رواية بين يوم وليلة الفصل الثاني 2 بقلم عمرو علي

   رواية بين يوم وليلة الفصل الثاني بقلم عمرو علي

رواية بين يوم وليلة الفصل الثاني

في ايه يا ماجد 

= ماجد مين

نعم!! ، هو انت فاقد الذاكرة ولا ايه

= اااااه أنتي قصدك انا ، ايوا صح انا ماجد

" طريقة كلامه غريبة ، فيه حاجة مش مظبوطة ومش فاهمة ايه هي 

احضرلك الفطار

= يا نهارك أسود ، انتي لسة محضرتيهوش ، قومي بسرعة حضريه ، عالم بهايم والله

" هو ليه يشتم ، والله انا مستعدة اخدمه بعيني بس من غير تهزيق ، تلقائي بزعل من نفسي وبحس اني قليلة اوي عشان حتى مش عارفة ارد عليه وبعذره من غير ما اسمع منه كلمة ، أو حد شاف ماجد بتاع امبارح وماجد بتاع دلوقتي هيقول انه ملبوس ، لسة واقفة بعمل الاكل لقيت اللي بيحط ايده على كتفي

اساعدك يا روحي

" بصيتله ، كان مبتسم ووشه ناقص يطلع قلوب 

= لا شكرا ، انا قربت اخلص

هاتي ، انا حابب اساعدك

" بدأ هو يعمل الاكل بدالي ، وبيعمله كأنه الشيف الشربيني 

= انت ممكن تروح تقعد برا وانا هجهز الاكل علطول و ااجي

يا روحي انا مش عايزك تتعبي

= مفيش مشكلة لو تعبت عشانك شوية 

انا مش عايزك تتعبي حتى لو عشاني ، انتي تقعدي زي الملكة وانا اعملك كل اللي أنتي عايزاه

= ماجد هو انت كويس

كويس لما بشوفك ، إنما لما بتغيبي عني بكون مش كويس خالص

= طب هنروح ل ماما ولا لأ

انا اسف يا قلبي مش هعرف ، فيه شغل مهم النهاردة ولازم يخلص

= مش انت قولت واخد اجازة

خلاص روحي انتي ولو انا خلصت بدري هعدي عليكي

= ماشي

يلا بقا عشان ناكل

" ممكن انا مثلا اللي بيتهيألي ، اكيد اه ، طب وهل كان بيتهيألي برضو لما شدني من شعري ، أو ممكن يكون التفسير الوحيد انه بيتعصب عليا شوية وبعدها ضميره يأنبه ، قعدنا عشان ناكل

ايه دا أنتي هتاكلي ب ايدك

= اه ، اعتقد ان فكرة اني ااكل ب رجلي اتلغت

وتتعبي نفسك ليه يا قلبي انا 

= يعني ايه

هأكلك انا ب ايدي

= لا يا حبيبي انا هاكل ، متشغلش بالك بيا

لو مش هشغل بالي ب حاجة حلوة زيك يبقا هشغل بالي بمين

" كلام حلو كتير وانا بصراحة هضعف ، اعمل ايه بقا بحبه ، نفسي تفضل كدا يا ماجد وانا مستعدة اعيش معاك عمري كله واكون تحت رجلك بس تحبني وتحترمني ، خلصنا اكل وهو دخل الأوضة عشان يلبس ، عدت ربع ساعة وخرج 

هو انت كدا رايح الشغل ، امال لو رايح تخطب هتلبس ايه

= وهي العيون دي هتشوف حاجة وحشة ازاي

" هو جوزي اه بس انا ممكن اعمل فضيحة دلوقتي

دايما بتعرف تغلبني بكلامك

= ممكن احلفلك اني مغلبتكيش قد ما أنتي بتغلبيني بحلاوتك

هو ينفع متروحش الشغل

= ينفع بس هترفد بعدها

لا خلاص روح

= مش هتأخر عليكي

كمان شوية هلبس وأنزل اروح لماما

= خلي بالك من نفسك يا نرمين

بتخاف عليا

= مش بطيق الهوا يلمسك

امممم بحبك

= وانا كمان بحبك يا نور عيني

" نزل ، حاسة اني شايفة ان الحياه لونها بمبي ، مبسوطة وعايزة اجري واتنطط ، قد ايه الكلمة الحلوة بتفرق معانا اوي ، قد ايه احساس حلو لما تحسس مراتك انها اجمل واحدة في الدنيا ، ساعتها هي هتشيلك على راسها وتتمنا الرضا ليك ، يسلااام لو الحياه تفضل كدا علطول ، روحت لبست و نزلت عشان اروح ل ماما

عاملة ايه يا ماما

= الحمدلله ، طمنيني عليكي أنتي

انا كويسة جدا

= شكلك مبسوطة 

أوي

= و ايه بقا سر فرحتك دي

ماجد

= مبسوطة معاه

جدا جدا

= يعني مش بتتخانقو

بصي الصراحة يعني ، هو ساعات بيكون عصبي شوية لكن بيرجع تاني حنين وطيب

= مش فاهمة

انا نفسي مش فاهمة يا ماما

= ماجد انسان محترم يا نرمين ، حافظي عليه ولو اتعصب شوية ، عادي كل الرجالة كدا ، و دورك انك تحتويه وقت عصبيته دي ، ساعتها هيهدا خالص وينسا انه متعصب أصلا

ماجد في عنيا من غير ما تقولي يا ماما

= ربنا يسعدك ويباركلك في حياتك يا بنتي

" وكمان دعوتين حلوين ، لو اليوم يخلص على كدا هكون مبسوطة أوي والله ، قعدت شوية مع ماما ، حاولت اكلم ماجد لكن موبايله مقفول ، تقرييا كدا هو مش هييجي ، روحت البيت كانت الساعة 8 ، مش موجود في البيت ولسة موبايله مقفول ، كل يوم يقلقني كدا ، فضلت قاعدة بهدومي اللي معرفتش اغيرها بسبب أعصابي اللي مظبوطة ، الساعة داخلة على 10 وهو لسة مجاش ، طب اعمل ايه ، جريت وقفت في البلكونة عشان اشوفه زي الاطفال ، نظراتي خاطفة بين الشارع والموبايل عشان اشوف الساعة او لو رسالة جاتلي تقول ان موبايله اتفتح ، فضلت واقفة ما يقرب من نص ساعة و لقيته جاي ، جريت بسرعة على باب الشقة ، فتحت واستنيته يطلع 

كنت فين يا ماجد

= ملكيش دعوة ، ادخلي نامي

يعني ايه مليش دعوة

= زي ما سمعتي ، ادخلي نامي يا نرمين

انا عايزة اعرف كنت فين وليه اتأخرت كدا

= خليكي ، هدخل انا انام 

لا مش هتنام غير لما ترد عليا

= سبيني انام يا نرمين و عدي ليلتك

لا مش هتنام ، حرام عليك تسيبني قلقانة عليك كدا

= معلش

هو دا ردك عليا

= اه وياريت ادخل انام بقا

مالك يا ماجد فيه ايه

" لف ضهره وبدأ يتكلم بصوت واطي وهو بيتشنج

اسكت ، مش هتطلع لا ، اسكت بقا ، سيبني و امشي دلوقتي 

" مكنتش محددة هو بيقول ايه بالظبط ، ندهت عليه

ماجد ، يا ماجد

= انا عايز انام دلوقتي

" رد عليا وهو لسة لافف ضهره ومش باصصلي

وانا عايز اعرف في ايه يا ماجد 

" مردش عليا ، خوفت عليه حسيت ان فيه مشكلة ، بدأت اقرب منه 

ماجد 

" مردش عليا

يا ماجد ، ماجد

" لف وشه و بص ليا ، وشه كان كله غضب وقال بصوت عالي

انا مش ماجد ، انااا أمجد

يتبع الفصل الثالث اضغط هنا

• الفهرس يحتوي على جميع فصول الرواية كاملة :"رواية بين يوم وليلة" اضغط على اسم الرواية