رواية اسرار قدس كاملة بقلم زينب ماجد عبر مدونة دليل الروايات
رواية اسرار قدس الفصل الثاني 2
واذا سالوك بالغ بالوصف بيهم
وكللهم مثل خواني ماكو خوان
واكبر من حجمهم كون تنطيهم …
ياخي مابيهم مضره اخواني طب اعشاب
وانت مغمض عالجرح خليهم
( للشاعر علي المنصوري)
خطاب : يمه بالله ما اتأخر .. اروح اوصيهم وارد
امه : استر عليه يالسبع يمه الله يستر عليك
– يمه ماكو شي بسيارتي اوصي ع الغراض لا تخافين
– شلون ماكو شي والدنيا متلايمة وبوش حاط احطاطه ويانا وصواريخه فوك روسنا تمطر .. لا يجيك صاروخ واروح اتعزى اكعد وليدي
– يما جاهل انا وتخافين علي صدك تحجين ابخت الله
– دعوف الطلع تعال احاجيك
– يابه ما اتأخر يمعودين شبلاكم
– اشعدك هناك شو شاد حيلك
– شعندي غير خالي وصاني على شغله
الحاجة: ابالله وتالله مو كودك خالك وشغله .. من امس واليوم مهرف كلبك اعلى بت وسام ، ورايح تتنطر الشوفه
– شني الحجي هذا يما .. دبسسسس كتلكم ما اتأخر
احمد: خطاب
اندار يمشي بهمة ويشمر بيده وهو يكول :- نحجي من ارجع
– اسمع هين احاجيك .. دحج
وكف اندارله :- شرايد ؟
-اصطبر اروح وياك جيب السويج
دحك عليه باستغراب :- شكو ؟
– دطني السويج
انطاه اله .. خذاه احمد ومشى كدامه حجه خطاب : شنو دفهمني
-امشي نحجي بالسيارة
ظلت امهم تصيح وتكاون وراهم
ما سمعوا عافوها وطلعوا ركبوا السيارة البيكب وطلعوا ، اندار خطاب
– شنو ابالك
– رايد اسألك ، شنهو الضمو خالي غاد ابيت وسام ؟
– ملفات جبناهن من السجن وضميناهن غاد عدهم
– وهسه يريد منك تدفنهم تحت التربان
– اي عليش ؟
– شنو هاي الملفات ؟
– مال سجن غير يعني ما اعرف شغلهم
– دحج لو ما الملفات هاي مهمة وتكسر ظهر خالي ما يخاطر بهالوضع ويروح يجيبهم من السجن وهسه يريد يدفنهم .. جاي تفتهمني ؟
– لا ، شنهو البالك ؟ ووين تريد توصل
– نشوف هالملافات شنهو وشتحوي وليش جاي يضمها
– لا نروح نبتلي بهالسالفة احمد عوف
– خليها عليه
– شناوي ؟
– انا ادورلي على خالي لزمة اكسر ظهرو بيها واطلعو من البيت
– خالي مو عدونا ، احنا اهل حل المشاكل بالعكل لا تتكايد وتمشي بالحيلة
– العكل ويا خالي ما ينفع الاكل مال اليتامى وماخذ حكهم وحاكمهم اي عكل التحكمه بيه بعد ؟
– احمد ما ادري شكلك ، بس ما راضي بكل هذا يعني
– انت عليش ادافع الخالي ومستكتل عليه وهو ماكل حكك
– حك الربى خالي ربانا
– شرباك ؟ خلاك تدرس لو عمرلك دار لو حطك بوظيفة خير بستان ابونا يدر وانا وياك يطلعنا نشتغل عمالة والله حتى نحط كم فلس بجيوبنا ونفرح .. يول هاي تربية لو شكى
ربانا لو جان حان علينا مكعدنا فرد يوم معلمنا شنهو الصح وشنهو الخطا كضى عمره ويانا مصايح وما يتفاهم وامي حاسبته براسنا الحريص واليخاف علينا، هو لو يخاف علينا يخلينا هذا حالنا ؟ .. دحج ابنو وهب مثلنا ؟ يكد يشتغل يشكى ، شو خيرنا وهم الشبعانين بيه واحنا النشكى
وازيدك من الشعر بيت اهو جان حال الضيم حالو
وكعد ويا امي مو لسواد عيونها خاطر يخلص من الفكر الجان عاضو
وامي على ابو عزبة وجهيلها زغار جابتو وركبتو فوك روسنا .
دحك لخطاب
صافن ع الطريق ما يحجي .. سكت احمد
عم الهدوء .. حس فكر خطاب متخربط وميدري شيقرر
غير الموضوع وندسه : شقصدها امي ابت وسام .. ها يولو ؟
حجاها وهو يندارله بغمزه .
ابتسم خطاب : هيج يمعود
– عشكان بتها
– لا مو الهالدرجة .. بس انعجبت بيها بنية من اهل الله وكلت لامي اتخطبها ، اشو ما اشوف الا امي تنز وتصيح دخيلك ابعدنا امها وامها
– شبيها امها
– ما عرف والله انا هاذ الاتمنى اعرفوا
– سهلة لا تحير، بس خل تكضي مصايب بوش ويستقر الوضع ومعليك علي انا اتخطبلكياها
-ان شاءالله
…..
قدس : اجا الليل وانا كلشي ما مفتهمة من يومي
خلصيتها بين المراح والهايشة الجايبة جديد .. وبين الببت .. تكضي من الريوك وهوسته لازم تحضر للغد تخلص هوست الغدا طفت اعلى كم حاجة كضى النهار وتعال سوي عشا ..
مرت اخوي الاخرى عد اهلها بالموصل .. اخواها اجالها كبل ضربة بوش بايام زعم هي تخاف من حس القصف .. ضلت بس نهلة .. وبناتها عبير وشروق زقار عمرهن يطلع ٥ و ٦ سنوات .
نهلة مرت اخوي كشمة ( مو حلوة ) واكبر من اخوي ب ١٢ سنة، بس كلبها ذهب ونادرة حيل مرة معدلة وقصتها قصة لجن قصتها (بقلاع الضر) امي استنكتها استنكاه خاطر تعاونها بالبستان ونعيش من خيره ..زعم انا حتى البستان مرات اخوتي ما يرضون اروح احوش لو اساعد امي .. عسرين
عيشتي خدمة بهالبيت .. وامي ومرت اخوي يطلعن
صار عمري ١٨ سنة وانا ولا واحد شايفني وخاطبني .. ووين يشوفني هاذ الواحد وانا عيشتي بهالبيت .. اسمي عايشة ابغداد وانا بغداد ما شايفتها .. امنية حياتي مو زواج وعرس وبدل صح اتمناهن مثل البنات واتمنى اعرس واخلص من اخوتي .. بس امنيتي اطلع سوك واشوف شلون العالم يشترون ويمشون
من جنت صقيرة وامي بالحبس
جنت اذكر عايشة بكلعة جدي بالموصل
جانت الايام حيل حلوة .. جثير بنات بحلي العب وياهن يلعبن وياي
حتى اذكر اسم اللعبة توكي وغميضان وشدة يا ورد وهيلة يا رمانة .
وعيت ع الدنيا امي ما هي .. ربيت عد مرة ما تبزر خذتني ودللتني
سجلتني مدرسة صف اول وثاني .. وجنت حيل مدللة عدها .. بس اخوتي جانوا عد عمامي شافوا الضيم قاد .. ينكتلون ويعذبونهم جثير .. لهساه من اسأل عليش عمامي جانوا يكتلون باخواني ما الكاه جواب
بليلة وضحاها
كالوا امج الحقيقية تريدج ولازم تروحين وياها
خبروني بالليل الفجر سلموني لامي وسام طلعت بينا الفجر مثل الشاردين نتختل .. ما اعرفها ولا احس وياها بالامومة .. وجهه جان يخوف .. ما استوعبت الصار ولا رضيتها ولا حبيت عيشته
جنت اسابيع اخلص الليل ابجي وادحك للكمر والنجوم واتمنى اطير يمهن
اتمنى ارجع للربوني .. امي وسام عسرة حيل على اتفه شقلة تكتل وترزل وما تتفاهم .. ولا فد يوم كعدت وياي وعلمتني لو حسيت هي امي .. ما اعرفها .. لليوم هي غريبة علي وسر ما جاي احله
ليش هيج وشصار وياها وانحكمت مؤبد وليش ذبوني عد وحدة تربيني
ابوي ما عرف عدل ميت
وما فرد يوم فكرت لازم يصير عدي اب لو اسعل على ابوي الحقيقي ..
زعم الاعرفو ابوي وامي العشت عدهم ودللوني هذا الاحسه بداخلي
امي وسام ..واخوتي المنها اعتبرهم كابوس تحلمت بيهم وانا عمري ثمن سنوات وعلكت بهالكابوس ما جاي ارجع.
قانون البيت عد امي
عد ما تقيب الشمس ويوذن العشا الكل ينام وممنوع احد يكعد بعد
ليش هالقانون ما عرف .. وهذا هم سر اتمنى اعرفوا بس ما استجري اكعد باليل ، امي تكتلني .
اكل عشاي وافرش افراشي وانام
بس منتبهه لشي .. عد ما نتعشى ونكش البيت ونروح لقرفنا ابو وهب ما هو .. اكعد الفجر الكا جزمتو بالباب وهو نايم بالدوانية .. جنت ما استقرب بس كمت اسعل نفسي كل جياتوا بالليل نصحى ونلكاه ما فرد يوم مرلنا بنهار .. ويطلع من عدنا ويا طلعت الشمس .. من افكر واجمع اسراري تطلع جثيرة ويا لغز احير بيه اتعب .. اختمها واكول مالي غرض اكل واشرب وانام والسلام .
كضيت العشا اطيته النهلة
وكتلها : انا نعسانة كلش تعشوا وكشي البيت خل انام
كالت: اني اخلص الشغل
رحت نمت من ال٦ العشا لحد الساعة ب٣ بالليل كعدت صوت قصف بعيد بس مسموع الدوي مالتو والصوت المرعب .. بس ما يهز الكاع مالنا بعيد ..
شلت راسي دحكت .. عمار نايم بس يوسف ما هو .. والضوا مالت اللالة كلش خافت .
كمت لحيلي جريت الربطة لبستها
ورحت للالة اشيلها واريد اعليها .. الا تطيح الشيشة وتنكسر نصها ، فريت : تعزيت تعزيت تعزيت امي لو درت كاسرة الشيشة الا اتكسر راسي .. يا صخام الصخمني .. هسه شكعداني .. دضلي نايمة احوس بهالليل اكعد امداني .. شكول لامي .
عليتها كامت تصخم زعم ما بيها شيشة
دحكت الشيشة ضال منها ربع والمكعد مالتها عدل ما مكسور .. شلتها حارة
جريت ربطتي وشلت ربع الشيشة وثبتتها ع الالة كعدت بس ربع .. يلا لا من شاف ولا من درى .. هذا عمار ناحرها برجلو وما يدري ما اني .
طلعت من القرفة ..
الجو بيه لسعة برد
وصوت الصواريخ والصواريخ يخوف
كهرباء نسيناها لو بطل لو لالة لو ظلمة .. امشي بالبيت اظلم
اتكضبت بالحياطين لحد ما وصلت قرفة امي .. هم ظلمة !!
امي ما تنام بقرفة ظلمة .. فانوسها يم راسها دوم .
صكيت باب القرفة
مشيت لقرفت نهلة فكيت الباب على كيفي خاطر اشوف هي واخوي نايمين لو كاعدين .. مديت راسي ادحك .. ظلمة ، صاحت نهلة : ياهو ؟
– انا قدس مروان نايم ؟
– ما هو
رديت الباب وطلعت للمطبخ تكضبت وجريت الفانوس ..
خذيته ورحت ادور يم مكان الجولة على الشخاطة .. كضبتها وشعلت الفانوس
رحت لقرفة امي ماهي .. الدوانية فارقة .. عجل وين راحو مروان وامي ويوسف ؟
طلعت برا البستان هوى عالي حيل
رجعت الفانوس .. ورديت طلعت ادحك البستان والمراح ما جن بيهن احد
انداريت من صوب الجول ع الممر وطلعت ادحك ع الجول .. الجو اظلم وصوت الهوى العالي من ورا الربطة يخوف جنه مال اشباح .. دحكت بظلمة شكل الجول يقبض النفس .. وينمل الجسد ويسري الخوف بالواحد .
– شعدج واكفة هين
فزيت من كل كلبي على الحس الاجاني من وراي
انداريت ما دحكت الوجه ولا ميز الصوت .. ظلمة وبس ظل واحد منكب واسود .. صرخت من كل كلبي وذبيت روحي ع الجول اريد اشرد .
كضبتني : وثول حتى ثوووول انا امج .. شجالج
ردت روحي من كالت انا امج
وكفت واني اكلها : خرعتيني يمه دخيلج شنيييه هو هيج
– وثول خرعت عليش .. تتعايرين
شمطلعج بهالليل ادحكين للجول ها .. انا ما موصيتج ما تكربين من الجول
– يمه مو رحت لقرفتج ما لكيتج
– ومن ما لكيتيني ادوريني شلج وراي ، صايرة فرد وحدة ما تنجرعين وعينج طالعة من زودها اخبر اخوتج يعلمونج شلون تكربين للجول
– لا يمه احلفج بالله لا تكليلهم يمه بروح ابوج .. والله بعد ما اكرب
– عجل فاركي فاركت روحج كون ولا ردت .
ركضت صوب البيت
دخلت المطبخ كلبي يرجف من الخوف
شربت مي .. صوت القصف بهده ما يهود صاروخ ورا صاروخ.
اجت نهلة : شكو يولي شجالها عمتي
– رحت ادحك بالجول وصادتني
– فلك صاب راسج كون ولا اتوبين من افتوكج
– اكلج جيبي الفانوس اخاف اروح قاد امي ترزلني
– ضلي هين انا اجيبو
وكفت اتنطر جابت الفانوس امي هم كربتها عدالها تريد تدحك ع الجول لو تطلع كالتلها : شجالج عمة ياهو بحال الجول ويطلعله بهالليلة المِظِلمة .
اجت: هاج من اكلت رزالة من جوا راسج
اخذت الفانوس واني اكلها :- اعجن ؟
– اي عجني على ما ينهض موذن الصبح خاطر نصلي ونخبز ونزهب الريوك .
عجنت ورحت لامي بالدوانية متمددة ونايمة مو بقرفتها : يمه
– وغمه .. شرايدة
– عليش نايمة هين ما بقرفتج ؟
– جوعانة انطر يصير الريوك اكل وانام بغرفتي شوية ، خبزتي ؟
– اي يمه اجيبلج خبزة حارة
– لا ، انطر الريوك
– ميخالف
ردت امشي .. اتذكرت ورجعتلها : حكة صدگ يمه اذكرت
– شكثر تكركين يولي من صباحيات الله ما تهودين كر كر كر من تكعدين لحد ما تنامين
– عجل يمه ويامن اسولف ؟
– والا تسولفين اسكتي صرعتينا
– زعم قير اخبرج
– خبريني يالله خل نشوف ام العلوم شعدها من علم بهالصباحيات ، احجي يااااله
– شيشة اللالة مكسور
– اها ما تجيبلها علم براسه خير كل علومج مثلج فكر وما بيها خير .. ياهو الكسر اللالة ومنين نجيب شيشة هسه اكوم اسكطج هسه وانعل ابيج
– يمه ما اني الكسرتها
– عجل ياهوه ؟
– ما عرف
– والله لكص اديني من هين لهين لو ما طلعتني انت الكاسرتها يولي
– يمه ما انا شجالج علي .
– ولي من هين لا اركعج بالنعال نعلت الله على اهلج لابو خيركم يا جلبة يا بت الجلب .
صاحت نهلة واني اشرد من رزالت امي : ولج قدددددس .. هي ملطمة وينج
– هااا
– ووجعا شعدج رايحة تحاجينها
– كلتلها على شيشة اللالة مكسورة بعدين تروح تكع براسي اني معلي
– وياهو الكسرها
– شمدريني يمكن عمار نحرها وهو نايم
– جذبتج بيضة واضح انت كاسرتها ورايدة تتبرين منها سويلج هم وياي وخل نكضي الريوك ونصم حلوكهم يلا ارد اطلع للبستان
– عليج الله كلي لامي خل اروح وياجن للبستان احوش برتقال
– عود اكللها بس اشتغلي
كضيت وياها الريوك .. امي نعسانة
حجت نهلة ؛ عمة ما طولج نعسانة وتريدين تنامين خل اخذ قدس والبنيات للبستان نحرش البرتقال
حجة مروان : لا اطلعي حوشيهن وردي بساع
– شيحوشهن وحدي اشايفني كرابة محراثة .. شبيها لو راحت وعاونتني المن اصير للبيت للبستان للحلال لو للجهال .. اطلع عاوني انت بدل ما كاعد تلف بهالتتن وادخن لا فايدة ولا زايدة
– انعل ابوج لابو عشيرتج اتسكتين عني لا اكوم افرغ الورور براسج
– يا كلاب الدنيا اي والله المچعچ يفرغ الورور براسي .. ما تولي
– هاي عليمن
– عليك عجل على امي
كام لحيله يريد يهد عليها ان جان تحركت من مكانها لو انهزت
من شافها ما اهتماله كام يهددها : الا يعرس عليها مرت الاخرى
ردت : وعرس ياهو الكاضبك هو انه حاسبتك زلمة خاطر اغار عليك .. عسى ما تاخذ الرابعة الله يجثر ويبليك .
كامت امي تصيح عليهم
مروان طلع من القرفة يصيح ويغلط عليها وامي استعزت بمكانها ما كامت منه اندارت تنام .. حجت نهلة : عمة راح اخذ البنوات ( البنات ) يعاونني
– اخذيهن بس عينج عليهن
اشرلتلي اكوم .. شلت صينية الريوك وركضت خضيتهن وجفيتهن ع الحوض
وجريت عباتي من البوفية وطلعت وياها .. عكبنا الممر الي على الجول ومشينا للبستان ، حجيت : الجول شبيه
– بيه شيب ابوج يولي ياهو مالتج انت ادورين ع النغل ياهو ابوه وتبحوشين على امور اكبر من راسج
-شسوي
– التسوينه اكلي واشتغل ونامي
– اهوووو
– ووجعو .. شيلي السلالي يلا .. شيلن انتن ويا عمتجن يلا
شلت السلالي ورحت احوش وياها برتقال
كعد عمار ما لاكي احد يسويله ريوك وامي نايمة
اجا للبستان مهرف .. كضبني من راسي وجرني : اني مو كايلج ما اطلعين للبستاااان موصيج لولااااا
كمت اصرخ وابجي واكلو: امي كالتلي ووووووواالله … يمااااااا
اجت نهلة تركض بيدها كرك .. وهبدته على راسه : حيل عنها المسلوع ابو حلك المهدل صاير زلمة ويتمشيخ علِينا
– عليش اطكين بت الخ****
– ولك ياهي بت الخ*** اكرب افلع راسك وراس الخلفوك وانعل والديك زعم شوفوني صرت زلمة ما يدري احط الجلبه وابوله عليه
ما رد عليها كام يدافع يريد يكضبني
دفعته : شرايد
– ما تطلع للبستان ادفنها
– اني خذيتها وياي تحوش انت واخوتك وامك فاكين حلوككم ونايمين عجل ياهو اليعاوني
– والبيت ياهو اليخدمنا بيه
– دكول جوعان اريد اتسمم سم الهاري كون يهرش البطون .. امشي انت يالدبة ردي البيت وسويله سم .
– فد ما يكتلني ؟
– ما يكتلج شو وليييي.
ضليت ادحك عليه وهو يتصيدني
خليت عباتي بسنوني وطكيتها ركضه جدامه .. وهو ركض وراي
شويه ووكف من شفته وكف .. كملت للبيت على كيفي
وفتت سويتله ريوك .. صاحت امي : قدسسسس
– ها يمه ؟
– وردتي الهوش ماي
– لا يمه ما وردتهن
– اطلعي اورديهن ماي واحلبي الجابت امس
– زين يمه
حطيت الريوك لعمار وكتله : راح اطلع للمراح ما تكول ما كلتلي
– ولي خل اكل
طلعت منه وقميته .. وقميت حظي الذابني عليه
رحت للمراح طلعت الصخول وجريت الهوش وردتهن ماي
ورحت للولدت امس .. مسحت على ظهرها وهي تشرب ماي
جبت السطل مال الجليب حطيت تحت ضرع ( ثدي ) الهايشة، وجبت التخته حطيتها جواي وكعدت احلب بضراعها .
حلبت سطل وهديت الهوش والصخول يرعن بالمراح
ورديت للبيت لكشت التمن عنبر وركبته وركبت مرك الحمص
وزهبت الغدا لاهلي .. دخلت نهلة تعبانة تتغدا وسلالي البرتقال مصفوفة برا
جبتلي سلة نايلون حطيتلي بيها كومة برتقال وخذيتها للمراح كعدت يم الصخول والهوش اقنيلهن واكل برتقال :
لازعلك بستان ورود
شجرة صقيرة تفييكي
ولاقزلك من نور شمس
سواره حطه بأيديكي
اقني واكشر بالبرتقال واحاجي الهايشة : هنيالج عدج ثور وعرستي
عجل انا يمتى اعرس شني راح اضل مجابلتج .. انت مو عرستي وجبتي وذرن ثداياج .. انا هم اريد اعرس ويصير عدي فرخ صقيرون العب علي اتونس بيه .. شني اضل هيج
بس وين اشوفه انت امي جابتلج عجل وعرستي
اني امي منين تدورلي رجل .. بس لاخواني تعرف تدورلهم نسوان وتجيبهن وتجي ولا تفكر تكول بتي كبرت تريد رجل .. شني عجل اني ما بشر ؟
بس يلا شنسوي البرتقال هم طيب ناكل والله كريم
دحكت كشور البرتقال صايرة تل استقربت اني اكلت كل هذا
لا ما معقولة .. يلا وين اروح شو لا تفكير يرضون افكر
لا يرضون اطلع .. لا يرضون احوش ، انوبه احرم روحي من الاكل
شباقيلي قير الاكل اتسلى بيه ؟
احجي ودحكت امي واكفة وتتصنط عليه : ها يمه
– انت ثمج ( حلكج) ما يسكت لو يلوچ لو يسولف
– عجل يمه شسوي ؟
– انجعمي واسكتي
– امرج يمه
– روحي الهوش والصخول وردي للبيت ولد اخت ابو وهب اجوي لا اطلعين جدامهم
-ميخالف
مت روحت الحلال وحطيت الجت يمهن وصكيت المراح .. طلعت منه صدت بعيني العنب .. امي مسوي ممر صقير بسمي وعودان مثبته عليهن العنب .. وعنكود زقير مال عنب توه طالع .. رحتله ومديت طولي انوشه
.. خطاب واحمد ومروان واكفيت كبال الدار
والمراح ودرب البستان جدامه .. احمد ومرواني منطين اظهورهم للبستان ويسولفون وخطاب واكف جدامهم يدور بعيونه بلكت يلمحها مرت الاخرى .
لحد ما لمحها وهي تمد طولها تريد تنوش عنكود العنب
خطاب : تيهت الحجي والسوالف لحظت اللي لمحتها .. ظليت حاير بين انزل عني عيب من اخوها وبين اريد اشبع شوفي بمنظرها .
ثوبها اصفر
وموزرة العباية على خصرها
وردنها ابو التجة جارته لنص ايدها وضاك تجت الردن على ايدها وهي سمينة
تهت بملامحها .
الهوى يهب بوجهي من البستان ومن شوفها العرك ينضح من كصتي ما جففه الهوى .. ناري الوجت بداخلي يسعرها الهوى ما يطفى بيها
ندسني احمد .. دحجتو
خزرني ورد يدحج المروان ويجره .. حسيت احمد فهمني اني تهت بغير واديهم .
احمد و مروان مشوا بممر للجول
وانا ظليت مبسمر بمكاني .. امسح على لحيتي ومدنج
وارد ابوگ بشوفي وادحكلها .. دكات كلبي اليدكن حيل على العرك الينضح من كصتي على الرجفة السرت بعضاي .. تيهت روحي .. مدري شجاريلي بيها .
صاح احمد : خطاااب
انداريت بفزة :
– تعال خوية يلا
مشيتله وهو كضب ايدي وشوشلي : يولي اهجع راح تمنجدنا
– يلا الملفات بالجول ندفنهن
مروان : متأكدين الخال كال بالجول
خطاب : لا بالبستان
احمد : لا يمكن كال بجول عليش ؟
– ما ادري انا اشوف بالبستان امن للملفات
– زين اكدر اطلع عليهن .. كبل لا ندفنهن
– امي ما ترضى
– انا معلي هو خالي راد منهن ملف كال اسم الملف غيدان ناظم
– اروح اكل لامي واشوف
– ديلا استعجل ناطرينك
مشى مروان وقدس اجت من المراح شافها والزلم واكفة صكعها على راسها : شعدج طالعة بت الخ** ما تشوفين زلم موجودة
قدس : جنت اسرح بالحلال امي كالتلي اايييييي
-فوتي لا ازركج بجلاق اكسر ضلعج صخلة
رجع صكعها على راسها وضربها جلاق وفوتها جوا
احمد يحجي وخطاب يدحك على مروان شلون يصكعها
-خطاب يول راح تبلينا
– البنية حيل خشت مخي .. بس خطية عليش هيج يجتلونها
– مو اقل من الجتل الياكلنه البنوات العدنا .. خطاااب
– اييي احمد شبيك
– لم روحك لو ما نادسك انا كدام اخوها جان كضبنه وحز اركابنا معلك عينك باخته
– انا لازم اخطبها .. بس تخلص هالاحداث اخطبها ترضى ما ترضى امي اريدها .
– وعد مني انا اخطبها الك حتى لو امي ما رضت بس ركز وياي هسه وخلينا نشتغل
– خالي كال بالبستان
– ادري بس ليش مروان رفض من سمع باسم الجول
– ما ادري
– لازم نتفق اني وياك ونكل لامه خالي كاللنا بجول
– عليش
– احنا جايين جايين خلينا نعرف سر الخال شنهو بهالملفات والجول .
طلع مروان وامه وسام ..
سلمت عليهن وكالتله : يا ملف الكالك عليه ابو وهب
احمد :- اسمه غيدان خطاب مو
– اي اي يمكن هيج اسمه
– بس غيدان
– لا كال الاسم الكامل بس ما ادري الكامل شنو خطاب تتذكره
– يمكن غيدان اسماعيل
– اي يمكن .. صح اتذكرت
– دخلوا للدوانية واكعدوا
يبحثون .. لكوها وثائق سرية تخص الدولة تابعة للسجن اللي يشتغل بيه ابو وهب ، لو طلعت وتسربت المسؤل ابو وهب .. اما لو انكشفت على ابو وهب من غير الحكومة فابو وهب يروح بيها .. على الجرائم والوثائق السرية جداً .
خطاب انصكع هو واحمد بالقروه واللي اطلعوه عليه، حجه خطاب : يول لا تصكعنا بهالبلية خل نعوفها ونسوي المطلوب ونمشي
– انت قريت لو قريت .. هاي الملفات كفيلة باعدامو
– يول منو يعدمه ؟ هي الحكومة المامنتو عليهن
– ولو خان الامانة ؟ .. اما لو سقطت الحكومة فمصيروا بادينا .. بس ندلي بموقعهن يروح بيها
– انت راح تدفنهن بالجول وتمشي شمدريك يضلن على حطتهن لحد ما نردهن
يحجي خطاب واحمد مركز بالسيديات : جاي تشوف ويا كل ملف سي دي الله اعلم هالسيديات شتضم من مصايب
– احمد اكول لا تورطنا اذا هالملفات تابعة لحكومة اجفينا شرها وخلي خالي يبتلي بيهن
– نبلي هو حية تطلع من اي مصيبة تصيبه بسمه
– احمد جاي تلعب ع الثكيل
– ويا محلاه لعب الثكيل
ظلينا ندور بيهن ونبحث .. دخلت وسام : لكيتو الملف
– ما لكيناه
خطاب : احتمال ناسي خالي او غلطان بالاسم ما جاي نلاكي
– وهسه وين تدفنون هالوثائق
احمد : بالجول
– لا بالبستان ادفنوهن امن
احمد : بالبستان بالبستان بس لو خالي سالنا نكله رايج
– اي كلو .. بضمانتي
– يلا يابه خلي نسويلنا همة وندفنهن بالبستان كبل لا ينزل الليل
شالوا الملفات .. احمد وخطاب ومروان
نقلوهن للبستان .. حجه احمد : مروان بس جيبلنا ماي بعرضك متت عطش
مشى مروان ..
اندار خطاب : انت شنو ابالك ؟ جنت تريد بالجول حولت بالبستان
– ما طولها رفضت ينضمن بالجول معناته الجول اكيد بيه شي
– اي ؟
– نجيلو بوكت اخر نكتشفو
– والله يا احمد خايف عليك
– يول عليش تخاف
– جاي تلعب بالنار خوية اتفقنا نرد حك ابونا مو نتورط ويا الحزب
– خلها يم ربك
– والنعم بالله
جابلهم مروان ماي شربوا وكاموا يحفرون بالكاع .. مشى مروان وخطاب مدنجج يحفر بالكرك .. صفر احمد بحلكه وصاح : يا ويلووووووو
اندار خطاب يدحك : شكو
– يول فاتت بس مو مرة فلك
– احترم نفسك لك لا تحجي عنها هيج
– تغار عليها مني يولو
– انا اكلك رايد اتخطبها وانت تغازلها
– ومنو كال هي يمكن غيرها انت ما شفتها
وكف من الحفر واتقرب منو : بهالبيت ماتلكى نسوان غيرها .. تلاكي المسترجلاة كل وحدة بيهن كاضبة هالمسحاة والكرك وارجل من زلم هالبيت .. بس هي كمر بينهن
– وانت مسويلهم جرد يولو
ضحك : دضب عينك لا اضبها وكمل حفر
ضحك احمد وهو يكله : اصلا جاي اتشاقى وياك ما شفت ولا وحدةً
– ادري
– دمشي لك كلاوجي
كاموا يضحكون وهم يحفرون .. دفنوهن
اجا مروان … كال : الليله تضلون عدنا
احمد : خير
– يكولون الحكومة طفرت والدبابات الامريكية انتشرت بس لا تسقط الدولة
خطاب : نضل نضل عدك شي ؟
تبسم احمد : لا يولو شعدنا .. بس زهبولنا عشا معدل ترانا طالعين على رعي بطونا ما متغدين
مروان : جنكم على عشا هسه البيت يجهزون كملوا وحياكم
مشى مروان .. حجه احمد : مستعد ؟
– عليش ؟
– نكتشف الجول بالليل
– شكلك راح تذبنا بمصيبة ما منها مخرج .. بس يلا ما طولنا لعبنا نكمل اللعب
كام يضحك احمد ويغني : خلو عليك يخافووون
كمل الاغنية خطاب وهو يكلو : حارس يحرسك مني واهلك ما يدرون حبك اللي مجنني
ضلوا يضحكون ويغنون وهم يخلصون الشغل
كملوا دخلوا غسلوا وارتاحو وصبولهم العشا .. احمد نام
وخطاب بحجة يورث جكارة برة كعد يراقب الوضع منهو النايم ومنهو الضال كاعد .. لحد ما البيت هدا ومل الاصوات خفتت ، نده احمد وكاله : يله
كعد احمد من النوم مسبل وصافن حجه خطاب : الجول اظلم شلون راح نفور بيه ؟
– لايت عدك بالسيارة
– اكو العدة مال خالي يمكن بيه لايت فضي
– نروح نجيبه ونطلع للجول
– يلا
مشوا خذو لايت .. ظلوا يفترون يفترون
احمد : ليش الهوى هنا يخنك
خطاب : دعوف الهوى شم الريحة خرب بهالجول تكول فطايس
احمد: معدتي لعبت من الريحة
بعدوا عن البيت وهم يطقسون هذا المكان لحد ما عثر خطاب … ضواله احمد
حسباله حجره .. دحك بيها هاي مو حجرة : يول هاي شنو ؟
خطاب : شو ضواك بالله
حركها خطاب وتطلع جف ايد طالعة من التراب فز احمد من مكانه وشمر اللايت من ايده ، جره خطاب وكام يحفر بيده .. طلعت ريحة جايفة حيل
احمد ابتعد يزوع من الريحة وخطاب لف شماغة على وجهه ويصيح : يول شجالك تعال ضوي
جر هدومه احمد وخلافها فوك خشمه وكضب اللايت وكام يساعد خطاب ويحفر بديه طلعة جثة زلمة ميت ، انصكعوا اثنينهم .. حجه احمد : شنو هاي يولو ؟
كام احمد يضوي علو وجه الميت مفتح عيونه حيل .. فزع منه : كوم يول نرجع
– ونهد الجثة معراة
– كوم خطاب
– المقبرة هذه سرية واعتقد انا وياك حطينا رجلنا بكاع وعرة يا احمد
صاحت وسام من وراهم بالظلام : وشجابكم لهالجول ؟ وشحطكم بيها
فزوا اثنينهم واندارولها …
- يتبع الفصل التالي اضغط على ( رواية اسرار قدس ) اسم الرواية