رواية سجينة مع وقف التنفيذ كاملة بقلم اميرة اسامة عبر مدونة دليل الروايات
رواية سجينة مع وقف التنفيذ الفصل الثالث 3
حس ناصر أنه بيتخنق ومش قادر يستحمل ويضغط علي نفسه و يكتم جواه الوجع أكتر من كده ركن عربيته في وسط الطريق الخالي تماماً و نزل ناصر مشى كام خطوه جوه الصحراء ووقف فجأه رمي العبايه والقفطان عالارض كان حاسس انهم بيخنقوه اكتر حني ضهره ومسك بأيده الاتنين ركبه وهو بيتنفس بسرعه ورا بعض ورا بعض وفجأه قام وفرد ضهره وهو بيقول ااااااااااه بكل صوته الااااه عملت صدي صوت وكأن الصدي خارج من قلبه وكل كيانه.
فاض بيه الكتمان صعب والوجع أللي جواه أصعب.
ناصر…..علييييييييييي فضل ينادي علي أخوه و يتألم ويبكي بصوت عالي عشان يخرج الشحنه اللي جواه كان محتاج يكون لوحده كان محتاج يوصل صوت الوجع البي جوه قلبه للعالم كله لكن كتم وتظاهر بالقوه اللي في لحظه تلاشت بمجرد ما فضل لوحده.
قعد ناصر علي ركبه بعد ما طلع كل اللي جواه وارتاح شويه.
ناصر…بدموع أتوحشتك يا أخوي أتوحشتك يا جلب أخوك لو أعرف اللي هيچرالك مكنتش هملتك لحالك ياعلي مكنتش جولت لسيف أرچع وهو ياچي بعدك مكنتش اعرف انك ما هتچيش يا علي كنت حاسس بأيه يا جلب أخوك وانت بينغدر بيك أتاخدت غدر ياعلي ياطيب يا زينه الشباب بس وغلاوتك في جلبي هچيبلك حجك وهتنام وترتاح في تربتك
خد ناصر نفس طويل وقام بهدوء نفض هدومه ومسح وشه وخد عبايته من الارض وراح علي العربيه من تاني دورها وطلع.
…………………
أما عند عاليا عدت عليها ساعات كتير وهي نايمه وحاضنه لبسهم تعبت من كتر العياط حاسه بوجع في أحبالها الصوتيه عندها صعوبه في البلع من كتر الصريخ رن المنبه جمبها قامت بتعب فتحت عينها كانت بتبص للأوضه بأستغراب و بتتمني اللي شافته ده كله يكون حلم لمحت اللبس بتاعهم في ايدها بسرعه أتجمعت الدموع في عينها ضمت اللبس لحضنها أكتر وبعد دقايق من دموعها اللي مش بتقف قامت بتعب وحزن كبير بخطوات بطيئه خرجت من أوضتها مرت علي أوضه ضحي وريم الاول فتحتها بهدوء علي أمل تلاقيهم الاوضه كانت فاضيه بصت علي سرايرهم وصورهم بألم وقفلت الباب تاني راحت علي اوضه خالتها دخلت وفضلت تلف فيها بتوهان وهي بتعيط.
عاليا….يااااارب الصبر من عندك يارب
خرجت بهدوء وراحت علي الحمام غسلت وشها و أتوضت وخرجت صلت وفضلت تعيط وتدعي كتير وبعد ما خلصت لبست ونزلت عشان تروح النيابه عشان معاد التحقيق.
وطبعاً مرعي كان وراها.
اتصل مرعي علي ناصر.
ناصر….أيوه يا مرعي أني في الطريج جربت اوصل.
مرعي…تاچي بالسلامه يا ناصر بيه البت نزلت الوجت من البيت ركبت عربيتها وماعرفش راحه فين عالصبح
ناصر…خليك وراها يا مرعي عينك ما تغيبش عنيها يمكن تكون راحه تجابل أختها.
مرعي…أطمن اني وراها من أول ما طلعت.
ناصر….اول ما اوصل هكلمك أشوفك فين.
مرعي….خد بالك من الطريچ.
ناصر….ربنا يستر .
قفل ناصر معاه وفضل مرعي مكمل ورا عاليا
وبعد وقت بسيط وصلت عاليا قدام النيابه عرف مرعي انها راحه عشان التحقيق وبسرعه بلغ ناصر.
طلع عاليا و فضلت مستنيه بره مكتب وكيل النيابه شويه وبعد وقت بسيط دخلها العسكري.
وكيل النيابه….أتفضلي يا آنسه عاليا
عاليا….بحزن شكراً قعدت عاليا عالكرسي .
وكيل النيابه تحبي تشربي ايه.
عاليا….شكرا ياريت لو نبدأ التحقيق من فضلك عشان لسه هروح المستشفي.
وكيل النيابه….تمام أولاً البقاء لله شدي حيلك.
عاليا….ونعم بالله.
وكيل النيابه….عايزك يا انسه عاليا تحكيلي اللي حصل من اول اليوم واخر مره شوفتي ضحي المجني عليها وريم أختك كانت امته وكان باين عليهم اي حاجه او لأ وأثناء اليوم لو كلمتيهم صوتهم كان متغير يعني كان في حاجه غريبه.
عاليا….بوجع وعيون بتلمع.
أخر مره شوفتهم كان أول أمبارح الساعه 8 الصبح تقريباً كنا في البيت بنفطر زي اي يوم مع بعض اتكلمنا وضحكنا كل حاجه كانت طبيعيه وطبعاً هما كان عندهم مشوار سفر تبع الشغل بتاعهم في اسماعيليه وزي كل يوم نزلنا و وصلتهم بعربيتي لحد مكان الشركه بتاعت أستاذ علي اللي هما بيشتغلوا فيها و سبتهم ومشيت كلمتهم مرتين مره ضحي اللي كلمتني وهما عالطريق ومره انا اللي كلمتهم لما وصلوا.
كانوا طبيعين جدا ضحكنا واتكلمنا شويه وقفلت معاهم صوتهم كان عادي زي اي مره بكلمهم فيها. بس ده كل اللي اعرفه عنهم واخر مره سمعت فيها صوتهم
وكيل النيابه…. طيب قوليلي تعرفي ايه عن استاذ علي أيه أنطباعك عنه ؟
عاليا….فالحقيقه انا مشوفتهوش قبل كده ولا عمري اتكلمت معاه عشان اكون اي انطباع عنه بس ريم وضحي طول الوقت بيشكروا فيه في اخلاقه واحترامه وازاي بيتعامل معاهم علي انه اخوهم ديما لما كان يبقي في سفر او ميتنج ويتأخروا كان يوصلهم وميسبهمش يروحوا لوحدهم
وكيل النيابه…..أزاي بتوصليهم لحد الشركه وهو اوقات يوصلهم للبيت وعمرك ما شوفتيه مش غريبه شويه؟
عاليا….لا خالص الغريب هو اني اطلع معاهم الشغل بتاعهم انا كان بيبقي عندي شغلي وطبعا احنا مش معانا غير عربيه واحده فا كان لازم اوصلهم في طريقي ولما كنت بوصلهم الطريق كان بيبدأ يتزحم يادوب كانوا بينزلوا واجري علي شغلي وهو المرات اللي وصلهم فيها تتعد لانه في العادي بيحاول ميأخرهمش ابدا وكل مره كان بيوصلهم كنت ببقي في الشقه جوه واوقات كنت بقفلهم في البلكونه بس هو مش بينزل من عربيته انا شوفت صورته وعارفه شكله من صوره علي موبايل ريم وضحي كانوا كلهم متصورين في الشركه تقرييا بعد انتهاء مشروع كانوا بيحتفلوا لكن انا معرفهوش ولا احتكيت بيه عالحقيقه.
وكيل النيابه….طيب معندكيش شك ان ممكن يكون هو اللي عمل كده في ضحي؟
عاليا بأستغراب…. ازاي حضرتك وهو كمان أتقتل ؟
وكيل النيابه….يعني ممكن يكون الشيطان لعب بيه وقف عربيته في وسط الطريق واعتدي علي ضحي وبعدين قتلها ريم شافت كل ده قتلته ؟
عاليا…بسخريه حضرتك عايز تفهمني ان ريم فضلت واقفه تتفرج عليه وهو بيغتصب ضحي و بيقتلها وبعدين قررت هي تقتله بتسع طعنات طيب لو ده اللي حصل فين ريم مظهرتش ليه
وكيل النيابه….يمكن خايفه هربانه مثلا؟
عاليا…اللي حضرتك بتقوله ده مستحيل لو استاذ علي زي ما بتقول كده هو اللي ورا ده كله فا لازم تعرف ان ريم اختي هي جرالها حاجه عشان بأختصار ريم متعرفش تعمل كده ولو هقول انها تعرف وممكن تعمل كده هتعمل كده مع واحد عادي مش في جسم وطول استاذ علي لو هنتكلم بالمنطق لا ريم اختي ولا ضحي يقدروا عليه وبعدين ريم هتجيب منين المطوه اللي اتضرب بيها وهو ازاي هيسيبها لحد ما تضربه تسع طعنات اكيد في حاجه غلط.
انا بثق في كلام أخواتي هما قالوا انه شخص محترم يبقي اكيد محترم.
وكيل النيابه….وايه اللي مخليكي واثقه كده؟
عاليا…بوجع عشان سبنا كذا شغلانه قبل كده أصحابها مكانوش محترمين ايه اللي يخليهم يكملوا معاه وهما شايفين انه وحش.
وكيل النيابه…..طيب قوليلي يا انسه عاليا ليكم أعداء في حد ضايقكم او هددكم بأي حاجه.
عاليا….لا خالص احنا ناس بسيطه و عاديه جدا حضرتك كل الناس في المنطقه بتاعتنا بتحبنا جدا و بيحترمونا و بيخافوا علينا
وكيل النيابه….طيب قوليلي انتوا ليه عايشين مع خالتكم وعايشين من امته.
عاليا….ماما اتوفت من حوالي تسع سنين وقبل ما تتوفي اصلا كنا ساكنين في بيت جمب بيت خالتوا يعني اصلا كنا مع بعض ديماً وعمرنا ما أفترقنا يا هي عندنا يا احنا عندها مكانش بيعدي اي يوم غير لما نشوف بعض ولما اتوفت مكناش صغيرين اوي يعني كنا فاهمين انا اكبر من ريم بأربع سنين ماما الله يرحمها أنفصلت عن بابا واحنا صغيرين ط وكل اللي عرفناه وقتها انه سافر بس لما كبرنا عرفنا ان كان ديما في مشاكل بينهم بسبب ان بابا بيعرف عليها ستات تانيه وطلبت الطلاق وبعدها هو سافر و سابنا خالص و اتجوز وفضل بعيد الاول كان بيسأل علينا كل فين وفين بعد كده قطع خالص ماما كانت مريضه سكر ورغم انفصالها من بابا وان هي اللي طلبت الطلاق بس هي كانت بتحبه اكتئبت وسابت نفسها خالص واهملت في نفسها وشكلها وبقت تطلع غلبها في الاكل لحد ما وزنها كبر شويه وطبعا قلت تنظيمها للاكل كانت ديماً رافعه عليها السكر لحد ما في يوم أتعورت في رجلها وطبعا كالعاده أهملت في العلاج لحد ما حصلها غرغرينا في رجلها واضطرت تعمل عمليه و عملت بتر للكاحل كله طبعا هي اكتئبت جدا لما شافت شكل رجلها وفضلت حالتها يوم عن يوم تسوء أكتر لحد ما أتوفت وبعدها عشنا مع خالتوا.
وكيل النيابه…تمام يا انسه عاليا أحنا كده خلصنا تحقيق عندك أي حاجه تاني تحبي تضيفيها
عاليا….بحزن لا بس أرجوك انا مبقاش ليا غير ريم أختي رجعوهالي أرجوك رجعوهالي حتي لو هي كمان اتقتلت بس عالاقل اطمن عليها واعرف طريقها
وكيل النيابه….اطمني يا انسه عاليا ان شاء الله هنلاقيها وياريت لو في اي حاجه حصلت او عرفتي حاجه حد كلمك بلغينا.
عاليا….حاضر
وكيل النيابه تقدري تتفضلي.
قامت عاليا وقفت وخرجت من المكتب عدت من قدام عز ومشيت.
دخل العسكري بلغ وكيل النيابه.
استاذ عز بره يا افندم
وكيل النيابه….خليه يدخل.
…………..
دخل عز وبدأ وكيل النيابه التحقيق معاه عرفه اللي حصل من اول الصبح والمشوار اللي كان رايحه ويخص مين وطبعاً طلع قرار أستدعاء لعزام عشان يعرفوا
اللي حصل منه طول اليوم واخر مره شاف علي والبنات كانت امته.
………..
وصلت عاليا المستشفي اللي فيها ضحي وطبعاً مرعي وراها
………..
قابلت عاليا الدكتور
الدكتور….البقاء لله يا انسه عاليا شدي حيلك.
عاليا…بحزن شكرا ونعم بالله.
الدكتور….انتي احسن؟
عاليا….الحمد لله دكتور انا كان لبا عند حضرتك طلب.
الدكتور…اكيد اتفضلي.
عاليا….انا عرفت ان اهل استاذ علي خدوه و دفنوه انا عايزه اخد ضحي من هنا اظن كفايه اوي اللي حصل فيها هي محتاجه ترتاح
استغرب الدكتور انها عرفت…مين اللي قالك ؟
عاليا…..حضرتك ناسي ان ضحي كانت بتشتغل مع استاذ علي واتبعتت منشورات كتير عالفيس من صفحه الشركه بتنعي ضحي واستاذ علي انا شوفتها صدفه وانا بحاول اكلم اختي وبحاول ادور علي اي حاجه توصلني ليها.
الدكتور…انسه عاليا انا عارف انك عايزه تستلمي ضحي امبارح قبل انهارده بس انتي عارفه ان لسه تقرير البحث الجنائي مطلعش
عاليا….مش هتفرق كتير هي وجودها هنا مش هيفيد كل اللي احنا مستنينه التقرير من فضلك انا عايزه استلم اختي زي ما اهل استاذ علي استلموه اظن ده حقي وحقها هي ملهاش غيري سيبوها ترتاح مع امها امها ماتت من وجعها وفراقها ياريت نريحهم بقي كفايه اللي شافوه.
الدكتور….بحزن علي حالتها طيب اهدي من فضلك انا هشوف موضوع التقرير الوقت وهبلغ الظابط بطلبك في أستلام ضحي و هرد عليكي.
عاليا….امته؟ انا عايزه انهارده أستلمها أرجوك هي معاكم من اول امبارح بليل واللي عرفته ان الكشف الجنائي خلص شغله خلاص انا محتاجه ارتاح عشان أفضي ادور علي اختي اللي مختفيه ومش عارفه طريقها خليني اطمن علي ضحي و اوصلها بأيدي لقبرها عشان اعرف اركز
الدكتور….صدقيني ده مش قراري لوحدي ومع ذلك اديني شويه وقت يا انسه عاليا تقدري تستنيني بره وانا هعمل اتصالتي كلها وابلغك.
عاليا….شكرا لحضرتك.
الدكتور…العفو.
استأذنت منه عاليا وخرجت وفضلت قاعده بره دموعها نازله مستنيه الدكتور يبلغها.
………………..
وصل ناصر للنيابه بعد ما بلغ مرعي وعرف منه ان عاليا في المستشفي.
………………..
دخل ناصر وبدأ التحقيق.
وكيل النيابه…قولتلي يا استاذ ناصر ان انتوا ملكوش أعداء.
ناصر….عمرنا ما كان لينا أعداء واصل ولا حتي كان لينا تار مع حد.
وكيل النيابه…..امال مين اللي ليه مصلحه يعمل كده في اخوك يا استاذ ناصر اخوك مطعون تسع طعنات.
ناصر…..وليه ما يكونش طلع عليهم جطاع طرج ولا شباب شاربين اللي اعرفه ان في بنت معاه انجتلت و كمان مغتصبه الصعايده يا باشا يجتلوا ياخدوا تارهم لاكن يلا يعتدوا علي حرمه ولا تارهم يصيبها.
وكيل النيابه….جميل كلام منطقي بس اتمني ان كلامك ده ما يكونش عشان القضيه تتقفل وخلاص وتاخد تار اخوك بأيدك.
ناصر…اسمع يا حضره الظابط اني جولتها جبل سابج و هجولها تاني لو اخوي حجه مچاش بالجانون هچيبه بيدي و وجتها هاخد بالتار لأول مره في حياتي ولازم تعرف اني مجولتش ولا هجول ان الجضيه تنجفل لان اني عايز حج اخوي امبارح جبل انهارده ولو اني عارف مين اللي عملها مكانش زماني جدام سعادتك الوجت و كان زمان سعادتك عندك خبر اني جبضت روح اللي عملها.
وكيل النيابه….تمام يا استاذ قولي اخوك اخر مره كلمته امته.
ناصر….يوم الحادثه الساعه 8 الصبح جبل ما يسافر لشغله
وكيل النيابه…..وايه سبب المكالمه؟
ناصر….هو متعود يحدتني كل يوم ولو انشغل اني بتصل عليه يعني كان اتصال عادي واليوم ده بالاخص المفروض ان علي بعد ما كان ها يرچع من سفريته كان هيعاود عالصعيد عشان يجضي معانا أسبوع ويحضر اول يومين في رمضان و جال انه هياچي عالفچر
وكيل النيابه….كلمته في وسط اليوم؟
ناصر…إيوه كان زين.
وكيل النيابه….استاذ ناصر عندك اي حاجه حابب تقولها انا كده خلصت كل الاسئله.
ناصر…لاه كل اللي اعرفه جولته.
وكيل النيابه…..تمام انا عارف انك اكيد هترجع تاني عالصعيد ده الكارت بتاعي لو عندك اي معلومه او لو وصلت لأي حاجه
ناصر….وده الكارت بتاعي لو احتچتلي هكون عنديك عموما اني جاعد لحد بكره عشان أشوف شغله هنمشيه كيف لو احتچتني اني حدتني.
وكيل النيابه….تمام يا استاذ يا ناصر تقدر تتفضل.
ناصر….بعد أذنك.
……..
فضلت عاليا قاعده مستنيه الدكتور يبلغها بأستلام ضحي لكن خاب أملها لما الدكتور قالها انهم محتاجينها انهارده كمان وتقدر تستلمها بكره وافقت عاليا بقله حيله وخرجت رجعت علي البيت
في الوقت ده كان ناصر راح علي عنوان بيت عاليا لما عرف من مرعي انه راجع وهي وراه
لمحها ناصر من الجنب وهي نازله من عربيتها كذا حد من الجيران وقفوا معاها واصحاب المحلات جمبها واضح انهم بيعزوها وبيواسوها بالكلام.
بلغتهم عاليا انها هتستلم ضحي بكره عشان يكونوا معاها
مكانش ناصر سامع اي حاجه لكن كان شايف حركات ايدها وهي واقفه بضهرها وكل شويه تقرب ايدها من وشها باين انها بتمسح دموعها و طبطبه الجيران عليها
بعد وقت بسيط طلعت عاليا علي شقتها.
مرعي….ها يا ابني هنفضلوا إهنه ولا هنروحوا فين.
ناصر….لاه هنطلعوا علي شجت علي نريحوا فيها كام ساعه ونرچع إهنه تاني الساعه الوجت تسعه هنعاود علي سبعه الصبح ونشوف هتعمل ايه
مرعي…انت ناوي علي ايه يا أبني.
ناصر….خليها في وجتها يا مرعي اخرها معايا بكره لو اختها ما ظهرتش اني هتصرف يلا روح أركب العربيه واطلع ورايا نروح نسلمها لعز اللول وبعدين نطلع علي شجه علي وسيف
مرعي….يلا بينا.
…………….
بعد مده بسيطه وصل ناصر عند عز.
ناصر…مش عارف أشكرك كيف يا استاذ عز .
عز…علي ايه بس يا أستاذ ناصر انا معملتش اي حاجه علي الله يرحمه كان اكتر من اخ هو سيف انا تحت امرك في اي وقت وبخصوص شغل علي شوف حابب تقعد معايا امته لو عايز تعرف اي حاجه
ناصر….علي الله يرحمه كان بيآمنك بروحه سيب كل حاچه كيف ما كانت وأي حاچه تحتاچها كلمني ومش هوصيك أي حاچه تجد توصلها تخص جضيه علي بلغني.
عز….من غير ما توصيني انا مش هرتاح غير لما اعرف اللي عملها أطمن.
ناصر…تسلم يا ابن الاصول يلا هستأذنك اني يادوب اروح اريح شويه اني ومرعي عشان بكره ورانا كام مشوار وبعدين هعاود البلد.
عز…توصل بالسلامه لو احتجت اي حاجه قبل ما تسافر كلمني هجيلك فوراً
ناصر….ده العشم بردك يلا تصبح علي خير.
عز….وانت من اهل الخير.
………….
وصل ناصر شقه علي وسيف
واول ما دخل قعد علي كرسي قريب من الباب وهو ماسك العصايه بتاعته في ايده عينه علي كل مكان بحزن ريحه علي ماليه المكان
وقف مرعي عالباب من غير ولا كلمه.
ناصر….واجف ليه يا مرعي أدخل وإجفل الباب تعالي أرتاح انت من امبارح مجعدتش.
دخل مرعي وقفل وراه وراح قعد علي كنبه وفجأه نزلت دموعه بقهر.
ناصر….و بعدهالك يا مرعي هنفضلوا حاطين يدنا علي خدنا ونبكي
مرعي….مش مصدج يا ناصر بيه مش مصدج جلبي واچعني علي سي علي حاسس كن روحه في الشجه.
ناصر….الله يرحمه يا مرعي.
مرعي….اني الوحيد اللي عارف اللي چواك متكتمش في روحك يا ابني سي علي كان غالي عنديك
ناصر….ما هرتاحش غير لما أچيب حجه يامرعي اللي چوايا مش هيخرچ غير لما اريحه في نومته و اطفي نار جلبي الجايده.
مرعي…بحزن طيب يلا جوم نام وريح چتتك شويه
مسك ناصر التليفون كلم فكريه
ناصر…حجك عليا ياستي صحيتك من النوم.
فكريه…بدموع لاه يا وادي اني لسه مخلصه صلاه وكنت جاعده.
ناصر….كفايه بكي يا ستي الله يرضي عنيكي معايزكيش تتعبي
فكريه…بدموع علي وحشني يا ناصر وحش جلبي
ناصر….بحزن وحدي الله يا ستي ادعيله واني هريح جلبك جريب أن شاء الله المهم طمنيني علي سيف.
فكريه….سيف تعبان جوي يا ناصر
ناصر…بلهفه ماله في ايه.
فكريه….من بعد ما رچعنا من الدفن امبارح وهو في اوضته بكلمه ما هيردش عليا ولا بيتحدت مع اي حد واصل ساكت لا راضي ياكل ولا يشرب دموعه ما هتنشفش و ما هيخرجش من اوضه علي.
ناصر…بحزن خليكي چنبه يا ستي لحد ما أرچعله اني بكره ورايا مشاوير كتير هخلصها وامشي عالڤچر وعلي ما الصبح يطلع هتلاجوني عنديكم.
فكريه….خد بالك من روحك يا ناصر احنا ملناش غيرك يا ولدي.
ناصر…حاضر يا ستي خدي بالك انتي من روحك ومن سيف يلا في حفظ الله.
فكريه…سلام يا ولدي
ناصر بتنهيده ااااااااااه يارب
بص علي مرعي لقاه نايم في مكانه.
ناصر…مرعي مرعي
مرعي…ايوه ايوه صاحي
ناصر…جوم نام چوه يا مرعي يلا جدامنا كام ساعه نرتاح شويه عشان ننزل نروح للبت.
مرعي…حاضر يلا يا ولدي.
………….
فضل ناصر في اوضه علي قاعد علي مكتبه ماسك تيشرت من هدوم علي بحزن مكانش عارف ينام وكأن الراحه مبقتش ليه من بعد فراق علي فضل يفكر طول الليل لحد الصبح ما طلع قام غسل وشه عشان يفوق وأتوضي وصلي وبعدين راح صحي مرعي.
ناصر…مرعي مرعي يلا جوم.
مرعي…إصباح الخير.
ناصر…يلا يا مرعي الساعه سبعه عايزين نروح للبت لسه الدنيا هاديه.
مرعي…ماشي يلا بينا.
قام مرعي غسل وشه وبعدين نزل هو وناصر ركبوا العربيه وراحوا عند بيتها كانت الساعه بقت 8
لكن وقف ناصر بعيد أتفاجئ بيها وهو بيركن نزلت ركبت عربيتها وركب معاها اتنين ستات من جيرانها واتنين رجاله وطلع وراها بعربيات ناس تانيه.
ناصر…هو في ايه مين دول ورايحين فين.
مرعي….ماعارفش يمكن جرايبها ولا حاچه.
ناصر…رايحين فين عالصبح إكده.
مرعي…خلينا وراهم يمكن عرفوا مكان البت التانيه ولا حاچه.
بصله ناصر بتفكير ورجع دور العربيه وطلع وراها.
بعد مده طويله وصلت عاليا المستشفي وطبعا أستشف ناصر انها راحه المستشفي من الطريق.
مرعي…تفتكر چايين ليه؟
ناصر…هو ايه اللي چايين ليه انت ناسي ان بنت خالتها لسه مندفنتش وموچوده في المستشفي چوه عموماً ياخبر بفلوس
مرعي…طيب بجولك ايه اني مش هعرف أفضل جاعد اني وانت علي نار إكده اني هروح بشويش أعس و إطجس من بعيد واعرف في ايه.
ناصر….صح صح يا مرعي انزل وخليك معايا عالتلافون المهم محدش يشوفك.
مرعي…سيبها عليا فتح مرعي الباب ونزل بهدوء وراح وراهم
لمح ناصر واحد من الامن بيوقف مرعي.
ناصر…ااااااه ما هيطلعوكش يا مرعي .
لمحه بيوطي علي ودن الامن وبيديله حاجه في ايده وطلع.
ناصر….عفارم عليك يا مرعي.
غاب فوق حوالي 25 دقيقه من غير اتصال.
ناصر…في ايه كل ده سمع اتصال علي تليفونه من مرعي رد بسرعه
ايوه يا مرعي فينك كل ده.
مرعي….ناصر بيه البت چايه تستلم چثه بت خالتها واللي معاها دول چيرانها چايين معاها عشان هتندفن.
ناصر…. هتندفن إكده مش هنعرفوا نتحدتوا مت البت
مرعي…شكلها إكده اني من رأيي نستنوا لما تخلص كل حاچه والدنيا تهدي من حواليها.
ناصر….طيب تمام خليك عنديك يمكن تعرف او تسمع اي حاچه بخصوص اختها ولو حسيت بجلج انزل طوالي
مرعي….ماشي يلا بالسلامه.
…….
مر حوالي ساعتين ونص كانت جهزت ضحي وكل الاجراءات خلصت اخيراً دخلت عاليا عشان تودعها الوداع الاخير.
عاليا….هتوحشيني يا ضحي هتوحشيني يا حبيبتي مش هسيب حقك وحق خالتوا مش هسيب حق ريم هعمل اي حاجه عشان ارجعه بس انا خايفه اوي يا ضحي الوحده وحشه ومرعبه بجد اول مره احس انكم كنتوا فارقين معايا اوي كده عشان عمري ما فكرت في يوم انكم متكونوش موجودين في حياتي سبتوني ليه يا ضحي لوحدي ليه مفضلش حد فيكم معايا ده انا محتجاكم اوي والله العظيم محتجاكم البيت وحش من غيركم اوي اكتر وقت أتمنيت فيها الموت هو الوقت ده هتوحشيني يا حبيبتي يا صاحبتي هتوحشيني يا احلي بنت في الدنيا
قامت عاليا باستها من راسها وخرجت تستناها بره وبمجرد ما خرجت انهارت وفضلوا جيرانها واخدينها في حضنهم ويعيطوا معاها.
اما عند ناصر تحت كان قاعد عينه علي بوابه المستشفي لمح مرعي خارج وبيمد بسرعه فتح الباب ودخل.
ناصر…حوصل ايه.
مرعي….نازلين بالبت خلاص جولت انزل بسرعه.
بص ناصر عالبوابه لمحهم شايلين تابوت في ضحى و عاليا منهاره.
ناصر…بحزن الله يرحمها .
فضل ناصر وراهم بالعربيه صلوا عليها وبعدين طلعوا عالمدافن كان في ناس كتير جدا من اهل حتتها وزمايل عاليا في الشغل وزمايل ضحي وريم في الشركه
الكل بيعزي ضحي وهي منهاره شكلها يقطع القلب
رغم ان ناصر مش شايف شكلها كويس من الزحمه لكن صوتها كان واصله من بعيد عياطها و انهيارها
حتي وقوعها علي التابوت اللي فيه ضحي و تمسكها بيه وسط صراخها حالتها كانت تصعب علي اي حد
الساعه بقت خمسه بعد العصر.
مشيوا الكل من المدافن وراحت عاليا مع جيرانها علي بيتها
لمح ناصر الصوان بيتنصب
مرعي….شكلهم هيعملوا عزاء تاني
ناصر….مش مهم مچاتش علي الحبه دول كمان خلينا.
بدأ العزاء بعد صلاه العشاء وفضل الناس تيجي وتمشي عاليا واقفه مش مبطله عياط واقفه بطولها تاخد العزاء محدش مصدق المل في حاله ذهول في يومين الدنيا تتقلب ويتحول البيت الهادي لحاليتن وفاه و أختفاء واحده منهم علي قد ما الكل كان حزين لكن عاليا كانت صعبانه عليهم اكتر اللي حصل كتير عليها وفوق أحتمال اي حد.
خلص العزاء علي الساعه 11 فضلت عاليا واقفه مع الناس اللي بيواسوها من جيرانها الصوان كان بيتشال في نفس الوقت علي الساعه 12 طلعت عاليا بيتها مع جيرانها وبناتهم اللي مسندين عاليا.
مرعي….هنطلعوا ميته؟
ناصر….بتفكير فضل ساكت شويه لسه يا مرعي مش الوجت الدنيا تهدأ خالص والمحلات دي تجفل والرچل تخف وبعدين نطلعوا.
مرعي…تفتكر ممكن يكون معاها حد بايت في شجتها من چيرانها ولا جرايبها.
ناصر….ماعرفش يا مرعي عشان إكده بجولك نستنوا شويه..
………
في شقه عاليا دخلوا معاها جيرانها شويه ولما اطمنوا عليها وبعد تصميم عاليا انها تفضل لوحدها سابوها تنام وترتاح.
دخلت عاليا خدت دش بارد يمكن تطفي النار اللي هي حاسه بيها
وقفت تحت المايه وقت طويل متعرفش قد ايه لكن كانت محتاجه تفوق أختلطت المايه البارده بدموعها حاسه بضياع و توهان أتمنت كتير تصحي من الكابوس لكن مبتصحاش.
خرجت بعد وقت طويل كانت لابسه بنطلون أسود قطن وعليه تيشرت أسود بنص كم اول حاجه عملتها راحت تصلي فضلت تعيط و تدعيلهم وتدعي ربنا يطمن قلبها علي ريم و مايكونش جرالها أي حاجه.
قامت عاليا بعد ما سلمت كانت حاسه انها مخنوقه رغم تعبها واليوم الطويل إلا انها مش عارفه تنام فتحت البلكونه ولمحت تيشرت بتاع ريم علي المنشر موجود عالاحبال بقاله كذا يوم ماتشالش من وقت اللي حصل
شالته وضمته لحضنها وهي بتشم ريحتها وفضلت تعيط كتير فضلت سانده عالسور وقت طويل.
مرعي….شكلها إكده لحالها .
ناصر…يبجي من حظنا يا مرعي
قامت عاليا قدامهم دخلت وقفلت وراها الشباك.
مرعي بص لناصر ايه يلا.
بص ناصر علي المحل اللي تحت البيت.
لسه استني صاحب الدكان خلاص بيجفل
…….
دخلت عاليا علي اوضتها طلعت من دولابها العروسه والفانوس اللي جابتهم لريم وضحي
بصت للفانوس بدموع وأفتكرت كلام ضحي.
ضحي….وانتي بتجيبي الزينه لخالتك هاتيلي فانوس
ريم…وانا هاتيلي عروسه بتقول وحوي يا وحوي.
عاليا…بدموع جبتلك الفانوس يا ضحي و جبتلك عروستك يا ريم
بس انتوا فين سبتوني ليه
نامت عاليا علي سريرها وهي حاضنه الفانوس والعروسه
……..
تصبح علي خير يا سمير
سمير….وانت من اهل الخير يا منعم مش هتصلي الفجر.
منعم…هصلي ان شاء الله ابقي نادي عليا وانت رايح.
سمير….ماشي يلا سلام.
مشي سمير ومنعم اصحاب المحلات و لفوا من شارع تاني
عرف ناصر انهم مش ساكنين في نفس البيت بص حواليه كويس لقي الدنيا هاديه خالص المحلات كلها قفلت والرجل هديت خالص.
ناصر….يلا يا مرعي.
مرعي….متوكد من اللي هتعمله ده يا ابني.
ناصر….معنديش حل تاني يا مرعي أختها هي اللي شاهده علي كل حاچه او هي الجاتله يعني في كل الحالات هي الوحيده اللي تعرف الحجيجه انزل يا مرعي مفيش وجت .
هز مرعي راسه ونزل مع ناصر بصوا حواليهم كويس وفي لحظه كانوا جوه مدخل البيت طالعين عالسلم.
طلعوا وقفوا قدام الباب.
ناصر….معايزش صوت يا مرعي البيت كله ساكن.
مرعي….الله كريم.
قرب ناصر ايده من الباب و خبط خبطات متفرقه .
سمعت عاليا صوت خبط عالباب
قامت بسرعه وهي في ايدها العروسه..كانت فكراها ريم.
عاليا…رييييم
جريت ريم عالباب بسرعه ومن غير ما تسأل فتحت وهي بتقول أسم اختها
وقفت ساكته و مصدومه متعرفش مين دول.
وهو وقف يبصلها و يبص علي هيئتها ماسكه عروسه ودموعها علي خدها.
ناصر…احمممم انسه عاليا.
عاليا…بتوتر مسحت دموعها مين حضرتك.
ناصر…اولاً اني اسف علي الوجت المتأخر ده ظروف اعرفك علي نفسي اللول اني ناصر المنشاوي اخو علي المنشاوي.
بصتله عاليا بحزن…اهلا بحضرتك.
ناصر…البجيه في حياتك شدي حيلك.
عاليا…ونعم بالله البقاء لله في استاذ علي.
ناصر…كلنا لها
عاليا…هو حضرتك جاي ليه اقصد يعني تعرف حاجه بخصوص القضيه.
ناصر….الحجيجه اني چايلك عشان إكده اني اللي كنت رايد أسألك كام سؤال لو ماهضايجكيش .
عاليا….لا خالص انا بس لوحدي واااا..
قاطعها ناصر…متجلجيش يا انسه عاليا مرعي معايا والباب هيفضل مفتوح اني هسألك كام سؤال وهمشي.
عاليا…بإحراج لا ابدا اتفضل
دخل ناصر وقعد علي اول كرسي قابله.
عاليا…اتفضل حضرتك.
مرعي….لا يابتي اني إكده زين.
عاليا…ميصحش اتفضل حضرتك اقعد هنا طيب.
دخل مرعي وقعد جمب ناصر وفضل الباب مفتوح.
قعدت عاليا قدامهم وهي بصالهم بترقب وتوتر.
ناصر كان ساند بايده الاتنين علي عصايته و باصص للارض وهو بيتكلم.
ناصر….أخوي الله يرحمه أنجتل بتسع طعنات بنت خالتك واخده طعنتين غير التعدي عليها
أختك كانت معاهم لكن ملهاش أي آثر الشرطه جلبت الدنيا ومحدش عرف يوصلها أختك فين؟
نزلت دموع عاليا وهي بتفتكر اللي حصل لكن أتفاجئت من باقي كلامه وبصتله.
عاليا….وانا هعرف هي فين منين إذا كانت الشرطه معرفتش توصلها انا هوصلها.
ناصر….اللي عمل إكده مكانش لحاله يا انسه عاليا اخوي الله يرحمه كان چامد وتد جوي ما يهابش حد لكن كيف ما بيجولوا الكتره تغلب الشچاعه واللي يجدر يعمل إكده لازماً يكونوا كتير لو اختك كانت معاهم كان زمانها ميته كيف علي وبت خالتك لكن الحكومه ملاجيتش جتتها ده معناه إنها عايشه ومش بعيد تكون متفجه مع اللي عملها.
وقف عاليا بفزع و صدمه…انت بتقول ايه ياراجل انت اختي ايه اللي متفقه مع عصابه اختي هتبقي عارفه ان بنت خالتها واختها هتتقتل وهيغتصبوها وتوافق انت اكيد اتجننت.
وقف ناصر بغضب قدامها ومسك ايدها بقسوه وهو خلاص الدنيا بتسود في وشه وكل اللي في عينه شر وبس في اللحظه دي قام مرعي بسرعه قفل الباب.
عاليا…انت بتعمل أيه الحقو….
وقبل ما عاليا تصرخ حط ناصر ايده علي بوئها
ناصر….قرب ناصر من ودنها وبيتك علي كل كلمه بغضب حسك لو طلع والله خلج الخلج لا هجبض روحك الوجت بيدي
اني مش چاي عشان أذيكي يا بت الناس فا لو حسك طلع هخلص عليكي مفهوم
هزت عاليا راسها وهي دموعها نازله.
ناصر…هشيل يدي ولو صرختي ما تلوميش غير حالك.
فضلت عاليا تتنفس بسرعه و بخوف شال ناصر ايده براحه وبصلها.
عاليا…بخوف و رعشه انت عايز مني ايه انا معرفش حاجه ومعرفش انت عايز ايه اصلا جاي لحد هنا تتهم اختي بأتهام هي بريئه منه والله اعلم هي لو عايشه بيحصل فيها ايه يا اخي ده انا أتمنيت اني كنت الاقيها ميته بعد اللي حصل لضحي ولا اني مبقاش عارفه عنها اي حاجه ومعرفش فيها ايه
مشيت كام خطوه جابت برواز فوق التلفزيون وقربت منه بكل غضب.
عاليا…دي ضحي الله يرحمها اللي اتقتلت و اغتصبت ودي ريم اختي اظن انك شايف شكلها دي لا تعرف تقتل ولا تخطط ولا تعرف تعمل اي حاجه .
ناصر…بوجع بس تعرف اللي عملها تعرف مين اللي جتل اخوي تعرف و شافت وهي الشاهد الوحيد محدش لجي جتتها تبجي عايشه وادام مختفيه تبجي هربانه وخايفه من حاچه.
عاليا…بوجع وغضب وليه متبقاش مخطوفه يا بني ادم
ليه متبقاش اتخطفت واتقتلت و رموها في مكان بعيد أرحمني بقي حرام عليك لو انت محروق اوي علي أخوك فا انا زيك واكتر
لو انت راح منك واحد انا راح مني تلاته
ناصر بنفس الغضب رغم انه حس بوجعها
ناصر…علي مكانش ينفع يموت من الاساس علي وجع بلد بحالها علي فراجه
وكمل بجمود أختك هي الوحيده اللي لها يد في اللي حوصل
عاليا….تعرف ايه ايه انت علي اختي عشان تقول كده ريم لا تعرف تتصرف ولا تفكر ريم دي طفله في نفسها لما وكيل النيابه حقق معايا ومن ضمن أسئلته قاللي ان ممكن مثلا علي يكون هو اللي عمل كده قولتله لأ مع اني معرفش اخوك بس ضحي وريم طول الوقت كانوا بيتملموا عن اخلاقه واحترامه صدقتهم عشان هما بيعرفوا في معدن الناس كويس ونفيت تهمه زي دي عن اخوك مش عشان بس مات زي ضحي عشان كان لازم اقول اللي يريح ضميري انت بقي بأي حق تتهم اختي اللي الله اعلم هي فيها ايه وادام انت تفكيرك بالشكل ده يبقي شكلي كنت غلطانه لما دافعت عن اخوك واخواتي كانوا غلطانين لما شافوا اخوك ملاك
واخوك هو اللي عملها قتل ضحي بعد ما اغتصبها
ناصر…بغضي اخررررسي علي لايمكن يعمل إكده
زقته عاليا بغضب في صدره وريم مستحيل تعمل كده
خد ناصر نفس طويل وفضل يلف حوالين نفسه وعاليا منهاره من العياط وفجأه بصلها ناصر بغضب
ناصر….انتي هتيچي معايا
عاليا…اجي معاك فين يا جدع انت هو انت مجنون ولا بتخرف
ناصر…اني هبجي مجنون صوح لو هملتك من غير ما اخدك معايا
انتي هاتفضلي تحت عيني لحد ما اختك تظهر
عاليا….افضل معاك فين واروح فين انت واعي للي بتقوله ده يا بني ادم انا اختي في خطر
ناصر….واني جولت اللي عندي لو خايفه علي اختك صوح تيچي معايا من سكات ولو ظهرت و كلمتك تعرفيها انك معايا ولو هي خايفه عليكي صوح كيف ما انتي خايفه عليها تيچي وترحمك من يدي.
عاليا….انا مش هاجي معاك واعلي ما في خيلك اركبه اختي محدش يعرف عنها اي حاجه ومش بعيد تكون في خطر تهمتك ليها تبلها وتشرب ميتها ولو فكرت تتعرضلي هقدم فيك بلاغ انت فاهم.
مسكها ناصر من ايدها بغضب ناصر المنشاوي ما يتهددش ولو علي اختك يا شاطره هي فعلا موضع اتهام الشرطه نسفت المكان كله ملاجولهاش اثر محمولها إنجفل و محمول علي وبت خالتك اختفوا كمان محدش ليه مصلحه غيرها لو مچتيش معايا بالزوج واللي خلج الخلج اني هجلب عليها البلد كلاتها من شرجها لغربها واني ورچالتي هنچيبها بس هرچعهالك چثه.
عاليا…بدموع طيب براحه بس خلينا نتكلم بالعقل انا وجودي معاك هيفيدك بأيه انا اوعدك اني مش هتنقل من هنا انا مينفعش اصلا اروح اي مكان عشان لو ريم جات او لو حد من الشرطه احتاجني يمكن يلاقوها فا متقلقش مش همشي من هنا لكن لو جيت معاك لا هعرف ادور علي اختي ولا هعرف اوصل لأي حاجه.
ناصر…من اول العزاء وانتي كل شويه تتحدتي في التلافون و عينك زايغه شمال ويمين ليه ماتكونش هي اللي بتكلمك وتعرف اخر الاخبار
عاليا…تليفوني اهو تقدر تشوف الارقام والله.
ناصر….وايه يعرفني ما يمكن تكوني مسحتي الرجم شوفي انتي هتفضلي تحت عيني انتي بتلافونك بكل حاچه تخصك وما هتتنجليش في اي مكان غير رچلي علي رچلك وإلا ورحمه علي بمچرد اختك ما ترچع هفرغ فيها السلاح حتي من غير ما أسمع دفاعها عن روحها مفهوووووم
اعتبري نفسك مسچونه عندي لحد ما أختك تظهر وتفرج بيدخا عنيكي
قعدت عاليا عالكنبه وهي بتعيط بقهر مش فاهمه ايه اللي بيحصل ولا عارفه تفهم البني ادم اللي قدامها ابو راس ناشفه و قلبها مرعوب علي اختها.
ناصر…..اخلصي لسه جدامنا سفر
عاليا…ابوس ايدك افهمني انا لازم افضل هنا عشان اعرف اي حاجه
ناصر…متجلجيش لو علي الاخبار فا كلها هتكون عندينا اول بأول رچالتي حوالين المكان كلهم عارفين شكل اختك يعني لو رچعتك احنا هنكون اول ناس. تعرف جبل الشرطه كمان و هتلاجيهم چايين وچايبينها كمان
عاليا….طيب لو حد من النيابه كلمني او جه سأل عليا او لو حد من الجيران ملاقنيش واتصل اقول ايه.
ناصر….هتجولي أي حاچه بتريحي أعصابك في اي مكان بتدوري علي اختك بنفسك اي حديت المهم يصدجوكي وافهمي كلامي زين اني ممكن الوجت انزل واسيبك عادي لو مش رايده تاچي بس الباجي انتي خبراه زين لكن لازما تعرفي ان من وجت ما هتنزلي معايا تنزلي بهدوء لاني مش خاطفك يعني يا تيچي بمزاچك يا بلاش ومتجلجيش هتكوني معززه مكرمه ها جولتي ايه؟
عاليا…بتفكير ودموع وقفت قدامه ممكن اغير هدومي طيب واجيب شنطتي.
ناصر…..علي اجل من مهلك هاتي كل حاچه تحتاچيها معاكي اني جاعد .
دخلت لبست وطلعت شنطتها فضلت تحط فيها حجات مهمه ممكن تحتاجها حطت العروسه والفانوس وهي بتعيط بقهر . يمكن تكون حاسه بوجع ناصر خصوصا لانه صعيدي والتار عندهم اهم من النفس ويمكن كمان تكون مش خايفه منه وعارفه انه مش هيأذيها لكن كانت عارفه ان النار اللي جواه دي هتطول ريم لو لسه عايشه عشان كده قررت تروح معاه عشان هي اللي تبقي عينها عليه لانها كانت عارفه انه هيعمل اي حاجه عشان يوصل لاختها قبل الشرطه كمان.
بعد وقت بسيط خرجت عاليا لابسه بنطلون چينس أسود وتيشرت بنص كم عليه أسود وكانت رافعه شعرها بطريقه عشوائيه. وباين علي عينها انها مبطلتش عياط.
عاليا…انا جاهزه.
ناصر…مرعي نزل الشنطه و چهز العربيه اني چاي وراك.
مرعي…تحت امرك يا ناصر بيه.
خرج ناصر وقف عالباب
وقفت عاليا تبص علي الشقه بحزن ووجع وبعد وقت بسيط سمعت صوته
ناصر….مش يلا ولا ايه
بصتله عاليا بغضب وقفلت الباب ونزلت وراه من غير ولا كلمه.
نزل ناصر كان مرعي قرب العربيه من الباب
فتحلها ناصر الباب اللي وراء
وركب قدام جمب مرعي وطلعوا عالطريق.
- يتبع الفصل التالي اضغط على ( رواية سجينة مع وقف التنفيذ ) اسم الرواية