رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثامن 8
على / اووووف خلاص هى قفلت على كدا مفيش حرف واحد راضى يخش خلاص
عمر / خلاص تعال ننام و نصحى بدرى شويه نكمل
على / على البركه يلا …. الا صحيح اخبار أية ايه
عمر / ايه ؟؟؟
على / هههههههههههههههه ماشى تصبح على خير
عمر / شوفتها النهرده
على / ايووووووه كدا اعدل
عمر / انا مخنوق اوى يا على من الحوار ده
على / ليه
عمر / مش عارف قلبى بيوجعنى اوى حاسس ان اللى بعمله ده غلط
على / و ايه اللى جابرك تعمله
عمر / عشان ده الصح
على / يعنى هو صح و لا غلط
عمر / ما انا لو عارف يا على كنت ارتاحت الله
على / اسمع يا عمر انت مش صغير و كبير كفايه انك تعرف الصح من الغلط عشان كل حاجه هتحصل فى حياتك بعد كدا مفيش حد هيشيلها عنك مش هتيجى تقولى بكره انت السبب انت اللى شجعتنى او انت اللى منعتنى انا اخرى انصحك و القرار و التنفيذ عليك
عمر / عارف
على / باكد بس يلا ننام
عمر / يلا
…………………..
فى البيت فى الامارات
حسام / و اتكلمتوا فى ايه بقى
ندى / مفيش اتكلمنا عن الاكل و الطبيخ و طبعا حكيتلها على صينيه البطاطس الرهيبه بتاعتى امبارح
حسام / هههههههههههههههه انبسطى يعنى
ندى / على الاقل اتكلمت مع بشر انا كان فاضلى شويه و اكلم الحيطان يا حسام
حسام يمسك ايدها
حسام / يا بخت الحيطان يا نونو
ندى / بطل هزار بقى تصدق بابا و ماما وحشونى اوى مش قادره اتخيل انى ما كلمتهمش و لا مره لحد دلوقت …. حسام صحيح هو احنا ليه ما عندناش تليفون
حسام / ايه السؤال ده ما قولتلك المنطقه لسه الخدمات بتاعتها ما كملتش
ندى / ايوه و لا نت
حسام / هو فى نت من غير تليفون
ندى / باقه على الموبايل اى حاجه
حسام / انتى فارق معاكى النت اوى كدا ليه
ندى / مش فكره النت نفسها فكره انى اتكلم مع الناس احساس انى لوحدى بين اربع حيطان خانقنى منتهى الممل طول اليوم يا حسام
حسام / و انا قصرت فى ايه دا يادوب بروح الشغل و ببقى بتاعك و بعدين هو انا حابسك و لا بستخسر فيكى حاجه ما انا كل يوم بخرجك اعمل ايه اكتر من كدا طيب
ندى / اهدى يا حسام انا ما اقصدش
…………………….
حسام / انا بضايق لما بحس انك مش مبسوطه بحس بعجزى بتعب لما بكتشف ان كل اللى عملته ما كانش كفايا و انى مش عارف انا قصرت فى ايه
ندى / انا ما قولتش انك قصرت انت الله يعينك و صدقنى انا مقدره اوى انت بتتعب قد ايه عشانى صدقنى
حسام / امال ليه الكلام ده و انا لوحدى و اكلم الحيطان و النت و التليفون ليكى مين تكلميه هنا اصلا
ندى / يا سيدى بلاش اكلم حد افرض احتجت حاجه منك و انت بره اتصل بلاش افرض حصلى حاجه قررت فى يوم تتاخر على الاقل تطمنى عليك بدل ما اقعد قلقانه
حسام يمسك ايدها و يقرب و يبص فى عنيها
حسام / انتى بتقلقى عليا لما بتاخر
ندى / ليه يعنى مش اخويا
حسام يسيب ايدها
ندى / و بعدين انت عارف انى ما ليش غيرك هنا و انا بخاف ابقى لوحدى و خصوصا بالليل بترعب انت عارف
حسام / انا اسف هبقى اخد بالى بعد كدا عن اذنك انا رايح انام تصبحى على خير
ندى / و انت من اهله
………………………….
فى مصر
مصطفى / معقول كل ده لسه ما روحش
مها / يعنى يرضيك يسيب البنت لوحدها فى البيت لحد دلوقت
مصطفى / انا بقول اتصل بيه تانى احسن
مها / انا بقول كدا برضه
مصطفى يحاول يتصل ثوانى و ينفخ
مصطفى/ موبايله مقفول
مها / يا ساتر استر يارب
مصطفى / يا ستى يمكن فصل شحن
مها / يعنى افرض البت حصلها حاجه دلوقت تتصل بيه ازاى
مصطفى / اكيد روح يا مها و نسى يحطه مش معقول هيفضل بره البيت لحد دلوقت يعنى بقولك ايه انا مش قادر انا داخل انام تصبحى على خير
مصطفى يقوم و مها قاعده بتفرك
…………………………
فى اوضه ندى
ندى نايمه فى السرير و عماله تفكر و هى بتتقلب
ن/ ليه كدا بس يا ندى تخليه ينام زعلان بقى دا ذنبه بعد كل اللى عمله عشانك….. اعمل ايه بس يا ربى انا تعبت اوى و مش عارفه اعمل ايه…… يعنى مش حرام كل اللى حسام بيعمله عشانى ده و انا فى الاخر …..يعنى اعمل ايه ما هو عارف من الاول انى بحب على …..و دا اللى تاعبنى اكتر انه لسه مكمل واحد غيره على الاقل كان عاملنى عادى او اقل ……ياربى بصرنى انا تايهه مش عارفه …….تفتكرى يا ندى على بيحبك زى حسام كدا تفتكرى معاهم حق ….لا على بيحبنى زى حسام و يمكن اكتر و لو كان معاه اللى مع حسام كان عمل اكتر ………و هو فى ايه اكتر من كدا ممكن يتعمل اساسا انتى اللى مش بتديله فرصه و انتى عارفه ده كويس ………. ازاى اديله فرصه و انا ⁷ كل لحظه بتخيل نفسى مع على فى كل ثانيه ما بفكرش فى حاجه غير على بنام بس عشان يوم يعدى و ارجعله تانى ……معامله حسام الحلوه ليا مش هتخلينى احبه دى بس بتعذب ضميرى ناحيته لان قلبى خلاص ما عدش ملكى عشان اديه لحد ……. ليه كدا بس يا بابا حرام عليك
ندى تقوم من الاوضه و تروح اوضه حسام نايم تخبط بالراحه
ندى / حسام انت نايم
حسام يقوم يقعد
ندى/ ايه اللى مصحيك لحد دلوقت
حسام / انتى ايه اللى مصحيكى
ندى / مش عارفه حاولت انام ما اعرفتش
حسام يرفع الغطا من جنبه على السرير و يشاورلها جنبه تروح تقعد
حسام / نامى
ندى/ لا انا هنام فى اوضتى انا بس جاية عشان
حسام / عشان ايه
ندى / ما قدرتش انام و انت زعلان منى بجد
حسام / انا عمرى ما ازعل منك ابدا يا ندى
ندى / بجد يا حسام
حسام / و انتى عندك شك فى ده
ندى / انا مش هسهرك اكتر من كدا تصبح على خير هقوم انام بقى
حسام يبتسم و يمسك ايدها
حسام / خليكى هنا النهرده مش اول مره ننام فى سرير واحد او اوضه واحده يعنى
ندى / كنا مضطرين وربنا يسامحنا بقى لكن دلوقت ما ينفعش هو صحيح انت زى اخويا بس برضه يلا تصبح على خير
ندى تقوم و حسام ينفخ بغل
…………………………….
فى مصر بعد فتره
عمر فى الحمام و على بيلبس صوت رساله على يبص يلاقى موبايل عمر هو اللى منور
على / جتلك رساله
مفيش رد على يروح يمسك الموبايل يلاقى اسم أية يستغرب و يفتحها
على / وحشتنى عاوزه اشوفك
على يبدا يقلب فى الرسايل و يضحك عمر يدخل الاوضه و على يبصله و على وشه ابتسامه كبيره
على / أية بتقولك وحشتنى
عمر / انت بتقلب فى موبايلى
على / ضايقتك ؟؟؟
عمر يحاول ياخد الموبايل على يبعد ايده و هو مبتسم عمر يبان انه مضايق و يقف عدل على يديله الموبايل
على / اسف حقك عليا
على يطبطب على كتف اخوه و يطلع بره و عمر يبص فى الموبايل و هو مضايق
………………………..
فى الامارات
حسام / ندى انا خارج هتعوزى حاجه
ندى تطلع من جوه
ندى / هتتاخر
حسام / لا هاجى زى امبارح بقولك ايه اللبسى عاملك مفاجاه
ندى / مفاجاه ايه
حسام / لو قولتلك مش هتبقى مفاجاه يلا خدى بالك من نفسك و ما تعمليش غدى يلا يا قلبى سلام
حسام يبوس راس ندى و يمشى و هى تقفل الباب وراه بالترباس حسام يروح يركب العربيه و يطلع الموبايل و يتصل بحد
حسام / معاك حسام زغلول …. ايوه … امتى هيركب ……… بكره تمام و انا فى انتظاركوا ..مع السلامه …….. اما اشوف اخرتها معاكى يا ست ندى …….. حقيقى مش عارف انا جايب الصبر ده منين
…………………………
فى كافيه
عمر / هاه فهمتى
أية / اه انا مش عارفه من غيرك كنت عملت ايه
عمر يبتسم
أية / بجد انا الفتره الصغيره اللى فاتت فرقت معايا جدا كل الناس لاحظت قد ايه انا اتغيرت ماما و صحباتى حتى المدرسين بتوعى
عمر / اتغيرتى ازاى
أية / هههههههه بقيت مبسوطه و هاديه و بعرف اركز الاول كنت علاطول سرحانه اقل كلمه تخلينى اعيط انا بجد اسعد واحده فى الدنيا انا بصلى كل يوم ركعتين شكر انك رجعت لحياتى تانى يا عمر والله يا عمر والله الفتره اللى فاتت من غيرك ما كانتش بتعدى كل يوم كان قلبى بيوجعنى و …
عمر / خلاص خلاص بلاش نتكلم فى اللى فات انا اصلا بحاول انساه بالعافيه تمام
أية / خلاص خلاص احنا ولاد النهرده
عمر / يا خبر اتاخرنا يلا يادوب اوصلك الدرس عشان اروح الشركه
أية / ماشى
عمر يحاسب و يقوموا يتمشوا فى الشارع خطوتين و أية بالراحه تقرب ايدها من ايد عمر لحد ما تمسكها و هى مبسوطه و خجوله و باصه فى الارض هو يمسك ايدها من غير ما يبصلها و يمشوا سوا الناحيه التانيه على جوه العربيه بيصورهم و هو مبتسم
على / والله و عرفتى تربى يا ام أية اما نشوف رايك ايه فى الصور دى
الابتسامه اللى على وشه تروح و يفتكر
///////////////////////////
عمر / ايه الاسلوب ده ايه التمثيليه السخيفه دى
حسام / هى تمثيليه فعلا بس مش احنا اللى عاملينها البيه هو اللى عاملها مش كدا برده يا علوه
حسام يحط ايده على كتف على على يزقها حسام يبتسم و يطلع موبايله
مصطفى / ما كانش العشم يا انور ابدا
حسام يدى الصور لانور يبص عليها
مصطفى / دا ابن الاصول اللى انت ضامنه داخل البيت مالشباك بيروح يعلق البت فاكرها ايه يا ابن الكلب هاه فاكرها سايبه
/////////////////////////////////
على يبص للصور اللى على الموبايل و الحزن مالى وشه و عنيه مليانه دموع
على / مش هسمح ان الغلطه دى تتكرر تانى ابدا
على يحط الموبايل جنبه و يسوق العربيه و يطلع
………………………..
فى الشركه
غاده / فى ايه يا عمر انا تقريبا ما عدتش بشوفك و حتى تليفونك بقى علاطول مشغول
عمر / و انا قصرت فى حاجه يا غاده
غاده / لا الحقيقه ما قصرتش بس بصراحه انا لما رشحتك لبابا كنت فاكره ان ده هيخلينا مع بعض اكتر
عمر / ايه ؟؟؟
غاده / اقصد يعنى احنا كدا كدا كنا تقريبا بنقضى نص اليوم سوا فى الكليه و كدا و احنا اصدقاء اقصد يعنى انت فاهم فقولت يمكن يعنى هنفضل برضو سوا انت فاهم عاوزه اقول ايه و لا اسكت احسن
عمر / ههههههههههههههههه
غاده / انت بتضحك على ايه
عمر / قال يعنى حتى لو حاولتى تسكتى هتعرفى
غاده ترفع حاجبها
عمر / هههههههههههههههه خلاص خلاص بقولك ايه احنا كنا بنقضى وقت اطول مع بعض لان كان فى وقت اكتر فاضى دلوقت فى شغل حتى فى البيت ياما بدرس ملف او بحضر بريزنتاشن او بزاكر
غاده / طب تمام ايه رايك نزاكر سوا
عمر / مش هينفع لانى بزاكر متاخر و اكيد مش هتنزلى من البيت فى الوقت ده
غاده / قفلتها يعنى
عمر / انتى عاوزه ايه هاه عاوزه ايه ما تجيبى من الاخر يا بت
غاده / بت اما تبتك عاوزاك تعزمنى على الغدى
عمر / كل الليله دى عشان جعانه يا طفسه ما تقولى كدا من الصبح صحيح انت مش انت و انت جعان انجرى قدامى اما نشوف اخرتها معاكى
غاده / هههههههههههههههههههههههههههههههههههه
………………………….
فى كافيه تانى
مروان / انا بجد ما بقتش بحس بالوقت معاكى
نهاد / و لا انا
مروان / بجد بتنسينى كل الهموم اللى شايلها معاكى بنسى الدنيا
نهاد / امال نور فين
مروان / نور … نور قلبالى البيت مناحه كل يوم الوضع بيبقى اسوء و مهما بعمل ما بتحسش بيبقى هاين عليا انام على السلم و لا انيش ادخل البيت من التحقيق اللى هتفتحه
نهاد / للدرجادى
مروان / انا مقدر ظروفها بس والله اعمل ايه ما على يدك
نهاد تمسك ايده
مروان / الحمد لله انك جنبى
………………………………
فى الامارات
ندى لابسه تسمع صوت عربيه بره تبص من الشباك تلاقى حسام جه يفتح الباب و يشاورلها تاخد شنطتها و تنزله تركب و يسوق و يمشى
حسام / اتاخرت عليكى
ندى / لا ابدا ايه هى المفاجاه بقى بص انا مش على بعضى من ساعه ما قولتلى هاه ايه ورق الاقامه خلص و اخيرا اخيرا هيبقى معايا تليفون
حسام / انا اسف يا ندى هو ده اللى كان نفسك فيه
ندى / لا عادى يعنى انا بس فكرت فى كدا اكمننا يعنى اتكلمنا فى الموضوع ده قبل كدا
حسام / موضوع ايه
ندى / انا ما اتكلمتش مع ماما و بابا خالص يا حسام من يوم ما جيت هنا حاسه انى محبوسه لوحدى
حسام / انتى شايفه ان حياتك معايا سجن
ندى / انت ليه كل حاجه تفهمها غلط كدا بس انت فاهم انا اقصد انى لوحدى
حسام / قولتلك لما الورق يخلص هطلعلك رقم و بعدين موبايلى اهو اتفضلى
ندى تمسك الموبايل من على التابلوه
ندى / دا فاصل
حسام / قولى بقى انى انا اللى فصلته
ندى / انا ما قولتش كدا و بعدين انت متعصب اوى كدا ليه هو انا قولت ايه يعنى
حسام / معاكى حق انا اسف
ندى / انا اصلا ما كنتش هتكلم بس لبنى قالتلى
حسام / لبنى ؟؟
ندى / مرات صاحبك اللى روحنا عيد ميلاد بنتهم
حسام / اه مرات فخرى مالها قالتلك ايه
ندى / قالتلى اننا هنا فى الامارات مش فى مصر و الحاجت دى ما بتاخدش وقت
حسام / و انتى ايه رايك
ندى / ما اعرفش انت يعنى هتكدب عليا ليه
حسام / مش يمكن لمصلحتك
ندى / مش فاهمه
حسام / ما افتكرش فى داعى انى اكدب عليكى اكتر من كدا اصلا كدا كدا كنتى هتعرفى
ندى / طب فهمنى
حسام / انا فكرت و احنا فى مصر ايه هو المبرر الجامد اوى للطلاق و اللى مفيش حد هيلومك عليه او حتى هيلاقى حجه و فى نفس الوقت شكلى قدام اهلى ما يبقاش عيل
حسام يبص لندى يلاقيها بصاله باهتمام
ندى / ايه هو
حسام / انك ما بتكلميش اهلك بسبب التليفون و كدا فطبعا مش هتقدرى على بعدهم هما نفسهم هيقولوا مش هينفع كل ده و انتى هتقولى كدا فهخليكى تنزلى مصر و بعدين هقولك تيجى مش هترضى و ننفصل فى هدوء
ندى / طب ليه ما قولتليش من الاول ليه كدبت
حسام / ما كنتش عاوزك تكدبى على اهلك لما تنزلى انتى اصلا مش هتعرفى و بعدين اصلا واحده برقتك ازاى هتقدر تستحمل ما تتصلش باهلها و لا مره و التليفون فى ايدها اكيد هتضعفى و لو مره و لو اتصلتى مره هيتصلوا هما مليون لانهم بقى معاهم الرقم
ندى / معاك حق
حسام / ببقى فى منتهى السعاده لما بتفهمينى
ندى / حصل خير ايه بقى المفاجاه اللى انت محضرهالى
حسام / اولا بما ان بعد بكره اجازه فانا قررت اخد بكره كمان اجازه و نسافر انا و انتى دبى يومين نتفسح عشان ما تبقيش جيتى لحد هنا و ما زورتيهاش بجد هتنبسطى جدا
ندى / نسافر فين انا معايش هدوم
حسام / و دى تفوتنى امبارح و انتى نايمه جهزت شنطه صغيره ليا و ليكى فى شنطه العربيه فيها غيارين كدا و يا ستى لو نسيت حاجه نبقى نجيبها من هناك ايه رايك بقى مش استاهل بوسه على المفاجاه دى
ندى / بوسه واحده دا انت تستاهل مليون بوسه
حسام / طب يلا هاتى حبه من اللى عليكى
حسام يمد لندى خده تزقه بايدها
ندى / بطل بقى الله …..ينهار ابيض مش المفروض كنا قفلنا الشقه احسن حد يدخل و لا حاجه
حسام / نقفلها ليه فخرى جاى بكره مع العمال
ندى / عمال ايه
حسام / ايه ده هو انا نسيت اقولك هههههههههههههههههه ينهار ابيض طيرتيلى عقلى يابنت اللذينه
ندى / قول بقى
حسام / ياستى انتى لما قولتى حد يدخل عليكى و انا مش موجود و مفيش تليفون بصراحه قلقت فكلمت شركه بتعمل ابواب حديد هيجوا يركبوا ابوب و شبابيك حديد امان اكتر
ندى / هيحطوا حديد على الشبابيك كمان يا حسام
حسام / يا حبيبتى ما انا ما اقدرش اجازف انى اسيبك لوحدك اعمل ايه بس
ندى / طب هتركبوا فوق كمان
حسام / اه انتى عارفه ان سهل اوى اى حد ينط على الدور التانى
ندى / دى هتبقى سجن رسمى يعنى حتى مش هقدر ابص على الجنينه و لا اطلع فيها
حسام / لا طبعا ازاى انا نقيت تصميم تشوفى كل حاجه كان الحديد مش موجود هو بس عشان ما حدش يدخل و يا ستى ما تقلقيش فتره صغيره لحد ما اجيب بواب يقف على باب الفيلا و ابقى اقعدى فى الجنينه زى ما انتى عاوزه تمام
ندى / و انا اقدر اقول ايه
حسام / لا كدا ازعل انا واخدك ابسطك اقوم ازعلك
ندى / لا ابدا انا مبسوطه طبعا
حسام / يارب دايما يا قلبى
……………………………..
فى شقه ندى
مها / سمعت اخر الاخبار
مصطفى / ايه ندى اتصلت
مها / ابدا و لا حس و لا خبر حتى امانى كلمتها اسالها قالتلى انها بتكلم حسام و بيطمنها بس ندى ما كلمتهمش و لا مره و حتى هى زعلانه اوى من الموضوع ده
مصطفى / بجد الموضوع ده مضايقنى جدا
مها / انسى انسى عرفت ان الحج انور باع كل ما يملك بيع و شرا لعلى
مصطفى / على مين … الواد بتاع الشاورما
مها / اه بيكيدنا رفضتوه لانه فقير اهو بقى غنى اهو فاكر ان بنتنا مش مبسوطه مع جوزها او اننا يعنى جبرناها على الجوازه دى
مصطفى ساكت
مها / انت عارف مين اللى قالى الوليه ام احلام اللى فى التالت جوزها قابل انور و ساله ما بيجيش ليه حكاله و خد الكبيره قال ايه سى على كل اسبوع يروح يبص عليهم و ياخد كل طلباتهم و كل اسبوع يتحايل على الحج انه يرجعله حاجته مالك ساكت ليه اضايقت
مصطفى / و اضايق ليه يخصنى فى ايه هو
مها / يعنى بسال
مصطفى / انا ما رفضتش على عشان الفلوس و لا عشان عيلته و لا شهادته انا رفضته عشان قرطسنى عشان ضحك عليا الناس مش متخيلة شكلى و انا بجيب ميه و حسام بيورينى الصور صور بنتى الوحيده اللى بتباها باخلاقها و بحط رجلى فى وش الطخين و هى حاطه ايدها فى ايد الواد ده
مها / و احنا عمرنا ما عملناها يا مصطفى
مصطفى يبصلها
مها / ايه نسيت ايام زمان لما كنا فى سنهم
مصطفى / هو مش زيى
مها / مهو دخل البيت من بابه و اتقدم و وافق على كل شروطك انا مش ندى هتكدب عليا و تقولى انه ما جاش
مصطفى / شكل فلوسه حلته فى عينك يكون فى علمك اللى بيجى بالساهل بيروح بالساهل و بكره تشوفى
مها / و مين قالك ان فارق معايا اشوف انا كل اللى يهمنى سعاده بنتى و بس
مصطفى / انا داخل انام يا مها
……………………..
فى الفندق فى دبى
حسام / عجبك
ندى / عجبنى دانا هيغمى عليا ايه البلد دى ايه الشوارع دى ايه الفندق ده
حسام / مبسوط انك مبسوطه
ندى / مبسوطه بس !!انا اتفسحت فسح تكفينى عشرين سنه قدام …. بس بينى و بينك لحسن يحبسونى لما ارجع مصر و انا بتخنق من الحبسه
حسام / معاش و لا كان
ندى / بتبصلى كدا ليه
حسام / اصلك حلوه اوى النهرده
ندى / ايه و انا كنت وحشه قبل كدا
حسام / لا بس انتى النهرده حلوه بزياده الضحكه بتليق على وشك اوى
حسام يحط ايده على خد ندى
حسام / بتخليى عنيكى تلمع
حسام يحاول يبوس ندى تسحب نفسها بسرعه
ندى / انا هروح الحمام عن اذنك
ندى تجرى و تقفل الباب
حسام / ابو كدا بقى انا قرفت
حسام يروح يخبط على الحمام ندى تفتح
حسام / انا اسف
ندى / ما حصلش حاجه عن اذنك هروح انام
حسام / ايه ده مش هتخرجى
ندى / لا معلش مش لازم النهرده انا تعبانه من السفر عاوزه انام
حسام / براحتك انا هنزل شويه اجيبلك اى حاجه و انا جاى
ندى / شكرا
حسام يمشى و ندى واقفه تنفخ
ندى / لا كدا مش هينفع لازم اشوف حل بقى
………………………………
فى مصر تانى يوم الصبح
عمر نايم و على بيكوى تليفون عمر يرن فى الشاحن جنب على يبص يلاقى أية عمر يصحى يلاقى التليفون فى ايد على يبصله على يحدفهوله
على / أية
عمر يكنسل
عمر / عاوزه ايه دى على الصبح
على / ههههههههههههههههههههههه هتلبس ايه اكويهولك معايا
عمر / انا داخل الحمام
عمر يقوم و يدخل الحمام و الموبايل فى ايده
على / هههههههههههههههههههههههههه ربنا يهدى
…………………………..
فى شغل مروان
نهاد / صباح الخير
مروان / صباح النور جايه بدرى يعنى مش عوايدك
نهاد / اصلى مبسوطه جدا تقريبا ما نمتش من الفرحه
مروان / خير فى ايه فرحينى معاكى
نهاد / اختى ولدت جابت ولد زى القمر
مروان / الف مبروك عقبالك
نهاد / يارب انت اصلك ما تعرفش انا بحب الاطفال دول قد ايه احلى حاجه فى الدنيا امبارح لو كنت شوفت ضحكته ياربى اكل قلبى بجد مفيش احلى من كدا و لا لما مسك صباعى بايده كلها و لا و هو بيتمطع ياربى على العسل يارب ارزق كل مشتاق يارب
مروان / امين
نهاد / اقولك بقى حاجه احلى
مروان / احلى من كدا
نهاد / انا قولتلهم يسموه مروان و عجبهم الاسم جدا
مروان / ههههههههههههههههههههه
نهاد / اختى كانت عاوزه تسمى ادم بس جوزها عنده زميل فى الشغل اسمه ادم و اخلاقه بايظه فما رضاش قولتلهم لو بالاخلاق بقى يبقى اكيد مروان
مروان / تسلمى كلك زوق
نهاد / بالمناسبه دى بقى انا عزماك على الفطار اوعى تقول فطرت
مروان / الصراحه لا
نهاد / مالك يا مروان شكلك مضايق انا ما اخدتش بالى من فرحتى فيك ايه اوعى تكون اتخانقت مع نور تانى
مروان / العادى بتاعها الفتره دى
نهاد / طب ما تكلم اهلها دخلوا حد كبير بينكوا
مروان / امها علاطول معاها على الخط و ابوها جنب امها يعنى انتى فاهمه
نهاد / هو منهم بصراحه النوعيه دى من الرجاله ما بتملاش عينى لو الراجل مش مالى مركزه فى بيته يبقى لزمته ايه بقى الست ست و الراجل راجل هى الدنيا خربت من شويه
مروان / عاوزه تفهمينى انك لما تتجوزى هتسمعى الكلام و هتقولى حاضر و طيب و نعم
نهاد / على فكره انا لو ما عملتش كدا ماما تدبحنى دى قاعده اساسى عندنا
مروان / ربنا يهدى
نهاد / المهم بقولك ايه فكها كدا و انا هبعت عم عبده يجيبلنا فطار النهرده عيد
مروان / و انتى فى مناسبه زى دى هتضحكى عليا بسندوتشين فول و طعميه لا يا ماما انا عاوز حاجه جامده
نهاد / لا تستنى لاول الشهر بقى لحسن انا بعزقت تلتربع المرتب على طقم جديد اللبسه فى سبوع مروان بس ايه تحفه
مروان / خلاص يا ستى العزومه عليا على الغدى
نهاد / و انا ما هصدق و هشبط و ادبسك بس دلوقت لو ما فطرتش العواقب هتبقى وخيمه انا بقولك اهو
مروان / هههههههههههههههههه لا لا نفطر طبعا
……………………………
فى الفندق فى دبى
ندى نايمه حسام يقعد جنبها و يلعب فى شعرها تصحى مفزوعه
حسام / ايه دا انا انا ايه كل ده نوم
ندى / انت جيت امتى احنا بقينا الصبح
حسام / انا هنا من بدرى بس جيت لقيتك نايمه نمت بره عشان ما اصحكيش قومى يلا الفطار
ندى / حسام انا عاوزه اكلم ماما
حسام / طبعا اتفضلى التليفون اهو
ندى / شكرا
ندى تتصل مها ترد علاطول و حسام قاعد جنبها
ندى / الو
مها /الو ازيك يا ندى يا حبى اخبارك ايه وحشتينى موت عاملين ايه فدبى
ندى / حلوه اوى يا ماما
مها / اهم حاجه تنبسطوا عامله ايه مع جوزك
ندى تبص لحسام
ندى / كويسين الحمد لله اخبارك و اخبار بابا
مها / بيسال عليكى يا قلبى
حسام يشاورلها
ندى / حسام عاوز يسلم عليكى
حسام ياخد التليفون
حسام / ازيك يا ماما اخبارك
مها / عامل ايه يابنى و ندى عامله ايه معاك خد بالك منها يا ابنى
حسام / فى عنيا يا امى هو انا عندى اغلى منها طمنينى عليكوا
مها / ابوك شغال فى الشقه بايده و سنانه
حسام يبص لندى
حسام / شغالين فى الشقه طب انجزوها بقى عشان نرجع
مها / بتتكلم جد يا حسام يابنى
حسام / والله يا ماما مش هخبى عليكى ندى مش مرتاحه فى الغربه و حضرتك عارفه انا طول الوقت فى الشغل و هى لوحدها
مها / يا حبيبتى يا بنتى
حسام / فانا بفكر انزل بيها بقى
مها / و ماله يابنى تنوروا دا لو مشالتكوش الارض نشيلكوا فعنينا
حسام / هستاذنك بقى يا ماما عشان خارجين سلميلى على عموا كتير اوى
مها / فى سلامه الله يا حبيبى فى سلامه الله
حسام يقفل
ندى / بجد هنرجع مصر
حسام / لا طبعا ارجع مصر اعمل ايه
ندى / امال انت ليه قولت كدا لماما
حسام / يا حبيبتى افهمى انا مش هقدر ارجع مصر كل الفلوس اللى كنت محوشها من يوم ما سافرت اتصرفت على الشقه و الفرح و الشبكه و السفر و الفسح و التوضيبات يعنى هنزل مصر مش هبدا من الصفر لا دانا هيبقى قدامى موال عشان اوصل للصفر اصلا
ندى / قولتلك وفر فى المصاريف من الاول يعنى ايه لزمتها فيله و فندق و سفر ليه كل ده
حسام / اول مره جيت هنا قولت لازم ندى تيجى تشوف الجمال ده و كل مره كنت بروح حته و تعجبنى كنت بقول لازم اجيب ندى … ندى هتنبسط هنا ندى هيعجبها المكان ده ندى ندى ندى
ندى تبصله و ساكته حسام يقعد على السرير و يديها ضهره
حسام / فى كل مره كنت بقرر اصارحك بحبى كنت برجع فى اخر لحظه و اقول لا ما يصحش تدخل البيت من الشباك استرجل الحلال احلى يوم ما تقولها بحبك قولها قدام الناس كلها خليها فى قلبك عشان ربنا يباركلك فيها
ندى / حسام
حسام / انا مش زعلان على الاقل عشتلى يومين حققت حلمى اتجوزتك و جبتك هنا و فرجتك على كل الحاجات الحلوه اللى كان نفسي فيها انا راضى
ندى / حسام لو سمحت
حسام / اصلا مين قالك انى هقدر انزل مصر تانى عشان امى و ابويا ابقى ابعتلهم زياره يتفسحوا انا بس مش عارف انا ناقصنى ايه هو زياده عنى ايه
حسام يبص على ندى يلاقيها بتعيط
حسام / انتى بتعيطى ليه هو انا بقولك كدا عشان تعيطى
ندى / اسكت بقى اسكت
حسام / ما انا بقالى سنين ساكت استفدت ايه بقالى سنين كاتم حبك فى قلبى و ساكت ايه اللى حصل حبتينى بصتيلى حتى ادتينى فرصه قوليلى انا ناقصنى ايه
ندى / مش ناقصك مش بايدى
حسام / و لا بايدى يا ندى حبك مش بايدى يا ندى قلبى اللى عمره ما شاف غيرك و لا هيشوف مش بايدى بس عادى مش انتى هتبقى مبسوطه خلاص انا مش مهم
ندى / انت بتعمل فيا كدا ليه
حسام / انا ؟؟؟ عملت فيكى ايه؟؟؟ فضفضت معاكى بكلمتين ؟؟؟؟اعترفتلك بحبى ؟؟؟؟ اجرمت ؟؟ لا ما اجرمتش عارفه ليه لانى بحبك و هحبك يا ندى
ندى / و انا كمان بحبك يا حسام بس ….
حسام / ليه بس ليه لازم يكون فى بس
ندى/ عشان مش بايدى مش بايدى
ندى تعيط اوى حسام ياخدها فى حضنه و يطبطب عليها
ندى / انا اسفه انا اسفه اوى
حسام / انا اللى اسف ما كانش المفروض اقولك كدا ما كانش المفروض اضغط عليكى كدا بس انا اسف انا اسف
حسام يمسح دموعه و يقوم يقف و يمسك ايد ندى
حسام / بصى انسى انسى اى لحظه هبل عدت بنا احنا جايين نتفسح و ننبسط و مش لازم يكون فى اى لحظه نكد بنا يلا قومى نخرج
ندى تبصله يقعد على ركبه و يبص فى عنيها
حسام / اى كان اللى هيحصل بعد كدا مش هياثر على اللى بنا انا هفضل ابن عمك و ضهرك و سندك مش لازم تبقى مراتى عشان افضل جنبك عمرى ما هخسرك و لا هسمحلك تخسرينى قومى اللبسى و هاخدك اوريكى حاجات تحكى عنها لما ترجعى مصر بالسنين
ندى / حسام
حسام / ندى خلاص كانت لحظه ضعف و مش لازم تضغطى عليا اكتر احنا جايين ننبسط فا ارجوكى لو ليا ذره معزه عندك حسسينى ان تعبى عشان ابسطك ما ضاعش هدر حسسينى انى ما بوظتش كل اللى عملته فى لحظه ضعف ارجوكى انا ندمان بما فيه الكفايا على الكلام اللى قلته ارجوكى
ندى تهز راسها يبتسم
حسام / قدامك عشر دقايق تكونى جاهزه يلا
…………………………
فى شارع ندى
على قاعد بيراجع الحسابات يرفع راسه و يتمطع يبص الناحيه التانيه يشوف مها شايله اكيس كتير و قبل البيت بحاجه بسيطه كيس فاكهه يتفدغ و تتشحطر الحاجه فى الارض يبص ثانيه و هى بتلمها و يحط القلم و يقوم يعدى الشارع و يلم معاها و هى تبصله باستغراب و يشيل الحاجه منها و يطلعها فوق و يحطها على باب الشقه و ينزل
مها / عملت كدا ليه
على / عملت ايه
مها / ساعدتنى
على / ما ساعدتكيش عن اذنك
على ينزل و هو خارج من العماره يقابل مصطفى و هو داخل يبصوا لبعض و على يمشى مصطفى يطلع يجرى يلاقى مها بتدخل الاكياس الشقه
مصطفى / عملك حاجه ضايقك والله ما هسكتله
مها تمسك ايده
مها / ساعدنى شال منى الحاجه و طلعها
مصطفى / ساعدك ؟؟؟ ازاى و ليه
مها / ما اعرفش انسى انسى ايه اللى رجعك من الشغل بدرى اوى كدا
مصطفى / حسيت بتعب عملت اذن و مشيت
مها / تعب ؟؟ مالك
مصطفى / مش عارف هنام شويه و هبقى كويس
مها / ارتاح يا خويا و لما هخلص الغدى هصحيك
……………………….
فى مطعم
مروان و نهاد قاعدين بيضحكوا
مروان / يخرب عقلك
نهاد / اعمل ايه يعنى ما هو اللى استفزنى
مروان / و بعدين
نهاد / مفيش المدرسات اتلموا و حاشونى من فوقيه
مروان / و كان سليم
نهاد / يعنى لسه فيه الروح كدا
مروان / هههههههههههههههههههههه انتى مشكله
نهاد / خاف على نفسك بقى ……… مروان !!!
نهاد تبص ورا مروان مروان يلف براسه يبص يلاقى نور وواحده صحبتها شايلين شنط و بيبصوا عليهم مروان يقوم يروحلها تسيب المكان و تجرى يجرى وراها و يمسكها
نور / لو سمحت لينا بيت مش ناقصه فضايح فى الشارع
مروان / تمام ممكن تركبى العربيه هشرحلك
نور تبص ورا مروان تلاقى نهاد طالعه من المحل تبص عليها
نور / حلوه ربنا يوفقك … تاكس
مروان / نور استنى
نور تركب تاكس و تمشى و هى بتعيط نهاد تروحله
نهاد / روح وراها فهمها هى فاهمه غلط انا ممكن اجى اتكلم معاها بس انا متاكده انها محتاجاك انت اكتر
مروان / انا اسف اوى اكيد ما كنتش اقصد اعرضك لموقف زى ده
نهاد / روحلها روحلها و ابقى طمنى
مروان يهز راسه و يمشى
…………………
فى كافيه تانى
عمر / و اخرتها يا أية
أية / والله بحاول يعنى اعمل ايه بتوحشنى
عمر / اهو على مسك الموبايل
أية / طب انا اذيتك ليك حق تزعل منى لكن هو ليه
عمر / تفتكرى ليه
أية / عشان ماما طب انا ذنبى ايه طيب
……………………..
عمر / خلاص يا أية اصلا انتى ثانويه عامه و لازم تركزى اكتر فى مزاكرتك و كمان تاخدى بالك افرضى امك خدت بالها تفتكرى هتسكت و لا هتيجى الكليه و تعملى فضيحه تانيه
أية / هى الدنيا ليه مكلكعه اوى كدا
عمر / انتى لسه شوفتى كلكعه اكبرى بس و انتى تشوفى
أية / ما يهمنيش طول ما انت جنبى ما يهمنيش
عمر / اشربى العصير يلا عشان ما تتاخريش على الدرس
أية / مش هروح خلينا سوا
عمر / أية اتعدلى بدل اقسم بالله
أية / خلاص خلاص انا اسفه هروح و هزاكر و هركز و هعمل كل اللى يرضيك خلاص بقى بلاش البوز ده عشان خاطرى
عمر / خلاص حصل خير
……………………….
فى شقه امانى
مروان / انا عاوز اتكلم مع مراتى
امانى / و هى مش عاوزه تكلمك يا مروان
مروان / يعنى ايه مش عاوزه تكلمنى
امانى / اما صحيح بجاحه هو انت كمان مش عارف عملت ايه
مروان / لا الحقيقه مش عارف نزلت فى استراحه الشغل اتغدى فى المطعم اللى لازق فى الشركه اجرمت
نور تفتح باب الاوضه و تطلعله
نور / كنت بتتغدى لوحدك و لا مع الست الهانم
مروان / دى نهاد زميلتى فى الشركه
نور /فى كل مره كنت بقولك هدومك رحتها برفيوم حريمى فى كل مره اقولك انت متغير فكى ل مره كنت بتكدب عليا انا شوفتك بعينى يا مروان
مروان / شوفتى ايه يا نور اتنين زمايل شغل بيتغدوا سوا اصل الموضوع ان اختها ولدت فكنا بنحتفل يعنى
نور / مبروك عقبالكوا
مروان / نور
نور / لو سمحت يا مروان امشى
مروان / نور حبيبتى
نور / ما تقوليش حبيبتى انا مش عاوزه اسمعلك مش قادره اشوفك اصلا
نور تيجى تمشى مروان يمسك ايدها
مروان / انا و نهاد زمايل شغل مش اكتر
نور / تمام هو انت لو كنت شوفتنى فى نفس الوضع كنت هتقول زمايل شغل مش اكتر و بعدين هى دى كنت قاعده اتنين زمايل دا انتوا كنتوا واخدين حقن زغزغه
مروان / نور
نور / بلا نور بلا زفت
امانى / بص اخر الكلام امشى كلامنا ما عدش معاك ليك كبير يترد عليه انا بنتى مش قليله عشان يتعمل فيها كدا و ان كانت تقلت عليك نشيلها فى عنينا
مروان / اللهم ما طولك يا روح يا حماتى لو سمحتى
امانى/ انا مش حماتك و لا اعرفك انت خلاص بقيت بالنسبالى شفاف هوا
مروان / نور
نور مدياله ضهرها و ما بتردش
مروان / نور لو سمحتى
نور / شرفت يا مروان مع السلامه
مروان ينفخ و يمشى امانى ترزع الباب وراه و نور تعيط
امانى / انتى بتعيطي على ايه والله لتصل بابوكى يشوفله حل معاه مش ده اللى كان بيدافع عنه و يقول الراجل مضغوط الراجل تعبان
نور تدخل الاوضه و تقفل على نفسها الباب و تعيط و ثوانى و تمسك الموبايل و تتصل بحسام يرد و هو سايق
نور / ايوه يا حسام عامل ايه
حسام / مال صوتك
نور / انا كويسه انت عامل ايه و اخبار ندى ايه
حسام / احنا كويسين طمنينى يا بنتى مالك حد مزعلك
نور تعيط
حسام / فى ايه يا بت انطقى اتخانقتى مع جوزك بسبب الخلفه دى
نور / بيخونى يا حسام
حسام / ايه
نور / شوفته قاعد معاها و مسخسخين من الضحك يا حسام
حسام / اقفلى اقفلى انا هتصرف هو فاكرك ايه
حسام يقفل السكه و يتصل بمروان
مروان / ازيك يا حسام
حسام / انت ايه اللى هببته ده
مروان / ممكن تسمعنى
حسام / ما اسمعش انت فاكرها هفيه انا دمعه من عين اختى تطير فيها رقاب انت فاكرها ما لهاش ضهر والله انزلك بكره
مروان / يابنى افهم
حسام / و مين الكلبه اللى كنت معاها دى ان شاء الله
مروان / هو انت متصل تسمع و لا تتخانق
حسام / اتخانق و احمد ربنا انى مش فى مصر ما كنتش اتصلت كنت جيتلك
مروان / يا حسام هى فهمت غلط
حسام / انا مش عاوز افهم اصلا انت تاخد بعضك و تروح تبوس راسها و تصالحها و الا قسما عظما ما نخليها على زمتك يوم واحد
مروان / انا روحتلها فعلا هى مش راضيه تسمعنى
حسام / حل مشاكلك يا مروان خلينا حبايب احسن ماشى
مروان / ماشى يا حسام ماشى
حسام يقفل السكه و يحدف الموبايل على التابلوه
ندى / فى ايه
حسام / سى زفت نسى نفسه
ندى / هو مروان كان مع مين
حسام / ما اعرفش تلاقيها بت شمال
ندى / و نور عامله ايه
حسام / بتعيط … نكد عليا اللهى ينكد عليه هو انا ناقصه ابن الجزمه ده
ندى / اهدى كلو بيتحل
حسام / لا مش كلو بيتحل يا ندى انا ما حدش ينزل دمعه من عين اختى و تعدى كدا بالساهل
ندى / يمكن فى سوء تفاهم يمكن هى فهمت غلط
حسام / يدعى ربنا تعدى على خير و الا اقسم بالله ما هرحمه
ندى / طب اهدى انت بس
ندى تمسك ايد حسام يبص على ايده و يبصلها
ندى / اهدى
حسام يبتسم و يكمل سواقه
…………………………
فى بيت عمر بالليل
على / اخبار أية ايه
عمر / عادى زى كل مره
على / انت ناوى تطول فى الحكايه دى لحد امتى
عمر يبصله
على / لو طولت هتبوخ على فكره قطمه احسن من نحته
عمر ساكت
على / لو امها عرفت انت عارف هيحصل ايه انت عارف كويس هتخسر ايه
عمر / انا تعبت يا على تعبت
على/ اخلص عشان نرتاح كلنا
على يسيب الاوضه و يمشى
……………………..
فى الفندق عند ندى
ندى / كان يوم طويل و مرهق
حسام / ما تقوليش انك ما انبسطتيش
ندى / لا خالص انبسطت جدا
حسام / بالله عليكي هنا بقى و لا مصر … فى فى مصر شوارع نضيفه كدا
ندى / كل مكان و له مميزاته بس مصر فيها حاجات اكيد مش موجوده هنا
حسام / يا شيخه
ندى / اكيد فيها عيلتنا يا حسام اهلنا و حبايبنا و زكرياتنا ماما و عمتوا و نور …. نور يا ترى هى عامله ايه دلوقت
حسام / زمانه صالحها
ندى / بس مش هنكر عجبتنى لما زعقت لمروان ما يصحش ابدا يحط نفسه فى موقف زى ده
حسام / بينى و بينك
ندى / ايه ؟؟
حسام / نور اللى غلطانه
ندى / بجد ؟؟ امال ليه عملت كدا
حسام/ هى شافته يعنى معاها فى اوضه نوم مكبره الموضوع
ندى / يا سلام
حسام / الواحده لازم تكون واثقه فى جوزها اكتر من كدا عارفه لنفرض ان فى حاجه مثلا هى كدا عملت ايه بقى ادتهولها
ندى / يعنى هو يخون و هى تلم يعنى
حسام / لا طبعا انا اللى يجرح اختى اكله انا بس بقول كان ممكن تتصرف بذكاء اكتر شويه
ندى / يا بنى انت بتهزر الست لو شافت حبيبها مع واحده تانيه ما بيبقاش عندها مخ اصلا دا الحمد لله انها ما قتلتوش و قتلتها ساعتها
حسام / يا واد يا خطر انت
ندى / بتكلم جد و على فكره انت متناقض منين بتقول انها غلطانه و منين زعقت فيه اوى كدا
حسام / زعقت فيه عشان ما يتمرعش عليها عشان يعرف ان ليها ضهر و يتلم و يراضيها و لولا حالتها النفسيه كنت لومتها بس هى بكره تهدى و تعرف انها كانت غلطانه
ندى / مش مقتنعه بس مش قادره اجادل انا داخله انام
حسام / ايه مش هتتعشى
ندى/ عشا ايه دا مفيش مكان فى بطنى لبق ميه
حسام / بس انا طلبت عشا اقعدى معايا حتى افتحى نفسى
ندى / امرى لله حاضر
………………………..
فى شقه نور
نور / انت بتقول ايه يا بابا
محمد / بصى يا نور انا ما قولتش اكتر من انك تسمعيله ما تهديش بيتك فى لحظه شيطان
نور / يا بابا بقولك كانوا قاعدين مسخسخين من الضحك
محمد / الضحك مش جريمه يا بنتى يمكن بيجاملها يمكن بيشتغلوا يمكن اى حاجه
نور / يا بابا….
محمد / نور دى حياتك و انتى حره فيها انا بس بقول تسمعى تحاربى عشان بيتك تحاولى تفهمى انا ما بقولش تتنازلى عن حقك لا انا عن نفسي هبهدله و امسح بيه الارض و هتشوفى بس على الاقل لما يجى بكره تسمعيله تمام
نور تهز راسها و تبص الناحيه التانيه
…………………………
تانى يوم
أية مروحه من المدرسه تتصل بالتليفون محدش بيرد تنفخ و تحط الموبايل فى شنطتها و تمشى
……………………….
فى الفندق عند ندى
ندى بتتكلم فى التليفون
ندى / ازيك يا ماما
مها / الحمد لله يا بنتى عامله ايه
ندى / ماما انا عاوزه اقولك حاجه
مها / ما تقوليش انك حامل
ندى / حامل ايه بس يا ماما انا …
حسام يفتح الباب و يدخل شايل صينيه فطار
حسام / بتكلمى مين
ندى / ماما
حسام / سلميلى عليها كتير
ندى / حسام بيسلم عليكى
مها / سلميلى عليه كتير … المهم كنا بنتكلم فى ايه
ندى / لا مفيش عادى عادى انا بس كنت بطمن عليكوا
مها / كويسين الحمد لله و بقينا احسن من ساعه ما بقينا بنسمع صوتك
ندى / معلش انتى عارفه ان بيتى ما فيهوش تليفون و بستغل ان الفندق فيه و بكلمك
مها / مش مشكله يا حبى
ندى / ماما انا لازم اقفل هحاول اكلمك فى اقرب وقت
مها / مع السلامه يا حبى مع السلامه
ندى تقفل السكه و تنفخ
حسام / للدرجادى ايه خير
ندى / مفيش
حسام / عليا برده فى ايه مش احنا صحاب
ندى / مفيش يا حسام بجد
حسام / بجد ماشى على العموم انا كنت فاكر انك بتثقى فيا و بتتكلمى معايا فى كل حاجه زى ما بعمل معاكى فى ايه يا بت ليكى حد غيرى هنا تتكلمى معاه
ندى / يا حسام اصل الموضوع يعنى …
حسام / خلاص خلاص انا هطلع بره الاوضه و انتى اتصلى بمامتك و كلميها و اسف انى دخلت و بعد كدا هبقى اخبط قبل ما ادخل عن اذنك
حسام يجي يقوم ندى تمسك ايده يقعد تانى
ندى / حتى ماما مش هينفع اكلمها فى حاجه زى دى
حسام / زى دى ازاى يعنى
ندى / انا بتجيلى كوابيس
حسام / كوابيس ازاى يعنى
ندى / كوابيس وحشه اوى يا حسام
حسام / ازاى انتى بتصلى قبل ما تنامى كل يوم و بتسيبى القران شغال جنبك
ندى / ايوه انا بقيت بعمل كدا بس برده الكوابيس ما بتروحش فى الاول كنت بقول يمكن متقله فى العشا يمكن يمكن يمكن بس مش راضيه تروح
حسام / مش عارف اقولك ايه بس الكوابيس ممكن تكون بتيجى لانك كنتى تحت ضغط شديد اوى الفتره اللى فاتت
ندى / قولت كدا خصوصا انها بدات من بعد جوازنا
حسام / طيب وضحت انتى حاطه نفسك تحت ضغط شديد اوى بس اللى يضايق ان كل اللى بعمله عشان اشيل الضغط ده من عليكى مش جايب نتيجه انا بقول نروح لدكتور نفسى
حسام يقوم و يقعد تانى فى ساعتها و يبص لندي و يسكت
ندى / ايه
حسام / هنقوله ايه احنا ما ينفعش نحكى الحقيقه لاى حد كدا احنا ممكن نتحبس
ندى / نتحبس
حسام / طبعا انتى فكراها لعبه دا تزوير فى اوراق رسميه و احنا مش فى مصر هنا العقوبات شديده خصوصا على اللى زينا
ندى / طب ما نرجع مصر
حسام / قولتلك حاضر لما يجى الوقت المناسب هرجعك لكن دلوقت صعب و بعدين ايه هو يعنى الكابوس المرعب اللى بيجى كل يوم ده انتى حتى ما قمتيش مفزوعه و لو مره واحده انا باخد بالى كويس اوى
ندى تبصله و تبص فى الارض
حسام / ندى اتفقنا مش هنخبى على بعض حاجه ما حدش هنا غيرى يساعدك
ندى تبصله و تبص فى الارض تانى حسام يرفع راسها لعنيه و يبصلها
ندى / بحس انى متكتفه و مش قادره اتحرك
حسام / اممم طبيعى كلنا بيحصلنا كدا ساعات
ندى / و فى حد … فى حد بي… بي….
حسام / بي.. ايه
ندى / بيغتصبنى
حسام يرفع حاجبه و يتعدل فى قعدته
ندى / ببقى حاسه بس مش قادره اعمل اي حاجه كانى مشلوله بصرخ بس من غير صوت انا نفسى مش سامعه صوتى
حسام / و المفروض كنتى هتقولى ده لمامتك ازاى هتقوليلها ايه اصلا ينهار اسود
ندى / ايه
حسام / هو ايه اللى ايه يا ندى ايه اللى ايه الو ماما انا بحلم ان فى حد بيغتصبنى و انا بنت مع انى متجوزه من حوالى شهرين مش كدا
ندى / انا ما قولتلهاش حاجه و ما كنتش هقولها كدا
حسام / ولا تقوليها ضربوا الاعور على عينه ما عادتش تفرق
حسام يقوم و يخرج و ندى تقوم وراه
ندى / انت ليه انانى اوى كدا
حسام / انانى ؟؟؟ انا ؟؟؟ بعد كل ده
ندى / انا بتعذب هنا بموت انت مش قادر تفهم
حسام / فاهم و قولتلك ان ده كلو بسبب الكوابيس بصى انا هحاول اتكلم مع حد مختص و اشوف هيقول ايه
ندى / هتقوله ايه
حسام / ما تشغليش بالك
ندى / ازاى يعنى
حسام / ندى ندى … اهدى شويه عصبيتك و توترك ده هو سبب كوابيسك اقولك انا مش متخصص بس سهل اوى اقولك ان اللى بتحسى بيه تفسير منطقى من عقلك الباطن خصوصا بعد اللى عموا عمله معاكى يوم كتب الكتاب .. و تفسير منطقى اكتر ممكن عشان انتى مش قادره تقتنعى ان انا و انتى متجوزين و مش واثقه فيا
ندى / لحظه لحظه اولا انا و انت فعلا مش متجوزين ثانيا انا واثقه فيك جدا
حسام / بجد
ندى / طبعا
حسام يبتسم
ندى / حسام انت مش عارف انت بالنسبالى ايه بحترمك قد ايه ووخداك قدوه و بحس انك اخويا الكبير
البسمه اللى على وش حسام تروح
حسام / بصى انا هنزل اروح مشوار افطرى كويس و انا شويه و راجع تمام
ندى / هتتاخر
حسام / لا ما تنسيش تفطرى
ندى تهز راسها حسام يبوس راسها و يمشى
………………………
فى شقه نور
مروان / خلينا منطقيين انا لو بخونك هقعد فى اقرب مطعم للشركه يعنى مهو الطبيعى انى لو بعمل حاجه غلط هستخبى
امانى / مهو من بجاحتك
مامه مروان / ايه الاسلوب ده احنا المفروض الكبار اللى بنصلح بنهم
امانى / نور بقالها شهور بتشتكى من معامله مروان الوحشه ليها
مروان / نور بتمر بظروف صعبه و انا مقدر بس هى مش قادره تفهم انى انا كمان بمر بظروف صعبه
نور / دا حقيقى ظروف صعبه ما بتفتكرهاش الا لما بتشوفنى لكن معاها بتنسى نفسك
مروان / اقولك حاجه اه حقيقى معاها بنسى مشاكلى اللى بمجرد ما بدخل من باب الشقه اول حاجه بتحصل انك بتفكرينى بيها فى دكتور فلانى فلانه حامل فلانه خلفت
نور / يعنى بقت غلطتى انا دلوقت
مروان / انا ما قولتش كدا
مامه مروان / نور يا حبيبتى مروان بيحبك و انا ما انكرش كام انى بحلم باليوم اللى اشيل فيه عياله بس هو من حبه فيكى حط كل رغباتنا على جنب لكن خد منك ايه فى المقابل
نور / مروان الضحيه هنا مش انا
محمد / مفيش هنا ضحايا دى مش حرب احنا هنا بحاول نصالحكوا
امانى / لا يا محمد احنا بنحاول نضغط على نور اكتر من كدا انها تنسى اللى شافته و تكمل حياتها عادى لان البيه مش قادر يقتنع انه غلط
مروان / ماشى انا غلطت انا اسف ممكن بقى تحدديلى انهى نقطه بالظبط اللى غلطت فيها عشان ما اكررهاش
نور / انت بجد بتسال
محمد / مروان اسمع اولا انت بتخرج من البيت على اساس انك تروح الشغل عارف ان فى ساعه فى النص للغدى و عارف ان بيتك بعيد فما بتقدرش تروح بس يعنى مش معقول الشركه كلها ما فيهاش راجل واحد تتغدى معاه
مروان / نهاد معايا فى المكتب مش فى الشركه لا فى نفس المكتب
محمد / احنا ما قولناش تقطع علاقتك بيها
نور / لا يقطع علاقته بيها
مروان / ما اسيب الشغل بالمره
نور / اطلب نقلك لفرع تانى
مامه مروان / و فى الفرع التانى مش هيبقى فى بنات حلوين
نور / مين قال لحضرتك اصلا انها حلوه
مامه مروان / اكيد مش هتغيرى منها اوى كدا لو مش حلوه
نور / انا مش غيرانه منها
مروان / يا جماعه بصوا اخر الكلام حاضر انا مش هنزل ساعه الغدى من الشركه خلاص هطلب دليفرى و معاكى حق يا نور انا حطيت نفسى فى وضع شبهه و كان ممكن اوى اى حد من الشركه يشوفنا و يفهموا غلط راضيه كدا
نور / مبدئيا
مروان / ثانيا كنت متوقع منك تثقى فيا اكتر من كدا
نور تبصله
مروان / انا بحبك
محمد / احنا دورنا انتهى بقول تاخد مراتك البلكونه و تكملوا كلامكوا انا متاكد ان عندك كلام كتير تقولهولها
مروان / انا رايى نكمل فى بيتنا على راحتنا احسن
نور تبص لمروان يحط ايده على صدره عشان خاطرى تهز راسها و تقوم تدخل جوه يقعد مبسوط
محمد / مروان انت عارف انى بحبك زى حسام بالظبط بس لو الموضوع ده اتكرر تانى او اى حاجه زيه انا مش هقدر ادافع عنك بعد كدا
مروان يهز راسه
…………………………..
بعد فتره
أية قاعده فى البيت بتكتب رساله و تبعتها
سمر تفتح الباب و تدخل
سمر / اخبار المزاكره ايه
أية تهز راسها
سمر / انا عارفه ان الفتره اللى فاتت كانت صعبه علينا كلنا بس لازم تعرفى ان انا و انتى ما عدلناش الا بعض و لازم تعرفى اكتر انى فخوره بيكى جدا و ان اى حاجه عملتها فى حياتى عملتها عشانك عشانك انتى و بس
سمر تبوس راس أية و تسيبها و تمشى و تبص عليها
سمر / زاكرى يا حبيبتى و لو عوزتى اى حاجه نادينى
أية تهز راسها و سمر تقفل الباب و تمشى
…………………….
- يتبع الفصل التالي اضغط على ( رواية سلف و دين ) اسم الرواية