رواية بين يوم وليلة الفصل الأول بقلم عمرو علي
رواية بين يوم وليلة الفصل الأول
صباح الخير يا حبيبي
= صباح الزفت على دماغك ، فين الفطار يا بنت ال****
اهدا طيب مالك فيه ايه ، هحضره حالا
= بسرعة انجزي ، كدا هتأخر على الشغل يا حيوانة انتي
حاضر حاضر
" يدوبك لسة صاحية من النوم ، مكنتش لسة عارفة افتح عيني ، لكن جريت عشان احضرله الفطار ، احساس حلو لما تعمل لحد بتحبه حاجة حتى لو هتيجي على حساب نفسك و راحتك لكن في نفس الوقت احساس بايخ جدا لما الحد دا ميحسش انك عملت عشانه حاجة ، كنت واقفة في المطبخ سرحانة ، فوقت على صوته من برا
يلاا ولا هنفطر امتا النهاردة ، انا مش عارف ايه العيشة المقرفة اللي انا عايشها دي ، انا كان مالي بالجواز والقرف دا
" مكنتش قادرة ارد ، ماجد طيب والله بس هو ساعات بيكون عصبي كدا ممكن يكون بسبب ضغط الشغل ، خلصت الاكل بسرعة و حطيته على السفرة ، قعدنا وبدأ ياكل
مرة تانية هتتأخري في تحضير الفطار هيكون فيها طلاقك يا نرمين
= انا اسفة
اسمعها مرة تانية
= آسفة
برافو
= ممكن اروح عند ماما النهاردة
= لا
ليه
= من غير ليه
من حقي أعرف
= وانا جوزك وليا حكم عليكي وبقولك لا مش هتروحي
بس انا هروح يا ماجد
= انتي اتجننتي يابت
" مسكني من شعري وشدني ناحيته
هو انا عشان اتكلمت معاكي حلو يبقا خلاص تعملي اللي على كيفك ، انا قولت مش هتروحي ومفيش نزول من البيت اصلا
= سيبني ، اوعاا
هتسمعي الكلام ولا لا
= هسمع ، اوعا بقا شعري
دي عيشة تقرف ، مينفعش معاكي الذوق ، انا هقوم انزل
" سابني ونزل ، شدني من شعري رغم انه عارف ان شعري ضعيف وبيقع بسرعة ، لأول مرة ماجد يعمل كدا معايا ، طب انا زعلته ف ايه ، ممكن لما يرجع اسأله ، بس لا اسأله ايه دا مد ايده عليا ، كلمت ماما عشان اعتذرلها
ايوا يا ماما
= ايه يا حبيبتي مجتيش ليه
معلش يا ماما مش هقدر ااجي
= ليه حصل حاجة
لا أصل.. ، اصل ماجد تعبان و لازم ابقا جنبه
= دي الاصول برضو يا نرمين
هبقا اجيلك مرة تانية
= جوزك يخف الاول وتعالي براحتك
حاضر يا ماما
" معنديش حد في الدنيا غيرها ، هي و ماجد كل حياتي ، مليش اخوات ، وصحابي معدودين جدا يعني تقريبا معنديش ، مليش في الدنيا غير امي و ماجد ، وكفاية انه كان اول حب في حياتي
متأكدة انك عايزاه
= اه عايزاه جدا يا ماما
فكري كويس يا نرمين
= فكرت وقررت ، ماجد غير اي حد ، وانا بحبه وعايزاه
دا اختيارك وأنتي حرة فيه
" ياما نفسي يرجع ماجد بتاع زمان ، ماجد بتاع زمان كان معايا من فترة و اختفى واللي موجود دلوقتي واحد غيره ، تصرفاته كلها غريبة حتى معايا ، و اخرها لما مسكني من شعري ، فوقت من سرحاني وقومت بدأت احضر الغدا ، الساعة كانت خلاص بتدق 5 ، المفروض ان دا معاد رجوع ماجد ، استنيته بس برضو مرجعش ، حاولت اكلمه لكن موبايله مقفول ، بدأت اقلق خصوصا انه مش متعود يتأخر ، عدت ساعة ولسة بحاول أكلمه ولكن دون جدوى ، قعدت على الكنبة مستنياه ، سندت دماغي معرفش نمت ازاي ، بس حسيت باللي بيفتح باب الشقة و داخل ، قومت وقفت
ماجد انت كويس
= اه كويس يا روحي
" قرب عليا ومسك ايدي
مالك يا عمري
= كنت قلقانة عليك
وأنا حد هيخطفني يعني
= مش عوايدك ترجع متأخر
سيبك دلوقتي من الكلام دا ، انتي عاملة اكل ولا اقولك تعالي ناكل برا
= لا انا عاملة اكل ، هقوم احضره ، ثانية واحدة
معقولة عايزة تحضري الاكل ب ايدك الرقيقة دي وتتعبيها ، ميصحش طبعا ، هحضر انا الاكل يا قلبي انا
" هو ايه اللي بيحصل ، هو ماجد اتجنن ولا ايه
اه نسيت اقولك ، احنا بكرا هنتغدا عند مامتك
= ايوا بس انا قولتلها...
خلاص انا اتفقت معاها
= تمام انا هصحا الصبح هروحلها ، وانت لما تخلص شغل تعالى
طب ينفع يعني
= ايه
ينفع تتعبي رجلك الصغيرة البريئة دي وتركبي مواصلات ، انا واخد اجازة بكرا وهنقضي اليوم سوا
" لا كدا مش طبيعي خالص ، دا مش ماجد دا أسامة منير ، معقول يكون ضميره اتأنب بعد اللي عمله معايا الصبح ، ياريت يكون صح ، كنت قاعدة وهو رايح جاي ينظم السفرة ويحضر الأطباق ، بدأ يولع شموع
احلى عشا رومانسي ل حبيبتي و روح قلبي نرمين
= ماجد انت بجد كدا
انا كدا من زمان ، من ساعة ما اتولدت
= يعني انت عايز تفهمني انك رومانسي كدا من وانت لسة طفل
لا ما انا اتولدت من سنتين بالظبط ، يوم ما قابلتك
" خدودي احمرت و اتكسفت ، بصيت في الارض ، رفع راسي لفوق
بحبك
= وانا كمان بحبك أوي
" كنت فرحانة أوي انه اخيرا ماجد بتاع زمان رجع ، هو تقريبا رجع وهو رومانسي شوية او شويتين الحقيقة بس مش مشكلة ، المهم ان الشخص اللي بحبه رجعلي خلاص ، بدأنا ناكل ، أو بدأت انا اللي ااكل لان هو كان باصصلي بس ، قام من على الكرسي بتاعه ، مسك ايدي وبدأ يرقص سلو ، كنت سرحانة على نغمات المزيكا الهادية ، الحب حلو أوي والله وخصوصا لو مع شخص مش بتحبه لا دا بتعشقه كمان ، كنت بتأمل في ملامحه وهو كذلك كأن الرقصة دي مكان ل عيوننا عشان تتقابل فيه ، كانت هي اللغة بينا ، اه هي لغة العيون اللي احيانا بتشرح حاجات يعجز اللسان انه يقولها ، شدني من ايدي و دخلنا الأوضة ، صحيت تاني يوم لقيته نايم جنبي
" بصوت رقيق وهادي " ماجد
ماجد
= ايه
اصحا بقا
= هي الساعة كام
الساعة 11
" فجأه لقيته قام بسرعة
= 11 ازاي ، انا كدا اتأخرت على الشغل الله يخربيتك ، و انتي نايمة جنبي زي البهيمة مش حاسة
في ايه ، مش انت قولت هتاخد النهاردة اجازة و نروح عند ماما
= مين اللي قال الكلام دا
انت
= محصلش
لا حصل وقولته امبارح
= انا قولت محصلش ، مش هنقعد نرغي طول النهار
" بعصبية " في ايه يا ماجد
= ماجد مين!!
يتبع الفصل الثاني اضغط هنا
- الفهرس يحتوي على جميع فصول الرواية كاملة :"رواية بين يوم وليلة" اضغط على اسم الرواية