رواية الحب الروحاني الفصل السابع 7 - بقلم يارا عبد السلام

  رواية الحب الروحاني كاملة بقلم يارا عبد السلام عبر مدونة دليل الروايات 

 رواية الحب الروحاني الفصل السابع 7

_لو سمحتى كنت عوزا اقابل جمال بيه..

_نقوله مين يا فندم

_كنت جايه اقدم على وظيفه السكرتيره

_اها اسمك والc.vبتاعك

_نور اسمى نور..

_تمام اتفضلي وانا هبلغه..

دخلت ونور وقفت بتوتر لأنها دلوقتي هتشوف الشخص اللي قتل اختها ،حاولت تتمالك أعصابها واتحولت ملامحها للجديه بعد ما السكرتيره خرجت..

_اتفضلي جمال بيه في انتظارك..

طبعا نور كانت عامله حسابها انها تكون في اجمل طله دخلت بكل ثقه..

كان راجل أربعيني باين على ملامحه الخبث ومارتحتش لنظراته ليا ..

جمال:تعالى تعالى يا حلوة اقعدي..

_احم أنا أنا كنت جايه علشان وظيفة السكرتيره و ..

_مقبوله من غير ما تكملى اصل احنا بنقدر الجمال اووي ..

نور ابتسمت بمجامله:اه شكرا اققدر استلم شغلى امتى

جمال:من بكرا لو تحبي وطلع كارت:ودا كارت في عنوان شقتى هبقى استناكى هناك..

نور بصتله :نعم!!شقة اي انت مفكرنى مين أنا مش واحده من الشارع..

_ومين قالك كدا انتى ست البنات أنا بس كنت عاوزك في شغل مش اكتر..

_اي شغل برا نطاق الشركه ميبقاش اسمه شغل يا جمال بيه عن اذنك..

قامت وخرجت وهى حاسه نفسها هيغمى عليها ..

جمال بخبث:يعجبنى البنات اللي شخصيتها قويه عجبتيني وانا الحاجه اللي بتعجبني بتبقى ليا ..

نور خرجت من الشركه وحاست أن دموعها هتنزل ركبت عربيه كانت واقفه مستنياها وكان فيها يحيي..

_ها عملتى اي..

اتنهدت بدموع:قبلت في الشركه وهبدا من بكرا أنا انا خايفه اووي شكله غريب اووي انا حاسه بخوف ناحيته البنى ادم دا مش طبيعي ..

يحيي اتنهد بتعب وطبطب عليها:خلاص يا نور لو مش قادره تكملى ننهى القصه ومتكونيش خايفه..

_لا يا يحيي أنا طالما بدأت بحاجه لازم اكملها للآخر بس انا بس من التوتر لقيت نفسي كدا علشان اول مره اتحط في الموقف دا ..

_نور متخافيش طول منا معاكى وفي ضهرك وافتكري دائما انك بتعملى كدا علشان تجيبي حق اختك وكمان عاوزك تثقي فيا انى هكون معاكى لحد ما نوقع الكلب دا في شر أعماله …

ابتسم:خلاص بقى امسحي دموعك وليكي عليا يا ستى هعزمك على ايس كريم اي رايك..

نور:لا أنا جعانه..

يحيي ضحك :حاضر تحبي تاكلى فين..

_اي حته بص اطلع بينا على وسط البلد نضربلنا اتنين كشري ونحبس بعصير قصب اي رايك..

ضحك عليها لأنها عامله زي الاطفال بتعيط بسرعه وبتفرح برضه بسرعه ،فيها كتير من سارة بس مختلفة برضو عنها في حاجات كتير ودا اللي بيميزها عنها لأن نور بتقدر انها تخلق جو ليها لوحدها …

_اتنين كشري يا عمو وزود الدقه..

_عنيا يا بنتى..

دخلت وهوا وراها مبتسم على طفولتها ..

قعدت :تعرف أنا على طول باجي هنا انا ومريم وبنعمل مسابقه..

_ازاي!

_اللي تخلص طبقها الاول التاني عليه يدفع ..

_اممم حلو دا تعالى نعملها..

_متلعبش قدامى علشان انا على طول بكسب..

_وانا مش بخسر..

قالت بتحدي:اتفقنا

الطلب نزل ولسه هيبدأ..

نور:استنى في شروط

_اي هى..

ابتسمت بخبث وحطت شطه كتير في طبقه :دي الشروط

يحيي يصلها بصدمه ومسك الشطه وحطلها منها هى كمان ..

_بس..

نور:عادي..يلا ابدا..

بداو ويحيي بقى ياكل وعيونه بتدمع ونور بتضحك على شكله وهوا بيبصلها بغيظ..

نور كانت بتاكل باستمتاع لأنها مش اول مره تاكل الكشري كدا..

مرت عشر دقائق وكانت عذاب بالنسبة ليحيي في حين أن نور خلصت طبقها.

_هههه معلش يا دكتور تعيش وتاكل غيرها هههه

يحيي بقى ليشرب ميه كتير من الشطه..

_هتتعب اكتر..

_امال اعمل اي

_اطلبلنا اتنين قصب..

بما انك كدا كدا عليك الحساب..

يحيي طلب قصب وبدأوا يشربوا..

_بس اي رايك في الخروجه الجامده دي على ذوقى..

_ابقى قابليني لو طاوعتك في حاجه تاني ..

_الله مش كنت بتراضيني

_انا آسف هبقى اسيبك تنفلقي بعد كدا..

ضحكت وقامت وهوا حاسب وخرج وراها..

يحيي كان رايح ناحية العربيه ونور وقفته:استنى..

يصلها باستغراب:اي تاني

كان في فرقة شباب قاعدين بيغنوا والناس حواليهم..

_تعالى نقعد هناك ..

بص على المكان وسمع الاغنيه نفس الاغنيه اللي كان بيسمعها مع سارة..

“في عشق البنات لمحمد منير”

ابتسم ولقى نور بتشده وبيروحو سوا يقعدوا وتبدأ نور تغني معاهم وتسقف وهوا كمان كان بيفتكر سارة وبيبتسم وبدأ بسقف معاهم ..

نور كانت فرحانه اووي أنه مبسوط معاها وبقت بتبصله وتبتسم وهى يتغنى وهوا بيبادلها الابتسامه، قلبها دق بفرحه وابتسامتها بدأت انها تتحول لابتسامة عشق..

قعدوا شويه وبعدين همسلها:يلا نمشي بقى اتأخرنا..

هزت راسها وقامت وقام وراها ..

نور:أنا مبسوطه اووي

بصتله:وانت كمان انبسطت..

_اه جدا تعرفي أن أنا وساره كنا بنسمع الاغنيه دي يعنى هى اه مش رومانسيه بس كنا بنسمها لما بتيجي الاماكن دي كانت زيك بتحبها برضو..

_انت لسه فاكر!!

_انا عمري ما نسيت ساره ولا عمري نسيت حاجه تخصها ولا اي زكري جمعتني بيها سارة كانت أول واخر حب في حياتى وأعتقد أن مفيش واحده في الكون تقدر تنسيهالى علشان ساره كانت متتنسيش…

_كان زمانكوا مع بعض دلوقتي قصة حب لا تنتهى انتو كنتو جمال اووي أنا بتمنى أن ربنا يرزقنى بواحد يحبنى زي حبك ليها..

اتنهدت بحزن بعد كلامه دا وعرفت انها لو حبته تبقى بتضيع نفسها وقلبها مع واحد عمره ما هيحس بيها ..

نور ابتسمت:يلا بقى علشان اروح ..

يحيي:يلا..

روحها وبعدين اتفقوا على باقى الخطه بكرا ونزلت …

نور دخلت اوضتها ودموعها بدأت تنزل:لا لا أنا لا يمكن هحبه لا يمكن مستحيل …

يحيي روح البيت

دخل واتفاجئ بوجود اخوه..

يحيي:يوسف !اي المفاجأه دي متصلتش بيا لي وعرفتنى انك جاي ..

يوسف قام وسلم عليه:مفيش يا سيدي المهمه اللي كنت فيها خلصت امبارح ورحلنا المتهمين كنت هستنى اعمل اي يعنى …

يحيي قرب منه:طول عمرك بطل يا يوسف ..

_حبيب اخوك ..

الام:طب هسيبكوا تتكلموا مع بعض عقبال ما اعملكوا الغدا وبصت ليوسف:عقل اخوك بقى علشان انا زهقت منه..

_شكرا يا ست الحبايب..

يوسف ضحك

_انت عاملها اي يبنى

_مفيش عوزا تجوزني بالعافيه وقال اي عوزا افرح بيك وملقتش الا احلام..

يوسف:دي البت فرسه دي تترفض دي

_روح اتجوزها انت معلش أنا وش فقر

_من يومك..المهم عملت اي في الموضوع بتاعك والخطه ماشيه ازاي..

_كويس انك جيت كنت عاوز اعرفك على نور دي تبقى اخت سارة والطرف المهم في الخطه..

_اممم حلوة طيب..

_انت مش هتبطل بقى

_اسف بس اعذرنى انا بقالي شهر وشي في وش رجاله مفيش ولا واحده ناويه تدخل حياتى مع انى زي مانت شايف طول بعرض وحليوه بس هتعمل اي المتعوس متعوس..

_قاعد أنا جنب الوليه الللى بختها مايل كدا وسع كدا من وشي..

تانى يوم نزل يحيي ويوسف مع بعض علشان يقابل نور ويوصلها..

وصلو عند الجامعه ..

_يوسف استنانى هنا عقبال ما اشوفها جوا واجيلك ماشي..

يوسف وهوا بيبص على البنات:ماشي متتأخرش…

كانت ماشيه وهى بتتكلم في التليفون مع مريم..

_خلاص يا مريم اقفلي علشان يحيي بيتصل وهبقى اكلمك بليل..

ردت عليه:انت فين

_انا جوا بخلص شويه اوراق انتى فين

_برا الجامعه

_خليكي عندك وانا جايلك..

فضلت واقفه وسمعت صوت بصبصه..

_بس بس .

نور تجاهلته..

_اكيد ماما كانت نحله علشان تجيب العسل دا كله نور بصت ليوسف بقرف وبعدت..

ايون كان يوسف اللي بيعاكسها..

يوسف نزل من العربيه وقرب منها..

_ممكن رقم بابا..

نور باستغراب:لي

_علشان اطلب منه القمر هوا في قمر بيطلع الصبح يا جدعان اي دا انا عمري ما شوفت جمال كدا..

نور اتعصبت:ممكن تبعد لو سمحت علشان ما فرجش عليك الجامعه عيب على شكلك وسنك يا شحط انت..

يوسف كان لسه هيتكلم

يحيي كان جه:في حاجه يا نور..

نور قربت منه:البنى ادم الغريب دا بيعاكسني

يحيي تتنهد بقلة حيلة من اخوه اللي مش بيبطل هزار دا:أنا آسف يا نور يوسف يبقى اخويا وهوا بيحب يهزر معلش..

نور:تمام علشان خاطرك انت بس ،بس انت جايبه معاك لي؟

_يوسف يبقى ظابط يا نور

_التافهه دا يبقى ظابط…يخلق ما لا تعلمون فعلا..

يوسف:لا دانا ظابط اووي يعنى انتى متعرفينيش..

_كفايه اللي عرفته عنك من شويه اكيد انت تبع الاداب..

يوسف:لا أنا ظابط في المخابرات يا حلوة..

_كمان!!!غلطوا لما حطوك في المكان دا والله بس يلا اكيد واسطه

يحيي:خلاص بقى انت وهى هوا وانا مش واقف ،اعتذرلها يا يوسف..

يوسف:علشان خاطرك بس ,آسف..

نور:اسفك مرفوض ..

ويلا علشان هتأخر..

ودخلت ركبت في العربيه ..

يوسف:أنا عاملك اعتبار بس لولا كدا كنت طبقتها في بعضها بحلاوتها دي

يحيي ضحك على اخوه..

يوسف:أنا مش عارف دي ازاي اللي هتوقع جمال ربنا يستر .

_ماشي يلا يا اخويا علشان عماله تبصلنا

_بقولك اي يا يحىى متجوزهالى..

يحيي بضحك:يبنى هوا انت لحقت

_خير البر عاجله..

_يبنى البت مش طايقاك انت نسيت اللي انت عملته من شويه !

لما نخلص المهمه دي بس وبعدين نشوف..

_ماشي هستنى ..

وصلوا الشركه ونور ودعت يحيي وتجاهلت يوسف تماما..

يوسف:عاجبك كدا والله لما اتجوزها هعرفها ازاي تعامل زوجها المستقبلي كدا..

نور دخلت للسكرتيره اللي عرفتها شغلها ..

نور:هوا جمال بيه مجاش النهارده ولا اي..

_لا جه بس اليوم اللي زوجته بتبقى معاه فيه ممنوع اي حد يدخل المكتب ..

_زوجته !!هوا متجوز..

_اه متجوز بس بنت زي القمر بس لابسه نقاب اصله بيغير عليها وعنده ولد زي القمر اسمه زين لسه صغير دا بقى هيبقى وريث المملكه دي كلها اصل بيني وبينك مفيش ولا واحده حلوة بتقدر تعدى من تحت أيده بس دي الوحيده اللي اتجوزها مش عارفه لى …

_اول مره اعرف انه متجوز وكمان مخلف غريبه يمكن علشان بيحبها

_حب!!لا مفيش الكلام دا للاسف هوا لحد دلوقتي فيه الطبع دا بس زي ما بتقولى يعنى عاوز يكون ليه وريث من بعده …

_اه يعنى جواز مصلحه..

_اها بالظبط كدا..

نور قامت ودخلت الحمام واتصلت بيحيي..

_في اي

نور:طلع متجوز ومخلف كمان

يحيي:بتهزري طب شوفتيها

_لا ممنوع اي حد يدخل وهي موجوده وكمان هى منتقبه..

_غريبه مرات واحد زي دا منتقبه!!

_مش عارفه أنا قولت اقولك هنعمل اي احنا لازم نتكلم معاها أو نشوفها..

_حاولى تشوفيها أو تتكلمى معاها وانا هشوف يوسف لو يعرف حاجه عن الموضوع دا ونجيب قراره..

_ماشي سلام..

رجعت تاني

_اسمها اي

_هى مين

_مرات المدير

_تقريبا اسمها اه ملك مدام ملك ..

_اه

يلا قومي وصلي الورق دا للحسابات وتعالى

_حاضر..

*أنا لازم اشوفها لازم ..

مشيت وكان في مكتب جنبهم بس مقفول قربت منه وفتحته ودخلت فتحت البلكونه وعدت منها براحه بس كان في حيطه بينها وبين اوضة المدير بصت على الارتفاع كان كبير جدا …

_انا لازم اعدي ..

طلعت على السور وحاولت تعدي ومع أن الخوف كان مسيطر عليها إلا أنها عرفت تعدى ..

اتسحبت ووقفت ورا الازاز بحرص أن حد يشوفها..

كانت قاعده معاه وبيتكلمو في الشغل ورافعه النقاب ..

نور حاولت تشوف وشها بس كان صعب ..

حاولت تقرب اكتر لحد ما انصدمت من اللي شافته..

_سارة!!!!

• يتبع الفصل التالي اضغط على ( رواية الحب الروحاني ) اسم الرواية