رواية الاعمي الجزء الثاني 2 الفصل الخامس بقلم ليلة عادل
رواية الاعمي الجزء الثاني 2 الفصل الخامس
-فندق انجلترا 6م
- اللوبى - يجلس على احد الترابيزات كل من مروان ومنير وزوجته لبنى فى لوبى الفندق منتظرين اميره بعد قليل تدخل عليهم اميره.
اميره : مساء الخير اسفة على التاخير
لبنى : انت بقى اميره
اميره : وحضرتك اكيد مدام لبنى . ... تمد ايدها وتسلم عليها
لبنى : لا احنا لازم نحضن القمر ده ... تقوم تقف تاخذ اميره بحضنها تنظر لمروان ... زى القمر يا مروان
اميره : شكرا انتى اللى قمر ازاى وفقتى
لبنى : نصيب
اميره : بمزاح ... ههههههههههه معلش تخليص ذنوب
منير : يا ماشاء الله الحلة لقت غطاها
اميره : تنظر لمنير تشاور باديها على مروان .... زى ما انت وهو عاملين فيها رميو وجوليت
مروان : يقف ... ههههه طب يلا يا جوليت عشان منتاخرش
منير : يقف. .... يلا حبيبى
لبنى : والله يا مرمر انا شكه فيهم من ايام كليه
اميره : ايوا هما علاقتهم مريبه اساسا هههههههههههههههه
مروان : طب يلا يا مريبه
اميره: يلا تتحرك اميره من امامه
مروان : باستغراب .... ايه ده
اميره : ما انت فتحت خلاص
مروان : بمزح ...مافيش كلام ده انا مابشفش اهو ... يقوم بملامسة وجهها
اميره : بس بس مدام لبنى بصه علينا
مروان: ما تبص انا راجل اعمى
اميره: هههههههههه طب خلاص بس هات ايدك
مروان : ايوا كدا اوعى تسيبى ايدى ابدا
اميره : المهم انت اللى متسبهاش
مروان : مقدرش بس ايه الحلاوه دى
اميره : بجد يعنى طلعت حلوه زى ما كنت متخيلنى
مروان : احلى كمان
اميره : طب يلا عشان منير هيولع فينا
- احد مطاعم السمك فى انجلترا 7م
- يجلس مروان بجوار اميره على احد الترابيزات ومعهم منير ولبنى .
مروان: هاكلكم شويه سمك هاتشكرونى بعدها
اميره : انا عايزه فليه
مروان : ليه اللى انا طلبته حلوه هيعجبك
اميره : معلش انا عايزه اكل فيليه
لبنى : متجبلها اللى هى عايزه
منير : انتى مالك خليكى معايا
مروان : سيبها براحتها يا منير انا بس يا لبنى عايزها تدوق السمك بجد هيعجبها ،... ينظر لاميرة ... بصى جربى لو مش عجبك هطلبلك اللى عايزه تمام
اميره : طيب
- بعد قليل يدخل الجرسون معه السمك بعد ان يضعه على الترابيزه يبدء الجميع بتناوله، لكن اميره كانت تشاهدهم فقط بعد قليل تبدء ان تاكل رز وسلاطه ، ولكن كان مروان يلاحظها فايميل عليها بصوت منحفض .
مروان :ما بتحبيش السمك
اميره : بالعكس بعشقه
مروان : طب خد دى من ايدى ياكلها بايده
اميره : طعمها حلو اوى
مروان : طب يلا كلى
اميره .: اصل ااا
مروان : ايه
اميره : ما بحبش اكل سمك بره البيت
مروان : اشمعنا
اميره : عادى محبش
مروان : هههههه ما بتعرفيش تنضفى السمك
اميره : بصراحه اه
مروان : بس كدا تؤمرى ..ياخذ احد الاسماك ويبداء بتنضيفها لها ويضعها فى طبقها
اميره : تبتسم.... عارف بابا اللى كان بيقوم بالمهمه دى ماما كانت بتفضل تقوله دلعها دلعها ...كفايه دول كل انت بقى
مروان : ببتسامه .. ربنا يخليهولك . ها افتحى بوقك
اميره : امممم تسلم يدك
لبنى : شايف بيعمل معها ايه
منير : بسخريه .. طب هى مابتعرفش تفصص لنفسها وماكلتش ، انتى بقى دى رابع سمكة تاكليها
لبنى : ماشى يا منير يلا حظوظ
اميره : حسد ده
لبنى : مقدرش ربنا يسعدكم ، ايوه كدا مروان اخيرا شفتلك واحده لذيذه ، انت كل اختيارتك كانت شمال
اميره : ههههه ايه ده هى مش ماجى بس
لبنى : بس بس انتى متعرفيش حاجه
اميره : لاء عرفينى
مروان : طب متسالينى انا
اميره : ما انت هتكدب
مروان : كدا
اميره : ايوا
مروان : انتى ديما ظلمانى يا ظالمه
اميره : مش عجبك
مروان : ونعمه عجبنى انا اقدر
لبنى : هبقى احكيلك بالليل لما نروح
اميره : قشطات
- سيارة مروان 10م
- تجلس اميره ومروان فى الكنبه الخلفيه فى العربيه تمسك اميره هاتفها وتتصفح الفيس ، وتسند راسها على كتف مروان ، ولكن وهى تقلب ترى صوره ثلاجه ممتلئ بشكولاته ، تنظر لها بحب لكن مروان لم يصدر اى اهتمام ، و عند وصولهم .
مروان : ما تتاخريش بكره
اميره : حاضر ميرسى على السمك
مروان : خدى بالك من نفسك تصبحى على خير متنسيش القواعد
اميره: هههه حاضر وانت بالف خير
- شقه اميره بنجلترا 12م
- تستيقظ اميره من النوم ، وعند فتح اميره باب غرفتها فجأة ، يقع عليها الكثير جدا من الشكولاته ، تنظر مصدومه ثم يظهر مروان.
اميره : مصدومه ايه ده ايه ده
مروان :ههههههه ايه رايك
اميره : ههههه انت هنا ازاى ، وايه ده
مروان: بمزاح نطيت من الشباك
اميره: بطل هزار ايه كميه شكولاته دى ، انت سرقه المصنع
مروان : لسه تعالى
اميره : لسه مخلصناش
مروان: ايوا تعالى
(ياخذها عند باب الثلاجه)
مروان : افتحى
اميره : تنظر لها.. اممم ماشى .. تفتح باب الثلاجه تتفاجئ بان الثلاجه ممتلئ بجميع انواع الشكولاته والبيبسى ونوتيلا تقف مصدومه .
اميره : ايه الجمال ده ، لا بجد انا عايزه اخدها فى حضنى عملت كل ده امتى حلوه اوى ....تحضن اميره مروان . .. بجد شكرا يالهوى على الجمال جميله اوى اول مره يحصلى كدا....كان اثناء حديث اميره ينظر لها مروان بحب وسعاده.
اميره : امسك .. تعطيه هاتفها .. صورنى جنبها
مروان : تعالى .. بعد التقاط الصورلها بجانب الثلاجه ، تذهب اليه ..
اميره .. يلا سلفى بقى
مروان : يلا
يقوم مروان باخذ عدد من الصور لهم ، هما ينظرون لبعض بحب واخرى وهم ينظرون للكاميرا سلفى
- البلكونه 2م
بعد التقاط الصور يذهبوا للبلكونه ويجلسوا على المرجيحه واميره بتاكل نوتيلا ومروان بجانبها .
اميره : حلو اوى تاخد حتة
مروان : تو كفايه اللى اكلتو
اميره :لالا خدى دى افتح بوقك .. تاكله معلق نوتيلا فى بوقه
مروان : خلاص كفايه وهاتى دى كفايه انتى كمان ..يخذها منها .
اميره : لا هات ...تاخذها منه
مروان : ادمان ده
اميره : اممم انا بعشقها ، قولى بقى ازاى عملت كدا ، دخلت ازاى اصلا
مروان : مافيش روحت لديفيد قولتله عايز اعمل مفاجأه لحبيبتى عايز نسخه للمفتاح ادانى
اميره : بسهوله كدا
مروان : اه
اميره : اى حد يقوله كدا يديلو المفتاح
مروان :ما هو شفنى معاكى كتير
اميره : انا محستش بيك ازاى
مروان : كنا بنعمل كل حاجه بهدوء بس المهم تكون عجبتك
اميره : طبعا ونبى اعملها كتير
مروان : بس كدا بسيطه
اميره : عارف لسه شايفه صوره بص هوريهالك ...تخرج هاتفها من جيب بنطلون وتطلعه على الصوره ثلاجه ممتلى بشكولاته.عايزه اقولك اول ما شفتها امبارح ، خطفت قلبى ، سبحانه الله النهارده الاقيك عاملى المفاجأه الجامدة دى
مروان : يابنتى انتى بنت حلال
اميره : مروان انت شفت الصوره
مروان : ايه
اميره : شفت الصوره
مروان : مين
اميره : ههههه بحببببك ...تبوسه من خده... قلبى يا ناس والله ، بقولك ايه
مروان :نعم يا قلبى
اميره : انت لما نرجع على طول هتكلم بابا ولا نستنى شويه
مروان : زى ماتحبى
اميره : اكلمهم الاول افضل
مروان : ماشى يا حبيبى
اميره : تحب الفرح يبقى فين
مروان : اى مكان
اميره : لا قولى مثل
مروان : سبيها لوقتها لسه بدرى لما نرجع خلينا هنا ننبسط وبس
اميره : بضيق .... اممم ماشى
- جامعه القاهره 3م
- تنزل شيرين من سيارتها امام مبنى كليه الآداب، وتخلع نظارتها تسرح وتتذكر شئ ، فتبتسم وتدخل الى المبنى ، تقف امام باب العميد ، تطرق الباب وتدخل ، يقوم العميد باستقبالها .
العميد : د كتوره شرين قدرى نورتى المكتب ومصر كلها
شرين : تجلس .. شكرا يا دكتور
العميد : اخبار مصر ايه اكيد وحشتك
شرين : جدا والجامعه كمان وحشتنى متغيرتش ، كأنى لسه سيبها مبارح
العميد : ايدك معانا ونغيرها ونطورها سوى
شرين : بحسم .. طبعا
- شقه اميره انجلترا 6م
- مازالت تجلس اميره فى البلكونه على المرجيه تمسك هاتفها، تتصفح الفيس ، يدخل عليها مروان ، حامل صنيه بها كوبايات شاى ، و يضع الصنيه على الترابيزه المجاوره لها ، ويقترب منها ويزقها ، تبتسم وهى تنظر للشاشه و يبدء بالتحدث معها.
مروان : بتعملى ايه
اميره : بتفرج على صور بص حلو اوى بس قولى رايك دى ولا دى احلى
مروان : دى جميله بس بلاش تنزليهم
اميره :امال انا متصوراهم ليه
مروان :عشان تغيظيهم طبعا
اميره :ههههههههه طبعا مره من نفسى بقى
مروان :ايوا غيظيهم من هنا وبكره فى الرعايه
اميره : لا منا كتبت ماشاء الله فى عينكم
مروان: بمزاح... انا مش هتكلم اتفضلى الشاى
اميره : لا مرجحنى تانى
مروان : والله طب اهو .. يزقها جامد ويوقعها
اميره :هههههه ليه كدا بس هزار البوابين ده هات ايدك ...تمسك ايده وتحاول تشده عشان توقعه
مروان : باستغراب .. بتعملى ايه
اميره :عايزه اوقعك وقع نفسك بقى
مروان : يوقع نفسه بجانبها ... ااااه مفتريه انتى ههههههههه
اميره :هههههههههه جدا على فكره
يضحكون سويا ثم يضع يده على كتفها يقربها من حضنه .
عياده د / خالد 8 م
- يظهر دكتور خالد هو يكشف على احدى المرضى سيده تبدو فى الستينات، اثناء الكشف .
خالد : لا ماشاء الله على الجرح ، بقيتى زى الفل ثم يذهب اللى المكتب ويجلس على كرسيه والمريضه خلفه، ثم تجلس على الكرسى الذى امامه.
خالد : كدا الجرح لم وكله بقى تمام
المريضه : يعنى نمشى على نفس العالج
خالد :لا هكتبلك على شويه كريمات تانيه كويسه
المريضه : تمام
(تطرق الممرضه الباب )
الممرضه : دكتور فى واحد اسمه ادهم برا
خالد :خليه يتفضل ...ثم ينظر للمريضه .... على معادنا كمان اسبوعين ان شاء الله
المريضه : ان شاء الله
- انثاء دخول ادهم يتقابل هو والمريضه عند الباب ، فتنظر له وتبتسم كانها تعرفه مع نظرات استغراب من ادهم ، فيدخل.
ادهم : اتاخرت عليك
خالد : فى معادك مظبوط
- شقه اميره انجلترا 8م
- مروان يجلس على كنبه امام التلفزيون يشاهد فيلم كرتون نيمو ، وعيونه بها دموع وتدخل عليه اميره و تجلس بجانبه فتنظر له تبدء بالتحدث .
اميره : تعبت عقبال مالميت كل الشكولاته
مروان : منا قولتك اساعدك مراضتيش
اميره : الدكتور قالك ماتوطيش ولا تعمل مجهود بستغراب تنظر له ... ايه مالك
مروان :لا مافيش
اميره : بخوف .. مدمع ليه عينك وجعتك
مروان : لالا خالص
اميره : تنظر للتلفزيون ... ايه ده ههههههههههه انت زعلان عشان نيمو يا روحى انت طلعت زميل
مروان : بتتريقى يا عديمه الاحساس
اميره : ههههههه والله لا انا بسيح اكتر منك كأن حد متلى
مروان : طب كويس عشان مطلعش معيط لوحدى من السينما
اميره : لا تقلق بقولك بص ايه رأيك....
تقترب منه تسند راسها على صدره يلف ايدو حولين رقبتها ثم تطلعه على صوره فيلا على هاتفها .
مروان : جميله
اميره : ولا دى
مروان :لاء الاولى احلى
اميره : انا بردو عجبتنى الاولانيه انت اصلا حابب نقعد فى الفيلا ولا الشقه
مروان :اللى يعجبك
اميره: مش عارفه محتاره
مروان : سبيها لوقتها
اميره : تنظر له.. ازاى يعنى مافيش وقت التجهيزات بتاخد وقت ولا ايه رايك نتجوز نقعد بشقتك ونجهز الفيلا واحنا متجوزين
مروان :حلوه الفكره دى انتى اصلاً صاحبه فكرة الشقه
اميره : مش حلوه
مروان: اى حاجه منك حلوه
اميره : خلاص متفقين انا هبعت احجزها
مروان :بس يا حبيبى لسه بدرى اوى
اميره : تعدل نفسها تنظر له ... انت شايف كدا
مروان : ايوا
اميره : اوك ..تقوم بمسح الصور
مروان : ليه عملتى كدا
اميره : اصل لسه بدرى لما ييجي وقتها هروح اعمل قهوه تقوم وتذهب للمطبخ ويذهب خلفها
مروان : اميره افهمى حاجات الجواز دى بتشغل الدماغ مش عايزك تنشغلى بيها من دلوقت لما نرجع اعملى اللى عايزاه
اميره : بضيق.. وانا قولتك تمام
مروان : مافيش فايدة
(تتركه وتخرج ويقف مروان مضايق)
(بعد يومين)
-فندق انجلترا 7م
تجلس اميره على رواف الفندق على احد الترابيزات امام حمام السباحه تنتظر مروان وتستمع الى اغانى يبدو على ملامحها الضيق ثم يدخل عليها مروان.
مروان : مستنتنيش ليه نطلع سوى
اميره :عادى
مروان : يجلس .. بتسمعي ايه
اميره: هسمعهالك ( تشغل لاغنيه ) (خد بالك عليا دي مش معامله تعاملني بيها وإبقا إفتكر لياأيام تعبت عشانك فيها ياريتك بس تفهمني وماتستهونش بوحده تبقى مجروحة ومابتبينش ده الوحده قد متضحي وتستحملول ما بتفكر تنسى ما بتستأزنش
مروان : اممممم عملت ايه لكل ده عشان بقولك نستنى لما نرجع عقلك صغير اوى
اميره : لا عشان كل ماقولك على حاجه تخص جوزنا تقولى بعدين
مروان : ايوا ننزل مصر نتكلم فى كل شئ بلاش نوجع دماغنا هنا
اميره : بنرفزه واستغراب... جوازك منى وجع دماغ
مروان : بقول حاجات الفرح القاعه البيت الكلام ده افهمى صح
اميره : بدات احس انك مش عايز نتجوز اصلا
مروان : يخبط كف على كف... لا اله الا الله انا بردو بقوول اميره تعقل مستحيل
اميره : مابهزرش على فكره
مروان : طب ممكن شويه عقل بقى عشان انا ايدى طويله
اميره : فكر عشان انزلك على ظهرك من هنا
مروان : اهون عليكى
اميره : جدا
مروان: بحبك يا مجنونه
اميره : وانا مش بحبك
مروان : كدابه اوى
اميره : رخم اويييييييي
- شقه اميره انجلترا 10ص
- غرفه النوم
- تنام اميره على السرير ، ويطرق احد الباب مره ثانية والجرس الباب تبدء اميره فى الاستيقاظ وتذهب وتفتح الباب وهى مش مركزه عند فتح الباب تتفاجأ بمروان ويحمل معه بوكيه وورد احمرواكياس.
مروان : كل ده نوم
اميره : بنوم .. هى الساعه كم
مروان : 10
اميره :10 مش لسه بدرى
مروان : طب ممكن ادخل
اميره : اتفضل
مروان : اتفضلى يعطيها الورد
اميره: شكرا تاخذ منه وتضعه على الكنبه ... اخدت انت انك تدخل بالمفتاح
مروان : انا دخلت من البوابه بس انتى اضايقتى
اميره : لاء
مروان : ممكن بقى تقعدى هنا لحد محضرلنا الفطار
أميره : انت لسه مافطرتش
مروان : وخلال قيامه باخراج العلب الطعام من الاكياس يتحدث معها ..لاء
اميره : ليه
مروان : عايز نفطر سوى زى كل يوم
اميره : متاخدش على كدا
مروان : انا اخدت خلاص يلا امسكى .. يعطيها ساندوتش
اميره : تمسكه منه ثم تضعه على الترابيزه ... شكرا هعمل شاى عشان اكل بيه
مروان : خليكى هعملك انا
اميره : لا هعمل انا وهعملك القهوه
- تدخل المطبخ وتقف اميره امام البوتاجاز و تقوم بعمل القهوة ، يدخل مروان ويقف خلفها ويخرج علبة من جيبة ويضعها على رخامه المجاورها لها .
اميره : تنظر بستغراب وهى تقف بظهرها تتحدث ..... ايه ده
مروان : افتحيها
اميره : تمسك العلبه وتفتحه تجد خاتم وتضعه مكانه مره اخرى ... جميل
مروان : ... بستغراب... بس كدا
اميره : جايبه لمين ؟
مروان : بستغراب ....جايبه لمين !! ، ازاى يعنى ، هو انتى مش ملاحظه حاجه
اميره: وهى تصب القهوة فى الفنجان .... لاء
مروان : ان ده مش خاتم عادى ، ده خاتم جواز
اميره : تلف وجهها له بسخريه ... جواز، هتتجوز مين
مروان : يعنى مش عارفه
اميره : تدير وجهه عنه مره خره .... هعرف منين
مروان : طب يا ستى تتجوزينى
اميره : تصمت قليل ... لاء
مروان : بصدمه ... ايه
اميره : بحسم تلتفت بجسمها له .... لاء مش موافقه .... تعطى له فنجان القهوة ثم تاخذ كوبايه شاى وتخرج خارج المطبخ وتذهب الى الرسبشن -يقف مروان مصدوم ، ثم يضع الفنجان على الرخامه المطبخ يخرج خلفها.
- الراسبشن /
- تجلس اميره على كنبه فى الرسبشن تشرب الشاى وتتناول السندوتش ، وتشاهد التلفزيون ،يخرج مروان متضايق يقف بقرب منها ينظر لها بصمت واستغراب لعدم اهتمامها بعد قليل يتحدث .
مروان : هو فى ايه
اميره : تنظرله .. فى ايه على ايه
مروان : (ينظر لها دون تحدث )
اميره : لسه بدرى اما نرجع نبقى نتكلم
مروان : مش هو ده اللى انت عايزاه
اميره : تقف وبغضب مشاوره باصبعها على صدره .. بظبط هو ده اللى انا عايزاه مش اللى انت عايزه
مروان : يعنى ايه
اميره : يعنى لما انت تبقى تعوزه ، وقتها ابقى افكر ، غير كدا ، الموضوع منتهى
مروان : هى قلة العقل بتاعتك دى امتى هتنتهى
اميره : بنرفزه ... مش هتنتهى وانا كدا و مش هتغير عجبك ولا لاء
مروان : اميره وطى صوتك وبطلى اسلوبك الاستفزازى ده
اميره : مش هوطى صوتى وبراحتى شقتى وانا حره فيها لو مش عجبك اتفضل
مروان : بحسم .. اميره قولت بس
اميره: لو مش بسيت هتعمل ايه
مروان : استغفر الله العظيم ، انا مش فاهم انتى بتعملى ليه كدا ، فهمينى انا غلط فى ايه ، انا مجرد ما حسيت انى زعلتك اتخنقت من نفسى ، ودينى جتلك وبعتذر ، وبنفذ كل شى انتى عايزه
اميره : بظبط اللى انا عايزاه مش اللى انت عايزه ، انت مش عايز تتجوزنى
مروان : ازاى يعنى انا مش عايز اتجوزك انتى مجنونه
اميره : بسخريه ونرفزه ... اه كل شويه لما نرجع نتكلم ، حتى فى مستقبلنا لما نرجع ، انت محسسنى انك بتعمل كدا شفقة
مروان :بستغراب ... ايه اللى انتى بتقوليه ده انتى يا بنتى بتفكرى ازاى ، فهمينى
اميره : زى البشر الطبيعين
مروان : واضح فعلا ، يمسك ايدها برومانسية وهدوء ... اميره من فضلك اهدى ، انا غلطان حقك عليا ، والله انا مابقصدش ازعلك ، بس ما تبقيش حساسه بزياده كدا ، انا مقصدش اللى فهمتيه انا عايزاتجوزك امبارح قبل بكره
اميره: بسخريه ... مش باين يعنى
مروان :مش باين ، عشان بقولك ناجل الكلام لحد ما نرجع هو ده مقياسك
اميره : بضيق .. لا يا مروان مش ده مقياسى ، بس مش حاسه بلهفه منك ، حاسك عادى
مروان : والله العظيم انا بحبك وعايزك تكونى مراتى وشريكه حياتى
تنظرأميره له دون تحدث .
مروان : ممكن بقى تلبسى الخاتم ده ونروح نقعد على يشاور بايده ... الكنبه دى ، ونتكلم بكل شى عايزه بس بشرط
اميره: كمان شرط
مروان : ايوا اعمليلى قهوه بدل اللى بردت
اميره : حاضر
يمسك مروان ايد اميره عشان يلبسها الخاتم لكنها تقفل ايدها
مروان : فى ايه تانى
اميره :معلش لما ننزل مصر ، هروح اعملك القهوه
- تسحب ايدها وتخرج من الرسبشن ، يقف مروان و ينظر لها وهى تتركه و يبدو على ملامحه الغضب ، و يذهب مروان الى باب الشقه ويفتح الباب ويخرج ، تسمع اميره وهى تقف فى المطبخ صوت الباب وهو يقفله بشده، فتبكى اميره وتكسر احد الكوبايات.
- كافيه انجلترا 12م
- يجلس مروان على احد الترابيزات فى احد الكافيهات و يدخل على منير .
منير : فى ايه يا حبيبى خضتنى
مروان : بقولك ايه تعال نتمشى انا مخنوق
منير : طيب يلا
أثناء سير مروان ومنير على الكورنيش .
مروان : هوده اللى حصل
منير : انت جيت تكحلها عمتها
مروان : يقف وينظر له بستغراب ...ازاى
منير : يعنى فى واحد عاقل فى دنيا يروح يعرض على البنت اللى بيحبها الجواز بطريقه دى كويس انها مادتكش بحاجه فى دماغك
مروان : ليه يعنى
منير : طريقتك بايخه جدا ، مافهاش اى نوع من الرومنسيه والحب ، حد يعمل كدا
مروان: كنت عايز اصالحها بسرعه هو ده اللى جه فى دماغى وقتها ، مالحقتش غير انى اشترى الخاتم
منير : دى وفهمتها ، انت ليه ما بتاخدش وتدى معاها فى موضعكم ، هى عندها حق تزعل
مروان : عارف بس انا مش عايز نسبق الاحداث
منير :احداث ايه هى بتقولك تعال نتجوز بكره ، انت غبى والله ، معرفش بتجيب الافكار دى منين ، بقولك غير من افكارك المريضه دى ، لان اميره غير اى حد دخل حياتك قبل كدا
مروان : عارف
منير : طب اهدى بقى لحسن البت اتزهق وتطفش
مروان : ده انا اموت فيها ، المهم اعمل ايه عايز اصالحها
منير : هقولك
يتبع الفصل السادس اضغط هنا
- الفهرس يحتوي على جميع فصول الرواية كاملة :"رواية الاعمى" اضغط على اسم الرواية