رواية اسرار قدس الفصل الخامس 5 - بقلم زينب ماجد

 رواية اسرار قدس كاملة بقلم زينب ماجد عبر مدونة دليل الروايات

 رواية اسرار قدس الفصل الخامس 5

حيره بيش ترضى ثنينهن خسران ..

عجينه بشص اذا ماتنوكل ذبوك ..

(للشاعر علي المنصوري )

قدس : كضيت الخبز وطلعت من ورا البييت وانا شايله صينية الخبز على راسي .. حطيته جدام مرت اخوي بس جسمي يصب عرك .. اريد ماي اقسل ما عدنا فد برميل الشرب وهاذ لو كربت منو ووسختو للسبح امي تفلع (تكسر)راسي

رحت ليوسف كتلو : يوسف روح جيبلي ماي اريد اقسل

– دولي منا ولي بيا حيل اجيب ماي واشيل على متني

– عجل شلون انا المن خبزت قير الكم جيبولي ماي اقسل

– ولي

وليت ورحت على مروان ما يرضى يجيب ماي

مشيت لعمار هم ما يرضى .. كت النهلة كالتلي : انت بطرانة الوادم وين وانت وين

قير لو اشوف وادم بجول واسعلهم ( انتم وين ) خاطر اعرف انا وين وهم وين؟ يربي اريد ماي اقسل شلون بالله الواحد الحران ما يقسل.

كعدت حارة الدنيا كلش صيف وكهرب ماكو واخوتي العسرين ما يشقلون الديزل بس من يجي او وهب .. يمكن هو اشتراها !

دحكت صار الظهر .. وهودوا اخوتي

واني سليت روحي من البيت خذت سطل حديد وطريت الدرب ترست السطل من الحنفية البعيدة ورجعت مروان كاعد .. شافني طالعة وهو صار وجه الجريدي وزرك علي يركض .

– وين جنتي ولج

– رحت اجيب ماي محد منكم يجيب

– ومن محد راح تروحين انت

طرني جلاق طفر السطل من راسي ووكع .. كضبني من راسي يجر بيه ويطك ليما وصل للبيت فكتني منو نهلة .. حجت امي : شجالج يولي وين جنتي

– تسعليني اني سعليهم هم ما يرضون يجيبون ماي واني حرانة

ضلت اتصيح عليه وتقلط فوك شينهم .. ضجت وبجيت

بس شسوي عود باجر الصبح وهم نايمين اجيب ماي

كملت شغلي وفرشت بالهول جدام باب المجاز خاطر يجيني هوا .. زعم القرفة حيل حارة .

ثاني يوم كعدت من الفجر خبزت خاطر اروح اجيب ماي كبل لا يكعدون اخوتي .. وصدك خلست الخبز خليته بالمطبخ وسليت روحي وخذت السطل وطريت جبت ماي واجيت .. دحكت من بعيد جن اكو واحد يدحك علينا

وكفت ادحك

ماكو احد .. ظليت اطمش .. ماكو

رحت سبحت .. حمامنا عبارة عن مكان اظلم لا بيه كلوب ولا ضوا .. بيه شباج صقير فرك بالكوا يلوحه الضوا .. وهو حمام هو مرافق ولازم ما نقسل هواي، زعم الخزان ينترس على وكت وامي تهرجنا .

غسلت بسطلة وحدة وطلعت ، لاكتني نهلة : منيلج ماي ؟

– اكلج فد ما تكليل لاحد ؟

– كولي يمصكوعة

– جبت ماي

– يولي عليش ما تسترين على روحج ؟ نوبة ووكت اتصيحين اخوتي عسرين وانت كلشي ما يرضيهم تسوي

– عجل اخيس ؟ اكلهم حرانة ما يجيبون ماي

– دمشطي بساع واكضي وياي الريوك

– والله شغلي انا خبزت خل اروح للمراح اورد الحلال ماي وانت اكضي الريوك

عفتها ومشيت وهي ضلت تقلط علي وراي

رحت للحلال .. لمحت من بعيد واحد وكفت ادحك .. شفتو الزلمة كرايب ابو وهب

من عرفتوا ابتسمت اله

كل ضني جاي على اخوتي .. بس وردت الحلال ورجعت كضيت الريوك ومشطت وما شفته مر على اخوتي

مرة ومرتين وثلاثة

كل مرة اشوفو من بعيد بس ما يجي لاهلي ولا يمر على اخوتي وحت ابو وهب من يجي هو ما يجي وياه

بعد فترة سعلت امي : يمه هذا كرايب ابو وهب عليش بس يراقبنا

– ياهوه ولج ؟

– يمه هذا اليجي وياه ما عرف شسمه

– وين شفتي

– اكثر من مرة دحكته يطمش من بعيد على البيت ويراقب

– عجل يمه اجذب عليج ؟

– مرت الاخرى لو شفتي كليلي

– ميخالف ، هو كل اسبوع هيج يبين انا من اشوفه اكعدج خوش

– اي كعديني

مرت ايام ماكو

اسبوع وبين .. لمحته من ابعيد بدون ما يشوفني

رحت كعدت امي : يمه يمه

– وغمه محد ينام مرتاح لا ما اجيتي مثل غراب البيت تنكرين براسه

– يمه انت مو كتيلي من يجي كرايب ابو وهب اكلج

شالت راسها بساع : وهساه موجود ؟

– لمحتو من شباج المطبخ

كامت وياي ووكفت ورا شباك المطبخ وخاتلة على صفحة وادحك وياي .. لحد ما كتلها : ذاك ذاك شوفي

شافته كالت : راقبي ولا تخلينه يشوفج

– عليش

– عدج وياه شي عليش تريدينه يشوفج

– يمه قير تروحين تصيحيلو يمكن جوعان ؟

– هو قدس خاطر همه وفكره بطنه .. اكضي شغلج من ثم ساكت وسوي الكتلج عليه

– صار يمه

كمت اخلص الريوك ونهلة ادحك وياي ودكلي : هو انا ابو وهب ما اجرعو نوبه كرايبه

– – سبحان الله اني هم اكرهو .. ما اكرهو يعني ما احبو

دحكت عليه : وشنهو الفرق يمصكوعة

– ما ادري فد ما اكره احد اني، بس ابو وهب شكلو يخوف ما احبه

– يولي ارهابي شينحب بيه

– شني يعني ارهابي ؟

– معناتها يذبح بالوادم

– اسم الله وابو وهب ذباح ؟!!

– اكول اكضي شغلج اشو اكضي مالج شغل بهاي السوالف توجعين راسج بيها

امي ما راحتله

ظلت ادحك منا ومنا

وراحت تخبر بتليفون عدها جابو ابو وهب بس تليفون ما بيه واير وكوة يحصل تكول الشبكة بعيدة ما تنوش .. ضلت تخبر تخبر تروح منا تجي منا .. والتفت من ورا البيت دشت للبستان واندارتله

وسام – سلام الله اعلى المجبل ويدحك من بعيد

فز خطاب ودحك وراه : هلا ام مروان

– عليش تطمش من بعيد

– لا تاخذينها بشين يا ام مروان انا اجيت خاطر افاتحج بموضوع

-شنهو الموضوع

– وكفة ؟

– ان جان ابالك تحج وياي ما تراقب من بعيد وتطمش على الدار

– افهم واعرف ما جان لازم ادحك من بعيد بس الظروف .. انا رايد اخطب بتج على خير

دحكت عليه : ووين تعرف بتي ؟

– شفتها اكثر من مرة وانا رايدها

– وجيتك ليجاي خاطر ادحك عليها ؟

-انا ردت اخطبها من زمان بس غياب اخوي احمد والصار منعني الحاجة وضعها تعبان وانا رايد

– الاصول تكول الرايد مرة يجيب ازلام ويجي يتخطبها ما يدحك اعلى دارها مثل الحرامية

– اتعذر منج وفعلي غلط اعترف وان شاءالله اصلح الغلط واجيب ازلام واجي خطابها

عفتها ومشيت من الدار

بعد ما بيها لازم احجي ويا خالي يخطبها الي

رجعت للبيت .. خالي منتظرني ، اول ما دخلت تلكاني : وين جنت خطاب

– خالي صار موقف لازم تعرف بيه

– شعدك اتراقب الجول خطاب

– انا عاشك بت وسام وهذا السبب

ضل يدحك بوجهي : دحج علي ابن اختي انا ريسان وما يغلبني سبع … رايد تغدر بيه

– خالي انت بحسبة ابوي عليش تفكر هيج ؟

– عيفنا من المجاملات واحجيلنا بالنظيف وين تريد تصل خطاب

– خالي انا لا دخل سياسة ولا دين ولا مشاكل وتعرفني مال غرض بشغلك ولا يهمني .. زلمه اشتغل نهاري خاطر اجمع فلوس عرسي واستقر

– رايد تعرس عجل

– اي ورايدك تروح وياي خطابها

– بس بالمقابل شنهو

– شنهو ؟

– الملفات

– خالي بيش احلفلك خاطر تصدك الملفات ما عدي

– عجل لا تفكر بخطبة

اخذت نفس وردت اتصادم وياه

بس استغفرت الله وطلعت منه ما ردت اتصادم وياه هسه .. اروح لامي تحاجي وهي تسهل الموضوع

طبيت على غرفة امي بلهفة : اسم الله الستار شجالك بهيدا

– يمه طالعة روحي واذا ما تدخلين وتحجين ويا خالي اقسم بذات الله اطلع عن طوري وتشوفون وجه ما شايفي بعمركم من خطاب

– شصاير احجي

– الصاير انا رايد اخطب

– وهالهوسة والعصبية عليش خاطر تخطب ؟

– خالي ما راضي يخطبلي تصوري يساومني وتاهمني وتاهم اخوي اللي ما ينعرف كاعة وين ومصدك بهالتهمة وقانع بيها

– وشنهي المساومة

– ملفات خاصة كشفهن احمد تاهمني انا بايكهن

– وهن وينهن ذني الملفات

– يمه شمدريني بيهن انا احاجيج على خطبة تساليني وينهن

– وياهي هاي الرايد تخطبها

– بت وسام

– غدي لا ذكرها الله . امش امش امش

– يمه لو مو ما ترديها لو هسه شما تصير انا راضي وقانع بيها ورايدها

– وانا ما ارضاها بت وسام تصير جنتي

– يمه راح تعاشريها تنام بصفح عيشتها عليج .. انا الرايدها يمه

– ابد والله يخطاب لا ارضى ولا اخليك تاخذها

– عجل يمه لا تلوميني بالراح اسويه

– وشنهو التسوي يخطاب .. تهدد

– من زغرنا حرمتينا من حمامنا وبعدتينا عنهم وجبتي خالي كلتي هذا بحسبت ابوكم .. كل هالسنين المرت وانا حاسبه بحسبة ابوي يضرب يغلط يهين يظلم اكول اكبر مني واحمل وعيب واحترم وخاطر امي ويخالف .. بس هين وتوكف عدي

– وشنهو التعمله ولك ؟

– اروح على عمامي وارد اذب جرش وياهم واخذ ازلام منهم واخطب .

جاي احجي دفر الباب وفات خالي : توكف بوجهي ولك خطاب

– خالي ما وكفت بوجهك انا كل الرايده منك اخطب بت انا رايدها وهذا واجبك اذا جنت بحسبة ابوي وان ما جنت بحسابه عدي عمام امشيلهم

ضربني راشدي وصاح : دحج هين لك انا ريسان ملاعيبك هاي حافظها البكدك اعبرهم وانا كاعد بت ما اخطب وزواج ما تتزوج ليما تتأدددددب

– ما ناقص ادب واعرف حدودي كلش زين ولا انا بقيد احد وجفك هاذ الضربته ممنونه

حجيتها وطلعت من الدار

ضل يصيح وهجم البيت فوك راس الحاجة

ويكللها هذا ابنج متفق ويا جماعة علي ابنج جاي يحفرلي يسليمة .. هاي تاليتها ويا ولدج اربيهم ويصيرولي جلاب تنهش بلحمي والله وتلله لا ارد اربيهم من جديد فلا اتسمى باسمي .

خطاب ما وفر جهد

من بيت اهله على بيت عمامه

راح على واحد من ولد عمه .. خذاه على بيت عمه الجبير

راح ودخل على عمه وسلم وحجاله حاله وكاله : ربينا زغار انتم ماكو وما عرفناكم الا لما كبرنا وتعونا غربتكم بس الطفر ما يطلع من اللحم واني مالي غيركم عمامي اتنخى بيكم

خالي ربانا صح وكبرنا

بس ساطي على خير ابونا ومانعنا اقل حقوقنا .. رايد اخطب ما يرضى ويساومني على امور ما عدي علم بيها

تقبله عمه ورحب بيه وحطله غده وكاله : شغلتك ان شاءالله محلولة ، ان جان على الخطب نروح ونخطبلك وان جان على خير ابوك .. فاحنا من شر امك ومكاونها ابتعدنا وخلينا لكاع لجهاله يعيشون منها

– والله عمي عشت عمري بالع عظم لا اكدر احجي تكب مشاكل بالبيت والوالدة تتعب ولا اكدر اسكت .. واتاني فرج بس الظاهر الما يحب المشاكل مالو حك عد ابنادم

– كول اسم الله وهلا ما جيت بيه .. العصر نروح انا وياك على جبير العشيرة ونشوف صرفة ويا خالك

ضل خطاب ابيت عمه للعصر راح وياه لجبيرهم حتى يدخل وياهم بالعشيرة ويصير منهم ويشيل اسم ابوه بالديوان

وصل برغوث حجي لريسان كالوله خطاب عد عمامه .. رجع ابو وهب هجم البيت فوك راس الحاجة ويكلها : ابنج بعد هالشكى والربى يهد خاله وينش العمامه .. لا تستغربين اذا باجر ذبج بالشارع حتى يعرس ويجيب حرمتا بالبيت .. انا خطاب الربيتو وهو ها علواته يكبر ويشيخ عليه تالله لاذلوا وراسو بالقندرة بس صبره عليه .

لليل رد خطاب .. خاله نايم بغرفة اميرة حشت براسه لحد ما كلها الله بس لان خطاب عاند خاله وطلع عن قيده .

كام باليل شال الفانوس ومشى للدوانية

لكاه خطاب جاي يدخن جكارة وكف وحاجه : خطاااب

رد وهو كاعد : ها خالي

– شعدك اليت حمدان العصر

– مشيتله بشغله

– وشنهي الشغله

نزل الجكارة من ايده طفاها بزاوية الحايط وشمرها ليبرا وكام : انا ذبيت جرش ويا عمامي

– تريد تحط راسك براسي ولك عمامك وين من انتم ازغار لا مروكم لا درو عنكم يوم الكبرتك وكويت عودك تتكوى علي بيهم ولك

– خالي انا وياك مو حرب انت عليش حاطني ابالك ؟ كل الردتو لا بستان ولا محصول .. بنية انا رايدها ورايد اخطبها وهاي اقل حقوقي عليك

– ورحت لعمامك يخطبولك ولك

– ما جدامي غير حل بعد ما رديتني

– اسمع لك تالله ان ما رديت عن هالامر يا خطاب وجزت لا ابجيك دم واعرفك حجمك شنهو

– انت افعل وانا افعل والبينا زود ينفذ

– تحط راسك براسي

– وكت التهدد خالي لا تتصور من السكوت .. كل عمري احترمك وما فرد يوم قللت منك بس خليلك خط احترام انا مو جاهل جدامك

– هين يبن اختي هين

دك على جتفه ومشى ..

ما اهتمله خطاب جل ما اباله ياخذ مشيه يخطب البنية الرايدها خاطر ما يتفشل جدام امها

ثاني يوم هم راح على عمه .. كاله : الجمعة هاي نجمع ازلامنا ونخطبلك وعرسك وتكاليف عرسك علينا شما يصير اكل ومعازيم عمامك على الروس يجمعولك وانت ابنا ونريدك ويانا تشيل اسم ابوك

حيل فرح خطاب بهالحجي

اول مرة يحس عده عزوة وسند عمام

كضى عمره ما يشوف غير خاله من هو زغير ترك الدراسة وطلع يشتغل ما عرف لا عمام ولا اقارب غير اقارب امه ومعارفها .. وهي منعتهم من كل اليربطهم بعمامهم خوف من المشاكل ، وخلت اخوها بداره زلمه …. هسه تغير كلشي هو الشايل اسم ابوه وعمامه كلهم رحبوا بيه وشالو عنه هم العرس يعني الفلوس العنده يخلصها على الغرفة ونيشان العروس

ذاك اليوم خطاب ما نام من الفرح

وهو يتنطر يوم الجمعة على نار .. شاف التقويم على الحايط .. اليوم اثنين يعني بعد ٤ ايام .. شيخلصهن ؟

ثاني يوم الوضع تمام

ثالث يوم امه حجت وياه عيب عليك وهذا خالك وتالي عمر تصف ويا عمامك عليه ويا حيف رباي وما جازيت تعبنا ومن هالحجي .. خصمها وياها وعافها تحجي وطلع

ثالث يوم الخميس .. الصبح مر ابو وهب عليه للدوانية من الصبح كعداه : خطاب خطاب اكعد ابني

شال راسه .. حجه ريسان : اكعد رايد احاجيك

-شنهو خالي

– اسمع ابني انا مدحتك كدام الزلم وكتلهم خطاب يدبرها

– شنهو

– رايدك مخبر بالديرة والداير ما دايرها

– اي

– شكو واحد عده اتصال لو يشتغل بالجيش الصفوي المتخاذل تنطينا اسمه وبالمقابل الك خمسين الف دينار عراقي مكافئة من جيش المجاهدين

خطاب : دحجت خالي شجاي يرطن من صباحات الله يا جيش صفوي يا مكافئة .. جريت جكارة حطيتها بحلكي وسالته : يا جيش خالي ؟

– اليسموه الجيش العراقي هاذ ما بجيش العراق ذوله خلك ناس تبعية صفوية استحلوا بلدنا بمساعدة المحتل

– وانا ياهو مالتي بهالسوالف تعرفني بعيد عن هالامور

– لا هذا الوكت بالذات لازم توكف لشعبك بيه وما تخلي الغريب والتبعي ياخذو

– مكعدني لهالموضوع خالي

– وردت اكلك تبلغ الحاجة تجهز الغرفة مالت وهب

– المن ؟

– ناس انطوني مرة بس ما رايد احجي خاطر لا تصير مشاكل ويعرضلي وانا اكره عرضتهن الكشرة تفكرني

– ان شاءالله خالي

– وذاك الموضوع فكر بيه

– اعفيني انا ما احب هالامور

– صير كدها

– مو قصة كدها خالي بس انا اشتغل

– مصر توكف ضد خالك يخطاب

– لا خ….. قاطعه

– انا كلت ابني واسايره بس طلعوا عمامك غاسلين مخك علي زين عفية خوش تجازي تعب يخطاب

– خالي القصة مو هيج .. كل ما بالأمر

قاطعني وكام .. نفخت وطفيت الجكارة .. مدري خالي شبراسه مكعدني من صباح الله تعال اشتغل مخبر .. اطوني مرة

خالي يمكن يبلع ؟

دحكت اليوم خميس

ما ظل بس اليوم وباجر امشي اخطبها واستعجل بتحضيرات الغرفة والنيشان خاطر اكضي الخطبة باسبوعين ونتزوج

بس اخاف خالي يضغط على امها ما يخليها تنطي البنية ؟ بهالحالة شلون ؟ ما لازم ابني عداوة وياه .. اسايره واساير امي واكف عن مخي المشاكل .

كمت على حيلي غسلت وطلعت للبستان .. شغلت الديزل وسكيت الكاع .. رجعت شلت الصوندة وخليتها بالمبردة مالت الاستقبال .. دخلت البيت ما بيه كهرباء لان الديزل زغير ما يشغل بيت كامل حده ماطور و ميردة .. تزيد عليه تضل المولد تصرخ

عفت الماي بالمبردة وشغلتها خاطر يتنكع الليف .. دخلت لامي كتلها على خالي والمرة اللي اطوها اله كالت : اليوم يجيبها ؟

– اي يكول عطوة هدية ما ادري بعد من يجي استفسري منه

– تصالحت وياه

– يايمه والله صرعتوني بسالفة الصلح وانا بحرب وياه خاطر اتصالح ما خطبلي وما رضى بس يظل خالي واحترمه بس ما ارضى يدخل بامري لو اروح لعمامي انا بعد مو زغير والزلم بلا عمام ماله هيبة ..

– وتوك ذكرت عمامك

– عليش ما اذكرهم وهم تكفلوا عرسي

– يا عرس يمه ولك اخيك ما هو وانت تفكر بعرس

– عجل شلون يمه اضل بلا مرة ليما يرد اخوي انا ما ناسي بس الحياة تتطلب

– وبت وسام

– يمه هذا الموضوع تعديته ولا تفتحي بعد امي على عيني وراسي بس مالج حك تدخلين باختياري وياهي المرة الاريد اكمل وياها عمري .

ظلت تحجي ربيتك وهاي تاليتك ومالي جلمة عدك … كمت منها احسن ما تطلع مني كلمة مو حلوة تخشن كلبها .

…..

قدس : اجتني امي اني بالمراح

صاحت ( قدسسسسس)

– ها يمه

– كربي ليجاي احاجيج

طلعت من المراح وانا شايلة الصخلة الزقيرونه : يمه فد اخليها ترضع

– هدي الاصخلة وتعاي جاي احاجيج

– يمه امي عصبي .. ذبيت الاصخلة من ايدي ورحتلها : ها يمه

– كعدي

– شكو

– حضري غراضج

– عليش

– كل بنية مجانها بيت رجلها وهي خطار عد اهلها ولو طالت بورت وثكلت

بكلبي كلت : هله هله واخيراً حست امي وراح تطيني لزلمه واخلف ويصير عدي جاهل صقييروووون هله هله

حجت : دحجي هين

– اي يمه

– ابو وهب باجر جاي

– اي

– وراح يجيب وياه شيخ يعقدلكم

– والعريس شني ما يجي

– دحجي هين واسمعي عدل لا تصيرين ثوله .. ابو وهب زلمه معدل وخوش رجال وراح يدللج وتعيشين بجاله مدلله

– يمه مو جبير

– الرجال ما يعيبو شي يظل زلمه

– زين يمه يسويلي عرس غير شني هيج اروح

– كتله على عرس بس يكول انا بعدين اسويلها حفلة صغيرة وتدلل

– هله هله ادلل منا وجاي كله ادلل راح اخلص من اخوتي العسرين هللللللللللله

– يولي البنية من يحاجوها بسالفة عرس تخجل وادنج اشو انت طكيتيلها اصبعتين يولي

– يمه انا خجلانه ما ما خجلانه فد بعدني هيجي جديدة على العرس .. بس يمه بعد ما اجي ليجاي ؟

– اكول ابعدي مني كومي اكلها تعرس تكلي اجي ليجاي

– عجل يمه تبيعوني ؟

عافتني ومشت .. هسه دخل يبيعوني واذا

المهم اعرس

فرحت وابو وهب الجنت اضوج منه كمت اتخيله حلو وهيج شخصية … انا شايفته ما ماشايفته بس يعني ما جنت اشوفو حلو بس راح يصير رجلي .. يحبني ويدللني ويطلعني ويمكن حتى ياخذني للسوك … اي يمكن .. قير راح يصير رجلي بعد

خلصت الليل احلام باحلام

اجيب وسادتي منا رادها منا والنوم ابعد من عيني .. باجر اعوف هذا البيت واطلع بعد اخلص .. فد راح اشتاك لمراح وصخلاتي .. يمكن اكلل لامي تطيني الصخلة الزقيرونه تا اخذها قاد وياي .

كعدت الصبح نهلة جابت ماي وسبحت ونظفتني واخذت حاجبي اول مرة بحياتي اخذ حاجبي شلعتني تشلع .. واطتني جلابيتين اجداد الها واخذت جلابياتي الزينات وعفت الراكدات وامي كالتلي : ابو وهب راح يشتريلج بعد وحتى زواكات يشتريلي الله واحط حمرة واصير اخبل بعد

كعدت انطر على نار

ورغم اعرف ابو وهب جبير وشايفته ما حلو

بس مدري ليش عكلي كام يصوره هيج هيبه ووقار وزلمه وصورة حلوة ابالي

عد ما اجا الظهر ووياه الشيخ

وامي واخوتي كعدوا اتفقوا وياه .. صاحتلي امي وكفت وراه الباب والشيخ ملجلنا ..

دحكت بابو وهب

رجعت للواقع وفزيت من احلامي

ما مثلي اللي صوره بالي واقعه ما مثل البالي .. جبير يطلع عمره بالخمسينات ووجهو مال واحد مجرم يخوف .. خزرته ونظرتو تصكر شلون اذا عشت وياه .. خاف يطلع عسر اكثر من اخوتي ؟

ضلت امي ونهلة يوصن بيه

جلمة اسمعها وجلمة اطفرها على كثر ما عكلي تشوش وافكاري تخربطت وشعوري ما عرف شلون اصوره خوف على رهبه على توتر ومغص صار ابطني واحس عيوني غوشت

كل عمري اتحلم اتزوج واصير عروس

بس احس اريد ارجع وما اعرس اريد اضل هنا حت لو اخوتي عسرين اني تعودت عليهم ما اريد اعيش ويا ناس قرب ( غُرب )

سلموا علينا واخذ الشيخ ليجدام وانا كعدت ليورا .. لابسة النقاب اول مرة اطلع من الجول حت ما اذكر مرة تمرضت وخذوني مستشفى لو طبيب كلشي ما يصيبني محبوسة بهالجول ..

اخذ الشيخ وصلاه لمكان وكالي : حولي اكعدي يمي

ردت افتح الباب تعسرت عدي وانا منكبة

فتحها وكمت حولت ليجدام حرك السيارة ومشى

بوكتها صيف ووكت ظهر والجو حار

فاتحة جامة السيارة وكاعدة ما استجريت اشوفه لو ادحج بوجهه وهو يمي ، مدنجة والنكاب على وجهي وسموم تلهب من هوى الجو الحار. لاف سيارته وفات بشارع الكترين زرع ما اشوف بيوت اوادم

صف السيارة طفاها ونزل ..شلت البوشية الاولى من وجهي خليت بس الثانية عيوني تبين منهن ،اندار صوبي فتح باب السيارة ، كال : احدري على كيف بختج (انزلي بهدوء)

نزلت وكوات ادحج دربي .. اطمشت من برا السياج .. بيت بعيد وقديم وداير ما دايره زرع ، استحي ادحج ضليت مدنجة راسي وامشي وراه، دحجت وهو يمشي جدامي لابس دشداشة بيضة وشماق احمر لافو على راسه هذا كل الشفتو منه وهو يمشي جدامي

فتنا بممر من المزرعة ياخذك للبيت اللي بنص البستان .

وصلنا البيت .. عالي تصعد تلث بايات مجال زقير والبيبان مشرعة ع البستان .. طلع جدامي شاب شايفته هاذ الجان يراقبنا كبل مدة ، تلكاه : هلا ابو وهب

– هلا بيك خطاب ، بلغيت الربع ؟

-الحاجّة بانتظارك

يحجي ويا بس حسيت عيونه تتفكدني ما ادري ليش هيج حسيت

مدنج بس يرفع بعيونه يدحج عيوني ،كاله : حرمة رابعة بالخير

حجه : قدس مرتي بأذن الله

الزلمة ما رد لا بحك ولا باطل ، حتى ما بارك بزواجته .. جنه اتصركع وابعد خاطر لا يشوفنا حاله ، دحك وراه .. حجه :اكربي اشوف اكربي …

صاح …. حاااااجّة

دخلنا.. جهيل جثيرة اجبلت عليه تندهله ( اجا ابونا اجا ابونا ) البيت هوسة واصوات من كل مكان

فات على مكان مبين مطبخ

مرة كاعدة جدام جولة تطبخ ، والثانية جدام حوض تغسل الصحون وتجفيهن بصينية ، والثالثة مكمبصة اكبال طاسة اتكطع اعكود ريحان ، رفع صوته : السلام عليكم

كامن بسرعة : هلا وعليكم السلام

-الحاجة وين ؟

-بغرفتها تذكر الله

-جل اسما ، زهب الغدا ؟

-ناطرين جيتك خاطر نزهب

-عجل ازهبوا الغدا لجل الحرمة الجديدة

اندار يحاجيني : اعرفج حريمي .. عواطف مرتي الاولى والجبيرة ام وهب

وعفاف مرتي الثانية ام ايسر

واميرة حرمتي الثالثة

بلعت ريجي ماخذ ٣ واني الرابعة .. امي عليش ما خبرتني ؟ اطتني لزلمة ماخذ اربعة .. بعدني بصكعتي

اندارلهن وهو يتفاخر ويكللهن : قدس مرتي الرابعة وخاتمتجن بأذن الله

الجبيرة رحبت بيه : جثير الهلا ان شاءالله يجعلها مبروك ابو وهب تستاهل الخير

الثانية ردت ابرود : اي بالخير

الثالثة تحسرت واندارت تطلع وهي تكول :امش اخبز الصينية عفاف صيحي بتج تخلص الريحان عني .

اهو ادرك بزعلها وكاللها : هينة يا اميرة ما عليج زود

-يزود بختك ابو وهب

طلعت متضايكة ، واني اطمش وكاضبة صرارة واسأل روحي ..عد يا ضيم اجبلت ؟ انا زوجة رابعة !؟

اجا صوت من ورانا : هلا بالخير اجبلت

-كربي حاجة اعرفج على حرمتي الجديدة قدس

دحكت علي وكالت : محييك الله وزود خيرك وبزرك وزايد عزك بأذن الله

-يحفظج الله حاجة ، علميها اولى طبايعنا بين ما اخض لشتي من الحر

-تغسل بماي زمزم ، تهنى يما .. كربي يقدس وارفعي النكاب عن وجهج ولدنا ما يعتبون الدار والحريم تفتر

رفعت النقاب من وجهي جاتلني الحر ووجهي احمر دم

خذتني وكعدتني على بساط ومبردة مشتعلة هواها طيب ريحته جن تسحب ريحة الزرع والطين وتهبه علينا بنسيمها ، كعدت وهي تسالني عني وعن اهلي وشلون تمت القسمة وسولفت الها ..

كومتني

كامت تاشر على الغرفة وتسميلي قرف ضرايري

لحد ما اشرت على قرفة وكالت : كومي

كمت وياها .. دخلتني على قرفة بيها دوشك نفر وكنتور طلاقتين ومرايا ملزوكة بالحايط شكلها قديم، بيها خط سواد ، حجت : هاي غرفتج نظفيها خاطر انطيج دوشكين جداد وغطوة هدية عرسج.

حجت وطلعت، ظليت ادحك وراها

القرفة تعبانة وحايطها مبوط من الرطوبة..

اخذتلي صفنة على القرفة هو هذا العرس الجنت جاتلة روحي عليه ، ولا جني عروس !

نزعت العباية والنكاب ، وخليتهن على كتر .. ودنكت شلت الفراش نكثته ، وضربت الوسادات وحدة باللاخ ، فاتت ، وحدة من نسوانة : هدي من ايدج تعاي تغدي .

خذيت العباية، كالت : مالها الزوم العباية ، ماكو احد غير ابونا .

طلعت من القرفة .. للحولي

ناصبين سفرة .. وحاطين عليها مواعين مرك وبنص السفرة انجانة جبيرة مال خضرة .. وصفطة خبز .

طلع ابو وهب من الحمام الخاولي على اجتافه ودشداشة رصاصية مال بيت ويمسح بوجهه وشعره ، صاح : طفوا المبردة

حجت الحاجة : اكعدي يم رجالج يقدس

تحركت جاي اريد اكعد

تعدتني اميرة وكعدت بصفة، ظل مدنك هو ما رد على تصرفها .. احتاريت وين اكعد .. على يمنته اميرة وعلى يسارة مرته الثانية عواطف، حجه وياها: جيبيلي راس بصل .

كامت وهي تكله : من عيوني

دحكلي واشرلي براسه، اجي اكعد يمه ..

كعدت على يسرته، اجت عواطف لكتني كاعدة يمه، الوجه انطعن اسود ، دنكت حطتله البصل وراحت كعدت ليغاد بس تطمش علينا بحقد .

مثل اي وحدة تدخل مكان قريب تستحي تاكل

ظليت اجيب بالخبزة منا، واردها منا، حجت اميرة : ليلتك عامرة عندي اليوم ؟

لف الخضرة بخبز غطسها بالمرك واتجاهل كلامها وهو ينطيني الأكل من ايده ..ظليت ادحك عليه وعليها ، حجه : اكلي يعروس ، الليلة انت عروسة هالبيت .

اول مرة احس واحد يحاجيني هيج ويفضلني

صح مستقربه الوضع وضايجة ومقهورة بس هالموقف نفه عني من فضلني ..

كاعدين على السفرة وما نحس ال صوت قوي صار برا وواحد يصرخ .. فزن والحاجة كامت .. ابو وهب ما تحرك من مكانو وكاللهن : كملن غداجن معليجن الحاجة تشوف الوضع

كلهن رجعت .. حجه هو : وهب شغل المبردة

كام شاب يطلع عمره بالعشرينات اكبر مني شقلاها .. هذا وهب ابنو ابر مني !!

ندسني وهو يحجي بصوت ناصي : عجبتج الغرفة لو اغيرها الج

هزيت راسي ما عرفت شحجي حيل مرتبكة ومتوترة ما متعودة احجي وياه .. الساني وهذرتي اللي اليت اهلي شو كلها اختفت هنا جن الطير اكل الساني ما عرف احجي

هوى المبردة من هب ارتاحيت شوية

لان كلش حارة ومحتقنة وكوة اكل .. هاي اني الادوس بالاكل دوس واسرط فد ٣ كرص اربعه هسه لكمة الوچ بيها وما تنبلع .

طفت الكهرباء وطفا الضوا .. من طفت المبردة اسمع صياح برا وتكسير ما عد افتهم .. حجه : دخلي لغرفتج .. لمن السفرة

كمت لقرفتي ولو هي قرفتيش

مو حلوة … كعدت على الدوشك وادحك

قرفة صقيرة بيها شباك طويل يطل على البستان .. اكو بنكة بس طافية وصارت وغرة حيل واني لابسة ملابسي اذني اختنكت

انفتح الباب وفاتت وحدة من زوجاتو ينكال الها اميرة ، حجت : يمتى عرستم ؟

-فد هو اجا وكال لامي على العرس وجاب الشيخ ما عرف بعد

– ها انت من هالنوع اليسوي روحه مسكين ويدلل خاطر يحلو بعينه

– اسمعي لج ردتج لاهلج ارحم من كعدتج هنا بس يجي كليله ما اريدك واطلعي منا لان لو ظليتي ما اخليج تنامين ليلة بهنا

– اني ما ستويتلج شي ليش تكرهيني ؟

– شتسوين اكثر من ما تاخذين رجلي وتنزلين على راسي ضرة .. عشر سنوات وانا المفضلة عده وما فضل غير ولا اخذ علي تجين من تالي تاخذيه مني وتريدين اسكتلج .. اشوفج انجوم الظهر بعز ضواها

حجتها وطلعت من القرفة وصفكت الباب

البيت هوسة وجهيل تصيح ورجال برا يصرخ بكل صوته ومعدفتهم هم هيج لو مخبوصين لان عرسنا اليوم

بطلت بعد ما اريد اتزوج بس يجي اكلو رجعني لامي اني بعد ما اريد عرس ، نسوانو الضاهر عسرات ما ينحملن اخاف منهن …

• يتبع الفصل التالي اضغط على ( رواية اسرار قدس ) اسم الرواية