رواية بنات المنشاوي الفصل الخامس والعشرون بقلم خلود وائل
رواية بنات المنشاوي الفصل الخامس والعشرون
دعاء:النمرة غلط يافارس بيه
فارس:انا عارف اني زودتها چوي بس والله غصب عني يادعاء كيف يعني تنسي تقوليلي انك خارچه برات البيت للدرچه دى انا مش في تفكيرك
دعاء بحنق:وقلتلك غصب عني عملتلي ايه عاد ....لا قبلت مني اعتذار ولا رديت علي مكالماتي وبتشوف رسايلي ومبتردش واصل وكل دة عشان ايه يعني
فارس:اتحددتي معاي زين يادعاء
دعاء:وانت تبچالي ايه عشان اتحددت معاك عدل ولا عوچ
فارس بصدمه:وة كانك واعيه لل بتقوليه ....اعقلي يادعاء
دعاء: خلاص ال مابينا انتهي يافارس من لحظه مااستغنيت عني وفضلت البعد في اكتر وقت كنت محتچالك فيه وياريت متتصلش بيا تاني هيكون احسن لينا احنا الاتنين
فارس بعصبيه مطلقه:كلامك دة ولا يفرق معاي انتي بتاعتي انا وبس ومهسبكيش تكوني لغيري واصل ولو حكمت هقتلك واقتل حالي بعدها ونرتاح
دعاء بحزن والدموع تملاء عينيها:مع السلامه ياواد عمي
اغلقت دعاء الخط لتنهي المكالمه وجففت دموعها سريعا وتجاهلت علي مدار اليوم كم المكالمات والرسائل الهائله من فارس لتنساها بفعل دوامه العمل .....اما في الجامعه فكانت آيه حاضرة للمحاضرات من بدايه اليوم إلي ان حان موعد محاضرة دكتور سيف
ليان:مش يلا بقي ولا ايه
آيه وهي تمط شفتيها:لاااااءا
ليان:اخزي الشيطان وابعدي عن الشر وغنيلو
آيه:هلاقيه جاي يرقصلي....يابنتي النهاردة لازم اصفي الحسابات القديمه ال مابينا ونبداء صفحه جديدة
ليان وهي تضيق عينيها:مش مرتحالك ياآيه
آيه بمرح:انا.....داانا غلبااان
ليان:هاتها جمايل يارب
دلف دكتور سيف لقاعه المحاضرات ليعتدل جميع الطلبه في امكانهم ومن نقطه ليست ببعيدة ترمقه آيه بنظرات مبهمه وسط اعجاب الفتيات به وهمساتهم التي تثير غيرتها في بعض الاحيان
سيف:Good afternoon.....النهاردة هنتكلم عن المهلبيه ال عملتوها في البحث ال طلبته قبل مانبداء المحاضرة
سمير:ليه بس يادكتور داانا عملت ال حضرتك طلبته بالمللي
مهند:يادكتور سيف والله علي اقصي مجهود وتعب
لميس:البحث بتاعي مش مظبوط ولا ايه يادكتور
سيف بحدة:البحث دة تروحو تقدموه للبرنس بتاع الكبدة يلف فيه السندويتشات دة لعب عيال مش شغل مهندسين....كميه هبد مايعلم بيها الا ربنا
عم الصمت القاتل في ارجاء المكان ليستكمل سيف كلامه :ولا بحث واحد يوحد ربنا عليه العين
آيه بتحدي :ولا واحد يادكتور؟
نظر سيف بأتجاه الصوت ليتفاجئ بها جالسه بجوار ليان وبعض الفتيات الاخريات لتتجه إليها جميع الانظار
سيف:انتي مش ممنوعه من حضور محضراتي لاخر السنه ولا انا بيتهيقلي!
آيه بنبرة واثقه وهي تهم بالوقوف:انا سألت سؤال ومحتاجه اجابه عليه ....حضرتك متأكد انه فعلا ولا بحث عليه العين؟
سيف:وبتسألي علي اي اساس
آيه:علي اساس اني طالبه وعملت البحث المطلوب بالظبط
سيف :ومنين متأكدة انك عملتي المطلوب بالظبط
آيه:ماعليك انت بقي دة سر الصنعه.....ثم هتفت قائله:درجات الكوينز هاخدها كامله مع حضوري لجميع محضرات حضرتك لاخر السنه
سيف بتهكم:والا🤨
آيه:تظلم عند عميد الكليه ونجيب اساتذة المادة الكبار ونشوف رأيهم ايه
شعر سيف بالحرج قليلا ولكن كبريائه يمنعه من تنفيذ طلبات آيه والرضوخ لها
سيف:اتفضلي هنا ياآنسه آيه اشرحيلنا عملتي البحث اذاي وايه ال كتبتيه فيه
اتجهت آيه بثقه ناحيه مكتب سيف لتقف بجوارة هامسه له من بعد:دة علي اساس انك مشفتوش بنفسك
تجاهل سيف كلمات آيه لينظر في الفراغ لتغطاظ منه آيه وبشدة وتبداء في شرح فكرة البحث وطريقه تجميع المعلومات المطلوبه وكل الخطوات التي اتبعتها في اعداد البحث الخاص بها بينما يتابعها سيف من زاويه قريبه بأعجاب شديد لثقتها القويه بنفسها وثباتها امام زملائها وطريقه شرحها وتفكيرها ليقطع شرودة كلمات آيه الموجهه اليه:ولا ايه يادكتور سيف؟
سيف:ها ... طبعا اكيد
آيه بفرحه:بجد
سيف:هو ايه الل بجد
آيه:حضرتك لسه موافق اني احضر محضراتك تاني
اغتاظ سيف بشدة فهو لم يكن ينوي اعادتها لمحاضراته ولكنه لا يستطيع فقدان هيبته أمام الطلبه ففضل الصمت
آيه:بس ايه راي حضرتك في البحث بتاعي
سيف ببرود وهو يتناول احدي الكتب بيديه:اممم مش بطال
رمقته آيه بعينيها الزرقاوتين اللاتي اشتعلتا غضبا لينظر لها سيف بطرف عينيه قائلا:عجبتك الوقفه هنا ولا ايه ياآنسه؟
انسحبت آيه ببرود لتعود لمجلسها بينما يثني عليها جميع زملائها بأعجاب شديد
رامز:دماغ الماظ يابشمهندسه
داليدا:يخرب بيت دماغك دي
سمير:يالهوي علي التفكير ايه يابنتي اللفه دي
ميار:طريقه شرحك ولا اجدعها دكتور
جلست آيه بجوار ليان ويبدو علي وجهها علامات الضيق
ليان بهمس:ايه مالك مش فرحانه ليه
آيه:افرح بأيه
ليان:يابنتي انتي ناويه تجننيني؟! دة انتي شرحتيلنا ذي اكبر دكتور بالظبط وكمان رجعتي تحضري وخدتي درجات الكوينز كامله يابختك
آيه:منكدتش عليه
ليان بتعجب:هو مين
آيه:اخوكي ... معرفتش انكد عليه
ليان بضحكه مكتومه: يخرب عقلك يا شيخه
**********
حل المساء وأضائت الانوار قصر المنشاوي وتحولت الحديقه الكبيرة لقاعه غايه في الجمال والرقي والفخامه يتوافد اليها نخبه المجتمع من كل حدب وصوب ليقف ابناء حسان المنشاوي بشموخ لاستقبال الضيوف والترحيب بهم اما في الداخل فقد كانت الاجواء حماسيه بشكل لا يوصف فهاهي صفيه ترحب بمن اتو لتهنئتها من الاهل والاحباب وقلبها لاتسعه الفرحه من شدتها أما بالاعلي في غرفه العروس فكانت تضع اللمسات النهائيه لينظر لها فتيات العائله بأعجاب شديد فهاهي مرام تبدو كملاك ابيض بفستان ملوكي ضخم وملامحها الانثويه الفاتنه التي تسلب الالباب بعينيها العسليتين وخديها الورديين اللذين يذدادان حسنا بوجود غمازات بهما وشعرها الحريري المنسدل بنعومه ويزينه تاج كبير في المنتصف مع بعض الخصلات التي ارجعتها للخلف مع طرحه طويله معها بيشه للوجه
غزال:بسم الله مشاء الله احلي عروسه تشوفها عيني تكون انتي يامرام
هنيه:يابختك ياسعد والله
مريم:بيضالك في القفص يابن هارون
مرام بفرحه:انا حلوة يابنات
غزال:چولي للقمر چوم وانا اققعد مكانك
مريم:احلي عروسه في البلد كلياتها والله
دلفت صفيه وبرفقتها اثنين من الخدم متجهه ناحيه مرام لتترقرق اعينها بالدموع وتحتضن مرام بشدة
صفيه: عشت وشوفت عروسه ذي القمر ياحبه عيني
مرام وهي تقبل يدي صفيه:ربنا يطولنا في عمرك يما
صفيه وهي تكفكف دموعها: يلا ياحبيبتي عريسك قرب يوصل واهله موجودين تحت
تعالت اصوات طلقات النار في الهواء معلنه وصول العريس لتتجه الفتيات جميعا للنافذة لرؤيته بينما اتجهت مرام لتسترق النظرات من خلف النافذة
صفيه:يلا يابنات كله ينزل تحت يلا
اسرعت الفتيات بالنزول لانتظار العروس لتتبعهم صفيه وخلفها مرام واتنين من الخدم خلفها ممسكين بديل الفستان عند نزولها سلم القصر الكبير ليقف الجميع انتباها واعجابا بمرام ودخولها بأسلوب الملوك
في فيلا الحديدي*****
كانت العائله مجتمعه علي طاوله العشاء ماعدا سامر الذي تغيب لحضور حفل زفاف احدي اهم العملاء بالشركه
صالح: سامر هيتأخر ولا ايه ياسيف
سيف:انشاء الله لا يابابا هو بس هيثبت حضورة نص ساعه مش اكتر وهيجي علي طول
صالح: المشوار لوحدة مش قليل يابني دي سوهاج
سيف:مش هنام غير لما يجي يابابا اطمن خير انشاء الله
دلفت ليان للغرفه لتشاركهم العشاء بمرحها المعتاد:يامساء الجمال والكريستال ياجماعه
جميعهم ماعدا سيف:مساء النور
سيف:مسائك ذي وشك
ليان بخفه ظل:الله ايه الحيرة دي بقاااا
تعالت ضحكات الجالسون بينما اتجهت ليان لتجلس علي كرسي السفرة الخاص بها بجوار سيف لتميل عليه بجسدها قائله:البت خدت عليك بونت ياكبو
سيف ببرود:البونت دة هديهولك انتي علي قفاكي لينا حساب بعدين
ليان:احم ...... يامنجي من المهالك يارب
فرح:بتتودودو في ايه كدة
سيف:ابدا ياستي دي سايقه الرخامه وعوزاني اشرحلها جزئيه في المنهج
فرح:يابخت من كان النائب خاله
انتهت العائله من تناول الطعام ليجلسو جميعا بغرفه المعيشه ويشاهدو التلفاز لينسحب سيف بهدوء ويقف بالحديقه موجها نظرة ناحيه ليان مشيرا لها بيديه ان تأتيه ..... ابتلعت ليان مافي حلقها بغصه واتجهت لسيف بالخارج ليقابلها سيف بوجه عابث بينما تملك الرعب منها لتقترب منه بحذر ليمسك بذراعها بقوة ناحيته قائلا:مين ابن الحلال ال كان بينقل محضراتي للست هانم صاحبتك
ليان بتوتر: والله....انا....انا...
سيف:انتي ايه انطقي
ليان: انا كنت بشرحلها ال بفهمه منك وبديها كشكول الملاحظات بتاعي
سيف:شيفاني عيل برياله ياليان .... انطقي .... واحدة بترتب علي الدفعه وامتياز كل سنه وعملت بحث ميفهمهوش غير طالب نابغه وتقوليلي بتشرحيلها
ليان :انا...انا.... والله كنت هقولك
سيف:هببتي ايه و خلتيها فاهمه المحضرات وكأنها موجودة انطقي
ليان بخوف:اوعدني متزعلش
سيف بحدة:ليااان
ليان:انا كنت بسجلها المحضرات بتاعتك وكل ملاحظاتك فويس نوت وبسألك علي الحجات ال بتقف عليها
تملك الغضب من سيف ليهتف:انا كنت حاسس والله مش معقول تفهم المنهج لوحدها كدة ...... انا سيف الحديدي حته عيله ذي دي تتحداني ماشي ان ماربيتكو انتو الاتنين مبقاش انا
ليان:ياسيف انت كنت عاوز تشيلها المادة حرام عليك
سيف بغيظ:حرام عليا اربي واحدة هزقتني قدام الطلبه بتوعي واتحدتني انتي مجنونه ياليان
حاولت ليان معالجه الوضع ولكن دون فائدة ليتركها سيف ويتجهه لسيارته ويقودها متجها للچيم حيث المكان الانسب لتفريغ طاقته السلبيه.......اما علي الجانب الاخر في قصر المنشاوي فقد كان حفل زفاف اسطوري يليق بعائله من اكبر واعرق عائلات الصعيد لينتهي بأصطحاب العريس وعائلته للعروس لقصر عائله السلانتي بزفه ضخمه ضجت بها شوارع البلدة بأكملها ليبداء فصل جديد في حياه مرام....
في شقه ورد*****
كانت تجلس آيه تذاكر في غرفتها لتتوقف وتغلق الكتاب الذي تدرس به وتستعيد بذاكرتها ماحدث معها اليوم لتعلو وجهها ابتسامه فخر وثقه اما عن دعاء فكانت توبخ نفسها عما فعلت مع فارس وتلومها بشدة فهي تعشقه بل ان عشقه يتملك قلبها ويتربع علي عرشه اما عن ورد فكانت تعد لحياتها القادمه وتدعو الله التوفيق والسعادة وتدون في ورقه الاشياء التي تريد شرائها لزواجها.....
في جناح سعد ومرام**""
كانت تجلس مرام علي فوتيه كبير موضوع بالقرب من السرير وتفرك يديها بشدة وتوتر ملحوظ ليقترب منها سعد بسعادة غامرة ويرفع البيشه عن وجهها لتتسع ابتسامته قائلا: والله براوة عليك ياواد ياسعد
مرام بخجل:ليه
سعد:نقاوتي ولا القمر اخترت مرتي أجمل واحدة في الدنيا كلياتها ادب واخلاق واحترام ودلال مفيش بعد اكدة عاد
احمرت وجنتي مرام بشدة ليتلجم لسانها ولا تستطيع الرد ليمسكها سعد من يديها ويتجه بها ناحيه الصالون الموضوع بالجناح ويجلس بقربها وينظر اليها بحنو قائلا:في كلمتين مهمين چوي لازم اقولهوملك يامرام لو تسمحي.
يتبع الفصل السادس والعشرون اضغط هنا
- الفهرس يحتوي على جميع فصول الرواية كاملة :"رواية بنات المنشاوي" اضغط على اسم الرواية