رواية كانت استقامتي البارت الثالث 3 بقلم مريم سمير
رواية كانت استقامتي الفصل الثالث 3
_ايدا !! احيه !!! انت عملت في البت اي؟
=والله معملت حاجه ، انتي هتلبسيني مصيبه !
_ابوها لو عرف هينفوخنا يخربيت ام صحوبيتك ، أي الي حصل ؟
=يبنتي والله وصلت للبوابه لقيتها جت وبتقرب وهي دايخه ف سندها لقيتها مغمي عليها
قربت منها وشميت ريحتها _لا دي سكرانه مفيش حاجه
=طب الحمد لله و.. ايييي!! شاربه حرام ؟ منكر يعني؟
_وطي صوتك ، اتكتم هنتفضح ، ابوها لو جه وشافك شايلها هيقول النار ولا العار ويطخك
=تفتكري ارميها وامشي؟
_طول عمرك شهم يولا والله ، تعالي ورايا يابا بس بشويش
=احنا هنسرق؟
_ألعن ، هنطلعها أوضتها
=طب متسبيني أنا الي اطلعها
_تصدق انك عيل مش محترم ؟ وجمله كمان هصوت وأصحي ابوها وخالتك يجوا يشوفوا المتربي عمل اي؟
=يلا يمريم نوديها اوضتها في أي !
طلعنا ب الراحه خالص ودخلناها اوضتها ونزلنا
_روح الجريمه في دمي بجد
=يبنتي احنا غطناها مش كشفناها!
_شوفتني وانا بتسحب؟
=ايوه منا كنت معاكي اصلا !
_انا عاوزة اطلع ظابط
=مريم أنا ماشي
_يمحمود اسمعني ، لو بقيت ظابط ه..
=هتبقي قادره ، تصبحي علي خير
_حاكم انت اخ مش كفاءه
=احمم ابقي اطمني علي سلمي الصبح
_ماشي يحنين ماشي
فتح الباب لقي احمد في وشه وهو مدروخ
_احيه بقي دا مبقاش بيت دا بقي ديكسو
سندت أيده حوالين رقبتي
_ولا انت رايح فين ؟
=لا يمريم متدخلنيش في الأمور العائليه دي
_واطي يمان واطي
مشي وهو بيضحك وانا سانده احمد طب ودا أطلعه ازاي دا ؟ اشيله؟
_احمد ! سامعني؟
=مالك حلوة اوي كده يشوشو
_دلع مريم شوشو معروفه ، مهو أنا اكيد مش بتخان يعبدالصمد
=عاوز انام
_ما طبعا مهو فندق
سندته لغايه مطلعنا الأوضه ، جيت امشي مسك أيدي وشدني
_احمد ، فوق
=عاوزة تسبيني زي ما الكل سبني؟
_احمد ..
=ششش
حضني فجاه فشهقت ! لا لا بقولك أي أنا محترمه يا استاذ اوعا تسبني بقي !
=ماما سابتني ، وبابا ولا كأني هنا ، وصحابي عرفني مصلحه ، محدش جمبي و..
كان بيعيط فطبطبت عليه _بس ، بس كله هيبقي تمم
سكت و بصيت عليه لقيته نام ، عدلته علي المخده وسويت شعره ب أيدي ، معقول الوجع دا كله ورا الوش الي دايما بيبان مغرور دا ! بعدت بسرعه ، أي الي أنا بعمله دا !
نمت علي الكرسي الي قدام السرير ، صحيت علي صوت احمد وهو بيكح
_انت كويس ؟
=وانتي مالك ، شئ ميخصكيش
_ايوه بردو انت كويس ؟
غمض عينه ومسك دماغه _انت لسه سكران ؟
=يووه بطلي كلام بقي
روحت المطبخ وجبت ازازه وطلعت
_اشهد أن لا إله إلا الله وأن محمدا رسول الله ، يا رب انت عارف نيتي اني افوقه لو قتلني مش مسمحاه
رشيت علي وشه الميا ف قام
=انتي بتعملي أي ؟
_بفوقك
=وانا مش عاوز مساعدتك ولا طلبتها اصلا
_الحمد لله فوقت
=!!
_هنزل أنا بقي
مسكت الباب فوقفني صوته =حصل أي امبارح ؟
_محصلش حاجه
=انا اتكلمت معاكي؟ قولت حاجه
_لاء
خرجت ، مكنش عاوز حد يعرف الي جواه ف فضلت مقولوش أنه قاله ، روحت اوضه سلمي لقيتها صحت وبتشرب قهوه
_عامله أي دلوقت ؟
*حصل أي امبارح ؟
_مالكم يجدعان هو امبارح اتقص من الذاكره ولا اي ! علي العموم محصلش حاجه ، اهم حاجه انتي بخير دلوقت ؟
*اه الحمد لله احسن
_محمود بيسلم عليكي
*ثواني ، أنا اخر حد شوفته هو
_اه مهو هو الي شالك وجابك هنا
*شالني !!
_ايوه كان مغمي عليكي
*متشكره اوي
_هو ممكن اسألك سؤال؟
*اكيد
_انتي بتشربي لي ؟
*..
_حاولي تبطلي دي مش حاجه حلوة خالص وكمان حرام ، اسيبك أنا بقي عشان تفوقي
نزلت المطبخ وعملت فنجان قهوه وطلعت ل احمد
_اشرب دا ، هتفوق اكتر بعده
خد مني الفنجان وهو ساكت وشرب اول شفطه
_مش كوثر الي عملاه ، انتي الي عملاه؟
=ايوه
سكت وشربه =تحب تفطر دلوقت ؟
_متحسسنيش انك بتهتمي بيا ، ماشي؟
=أنا مبعملش كده ، أنا بعمل الي المفروض اعمله
_بحكم اي؟ انك مراتي ؟ لا وقولتلك قبل كده
=خلاص بشوقك وبراحتك ، أنا غلطانه اصلا اني اتخضيت عليك
سبته وانا متعصبه ، ورزعت الباب ورايا ، اتخضيت عليه؟ وانا اتخض عليه بتاع أي مهو براحته !
نزلت وفطرت أنا وعمو السيد وماما وسلمي
طلعت وانا معايا صنيه فطار عشان يفطر
_الفطار
سبته ونزلت من قبل ميرد ، الفون رن كان محمود
_عامل أي
=الحمد لله ، سلمي عامله اي؟
_الحمد لله أنا تمم والله يبني متقلقش عليا
ضحك =طب وهي ؟
_الحمد لله بتقولك متشكره اوي ها
=العفو يختي ، هروح انا الشغل بقي
_ربنا يعينك
=قصدك ربنا يتوب عليا نفسي اشتغل في قسم نضيف بقي بدل ما أنا ظابط علي البطاقه وخلاص وقاعد أنش
_ان شاء الله ربنا هيكرمك والله
=يا رب يمريوم
_مع السلامه ، خلي بالك من نفسك يظبوطه
=مع السلامه يحبيبتي
قفلت معاه ولقيت أحمد في وشي
_كنتي بتكلمي مين؟
=ملكش دعوه
جيت امشي مسك أيدي وضغط عليها _بقولك بتكلمي مين ؟
=احمد سيب أيدي عشان متزعلش
سابها _وبعدين معاكي بقي !
=محمود ابن خالتي ، ها حاجه تانيه ؟
_مش ملاحظه انكم قريبين زياده عن اللزوم
=عشان هو اكتر حد بيحبني في الدنيا دي وبيخاف عليا اكتر مني واجدع صاحب عندي ومش هخسره مهما حصل
_..
=وبعدين يحلاو شوشو
_شوشو مين؟
=اي ناسي انك قولت شوشو امبارح ؟
_وانتي مالك اعرف مين ولا اقول أي
=يبقي انت كمان ملكش دعوة بيا
مشيت من قدامه بسرعه ، فضلت قاعده في الجنيه لغايه ما الليل هل ، لقيت سلمي بتخرج من البوابه
_سلمي سلمي
=مريم !
_راحه فين ؟
=راحه ، راحه لصحبتي
_هتتأخري ؟
=هبات عندها
_قولتي ل عمو ؟
=وانتي مالك انتي هو تحقيق ولا اي !
مشيت وهي متوتره ، هو في أي ! اتسحبت ومشيت وراها لغايه مدخلت فله تانيه ، لفيت من ورا عشان كان فيه حرس قدام الفله ، كان شباك في الأوضه مفتوح ، لقيتها قاعده مع شاب
معرفتش اعمل اي ، مجاش في بالي غير محمود
_محمود
=في حاجه ؟ مالك ؟
_هبعتلك ابلكيشن علي الواتساب تجيلي دلوقت
=في أي يبنتي ؟
_لما تيجي هقولك ، بس بسرعه
بعد ربع ساعه لقيته جه ف شديته بسرعه ووقفنا ورا
_شايف ، سلمي مع واحد وبيشربها غصب
=مع واحد فعلا
_لازم ندخل
=ميمكن هي الي عاوزة كده ؟
_بس باباها لو عرف هيتعب ، لازم نمشيها من هنا ، يمكن مش عارفه الصح من الغلط
=محدش هيودينا في داهيه غير دماغك
_يلا ننط بس
نطينا احنا الاتنين وقربنا من الأوضه لقناه بيقرب منها وماسك وشها
*انتي حلوة اوي يسلمي
=شبه امك ولا اي ؟
*انت مين ؟
=ابعد عنها احسنلك
نده البودي جارد بتوعه كانوا اربعه ف وقفت جمب محمود
=هنحيي جو المعسكر ولا اي ؟
_انت مش شايف حجمهم؟ أنا عيله يلا نجري أنا مالي اصلا !
=مريم انشفي احنا كنا بناكل العساكر
_طب يلا بسم الله
كل واحد فينا ضرب اتنين ، دا اللهم بارك والله
=اوعا تربيتي
_اخويا السندال
بصيناله =هخليك تضربه انت عشان تعرف اني بعزك بس
_روحي يشيخه ربنا يسترك
ضربه ضربه واحده أغمي عليه ، دا أي الرجاله الناشفه دي !
بصينا علي سلمي لقناها دايخه
=سلمي انتي كويسه؟
*اه لا لا لا اه
=ما شاء الله ، شيل يعم شيل
شالها وروحنا الفله ، فتحت البوابه ب الراحه ودخلنا ، طلعناها اوضتها
_والله هنفضل أبطالها ل حد منبطلها ، عالمي عالمي
بلع ريقه =مريم جوزك وراكي
غمضت عيني بقوه ولفيت وفتحتها ولما فتحت لقيته ف وقفت جمب محمود
*انتوا بتعملوا أي في اوضه سلمي ؟
- تابع الفصل التالي عبر الرابط: (رواية كانت استقامتي) اضغط على أسم الرواية