رواية علي الرف الفصل الاخير بقلم لولو محمد
رواية علي الرف الفصل الاخير
نهى / عادى اصلا انا الحاجات دى مش فى دماغى انت عارف
مروان / ازاى يعني يعني انا عشت كل الفتره دى بكع عشان ما تحسيش انك اقل من المرتبطين فترضى تقبلى باى كلب يقوم لما تتخطبى ما تلاقيش ليه اقل من باقي البنات اللى بيجيلها هدايا فى ايه و بعدين الحب مش بالكلام لازم يبان اهتمامه و كرمه امال فتره الخطوبه دى عملوها ليه ما لو مش مهتم بيكي و حاطك نمبر وان فى حياته قبل اى حاجه تانيه من دلوقت لما تبقي فى بيته و يدخل بينكوا الملل و الروتين هيعمل فيكي ايه
نهى / اكيد الموضوع مش كدا و بعدين ما هو بياخدنى بره و نقعد و ناكل يعني مش بخيل
مروان / و احنا مجوعينك اكل و لا كان ناقصك هنا حاجه هو دوره حاجه واحده يا يقوم بيها صح يا يمشي
نهى / على فكره ممكن يكون عاملى مفاجاه زى ما كلكوا قولتوا
مروان / كلنا !! يعنى مش انا لوحدى اللى اخدت بالى ... بصي دى حياتك و انتى حره تمشيها زى ما تمشيها بس ما تقبليش بحاجه اقل من قيمتك يا نهى مش بعد ما عشتى ملكه طول السنين دى يجي واحد يحطك على الرف لما يبقي يفضي و لا لما يهفه الشوق
نهى / على مش كدا بس هو مضغوط انت عارف الدراسه و الشغل و المشاريع اللى بيعملها
مروان / يا ستى الله يعينه بس انتى ملاحظه انك كدا رقم اربعه و لا خمسه فى حياته لو انتى مش مهمه اوى كدا خدك ليه ما كان اهتم باولوياته و لما يبقي يفضى يبقي يجي يتقدم بيربطك جنبه ليه ما دام مش فاضيلك
نهى / اكيد له ظروفه اكيد له مبرر لكل ده
مروان/ لتكونى ناويه تعاتبيه ايه يا نهى هتشحتى الاهتمام بعد كل ده
نهى تبص لمروان و ساكته و الحزن باين عليها تليفون مروان يرن
مروان / دى ماما ... ايوه يا ماما انتى فين ... ايه !! مستشفى ايه انا جايلك انا جايلك سلام سلام
نهى / مالها عمتى
مروان / خالتو ايات تعبت و راحت المستشفي و شكلها هتعمل عمليه و ماما معاها انا رايحلهم
نهى / انا جايه معاك
مروان/ تعالى
نهى و مروان يمشوا
........................
فى المستشفى
مروان واقف مع محمد و ابتسام قاعده بتقرا قران و نهى جنبها على و محمود يدخلوا جرى
محمود / خير يا جماعه مالها الاستاذه ايات
محمد / اتكت على نفسها فى التنضيف فجاه وقعت و هى ماسكه قلبها و بيقولوا هتحتاج قسطره بس الدكاتره طمنونا ان الموضوع بسيط
محمود / ان شاء الله خير ان شاء الله ما تقلقش باذن الله خير
محمد / يا رب يا استاذ محمود يا رب
على يبص لنهى ضاربه بوز و باصه الناحيه التانيه
على/ ازيك يا نهى عامله ايه
نهى بترد من غير نفس
نهى / الحمد لله ...عن اذنكوا اجيب حاجه اكلها انا جيت من غير غدى
مروان / انا هاجى معاكى
على / خليك مرتاح يا مروان انا هروح معاها
مروان / انا كمان اصلى
ابتسام / خليك يا مروان جنبى على هيجبلنا كلنا باكوين بسكوت و ازازه ميه
محمد / نطمن عليها بس و هبعت اجيب اكل
مروان / ما احنا فيها انا ممكن
ابتسام / اقعد بقي يا مروان روحوا يا ولاد يلا روحوا
على و نهى يمشوا
مروان/ ما كنت روحت معاهم تدبسيه فى حاجات لينا ليه
محمود / ايه الكلام ده يا مروان
ابتسام / انا حسيت ان فى بينهم زعل قولت يتكلموا على انفراد انا مش عارفه ايه اللى حصل كانوا زى الفل
مروان/ اكيد عمل حاجه
محمود / انا هتكلم معاه
محمد / مفيش داعى نكبر المواضيع يا استاذ محمود يا خبر بفلوس دلوقت ينزلوا و يبقي ببلاش
مروان / هو احنا فى ايه و لا فى ايه
محمود/ و الله يا ابنى معاك حق
....................
فى الكافتريا
على / ما انا مش هضرب الودع اعرف مالك ما تتكلمى يا بنتى فى ايه
نهى / مفيش يا على حوار كدا مضايقني و خلاص
على / و الحوار ده يخصنى اكيد صح
نهى تبصله
على / طب افهم طيب ارد ادافع عن نفسي يمكن اكون مظلوم ... بلاش مظلوم انا غلطان و الغلط راكبنى من ساسي لراسي على الاقل اعتزر و اصالحك ... ما اكررهاش تانى
نهى / النهرده الايه يا على
على / الخميس
نهى / كام فى الشهر
على / اربعتاشر ... ايه عيد ميلادك
نهى / استهبل بقي ايه مش عارف الفلانتين
على / اااااه فلانتين ... لا ليكي حق تزعلى صح ... بس دا مش عيدنا يا نونو
نهى / بس كل الناس بتحتفل بيه على فكره انا مش فارق معايا الهديه انا بس كنت مستنيه اهتمام مكالمه او رساله
على / انا مش بعترف بيه فاكيد كنت زى كل خميس هكلمك الساعه حداشر لما اخلص الشيفت بتاعى و اروح
نهى / تمام
على / انا مستعد اجيب هديه كل يوم فى السنه الا اليومين دول انا ما بحبش الفلانتين ده
نهى / خلاص يا على تمام
نهى باصه الناحيه التانيه
على / نهى ... نهى ... نهى
نهى / المفروض انى ابص على البنات اللى فى الكليه لما صحابهم بيجيبولهم هدايا و بيهتموا بيهم و انا بقي اللى مرتبطه فى الحلال خطيبي مش معترف بالفلانتين
على / هو انا بخيل يا نهى هو انا ما بجبلكيش حاجه خالص خليهم يبصولك السنه كلهم و سبيهم يغلطوا فى اليوم ده و ما لكيش دعوه بيهم و بعدين تبصيلهم و لا يبصولك ليه اصلا ما كل واحد يخليه فى حاله
نهى / انا مش فارق معايا بس انا كان نفسي تجبر بخاطرى
على / يوم اجبر يوم واحد و باقي السنه اديكي بالجزمة او اشعلقك بيا بهديه يوم فى السنه و ازهق بعد فتره و ادب معاكى خناقه و كل واحد يروح لحاله
نهى / خلاص يا على انا ما كنتش ناويه اتكلم اصلا و لا اعاتب انت اللى ضغطت عليا
على / خلاص يا نهى تمام بكره اخدك و ننزل تنقى الهديه اللى تعجبك و نتفسح نطمن بس على عمتك و بعدين
نهى / بعد العيد ما بيتفتش الكحك و حتى لو روحت دلوقت تجيب هديه خلاص الموضوع خلص اصلا الاهتمام ما بينطلبش
على / و انا كدا كدا ما كنتش هجيب النهرده
نهى / تمام هستاذن بقي انزل اطمن على عمتى
نهى تسيبه و تمشي و هو بيضرب كف على كف
...................
فى شقه نهى
نهى تدخل و تقفل الباب تبص على هديه مروان فى الارض و تروح تقعد قدامها تلمها تليفونها يرن تبص على
نهى / الو
على / هديتي دلوقت نتكلم
نهى / فضيت انت دلوقت نتكلم
على / نهى حبيبتى انا مش فاهم ايه اللى جرالك ما انا من اول يوم مديكي جدول مواعيدي لو كنا بكره كنت كلمتك من بدرى ما انتى عارفه
نهى / ما انت قدرت تفضي نفسك لعمتى
على / هو انا روحت اتفسح دى زياره مريض افرضي محتاجين حاجه
نهى / انت عارف انت مشكلتك ايه
على / خير
نهى / انك بتفكر فى كل حاجه و بتعمل حساب لكل حاجه الا انا راميني على الرف كدا لما تفضي تنزلنى تتسلى شويا و ترجع تركنى تانى
على / لا اله الا الله و انا بتعب و ازاكر و اشتغل ليه مش عشانك
نهى / لا عشان نفسك
على / والله ... طب طظ فيا بلاها شهاده و بلاها شغل و خليني جنبك تقدرى تقوليلى احساسك ساعتها ايه بخطيبك الفاشل اللى كان بينجح كل سنه بتقدير و بقي بيسقط و صايع ... حبيبتي هى الفسح و الخروجات و الهدايا دى مش لازملها فلوس هتفرحى لو بقيت شحط كدا و باخد مصروف من بابا افسحك بيه
صمت
على / يا قلبي انا عارف ان فى حد سخنك النهرده بس انتى عرفانى و اللى حصل النهرده بيحصل كل يوم بالعكس انتى كنتى بتشجعيني و اقفل و زاكر اقفل و ركز فى شغلك ايه اللى جد يا نهى هديه الفلانتين كل اللى عملته و جبته اتمسح عشان هديه سقطتها حبى ليكي مقياسه هديه واحده فى يوم محدد
نهى / الموضوع مش كدا
على / الموضوع ياما متاسفنه ياما واخده عين لانى واثق ان مش انتى اللى بتتكلمى ابدا
نهى / تمام يا على اقفل
على / مش و انتى زعلانه
نهى / تمام مش زعلانه ... سلام
على / سلام
على يقفل باب الشقه يتفتح و مروان يدخل شايل كيس
مروان / جبتلك فرخه مشويه بالسلطات من المحل اللى على اول الشارع اسرع حاجه انا واقع ... مالك
نهى / ما فيش
مروان/ كلمتى على صح
نهى / هو انا غلطت فى اللى قولتهوله فى المستشفي صح ما كانش المفروض اقوله كدا صح
مروان / مش فاهم
نهى / يعني هو كلمنى دلوقت و بصراحه معاه حق
مروان / معاه حق يهملك بالشكل ده
نهى / هو مش هاملنى بس هو الخميس عنده اصلا مضغوط و انا عارفه ايه اللى ضايقني بقي ايه اللى عصبنى كدا
مروان / خلاص لو شايفه انك غلطانه اتصلى بيه اعتزريله
نهى / انت شايف كدا
مروان/ طبعا ... عشان يعتبرك هفيه و كل ما تزعلى يضحك عليكي بكلمتين و تجرى انتى اللى تراضيه
نهى / ما انا برضه ... انا بصراحه مقتنعه بكلامه
مروان / بس المفروض يقدر مشاعرك المفروض يكفيكي عن الدنيا كلها ما يخليكيش تبصي لحد
نهى / بس انا كنت عارفه ظروفه و هو مش بيتاخر و بعدين
مروان / الاكل هيبرد و انا لسه هاخد الحاجه لامى فتعالى ناكل لقمه دلوقت و بعدين نتكلم
نهى تهز راسها و تقعد تاكل مع مروان
.....................
فى المستشفي
ابتسام / يعني ما قالتلكش متخانقين ليه
مروان / انا ما كنتش موافق عليه من الاول
ابتسام / هى المصايب كدا ما تجيش غير نوبه واحده
مروان / بقولك ايه لعله خير لعله ايه لا هو خير فعلا
ابتسام / لا اله الا الله انت بتتكلم كانها فشكلت لا ان شاء الله ما توصلش للدرجادى
مروان / انتوا عاجبكوا ايه فى الواد ده انه مهندس يعني و لا ان ابوه عنده مصنع
ابتسام / ان البت بتحبه يا مروان الواد داخل دماغها
مروان / انتوا اللى حطيتوه فى دماغها و فهمتوها انه ياما هنا ياما هناك بفرحتكوا المبالغ فيها دى
ابتسام / بقولك ايه انا هدخل انام جنب خالتك و انت روح ارتاح شويه عشان وراك كليه الصبح
مروان / افرضي احتاجتى حاجه
ابتسام / هحتاج ايه فى الكام ساعه اللى لحد ما جوز خالتك يجي دول روح يا ابنى ما تضيعش مستقبلك
مروان / تمام ... لو عوزتى حاجه الموبايل جنبى
ابتسام تهز راسها مروان يمشي
..............
فى شقه على
محمود / بس انت لازم تراعى ان الحاجات دى برده بتفرق مع البنات
على / لا يا بابا الحاجات دى ما كانتش فى طبعها فى حد مسخنها
محمود / حد زى مين يعني
على / حد زى مروان مثلا
محمود / لا يا على اكيد الحكايه مش كدا
على يطلع موبايله و يفتح بوست
على / اصل طبيعي ان واحد يجيب لاخته هديه زى دى فى الفلانتين و مش بي كدا دا يصورها و ينزلها على الفايس دا مشيرها من المستشفي اللى هو خالته بتعمل عمليه و هو بيحتفل بالفلانتين مع خطيبتي و انا بتتخانق معايا عشان انا مهمل فى حقها و الاهتمام ما بينطلبش دا على اساس انها مش عارفه ظروفى و راضيه و مبسوطه من زمان رد انت بقي
محمود / ليك حق تضايق طبعا ما اقدرش اتكلم بس انا رايي تسمع منها و تتكلم معاها تفهم منها يا ابنى و ما تستعجلش فى قرارك عشان ما ترجعش تندم و اه ما تحكيش حاجه لامك و لا اخواتك انت عارفهم جنازه و يشبعوا فيها لطم انت و هى هتتراضوا و هم هيفضلوا شايلين
على / ما كنتش هحكى اصلا
محمود / انت ابن اصول يا على خليك جنبها لحد ما تعدى الظروف اللى هى فيها و بعدين اتكلم معاها و على اساس الحوار اللى بينكوا خد قرارك تمام
على يهز راسه محمود يطبطب على رجله و يقوم
.......................
فى شقه نهى
مروان يفتح الباب و يدخل مفيش صوت يروح يفتح باب اوضه نهى نايمه و يفتكر كلام صاحبه " البت فى بيتك كلمه كدا لمسه كدا و اهو كلو بالحنيه بيفك" مروان يبص فى الارض و يهز راسه لا و يشد الباب يقفله نهى تصحى تتخض تقوم تجرى تلبس الاسدال و تطلع بره تلاقي مروان بيدخل اوضته
نهى / اخبار عمتى ايه
مروان / احسن كتير
نهى / اعملك حاجه
مروان / لا ما تتعبيش نفسك انا عاوز انام تصبحى على خير
نهى / و انت من اهله
مروان يدخل اوضته و يقفل الباب و يسند عليه بضهره
مروان / انا لازم اكلم ماما و احط حد للموضوع ده كدا مش هينفع كدا مستحيل ينفع
......................
فى كافيه
على / يعنى تصرفه عادى
نهى / اه عادى و علاطول بيجبلى زى ما كان بيجيب لمى عشان عمره ما حب انى احس انى اقل من المرتبطين بالعكس كان بيهتم بيا و بمشاعرى
على / و كان كل مره بيجيبلك هديه اوفر اوى كدا و يشير فيديو ليكي يفرج عليه صحابه و زمايله على انبهارك بهديته
نهى / انا ما اعرفش انه شيره
على / امال انا عرفت منين
نهى / ما اعرفش ما فكرتش بس اكيد هو ما يقصدش عادى يعني
على / بصي يا نهى خلاصه الكلام انا مش مرتاح
نهى تتعدل فى قعدتها
على / انا و الله حاولت كتير اكدب الاحساس اللى جوايا ده حاولت كتير بس هو فى كل لحظه بياكد المشاعر دى بيثبتلى انى ....
نهى / سكت ليه انا مش فاهمه حاجه
على / حبيبه لحد ما عرف انى صورتك تمام اى اخ بيغير على اخته حمش و دمه حامى و يحترم بس رفضه ليا و احراجه لينا و انا بتقدم رسمي باهلى و معاملته ليا و كلامه و مواقفه و اخيرا هديه زى دى يوم الفلانتين
نهى / هو انت عشان ما جبتش و ما اهتمتش مستخسر ان اخويا يجبلى يعني انا بنت البطه السوده يعني عشان دونا عن البنات كلها لازم اتهمل صح
على / انا ما قولتش كدا و انا ما اهملتكيش
نهى / انا كنت جايه فكراك هتراضيني هتقولى اى كلام حتى لو هتضحك عليك كنت هصدقك و نتصالح بس انت مضايق ان جالى هديه اصلا انت مضايق انى فرحت
على / ما حدش بيجيب لاخته هديه زى دى
نهى / ما حدش زيك و هو مش زيك و مش المفروض يكون زيك على فكره
على يبص الناحيه التانيه
نهى / انا بجد مصدومه فيك
على يبصلها بصدمه
نهى / واضح انك مش واخد بالك من الفرق الكبير بين علاقتى بيك و علاقتى بمروان انا لسه عرفاك قريب انما هو عشره سنين انت جاى عليه انت ممكن تمشي انما هو لا انا ابيع الدنيا و لا ابيعوش
على يبسم
على / تمام وصلت الرساله
نهى / لو عندك مشكله مع مروان حلوها زى الرجاله و لو عندك مشكله معايا
على / لا لا لا مشكله ايه ربنا ما يجيب مشاكل ... هو بس واضح انى دخلت بينكوا غلط
نهى تسكت و ترتبك
نهى / غلط !! و ناوى بقي تصلح الغلط ده ازاى
على / اللى تشوفيه
نهى / ليه و انا اللى غلطت و لا انت ... على العموم ما فيش داعى احرجك اكتر من كدا ... حاجتك هتكون عندك النهرده عن اذنك
نهى تقوم على يتنهد و الضيق باين عليه و يسيب فلوس و يطلع وراها بتوقف تاكس
على / تعالى اوصلك
نهى / مفيش داعى انا هركب تاكس
على / تمام تعالى اركبك و اطمن عليكي تعالى
نهى / تطمن عليا ليا بمناسبه ايه يعني بتكرر اخطائك تانى ايه ما بتتعلمش ... على فكره العيب مش عليك العيب عليا انا اللى كنت بدافع عنك و رسمالك كدا صوره هو فعلا مروان الوحيد اللى كان شايف حقيقتك بس انا من هبلى ما صدقتوش
على / اهو اهو مروان اهو يعني صح اهو بيسخنك عليا و بيوقع بينا ايه مش قادره تشوفى ليه انتى
نهى / مروان مش زيك مش مش انت اللى بتحاول تخليني وحيده
على / هستفيد ايه ؟ نهى احنا فى الشارع تمام تعالى نركب العربيه نتكلم فى الطريق
نهى / التكسيات عماله تعدى و انت شاغلنى لو سمحت ابعد
على / انا عمرى ما حاولت اوقع بينكوا عمرى ما اتمنيت انك تكونى وحيده و لا هستفيد حاجه من الموضوع اصلا بالعكس انا عديت مواقف كتير صعب على اى راجل يعديها عشان مقدر علاقتكوا و متفهمها راجعى نفسك يا نهى و انتى تعرفى مين بيحبك بجد و مين
نهى تشاور لتاكس يقف تركب
نهى / اعتقد انك انت اللى لازم تراجع نفسك
نهى تقفل الباب و التاكس يمشي
..................
فى شقه نهى
مروان / انا هاخد شبكته دى و اروح ارميها فى وشه هو فاكرنا هنزعل بركه يا جامع
ابتسام / انا ما شوفتش كدا انت ايه حكايتك جنازه و تشبع فيها لطم دا بدل ما تهديها بكلمتين
مروان / قصدك اجى عليها و اجبرها ترجع له مش كدا
ابتسام / لا طبعا يا ابنى البت فالقه روحها من العياط
مروان / عشان حيوان و ما بيقدرش النعمه
ابتسام / لا عشان دا سوء تفاهم و كبر انا مش فاهمه اصلا ايه اللى وصل الموضوع لكدا لا عمر اختك بصت لهدايا و لا
مروان / مش اختى
ابتسام / بصت ل ... ايه؟؟
مروان / نهى مش اختى
ابتسام / مش فاهمه ليه بتقول كدا
مروان / عشان دى الحقيقه اللى بحاول اكلمك فيها بقالى كام يوم بس حضرتك مش فضيالى انا و نهى مش اخوات
ابتسام / ما تكملش
مروان / ما كنت قادر اتكلم عشان لا يخطب احدكم على خطبه اخيه بس اهى جت من عند ربنا اهى
ابتسام / انت بتتكلم جد يا مروان
مروان / و جد الجد كمان هو لا حبها قدى و لا تعب عشانها قدى ما يستاهلهاش
ابتسام / عشان كدا وقعت بينهم عشان كدا سخنتها عليه انت كنت بتسخنها عليه فعلا زى ما على قال مش ظالمك
مروان / لا ما حصلش ... و لو حصل انا كنت بوريها حقيقته
ابتسام / انا مصدومه فيك بجد
مروان/ ليه عملت ايه
ابتسام / مش عارف عملت ايه هو للدرجادى انا ام فاشله اهتميت باكلك و شربك و نسيت اعلمك دينك
مروان / ايه الاوفر ده انا مش فاهم حاجه
ابتسام / فى ان نهى اتحرمت عليك
مروان/ دا على اساس اننا طلعنا فجاه راضعين على بعض و كدا و لا ايه يعني مش فاهم ايه اللى حرمنا على بعض
ابتسام / التخبيب يا قلب امك
مروان / يا ماما مش وقت هزار و ظرافه يعني
ابتسام / يقول الرسول الكريم صلى الله عليه وسلم «من خبب زوجة امرئ أو مملوكة فليس منا» ، وبيقول كمان «لعن الله من خبب امرأة على زوجها ولعن الله من خبب رجلا على امرأته» و فى حديث كمان بيقول «ليس منا من خبب امرأة على زوجها أو عبدا على سيده»
مروان / مش فاهم يعني ايه يعنى
ابتسام / التخبيب يعني تفسد العلاقه بين اتنين تكرههم فى بعض تقلل من اللى بيعملهولها تظهرلها عيوبه توقع بينهم تقلبهم على بعض و تكرههم فى بعض
مروان / انا كنت بتكلم معاها عادى بخليها تشوف الصوره كامله
ابتسام / لا و انت الصادق بتوريها الصوره اللى انت عاوزها تشوفها عشان مصلحتك تكبر المشكله و تفضل تنفخ فيها و تسخنها و تشجعها باختصار جنازه و شبعت فيها لطم
مروان / انا !!
ابتسام / ما هو من فشلى كام معلمتكش ان الرسول صلى الله عليه وسلم بيقول «إن العبد ليتكلم بالكلمة ـ من رضوان الله ـ لا يلقي لها بالا، يرفعه الله بها في الجنة، وإن العبد ليتكلم بالكلمة ـ من سخط الله ـ لا يلقي لها بالا، يهوي بها في جهنم»
مروان / ايه الاوفر ده هى كلمه الحق بقت تخبيب
ابتسام / دا حتى لو كلمه حق يراد بيها باطل انت كنت قاصد انك تفرق بينهم و ان كدبت عليا مش هتكدب و تدارى نيتك من ربنا دا إبليس بيضع عرشه على الماء، ثم يبعث سراياه فأدناهم منه منزلة أعظمهم فتنة، يجيء أحدهم فيقول: فعلت كذا وكذا، فيقول: ما صنعت شيئًا، ثم يجيء أحدهم فيقول: ما تركته حتى فرَّقت بينه وبين امرأته، فيدنيه منه، ويقول: نعم أنت، فيلتزمه انت مستوعب انت عملت ايه و لا لا
مروان / هو مش هيحبها قدى
ابتسام / فات المعاد يا ضنايا ما عادتش تجوزلك
مروان/ رجعنا تانى بقي للكلام ده
ابتسام / دا مش كلامى دا كلام الفقهاء من المالكية والحنابلة والإباضية إلى اتفقوا أنه إذا أفسد رجل ما بين زوجين؛ حتى تطلق المرأة، فطلقت؛ فإنها تحرم على هذا المفسِد المخبِّب ما بينهما؛ وذلك معاملةً له بنقيض قصده الفاسد. يعني بما انك كنتَ سبب طلاقها بإفساد ما بينهما؛ فلا يجوز لك التزوج بها
مروان / ايوه بس دول مش متجوزين عشان يطلقوا
ابتسام / واحد اقولك انا ما بفهمش حاجه انزل دلوقت روح دار الافتاء و اسالهم و بعد ما تتاكد انى صح اسال نفسك سؤالين الاول هو انت للدرجادى انانى انك تكسر فرحتها بواحد كويس هى اخترته و كانت فرحانه بيه و ما تقولش وحش انت عملت كدا عشان عاوزها لنفسك بغض النظر بقي هى عاوزه ايه
مروان يبص لمامته
ابتسام / لو ما كانش تخبيب و قهرتها زى ما هى يا قلبي مفلوقه جوه من العياط اهو تضمن انها تحبك و لا هتملا بيك مكانه و خلاص مش هم عندك سعادتها صح و بتقول بتحبها اكتر منه مش كدا
مروان يبص لابتسام و ينزل
ابتسام/ ربنا يهديك يا ابنى
........................
قدام دار الافتاء
مروان خارج و هو مضايق ياخد نفس عميق و يبص للسما و يطلع موبايله و هو عمال يخبط برجله فى الارض بتوتر يتصل بعلى
مروان / الو
على / السلام عليكم
مروان / عاوز اقابلك لو وقتك يسمح
على / بالسرعه دى ... على العموم الهديه لا ترد مفيش داعى
مروان / انا عاوزك عشان اعتزرلك و اصلح سوء الفهم اللى حصل بينا انا مش جاى ارجعلك حاجتك انا جاى و فى نيتي صلح لو عاوز صلح يعني
على / انت فين و انا اجيلك
مروان / انا فى الشارع ممكن نتقابل فى اى كافيه هبعتلك لوكايشن
على / تمام انا فى الطريق
مروان يقفل
مروان / من ترك شيئا لله عوضه الله خيرا منه ... القوه من عندك يا رب
.....................
فى اوضه نهى
ابتسام / يا بنتى ما له حق يغير
نهى / من اخويا !!!
ابتسام / ما هو مروان مستفز برده
نهى / عشان حب يفرحنى
ابتسام / يا قلبي ربنا يديم عليكي الفرح بس مروان اتصرف غلط ليه يشير فيديو ليكي من غير اذنك و لا اذن خطيبك يعني تخيلى شاب حمش دمه حامى فجاه يشوف فيديو لخطيبته و الكل بيباركلها و يهيصوا
نهى / دا اصلا ما اتمسكش بيا و بيقولى انى غلطه
ابتسام / سوء تفاهم بدليل انه اتصل بيا و بلغنى بنمره التاكس اللى ركبتيه و بقي يتصل كل شويه لحد ما اطمن انك وصلتى دا لو بايع كان رد فعله هيتغير خالص و على فكره حكالى وجهه نظره و بجد زعلان جدا و هو كمان شايف انك فضلتى مروان عليه
نهى / مروان اخويا
ابتسام / يا حبيبتي اخوكى بكره يتجوز و يبقاله حياته و انتى تتجوزى و يبقالك حياتك و مهما فضلتوا اخوات جوزك قبل اى حد
نهى / انا زعلانه منه اوى
ابتسام / هشدلك ودانه و اقوله و لا قهره بنتى ابدا يا يجي يراضيكي و يبوس راسك يا يجي ياخد حاجته احنا ما بنشتغلش عنده عشان نوديله حاجته اه
نهى تبصلها
ابتسام / اكلمه ؟
نهى / مش عارفه ... انا بجد زعلانه اوى
صوت الباب يتفتح
صوت مروان / انا جيت اللى قالع راسه يلبسها
ابتسام/ خليكي هنا انا هطلعله
صوت مروان / على هنا جاى معايا يصالح خطيبته
نهى تتفاجئ ابتسام تبتسم
ابتسام / انا هطلعله و انتى غيرى و اغسلى وشك و اطلعى خدى وقتك
نهى تهز راسها ابتسام تلبس الطرحه و تطلع تلاقى على قاعد مع مروان يقوم يقف
ابتسام / نهى هتغير و تطلع اجبلك حاجه تشربها
مروان / يشرب ايه انا جعان فين الاكل
ابتسام / بس كدا ثوانى
على / لا انا شبعان تسلم ايدك
ابتسام / طب بالله عليك اكلت عرفت تاكل و انت مزعلها
على يبتسم بحرج
ابتسام / هسخنلك
ابتسام تدخل تقابل نهى طالعه بالاسدال
ابتسام / هو ده اللى خدى وقتك فى اللبس
نهى / يستاهل يشوف نتيجه انه يزعلنى اتزوقله ليه و لا اللبسله الحلو ليه
مروان/ احم طب انا هقوم اساعد امى فى الغرف و اهو نسيبكوا تتكلموا
ابتسام / عين العقل
ابتسام تطبطب على كتف مروان و يدخلوا و هى بتوشوشه
ابتسام / انا فخوره بيك
مروان / كويس اهو يبقي حد فينا فخور بيا
مروان يدخل و على يقوم يقف جنب نهى و هى زعلانه و مدياله جنبها
على / هو المفروض ان ده اسوء حالتك يعني
نهى تبصله بغضب
على / اعمل حسابى يعني اعرف لو دى اسوء حالاتك يبقي يا بركه دعاكى ياما بجد
نهى / انا ما بهزرش انا زعلانه منك بجد
على / دا انا جايلك ارضك فين أخلاق الفرسان
نهى تبص الناحيه التانيه
على / طب و الله ما اقدر ابدا ... طب ايه يرضيكي طيب
نهى / انت بجد شايف دخولك حياتى غلطه
على / الغلطه الوحيده اننا ما بداناش فى توضيبات الشقه بحيث انى اخلص امتحانات من هنا نتجوز من هنا علاطول عشان اقسم بالله ما قادر ابعد عنك
نهى / امال ليه قولت كدا
على / شيطان و دخل بينا و بعدين ما تتنيش و تتفردى كدا انتى كمان ما كنتيش طبيعيه خالص
نهى / و الله
على / من امتى يا نهى ما بتقدريش ظروفى بالشكل ده هو مش كان اسلوب حياتى انى مشغول طول الوقت بين الدراسه و الشغل عاجبك مش كنتى بتقولى عنى انى راجل مش عيل بياخد مصروفه مش كنتى منبهره بتنظيمي لوقتى و انى عصامى ايه بقيت كخه
نهى تبصله
على / انسي و انا هنسي و خلينا ناخد عهد على نفسنا اننا ما نسمحش للشيطان يدخل بينا تانى
نهى تبتسم و تهز راسها
على / اقسم بالله بحبك يا نهى و زعلك غالى اوى عليا طب
نهى / ماشي
على / دا انتى لسه زعلانه بقي ايه مفيش واحده و انا كمان بحبك
نهى / و انا كمان بحبك
مروان متابعهم من ورا ستاره الطرقه يفتكر كلامه مع الشيخ
مروان / حتى لو بحبها
الشيخ / يا ابنى اللى بيحب حد بيتمناله السعاده و على كلامك خطيبها شاب كويس و متدين و بيتقى ربنا فيها
مروان / طب و انا
الشيخ / انت ايه
مروان/ ما انا كمان كويس و عارف ربنا ليه هو اه و انا لا
الشيخ / النصيب يا ابنى و بعدين هى اختارته اختارته لما وافقت عليه و حبته لو ما كانتش بتحبه ما كانتش وافقت عليه من الاساس ما كانتش علاقتهم استمرت و لا كانت احتاجت تدخلك عشان تفرق بينهم
مروان / ما كانش قصدى افرق انا كنت بوريها
الشيخ / ما كنتش هتحتاج تدخل اصلا لو ما لهمش نصيب مع بعض الحكايه عمرها ما هتمشي
مروان يبص فى الارض
مروان / طب اعمل ايه
الشيخ / اتعلم قبل اى حاجه قيمه الحاجه اللى معاك انت لو البنت دى عرفت اللى انت عملته ممكن تخسرها للابد انت بتتصرف بحريه لانك ضامنها حاطتها على الرف و عايش حياتك لما جه واحد عارف قيمتها و قرر ينزلها من الرف و ينفض التراب من عليها انت اضايقت و رميت اللى كانت معاك و عملت اللى عملته عشان ترجع حاجه كانت اصلا معاك و ما قدرتهاش و لو ما كانش حرام و كنت اتجوزتها برده ما كنتش هتصونها و لو سابتك و قابلت غيرها برده ما كنتش هتصونها لان ده للاسف يا ابنى طبعك و ما تفهمنيش غلط دا مش طبعك لوحدك دا طبع ملايين و مليارات من البشر اللى بتضمنه بتركنه على الرف
مروان / صدقنى انا مش كدا
الشيخ / خلاصه الكلام من ترك شيئا لله عوضه الله خيرا منه روح صلح اللى عملته و انوى التوبه و لو ليك نصيب فى حاجه هتجيلك لحد عندك و ان ما جاتش بذاتها تبقي ما كانتش خير ليك و لا انت خير ليها و اكيد ربنا شايلك الاحسن
مروان يسكت
الشيخ / انت عملت وزر كبير و قبل اى حاجه لازم تتوب عنه و تحاول تصلح بينهم زى ما وقعت بينهم ربنا ممكن يسامح فى حقه لكن عمره ما يسامح فى حق العباد
مروان يهز راسه و يفوق على منظر نهى و على و هم بيضحكوا و ابتسام تعدى شايله صينيه
ابتسام / وسع يا مروان الصينيه تقيله على ايدي
مروان يشيل عنها و يطلع بالصينيه
مروان/ احلى اكل بقي اكل سمسم ام مروان الاكل الاصلى بتاع زمان بصحيح
على / هو انا قولت شبعان صح اصل ريحه الاكل ده تخلينى ارجع فى كلامى عادى جدا
ابتسام / الف هنا اقعدوا يا ولاد اقعدوا ربنا يهدى سركوا يا ولاد و يبعد عنكوا ولاد الحرام
مروان / امين
نهى تبص لمروان مبتسمه يبتسم يقوم يغرف بنفسه لعلى و الكل ياكل و هو مبسوط
تمت الرواية كاملة عبر مدونة دليل الروايات