رواية تبنيتها ولكن أحببتها الفصل الواحد والعشرون 21 بقلم منة الله وائل

   رواية تبنيتها ولكن أحببتها الفصل الواحد والعشرون بقلم منة الله وائل

رواية تبنيتها ولكن أحببتها الفصل الواحد والعشرون

كانت تستمع له ولكن ذهنها يفكر في اشياء أخرى، كانت لا تستطيع الصمود اكثر من ذلك لم نشعر بشئ الا انها فقدت الوعي ووقعت على الأرض

السيد چو بصراخ :

فيفي بنتي الحقونيييي، ميس ماااااااااري

جاء الجميع على صوته وهو يصرخ وجدوا فيفيان تسقط على الأرض و بجانبها السيد چو يحاول ايقاظها

السيده ماري بفزع :

إيه اللي حصل مسيو چو؟

السيد چو :

عرفت كل حاجه ميس ماري ودي النتيجه

السيده ماري بأمر :

هاتوها على الغرفه بسرعه، ميرت كلمي دكتور اغنيثت فورا يلا

موزموزيل ميرت باحترام :

داكور ميس ماري

السيده ماري وهي تنظر إلى فيفيان الفاقد للوعي قائله بحزن :

كان لازم تعرف مكنش ينفع تفضل ظالمه أهلها وهي ماتعرفش حاجه

           بقلمي منه وائل

**********************

           في منزل كامل

بالتحديد في غرفة بسمه، كانت تجلس على الفراش ويجلس أمامها عاصم.. 

بسمه بألم وبكاء قائله :

اااااه براحه والله رجلي بتوجعني مش قادره

كان يجلس أمامها ويضع قدمها على قدمه ويقوم بتضميم جرحها قائلا :

ماانتي لو بتسمعي الكلام ماكنش حصل كل دا، عماله تتنططي على السلم واقولك انزلي وانتي مش بتسمعي الكلام، لا وكمان بعد ما وقعتي مش عاوزه الدكتور يجي مهمله في كل حاجه

بسمه وهي تتألم :

محصلش حاجه لكل دا يعني، ااااااه براحه رجلي

ميرفت وهي تأتي بكوب لبن ساخن قائله :

انتي على طول متهوره يا بسمه هو معاه حق يلا اشربي

نظرت بسمه الي الكوب باشمئزاز ثم قالت :

يا ميمي حرام عليكي انتي عارفه كويس اني مش بحب اللبن وبعدين هو انا كنت بعمل عمليه لبن ايه اللي جيباهولي دا، دا انا وقعت ورجلي اتعورت بس مش اكتر.

ميرفت وهي تضع الكوب امام فمها قائله :

ماهو اللبن بقا هيعوض الدم اللي نزل منك يلا بقا بلاش دلع.

بسمه وهي تبعد وجهها عن الكوب قائله :

لا يا ميمي بالله عليكي انا مش بحبه.

امسك عاصم الكوب من يدها ثم قال :

هاتي اللبن دا يا ميمي وروحي لوسمحت خليهم يجهزوا اي حاجه الواحد ياكولها

نظرت له ميرفت ثم ابتسمت وغمزت بعينها وقالت :

ماشي يا حبيبي من عينيا، عم اءذنكم

نظر لها عاصم ثم ابتسم ابتسامة مكر جعلت ترجع إلى الوراء قائله :

إيه في ايه؟ مالك بتبصلي كدا ليه؟

هب عاصم واقفا ثم ابتسم وقال :

تحبي تشربي بالذوق والا اشربهولك انا؟...

بسمه وهي ترجع إلى الوراء الي ان اصطدمت بالحائط فنظرت له وقالت :

لا يا عاصم انا مش هشربه ولا انت هتشربهولي ولو سمحت بقا كفايا عشان مش قادره أقف على رجلي والله

اقترب منها عاصم ووضع يده على الحائط بجانب راسها وقال :

اممم مش هتشربي

نظر لها ثم وضع الكوب على الطاوله وقام بحملها

بسمه بصراخ ومقاومه قائله :

عاااااصم انت اتجننت نزلني، نزلني بقولك انت هتعمل ايه 

جلس على الفراش ووضعها على قدمه وقال :

يلا افتحي بوقك يلا

نظرت له وسرحت في عينيه كانت لا تشعر بشئ ولم تلاحظ انها تشرب اللبن من يده كانت لا تنتبه شئ سوي عينيه المسلطه على عينيها

ابتسم عاصم ثم قال وهو يضع الكوب جانبه قائلا بمرح :

اومال لو بتحبي بقا كنتي شربتي جاموسه بحالها والا ايه؟..

انتبهت بسمه الي كلماته ثم نظرت الي الكوب الفارغ َوضعت يدها على فمها وجدت بعض بقايا اللبن على شفتاها

بسمه بصدمه قائله :

إيه دا؟!، انا... انا شربته ازاي؟

عاصم وهو يضع قدم فوق الأخرى قائلا :

عادي زي الناس حطيتي الكوبايه على بوقك وشربتي هههههه سهله

بسمه وهي تضربه على كتفيه قائله :

يا عاصم بقا ماتهزرش انت شربتهولي ازاي

عاصم بمرح :

يابنتي انا اصلا وسيم وقمر  وعارف نفسي اي بنت تبص في عيني تدوب فيا

بسمه وهي تقوم بطرده خارج الغرفه قائله :

لا والله طب يلا بقا برا يلا امشي

عاصم وهو يرحل من الغرفه ويضحك قائلا :

هههههههههه طيب خلاص خلاص خارج اهو بس كنت عاوز اقولك حاجه

بسمه وهي تتكئ على الباب قائله :

إيه هي؟

عاصم سريعا :

بحبك

ثم تركها ورحل سريعا

، كانت تقف مصدومه لم تستطيع قول شئ، فاغلقت الباب ثم ابتسمت وقالت :

شكلي انا كمان هحبك

           بقلمي منه وائل

**********************

         عند كامل وفريده

كامل بحذر قائلا :

سيبها وهديك اللي انت عاوزه

الرجل وهو ينظر لفريده التي تصرخ بين يديه قائلا :

لا احنا خلاص خدنا اللي احنا عاوزينه، لو جيت ورانا هنموتها قدام عينك اوعي تتحرك

فريده ببكاء وصراخ قائله :

عاااااااااااااا كااامل ماتسبنيش

كامل وهو يحاول طمئنتها :

ماتخافيش يا فريده ماتخافيش

كانوا سيرحلون ولكن أوقفهم صوت ارتطام شئ بالأرض

نظروا جميعا الي مصدر صوت ولكنهم لم يجدوا كامل مكنه والمكان مظلم تماما 

قال أحدهم وهو ينظر حوله :

هو راح فين ده؟

كان سيتفوه الاخر بكلمه ولكنه وجد صديقه أحدا ما ضربه على راسه سقط مغشيا على الأرض

الرجل بقلق قائلا :

بقولك ايه انت واحد واحنا اتنين فسبنا نتكل احسن بدل مااقتلها اهي في أيدي

وأثناء ما كان يتحدث وجد صديقه الاخر يقع مغشيا عليه أثر ضربه على راسه

دي الرعب في اوصاله وشعر بالتوتر والقلق ثم قال وهو في محاوله لقتل فريده قائلا :

والله هقتلهالك لو قربت مني اهي

فريده بصراخ :

اااااااه سبني بقا حرام عليك اااااااه

كان يقف كامل ورائه وبيده اله حاده فاقترب من اءذنه وقال بصوت ارعبه :

تعرف اللي بيمد ايده على حاجة كامل عز الدين بيحصله ايه

ثم قام بضربه على راسه وسحب فريده الي صدره وقال :

ماتخافيش يا فريده انا جنبك

كانت تتشبس به وتبكي

قام كامل بأخذها الي السياره ووضعها بداخلها وقام بتغير إطار السياره سريعا وانطلق الي منزله

          بقلمي منه وائل

**********************

           في منزل الكبير

الكبير بغضب :

يعني ايه تخرچ من الدوار وانتوا ماتعرفوش حاچه ياولد المنكوب انت وهو

إحدى الغفر برعب قائلا :

َوالله يا كبير كنا في وجت الغدي ومحدش لمحها واصل وهي بتخرچ وبعدين روحيه كانت معاها طولة النهار

نظر له فتحي ثم قال بغضب شديد :

روحيه يا روحيه، انتي يابت

جاءت روحيه ووقفت أمامه وهي ترتعش من الرعب قائله :

ايوا يا كبير

فتحي بحده قائلا :

ستك كريمه فين يابت؟

روحيه وقد استشعرت انه يومها الاخير، نظرت له والدموع في عينيها ثم قالت :

معرفش يا كبير والله ماعرف يا كبير

اقترب منها ثم امسك شعرها بيده وقال بصوت اجش جعلها تنتفض من مكانها :

انطجي يا بت فين كريمه، والله لو مانطجتي لهجطع من چسمك حتت انطجي

روحيه بصراخ قائله:

عاااااا ااااااه والله يا كبير اني ماعملت حاچه سايج عليك النبي، احب على يدك يا كبير ارحمني

كان سيتفوه بالحديث ولكن اوقفه صوت عم جابر قائلا:

جالتلك ماتعرفش حاچه، ايه هتخلج مكان من عندهِا إياك

تركها فتحي ثم وقف وقال :

إيه يا چابر طلعلك حس إياك، ايه نسيت نفسك والا ايه؟

اقترب منه جابر ثم قال :

لاه مانسيتش نفسي ولا حاچه بس افتكرت حاچه أجده

فتحي باستغراب قائلا :

حاچه ايه دي؟

جابر وهو يقف أمامه قائلا :

افتكرت ولدي الصغير ولد صاحبي الله يرحمه كان بيحبني جوي جوي ومكنش جاسي إجده، كان طيب كان بيجولي يا انت بوي التاني، بس الولد ديه كبر وبجا عافي وجاسي جوي، جاي بجا جاسي على أهل بيته، وجسي كمان على بوه التاني، شوفت بجا الفرج بين التنين؟!...

كان يستمع الي حديثه ويتذكر كل شئ منذ صغره

فتحي بتحدي :

مفكرش حاچه من ديه وبعدين انت ايه دخلك في الحديت ديه ملكش صالح، وبتي اني هعرف اچبها كيف يلا كله يغور من وشي يلا

والله العظيم لهچيبك يا كريم واجتلك واغسل عاري بيدي

...........................         

روحيه وهي تفتح باب البدروم قائله :

ست نعيمه ياستي انتي صاحيه؟

نعيمه وهي تسعل بشده قائله :

كح كح ايوا يا روحيه تعالي يابتي

روحيه وهي تضع الطعام أمامها قائله وهي تلتف حولها :

اني خربت ست كريمه عند سي محمد وهما هيجدروا يلحجوا ست فريده

نعيمه بسعاده وهي تشعر بالتعب قائله :

كح كح كح، يا ماانت كريم يارب، الحمدلله يارب احف چنبيهم يارب دول غلابه

روحيه بصوت بصوت منخفض قائله :

الكبير كان هيموتني عشان يعرف مكانها فين بس عم چابر إلهي ربنا يستره لحجني وخلاه نسي الموضوع وسبنا، بس اني چايه اجولك چهزي حالك عم چابر هيخرجك من اهنه ماتخافيش

نعيمه بتعب قائله :

مفرجاش ياروحيه مفرجاش يابتي كدا كدا اني هموت بس اهم حاچه اني اطمن على بتي وحفيدتي

روحيه وهي تقبل يدها بخوف قائله:

بعد الشر عليكي ياستي انشالله اللي يكرهك، المهم دلوك كولي الوكل ديه واول ما عم چابر يجولي هچيكي طوالي يلا فوتك بعافيه ياستي

           بقلمي منه وائل

**********************

             في المدرسه

الطبيب وهو يضع الدواء في المحلول قائلا :

اتعرضت لصدمه عصبيه ودا ادي لخلل في الأعصاب يعني على حسب حالتها كدا الصدمه أثرت عليها جدا، انا ادتها منوم ينيمها للصبح عشان تريح اعصبها وبكره الصبح اول ماتصحي راقبوا ردود أفعالها واي تغير يحصل كلموني

موزموزيل ميرت بحزن قائله :

داكور مسيو اغنيثت مرسي

، مكنش يصح ان كل حاجه تتقلها مره واحده ميس ماري البنت معندهاش القدره انها تتحمل كل دا

السيده ماري بتوضيح :

الواجب علينا اننا مش نداري عنها حاجه لان احنا مهما دارينا كدا كدا هتعرف وكدا كدا هتاخد الصدمه فلازم تستوعب كل دا هي مش صغيره، تسع سنين والدها مداري وحصرها في دايره بدءت تبنيها هي بالوحش اللي هي شيفاه من وجهة نظرها، تعرفي لو كان فهمها كل حاجه اول بأول وكانوا عاشوا معاها التسع سنين دي معاها بحلوها مرها على أقل الصدمه كانت هتبقا اقل وتأثيرها مكنش هيبقا قوي كدا بس دا خطأ من والدها الرب يرحمه، المهم احنا لازم نركز الفتره دي على ردود أفعالها زي ما الدكتور قال عشان نعرف حالتها وصلت لايه

موزموزيل ميرت وهي ترفع الغطاء على فيفيان قائله :

داكور ميس ماري

رحلا الاثنتان من الغرفه وتركا الفتيات ينظران الي فيفيان النائمه بشفقه وحزن

ميشيل بحزن قائله :

يعني فريده ومشيت ومش عارفين هترجع امتا وفيفيان كمان تعبت وحالتها صعبه مش عارفه ايه بس اللي بيحصلنا دا

كرستين وهي تجلس على الفراش بيأس قائله :

بتحصل حاجات عجيبه ومش بتخطر على البال

اميره بتفكير قائله :

طب لما فريده تتصل وتسأل على فيفيان هنقولها ايه؟

ميشيل بضيق قائله :

وهو يعني انتي شايفه ان فيفيان مش هتفوق تاني خلاص

اميره بتوضيح قائله :

مش قصدي كدا يا غبيه انا اقصد ان ممكن يحصل حاجه لفيفيان لما تفوق وبالتالي ممكن ماتقدرش تكلم فريده ساعتها بقا هنعمل ايه؟!

نظروا الفتيات لبعضهم بحيره ولم يجدوا رد على سؤالها

اميره بخيبة امل :

ربنا يستر

           بقلمي منه وائل  

**********************

           في منزل كامل

كامل وهو يمسك فريده من ذرعيها ويضع چاكيته عليها قائلا :

ادخلي يا فريده تعالي

نظرت فريده الي المنزل وكان منزل غريب لم تراه من قبل، نظرت له بعينيها، وهو قد فهم ماتريد ان تقوله فقال لها بتفهم :

ايوا يا فريده دا بيت تاني غير البيت بتاع العيله، دا البيت اللي لما بحب ابعد عن الكل باجي فيه ولحد النهارده محدش يعرف حاجه عن البيت دا غير اتنين بس، انتي

ثم اخذ نفس عميق وتنهد وقال بحزن :

ومرام الله يرحمها

جلست فريده على الاريكه ثم نظرت له باستغراب وقالت :

مين مرام دي؟

جلس كامل بجانبها وقال :

مرام دي البنت اللي كنت بحبها، كنت بحبها اوي كنت دايما شايفها أجمل حاجه حصلتلي في حياتي، بس للاسف طلعت هي اسواء حاجه حصلت في حياتي

فريده بتساؤل قائله :

ليه هو حصل ايه؟

كامل وهو يقف قائلا :

لا دي حكايه طويله اوي هبقا احكيهالك بعدين، ممكن بكرا في الطريق يعني بحيث ان الطريق طويل فمش هنلاقي حاجه نعملها هحكيلك بقا، المهم دلوقتي تقومي تاخدي دش وتغيري هدومك دي وتنزلي عشان نتعشى سوا

فريده بأعتراض قائله :

لا انا مش جعانه انا محتاجه انام بس

كامل بنفي قائلا :

تؤتؤ يلا اسمعي الكلام

فريده بضيق وتذكر أطفال قائله :

يووووه بقا مش جعانه انا

كامل بأمر :

يلا قولت

فريده بحزن :

حاضر

كامل :

فريده

التفتت فريده له قائله :

نعم

كامل بابتسامه صافيه قائلا :

فين البوسه بتاعتي؟

اتسعت عين فريده ثم قالت بغضب :

إيه قلة الأدب دي

ضحك كامل بشده على طريقتها ثم قال :

 هههههههههههه دايما دماغك بتفهم غلط كدا، انا اقصد البوسه بتاعتي بابي اللي هي هنا من خدي

نظرت له فريده بضيق ثم قالت :

هو لازم يعني

كامل وهو يقف أمام الدرج قائلا :

ايوا ومفيش طلوع الا لما اخدها ها يلا

كانت تشعر بالخجل الشديد من طلبه هذا ولكن لم يكن أمامها سوي ذلك فاقتربت منه وقامت بتقبيل وجهه ثم صعدت الي أعلى سريعا ووجها يكاد ينفجر من الخجل

ضحك كامل على فعلتها تلك، ثم وضع يده على وجهه وابتسم

           بقلمي منه وائل

**********************

      في الصباح في الصعيد

كانوا يجلسون على المائده يتناولون طعام الإفطار

نظر عبد القوي الي ولده محمد ثم قال :

ماتعرفش حاچه عن بت فتحي؟

نظر له محمد بارتباك وتوتر ثم قال :

ها... واني هعرف منين بس يا بوي، هو اني بروح هناك يعني دا من يوم ما رجعت من مصر ساعة ماروحتلهم الجسم واني معرفش عنهم حاچه واصل

نظر عبد القوي له بشك ثم قال :

اه طيب وبالنسبه لموضوع بنتك، هتعمل فيه ايه؟

محمد وهو يتنهد بحزن قائلا :

معرفش يا بوي اني دماغي هتتفرتك ميت حته ماجدرش افكر في أي حاچه واصل

عبد القوي وهو في محاوله للتهوين عليه قائلا :

ماتخافش ياولدي اللي معاه ربنا مايضيعش ابدا

محمد :

َونعم بالله يا بوي

الغفير بتوتر قائلا :

اا.... ياسي محمد

محمد بتساؤل :

في ايه يا محروس؟

محروس بقلق :

ااا.... ال....

عبد القوي بغضب قائلا :

ماتنطج ياولد الفرطوس انت في ايه؟

وعندما كان سيتفوه بكلمه وجدوا فتحي يدخل الدوار وعلى وجهه علامات الغضب نظر لهم بحده ثم قال :

فين بتي يا عبد الجوي؟

وقف عبد القوي ثم قال بهدوء :

نورت الدوار ياعمده بس ماجولتلناش ليه على الزياره المفاجاءه كنا عملنا الواچب

فتحي بغضب وهو ينظر لمحمد قائلا :

لا واچب ولا غيره يا عبد الجوي، اني عاوز بتي

عبد القوي بتساؤل :

بتك؟، هي مش في بيتك المفروض اني اللي أسألك هي فين؟

فتحي بنفاذ صبر قائلا :

بجولك ايه ياعبد الجوي اني ماطايجش روحي انطج وجول البت فين اني عارف انها اهنه، يا كريمه يا كريمه انتي يابت

امسكه محمد من ذراعه وقال :

انت اتچننت والا ايه ياعمده البيت له حرمته وانت عمال تتحرك فيه وكانها الزريبه حداكم

امسكه فتحي من وجهه وقال :

مش لما تبجا تعمل احترام وتراعي حرمة بيتي الاول ابجا اراعي حرمة بيتك يابن عبد الجوي

عبد القوي بغضب قائلا :

محدش جرب من حريمك يا فتحي روح شوف بتك فين ملناش صالح باللي بيوحصل بيناتكم

ترك فتحي محمد ثم نظر الي عبد القوي وقال:

ماشي يا عبد الجوي اني ماشي، بس لو عرفت ان ابنك له يد في الموضوع ابجا چهز كفنه عشان هيحصل چده

ثم تركهم ورحل

نظر عبدالقوي الي ولده ثن قال بحده :

لو عرفت ان ليك يد بالموضوع اني اللي هوديها بيدي لحد ابوها اني مش مستغني عنِك

محمد بقلق لنفسه :

ربنا يستر

           بقلمي منه وائل

**********************

 في منزل كامل (منزل العائله)

ميرفت بغضب :

شوفتي ابن عمك بعد كل اللي عملناه امبارح وفضلنا مستنينوا وفي الاخر مجاش لا وايه اتصل عليه كمان يقولي انا مسافر يا أمي شايفه عمايله

بسمه وهي تتناول الإفطار قائله :

وهو يعني اول مره يعملها ماهو على طول كدا

ميرفت وهي تجلس على المائده قائله :

اموت واعرف المكان اللي على طول بيروحلوا دا المفروض انتي أقرب حد ليه تكوني عارفه

بسمه وهي تأكل قائله :

وحياتك مااعرفه ولا عندي فكره عنه اساسا

ميرفت بغضب :

وانتي هتعرفي ازاي وانتي كل تفكيرك في الأكل وبس

تن تن

عاصم بابتسامه قائلا :

صباح الخير على الجميع، ايه دا  مالكم مبوزين على الصبح ليه كدا؟

ميرفت :تعالي ياعاصم شوف صاحبك دا اللي معندهوش دم يعني ايه نستناه امبارح وفي الاخر مايجيش واتصل عليه قال ايه مسافر ومش راضي يقول مسافر فين

عاصم وهو يجلس بجانب بسمه ويأكل قائلا :

َوهو جديد عليكي يا ميمي ماهو على طول كدا يعني فكك منه تعالي يلا كولي دا الفطار يجنن مش كدا يا بوسي؟

بسمه وهي تنظر له وتاكل مثله قائله :

اه جدا

نظرت لهم ميرفت باشمئزاز وغضب ثم قالت :

داتكم ستين نيله أنتوا الاتنين همكم على بطنكم داتكم القرف

ربنت يصبرني على مابالاني

           بقلمي منه وائل

**********************

            في المدرسه

فتحت عينيها ونظرت الي سقف الغرفه كانت تحاول تجميع شتات رؤيتها بوضوح، ثم حاولت الاعتدال في جلستها وجدت الفتيات يستعدون ليومهم الدراسي ويرتدون ملابسهم

ميشيل وقد لاحظت استيقاظها قائله بسعاده :

فيفيان صحيت يا بنات

نظروا الفتيات جميعا اليها ثم ذهبوا لها وهم يهللون بسعاده ومرح احتفالا باستيقاظها

كرستين بسعاده قائله :

حمدالله على سلامتك يا فيفي كدا خضتينا عليكي

اميره بتساؤل :

عامله ايه دلوقتي يا فيفي طمنينا عليكي

كانت تنظر لهم فقط وتوزع نظراتها عليهم ولم تتفوه بكلمه

ميشيل باستغراب :

هي مش بترد علينا ليه؟

إحدى الفتيات اقتربت منها وقالت :

فيفيان انتي ساكته ليه؟

نظره لها ولم تتحدث أيضا

اميره :

دا احنا شكلنا داخلين على ايام سوده

          بقلمي منه وائل

**********************

          في سياره كامل

كامل :

وبس ياستي دي حكاية مرام كلها

فريده باندهاش:

ياااااا معقوله في كدا، هو ممكن حد ياذي حد بيحبه؟

كامل بتوضيح :

مااسمهاش كدا يا ديده، اسمها ممكن حد ياذي حد كان بيدعي انه بيحبه او كان متخيل انه بيحبه بس طلع بيحب الفلوس اكتر منه، فالاجابه هنا اه، ناس كتير تقدر تضحي بأغلى ناس على قلبهم عشان خاطر الفلوس وممكن كمان توصل للقتل، على العموم ياستي دي حكايه قديمه وراحت لحالها وخلاص يعني انا مبقتش افكر في الحب والكلام الفارغ دا

نظرت له فريده ثم قالت :

الحب عمره ما كان كلام فارغ، احنا بس اللي بنختار غلط يا كامل، هو صحيح انا عمري ماجربت شعور الحب دا في حياتي بس متأكده انه حلو اوي بس لو اخترنا صح، وعلى راي الست ام كلثوم

ياللي ظلمتوا الحب وقولتوا عليه مش عارف ايه، يا العيب فيكوا يا في حبايبكم

ضحك كامل على طريقتها وهي تغني ثم اكمل معاها الغناء وسرحوا كثيرا ولم يلاحظ كامل تلك العربه كبيرة الحجم التي اقتربت منهم

فريده بانتباه وهي تصرخ :

حاسب يا كااامل عاااااااااااااا

يتبع الفصل الثاني والعشرون اضغط هنا

• الفهرس يحتوي على جميع فصول الرواية كاملة :"رواية تبنيتها ولكن أحببتها" اضغط على اسم الرواية