه
- خلاص يابا الحاج ابوس ايدك سبها اعتقها لوجه الله
- اعتقها لوجه الله وهي دي تعرف ربنا اوووووعي خليني اربيها
وبص لضحي وقال ...
وانتي عوزاني اموت عشان يطردو بره يابت المقيحه
وشدها ونزل فيها ضرب
وهيا تصرخ ...
كدابه يا جدي ااااااه خلاص يا جدي والنبي خلاص
فضل جدي يضرب فيهم لحد ما ايده خدلت ومحدش فينا عارف يحوشو
بصلهم وقال ..
من زمان وانتي كان لازم يتكسرلك ضلع
بس الخروف اللي انا مربيه معرفش يشكمك يا ناقصه
حسك عينك حسك يعلي ف بيتي ولا ايدك تترفع علي فاطمه
ده عدلات اللي بقالها هنا سنين عمرها مطلعها حس
تيجي انتي يا واطيه يا عرة الحريم حسك يعلي
بصتلو بغل زي ماتكون عاوزه تضربه
- بتبصيلي كده ليه يابت ما تيجي تاخديني قلمين انا روخره
انفجرت ف وشو ...
انشالله ربنا ياخدك وتنكسر ايدك يا راجل يا كحكح ياللي رجلك والقبر
وايدك لو اتمدت عليا تاني انا هقطعهالك وبناقص جوازة الندامه دي
اتفوووو عليكو عيله غجر
جدي كان متفاجئ من اللي اتقال ده ومبقاش قادر ياخد نفسو
امي جريت عليه
وسندته وحست انو هيقع
بس الكلمتين اللي قالتهم دول قالتهم بحس عالي
وكان عمي جمال داخل علي حسها وسمع الكلمتين دول
ف لحظه لقيت عمي جمال داخل والشر ف عنيه
ونزل فيها ضرب وبالبوكس ف بطنها وكمل عليها وفعلا كان هيموتها
لولا امي حاشته عنها
جابها من شعرها بالعبايه البيتي اللي كانت لابساها وجرها ف الشارع
امي طلعت تجري وراه ومراته كمان
عشان يسيبها
والناس اتلمت ع المنظر
كان بيتها ف اخر الشارع
اخدها جر ع الأرض من بيتنا لبيتها
وراح رماها قدام باب بيتهم بعد ما كانت فضيحتها بجلاجل
وبصلهم وقال ...
بنتكم اهي يا عيله لمامه يا راجل معرفتش تربي بنتك
ومشي
والشارع اللي عمرنا مطلعلنا حس فيه
مبقاش سيره الا احنا واللي عمله عمي جمال
ورجع شخط فينا كلنا
- كل وااااحده تخش شقتها مشوفش حد تحت يلااااااااااا
طلعت امي جري ع التليفون
اتصلت بأبويا
- عادل إلحقنا
- في اي يا فاطمه
حكتله اللي حصل
- إلحق ابوك واخوك لو احمد جه هيصور قتيل هنا ومش هيسكت
- طب اهدي اهدي انا جاي استأذن واجي جري
ويادوبك امي قفلت من هنا
وسمعت صوت عمي احمد اللي اكيد من علي دخلة الشارع لأخره عرف اللي حصل لمراته
وامي سمعاه عمال يزعق بس خافت تنزل
جدي مقلش غير ...
حسك ميعلاش وانا عايش
ايه هتضربني ولا اي
- ميصحش تمد ايدك عليها يابا لا وكمان جمال يمد ايدو عليها ده لا في احترام ليا ولا لأي حاجه
جمال ..
واكسرلك رقبتها كمان احمد ربنا اني مموتهاش
عاوزني اسمعها بتطول لسانها علي ابوك واسكت انت بقي مش عارف تلم أهل بيتك دي حاجه تانيه
جدي بصله وقال ...
سنين وانا شايف الغل جواكم انت وهي وشربتوه للبت شرب
مستنيني اموت عشان تعملو اللي يحلالكم واول واحد هتيجو عليه الغلابان ومراته وبنته
اسمع انا مش هقولك طلقها
مع أن الأصول شتمت ابوك وضربت مرات اخوك انت من نفسك تعمل كده
إنما أنا عارف اني طول السنين دي بربي خروف بقرون ملوش لازم
خييييخه
اسمع انت تاخد مراتك وعيلك وتمشي من البيت ده
- يعني اي بتطردني من بيتي
- مهواش بيتك
ديه بيتي لحد ما اموت وتبقو تورثوني
رووووح ابنيلك بيت واحقنه غل وكره وسواد
إنما عندي هنا لاااااا
- بقي كده
يابا دي اخرتها
- دي أخرة السواد اللي ف قلوبكم
- طييييييب
وخرج عمي احمد من البيت وسحب بنته ف ايدو
علي دخلة ابويا
وحكيناله كل اللي حصل
وفضل يتحايل علي جدي انو يرجعو البيت وميسيبوش يمشي
جدي مكنش راضي ابدا بس ف الاخر وافق
وابويا قرر وقتها أن احنا اللي لازم نسيب البيت نهائي ونبعد
بس مقلش لجدي الكلام ده
وبعد ما رجع عمي احمد ومراته البيت
ابويا فاتح جدي ف الموضوع
وجدي زعل منو اوي وقال ...
عاوز تسيبني وتمشي يا عادل
مستكتر الشويه اللي قاعد فيهم معايا قبل ما امشي
- يا بويا انا مش هسيبك انا بس هبعد من هنا وهنجيلك علي طول
بس طول ما احنا قاعدين هنا مفيش حد فينا هيرتاح
لا انت هترتاح ولا احنا كمان
انت هتبقي مبسوط لما حد فينا يخش الحبس ف التاني
- لا يا عادل يابني لا
طلاما انت شايف أن مشيانك من البيت ف مصلحتك يبقي اعمل اللي يريحك
بس متقطعش ابوك يا عادل ومتحرمنيش من شوفتكم
وفعلا مشينا واخدنا شقه ايجار علي ادنا وف حته حلوه
وقتها كان عندي خمستاشر سنه
وسبنا البيت وصباح يولعو ف بعض
بس كنا علي طول بنروح لجدي
والغل بقي مالي قلبهم اكتر وعاوزين يعرفو احنا عاملين اي
ودخلت ثانوي عام وضحي دخلت تجاري
وف اليوم ده سمعت انها اتكلت علقه محترمه من امها
وانا وباسم بقينا زي السمنه ع العسل وضحي بقت غيرانه
كانت حبيبة صباح لازقه فيها الاربعه وعشرين ساعه وتقريبا عايشه معاهم
كنت اوقات بحس انها بنت صباح مش بنت عدلات
حتي جدي لما ضربها كان بيقولهم انتو شربتو الكره للبت
والسنين عدت
ودخلت كلية العلوم
وباسم قرر يخطبني وكانت دي الصدمه بالنسبه لضحي
بس الغريبه واللي مفهمتوش ان صباح امه كانت موافقه
وكانت عارفه اننا بنخرج وبنتكلم ومش ممانعه
بس ماما وبابا لما عرفوا كده موافقوش
وانا فضلت اعيط واتحايل عليهم يوافقو علي باسم ابن عمي
وان احنا ملناش ذنب ف اللي بينهم
وفعلا وافقو وطلب عمي احمد ايدي لباسم من ابويا
بس جدي كان له رأي تاني
وبعد قراية الفتحه بيوم
لقينا جدي جاي عندنا
وجاي ناوي علي بيات ودي مش عادته
واول ما دخل سأل عليا وطلب اننا نقعد لوحدنا
بس كمان كان عاوز ابويا معايا
وبصلنا وقال ...
الجوازه دي لا يمكن تتم
انا ...
ليه يا جدي بس
باسم بيحبني وانا بحبه وهو طيب مش زيهم
- غرام يا بنتي انتي عارفه أن اعز الولد ولد الولد
وانتي اعز عندي من عيال ولادي كلهم
باسم لهو بيحبك ولا هو طيب ولو نسبتو النسب ده هيعم بخراب
انا ادري بمصلحتك
- مش هقدر ابعد عنو يا جدي
- يبقي كتبتي علي نفسك تدخلي ف بير وسخ مش هتطلعي منه ابدا
انا بحميكو يا بنتي
- من اي بس
- من شر صباح وعيالها
من شر ابني اللي اتعمي بجوازته دي
لو هقول أن في حد عدل ف البيت ده فهو كريم
مش باسم
كريم جواه طيب
إنما باسم لا
اهربي بجلدك يا بنتي
بابا كل ده كان قاعد ساكت
جدي ...
ساكت ليه يا عادل
- عشان كل الكلام ده انا قولته ومفيش فايده يا بويا
هيا بتحبه وخلاص وانا قولت يمكن يطبع بينا لما يتجوزها
- من امتي يا عادل الراجل بيطبع بطبع أهل مراته
الراجل باللي اتربي عليه
- مش يمكن يابا جوازتهم دي ترجع الميه لمجاريها
- عيبك انك طيب يابني
وعشان كده انا جتلك وعامل حسابي ويعلم ربنا اني بعمل ده عشان احميك من اللي هيعملوه فيك بعد ما اموت
- عامل حسابك علي اي يابويا
- شوف يا عادل
انا خلاص العمر ما فضلش فيه حاجه
انا قررت اكتبلك الحاجات دي بأسمك قبل ما اموت
المحل الرئيسي بتاع العطاره والأرض العمرانه اللي ف بلبيس والبيت اللي ف دهشور
- يالهوي يابا انت كده بتحميني ده لو عرفوا هيبهدلوني يابا وتولع ف قلوبهم النار
- حق ربنا يا عادل انا مظلمتش
زيك زيهم
بس انا بكتبلك ورثك ف حياتي وانا عايش عشان انا عارف ان لو مت محدش هيديك حاجه يا عادل
جمال هيكبر دماغه وأحمد هيسكته بكلمتين
متنساش ان انت وجمال ملكوش ف شغل العطاره
محدش عارف الشغل غير احمد هو اللي كان لابدلي وعاوز يعرف كل حاجه عن الشغل
- يابا بس
- متقاوحنيش انا مش ظالم يابني انا عاوز اطمن عليك قبل ما اموت
- ربنا يديك الصحه والعافيه حسك بالدنيا متقولش كده
- امضي يابني يا حبيبي
امضي
مسك القلم ومضي
جدي ساعتها ارتاح اوي وخد نفسو وقال ...
عاوزك بقي تباشر حاجتك بنفسك وتكمل مشواري
- حاضر يابا حاضر
يا فاطمه حضريلنا العشا
وقعدنا اتعشينا وجدي قعد معانا اسبوع
وكل يوم باسم يجي يقعد معانا
جدي كان مقتنع أن امه اللي بعتاه يعرف اي الدنيا
وحدد معاد كتب الكتاب مع ابويا
يكتب الكتاب مؤقتا وف تانيه جامعه ولا حاجه نتجوز وأكمل تعليم ف بيته
وقال لجدي أنه هياخد شقه بره لينا بعيد عن بيت العيله
وبعد تمن شهور وخلاص هنكتب الكتاب
وجدي جه قعدنا معانا شهرين بحالهم
ولحد كتب الكتاب وهو معانا ومالي علينا البيت وكنا بنتكلم انا وهو وادلع عليه كالعاده
ويحكيلي عن مغامراته وهو شاب
وازاي اتعرف بتيته الله يرحمها
وكنت بشاركه ف كل حاجه
وظبطنا قاعة كتب الكتاب وكل حاجه كانت تمام
نمت وانا مبسوطه ومش مصدقه نفسي اني انا وباسم خلاص هنكون سوي
نمت علي احلام جميله
وصحيت علي اوحش خبر ف حياتي
امي بتصرخ وبتعيط
- ماما مالك يا ماما مالك في اي
- ااااااه يا غرام اااه يااااااارب
جدك يا غرام جدك
الدم نشف ف عروقي ونطقت بالعافيه
- ماله جدو يا ماما
- جدك ، جدك مات
يتبع الفصل الرابع اضغط هنا
- الفهرس يحتوي على جميع فصول الرواية كاملة :"رواية حما وتلت سلايف" اضغط على اسم الرواية