رواية أحببت صغيرتي الفصل الثامن 8 - بقلم اسراء إبراهيم

  رواية أحببت صغيرتي بقلم اسراء إبراهيم 

 رواية أحببت صغيرتي الفصل الثامن 8

 نورهان فجأة تنحت وقلبها دق وقربت من اوضة الصالون وبقت تحاول تسمع اللي بيدور جوة وهي قلبها مقبوض 

اما جوة فكان قاعد عبد الرحمن  وعمر قدام  حمدي خال نورهان وجمبه سهام مراته اللي كانت بتبص لعبد الرحمن  وعمر بغموض وقطع السكوت حمدي اللي قال بجمود: 

خير يا حضرات  جاين ليه لمواخذة 

عبد الرحمن بصله بثقة واتكلم: 

انا اسمي عبد الرحمن محمد السعيد  وده اخويا دكتور عمر  وجاين نطلب ايد نورهان 

قامت سهام بغضب وقالت: 

معندناش بنات للجواز  البت مخطوبة وفرحها كمان يومين

عبد الرحمن اتجاهلها وبص لحمدي وقال: 

ايه يا استاذ حمدي هو انتو عندكم الحريم هيا اللي بتتكلم ولا ايه 

حمدي اتحرج  من كلام عبد الرحمن وقال بصوت خشن: 

قومي خشي جوة يا سهام دلوقتي دي قاعدة رجالة 

سهام بصتله بتوعد وبعدين بصت لعبد الرحمن بغيظ وقامت بعصبية وخرجت وفي الوقت ده كانت جريت نورهان لاوضتها لما سمعت كلام  خالها 

حمدي اتنحنح وقال بغموض: 

وانت بقي لامواخذة شوفت بنت اختي فين  

عبد الرحمن اتوتر وبص لعمر  اللي حرك راسه كأنه بيطمنه فاتنهد عبد الرحمن  وقال: 

في الجامعة  شوفتها هناك واعجبت بيها وجيت اطلبها منك 

حمدي بصله بتركيز وقال بغموض: 

ااه يعني انت كمان دكتور هناك مش كدة 

عبد الرحمن معرفش يرد لان لو قاله انه طالب اكيد هيرفض وهنا اتكلم عمر وقال  بثقة: 

اه تقدر تقؤل كدة 

حمدي فكر شوية وبعدين حط رجل علي رجل وقال بهدوء: 

وانا متأسف مش هقدر اوافق لان البت مخطوبة 

عمر قام وقال بهدوء: 

تمام عموما انتو الخسرانين لاني كنت هكتبلها ڤيلا بأسمها ده غير الخير اللي كان هيعم عالكل 

يلا بينا يا عبد الرحمن  بقا 

حمدي عنيه زغللت فقال باندفاع: 

احم طب استنو يا بشوات الكلام اخد وعطا 

عمر بص لعبد الرحمن وابتسم  وبعدين بص لحمدي وقال : 

ما انت خلاص قولت اللي عندك انا عن نفسي معنديش وقت لو موافق تمام كتب الكتاب بكرة والمهر شيك علي بياض ها قولت ايه 

 حمدي ابتسم بطمع وقال بسرعة: 

موافق طبعا ده انا ليا الشرف يا باشا اني اناسبكم 

عمر شاور لعبد الرحمن وقامو هما الاتنين وقبل ما يخرجو عمر بص لحمدي وقال: 

اعتقد ده اتفاق رجالة يا  استاذ حمدي هه يعني بكرة الكلام ميتغيرش وسابه وخرج  

............................................... 

كانت نورهان رايحة جاية في الاوضة بتوتر خايفة اوي  احسن حمدي خالها يتخ*انق مع عبد الرحمن وقطع تفكيرها دخول خالها  وهو بيقؤلها بحزم: 

اعملي حسابك كتب كتابك بكرة 

نورهان اتصدمت وافتكرت انه طردهم ولسة مصمم علي معتز فقالت بحزن: 

يا خاله عشان خاطر ماما الله يرحمها متجوزنيش معتز ده انا بكر*هه 

ابتسم خالها بسخرية وقالها: 

لا ياختي اطمني ده دكتور معاكي في الجامعة  

بس ايه متريش ومبسوط ولسة ماشيين دلوقتي  وانا خلاص اتفقت معاهم وبكرة كتب الكتاب 

نورهان ابتسمت اول ما قالها  كدة ولاحظتها سهام اللي كانت متابعة كلامهم من بعيد وبصت لنورهان بشك وبعدين مسكت فونها وجريت عالاوضة تتصل بمعتز اخوها بسرعة: 

الو الحق يا معتز نورهان جالها عريس وحمدي موافق  

حمدي اتعدل وقال بصدمة: 

انتي بتقؤلي ايه  هو مش انا متفق معاه ازاي يجوزها لحد تاني يعني 

سهام لوت وشها وقالتله بسخرية: 

اصل انت متعرفش دول باين عليهم متريشين اوي وااه كمان العريس طلع دكتور في الجامعة اللي هيا فيها 

معتز استغرب وقالها  بشك: 

دكتور في الجامعة واسمه ايه ده 

سهام فكرت شوية وقالتله بسرعة: 

اه عبد الرحمن وحمدي اتفق معاهم كتب الكتاب بكرة 

معتز اول ما سمع اسم عبد الرحمن افتكره علطول وابتسم بسخرية وقالها: 

انا كدة فهمت خلاص يا سهام اقفلي انتي وانا هتصرف  وقفل معاها وهو بيتوعد لعبد الرحمن 

..............................................

تاني يوم كانت قاعدة هاجر مع جميلة في المستشفي مستنين  دكتور مروان لما يجي وعمر كان معاهم وشوية ومروان جه واول ما شافهم ابتسم  ورحب بيهم وبص لهاجر وقال بود: 

نورتي المستشفي يا انسة هاجر مش اسمك هاجر برضه 

هاجر اتوترت وبصت لعمر اللي كان باين عليه الغضب وبلعت ريقها بخوف وهيا بتحرك راسها بأه وبتقؤل بصوت واطي: 

اه  هاجر ومتشكرة اوي 

مروان بص لجميلة وقالها اتفضلي انتي معايا يا ست جميلة وهما هيستنو هنا وفعلا اخد جميلة ومشي وعمر كان بيبص لهاجر  اللي اتوترت وقالت ببراءة: 

والله يا ابيه عمر هو اللي سلم عليا 

عمر بصلها وابتسم علي شكلها وقالها : 

ايوة كدة عايزك تاخدي بالك من اي حاجة عشان متتوقعيش رد فعلي 

هاجر بصتله بضيق ودورت وشها فقرب منها وقالها بخبث: 

مش هتسأليني عملت ايه مع رنا  

هاجر بصت في عيونه بحزن ودورت وشها وهيا بتقؤل: 

ميشغلنيش انت طلبت مني طلب وانا نفذته واللي بينك وبينها ده يخصك انت  وقبل ما تكمل كلامها لقت عمر مسك ايديها فاتصدمت

 وقلبها دق دي اول مرة يمسك ايديها كدة  بس افتكرت انه ممكن يكون بيعمل كدة عشان رنا تشوفهم وتغير فقالتله: 

هيا  جاية علينا مش كدة 

عمر استغرب وقالها:  

مش فاهم قصدك مين اللي جاية علينا ؟  

هاجر بصت في عيونه بحزن  وقالتله: 

 رنا مش انت عملت كدة عشان تشوفك وتغير عليك 

عمر بص في عيونها وابتسم وهو بيقؤل: 

ومين قالك اني مسكت ايدك عشان اخلي رنا تغير مش جايز عشان انا... 

 وملحقش يكمل كلامه لما جت رنا  فعلا وشافت عمر ماسك ايد هاجر وبيبتسم ليها فوقفت قصادهم وهيا بتقؤل بضيق: 

عمر ممكن اتكلم معاك شوية لوحدنا 

هاجر اول ما شافت رنا اتأكدت انه عمل كدة فعلا عشانها  فل*عنت نفسها انها مشيت ورا قلبها وافتكرت عمر ابتدي يحبها فسحبت ايديها من ايده بهدوء وهو حس بيها واضايق وبص لرنا وقالها بهدوء: 

 تمام  وبص لهاجر وكمل  ثواني وراجعلك ماشي 

هاجر بضيق حركت راسها ومتكلمتش وعمر قام مشي مع رنا  وعيون هاجر متابعاهم 

................................

سهير كانت قاعدة في البيت بتفرك ايدها في بعض من التوتر وقلقانة علي جميلة وبصت لهبة اللي بتلعب في تلفونها: 

بت يا هبة رني علي هاجر كدة عايزة اطمن علي جميلة 

هبة ابتسمت وقالتلها بحب: 

متقلقيش يا ماما  ان شاء الله  خير وانا لسة مكلمة هاجر من شوية وقالتلي جميلة  كويسة اطمني انتي بس  

سهير رفعت ايدها وهيا بتدعي: 

يارب يا بنتي يطمنا عليها

  في نفس الوقت خرج عبد الرحمن من القوضة وقعد قدام امه  ومش عارف يفتح موضوع جوازه ازاي  وسهير  حست بيه فقالتله بابتسامة: 

مالك يا عبده حساك عايز تقؤل حاجة ومتردد 

ابتسم عبد الرحمن وقرب منها اكتر وقال بشجاعة: 

بصراحه  اه يا ماما في موضوع كدة عايز اتكلم معاكي فيه 

هبة قربت منهم بفضول اول ما عبد الرحمن قال كدة وسهير ضر*بتها علي دماغها بخفة وقالتلها  بغيظ: 

قومي يا زفتة شوفيلك حاجة اعمليها وسبيني مع اخوكي شوية 

هبة نفخت بصيق وقامت وهيا بتقول: 

يوووه  هو سر حربي بس ماشي مسيري هعرفه برضه  وسابتهم ودخلت الاوضة 

سهير بصت لعبد الرحمن وطبطبت عليه وهيا بتقؤله: 

خير يا حبيبي قول في ايه 

عبد الرحمن كان خايف من رد فعل امه لما يحكيلها بس اتشجع وقالها: 

بصي يا ماما انا عايزك تسمعيني للاخر وياريت تفهميني الاول قبل ما تحكمي 

سهير بصتله بشك وقالت: 

واد انت قلقتني ما تقول في ايه علطول 

عبد الرحمن بلع ريقه بخوف وبعدين بدأ يحكيلها كل حاجة من اول حبه لنورهان لحد ما عرف  موضوع معتز ومرواحه هو وعمر لابوها وتحديد كتب كتابه كمان 

........................................... 

كان واقف عمر وهو مربع ايده في مكتب رنا وبيقؤلها ببرود: 

خير يا رنا كنتي عاوزة ايه؟ 

رنا قربت منه وحاوطت  رقبته  وهيا بتقوله بدلع: 

اخس عليك يا عمر  بقي انا رنا حبيبتك تعاملني كدة طب هونت عليك 

عمر اتنهد بضيق وهو بيشيل ايديها وبيقؤلها: 

ياريت تبطلي طريقتك دي يا رنا واعتقد اللي بينا انتهي وانتي اللي قررتي مش انا ولا نسيتي 

رنا اتوترت وقالتله بحزن: 

كانت لحظة شيطان يا عمر وانت اصلا كنت بتكلمني وانت  متعصب  ومضايق 

عمر قاطعها وهو بيقؤل بتحذير: 

لا استني بس ثواني كدة اصححلك معلومة انا متعصبتش الا لما خيرتك بين حياتنا سوا زي زوجين وبين شغلك وكيانك اللي بتحلمي بيه وانتي وقتها كان ردك عليا هو انك عمرك ما هتتنازلي عن طموحاتك في سبيل عيال وبيت واسرة 

رنا اضايقت وقالتله  : 

اها وعشان كدة بقي روحت لهاجر ولا عشان هيا بقي صغيرة وعبيطة ضحكت عليها بكلمتين ووافقت تكونلك الزوجة اللي بتحلم بيها 

عمر ابتسم بسخرية وقالها: 

هاجر انا كنت غ*بي عشان  كانت طول الوقت ده  قدام عيني ومش شايفها وللاسف كنت بجري ورا سراب وحب كداب  منكرش اني مكنتش حاسس بمشاعر ناحيتها  بس ده لاني كنت حاططها في خانة الطفلة اللي ربتها علي ايدي وهيا كانت شايفاني  كل حاجة بالنسبالها  وانا بايدي جر*حتها وهنتها وقللت منها، وابتسم وكمل، بس كل ده هيتغير  ،  علي فكرة انا بشكرك يا رنا لانك بسبب موقفك ده ورفضك ليا  اديتيني فرصة اني افتح عيني واشوف اجمل انسانة في الدنيا  واحدة حبتني بجد مش شاغلها غير اني اكون معاها وبس عايزة تحقق كيانها بس وهيا معايا وايديها بايدي  

رنا عنيها دمعت وعرفت انها فعلا خسرت عمر للابد  فحاولت تلم باقي كرامتها وقالتله بهدوء: 

تمام يا عمر ربنا يسعدكم 

عمر ابتسم وقالها: 

ان شاء الله يا رنا انتي كمان تلاقي  الراجل اللي في المواصفات اللي انتي عايزاها ويوافق بشروطك ويكون طموحه زيك  بعد اذنك وسابها ومشي 

........................................... 

كانت هاجر قاعدة متوترة بتفكر في عمر ورنا وعقلها بيهيألها ميت فكرة وفكرة عنهم  وقطع تفكيرها دكتور مروان اللي قرب منها وقالها بابتسامة: 

انسة هاجر والدتك تقدر تروح وان شاء الله كل  اسبوع هتجيبهالي مرتين لحد ما نخلص قرص العلاج ومتقلقيش ان شاء الله هتبقي كويسة 

هاجر ابتسمت وقالتله بامتنان: 

متشكرة اوي ليك يا دكتور بجد علي تعبك معانا 

مروان بصلها بأعجاب وقالها: 

الشكر لله ده واجبي احم  هو انا ممكن اسألك سؤال 

هاجر اتوترت وقالتله: 

اه طبعا اتفضل 

مروان باندفاع: 

انتي مرتبطة او حاجة 

هاجر اتوترت ومعرفتش ترد تقؤل ايه وبقت تبص حواليها  بتوتر  لحد ما جمعت  نفسها ولسة هتجاوب سمعت صوت عمر  اللي قرب منها وحاوط كتفها بايديه وبيقؤلها وهو بيضمها ليه: 

خير يا حبيبتي طنط جميلة كويسة 

مروان اتحرج من عمر وقال بتردد: 

انت  تقرب لهاجر يا دكتور عمر 

عمر بصله بتركيز وقال  بهدوء: 

اه هاجر تبقي مراتي يا دكتور مروان 

مروان اتصدم واتوتر وقال باحراج: 

اسف بعد اذنكم  وتقدرو تاخدو الحجة وتمشو 

هاجر بعد ما مروان مشي بصت لعمر بضيق وقالتله وهيا بتبعد عنه: 

 انت ازاي تلمسني كدة وكمان تقؤله اني مراتك مش شايف انك ذودتها اوي 

عمر اتغاظ وقالها بغيرة: 

وانتي زعلانة ليه عشان عرف انك متجوزاني مش كدة 

هاجر بصتله بغضب ومردتش عليه وسابته ومشيت وهيا من جواها عارفة ان ده مش السبب الحقيقي اللي مخليها مضايقة من عمر 

.......................................... 

قامت سهير بغضب وهيا بتقؤل لعبد الرحمن بعصبية: 

وانا فين من كل اللي حصل ده خلاص مبقاش ليا لازمة مش كدة 

عبد الرحمن قام بلهفة وباس راسها وهو بيقؤل: 

والله العظيم ابدا ده انتي الخير والبركة بس اللي حصل كله انا حكتهولك والبنت لو كنت استنيت كانو هيجوزوها غصب عنها فكري كدة لو هبة اختي مكانها وبتتعامل كدة صدقيني يا امي نورهان انسانة طيبة اوي ولما تعرفيها هتحبيها 

سهير اتنهدت بغضب وقالتله: 

يابني افهمني انا مش معترضة عالبت ولا ظروفها انا بتكلم اني اخر من يعلم يعني بتحب بقالك سنتين يا عبد الرحمن ويحصل كل ده وكمان تروح انت واخوك تطلبوها وانا معرفش طب ينفع 

عبد الرحمن وطي وباس ايديها وهو بيقؤل: 

حقك عليا يا ست الكل والله اخر مرة وبعد كدة مش هخبي عليكي حاجة ابدا  متزعليش بقي يا سوسو عشان خاطري وادعيلي كدة ربنا يوفقني واعرف اخدها من بيت خالها ومراته العقر*بة دي  

ابتسمت سهير غصب عنها وقالتله: 

هقؤلك ايه ربنا يوفقك يابني ويريح بالك ويجعلها من نصيبك قادر يا كريم 

عبد الرحمن بفرحة: 

ايوة كدة  يا سوسو ربنا ما يحرمني منك ولا من دعواتك ابدا  

........................................... 

بليل في بيت حمدي خال نورهان كان قاعد  معتز وحاطط رجل علي رجل  وبيقؤل لحمدي: 

مش عيب يا جوز اختي تبقي راجل طويل عريض وحتة عيل يضحك عليك ويركبك العمة 

حمدي كان بيبصله بغضب وقاله بحدة: 

انت بتقؤل ايه يا جدع انت 

معتز ابتسم بخبث وقاله: 

بقؤل ان العريس اللي جالك امبارح وخلاك ترجع في كلامك بخصوص جوازي من بنت اختك  ده لا متريش ولا حاجة ولا حتي دكتور زي ما قالك 

حمدي وشه اتغير وقلب الوان وقال بحدة: 

ازاي يعني الكلام ده  ثم انت عرفت منين 

معتز نفخ سيجارته و قاله ببرود: 

الواد ده اللي اسمه عبد الرحمن طالب لسة، عند بنت اختك في الكلية وداير حواليها وعمال يشاغلها وكذا مرة اروحلها و اشوفها معاه 

حمدي قام بغضب ونادي بصوت عالي علي نورهان   ... 

• يتبع الفصل التالي اضغط على ( رواية أحببت صغيرتي) اسم الرواية