رواية مابين الحلم والحقيقة الفصل السابع 7 بقلم اميرة اسامة

رواية مابين الحلم والحقيقة البارت السابع 7 بقلم اميرة اسامة الجزء الثاني من رواية دار الايتام

رواية مابين الحلم والحقيقة الفصل السابع 7

بعد وصول ليل ونور الكافيه

ليل...تشربي ايه يا نور

نور...ولا اي حاجه

ليل...مش هينفع

نور...طيب ممكن اي عصير

ليل...واحد قهوه ساده وواحد عصير فريش

الويتر...تحت امر حضرتك بعد اذنك

ليل..اتفضل

طلع ليل سيجاره بهدوء ولعها وخد نفس

نور كانت بتهز رجلها وحاسه بتوتر

خير يا مستر ليل

ليل...خير يا نور مالك بس متوتره كده ليه

نور....مش عارفه حاسه ان في حاجه ليها علاقه ب بابا وبالرغم من اني اطمنت عليه بس بردو قلقانه

ليل...لا متقلقيش اطمني انا قولتلك من البدايه ان دي حاجه ملهاش اي علاقه بحاج محمد

نور....طيب قولي في ايه

ليل...نور...انا طبعا عمري ما شغلت اي حد معايا فالشركه من غير ما اعرف اي حاجه عنه يعني تقدري تقولي كده ان اي حد شغال عندي انا اعرف اصله وفصله وتاريخه من يوم ما تولد كمان..ده طبع فيا لازم اللي يشتغل في مجموعه السيوفي اعرف عنه كل حاجه

طبعا لما حاج محمد جاب تمارا تشتغل وقال قريبتي فامجرد انها جايه منه او تبعه يعني ثقه انتي متعرفيش والدك عندي ايه...بس ده ميمنعش ان الطبع يغلب التطبع ومقدرتش اني مدورش ورا تمارا خصوصا ان احداث شغل تمارا كان ليها ظروف خاصه او تقدري تقولي حصل حاجات خلتني ادور وراها عارف ان حاج محمد عمره ما هيأذيني بس لما ابقى عارف طول حياتي ان حاج محمد ملهوش اي قرايب وفجأه يظهرله قرايب لازم اشك...او بلاش اشك خلينا نقول ان الفضول وقتها قتلني اعرف ايه حوار قرايبه ده...

نور....مستر ليل

ليل...اسمعيني للاخر يا نور بلاش تقاطعيني اصلا انتي هنا عشان انا محتاج اسمعك بس خليني الاول افهمك وبعدين ردي

نور...تمام اتفضل معاك

ليل....طبعا عشان مطولش عليكي انا عرفت اصل تمارا يوم حادثه حاج محمد مش هي بس هي وعشق وزهره.

سكتت نور بحزن

ليل...طبعا اصلهم وحكايتهم دي متخصنيش دي ظروف اتحطوا فيها لكن اللي يهمني في الموضوع اللي حصل يوم الحادثه اليوم ده بالنسبالي غريب جدا....عشق في اليوم ده جت واتفاجأت انها هي كمان قريبة حاج محمد واخت تمارا المشكله مش في كده المشكله كان في طريقتها وارتباكها وكلامها اللي كان متلغبط لما سألوها جيتي ليه كلامها مكنش مفهوم...وبعدها طلبها الغريب اننا نبعد عن الشارع والاغرب لما سألناها عن السبب وقالت ان في حادثه هتحصل مقصود بيها تمارا بس بابا اللي هيتخبط حاج محمد وفعلا ده اللي حصل.

طبعا انا لما قابلت عشق امبارح وسألتها حسيت كلامها غريب جدا وكان ردها على سؤالي ان هي حلمت حلم والحلم ده بيتحقق وطبعا قالت حاجات كتير هتحصل من ضمنها حاجات هتحصلي انا في شغلي وحاجات شخصيه والحقيقه هي قالت حاجات كتير يمكن محدش يعرفها غير ناس قريبه ليا..وده اللي شغلني اكتر وخلاني اطلب اقابلك...بصي يانور انا راجل اعرف اقرأ اللي ادامي كويس طبعا انتي عارفه اسمي عامل ازاي في السوق انا الكل بيعملي مليون حساب شركتي مسمعه في الشرق الاوسط كله ليا شغل في اغلب دول العالم باختصار رغم ان سني صغير بس الكل عارف مين هو ليل السيوفي اكيد ليا اعداء كتير وده بسبب الشغل ولاني ناجح في مجالي انا الشغل يا نور والسوق علموني اقرا اي بني ادم من غير ما اتعامل معاه حتى... وبالرغم من اني شكيت في تمارا لما اشتغلت بس مكنتش قلقان منها حتى برده لما شوفت عشق وقالت اللي هي قالته برده مش قلقان منها بس يمكن تكون دي اول مره في حياتي معرفش اقرا بني ادم يا نور وبقولها من غير اي احراج انا فشلت في اني اقرا عشق بس بردو اللي قالته انا مش مصدقه ولا قادر اصدقه في مليون حاجه جت في بالي من ناحيتها زي مثلا ان حد حادفها عليا سواء اعداء شغل سواء حد يعرفني شخصيا مش عارف انا من امبارح مش عارف انام قالت حاجات كتير قبل ما تحصل وحصلت بالحرف قولت لنفسي يمكن متفقه مع حد بس لما برجع افكر بهدوء طيب يوم ولادة مهره عرفته ازاي لدرجه اني خليت الجارد والبواب عينهم عي الڤيلا وعرفتهم ان مفيش مخلوق يدخل كنت شاكك انها ممكن توصل لمهره وتعمل اي حاجه تسرع معاد الولاده معرفش أذا كان ده ينفع ولا لا بس ده اللي جه في بالي وفعلا مهره ولدت ولما اتأكدت من الجارد والبواب فعلا محدش دخل طب ازاي حسيت وقتها اني هتجنن وملقتش اي رد على أسئلتي غير والدك وهو الوقت مش هيقدر يفيدني عشان كده يا نور ملقتش غيرك ادامي ومحتاج اعرف منك حكايتهم عايز اعرف اذا كان وراهم اي حد ولا لا

سكتت نور وسرحت شويه مش عارفه ترد تقوله ايه مستغربه اللي سمعته ثواني ورجعت تاني بصت لليل..

نور...مستر ليل بص انا مش عارفه اقول ايه لحضرتك يمكن اللي بتقوله ده غريب وغريب جدا كمان وانا نفسي لو في مكانك اكيد هيبقى ده نفس احساسي يمكن اكتر بس يمكن معنديش حاجات كتير اقولهالك تريحك بس اقدر اقولك حكايتهم من يوم ما بابا قابلهم..طبعا احنا كنا خدنا عهد بينا وبين بعض وده كان طلب بابا ان محدش يعرف اي حاجه عنهم عشان ميستغلهمش او يطمع فيهم بس بما ان الموضوع بيكبر بالشكل ده وفي شك فانا هحكيلك

من حوالي شهرين ونص او يمكن اكتر كان يوم خميس وبابا راجع البيت اتفاجأت ب بابا بيكلمني وبيقولي انه عاملي مفاجأه وطبعا بعدها بشويه لاقيته دخل عليا الشقه ومعاه عشق وتمارا وزهره..

لما سألت بابا قاللي اللي حصل ويعرفه لانه طبعا وقتها مكنش لسه يعرف حكايتهم قال بس اللي حصل واللي هو انه كان راجع من الشركه وكان بيجبلي حاجات من السوبر ماركت وبيعدي الشارع اتخايل بيهم اعدين على الرصيف وحاوليهم شنط ونايمين على كتف بعض وباين على ملامحهم انهم معيطين بابا طبعا حضرتك عارفه بيصعب عليه اي حد ولان هما شكلهم كان محترم ونضيف يعني مش متسولين مثلا فضوله خلاه يروحلهم تقدر تقول انه شافني انا فيهم حاول يصحيهم اتنين بس اللي صحيو تمارا وزهره بابا سألهم عن سبب نومهم خصوصا الجو كان هادي وسقعه والدنيا ليل

قالوله انهم مش لاقين مكان يروحوه ولما حاولو يشوفو شقه يباتو فيها كان أيجارها عالي وهما ملهمش اي حد طبعا صعبوا اوي على بابا وحس بصدق كلامهم وحزنهم فعرض عليهم انهم يروحو معاه في الاول اتاخدوا وخافو بس هو عشان يطمنهم قالهم انا عندي بنت في نفس سنكم مراتي متوفيه واحنا لوحدنا اعدوا معانا حتى لو لحد الصبح بدل اعدت الشارع والنوم على الرصيف وعشان يأكدلهم ده اتصل بيا وانا طبعا مكنتش اعرف فضلت اهزر مع بابا واقوله يلا حضرتلك الاكل وعشان نسهر سوا وقتها كان فاتحلهم الاسبيكر وبما اني مكنتش اعرف وبتكلم على طبيعتي فا اطمنوا شويه بس حبوا انهم يسألوا عشق لان تقريبا كده هما بيعتمدوا عليها اوي حاولوا يصحوها مكنتش بتصحى بابا قلق فضلوا يهزو فيها مش بتصحى بس في نفس الوقت جري بابا جابلها عصير ولما رجع كانت صحيت وتقريبا البنات قالولها وبعدها وافقت وجم البيت عندنا اتعشينا سوا وبابا قالهم ادخلوا ارتاحوا بس عشق رفضت انها تدخل قبل ما تحكي كل حاجه عنهم وقالت لبابا انت فتحتلنا بيتك من غير ما تسأل عن اصلنا او ورانا ايه وحقك علينا انك تعرف حكايتنا...وحكيتلنا حكايتهم

وابتدت نور تحكيله كل حاجه قالوها البنات يومها..

نور....بس دي كل حكايتهم يعني بابا شافهم صدفه وهو اللي راحلهم برجله وصحاهم يعني حتى مكنوش صاحين عشان نقول انهم استنوه مخصوص او انهم حاول يلفتوا انتباهه يعني هما مكانوش يعرفونا ولا يعرفوا حضرتك البنات دي انا أشهدلهم بروحي اني مشوفتش احسن ولا انضف منهم في حياتي نفسهم عزيزه عليهم جدا كل اللي كانوا يملكوه هو مبلغ بسيط جدا ولحد الوقت سايبينه في دولاب بابا رغم انه رفض تماما بس لما لاقهم مصممين خدهم عشان يريحهم لكن شايلهم فضلوا كتير يدورو على شغل زهره اشتغلت وتمارا بعد الحادثه بابا حب يفرحها ان حضرتك وافقت على شغلها عشق بتنزل يوميا معانا تدور يمكن لحد الوقت ربنا موفقهاش في الشغل بس هي راضيه يمكن في حاجه غريبه بما اننا كنا بنات مع بعض بنأعد نحكي ونتكلم كنت ديما اسمع تمارا وزهره بيسألوها مالك ايه اللي مغيرك من يوم ما صحيتي يقصدوا اليوم اللي بابا لقاهم فيه

وسمعت جمله من تمارا قالتها لعشق قالتلها انتي قولتي انك حلمتي حلم ايه هو ليه الحلم ده الوحيد اللي فارق معاكي ومغيرك كانت بتهرب دايما من السؤال وتقولها حلم عادي زي اي حلم

ومن كلامي معاهم عرفت ان عشق دايما بتحلم بحاجات كتير وبتحقق بتحس بحاجات من قبل ما تحصل..

ليل...ليه شيخه مثلا

نور...مش حكاية شيخه بالعكس عشق بتحب الضحك والهزار مش معقده خالص دمها خفيف بس هي مبتسبش فرض بمعنى الكلمه القرآن دايما بتقرأه يعني عكس ناس كتير دايما اشوفها تقرأ بس القرآن في رمضان عشق دايما وبردو بالرغم من ان تمارا وزهره كده بس عشق زياده عنهم اوي

زي من فتره بابا صحي الفجر لقاها اعده في الصاله على السجاده بتقرا قرآن بابا قالها كان هيروح عليا نومه بس الحمد لله صحيت

ضحكتله عشق وقالتله عشان كده ربنا هيكرمك انهرده لما سألها بابا تقصدي ايه قالتله ان ربنا باعتله رزق حلو انهرده وانها شافتله حلم حلو قالها هشوف لو اتحقق هحليلك بوئك وفعلا في اليوم ده حضرتك اديت بابا فلوس كتير عشان كان في شغل في شرم كان عليه مشاكل واتحل فا حضرتك حبيت تفرح اللي معاك في الشركه وكان من ضمنهم بابا..

ليل...فعلا ده حصل.

نور....وهو ده برده اللي حصل عايزه اقول لحضرتك ان من يوم ما البنات دول جم بيتنا واحنا حالنا اتغير للاحسن بكتير اوي يمكن كان الاول كويس جدا الحمد لله بس وقتها كنا فردين لما بقينا خمسه تخيلت ان الدنيا هتبقى ماشيه بالعافيه بس لقيت العكس ساعتها بابا قاللي ان التجاره مع ربنا عمرها ما كانت خسرانه وانا ربنا باعتلي البنات دي احافظ عليهم ووافقت وهو اكرمني بزياده..صدقني يا مستر ليل يمكن يبان اللي هقوله تخريف بس لو عشق قالت لحضرتك نصيحه تخصك او تخص شغلك اسمع كلامها حضرتك لو متعرفهمش بس اكيد تعرفني وعارف اني عمري ما هضرك ابدا او عالاقل كنت عملت زي حضرتك وشكيت فيهم وخفت على بابا بعد اللي سمعته بس انا واثقه فيهم جدا.

حط ليل ايده على راسه وهو بيفكر مش عارف يعمل ايه يصدق اللي نور قالته ولا يصدق نفسه ولا يصدق عشق

نور....عارفه ان حضرتك الوقت عقلك جواه حرب بس هقولك كلمه عشق دايما تقولهالي

أمشي ورا احساسك لانه عمره ما هيخونك...وأوزن الامور بعقلك وقلبك مع بعض متخليش ميزان واحد فيهم يطب..

بصلها ليل بهدوء وابتسم وهزلها راسه وبعد مده بسيطه خرجوا من الكافيه ووصلها

ليل...نور طبعا مش هقولك ان مش لازم حد يعرف مقابلتي بيكي

نور...اطمن اكيد هعمل كده

ليل....يلا اطلعي بسرعه

نزلت نور وطلعت على البيت ومشي ليل

في الوقت نفسه كان جاسر خلص الميتنج مع هادي واتفقوا على السفر وبلغ ليل بكل حاجه وده اللي خلي ليل يفكر اكتر

عدى يومين وسط تفكير ليل اللي مبيخلصش لكن الوضع كان مع البنات افضل كل واحده فيهم اللي بتنزل شغلها زي تمارا وزهره واللي بتنزل جامعتها وتروح المستشفى زي نور اما عشق فقررت انها تغير جزء كبير في حياتها وهو انها تحاول تنسى الحلم....

وتعيش طبيعيه خصوصا انها ارتاحت بعد ما حكت كل حاجه لليل وبالرغم من انها حاسه انه مصدقهاش بس كانت مرتاحه شويه..قررت عشق انها تنزل تدور بجديه على شغل عشان تشغل نفسها وعشان تقدر تصرف على نفسها وجامعتها وتقدر تساعد في البيت خصوصا بعد ما حاج محمد تعب..

فضلت تنزل طول اليوم تدور على شغل وتروح اماكن كتير طالبين فيها موظفين. اما عند جاسر وتمارا فا سافروا مع بعض عشان الشغل..

تمارا....اشهد ان لا إله إلا الله

جاسر...مكنتش اعرف انك جبانه اوي كده

تمارا...واديك عرفت

جاسر...طيب مش غريبه انك اول مره تركبي طياره وتكوني خايفه بالمنظر ده

تمارا....انا فعلا اول مره اركب طياره بس انا اصلا بخاف من اي حاجه عاليه مابالك بقى حاجه عاليه بالمنظر ده... دي غلطه واحده وهنبقى احنا والارض حته واحده

جاسر...اعوذ بالله 🤨🤨ايه يابنتي الافكار السلبيه دي

تمارا....بقول ايه يا مستر جاسر خليني انا في سلبيتي وحضرتك في ايجابيتك

جاسر ..لا والله تصدقي ان انا غلطان اني حاولت اهديكي كنت سيبتك كده ميته في جلدك واقولك احنا فيها واحنا راجعين هحجز انا كرسي بعيد عن الكرسي بتاعك

تمارا....ايه النداله دي

جاسر....نعمممم🤨🤨

تمارا...🙄🙄لا مقصدش حضرتك على فكره

جاسر...لا وعلى ايه حضرتك بقى بس اقولك انا هعرفك النداله

تمارا...بثقه على فكره ما بخافش😏😏اصلا خلاص الخوف راح

جاسر...تمام هنشوف😉😉👌

تمارا...ماشي يا مستر جاسر هنشوف يلا بقى عشان عايزه ارتاح شويه

جاسر....يلا بينا مشيت تمارا خطوه لقت جاسر مسكها من كف ايدها بقوه برقت عينها وبصتله😳

جاسر...على فكره انا اسمي حلو يعني ينفع يتقال لوحده من غير مستر او حضرتك ماشي

تمارا...🤐🤐🤐

جاسر....المره الجايه مش هقولها تاني لاني قولتها كتير ومفيش فايده بس بعد كده متزعليش من اللي هعمله

تمارا...هتعمل ايه🙄

جاسر....والله انتي ورزقك معايا بقى اصل نسيت اقولك كمان ان دماغي دي اصغر من اي طفل😉

تمارا...لا وعلى ايه ماله جاسر وحش

جاسر..انا عارف😉😂😂جبانه

تمارا...اصل مقولكش عاللعب مع العيال جربته كتير😏😏

جاسر...طب يلا ياعاقله

تمارا..يلا

راحوا مع بعض عالفندق استقبلهم هادي ومكنش جاسر طايقه من نظراته لتمارا وبعد ما صمم جاسر ان الاوض يكونوا جمب بعض طلعوا اخيرا على اوضهم يرتاحو

تمارا....شكرا يامست...

جاسر..🤨🤨🤨

تمارا...يا جاسر اقصد يا جاسر 🙈🙈

جاسر...بضحك لحقتي نفسك

بقولك ايه...ادخلي ارتاحي شويه وظبطي نفسك وشويه وننزل نتغدى لاني جعان اوي وطبعا انهارده مفيش شغل فا قررت اخليها عليا واتواضع وافسحك😉

تمارا....ايه تتواضع دي طب بقولك ايه انا مش خارجه من الاوضه اصلا وهقضيها نوم وبس

جاسر.... ساعه وهعدي عليكي تكوني خلصتي 🤨🤨

واياكي اجي الاقيكي مخلصتيش

تمارا...مش هخلص😒

جاسر...ماشي هنشوف يلا اقفلي على نفسك واياكي تفتحي الباب ده غير ليا واياكي اشوفك واقفه مع هادي ولا بتكلميه مفهوم

تمارا...طيب😒

جاسر...ابتسم لها ومشي على اوضته😉

ضحكت تمارا غصب عنها ووقفت ورا الباب بعد ما قفلته وهي حاطه أيدها على قلبها وبتاخد نفس طويلللللللل

عدى يومين ولسه الوضع زي ما هو نور بتنزل جامعتها وتروح المستشفى عشق بتدور على شغل زهره في شغلها

ليل بيحاول يعمل زي ما عشق عملت انه ميفكرش بس مكنش عارف

مسك ليل موبايله واتصل على رجالته اللي سكنوا في شقه ادام بيت حاج محمد..

ليل....الوو

واحد من الجارد..ليل باشا

ليل...ايه الاخبار

الجارد...كله تمام يا باشا متقلقش

زي ما حضرتك امرت بالظبط مبينزلوش من تحت عنينا حتى الشارع بتاعهم زي ما تقول كده كشطناه عرفنا تقريبا حاجات كتير عن اللي ساكنين فيه وشوفنا كام عيل صايع كده واقفين على طول عالناصيه من غير شغل ولا اي حاجه اعدين يرازو فاللي رايح واللي جاي يعاكسوا فالبنات يتخانقوا بلطجيه من الاخر

ليل...طيب كويس اوي عينك عليهم بس بردو متغفلش عن اي حاجه بتحصل حواليك يعني متهتمش بدول وتسيب حاجه تانيه تحصل

الجارد....اطمن يا باشا احنا تلاته انا وعماد عالقهوه تحت بنراقب الشارع والمحل اللي انسه زهره شغاله فيه عنينا عالعماره

ورامز ورا انسه عشق زي ما حضرتك امرت

ليل...كويس اوي طيب بقولك ايه ملاحظتش ان العيال البلطجيه دي حد فيهم بيراقب اي حد من البنات

الجارد...لا لاحظت يا باشا بس بتبقى كلمه من بعيد كده وطبعا زي ما حضرتك قولتلنا مندخلش إلا لو كان في حاجه كبيره غير كده لا

ليل...تمام اوي عموما فتح عنيك كويس وانا هكلم رامز اطمن منه

الجارد...تمام ياباشا مع السلامه

قفل ليل واتصل على رامز

ليل...الووو

رامز...ايوه ياليل باشا

ليل...ايه الاخبار عندك يارامز

رامز...مفيش يا باشا انا وراها من بعيد زي ما حضرتك قولت هي بتروح من مكان لمكان ولما حاولت اعرف هي بتدخل فين او بتروح فين عرفت ان دي اماكن طالبه موظفين وهي بتدور على شغل

ليل...تمام فتح عينك يا رامز مش عايز اي حاجه تحصل والاهم مش عايز عشق تلمحك

رامز...تمام يا باشا

قفل ليل ورجع راسه لورا

خبط نوح عالباب ودخل

نوح...ايه سرحان في ايه

ليل...ولا حاجه تعاليى

ادم...مالك

ليل...مفيش بريح شويه ايه انتو ماشيين ولا ايه

نوح...اه انا وادم خلصنا شغل فجينا نشوفك هتمشي ولا ايه وبعدين كنت بكلم نور قالت انها رايحه المستشفى وزهره رايحالها

ليل....هتروح الوقت دي الساعه سته

نوح ...لا ما هي لسه هتمشي الوقت من الجامعه ورايحه على هناك وبعدين هي كان عندها محاضرات كتير ومراحتش قولتلها تروح بكره بس هي مش قادره فقولت اروح ابص عليه انا وادم ونبقى نروحهم

ليل...تمام يا حنين عموما انا لسه ورايا كذا حاجه وتقريبا مش هعرف اروح انهرده

ادم....لو عايزني معاك هفضل

ليل...لا لا روح

نوح...اشطا نقوم احنا بقى عشان منتأخرش

ليل...ماشي ياعم 🤨

نوح..😉😉😉😉

خرجوا نوح وادم واتصل ليل بعشق

عشق...الوو

ليل....ازيك يا عشق

عشق...بخير حضرتك

ليل...انا اسمي ليل وتقدري تقوليلي ليل

عشق...حاضر

ليل...انتي فين

عشق...انا كنت بشوف شغل وخلاص هركب واروح

ليل...ولقيتي

عشق...بخيبه امل بس حبت انها تداريها كرامتها وجعتها..اه الحمد لله وتقريبا كده هستلم من بكره

ليل...تقريبا!!!مش عارفه اذا كنتي هتستلمي ولا لا

عشق...لا مقصدش اقصد ان من بكره هستلم

ليل...طيب عندك مانع اني اشوفك الوقت

عشق...الوقت؟؟

ليل.. ايه في مشكله

عشق...لا بس يعني عشان الوقت متأخر

ليل.. لسه الساعه هتيجي على سته مش متأخر ولا حاجه وعموما انا مش هأخرك

عشق...طيب اشوفك ازاي

ليل....ابعتيلي اللوكيشن بتاعك وانا على طول هبقى عندك

عشق...طيب تمام

قفلت معاه عشق وبعتتله اللوكيشن نزل ليل من الشركه واتحرك عليها واتصل برامز وهو في الطريق

رامز...ايوه يا باشا في حاجه

ليل...بقولك يا رامز انا جاي الوقت لعشق اول ما اجي وتتأكد انها بقت معايا تروح عالخان على طول تخليك مع عماد وشريف عينكم عالبيت والشارع وكل تفصيله

رامز...تمام يا باشا

ليل...سلام

بعد مده بسيطه وصل ليل عند عشق ورامز مشي عالخان

ليل...ازيك يا عشق

عشق...بخير الحمد لله

ليل..اركبي

اترددت شويه عشق باحراج بس بمجرد ما بصت في عينه ركبت وهي طايره من الفرحه ان هو اللي كلمها وطلب يشوفها.

ليل...تحبي تروحي مكان معين ولا اروح انا

عشق...هو ينفع منروحش ونفضل فالعربيه عشان منضيعش وقت

ليل...اللي يريحك طبعا مشي بيها شويه وركن العربيه في مكان هادي نوعآ ما

عشق...خير حضرتك طلبتني ليه

ليل....انا موافق يا عشق انك تشتغلي معايا انتي والبنات

بصتله عشق بأستغراب وردت عليه بكل ثقه موافق؟؟؟بس انا مطلبتش اصلا اني اشتغل مع حضرتك ولا عايزه

ليل..😳

• تابع الفصل التالي عبر الرابط: "رواية مابين الحلم والحقيقة" اضغط على أسم الرواية