رواية مطلقة في قلب صعيدي كاملة بقلم مروة ماجد عبر مدونة دليل الروايات
رواية مطلقة في قلب صعيدي الفصل الحادي عشر 11
بسم الله والصلاه والسلام على رسول الله صلى الله عليه وسلم
وطبعا الفيلا كلها بتصحى على صوت زغاريد ، لا الفيلا ايه البلد كلها سمعت ان نعمه هانم حامل ، وعلشان البلد كلها بتحب الدكتور وبتحترمه فطبعا الكل فرحان علشان نعمه ، اللى اخيرا حامل بعد جواز استمر ١٠ سنين وكانت خلاص فقدت الأمل
نغم بتصحى بسرعه وتنزل تبارك لنعمه وتحضنها والدموع فى عيونها ولسه الزغاريد شغاله وسمعتها الحاجه اللى طارت من الفرحه وحست ان خلاص الايام الحلوة هتهل على فيلا الايوبي من تانى
الاستاذ هادى مش مصدق نفسه وعمال يشيل فى نعمه ويلف بيها الفيلا كلها ويقول
الحمد لله اخير يا نعمه ربنا أراد والمعجزة حصلت
نعمه
الحمد لله يا هادى ، بس انت كنت فاكر ايه ، اياك تكون فاكر انى علشان روحت لدكتورة معرفه نغم علشان اكدة حملت ، لا ، انا من الأساس مكنش عندى حاجه
هادى بيقول
اهم حاجه انك دلوقتى تخلى بالك من ابنى ، وإياكى تعملى اى حاجه او حركه غلط انتى متعرفيش ابنى دة انا ياما حلمت بيها ، العب معاه، اشيله ، اعلمه ، اخليه يطلع راجل زى ابوة كدة تمام
نعمه
واه ، انت اتجننت يا راجل ولا ايه وافرض يعنى انه طلع بت هتزعل اياك
هادى
لا يا نعمتى وهاعلمها واشيلها والعبها واخليها تطلع بنت بميت راجل برضو
ولسه هادى ونعمه بيحلموا أحلامهم الورديه للبيبي اللى جاى
عصام واقف بيتفرج عليهم ويحاول يستغل اى وقت تنشغل فيه نعمه علشان ينفذ الخطه بتاعته مع نغم
وهنا نغم بتظهر وهى بتساعد الخدامين فى تجهيز الفطور بكل حب
عصام بيقرب منها ويشيل معاها ويقول
معقول يا مدام نعم انتى بنفسك بتحضرى الفطور
نغم
مفيهاش حاجه يا عصام بيه انا احب اخدم نفسى واخدم اللى معايا كمان ، وانت اخبارك ايه رجلك احسن دلوقت
عصام
الحمد لله تمام ، عاوز أسألك عن حسن بيكلمك ولا مشغول مع ميرا ، حكم انا عارف ان ميرا تشغل بلد وحسن اما بيكون معاها بينسى الدنيا كلها
نغم باستغراب 🥺
مين ميرا ، وايه علاقتها بحسن
عصام بيرد بخبث ويقول😈
ااااا هو انا عكيت الدنيا ولا ايه ، ميرا دى مرات حسن الامريكانيه ، هو محكاش عنها ليكى ولا ايه
نغم الطبق وقع من ايدها وقالت
مراته ، هو حسن متجوز فى امريكا
عصام
بصراحه موضوع مراته دة انا مش متأكد منه ، حكم انتى ست العارفين الستات فى امريكا عاملين ازاى، بس حسن على طول يحكى عنها أنها بتسيب بيتها وتبات معاه فى شقته ، إنما بقى ان كان متجوزها ولا مقضيها اكدة الله اعلم
نغم
مش معقول ، حسن لا يمكن يعمل كدة ، حسن بيخاف اوى من اى حاجه حرام
عصام
لا ، انتى اصلك متعرفيش حسن ابن عمى هو شقى حبتين ، ويحب الحلوين قوى ، واى واحده تعجبه يخطبها شوى وبعدين يسيبها ، بس باقولك ايه يا ست نغم ، الكلام دة سر بيناتنا اياكى حد يعرفه انا بس بعرفك علشان مش معقول برضو واحده ست محترمه زيك اكدة يتسلى بيها شويه وبعدين يسيبها
نغم سمعت كلامه وخلاص بدات الغيرة والشك تزيد فى قلبها من ناحيه حسن وهى كانت مفكرة انه على خلق ومستحيل يعمل الحاجات دى ، لكن من الواضح ان كلام عصام نجح فى تنفيذ الخطه بتاعته وانه يدخل الشك لقلب نغم
ولسه نعمه وهادى بيحلموا بالمولود اما نغم فمش حابه حد ياخد باله انها زعلانه أو بتفكر فى حاجه
هادى بيقولها
مدام نغم مش عارف اشكرك ازاى انك شجعتى نعمه على العلاج والرياضه والحمد لله ربنا اكرمنا بالحمل متعرفيش انا سعيد بيه ازاى
نغم
الف مبروك يا استاذ هادى المفروض بقى تصلى ركعتين شكر لله وتزود من الصدقات اللى بتطلعها
هادى متلخبط وبيقول
ها ، اصلى اه طبعا طبعا
نغم
ليه اللخبطة دى يا استاذ هادى ، ايه مش بتصلى ولا ايه
هادى
لا باصلى طبعا بس باقطع ساعات ساعات كدة بس والله ناوى بإذن الله أنى انتظم فى الصلاه بس اشيل ابنى فى حضنى الاول
نغم
لا يا استاذ هادى المروض اننا بنصلى علشان دة فرض علينا مينفعش نقول هنصلى لما يحصل كذا
هادى حس فعلا انه مقصر اوى مع ربنا وكلام نغم لمس قلبه وبدا فعلا يحس انها ست كويسه
ومر اليوم وبالليل نغم بتكلم حسن وتحاول تفهم منه ميرا تبقى مين وليه عايشه معاه فى نفس البيت لكنها مش عارفه تبدا الكلام من فين
نغم
ازيك يا حسن عامل ايه
حسن
الحمد لله انا تمام انتى عامله يا حبيبتى طمنيني عليكى وعلى البيت كله
نغم
كلنا كويسين اوى الحمد لله، وكمان عندى خبر حلو اوى ليك ، نعمه حامل
حسن
ياااه الحمد لله بجد انتى وشك حلو اوى على حد تدخلى حياته
نغم
ماشى ، يارب بقى يبقى وشى حلو عليك انت كمان ، طمنى عليك بتاكل ازاى وبتاكل لوحدك ولا فى حد عايش معاك
حسن بيرد بكل براءة ويقول
لا عايش لوحدى وباتغدى فى مطعم جنب الشغل والعشا هنا فى البيت حاجات خفيفه كدة
نغم
امممم ، هو شغلك فيه ستات يا حسن ولا رجاله وبس
حسن
لا طبعا فيه رجاله وستات ، زيه زى اى شغل تانى ، ايه بتغيرى عليا ولا ايه
نغم
اكيد طبعا لازم اغير عليك ، ولا يزعلك
حسن
خالص دة احلى حاجه فى الدنيا انتى تغيرى براحتك بس انا عاوز اقولك ان مفيش فى قلبى حد غيرك ومش من دلوقتى يا نغم من زمان اوى
نغم
طيب ممكن اسالك سؤال
حسن
طبعا حبيبتى اتفضلى اسالى
نغم
مين ميرا اللى قاعده معاك فى بيتك
حسن
ميرا ، مين قالك الموضوع ده ، محدش يعرف عنه حاجه غير تقريبا نعمه وعصام لأنها كانت بتتصل كتير عليا وانا فى مصر
نغم
محدش قالى حاجه بس سمعت كدة بالغلط وقلبى حس ان فيه حاجه ما بينكم
حسن
لا خالص مفيش ، ميرا دى بنت بتشتغل فى الجامعه واتعرفت عليها وبقينا أصدقاء ولكنها يعنى متحررة شويه وانا الحمد لله اقدر اسيطر على الوضع كويس
نغم
يعنى انت مش متجوزها
حسن
لا طبعا جواز ايه ولا فى اى علاقه ما بينا اصلا
نغم لسه برضو مش مصدقه حسن ونجح عصام فى انه يزرع الشك والغيرة فى قلبها ، وقررت انها تسأل فى الموضوع ، وقفلت مع حسن وهى برضو زعلانه
وفى امريكا عند حسن بيشتغل بكل جد علشان يخلص شغله وينزل مصر فى أقرب فرصه ، لكنه اتفاجا ان فى مسروقات من الشركه والحاجه اللى اتسرقت دى كانت المفروض انها عهده حسن ، ولازم ترجع تانى ولو مرجعتش حسن كدة ممكن يدخل السجن
حسن بيحاول بكل الطرق يثبت انه برىء ويحاول يعرف مين اللى سرق العهده بتاعته ولكن للأسف بدون جدوى
ومر يومين وحسن لسه مشغول جدا ومش فاكر اى حاجه فى يومه غير الشغل والمصيبه اللى اتحط فيها ، ونغم فى مصر مستنيه انه يتصل وجواها لسه شك فيه بسبب كلام عصام
وبعدها بيومين عصام فى الفيلا بيسال عن حسن ونغم بترد وتقول
الدكتور حسن بقاله كام يوم مش بيتصل وحتى انا اتصلت بيه ومش بيرد ، اكيد مشغول فى شغله ربنا معاه
عصام بخبث وبصوت واطى بيقول
مش قولتلك لما بتكون معاه ميرا بينسى الدنيا ، تلاقيهم بايتين سوا وقافلين الموبيلات ولا حاسيين بالدنيا
وفى خلال الأيام دى عصام قرر انه ينفذ الجزء التانى من الخطه ويضرب على الحديد وهو سخن
عصام
مدام نغم ايه رايك عاوز مساعدتك فى مشروع كدة باعمله للبلد ، اصلى باعمل مدرسه ابتداءى ودار أيتام، وكله من مالى الخاص، لله وحياتك ، انا اصلى باصلى واصوم اتنين وخميس واحب اطلع نص مالى لله والمشاريع الخيريه ، ايه رايك تبقى معايا وتشوفى الأرض اللى بيتعمل عليها المشروع ،
نغم سرحانه فى كلامه عن حسن وميرا ولكنها ردت وهى مش عارفه هو بيتكلم عن ايه وقالت
اه طبعا طبعا ربنا يوفقك
وتانى يوم عصام من بدرى مستنى نغم تخلص شغلها مع ام حسن وابنها وتنزل تروح معاه مكان المشروع وطبعا عصام لابس بدله شيك اوى ومعاه عربيه اخر موديل وبصراحه اى بنت مستحيل تقاوم كل الإغراءات دى
ونزلت نغم مع عصام ولكن فى بلكونه الفيلا واقفه نعمه اللى شافتهم وهو بيفتح ليها باب العربيه ، ومن الواضح ان نعمه لسه مش صافيه ونيه الانتقام مسيطرة عليها ، نعمه بتصور نغم وعصام وتحتفظ بالصور إنما بتعمل ليه كدة الله اعلم …
بيدخل عليها هادى ويقول
نعمتى بتعملى ايه خير وليه واقفه مش خايفه على ابنى ولا ايه
نعمه
اسكت يا حزين ، باين كدة ديل الكلب عمرة ما يتعدل والمطلقه بتستغل غياب اخوى وترمى شباكها على عصام
.هادى
لا مش ممكن بصراحه الست محترمه اوى ومشفناش منها حاجه وحشه
نعمه
اسكت خالص انت متفهمش حاجه فى شغل النسوان وياوليك يا نغم منى، انا كنت زمان مكسورة انما دلوقتى خلاص لازم احافظ على شرف وسمعه اخوى
يا ترى نعمه هتعمل ايه بالصور ؟؟
ويا ترى عصام هينجح فى الإلحاح على قلب نغم ؟؟
ياترى حسن هيطلع من الورطه دى ومين اللى حطه فيها ؟؟، ولا هيدخل السجن والأمور هتتعقد ؟؟
- يتبع الفصل التالي اضغط على ( رواية مطلقة في قلب صعيدي ) اسم الرواية