رواية المهندسة نور البارت الأول 1 بقلم وفاء الغرباوي
رواية المهندسة نور الفصل الأول 1
وأنتى بقا اللى بيقولوا عليك المهندس نور؟
اكتر من ساعة وانا بسأل فى المكان واقول المهندس نور المهندس نور وساعة ماالاقيك تطلعى ست.
رفعت حاجبيها وربعت ايديها وهى بتاكل فى نفسها،اصطبحنا وصبح الملك لله، يافتاح يا عليم يا رزاق يا كريم
انا اصبحت بوش مين النهاردة ؟
نور بتتكلم وهى ايديها على بوقها ورافعة راسها وبتفكر
دى أكيد ست زغلولة دى عنيها انا عارفاها
واتكلمت بصوت عالى
الصبر يا زغلول لما ارجعلك
الراجل متابع حركاتها سمعها واتكلم وسالها
زغلول مين؟
_لا ياحج متاخدش فى بالك دى جارتنا وبعدين انت....
ووقف الكلام على لسانها لان نور مبتحبش حد يغلط فيها ولا يغلطها فى تصرف..
_خير أمر ياحج بتسأل على الست ليه اللى هو انا المهندس نور تحت امرك
بس اتفضل اقعد حضرتك ارتاح الاول ..تشرب أى ؟
وبنفس حدته اتكلم وزعق
لا معلش انا مبتعاملش مع ستات اناعايز راجل اتكلم معاه
الستات مكانها البيت مش هنا ..هنا مكان شغل وبس
مش على اخر الزمن شغلى يقف عشان ست واسمها
برقت نور بعنيها جامد اوى ، والراجل مشكور سكت
يعنى الله اعلم لو اتكلم كان حصله أى
فكت نور ايدها ولفت حوالين المكتب وقعدت وابتسامة صفرا على وشها وردت بهدوء
_معاك حق والله ياحج احنا مالناش غير قعدة البيت بلا شغل بلا ممرمطة خدنا أى من التعليم والشغل واهو فى الاخر بعد التعب دا كله مش عجبين
يعنى اهالينا يعلمونا ويدفعوا دم قلبهم ونشتغل عشان نحاول نرد جزء من تعبهم لينا وبردوا مش عاجبين
وفى الاخر يجى بن الحلال ياخدنا احنا والشغل ولا كانهم ربوا ولا كبروا ولا علموا.
قعد الراجل يبص لها وافتكر كلام العامل عنده لما راحت الموقع وازاى كانت شديدة وبتامر وتنهى وسابتهم يضربوا كف على كف ومرتضتش تخلص رخصة العمارة وجه هنا لقى واحدة ست كلامها مختلف تماما..
_روحت فين ياحج بكلمك ..الكلام خدنا مقولتش تشرب أى
_عايز قهوة مظبوط
رفعت نور السماعة وطلبت البوفيه واتكلمت بحذر وشدة
_هاتلى ٢ قهوة واحدة مضبوط والتانية سادة وقفلت الخط
الراجل لسه محتار فيها منين بتكلمه بالهدوء دا ومنين جامدة كده.. وفجأة سألها
_والداك فين
استغربت نور السؤال، او يمكن مبتحبش سيرة والدها تيجى وضحكت
_ هتقول لبابا اللى انت محتاجة فى الشغل وهو يبلغنا
ولا هتشتكيله منى..
انقلبت لهجتها لرسمية وجافة
حضرتك لو عندك سوال يخص الشغل اتفضل اسأل وانا هجاوبك غير كده انا اسفة
مقولت عايز راجل اتكلم معاه
_والله يا حج احنا ٣ ستات مهندسات فى المكتب زى ماحضرتك شايف ممعناش راجل لما يعينوا راجل هابقى ابلغك ان شاءالله
وبدات تقلب نور فى الورق قدامها وتمضى وتراجع
والراجل عمال يبص لها ونفسه يولع فيها
وقام وقف وخبط بايده جامد على المكتب ..بس نور الخبطة مهزتش فيها شعرة ، رفعت وشها بهدوء وبصت له وقامت وقفت بس قبل ما تتكلم
جه عامل البوفيه ودخل حط القهوة من سكات وقبل ما يخرج كانت المفاجأة
- تابع الفصل التالي عبر الرابط: "رواية المهندسة نور" اضغط على أسم الرواية