رواية فؤادة الفصل التاسع عشر 19 بقلم ميمي عوالي

   رواية فؤادة الفصل التاسع عشر بقلم ميمي عوالي

 رواية فؤادة الفصل التاسع عشر

بعد انصراف العم نبيل الى اشغاله ظلت فؤادة بجوار الصغيرين فى الحديقة حتى قالت لها سلوى : هتجيبيلى توت يا طنط

فؤادة : حاضر ياحبيبتى هجيبلك ، وتنهض من مكانها لتتجه الى شجرة التوت وصعدت عليها وفعلت كما فعلت فى المرة السابقة ، و عندما هبطت من عليها امرت الصغار بجمع التوت من الارض ليتم غسله ، ولكنها شعرت فجأة بأنها مراقبة أخذت تنظر حولها فى كل اتجاه ولكنها لم تجد احد ، ولكنها عندما نظرت الى الاعلى ، وجدت ان جلال يقف بشرفة غرفتها يراقبها بهدوء شديد و هو يدخن سيجارته بشرود باد عليه

و عندما تلاقت اعينهم ، القت عليه فؤادة تحية الصباح بايماءة من رأسها وصوت لا تكاد تسمعه بأذنها ، ولكنه أجابها بايماءة مماثلة ، وايضا بصوت غير مسموع ، ثم عاد الى الداخل

سلوى : ياللا ياطنط عاوزين نغسل التوت

فؤادة : تعالوا على المطبخ ياللا ، و نشوف فى حد صحى واللا لسه

وعندما دلفوا الى الداخل وجدوا ان ام ابراهيم و ماجدة متواجدتين بالمطبخ ويقومان بتحضير الافطار

فؤادة : صباح الخير

ام ابراهيم : يسعد صباحك يا بنتى ، انتى صحيتى امتى ، ده انا لما سمعت حسك فى الجنينة مع الولاد كنت لسه هخرجلك اشوفك عاملة ايه دلوقتى

فؤادة : الحمدلله يا خالة ، انا بخير ما تقلقيش

ماجدة بتردد : كنت عاوزاكى فى حكاية كده يا ست فؤادة

فؤادة بتركيز : حكاية ايه يا ماجدة خير

ماجدة وهى تتنقل بعينيها بين فؤادة و ام ابراهيم : اصل التليفون بتاعى الظاهر فيه مشكلة و كنت عاوزاكى تبصيلى عليه

فؤادة : طب بعد اذنك يا خالة اغسلى التوت للولاد ، وانتى يا ماجدة هاتى التليفون بتاعك وحصلينى على الجنينة

وعندما ذهبوا الى الخارج مرة اخرى قالت ماجدة : تليفونى مابطلش رن من امبارح بالليل ، وانا مارضيتش ارد الا اما اشوفك هتقولى ايه

لتأخذ فؤادة الهاتف من يد ماجدة وتنظر اليه لتجد عشر مكالمات من ندا واكثر منهم من الزينى لتقول : و خليكى ماترديش

ماجدة : خالة ام ابراهيم كل شوية تزعقلى على صوته ، و تقوللى ياتردى يا تقفليه ، و انا ما اعرفش اقفله ازاى

فؤادة : و هى عارفة مين اللى بيتصل

ماجدة : لا ، ما بتسألنيش

لتعيد فؤادة الهاتف الى ماجدة قائلة : انا قفلتلك الصوت ، بس خليكى ماترديش برضة مهما اتصلوا لحد اما اقوللك

ماجدة : تؤمرينى يا ست فؤادة

فؤادة : روحى بقى شوفى اللى وراكى ، لتذهب فؤادة خلفها حتى وصلت الى غرفة محمد ، و دقت الباب بخفوت وانتظرت مكانها ، حتى سمعت صوت محمد قائلا : ثانية واحدة

و عندما فتح محمد الباب ووجد فؤادة امامه قال : صباح الخير ، فى حاجة واللا ايه

فؤادة : هى عايشة صحيت

محمد : ايوة من شوية

فؤاة: طب كنت عاوزاك فى كلمتين كده بينى و بينك ، ياريت تحصلنى على برة

محمد : طب روحى وانا دقيقتين وهتلاقينى وراكى

وعادت فؤادة الى جلستها بالخارج ووجدت محمد خلفها مباشرة ، و جلس بجوارها قائلا : خير ، فى حاجة حصلت تانى واللا ايه

فؤادة : عمى جاى هنا

محمد بفضول : ايه … امتى وعرفتى منين

فؤادة : كلم عمى نبيل فى التليفون يتطمن على البنات ، و عرف منه اللى حصل و قال له انه هييجى بنفسه

محمد : و مش غريبة شويتين انه يتصل بنبيل .. و ما يتصلش بعياله ، لا و كمان فى نفس اليوم اللى يحصل فيه كل المصايب دى

فؤادة ببعض الغضب : و بعدهالك بقى يا محمد ، انت ليه على طول حاطط ابوك ورا كل المصايب اللى ممكن تحصل فى الدنيا دى

محمد بدهشة : انتى اللى بتقولى كده ، اشحال ان ماكنتيش اكتر واحدة اتأذيتى منه

فؤادة : انا ما اتأذتش منه

محمد : والله .. اومال هربتى منه ليه يا فؤادة لما هو حلو وصالح كده

فؤادة : يا محمد ، يامحمد مين فينا مافيهوش عيوب

محمد : برضة هربتى منه ليه يا فؤادة

فؤادة بتنهيدة : لانى ماكنتش بحب الهلالى ، و لا كان مناسب ليا يا محمد

محمد بغيظ : يا سلام ، يعنى مش عشان كان طمعان فى ارضك و فلوسك مثلا

فؤادة بوجع : يا محمد ارجوك ، انا بحاول انسى الحكاية دى ، ليه مصر انك دايما تفكرنى بيها

محمد : عشان تفضلى فايقة و مصحصحة للى بيحصل حواليكى يا فؤادة ، عشان ماتديلوش الامان تانى ابدا ، و قلتهالك قبل كده ، انا برضة لحد دلوقتى مش قادر ابرأه من النار اللى انضربت عليكى

فؤادة : اسمع يا محمد ، استاذ عارف سمع عمى و هو بيتكلم فى التليفون وبيتخانق مع الهلالى ، و معنى كلامه وقتها انه ماكانش يعرف مين الل ورا اللى حصل ، و كمان جالى يوم ماخرجت من المستشفى وقاللى انه مالوش علاقة باللى حصل

محمد بسخرية : وانتى بقى صدقتبه

فؤادة : ماتقدرش تنكر ان رغم كل اللى عمى بيعمله ، الا انه مابيكذبش ، و انت عارف الكلام ده و متأكد منه كمان ، و لو كان له يد فى اللى حصل ، كان على الاقل هيتلاشى انه يتعامل معايا ، مش انه يجيلى مخصوص عشان يبرأ نفسه

محمد بتنهيدة : و انتى دلوقتى عاوزة ايه

فؤادة : اسمع يامحمد ، استاذ عارف معجب بنهاد ، و عاوز يتجوزها ، و طبعا عمى ممكن يرفضه بسبب علاقته بجلال

محمد : ده اكيد

فؤادة : رغم انى ما عاشرتش العيلة دى كتير ، بس اقدر اقول لك و انا متأكدة من كلامى ده ، ان الناس دى جميلة اوى يا عارف ، كلهم بلا استثناء ، كبيرهم وصغيرهم ، طول ما انا وسطهم ماشفتش منهم غير كل خير ، و اديك شايف اهوة هم بيعملوا ايه معايا ، و عشان كده ، شايفة ان نهاد تستاهل الاستاذ عارف ، و انها هتبقى سعيدة جدا معاه لو قدروا فعلا بتجوزوا

محمد بخبث : و طبعا انتى كمان هتبقى سعيدة بسعادة جوزك حبيبك عشان خاطر اخوه

فؤادة بصت فى الارض و سكتت

محمد : طب انا مش فاهم انتى عاوزة توصلى لايه دلوقتى

فؤادة : انا عاوزاك تنتهز مجى عمى هنا ، وتصفى بقى كل الخلافات والزعل اللى موجود ، و تبقى فرصة اننا نخطب نهاد و نفرح بيها

ليعلو صوت ضحك محمد لتنظر له فؤادة بامتعاض قائلة : ممكن اعرف بتضحك على ايه دلوقتى

محمد : فؤادة هتفضل طول عمرها فؤادة

فؤادة بغيظ : اشجينى ، عاوز تقول ايه

محمد : عاوز اقول انك نسيتى كل اللى انتى فيه و غرقتى نفسك فى مشكلتى ومشكلة نهاد

فؤادة بعزيمة : ده لانى ما بركنش حاجة على الرف يا محمد ، و انت عارف كويس ان مهما حصل الا انى عمرى ماهفرط فى حق من حقوقى ، يبقى هحمل هم ايه وليه

ليضمها محمد تحت جناحه مقبلا رأسها قائلا : ربنا ان شاء الله مش هيتخلى عنك ابدا ، ما ضاع حق وراءه مطالب

فؤادة : طب هتقابل عمى

محمد : يابنتى الحكاية مش سهلة كده زى ما انتى فاكرة ، و بعدين يعنى انتى فكرك انه هيقبل انى اتجوزت من غير علمه كده بسهولة

فؤادة : مهما كان صعوبتها بس اكيد هتبقى اسهل من انه يعرف بعد ولادة عايشة … صدقنى

وبعد صمت قليل قال محمد : ربنا يقدم اللى فيه الخير ، انا هقوم ابص على عايشة ، وبعدين انتو مش ناويين تفطرونا واللا ايه ، مش كفاية امبارح جوعتونا وبايتونا من غير عشا

ليسمعوا صوت عايشة وهى قادمة اليهم قائلة : اى والله يا فؤادة ، انى جوعانة كتير و بدى اكل

فؤادة بابتسامة : حقكم عليا والله بس اهو على يدكم اللى حصل

عايشة : انتى كمان ماكلتى اى شى من البارحة من وقت الفطور

محمد : لا ان كان على فؤادة ممكن تقعد بالاسبوع ماتاكلش عادى

عايشة : مو معقول

فؤادة : خليكوا انتوا قاعدين فى الهوا كده شوية ، ولو مالقيتش حد صحى برضة ، انا هخليهم بجيبولكم انتم الفطار

و ما ان نهضت فؤادة من مكانها حتى لمحت جلال يقف فى شرفتها مرة اخرى وهو يتابع حديثها مع محمد و عايشة ، و لم تكن تعلم انه كان يتابع حديثها مع محمد من البداية

و لكنها خفضت بصرها سريعا واتجهت الى الداخل لتجد ان الجميع قد بدأوا فى التجمع بالداخل ، فقالت لهم : صباح الخير ، كنت لسه هبتدى اصحيكم

نهاد وهى تتثائب : احنا صحينا من الجوع ، انا عاوزة افطر

عارف ضاحكا : الصراحة يا فؤادة انا ابتديت اشك ان الفطار اللى فطرتيهولنا امبارح ، كنتى بتأكلينا وانتى عاملة حسابك انه يقوم بدور التلات وجبات

فؤادة بمرح : طبعا اومال ايه ، عشان ابقى مدبرة

نهاد : مدبرة مجاعات ، عاوزة ااكل

سلمى وهى تضرب نهاد على رأسها : بس فضحتينا

ثم نظرت لفؤادة قائلة : بابا و ماما جايين النهاردة

فؤادة : والله ، مراة عمى جاية معاه

نهاد باستغراب : انتى كنتى عارفة واللا ايه

فادة : ااه ، و محمد كمان عرف

سلمى وهى تلتفت اتجاه غرفة اخيها : هما صحيوا

فؤاة : ااه ، قاعدين برة على ما الفطار يجهز

نهاد بفضول : طب وانتو عرفتوا ازاى ، دى ماما لسه مكلمانى الصبح قبل ما يركبوا العربية على طول

فؤادة : عمى كلم عمى نبيل و بلغه

كان حسين بجلس و ليلى على قدميه تحاول طرد النوم من عيونها وهى تتشبث بملابس ابيها ، فقالت لها فؤادة : مش هتاكلى توت يا لولو ، سلوى و ادهم بياكلوا التوت لوحدهم فى الجنينة

لتهبط الصغيرة من فوق اقدام والدها وهى تجذبه معها اتجاه الخارج فيضحك حسين قائلا : طب انا مش عاوز توت ، اجى بقى معاكى ليه

حسنة : اخرج معاها لحد ما تتطمن انها شافتهم وسيبها معاهم وتعالى تانى

وبعد قليل انضم اليهم جلال قائلا : صباح الخير عليكم جميعا

ليرد الجميع تحية الصباح ، و تأتيهم ماجدة تخبرهم بان الفطور معد على مائدة الطعام ، فتقول فؤادة موجهة حديثها لجلال : مش المفروض حد يبلغ المتر ان الفطار جاهز عشان ييجى ياكل معانا واللا ايه

جلال وهو يحك ذقنه بيده : ده انا كنت نسيته خالص ، انا هروح اندهله

و بعد دقائق قليلة اجتمع الجميع على مائدة الطعام وهم يتحدثون عن ما جرى بالليلة السابقة ، فقال المحامى : المفروض نبقى موجودين فى النقطة على الساعة حداشر عشان يتعمل محضر رسمى بكل اللى حصل

و عندما حل عليهم الصمت قالت نهاد : يعنى كلنا لازم ناكل كويس ، عشان ماحدش يعرف هناكل المرة الجاية امتى

ليضحكوا على ما قالت ، ووسط ضحكاتهم يسمعوا صوت سالم وهو يقول بقوة و بصوت عالى : السلام عليكم

لتنهض فؤادة مسرعة و تتجه لزوجة عمها محتضنة اياها وهى تقول : وحشتينى اوى لدرجة عمرك ماهتتخيليها

ام نهاد : ما قدرتش ما اجيش اتطمن عليكى

ثم وقفت امام عمها قائلة بادب و ترحاب : اهلا يا عمى ، نورت مزرعتك

لينظر اليها سالم بصمت رغم مرور نظرة عابرة فسرتها فؤادة بانها نظرة الم لم تعرف سببه ، و لكن سالم قال : انا قلت اجى اتطمن عليكى بعد ما عرفت اللى حصل معاكى

لتربت فؤادة على كف عمها قائلة : طبعا يا عمى ، انا متأكدة ان عمرك ما هتتخلى عنى ابدا ، تعالوا ياللا نفطر سوا ، احنا لسه ما خلصناش فطارنا

سالم وهو ينظر باتجاه محمد بجمود : ، لا ، روحى انتى كملى فطارك وبعدين نبقى نتكلم ، احنا فطرنا من بدرى

فؤادة : طب استريحوا على ما اطلب لكم القهوة ، و قبل ان تلتفت وجدت جلال يقف خلفها و قال مرحبا : اهلا وسهلا يا سالم بيه ، نورتنا

سالم بجمود : شكرا

ليحيى جلال زوجته قائلا بترحاب : اهلا و سهلا بحضرتك ، يا ترى فاكرانى

زوجة سالم بود : اهلا بيك يا بنى ، ايوة طبعا فاكراك

ليبدأ الجميع فى القدوم والترحيب بسالم و زوجته حتى لم يتبقى غير محمد الذى اقترب و ارتمى باحضان والدته متبادلا و اياها الاحضان والقبلات ، ثم ابتعد عنها واقترب من ابيه قائلا بخفوت : ازى حضرتك

لينظر اليه سالم قائلا بنبرة يغلب عليها العتاب : حمدلله على السلامة

محمد : الله يسلمك

واشار محمد الى عايشة لكى تقترب منه ، و عند اقترابها ، اخذها محمد تحت جناحه و نظر الى ابيه قائلا : اقدم لك عايشة .. مراتى

ليرفع سالم عينه التى ارتطمت ببطن عايشة بذهول ، و اخذ ينقل عينيه ما بين وجهها وبطنها المنتفخ و وجه محمد فى صمت ثقيل ، حتى قطعته عايشة باقترابها من زوجة سالم قائلة ببشاشة : كيفك امى ، ان شا الله تكونى بخير

لتحتضنها زوجة سالم بحذر و هى تربت على بطنها بحنان قائلة : انا بخير ما دمتم كلكم بخير يا بنتى ، ربنا يقومك بالسلامة و يتملك على خير

لتنظر عايشة الى سالم بتردد ، و لكنها انحنت مقبلة يده قائلة : رضاك على راسى عمو

لينظر اليها سالم بجمود و لكنه تمالك صدمته و قال بهدوء : اقعدى .. و حاولى تستريحى عشان ما تتعبيش

لتبتسم عايشة بود شديد و تجلس الى جوار زوجة سالم

سالم موجها حديثه الى فؤادة : هتروحى النقطة امتى

جلال و هو ينظر لفؤادة : احنا المفروض نبقى موجودين هناك الساعة 11

سالم : انا هاجى معاكم ، عشان اضم البلاغات اللى اتعملت قبل كده للبلاغ الجديد

ليتدخل المحامى قائلا : اسمحلى اتدخل فى الكلام يا سالم بيه ، يا ترى حضرتك فاكرنى

لينظر سالم الى المحامى ببعض الغضب قائلا : و هو انت تتنسى برضة يا متر

ليقول المحامى بعملية شديدة : كويس جدا انك فاكرنى ، بس يا ترى حضرتك معاك ارقام المحاضر دى

سالم و هو ينظر بجانب عينيه الى فؤادة : الحقيقة لا ، شريكى هو الل كان بيعمل المحاضر دى عشان له معارف هنا فى النقطة و هو اللى معاه ارقام المحاضر

لمحامى : يعنى حضرتك ما جيتش تعمل المحاضر دى بنفسك ولا مرة

سالم بتنهدة : لا

المحامى : طب ياترى فاكر تواريخها

سالم : ايوة ، دى فاكرها كويس جدا ، و عموما هم كانوا تلات بلاغات ، اخرهم كان …..

وعندما صمت سالم ، قال المحامى يستحثه : كان ايه حضرتك

ليقول سالم بجمود وهو ينظر لفؤادة : كان يوم هروب فؤادة ، لما نبيل كلمنى و بلغنى انهم حاولوا يخربوا محول الكهربا

المحامى : تمام ، لما نوصل النقطة ان شاء الله هحاول اطلع ارقام المحاضر و ارفقه بالمحضر الجديد ، و ياريت نستعد عشان يا دوب نوصل فى معادنا

مؤقتا هنحتاج يبقى موجود معانا الست فؤادة و جلال بية و عارف بية ، و استاذ نبيل ، و طبعا سالم بية مشكورا

ليقول جلال : طب بعد اذنكم انا هطلع اجهز ، و بعد ان اتجه الى الدرج التفت الى فؤادة قائلا : تعالى يا فؤادة ياللا عشان تجهزى انتى كمان

فذهبت فؤاة خلفه فى هدوء حتى صعدوا الى غرفة والدها فاشار لها جلال بالدخول : ليغلق الباب ورائهم وهو يقول : احنا امبارح ما جيبناش سيرة الموضوع بتاع ماجدة فى المحضر

فؤادة شاهقة : و ماينفعش نجيب سيرته طبعا

جلال باستغراب : و ليه بقى ما ينفعش

فؤادة : اعتقد ان ما يصحش ابدا نجيب سيرة ندا فى حكاية زى دى ، افرض ان جه عليها اى حاجة قانونا واتأذت بيه ، يبقى انا السبب فى اذية ام ادهم وليلى ، لا طبعا انا ما اقبلش الكلام ده

جلال : بس احنا كده نبقى بنساعدها على اللى هى بتعمله

فؤادة : بص يا استاذ جلال ، حضرتك ممكن بكل بساطة تكلمها و تفهمها اللى حصل وحقيقة الموقف ، و انك عرفت باللى هى عملته ، وخلاص كده ، ما اعتقدش ابدا انها ممكن تخطى خطوة زى دى تانى ابدا

وعندما وجدت علامات عدم الراحة على وجهه قالت مستعطفة : عشان خاطر الولاد يا استاذ جلال ارجوك و اعتقد كمان عشان خاطر عم حضرتك

جلال : انتى مش واخدة بالك انك كنتى اتعودتى تشيلى الالقاب ، ليه دلوقتى بترجعيها ، انا عاوزك تنتبهى اوى وانتى بتتعاملى معايا في قدام عمك ، لان عمك لو شك لحظة واحدة ان جوازنا ده تمثيلية ، ممكن يقلب الدنيا على دماغنا ، و احنا مش ناقصين مشاكل ابدا ،على الاقل دلوقتى

فؤادة : ما تقلقش ، انا هبقى حريصة اوى من الناحية دى

جلال : و عاوزين نحاول نصلح العلاقات على اد ما نقدر ، عشان موضوع عارف و بنت عمك

فؤادة بابتسامة : ايوة ، عندك حق ، ربنا يسعدهم

جلال : طب روحى غيرى هدومك واستعدى عشان تنزلى ياللا

لتومئ فؤادة برأسها وتغادر الغرفة متجهة الى غرفتها

فى مركز الشرطة

بعد اخذ اقوال الجميع ، جاء الدور على سالم فقال له النقيب حمدى : كلام حضرتك غريب جدا يا سالم بية ، لان دى اول مرة يتقدم بلاغ من مزرعتكم تجاه اى حد من جيرانكم

سالم بذهول : ازاى حضرتك تقول الكلام ده ، فى تلات بلاغات متقدمين قبل كده فى نفس الشخص و اتهمناه فيها بمحاولة التخريب

النقيب حمدى : و انا بأكد لحضرتك للمرة التانية ان الكلام ده ما حصلش أبدا، انا مسئول عن النقطة هنا من خمس سنين فاتوا ، و كنت اعرف سليم بية الله يرحمه معرفة شخصية ، و ماينفعش ابدا نعرف ان فى حد بيحاول يأذى بنته او يخرب المزرعة ونسكت من غبر مانتحرك ، ولو حضرتك معاك ارقام المحاضر اللى بتتكلم عنها دى ، ممكن نبحث فيها عشان تتأكد بنفسك ، لكن اللى حضرتك لازم تعرفه ان سليم بية الله يرحمه كانت خدماته مغرقة الكل هنا ، و لا يمكن ابدا يوصللنا ان فى حد بيضايق بنته او بيتعرضلها بعد موته وهنقف متكتفين ، كنا حتى على الاقل هنتدخل بشكل ودى و نتأكد ان ده مايحصلش مرة تانية

المحامى موجها حديثه لسالم : واضح ان شريكك كان له غرض معين ورا اللى عمله ده يا سالم بية

النقيب حمدى بفضول : شريكه مين ، و ايه دخله باللى حصل بالظبط

المحامى : شريكه الهلالى

النقيب حمدى بعدم فهم : شريك مين حضرتك ممكن توضحلى

المحامى : فى واحد اسمه الهلالى يبقى شريك سالم بية، واللى فهمه انه له هنا علاقات عملت له محاضر ضد الزينى ، و اللى على مايبدو انه له مصلحة فى انه يفهمه ده بالكذب

النقيب حمدى : ده لان ماحدش هيعمل محضر فى روحه يامتر

المحامى : مش فاهم

النقيب حمدى : هو حضرتك ما تعرفش اسم خصمك فى القضية بالكامل

المحامى باستغراب : الحقيقة اللى وصلنى ان اسمه الزينى

النقيب حمدى : ده اسم الشهرة اللى اتعرف بيه هنا ، لكن اسمه الحقيقى .. زينى عبد العزيز الهلالى

لينتفض سالم من جلسته وهو يصيح بغضب : يعنى ايه ، يعنى السنين دى كلها كان بيخدعنى ، طب كان يقصد ايه من اللى عمله ده

جلال : ايوة يا فندم ، بس الهلالى اللى احنا نعرفه حاليا اسمه عبد الجليل الهلالى ومحبوس على ذمة قضايا كتير ، و ما اسموش زينى

النقيب حمدى : ايوة فعلا ، بس زينى ده يبقى ابن اخوه و شريكه فى الارض فى نفس الوقت ، و هو اللى بيدير المزرعة

جلال : يعنى من البداية و هو حاطط عينه على الارض ، وبيخططلها باقذر الوسايل

لتنظر فؤادة لعمها بعتاب شديد و لكنها عادت بنظرها الى النقيب حمدى و قالت : انا كل الكلام ده دلوقتى مايهمنيش ، انا اللى يهمنى فعلا انه يتحاسب على كل اللى عمله ، هو بقى ، ابوه ، عمه .. ماتفرقش ، لكن بالشكل ده انا احب اضيف اتهام تانى ما اتكلمتش عنه قبل كده

النقيب حمدى : اتفضلى … عاوزة تتهميه بايه تانى

فؤادة : بمحاولة قتلى ، و ان هو اللى ورا ضرب النار اللى اتعرضتله من فترة قريبة

المحامى : وانا معايا صور من اوراق الواقعة يا فندم و تفاصيلها

النقيب حمدى و هو ينظر لفؤادة : عموما ، ماتقلقيش ، هو موجود برة ، و التحقيق معاه هيبتدى حالا ، و هواجهه بكل التهم المنسوبه اليه

جلال : طب المفروض اننا دلوقتى نمشى واللا ننتظر برة واللا ايه

المحامى : اتوكلوا انتو على الله ، و انا هتابع التحقيقات وصلت لفين وهبلغكم فورا بكل جديد

عند خروجهم من مكتب النقيب حمدى فوجئوا بأن الزينى ماهو الا شاب فى اوائل الثلاثينيات من عمره ، تبدو عليه العنجهية الشديدة ، و ما ان رأته فؤادة حتى اقتربت منه قائلة بقوة : نجوم السماء اقرب لك من انك تلمس حفنة تراب واحدة من ارضى يا ابن الهلالى ، و لو ما ارتجعتش ، هتحصل عمك وتونسوا بعض فى السجن

ليقول لها الزينى بحقد شديد : و انتى لو كنتى فاكرة انك ممكن تتجوزى عمى و تحطى ايدك على ارضى ، يبقى بموتك يا بنت سليم

لتنظر له فؤادة بصدمة ، فهى لم تفهم مقصده ، من منهم يطمع فى ارض الاخر ، كيف له ان يقلب الحقائق هكذا فى لحظة واحدة ، ولكنها افاقت على جلال وهو يجذبها من ذراعها و يذهب بها الى السيارة

عند عودتهم ، اصطحب سالم العم نبيل معه فى سيارته ، وكانت فؤادة وعارف بصحبة جلال بسيارته

فى سيارة جلال ، كانت فؤادة شاردة للغاية فقال عارف : مالك يا فؤادة ، ايه اللى شاغل بالك اوى كده

فؤادة بانتباه : الكلام اللى قالهولى الزينى ده غريب اوى

جلال : انا لما سمعته استغربت ، بس بعد كده مالقيتلوش غير تفسير واحد

فؤادة بفضول : و ايه التفسير ده

جلال : اللى اعرفه ان الهلالى ما عندوش ولاد ، و طول عمره متولى ابن اخوه واللى اتفاجئت النهاردة بس ان ابن اخوه ده يبقى الزينى نفسه و اللى بيعتبر نفسه الوريث الوحيد لكل ممتلكات الهلالى

واللى فهمته ان الزينى ما كانش موافق على فكرة جوازك من عمه ، عشان ماتشاركيهوش فى الميراث

فؤادة : طب ما انا سيبت له الدنيا كلها وهربت ، عاوز منى ايه تانى

جلال : عاوز يقفل الحكاية بطريقة تضمن له انها ماتتفتحش تانى ابدا ، و ممكن يكون خاف انه بدل ما الهلالى ياخد المزرعة منك … يكتب لك هو نصيبة فى المزرعة التانية

فؤادة بذهول : يقوم يحاول يقتلنى

جلال : هو اكيد عارف ان عمه يقدر بكل سهولة انه يشترى المزرعة من عمك ، و ان وجودك هو العقبة الوحيدة اللى قدامه واللى تمنعه من انه يحط ايده على المزرعة بتاعتك ، فممكن يكون تفكيره جابه ان الحل الامثل بالنسبة له انه يخلص منك

يتبع الفصل التالي اضغط هنا

• الفهرس يحتوي على جميع فصول الرواية كاملة :"رواية فؤادة" اضغط على اسم الرواية