رواية علي الرف الفصل الرابع بقلم لولو محمد
رواية علي الرف الفصل الرابع
على / انا محوش حوالى خمسه و عشرين الف اعتقد هيبقوا كويسين للشبكه مش كدا
محمد / الشبكه كدا كدا هديه العريس مش هنتكلام فيها
مروان / لا معلش يا عمى هنتكلم خمسه و عشرين ايه انت لو ماجر عربيه استعمال هتدفع اكتر من كدا
محمود / احنا كدا كدا هنزود برده يا مروان يا ابنى
على / انا اسف يا جماعه بس انا الحقيقه مش متعود اخد مصروف او ان حد يساعدنى و ما اعتقدش ان عيب ان انا و هى نبدا حياتنا على قدنا و نبنيها سوا
مروان / برافو حقيقي برافو بس حضرتك يعني هتاخدها من بيت عندها فيه كل حاجه عشان تعيشها فى بيت على قدك تضحى بصحتها و شبابها تبنيهولك و فى الاخر تسيبها و تروح لغيرها صح ما اللى بيجي بالرخيص بيروح رخيص برده يا هندسه
الكل محرج و بيبص لبعضه
على / ولاد الاصول ما بيعملوش كدا يا مروان
مروان يقوم يقف
مروان / ولاد الاصول ما بيصوروش بنات الناس و يستغلوا صحابهم يا باشمهندس ... انا اسف انا مش موافق على اللى بيحصل ده عن اذنكوا
مروان يمشي و يرزع باب الشقه وراه و نهى عينها عليه و الكل محرج
ابتسام / انا اسفه اوى يا جماعه هو مروان كدا طبعه حامى بس و الله حنين ما حدش ياخد على كلامه
على / انا فعلا غلطت بس والله الموضوع مش زى ما هو فاكر خالص
نهى / عن اذنكوا اعمل شاى
نهى تجرى على جوه و هى بتعيط من غير ما حد من اللى قاعدين ياخد باله
.......................
على قهوه
هشام / بطل العالم فى التخلف حد يعمل كدا
مروان / ما قدرتش يا اخى ايه دا انا لولا امى كل شويه تشدنى كان زمانى قمت جبتها من شعرها
هشام / يعني انت صحيت من النوم فجاه اكتشفت انك بتحبها طب و مى و سنين الحب و الغرام اللى كان مولع فى الجامعه كلها كان ايه دا انت كنت بتغير عليها من الهوى كنت بتتخانق و تقلب الجامعه مجزره لو حد بص عليها بطرف عينه كدا مع ان نهى كانت قدامك برده ايه اللى جد
مروان/ اللى جد انى كبرت الفتره اللى فاتت على يدك انا و مى كنا بنتخانق على اتفه الاسباب و كنا بنتخاصم اكتر ما بنتصالح و كنتوا ديما تدخلوا عشان تصالحونا عمرها ما جت تراضيني عمرها ما فرق معاها زعلى ما تلبسيش كذا تلبسه عند ما تكلميش فلان تقف تضحك معاه عشان تستفزنى
هشام / لكن نهى طبعا حاضر و طيب و نعم و كدا
مروان / نهى فهمانى بتعمل اللى يبسطنى من غير ما اقول و انا كمان بحب اشوفها مبسوطه نهى دى ربايه ايدي يجي هو ياخدها كدا على الجاهز
هشام / سنه الحياه ما اكيد مش هتقعد عمرها كلو من غير جواز يعني
مروان / انت هتعمل زى امى عمرها ايه هو فات من عمرها قد ايه اصلا و بعدين
هشام / و بعدين هى اختارته هو يا صاحبى يعني ما بتحبكش
مروان / ما عشان ما تعرفش انى بحبها
هشام / طب ما قولتلهاش ليه
مروان / عشان ... عشان خفت يكون حرام
هشام / طب الحمد لله انك عارف انه حرام
مروان / مش كافر يعني اكيد عارف ان لا يخطب احدكم على خطبه اخيه عارف انها لازم ترفضه الاول و بعدين اتقدم بس لما لقيت الكل مشجعها بفرحتهم الاوفر دى ... هى مش فاهمه حاجه مش عارفه مصلحتها و هم كل اللى يهمهم يلبسوها فستان ابيض و يخلصوا منها و خلاص
هشام / لا وسعت منك دى لا امك و لا خالتك كدا
مروان / أمال يوافقوا على اول عريس كدا
هشام / بختها ان اول عريس كويس و مناسب ما يعيبهاش و لا يعيبه
مروان / مش هيصونها يا هشام مش هيحبها قدى
هشام / دلوقت ما دام وصلوا لمرحله الاتفاق تبقي هى وافقت يا صاحبى خلصت بقي
مروان / عشان هى ما تعرفش حقيقته عشان هى مش شيفاه زيي
هشام / بيقولك ايه اذا اردت شيئا بشده فاطلق سراحه سبها تجرب و خليك جنبا وقت ما تشوف حقيقته اللى بتقول عليها دى و تقرر تخلع تبقي السكه قدامك فضيت
مروان ساكت
هشام / مالك
مروان / انا مش هستنى تشوف هى حقيقته انا اللى هوريهاها
مروان يقوم و يطلع فلوس
هشام / على فين بدرى كدا
مروان/ مروح
هشام / ماشي بس بالهداوه ما تركبش نفسك غلط اكبر من اللى عملته و ياريت تحاول تصلح اللى هببته
مروان / سلام
مروان يمشي و هشام بيضرب كف على كف
........................
فى شقه نهى
نهى بتكلم على فى التليفون
نهى / لسه ما روحش و ما ردش على عمتى فى التليفون و قاعده بره مستحلفاله
على / دلوقت يروح هيروح فين يعني هو السؤال هيعمل ايه لما يعرف اننا قرينا الفاتحه
نهى / والله هو مش كده خالص انا مش عارفه والله ايه اللي جرى له
علي /عادي بتحصل ما تحطش في دماغك بكره ربنا يهديه ويتقبل الموضوع
نهى / يا ترى اهلك قالوا ايه اكيد اضايقوا من اللي حصل
على / بالعكس كنا بنرتب امتى هتقابلى اخواتي
نهى / انت بتقول كدا و خلاص عشان ما اضايقش
على / بالعكس دول متحمسين جدا يقابلوكى دا ماما لحد دلوقت لسه بتتكلم معاهم فى التليفون اتفقوا هيعملوا عزومه و نتجمع كلنا عندنا هنا فى البيت
نهى / تمام مفيش مشكله
صوت باب الشقه
نهى / شكل مروان رجع هروح اشوفه و بعدين اكلمك تمام ؟
على / خليها بكره انا ورايا كليه الصبح و انتى كمان وراكى اكيد ... صحيح عاوز جدولك
مروان يفتح باب الاوضه و يدخل و وراه مامته
مروان / انا اسف ... مبروك
نهى / تمام
مروان/ دا على اللى بتكلميه
نهى / اه
مروان/ قوليله مبروك ... تصبحوا على خير
ابتسام / ربنا يهدى
مروان و ابتسام تقفل الباب و تمشي نهى تكمل كلام فى التليفون
نهى / الو ... على لسه معايا
على / نهى هو مروان دخل عليكي دلوقت من غير ما يخبط و لا انتى اللى فتحتى الباب
نهى / انا لما ببقي بغير او كدا بقفل الباب بالمفتاح ليه
على / طب معلش انا اسف يعني هو انتى كنتى بتكلميني بحجابك
نهى / مش للدرجادى يعني
صمت
نهى / على ؟؟
على / معاكى
نهى / سكت ليه
على / احم .. بصي هو انتى محجبه عن اقتناع و لا عرف عشان الناس فى الشارع و كدا
نهى / لا انا اللى اخدت القرار و لبسته من نفسي ليه ؟
على / اصل ما ينفعش مروان يشوفك بشعرك ما ينفعش اصلا يدخل عليكي كدا من غير ما يخبط
نهى / هههههههههه انت هتغير من اخويا
على / انتوا راضعين على بعض
نهى / لا اله الا الله ازاى يعني بفرق السن ده انت بتقول حاجات غريبه اوى
على / تمام يعني يجوزلك
نهى / هو مين ده مروان ... يا ابنى مروان ده اخويا دول كانوا بينيمونا فى سرير واحد
على / لا اله الا الله ... تمام الكلام ده و انتوا صغيرين بس دلوقت ما شاء الله كبر و انتى كبرتى و كل واحد بقي بينام فى اوضه صح
نهى / اكيد يعني
على / شرعا ... بتاع ربنا مروان ينفع يتجوزك عادى اه مفيش مشاعر جواكى ناحيته غير اخوه بس هو مش اخوكى يعنى لازم تلبسي قدامه الحجاب
نهى / هلبس الحجاب فى البيت يا على
على / تمام ... طب بصي يا نهى انتى ما شاء الله عليكي بنت ذكيه و متفتحه ممكن تقرى فى الموضوع انا مش عاوز انا اللى ابقي فارض ده عليكي او تعملى كدا عشانى بس انتى مسلمه و ملتزمه مش هتخسرى لو دورتى فى دينك و مش عيب ان حاجه تسقط من عمتك انها تعرفهالك يمكن هى نفسها مش واخده بالها منها و شيفاكوا اخوات بس مش هتخسرى حاجه لو دورتى يمكن ربنا ينور بصيرتك و يمنع عنك وزر كبير ليكي و ليه و لعمتك ... الو نهى
نهى / معاك
على / ساكته ليه اضايقتي من كلامى انا والله ما بقول كدا غير عشان مصلحتك كدا كدا لما نتجوز كل الكلام ده هيتنسي لان اكيد اختلاطك بمروان مش هيكون بنفس الطريقه لما تبقوا فى بيت واحد بس حتى لو ده حصل مش عاوزه يحصل عشان انا عاوز ده او انا مانعك زى ما اخترتى الحجاب بنفسكك و لبستيه بقرارك كمليه بقرارك اعمليه صح و ما تضيعيش الثواب ما تبقيش زى اللى رقصوا على السلم لا اتغندرتى بشعرك و لا اتعفيتي بحجابك فهمانى يا نونو
نهى / فاهمه
على / انا ممكن اجيبلك فتاوى و ممكن اوديكي لشيوخ بس انا عاوزك تطلعى المعلومه بنفسك هتفرق معاكى اوى
نهى / تمام يا على ... تمام
......................
فى الصاله عند نهى
مروان / لسه مخطوبين ما بقالكوش اسبوع و لحق يبعدك عنى كل ده
نهى / على ما لوش دعوه انا دورت و لقيت ان ده الصح احنا مش اخوات يا مروان
مروان / و فيها ايه لو مش اخوات بس
نهى / انا عارفه ان ده فجاه و انه بقي وضع لا انا و لا انت واخدين عليه بس المفروض تشجعنى انت كنت ديما بتشجعنى على الحجاب فاكر لما قولتلك انى نويت عملت ايه
مروان/ نزلت جبتلك طرح كل الالوان بس مش منى يا نهى مش منى
نهى/ الصح ما بيتجزاش يا مروان انا عارفه ان عمرك ما هتبصلى
مروان يتعدل فى وقفته
نهى / عارفه اننا اخوات بس دا شرع ربنا و مش هنعترض ربنا اراد يبصرنى عشان يبعد عننا وزر ما كناش واخدين بالنا منه لعله يسامحنا على اللى فات لاننا ما كناش نعرف مع اننا غلطانين برده اننا ما دورناش بس على العموم دلوقت عرفنا يعني ما لناش حجه
مروان / خلاصه الكلام انتى صحيتى فجاه قررتى تقوليلى ابعد و اخرج من حياتى صح
نهى / لا طبعا انا ما اقدرش من غيرك انا بس طلبت اننا نلتزم بالحدود ما تدخلش الاوضه الا لما تخبط عشان اللبس الاسدال او الطرحه و انا مش هخرج من الاوضه من غيرهم و انك ترتب مع عمتى عشان ما نبقاش لوحدينا فى البيت
مروان / هتهجم عليكي مثلا هتحرش بيكي يعني
نهى / مش قصدى انا اقصد
مروان / تقصدى و لا ما تقصديش ... انا كنت عارف انه هيعمل كدا بس ما كنتش متخيل انك هتطاوعيه ما كنتش متخيل انك هتبيعيني عشانه عملك ايه خلاكى تبقيه عليا
نهى / والله ابدا هو ما يجيش فى غلاوتك انا بعمل كدا عشانك
مروان / عشانى !! بتبعدى عنى عشانى بتتحجبى منى عشانى !!
نهى / و الله عشانك عشان ما ندخلش النار عشان بحبك و بخاف عليك يا مروان
مروان / بتحبيني !!
نهى / مش اخويا يا مروان
مروان / لا مش اخوكى الإخوات ما بيتحجبوش من بعض على العموم انا عمرى ما اعترضت على رغباتك انا هخرج من حياتك يا نهى خليه ينفعك
مروان يمشي و يرزع الباب وراه ابتسام تطلع من جوه
ابتسام / قولتلك انا هكلمه قولتى لا
نهى / انا عارفه مروان دلوقت يهدى و يرجع صح ؟
ابتسام / و الله مش هكدب يا نهى مروان متغير خالص هو اكيد كان عارف ان ده هيحصل عشان كدا كان رافض على بس اكيد هيفهم ان دى سنه الحياه و طبيعي يحصل و بكره هو كمان يتجوز و يسيب العش هو راخر و افضل انا هنا بقي لوحدى بين الاربع حيطان
نهى / لوحدك ايه بس ... بطلوا افلام عربى بقي
ابتسام / على هيوصلك الكليه
نهى / اه فى الطريق
ابتسام / طب جهزى حاجتك عشان ما تلطعيهوش تحت انا نازله المحل ... سلام
نهى / سلام
.................
فى الكليه
مروان / مش عاوز اسمع صوتك اذا اردت شيئا بشده قال اهى طارت
مى تدخل تعديهم و تروح المبنى
هشام / و اهى مى كمان طارت
مروان / انا فى ايه و لا فى ايه
هشام / على فكره بقي اللى حصل ده خير و البت معاها حق مش فاهم انت قافش ليه على الاقل دلوقت عديتوا مرحله انكوا اخوات و فهمت انكوا ينفع تتجوزوا
مروان / ربع روقانك
هشام / فكر فيها بس دى فرصه و جتلك قرب منها و خليها تشوفك بمنظور بعيد عن الاخ لعل و عسي
مروان يهز راسه
شاب يدخل
الشاب / صباحو لعب ايه المحاضره باس و لا ايه
هشام / لا انا حجزت و اديني قاعد مستني البيه يشرف
مروان/ لا انا باس فعلا انا ما بفهمش منه حاجه اصلا و كدا كدا مش فى المود فبناقص حرقه دم بقي
راجل عجوز يعدى يدخل المبنى هشام يقوم بسرعه
هشام / تمام اطير انا اللحقه بقي و هبقي اصورلك اللى قاله
مروان / تمام
هشام يجرى على المدرج و الشاب يقعد جنب مروان
الشاب / مالك يا ابنى على فكره انت مش عاجبنى من الرحله
مروان / و لا عاجب حد فكك منى انت اخبارك ايه
الشاب / على حطه ايدك صحيح عملتلى ايه فى الحوار بتاعى
مروان / اه الراجل قال تقدر تستلم من اول الشهر و الله الراجل كلمنى من يوميها و شوف انا عقلى طاير خالص نسيت اقولك
الشاب / يا عم حصل خير بس يا رب تظبط بقي لحسن الشغلانه الاخرانيه دى كرهتني في عيشتى
مروان / لا ما تقلقش الراجل ابن حلال و الكل بيشكر فيه ارفع انت بس راسي
الشاب / عيب ... احكيلى بقي يا وحش ايه مش ناوى ترجع لمى على فكره الكل واخد باله انكوا انتوا الاتنين مش مظبوطين من ساعه ما سبتو بعض بس نقول ايه انتوا الاتنين دماغكوا انشف من بعض بس لو ليك كيف يعني اخوك ممكن يظبطك
مروان يبتسم و يبص الناحيه التانيه
الشاب / يا عم ما بهزر انا اطلع اشاعه انك معجب بواحده تانيه و شويه فلفل شطه هتغير هتروح انت تقولها انتى الاولى و التانيه و التالته و الرابعه بس و هديه حلوه منك الميه هترجع لمجاريها
مروان / كتر خيرك بس مى حوار و اتقفل
الشاب / غاوى نكد ليه يا صاحبى ما انت اهو تعبان من غيرها
مروان / اقولك ايه بس
الشاب / انت لسه زعلان عشان خطوبه بنت خالك من الواد بتاع الرحله يا عم ما الواد طلع قد كلمته و جه يصلح غلطته اهو فى ايه بقي
مروان / ملافظك يا عم انت بتقول ايه يصلح غلطته ايه اللى يسمعك يقول ايه
الشاب / يا عم ما اقصدش انا اقصد انها فرصه تتجوز و الشقه تخلالك تتجوز انت كمان انت هتخللها جنبك
مروان / و الله ما انت فاهم حاجه
الشاب / طب ما تفهمنى يا عم هو ان ما كنتش هشام ما انفعش
مروان / ابتدينا بقي
الشاب / يا عم احكى صدقنى انا اللى هفيدك
مروان / ما تسيب شغل القمص و قله العقل دى للبنات يعني
الشاب / طب و الله حلك عندى و اتحداك احكيلى انت بس اللى مضايقك يا عم فضفض مش يمكن افيدك
مروان يبص لصاحبه الشاب يقعد و يطلع سجاره و يشربها
....................
فى المدرج عند نهى
البنات تطلع و نهى و صاحبتها قاعدين
نهى / ابقي انا غلطانه
البنت / انتى ما دام عرفتى المعلومه و انه حرام تتحاسبي خصوصا انك دورتى عليها بنفسك مش حد قالك و خلاص
نهى / التانى بقي زعل و دا جاى يبعدك عنى انا مش عارفه اعمل ايه مروان اتغير خالص
البنت / طب ما يمكن خناقته مع مى دى صاحبته ماثره عليه يمكن كان مستنى تصبرى شويه عشان نفسيته مش عارفه
نهى / و الله حاولت اصالحهم بس هو مصمم دا مره قالى انه حاطت عينه على واحده تانيه يتجوزها و هيقولى لما نرجع من اسوان بس لحد دلوقت لا حس و لا خبر
البنت / ما يمكن ده اللى مضايقه انك اتلخمتى مع على و طنشتيه انتى عارفه مروان يعني بيحب يبقي الاسبوت كله عليه ... بت داهيه لتكون البنت دى انتى
نهى / لا دى هربت منك خالص دا اخويا يا بت
البنت / امال اللى على راسك دى ايه
نهى / هو عمره ما هيبصلى كدا و بعدين مروان مش من النوع اللى بيتكسف مثلا لما بيعوز حاجه بيقول
البنت / ما اعرفش طب لو طلع بيحبك
نهى / بيحبنى ايه يا هبله بقولك اخويا دا انتى السلوك الادارى مسح مخك باين
البنت / اه والله و لسه محاضره الاقتصاد بقولك ايه ما تيجي نروح الكافتريا نشرب حاجه
نهى / تعالى
.......................
قدام المبنى
الشاب / هههههههههه بقي انت كل ده عمال تلف و تدور عشان تقول انك بتحب بنت خالك دا انت مسخره
مروان / ما هو عشان كدا بالظبط ما بحكيلكش حاجه
الشاب / طب و اللى يحللك الحوار ده تديله ايه
مروان/ ايدى على كتفك
الشاب / بص انت مشكلتك مع نهى انها اتربت على انك اخوها فحوار انها تلبس الحجاب منك ده مصلحه تلعب عليه بقي
مروان/ ازاى
الشاب / تحسسها انك مش اخوها تخليها تشوفك بنظره تانيه
مروان / ازاى برده
الشاب / الفلانتين جاى اهو هاتلها هديه
مروان/ ايه الجديد ما انا بجبلها كل سنه و فى عيد ميلادها كمان امال اخليها تبص بره او تحس ان اللى بيرتبطوا احسن منها
الشاب / ورد و دباديب و كدا
مروان/ و شيكولاته
الشاب / دا غير هديه مى
مروان/ كنت بتنفخ
الشاب / طب بالنسبه للحاجات التانيه ايه نظامها
مروان / حاجات ايه
الشاب / الاحضان البوس الحاجات اللى بين الاخوات دى موجوده برده
مروان / لا طبعا ايه اللى بتقوله ده انت ازاى تفكر فى حاجه زى دى
الشاب / يا عم اخ و اخته مش هيحضنوا بعض مش هيبوسو بعض ايه يا عم مالك ما شوفتش اخوات قبل كدا
مروان / لا يا عم اكيد لا بوست و لا حضنت و لا فى اى نوع تلامس
الشاب / امال اشمعن الحجاب
مروان/ هتتخنق فى بيتها كمان
الشاب / بص انا هقولك حاجه لو عملتها البت دى هتبقي بتاعتك خفت بقى و لا اترددت انت حر
مروان / قول يا جهبز
الشاب / البت فى بيتك كلمه كدا لمسه كدا و اهو كلو بالحنيه بيفك
مروان يتعصب و يقوم يقف
مروان / تصدق انك زباله ما اتربتش بس العيب مش عليك العيب على اللى يعملك قيمه و يقف يتكلم معاك
الشاب / يا عم اهدى اللى يسمعك يقول ايه هو انا قولتلك اغتصبها يا عم و لا حتى تنام معاها بس حنن قلبها
مروان / انا مش مصدق انى عرفت واحد زيك اتفو عليك واطى
مروان يمشي ناحيه المبنى يقابل نهى خارجه هى و صاحبتها تبصله يعديها كانه مش شايفها
نهى / شوفتى
البنت / كبرى مخك لما يهدى ابقي عاتبيه
........................
فى كافيه
نهى قاعده مع على بتبص فى ورقه كبيره
على / دا يا ستى جدولى ما تكلمينيش خالص فى المواعيد دى غير كدا انا بتاعك اتكلمى فى اى وقت
نهى / و انا هحفظ كل ده و على ايه لما تفضي ابقي كلمنى
على / المهم احنا عاوزين نرتب يوم تيجوا تشوفوا الشقه عشان نبدا فى التجهيزات
نهى / مش بدرى شويه
على / هفهمك انا مش ناوى اخد جنيه من بابا فى جوازى كتر خيره جابلى الشقه و كتر خيره برده وفرلى شغل فى المصنع و بيصرف على دراستى اكتر من كدا اعتقد انى كفيل بيه ايه رايك
نهى / انا ما عنديش مشكله خصوصا ان الفرح لسه فاضل عليه تلت سنين يعني سهل نرتب حياتنا على قدنا بس هو معلش كل الشباب اهاليهم بتساعدهم ... انا طبعا معجبه بعصاميتك بس مش فاهمه ليه ... هو فى مشاكل
على / أجرى اجرى ربطى الاحداث و انكشي على النكد بالعكس مفيش علاقه احسن من علاقتى ببابايا بس انا كدا عاوز اتعب فيكي و فى بيتنا عاوز كل قشايه فيه تبقي زكرى حوشت تمنها فى قد ايه و نزلنا نجبها سوا و طهقنا الراجل فى الفصال عشان تكفى الفلوس اللى معانا مش عارف هو افوره و لا ايه بس دا اللى حلمت بيه
نهى / عاجبنى على فكره ... و مش هنكر انى سمعت مره عمتى بتقول ان طول ما الاهل بيساعدوا ولادهم ماديا دا هيديهم الحق يدخلوا فى حياتهم
على / الاهل هيدخلوا حتى لو ما بيصرفوش
نهى / ازاى يعني ؟؟؟
على / اهدى كدا مالك على فكره ما حدش هيجبرك تعملى حاجه مش عجباكى كل الفكره انهم اكيد هيدوكى النصيحه هيعدلوا عليكي بس فى الاول و الاخر مش هيحصل غير اللى انتى عوزاه فخدى الكلام بحب و دخلى من هنا طلعى من هنا
نهى / بيقول ولد على بنات بيبقي جوازه فاشله
على / مين الوحشين اللى بيقولوا كدا بصي انا شخصيا بعرف احط كل واحد عند حده بالادب و دول فى الاول و الاخر اهلى و انتى مراتى يعني اللى يمسك يمسنى و اللى يمسك يمسني برده عاملى ربنا و الباقي عليا و ان لا قدر الله فلتت حاجه كدا و لا كدا دورى قصادها يمكن تلاقى حاجه حلوه تشفعلهم ما لقتيش دورى عندى و انا اوعدك انك هتلاقى حلو كتير يشفعلى و يشفعلهم
نهى / وعد يعني
على / لتكونى فاكره انك هتعيشي عمرك كله مش هيطلع منك موقف كدا و لا كدا هقولهم هم كمان نفس الكلام و بعدين ما تفكريش فى الحاجات دى و ابعدى عن الوحشين اللى بيملو دماغك بالكلام ده
نهى / ماشي
على / اخبار مروان ايه
نهى / كلمته بس زعل جدا طبعا اضايقت عشانه بيقول انك بتخرجه من حياتى بشياكه بس انا متاكده انه زى يوم قرايه الفاتحه كدا هيهدى و يفكر و يجي يراضيني هو علاطول بيراضيني
على / هو كدا كدا الشيطان مش هيسكت و هيصعب الموضوع عليكي و عليه بس دا جهاد يا قلبي
نهى / لا والله انا خدت قرارى و بدات فعلا النهرده دخل لقانى بالحجاب اصلا
على / تمام بقولك ايه اطلب المنيو تانى نجيب حاجه نحلى و لا نروح نشوف مكان تانى
نهى/ ممكن نروح نكمل قعدتنا فى البيت عادى و كفايا مصاريف
على / فكرى تانى
نهى / جواب نهائي قوم بينا نروح
على / تمام يا قلبي حاضر
على يشاور للجارسون و يبص لنهى و الاتنين مبتسمين
..........................
فى محل هدايا قبل الفلانتين
مروان / لا السنادى هديه واحده بس عاوز حاجه تطرقع فاهمنى تريند بقي و حركات و ظبطلى البريزينتايشن عاوزها ما حصلتش
شاب / طب فى حاجه معينه فى دماغك
مروان/ ورد و شيكولاته ... بص مفيش حاجه فيها صور يعني زى اللبوم او افتكاسه اعرض بيها صورنا سوا
الشاب / لو عاوز اللبوم تمام لو عاوز البوكس اللى بيتفرد و اللزقلك الصور على جدرانه من جوه اول ما تفك الشريط يتفرد كدا و الصور ملزقه و الشيكولاته و جليتر
مروان / دا كام فى كام و بياخد كام صوره ده
الشاب / شوف عاوز تحط كام صوره و ممكن نعملهم بوكسات جوه بعض
مروان / حلو عاوز خمس بوكسات جوه بعض و شوفلى ساعه مثلا و جراب بناتى كدا و ازازه برفيوم على زوقك و املاهولى فل بقي انا عارف ان امى هتنفخنى فى التنضيف بس عاوز حاجه هلاك انت عارف زوقى
الشاب / يا باشا انا عمرى قصرت رقبتك
مروان / أمال انا بجيلك ليه
الشاب / على العموم دى تشكيله ساعات نقى اللى تناسبك و انا هحسبلك ميزانيه مبدئيه للبوكس
مروان / قشطه تمام اوى
مروان يروح ناحيه رف و يبدا يبص على ساعات رقيقه بناتى
...........................
فى الكليه يوم الفلانتين
نهى / حتى مروان كان بيجبلى هديه كل سنه ما قاليش صباح الخير حتى
البنت / يبقي عاملك مفاجاه هو كمان هو مين اللى هيروحك صحيح
نهى / مروان على عنده كليه للساعه سبعه بالليل و هيطلع من هناك على المصنع دا على كلامه امبارح
البنت / و هو ده جدوله فعلا
نهى / اه جدوله بس يعني مش قادر ياخد يوم اجازه عشانى
البنت / تلاقيه يا بنتى عاملك مفاجاه صدقيني بصي لا تكلميه و لا تعبريه و استنى شوفى هيعمل ايه
نهى / تفتكرى ناسي ان النهرده الفلانتين
البنت / انا اعرف بس الكليه زى ما انتى شايفه قلبت احمر فى احمر و ورد و دباديب و هدايا و لا محل اللعب
نهى / الا انا
مروان يطلع من المبنى
نهى / مروان خلص اهو هروح بقي هتعوزى حاجه
البنت / ابقي طمنيني
نهى / سلام
نهى تروح لمروان
نهى / خلصت نروح
مروان / يا ريت لحسن انا تعبان خالص النهرده
نهى / ليه سلامتك
مروان/ مهبط يمكن جعان يلا يلا
نهى /صحيح كل سنه و انت طيب
مروان/ بمناسبه ايه
نهى / النهرده الفلانين هو ان ما كانش تجيب لمى تنسانى
مروان/ و الله انتى فايقه و رايقه يلا لا اتحركى اتحركى
مروان يمشي و نهى تعوج بقها و تروح وراه يركبوا العربيه و يمشوا
..................
فى بيت مروان
مروان طالع و نهى وراه فجاه يقف
مروان/ يا خبر نسيت اعمل مكالمه مهمه
نهى / ما تدخل تعملها جوه لازم على السلم
مروان / خشي خشي بس و انا هحصلك
نهى تفتح الباب يكون مروان فتح الكاميره نهى تلاقي الصاله فيها بوكس متحاوط ببلالين هليوم تتفاجئ
مروان / كل سنه و انتى طيبه
نهى / دا عشانى
مروان / و لا مى و لا غيرها انتى اللى فى القلب
نهى تبتسم
نهى / انت بتصور ايه
مروان/ افتحى الهديه
نهى / صح صح
نهى تجرى تشد الشريط البوكس يتفرد فى الارض كل جزء فيه ملزوق عليه صورهم سوا و شيكولاته و فى النص بوكس اصغر تشد الشريط يتكرر الوضع و تلاقى بوكس اصغر تشد الشريط
نهى / ههههههههههههه هم كام بوكس
مروان / دا الاخير افتحى بقي شوفى هديتك
نهى تشيل البوكس اللى فى النص و تفتحه تلاقيه مليان فل و مش باين حاجه تحطه على الارض و تمد ايدها تلاقى اللبوم صور
مروان / عشان تلمى فيه الصور دى كلها دى تقريبا زكرياتنا سوا
نهى / احلى زكريات
مروان / كملى لسه فى
نهى تمد ايدها تلاقى علبه فيها ساعه
نهى / حلوه اوى كلفت نفسك اوى ليه كل ده ما ورده و دبدوب زى كل سنه و خلاص
مروان / السنادى مهمه اوى بالنسبالى كملى لسه فى هديه كمان
نهى / البوكس مليان شيكولاته انت ناوى تطخنى بقي و لا ايه
مروان / و فيها ايه و لا يكون سى على ما بيحبش الطخان و هيرجعك لما جسمك يبوظ من الحمل و الولاده
نهى / لقيتها لقيتها ... دى برفيوم ... كل ده عشانى
مروان / عجبوكى
نهى / اوى اوى بجد دى احلى هديه جتلى فى حياتى ... يا نهار ابيض هى عمتى فين ... يا عمتى يا عمتى شوفتى مروان جابلى ايه
نهى تدور على عمتها فى الشقه
نهى / شكلها لسه فى المحل انا هكلمها فى التليفون ... ما تقفل الفيديو ده بقي
مروان يقفل الفيديو و يروح يقعد على الارض و يشيل الصور من على البوكس و يحطها فى الالبوم نهى تروح تقعد جنبه تبص فيهم
نهى / انا فاكره الصوره دى كويس
مروان / احلى حاجه فى خالى الله يرحمه انه كان بيحب يصورنا بصي كدا على الصور احنا كل صورنا مع بعض ازاى
نهى / فعلا و كلها حلوه اوى ... ههههههههه بص هنا لما سنانى اللى فوق كلها كانت واقعه كنت بتقعد تالس عليا
مروان / ما انتى شكلك كان عبيط اوى
نهى / و دى فى المصيف انا فكره اليوم ده لما كنت هتغرق عشان بتتمنظر قدام البنات و عاملى فيها سبيح
مروان / ايه جالى كرانب
نهى / كرانب اه حصل استنى استنى الصوره دى .. الله ... مش مصدقه انك محتفظ بيها
مروان / صورتك اول يوم مدرسه كنتى بتعيطي و خايفه دخلت و حضرت معاكى الحصه الاولى و لما اندمجتى جريت على فصلى و طبعا اتعاقبت على التاخير و اتزنبت اليوم كله اياكش يتمر
نهى / ربنا يخليك للغلابه ... الصور حلوه اوى انت منقيهم كل واحده بزكرى اجمل من التانيه ... دى احلى هديه جتلى فى حياتى
مروان / احلى من هديه على
نهى تبص لمروان و تتكلم بحرج
نهى / اصل على مشغول اوى النهرده انت عارف
مروان / تمام ... اكيد مظبط مفاجاه مش معقول يعدى اول فلانتين بينكوا كدا
نهى / عادى اصلا انا الحاجات دى مش فى دماغى انت عارف
مروان / ازاى يعني يعني انا عشت كل الفتره دى بكع عشان ما تحسيش انك اقل من المرتبطين فتطردى تقبلى باى كلب يقوم لما تتخطبى ما تلاقيش ليه اقل من باقي البنات اللى بيجيلها هدايا فى ايه و بعدين الحب مش بالكلام لازم يبان اهتمامه و كرمه امال فتره الخطوبه دى عملوها ليه ما لو مش مهتم بيكي و حاطك نمبر وان فى حياته قبل اى حاجه تانيه من دلوقت لما تبقي فى بيته و يدخل بينكوا الملل و الروتين هيعمل فيكي ايه
نهى / اكيد الموضوع مش كدا و بعدين ما هو بياخدنى بره و نقعد و ناكل يعني مش بخيل
مروان / و احنا مجوعينك اكل و لا كان ناقصك هنا حاجه هو دوره حاجه واحده يا يقوم بيها صح يا يمشي
نهى / على فكره ممكن يكون عاملى مفاجاه زى ما كلكوا قولتوا
مروان / كلنا !! يعنى مش انا لوحدى اللى اخدت بالى ... بصي دى حياتك و انتى حره تمشيها زى ما تمشيها بس ما تقبليش بحاجه اقل من قيمتك يا نهى مش بعد ما عشتى ملكه طول السنين دى يجي واحد يحطك على الرف لما يبقي يفضي و لا لما يهفه الشوق
نهى / على مش كدا بس هو مضغوط انت عارف الدراسه و الشغل و المشاريع اللى بيعملها
مروان / يا ستى الله يعينه بس انتى ملاحظه انك كدا رقم اربعه و لا خمسه فى حياته لو انتى مش مهمه اوى كدا خدك ليه ما كان اهتم باولوياته و لما يبقي يفضى يبقي يجي يتقدم بيربطك جنبه ليه ما دام مش فاضيلك
نهى / اكيد له ظروفه اكيد له مبرر لكل ده
مروان/ لتكونى ناويه تعاتبيه ايه يا نهى هتشحتى الاهتمام بعد كل ده
نهى تبص لمروان و ساكته و الحزن باين عليها تليفون مروان يرن
مروان / دى ماما ... ايوه يا ماما انتى فين ... ايه !! مستشفى ايه انا جايلك انا جايلك سلام سلام
نهى / مالها عمتى
مروان / خالتو ايات تعبت و راحت المستشفي و شكلها هتعمل عمليه و ماما معاها انا رايحلهم
نهى / انا جايه معاك
مروان/ تعالى
نهى و مروان يمشوا
يتبع الفصل التالي اضغط هنا