رواية قطة بين مخالب الصقور الفصل الثالث بقلم ملك محمد
رواية قطة بين مخالب الصقور الفصل الثالث
آدم : بتعملي اي
تالا وهي تضع ملابسها داخل الحقيبه : بجهز شنطتي لأن زي مانت عارف عمار بيدور عليا ومينفعش يلاقيني هنا
آدم : هو احنا مش اتفقنا اننا هنهرب سوا
تالا : مش مستعده اضحي بحياة حد خصوصاً انت
آدم : قولتلك متخفيش كل حاجه هتبقى تمام
تالا : هو اي ال مخفش انت ليه محسسني انك اول مره تعرف نادر
آدم : انا عارف نادر وعارف ان القتل عنده زي اللعبه بس بردو خليكي واثقه فيا وتعالي معايا
تالا بعصبيه: انا خسرت اخويا قبل كدا ومش مستعده اخسرك فاهم ولا لا
آدم : بس انتي قولتي انك ناويه تهربي
تالا : حصل بس لوحدي مش معاك
آدم : وانا مش هسيبك ورجلي ع رجلك
تالا وهي تضع ملابسها ف الحقيبه : آدم انا قولت ال عندي وانتهى ممكن تسبني وتخرج دلوقتي
آدم أمسك يديها قائلاً : تالا انا مش هسيبك
تالا بحزن : يبقى هتموت وانا قولت اني مش مستعده اخسرك
آدم : وحتى لو فيها موتي مش مهم المهم اكون معاكي
تالا : للأسف حبنا محكوم عليه بالإعدام والقدر صعب يجمعنا
آدم : بس احنا محاولناش حتى سبينا نحاول وبعدها نقدر نحكم
تالا نظرت لعينيه بصمت
آدم : ثقي فيا مره واحده بس
___________
"في منزل عمار"
دخل الى الفيلا والغضب يملأ وجهه كانت عائلته تجلس على طاولة الطعام
رزان : اهو عمار جه تعالى دانت حماتك بتحبك
أجاب بضيق: مليش نفس كملوا أكل انتو
وتركهم ومضى
والدته : في اي ياعمار حساك مش ع بعضك من امبارح
عمار : مفيش ياماما انا طالع أوضتي
ثم صعد لغرفته
رزان بتعجب : هو ماله كدا ياماما
والدتها : مش عارفه كملي أكلك انتي تلاقي في مشاكل ف الشغل
"في غرفة عمار خلع معطفه وألقاه بغضب وهو يحدث نفسه قائلا "
: يعني اي محدش لاقيها هتكون الأرض انشقت وبلعتها ولا اي يعني
___بقلم ملك محمد ______
"في منزل اكرم السيوفي"
نادر بغضب وصوت أجش مرتفع يملأ اركان المنزل
:تالا فين ياشريف
شريف بخوف : خرجت يانادر بيه
نادر بغضب : خرجت فين انطق
شريف : آدم كان رايح يجيب شوية طلبات للمطبخ وهي أصرت تروح معاه قالت انها من زمان مخرجتش وعايزه تغير جو
نادر بغضب وعصبيه : الله الله الهانم طالعه تشم هوا وعمار قالب عليها الدنيا بره هي الهانم نسيت نفسها ولا اي وبعدين ازاي تخرج بدون أذني واضح انها اتجننت خلاص
خرج والده من مكتبه قائلا : بتزعق كدا ليه يانادر في اي
نادر بحده : الهانم خرجت
اكرم : خرجت ! خرجت ازاي وهي عارفه ان عمار بيدور عليها ومينفعش يعرف ان ليها علاقه بالفيلا هنا
نادر بغضب : انا مبقتش فاهم حاجه البنت دي هتجنني خلاص
كاميليا بهدوء وخبث : يعني كل ال فارق معاك انها خرجت بره الفيلا ومش فارق انها خرجت مع سي آدم
ثم ضحكت بخبث
نادر بتعجب اقترب منها قائلا : تقصدي اي بالي انت بتقوليه داه
كاميليا بخبث : لا انا مقصدش حاجه بس ال عايز يفهم هيفهم
جذب نادر مفاتيح سيارته من على الطاوله وهم مسرعاً للخارج
_________
"ف السوبر ماركت"
آدم : شوفي كدا الفلفل دا حلو ولا
تالا بهدوء : اه حلو
آدم : هو انتي طالعه تغيري جو ولا تنكدي ع نفسك
تالا : اه حلو لولولولولي كدا كويس
آدم بضحك : اه خليكي مفرفشه كدا تعرفي اني بحب ضحكتك خليكي اضحكي ع طول
تالا بإبتسامة خجل : حاضر
آدم : انا حجزت التذاكر وكل حاجه جاهزه اول لما ابعتلك رساله تنزلي تمام
تالا : مابلاش ياآدم انا قلبي مش مطمن
آدم : قولتلك متخفيش طول مانا جمبك بس قوليلي صحيح انتي موافقه تتجوزي ابن الخدام بتاعك ولا لا
تالا بإبتسامه : معرفش هفكر لسه اصل بصراحه مش من مستوايا خالص
آدم : نعم يااختي
تالا بضحك : بهزر ياعمنا اساسا انا بحبك من وأحنا صغيرين وانت عارف كدا فاكر لما كانت مرات عمي بتعاقبني لما اتشاقا ف البيت وتحبسني ف الأوضه بدون أكل وانت كنت تتسحب وتجبلي الأكل ع أوضتي
آدم بضحك : فاكر طبعاً دانا حتى ياما اكلت علقات بسببك بس بردو ع قلبي زي العسل
تالا : مانا بردو ياما استخبيت ف المطبخ تحت الطربيزه علشان اشوفك وانت مع عمو شريف بتعملوا أكل وكنت بفضل طول الوقت مستخبيه تحت لحد مارقبتي كانت بتوجعني
آدم بضحك : ع فكره انا كنت عارف انك تحت الطربيزه وكنت بسيبك
تالا بحزن : كانت ايام حلوه اوي بس لما كبرت كل الأيام الحلوه دي راحت وبدأو يستغلوني ف شغلهم وحاجه قرف
آدم : هانت وهنسبلهم كل حاجه ونمشي
تالا بخوف: طب مش يالا نروح بقى حاسه اننا اتأخرنا
آدم : حاضر هجيب آخر حاجه ويلا
فجأه يدخل نادر السوبر ماركت ويسحب تالا من ذراعها بقوه ويخرج بها للخارج
تالا بخوف : في اي انت مجنون
نادر بغضب : اركبي اخلصي قبل ماحد ياخد باله
صعدت للسياره وركب هو الآخر
نادر بعصبيه : انتي ازاي تخرجي بدون ماتستأذني مني
تالا : واستأذن منك ليه
نادر بعصبيه : علشان انا ابن عمك وهبقى جوزك بعد كدا
تالا : لما تبقى جوزي هبقى استأذن
نادر : انتي عايزه تجننيني ببرودك داه ولا اي بالظبط وبعدين احنا مش قولنا انك متخرجيش علشان عمار بيدور علي
تالا ببرود وضيق : نسيت
نادر بعصبيه : ثم صحيح انتي بتخرجي مع آدم بمناسبة اي
تالا : بدون مناسبه ومتنساش ان طول مانا مش مراتك انا حره
نادر هم ليصفعها على وجهها لكنه سرعان ما تمالك اعصابه قائلاً : انا مش هتعصب تمام مش هتعصب بس لما تبقي مراتي وقتها هيكون رد فعلي غير كدا خالص
وآدار السياره بغضب ومضى في طريقه
________
"ف المساء"
ارسل آدم رساله لتالا قائلاً فيها
: ها هتنزلي امتى
تالا: شويه بس لما كلهم يناموا
آدم : الكل نام وانا مستنيكي ف الجنينه انزلي يلا
نزلت تالا لأسفل بحذر وبطئ وهي وتحتضن قطتها
آدم أمسك بيدها قائلا
: يلا العربيه واقفه بره
صعدوا للسياره
آدم : مالك قلقانه ليه كدا متخفيش انا مرتب كل حاجه
فجأه أثناء سيرهم اتجهت السياره لمكان آخر غير المطار
آدم بتعجب : في اي ياابراهيم انت نسيت الطريق ولا اي
ابراهيم لم ينطق بكلمه وظل يسير في طريقه
آدم : انت يابني انا بكلمك
نظر السائق له قائلا : انا مش إبراهيم
ادم وتالا بفزع : امال انت مين وبتعمل اي هنا
لم يجبه
آدم بعصبيه : وقف العربيه بقولك
لم يوقفها
حينها علمت تالا ان الموت مدركهم لا محاله
خلع ادم حزام بنطاله ولفه حول عنقه قائلا
: وقف العربيه بقولك
لم يستطع السائق الصمود ف أوقف السياره ليلتقط انفاسه
نزل آدم وتالا بسرعه
تالا بخوف : خلاص كدا كل حاجه انتهت بص انت اهرب وسافر وانا هقف هنا هو هيجي يدور عليا
آدم : وانا قولت مش هسيبك
وامسك بيدها قائلاً
: يلا امشي معايا
تالا بخوف : بقولك خلاص نادر طالما عرف يبقى الموت ورانا اهرب انت والحق نفسك
آدم: قولت مش هسيبك حتى لو هموت امشي معايا يلا
تالا لم تجد مفر وكأنه وضعها أمام الأمر الواقع أمسكت بيده وهمت للسير وإذا بها لم تمضي حتى خطوتين للإمام وتسمع صوت نادر يقول
: رايحه فين ياتالا
نظرت للخلف فوجدت نادر يصوب بالمسدس تجاههم
آدم بصدمه : نادر
نادر بغضب شديد : بقى تسبيني انا علشان تهربي مع ابن الخدام دانتي طلعتي واطيه اوي
تالا ببكاء وخوف : نادر انت فاهم غلط آدم ملوش علاقه بيا انا ال طلبت منه يهربني
نادر بحده وصوت مرتفع : اسكتي خالص كفايه كدب بقى
وصوب بالمسدس تجاه آدم
وقفت تالا امام آدم بسرعه قائله ببكاء
: موتني انا الأول انت قتلت اخويا قدامي ومش هسمحلك تقتل دا كمان قدامي
نادر بصدمه : لدرجادي بتحبيه طب عملك اي علشان تحبيه دانا محرمتكيش من حاجه واحلى واغلى حاجه كانت بتكون عندك قبل ماتطلبيها هو عملك اي علشان تحبيه كدا
تالا لم تنطق بكلمه
نادره بعصبيه: انطقي هو عملك اي
تالا ببكاء: مش لازم يعمل علشان احبه هو اداني الحب والحنيه والآمان ال انا محتجاهم مش كل حاجه فلوس وانت للأسف مش عايز تفهم داه
نادر بسخريه : هه حب وحنيه وآمان وانا كنت بتقرطس طول الفتره دي كلها ومن مين من ابن الشغال بس عارفه ليه انا اضحك عليا بسهوله كدا علشان كانت آخر حاجه افكر فيها انك ممكن تبصي لداه داه ياتالا
تالا : ومالو داه ع الأقل احسن منك مليون مره
آدم : نادر تالا مش بتحبك سبها تمشي معايا وانساها وعيش حياتك
نادر بسخريه وحزن : بسهوله كدا اسبها دانا ال مربيها ع إيدي انا هتجنن إزاي قدرتي تخوني حبي ليكي بسهوله كدا
تالا ببكاء : انا مخونتكش لأني محبتكش من الأساس
نادر بحده وعصبيه: محبتنيش مش كدا بس حبيتي آدم وانا هقتلهولك دلوقتي علشان للأسف مش هينفع تحبي غيري
تالا تقف أمام آدم قائله
: مش هسيبك تقتله عايز تقتله اقتلني الأول
نادر بحده وحزن :ومالو ال انتي عايزاه واطلق الرصاص ناحيتها
دفعها آدم ع الأرض واستلقى الضربه مكانها
تالا جريت ناحيت آدم قائله ببكاء وهروله : ارجوك متمتش آدم آدم رد عليا انت آخر أمل ليا ف الحياه آدم آدم
يدها كانت ملطخه بالدماء وظلت تصرخ وتنادي ببكاء هستيري
: حد يلحقنا ياناس حد يطلب الإسعاف بسرعه
لكن صراخها لم يجدي نفعاً ف المكان مظلم تماماً وفارغ من البشر
وقفت مسرعه نحو نادر قائله ببكاء
: ارجوك متسبوش يموت أنقذه وانا هنفذ ال انت عايزه اقولك انا موافقه اتجوزك بس ارجوك متسبهوش يموت
يتبع الفصل التالي اضغط هنا
- الفهرس يحتوي على جميع فصول الرواية كاملة :"رواية قطة بين مخالب الصقور" اضغط على اسم الرواية