رواية سحر سمرة الفصل الاول بقلم أمل نصر
رواية سحر سمرة الفصل الاول
جالسه على ارضية الشرفه الصخريه .. وهى ضامه ركبتيها الى صدرها .. ومستنده بظهرها على حائط الشرفه .. مغمضه عيناها وتاركه وجهها لهذه النسمات البارده .. تود لو انتقلت هذه البروده لخلايا عقلها .. فتوقف هذه الماكينات الدائره بالتفكير .. او تتوقف اذنها عن الاستماع لهذه الاصوات المزعجه .. او يحدث شيئاً ما وينقلها من عالمها نهائياً !!..
فتحت عيناها مجلفه لصوت الباب وهو يفتح ويغلق بعدها .. لتراها وهى تتقدم بخطواتها نحوها بجسدها الهزيل وعيناها التى لا يخلو منها الكحل الاسود .. رغم تقدم سنوات عمرها اللى قاربت الخمسين .. سبب شقائها وعذابها !!!
- انت لسه يابت مالبستيش ولا جهزتى نفسك !.
اشاحت بوجهها للجهه الاخرى .. دون ان تنطق بحرف
اقتربت المرأه اكثر منها لتهدر بصوت خفيض
- يابت جومى وبلاش عمايلك دى .. الضيوف على وصول .. جاعدالى على الارض البارده .. مش خايفه لتمرضى .
اعتدلت بوجهها وهى ترمقها بلامبالاه
- وافرضى مرضت ولا تعبت يعنى .. ايه هايحصل ؟!.
زفرت المرأه بضيق ثم اردفت
- وبعدين معاكى يا" سمره " ؟!.. انتى كان حد جبرك !!... مش انتى اللى جولتى امين !.. لزوموا ايه بجى الكلام الماسخ ده بس ؟!..
- اكيد مالوش لزوم الكلام .. انا عارفه لو اتكلمت من هنا لبكره .. كأنى بأدن فى مالطا !.
قالتها وهى تنهض عن الارض .. وتترك الشرفه .. لتتبعها الاخرى بداخل الغرفه .
- يعنى خلاص هاتلبسى وتجهزى نفسك ؟! .. حريم عمامك بيستعجلوكى تحت وبيسألوا عليكى .
"سمره" وهى جالسه على طرف الفراش
- انزلى يا امى .. انا هالبس واتعدل واتزوج .. وانزل تحت وسطيهم اضحك واهزر كمان !.. راضيه يا امى ؟!.
المرأه وهى ترمقها بنظرات حانقه قبل ان تتقدم من باب الغرفه
- البسى ياختى وهازرى واضحكى .. لهو انتى اجل من بت خالك " رضوى " اللى عاملاها فرح فى اؤضتها مع صحباتها ..فرحانه بخطوبتها ب" قاسم ".
اؤمات برأسها باستخفاف وهى تتمتم بصوت خفيض
- قاسم .. اممم !!!
المرأه بضيق
- ماشى يا" سمره " .. اما اشوف اخرتها ايه معاكى يابت" بسيمه " .. انا هابعتلك "شيماء "بت خالك
.. تونسك وانتى بتلبسى .
نظرت اليها " سمره " بخواء وهى تخرج من باب الغرفه وتصفقه بقوه ..
................................
وفى الغرفه الاخرى كانت تلتف بفستانها امام المراَه بسعاده وهى تضحك مع الفتيات صديقاتها
- ها ايه رأيكم يابنات ؟ .. حلو الفستان عليا .. طب اللون لايق على وشى ؟!
اردفت " سميه "صديقتها
- يابنتى اهمدى شويه .. خوتينا .. كام مره تسألينا من ساعة ما جينا .
نقلت انظارها من المراَه اليها
- طب اعمل ايه طيب ؟! .. جلجانه يا " سميه " .. طمنونى يابنات .. انا مش عايزه اطلع اقل منها .
زفرت الفتاه بضيق فأردفت الاخرى
- مش كده يا " رضوى " .. ماتحطهاش فى مخك .. عشان تعرفى تفرحى .
- افرح ازاى انتى كمان ؟! .. وهى هاتعيش معايا فى نفس البيت .. هو انا متحملاها فى بيت ابويا .. عشان اتحملها كمان فى بيت جوزى .
قالتها وهى تتقدم بخطواتها وتجلس على طرف الفراش .. فجلست بجوارها " سميه " لتسألها
- جوليلى يا" رضوى " .. هو انتى خايفه من " سمره " ل" قاسم " يبصلها تانى ويرجع فى كلامه .
خرجت منها تنهيده مثقله قبل ان تقول
- خايفه !!! ... دا انا بموت كل دجيجه وانا بفكر فى الموضوع ده .. انا عارفه من زمان انه هايموت عليها .. وياما اتجدملها وساق عليها ناس عشان ترضى وتجبل بيه .. وهى دايماً ترفض .. وانا طول عمرى بموت على نظره منه .. جوم لما يجى اليوم ده اللى بتمناه يحس بيا فيه ويطلبنى للجواز .. يجى بعد هى ما تقبل باخوه ويبجى جوازى انا وهى فى يوم واحد و بنفس العماره وشقتها جصادى .. عشان تبجى عقده ليا العمر كله .
قالت الاخيره بصرخه .. لتلفت بعدها وترى الفتيات ينظرن اليها بأشفاق فتنهض مسرعه نحو المراَه وهى تردف
- جومى انتى وهى ساعدونى .. انا عايزه ابجى احلى منها مية مره الليله .. عايزه مايشوفش حد غيرى فى الفرح كله .. فاهمين !!!.
.........................................
وفى منزل اخر قريب
خرج من غرفته وهو يهتف على اخته الصغرى
- مروه .. انتى يابت ؟
سبقت الوالده فى الرد وهى جالسه ببهو المنزل بجوار زوجها
- مالك بتنده ليه عليها يا عريس ؟!
اتسعت ابتسامته وهى يجلس بجوارها ويقبلها اعلى رأسها
- ست الحبايب !.
ابتسمت المرأه بسعاده قبل ان تسأله
- فرحان ياولدى ؟ .. ربنا يتم فرحتك على خير .
اومأ براسه موافقاً دون ان ينطق بحرف ... فتدخل الرجل المسن
- وما يفرحش ليه ؟؟.. وهو هايتجوز احلى بنات البلد .. تعليم وجمال .
ازدادت ابتسامته اتساعاً وهو ينهض
- وبعدين معاكم بجى انا مش هاخلص منكم النهارده .. بت يامروه .. انتى فين يابت ؟؟.
اتت الفتاه مهروله
- ايوه يا " رفعت " .. انا جيت اها .. عايزنى فى ايه بس ياعريس ؟
تكلم بجديه
- كويتى العبايه ولامعتى الجزمه الجديده
الفتاه وهى تضحك
- طبعاً امال ايه ؟... كويت العبايه وعطرتها ولمعت الجزمه كمان .. فاضل بس انك تلبسهم ياعريس
اومأ مرحباً
- كويس .. طب وحضرتى برضك هدوم " قاسم " وحاجته ؟!.
حركت رأسها بالنفى
- لا ماعملتش اى حاجه .. عشان هو جافل على نفسه من الصبح .. ولما خبطت عليه اسأله ..
قالى .. مالكيش دعوه .. وانا هاحضر كل حاجه بنفسى !!!.
عقد حاجبيه باندهاش
- بنفسه !!!!.
...............................
وبداخل غرفته كان واقفاً بجسده الطويل وعضلاته البارزه من الفانله التى يلبسها اعلى جسده .. امام النافذه الخشب المفتوحه على مصراعيها .. ينفث دخان سيجارته بين اطراف اصابعه .. وهو ينظر لأشجار الحديقه الخلفيه للمنزل .. بعينيه العميقه بنظره لاتنبئ بالخير .. لا احد يستطيع قرأة مايدور بعقله .. ولا احد يعرف ماذا يريد ؟؟ .. ظل هكذا لفتره ليست بقليله .. وبعدها عاد ثانية بخطواتٍ متمهله ليجلس على طرف الفراش .. فتناول حذاءه من على الارض .. ليقوم بمسحها بخرقه قديمه وتلميعها .. ليردف لنفسه بوعيد .. والسيجاره مازلت فى فمه .
- حاضر يا" سمره " .. حاااااضر ؟!.
تناول السيجاره بعدها من فمه وهو ينظر لها ويكمل
- ان ماكنت اخليكى تركعى مابجاش انا !! .. بس تيجى العشيه !!!.
...............................
وفى المساء
حضر اهل العريسان لمنزل الحاج " سليمان" والد " رضوى " والخال الاكبر ل" سمره " ... ليجلس الرجال بداخل المندره لقرأة الفاتحه .. والنساء بداخل البهو الكبير للمنزل يتسامرن ويرقصن على انغام الموسيقى .
رضوى كانت ترقص بسعاده مع صديقاتها " سميه " و" نورا" وبعض الاقارب فى انتظار العريس وهى تنقل انظارها .. لتلك الجالسه على مقعدها بجوار النساء .. مستقيمة الظهر .. تبتسم بتكلف وكأنها اميره بجوار رعاياها .. بهذا الفستان المنسدل على جسدها المتناسق .. وكانه فُصل خصيصاً لها مع هذه المساحيق الخفيفه التى وضعتها بوجهها ومع زلك زادتها جمالاً وبهاءاً .. مابال هذه الفتاه تبدوا جميله ومبهره فى اى شئ .. وبكل حاله .. ونظرات النساء حولها خير دليل على صدق ماتشعر به .
هذا ما كانت تشعر به ايضاً معظم نساء العائله التى كن ينظرن ل" سمره " بانبهار لا يخلوا من الحقد لبعض النفوس الكارهه .. وتفاخر اخريات كأهل العريس المحظوظ كشقيقته "مروه " التى كانت تتحدث عنها وترقص بسعاده مع بعض الاقارب
اما " سمره " التى كانت ترسم البسمه على وجهها .. فكانت فى عالم اخر .. دوامه من الافكار المتلاحقه ساقطه بها ولا تجد منفذ للخروج منها .. فاقت من شرودها على اصوات النساء التى تهلل للعريسان الذان يدلفان بجوار الرجل الكبير " سليمان" وبعض رجال العائله .. رفعت انظارها لتفاجأ بنظرته المتصيده لها وهو يسير بجوار اخيه " رفعت " الذى يبتسم بسعاده ظاهره .. فتعمدت تجاهله .. لتزيد من اشتعال عينيه وهو يرى ابتسامتها الساحره لاخيه .
جلس بجوار " رضوى " .. المتلهفه لنظره او كلمة اعجاب ولو بسيطه منه تثلج صدرها .
- انت مين كوالك العبايه النهارده ؟!.
- هه ... ايه بتجولى ؟!.
قالها وهو يفيق من شرده فااكملت هى بلهفه
- اصل العبايه اللى انت لابسها زينه جوى .. دا غير ان انت نفسك شكلك حلو جوى النهارده .
رفع حاجبه بتكلف ليرد عليها ببرود .
- شكلى حلو !!!... طب كويس !
خبئت ابتسامتها قليلاً ثم اردفت بأمل
- طب ايه رأيك فيا انا ؟؟ .. ولا الفستان اللى لابساه ؟.
نظر اليها بتقيم ثم اردف باقتضاب
- زينه !.... وفستانك زين برضوا !!.
قالها واللتفت ثانية لناحيه الاخرى .. ليزيد بداخلها هذا الشعور بالاحباط وخيبة الامل .. وهى تراه لا يرفع عينيه عنها .
وفى الناحيه الاخرى وهى جالسه بجوار " رفعت " .. الذى لايمل الكلام والثناء على جمالها وهى تبتبسم برزانه
- تبارك الله فى ماخلق .. انتى ايه بالظبط ؟!.
سمره بابتسامه ودوده
- يعنى هاكون ايه بس ؟؟ .. انا كده هاتغر يا" رفعت " .. بكلامك ده !
- انتى تتغرى وتعملى اللى انتى عايزاه .. يا"سمره" ياست البنات انتى
قالها بسعاده ظاهره بعينيه .. اشعرتها ببعض الفرح .. وهى تبث بداخلها بعض الطمأنينه لتريح عقلها ولو قليلاً .
مع مرور الوقت بدأت " سمره " تندمج مع اجواء الفرح حولها من دعابات النساء الاقارب ورقص بعض الشباب الصغار على انغام الموسيقى مع كلمات الغزل التى كانت يمطرها بها " رفعت " وهى تتجنب النظر لهذا المدعو " قاسم " وهى تشعر بنظراته المسلطه عليها ..
ومع قرب انتهاء حفلة الخطوبه المقتصره فقط على الاهل والاقارب وانصراف بعضهم .. عادا العريسان مره اخرى للمندره لتبادل السمر والاحاديث مع شباب ورجال العائله .
اما الفتيات العرائس فتجمعن فى جلسه واحده مع نساء العائله .. فى جو يسوده المرح والاحاديث الوديه ..
"نعيمه "زوجة" سليمان "بغبطه
- والنبى ياام " رفعت " .. انا لو كان اتجلى ان اليوم دا هاياجى عمرى ماكنت اصدق .
نفيسه ام العريسان بضحكه
- ومين سمعك يااختى ..دا انا نفسى كنت خايفه لا اموت ولا يجى اليوم ده .. اللى اشوف ولدى الكبير " رفعت " عريس فيه !
مروه بسرعه فى الرد
- بعد الشر عليكى ياما .. بلاش كلامك ده وافرحى .. دا انت النهارده جريتى فاتحة الاتنين .. مش واحد فيهم .
وايه على جوز عرايس يحلوا من على حبل المشنقه
قالتها الاخيره بابتسامه واسعه وهى نظراتها مرتكزه على " سمره " .. لتزيد من اشتعال الحقد فى قلب " رضوى " .. وهى تشعر وكأن المقصوده بهذا الكلام " سمره " وحدها .. وهى مجرد تابع .. اما " سمره " فكانت تحصى الدقائق لانتهاء السهره وهى تنظر ل" بسيمه " التى كانت تومئ لها بعيناها لتتبادل معهم الحديث .. الا انها لم تستطع الصمود اكثر من ذلك لتردف بابتسامه مسروقه
- طب ياجماعه عن اذنكم بجى .. اصل تعبانه وعايزه اريح شويه .
- استنى يابت لسه الوجت بدرى
قالتها " بسيمه " بشده .. ولكن " نعيمه " لحقتها بموده
- سيبيها يا" بسيمه " .. اسم الله عليها تلاجيها تعبت .. خليها تروح تريح جسمها .. روحى ياحبيبتى بس ياريت فى الاول تبعتيلى حد ينده على واحد من الشباب " رفعت " ولا " قاسم " .. عشان حد فيهم يوصلنا .
- ما لسه بدرى !!
خرجت من فم الاثنتان " بسيمه " و" نعيمه" لتردف المرأه
- بدرى من عمركم .. روحى ياحبيبتى زى ماجولتلك .
- ما تستنى ياخالتى شويه .. انتى صاحبة بيت .
قالتها" سمره" بموده وصدق .. لتزيد من فرحة الاخرى هى وابنتها التى اردفت بابتسامه واسعه
- تسلمى يا " سمره " ياقمر انتى .. احنا ان كان علينا مش عايزين نمشى .. بس انتى عارفه ابويا .. حماكى عن جريب ان شاء الله .. لازم ياخد الدوا بتاعه فى وجته .
اومأت " سمره " براسها بتفهم
- ااه .. ماشى حاضر .. ثوانى هاشوف عيل ينده على واحد منهم فى المندره .
قالتها وذهبت امام نظراتهم الفرحه .
بعد ان ابتعدت " سمره " عنهم .. وهى تبحث عن ابن خالها الصغير " مروان" وقبل ان تصل لباب المندره .. فوجئت بذراعٍ قويه .. تدخلها بسرعه داخل غرفة المكتب لعمها .. لتشهق مزعوره وقبل ان يخرج منها الصوت لتصرخ .. فوجئت بكفه تطبق على انفاسها .. وعيناها القويه تنظر لخوفها بتشفى !!!
يتبع الفصل التالي اضغط هنا
- الفهرس يحتوي على جميع فصول الرواية كاملة :"رواية سحر سمرة" اضغط على اسم الرواية