رواية سجينة مع وقف التنفيذ كاملة بقلم اميرة اسامة عبر مدونة دليل الروايات
رواية سجينة مع وقف التنفيذ الفصل الخامس عشر 15
خرجت عاليا من البلكونه وراح مرعي عشان يفتحلهم الباب و يستقبلهم.
طلع سيف معاه شنط كتير وناصر شايل معاه رافع النضاره علي راسه شكله يجنن🙈
عاليا كانت واقفه جمب رخامه المطبخ لانه مطبخ أمريكي لكن واقفه شيفاهم.
مرعي…لناصر بقلق واضح كان بيحاول يخفيه إكده يا ناصر تخلع جلبي عليك يا ولدي .
ناصر….بإبتسامه حنونه ليه بس يا مرعي اني زين أها
مرعي….يارب ديماً يا ولدي أشوفك زين وأعمل حسابك من إكده وطالع مههملكش تروح أي موطرح لحالك رچلي علي رچلك.
سيف….يا عم مرعي خليك معايا ووشيل عني لا راضي تدخلني ولا راضي تاخد مني صوابعي ورمت
مرعي….وه متآخذنيش يا ولدي جلبي كان مخلوع علي ناصر.
سيف….ومتخاعش عليا ليه وانا شايل كل الشنط دي😒
ناصر…بأبتسامه وسعله الطريج يا مرعي أحسن يفضحنا.
رفع عينه علي عاليا من بعيد لقاها واقفه مبتسمه.
ناصر….كيفك يا عاليا.
عاليا….بنظره عتاب الحمد لله.
سيف…تعالي معايا يا عاليا نطلع الاكل بسرعه القرآن خلص خلاص والمغرب هتآذن.
عاليا….ماشي يلا.
ناصر…لاه همل عاليا تروح تچيب ريم واني هساعدك.
سيف…طيب يلا بسرعه.
خرجت عاليا من المطبخ راحت علي الاوضه كانت ريم لسه نايمه.
عاليا…ريم يلا يا حبيبتي الفطار جاهز يلا قومي يا ماما عشان تاكلي وتاخدي علاجك
ريم…بأرهاق صباح الخير.
عاليا…بأبتسامه بسيطه صباح الخير ايه قصدك نساء الخير يلا قومي المغرب بتآذن اهي.
ريم….حاضر قوميني يا عاليا.
عاليا…يلا يا حبيبتي سمي الله وقومي براحه.
قامت عاليا من جمبها نزلتلها رجلها براحه ووقفت قدامها مسكتها من ايدها السليمه وايدها التانيه علي وسطها.
ريم …انا دايخه اوي يا عاليا.
عاليا…طبيعي يا حبيبتي عشان نايمه بقالك فتره الوقت الدوخه تمشي ولما تاكلي هتكوني احسن.
ريم….مش عايزه انام تاني يا عاليا خليني معاكي بره انا زهقت.
عاليا…..ماشي يا حبيبتي بس عشان الاضاءه الوقت غلط عليكي.
ريم…انا كويسه والله بس خلوني صاحيه لما بنام بحس اني بتخنق وبجس كأني مش هقوم تاني.
عاليا…بلهفه بعد الشر عليكي يا حبيبتي متقوليش كده خلاص خليكي بره بس لو حسيتي انك مصدعه هتدخلي تاني.
ريم….ماشي.
خرجوا براحه كان ناصر و سيف جهزوا السفره و معاهم مرعي بيساعدهم.
سيف….بأبتسامه اهلا صباح الخير
ريم….صباح النور
ناصر….عامله ايه الوقت يا ريم.
ريم….الحمد لله بخير.
ناصر…يلا تعالي عشان تاكلي وتاخدي علاجك.
ريم…بهمس لعاليا هو مش ده ناصر اخو مستر سيف.
عاليا…اه هو في ايه انتي نستيه ولا ايه.
ريم…لا متخافيش لسه مفقدتش الذاكره بس هو أزاي بيتكلم زينا
عاليا…كتمت ضحكتها لا متاخديش في بالك اصله ملبوس🙈
سيف…بابتسامه بتضحكي علي ايه🤔
عاليا….بضحك لا ابدا مفيش🙈
رفع ناصر حاجبه و بصلهم🤨 وفضل ساكت.
قعدوا كلهم وبدأوا ياكلوا مع بعض.
سيف…بقولك يا ناصر صحيح بعد الفطار هنزل اروح محطه مصر ولو لقيت في قطر انهارده طالع علي قنا هسافر ملاقتش يبقي بكره.
بصله ناصر بأستغراب تسافر ليه وبدأ القلق علي ملامحه ستك فيها حاجه.
سيف….لا لا مفيش متقلقش كده كل الحكايه اننا لما سافرنا جينا بعربيتك وسبت عربيتي هناك كنت فاكر اننا هنرجع علي قنا تاني وانا بصراحه مش عارف اتحرك من غيرها كمان عشان شغلي
ناصر….عربيتي موجوده يا سيف لو أحتاجتها مش وقته سفر خالص انا محتاجلك هنا معايا خصوصا ان اليومين دول هنزل كتير.
بصتله عاليا بقلق من غير تعليق.
سيف…..هتتحرك يعني هتحتاج عربيه انا هعمل ايه متقلقش مش هتأخر عليك و هيكون مسافه الطريق هطمن علي ستك كمان وأشوف كل حاجه ماشيه تمام ولا في حاجه وهاخد العربيه وهرجع مش هتأخر.
سيف….لو مشكلتك في العربيه خليك يا سيف ومرعي هيسافر مكانك
بصله مرعي وسكت.
ناصر….اني محتاج مرعي يسافر عشان يعمل كام حاجه مهمه و يرجعلي تاني .
مرعي….عيني يا ولدي شوف عايز ايه واني هعمله وهچيبلك عربيتك يا سيف يا ولدي وهاچي تاني.
سيف….ايوه بس كده تعب علي عم مرعي انا ممكن اعملك اللي انت عايزه يا ناصر
مرعي….تعب ايه بس لساتني معچزتش متخافش عليا يا ولدي.
ناصر….اللي عايزه من مرعي مفيش غيره هيعرف يعمله كأني موجود يا سيف بعد الفطار هتطلع علي المحطه وخد معاك مرعي لو في سفر خليه يسافر علي طول ملاقتش احجز ورجعه تاني قبل ما تروح تشوف شغلك.
سيف….خلاص ماشي تمام.
ريم….مستر سيف ممكن تعدي تجيب خالتو بقي .
بصلها سيف وسكت
ريم….كمان قولها تجيبلي انا وعاليا هدوم عشان مش معانا هنا حاجه.
لحقهم ناصر بسرعه.
ناصر….كلمتها وانا جاي يا ريم كنت ناوي أعملهالك مفجأه و أجيبها تفطر معانا بس لقيت صوتها تعبان شويه لما سألتها مالك قالتلي ان رجلها أتجزعت جامد وهي نازله من السلم و ورمت اوي راحت المستشفي تطمن لقتهم عملولها جبيره لمده عشر ايام هي قالتلي مش هتستني انها تفكها عشان تجيلك بس الالم يخف شويه وتقدر تدوس علي رجلها هتيجي مبسوطه اوي وفرحانه جدا عشان عرفت انك موجوده وسطنا وقالتلي انها هتجيب تليفون و تكلمك عشان تسمع صوتك بنفسها لحد ما تجيلك.بس انا ممكن بكره اعدي عليها و هجيبلها تليفون تكلمك منه لانها مش هتقدر الوقت تنزل وهخليها تكلمك وانا هناك كمان.
ريم….بقلق وراحه في نفس الوقت كلامه مقنع لكن هي مش مرتاحه.
هي فين تليفونها.
ناصر…بهدوء شديد كأنه عارف بيقول ايه. لما رجلها اتجزعت التليفون وقع من ايدها و اتكسر
سكتت ريم وبصت في طبقها من غير اي تعليق لكن الحزن والقلق كانوا باينين علي ملامحها.
ريم….ولو علي اللبس يا ستي مؤقتاً كده بعد ما نفطر انا هنزل اجيب ليا و ليكي حجات بسيطه لحد ما خالتو تيجي و تجيبلنا كل اللي هنقولها عليه.
تنزلي فين؟؟؟ وكان ده سؤال ناصر واللي فيه بعض الغضب.
عاليا…بقلق بسيط هشوف اي مكان هنا اجيب منه حجات ليا وليها احنا مش معانا حاجه هنا خالص.
ناصر….أزاي يعني تنزلي لوحدك انتي مش عارفه ان في قلق عليكي انتي وهي بعد الفطار هاخدك وننزل تجيبي كل حاجه نقصاكم
عاليا…طب وريم هنسيبها أزاي وسيف وعمو مرعي كمان نازلين.
وبعدين انت منمتش خالص واكيد تعبان
ناصر…ملكيش دعوه بيا انا كويس وبعدين خلاص يبقي هنستني لما يروحوا الاول و لو مرعي سافر سيف يرجع يقعد معاها لحد ما نيجي ولو مسافرش سيف يوصله ويطلع مرعي يفضل معاها لحد ما احنا نرجع.
في اللحظه دي نطقت ريم بخوف وفزع لا متسبينيش لوحدي يا عاليا🥺
سكتوا كلهم و بصتلهم عاليا بإحراج.
عاليا…ريم حبييتي اهدي ومتخافيش مفيش حاجه انتي هنا معانا في امان ريم لازم تنسي الحادثه ياريم شويه سيف وناصر و عمو مرعي مش زي عز يا ريم
بصتلها ريم بعيون بتلمع بالدموع متسبنيش عشان خاطري.🥺
عاليا…..ريم انا مش هسيبك يا حبيبتي وبعدين خايفه من ايه دول اخوات مستر علي اللي كول عمرك انتي وضحي بتشكروا فيه صح🥺 احنا اكيد مش هينفع نفضل قاعدين بلبسنا ده ولازم نجيب حجات نقصانا انا مش هتأخر عليكي يا حبيبتي هنجيب الحاجه بسرعه و نيجي علي طول
سيف….بأبتسامه بصي يا ستي انا عندي اقتراح تاني بعد ما نفطر هما ينزلوا وانا وعم مرعي هنفضل معاكي ولما هما يجوا هنزل انا ومرعي وكمل بضحك عشان يبعد خوفها عنها وعلي بال بقي ما يجوا انا جبت من السوبر ماركت كنافه هقف انا وانتي وعم مرعي نعملها مع بعض واهو بالمره أعلم علي عاليا وناصر اصل الاتين بيعرفوا يعملوها وبصراحه انا ناوي اتفوق عليهم قوليلي صحيح بتعرفي تعمليها.
ابتسمت ريم غصب عنها وهزت راسها بلأ
سيف….اوبااااا🤨 قصدك انهم هيفضلوا معلمين عليا والله ما يحصل عموما بصي هنحاول وزي ما تيجي بقي معانا يا عم مرعي ولا علينا🤔
مرعي….بأبتسامه معاكم يا ولدي.
سيف….اتفقنا يا ريم 🤔 متكسفنيش شكلنا هيبقي وحش اوي.
ريم…بأبتسامه وهي دموعها نازله أتفقنا.
ضحكت عاليا بحزن و باستها من ايدها مش هتأخر عليكي يلا كلي بقي وفكري في اللي ناقصك عشان اجيبهولك معايا.
ابتسم ناصر في صمت و كملوا أكل.
……………..
بعد الفطار قامت عاليا طلعت علاج ريم و أدتهولها و قعدتها علي الكنبه من تاني كان ناصر غير هدومه وخرج وعينه باينه انها حمرا جداااا من قله التعب والمجهود.
ناصر…يلا يا عاليا.
عاليا….بصت لريم هنزل ماشي
هزت ريم راسها و أبتسمتلها.
باستها عاليا من راسها وبصت لناصر يلا.
ناصر لسيف….لو أفتكرت اي حاجه اتصل علينا وانتي ياريم لو احتاجتي اي حاجه خلي سيف يكلمنا علي طول.
ريم…شكرا لحضرتك
ناصر…مرعي حطها في عيونك انت وسيف
مرعي…متخافش عليها يا ولدي في عيوني التنين.
ناصر…سلام عليكم.
الجميع…عليكم السلام.
………..
سيف…بضحك يا اعوذ بالله الجوز دول يتفات لهم بلاد فاكرين عشان عرفوا يعملوا كام اكله هيشوفوا نفسهم علينا ميعرفوش اني جوايا شيف مدفون.
ابتسمت ريم وسكتت.
مرعي….بضحك وكان فين الحديت ده وهما جدامك
سيف….الله جرا ايه يا عم مرعي انت معايا ولا عليا🤨 بص لريم هقولك علي سر خطير اصل انا نقطه ضعفي الكنافه بحبها جدا
ناصر لما كان يجي من الصعيد في رمضان يقعد معانا هنا يومين عشان شغله كنت لازم أستغله واخليه يعملها وهو بصراحه حريف فيها مش بس هي هو اصلا بيعرف يعمل اكل حلو اوي عشان لما كان بيدرس هنا قبلنا كان قاعد لوحده فا كان بيخترع عشان ناصر مش بيحب اكل الشارع اوي معدته بتتعب من أقل حاجه فا بيحب اكل البيت وطبعا اتعلم كان يتصل بستي وهي توصفله وهو يقوم يطبق لحد ما بقي استاذ و بيخترع أكلات كمان و ابتسم بحزن علي الله يرحمه مكانش بيعرف اوي بس كان ممكن يعمل كام صنف سريع كده واغلبهم مكرونه هي الراعي الرسمي لأكلنا هنا مكرونه و باينيه مكرونه وفراخ محمره اي حاجه تمشي مع المكرونه كان بيعملها اما بقي العبد لله لا عمري حبيت المطبخ ولا في بينا وفاق انا باكل وبس.
ضحك مرعي بحب…الله يچازيك يا سيف ولدي.
سيف…بضحك اكذب يعني المهم بقي عاليا لما كانت عندنا لمحت كنافه في التلاجه طلبت منها تعملها وفعلا عملتها وكانت حاجه كده وهم عشان كده نفسي أعلم عليهم😭
ريم…بابتسامه عاليا اكلها مله جميل هي بتحب المطبخ اصلا زي خالتو.
سيف…عشان يبعد عن سيره خالتها عاليا ايه الوقت سيبك منها المهم انتي بتعرفي تعملي ولا لا.
ريم….بضحكه باين عليها التعب انا زيك بالظبط مليش في المطبخ باكل بس.
سيف….وطبعا انت كمان يا عم مرعي متعرفش🤔
مرعي…اني ياولدي اخري أسلج حتت فرخه اعمل شويه رز أجطع بطاطس مليش في الوكل الالفرانكه ده.
سيف…بضحك اني شكلي أستعجلت لما حبيت أقف قصادهم🙄 هعمل ايه الوقت🤔
ريم….خلاص افتح النت وهات وصفه وامشي عليها وربنا معاك
سيف….تصدقي صح بس لقتها خلاص قوموا يلا تعالوا ساعدوني قبل ما يرجعوا.
……….
نزل ناصر ركب عاليا وراح ركب واتحرك بالعربيه.
بصلها ناصر عايزه تروحي مكان معين ولا أوديكي انا.
عاليا….هو انت تعرف اماكن هنا
ناصر…نسيتي اني كنت عايش هنا ولا ايه.
عاليا…بأبتسامه ايوه صح طيب خلاص وديني انت.
ناصر…ماشي يا ستي.
عاليا….عينك حمرا اوي انت شكلك تعبان ومحتاج ترتاح يا ناصر مكانش ينفع تنزل ابدا.
ناصر…..و اسيبك لوحدك؟
عاليا….لا بس عالاقل متنزلش وانت تعبان كده انا لولا اننا مش معانا غيار مكنتش نزلتك انهارده
ناصر….انا اوقات ممكن اطبق بال3 ايام يعني متحمليش همي خالص سيبك بقي من الكلام ده خلينا في المهم
عاليا….قول.
ناصر….🤨 ايه شغل العيال اللي عملتيه انهارده ده.
ابتسمت عاليا بإحراج و بعدت وشها عنه بسرعه.
ناصر….بصيلي هنا🤨
فضلت عاليا باصه قدامها وحاسه انها هتموت من الاحراج.
قرب ناصر ايده من دقنها لفه ليها وبصلها ها ردي عليا.
عاليا….كنت خايفه عليك يا ناصر.
ناصر….هيحصلي ايه يعني يا عاليا ما اللي بدور عليه هربان مني.
عاليا….مش يمكن يكون هربان بس عينه عليك وانت اللي مش شايفه.
ناصر…حتي لو مش هيقدر يعمل حاجه يا عاليا هو بظهور ريم عارف ان كلنا عرفنا الحقيقه.
عاليا…لما هو مش هيعمل حاجه ليه مخلينا قاعدين معاكم وبتقول ان في خطر علينا؟.
ناصر…..لاني مش ضامنه يا عاليا ولا عارف هو الوقت بيفكر في ايه
هل كل اللي شاغله الوقت انه يطلع بره البلد قبل ما ابلغ ويتمسك ولا يختفي عن عيني تماما عشان انا مطلهوش ولا الغل والحقد يكونوا عامينه و شايف انه مبقاش باقي علي حاجه ويفكر يآذي ريم او حد مننا هو الوقت يا عاليا مشتت مش عارف يفكر صح فا هتلاقيه ماشي بيلطش عشان كده انا ببعدكم عنه الوقت عشان لو فكر انه يلطش او يضرب ضربته ما تبقاش فيكم فهمتي.اللي زي عز يا عاليا غدار ملهوش أمان.
عاليا….هو انا ممكن أسألك سؤال يا ناصر؟
ناصر….بنظره حب طبعاً.
عاليا…بحزن بعد ما عرفنا الحقيقه كامله من ريم و شوفنا كلام عز بعيننا فا المفروض ان اللي حصل ده عز عمله بدافع حبه لضحي.
هو ممكن يا ناصر الحب يخلي واحد يآذي اللي بيحبه الآذيه دي كلها؟🥺
ناصر…..بصلها ناصر وعيونه كلها مشاعر مختلطه ما بين حب وبين وجع وحزن وبين غضب .
لا يا عاليا من يوم ما جينا الدنيا والحب ليه طريق واحد بس عشان نقدر نوصله لازم نمشي الطريق ده وشرط دخولك الطريق ده انك تكوني حد نضيف جواكي رحمه وقلبك برئ مليان حنان وعطف جواكي إنسانيه متعرفيش لا غدر ولا نفاق ولا خيانه ولا كدب اللي بيحب ياعاليا ميعرفش يخون تحت اي ظرف اللي بيحب ميقدرش يغدر او يحقد اللي بيحب بيتمني انه يشوف اللي بيحبه سعيد سواء كان معاه او مش معاه ولو مقدرتيش تتمني للي بتحبيه السعاده حتي وهو بعيد عنك تبقي انانيه وعمر ده ما يبقي حب الحب اللي يخليكي تآذي بني ادم وتدمري حياته او تنهي حياته بأيدك عشان ميبقاش مع حد غيرك عمره ما يكون حب ياعاليا ولا حتي يتسمي حب تملك لان التملك في الحب يمكن يكون وحش لان الشخص اللي واصل للدرجه دي في الحب بيبقي غيران علي اللي بيحبه وعايزه ليه هو وبس بيخنقه بس بردو ميقدرش يآذيه لكن الاذيه دي لشخص أتعود ان اللي يحط عينه عليه ميبقاش لغيره حتي لو اضطر انه يقتله زي ما عز عمل مع ضحي ومش بس ضحي عملها مع صاحب عمره يعني لو فرضنا انه حب ضحي لدرجه الجنون طيب وصاحب عمرك غدرت بيه ليه مقدرتش تفتكرله حاجه كويسه عملها معاك مصعبش عليك و ان بتطعنه بدل الطعنه تسعه كان فين قلبك اللي ادعيت بيه الحب وقتها
عز لو كان حب وقلبه دق بجد مكانش ممكن يقدر يشوف دم ولا يستحمل يشوف حد قدامه روحه بتروح لكن اللي يوجع بجد ان هو كان القاتل ده…فا عن اي حب عز أتكلم؟؟
عن اي حب حس بيه وهو من الاساس ميعرفش يعني ايه حب
هو مدخلش حتي لو خطوه واحده في طريق يا عاليا هو كان واخد طريق تاني طريق هو اللي رسمه بأيده بأسم الحب لكن نهايته كانت غدر وقسوه وخيانه.
نزلت دموع عاليا هي بتفتكر المعاناه اللي عاشتها ضحي وعاشها علي.
ناصر…بابتسامه وجع مسح دموعها هموت اعرف بتجيبي الدموع دي كلها منين.
ابتسمت عاليا غصب عنها وكمل ناصر طريقه وكل واحد فيهم جواه وجع كبير💔
………
عند عمر في الإسماعيليه..
وصل عمر لبيت أهل خديچه عشان يشوف حل في مشكلتهم
سعيد….يعني ايه يا ابني انا مش فاهم تقصد ايه؟
عمر….لا حضرتك فاهم يا عمي خديچه مش عايزه تعيش انا اتحملت كتير اوي وحضرتك عارف ده كويس وعارف قد ايه انا جيت علي نفسي كتير وديما كنت انا اللي اجي اصالح واتحايل مع اني مكنتش غلطان.
سميره….يا ابني البيوت ديما فيها مشاكل ولازم تعرف مشكلتكم ايه وتحلها.
عمر…والله معنديش اي مشكله عشان أدورلها علي حل المشكله عند خديچه اللي بتحاسبني علي حاجه مليش يد فيها الخلفه واللي للاسف مش مني انا ومع ذلك انا لا عمري اتكلمت معاها في حاجه زي دي ولا عمري حسستها اني نفسي اكون اب
سميره بدفاع عن بنتها…ازاي يا عمر وهي طالبه الطلاق اكيد انت حسستها بحاجه زي دي الغلط غندك يا عمر مش عند بنتي.
عمر…الغلط عندي انا ؟ حضرتك شايفه كده طيب تمام هاتيلي مره واحده بس من يوم ما انا وخديچه أتجوزنا زعلتها خليها تقولك وهي قاعده قدامك كده امته نزلت زعلانه من البيت بسببي امته كان في مشكله مني انا بسبب موضوع الخلفه انا اكيد مش ملاك بس انا معنديش وقت اعمل في مشاكل انا بنزل شغلي بقضي فيه اغلب يومي وبرجع يا دوب اتعشي معاها واقعد معاها شويه او لو عايزه تخرج وتجيب اي حاجه بنزل معاها وبرجع انام عمري ما قصرت معاها وديما بعوضها عن وقتي الطويل اللي بقضيه في الشغل.
سعيد….يا ابني انا عارف كل اللي بتقوله ده بس بردو معلش أستحملها.
خديچه…بجمود وانا مش عايزه حد يستحملني انا تعبت خلاص ومبقتش قادره اعيش العيشه دي
انا عايزه اطلق.
سكتوا كلهم ثواني سعيد بيبصلها بغضب وامها بتحاول تهدي فيها
فضل عمر باصصلها من غير اي كلام
سميره…يا بنتي طلاق ايه بس استهدي بالله.
خديچه….وانا قولت مش عابزه اكمل انا حره دي حياتي.
عمر….بقوه وثبات تمام وانا موافق.
سعيد…موافق علي ايه يا ابني انت هتاخد علي كلامها
عمر….اللي ترفض تعيش معايا يا عمي وانا صابر عليها سنين متستاهلش اني أستحملها اكتر من كده واظن مفيش راجل في الدنيا يتحمل اللي انا اتحملته منها ولا في راجل يرضاها علي رجولته وكرامته ورجع بص لخديچه خلصت خلاص يا خديچه قام عمر وقف وبصلها انتي طالق يا خديچه ورقتك هتوصلك وعشان اكون راجل معاكي للنهايه كل حقوقك هتوصلك.
بعد اذنكم.
خرج عمر بسرعه من بيت أهل خديچه الصدمه كانت علي ملامح امها وابوها اللي فضلوا يلوموا فيها اما خديچه فا حست بوجع بعد طلاق عمر مكانتش فاكره انها هتحس بيه.
اما عمر فا نزل ولأول مره من سنين يحس براحه كبيره اوي كده وكأنه حمل اتشال من علي قلبه علي قد ما حب خديچه علي قد ما هي عرفت بطريقتها تشيل حبها من قلبه ومن كتر المشاكل حولت حياتهم لجحيم و روتين مميت بينهم هما الاتنين أبتسم عمر واتنفس براحه محسش بيها من سنين كتير لدرجه انه محسش للحظه بالندم او الحزن مقدرتش خديچه تسيب ليها ذكري تخليه يفتكر عشرتهم كل اللي كانت سيباها نكد.وخناق ومشاكل وبعاد وجفاء وفجأه أبتسم لما أفتكر ريم… قدر عمر من بعد ما لقوا ريم بحوالي اسبوعين يحس من ناحيتها بحاجه جواه بتتولد خصوصا لما روحت معاهم عالبيت شعور غريب بيحركه تجاهها غصب عنه لاول مره من يوم ما اتجوز خديچه قلبه يدق لحد غيرها رغم المشاكل اللي بينهم كلها لكن عمره ما شاف حد غيرها ولا كان ده تفكيره لكن غصب عنه قدر يتشد لريم ويمكن يكون ظهورها شجعه من غير ما تقصد انه ياخد قرار صح ويخرج من سجن مميت عاش فيه سنين قدرت ريم من غير قصد منها انها تخليه يحس انه لسه جواه قلب بينبض وبيحس قدرت تخليه يشوف الدنيا بشكل تاني ويرجع لعمر القديم. ومن غير أي شعور منه طلع رقم ناصر عشان يطمن عليها منه لحد ما يروح بكره.
عمر…..الوووو استاذ ناصر.
ناصر…أهلا أزيك يا دكتور عمر عامل ايه.
عمر ..الحمد لله بخير.
ناصر…ودكتور ياسر اخباره ايه.
عمر…الحمد لله كلنا بخير وزي الفل طمني علي ريم عامله ايه؟
ناصر…الحمد لله كويسه مفيش غير الدوخه والنوم الكتير زي ما حضرتك قولت ان دي اعراض عاديه ولا ابه.
عمر….مظبوط متقلقش وعموما انا بأمر الله بكره هكون في القاهره وهعدي عليكم فا انا اتصلت عشان اطمن عليها وعشان كمان اعرف العنوان لو أمكن
ناصر…يا خبر يا دكتور حضرتك بتقول ايه ده بيتك وبيت اخواتك تنورنا اي وقت كفايه تعبك والله هبعتلك العنوان في رساله عشان متنساهوش وطبعا كان نفسي والله اديك ريم بس للاسف انا مش في البيت نزلت بعد الفطار علي طول
عمر…لا خالص مفيش مشكله المهم انها بخير.
ناصر….تسلم يا دكتور ياعمر كنت عايز كمان اقولك حاجه بس لما تيجي بكره بأمر الله قبل ماتشوفها كده عايزين نتفق علي حاجه بخصوص خالتها.
عمر…خلاص بأمر الله لما اجيلك نتكلم ان شاء الله هكون عندكم علي العشاء.
ناصر…عشاء ايه بس يا راجل عيب والله انا هستناك عالفطار رمضان خلاص كلها خمس ايام و ماشي عايزني اعمل معاك الواجب.
عمر….واجبك واصل يا ابو الكرم كله بس والله مش هقدر خليها وقت تاني.
ناصر….والله ما هيحصل هستناك خلاص بكره و هبعتلك العنوان الوقت.
عمر…ماشي يا سيدي بأمر الله يلا سلام عليكم
قفل عمر وخاب أمله في انه يسمع صوت ريم و يطمن عليها بنفسه.
وسرح شويه ورجع أبتسم الراجل ده مجنون ولا ملبوس ولا ايه شويه صعيدي وشويه قاهري🙄
هو ملبوس فعلا..
………
عند سيف وريم.
سيف…يالهوييييييي الكنافه مبتتقطعش 😂😂🙈🙈
ريم…بضحك هو في ايه؟ ايه اللي حصلها😂
مرعي….وه تعرف يا سيف يا ولدي اني شوفت كنافه كتير وجليل انما كنافه كيف الحچر الصوان مشوفتهاش عمري😂😂
سيف…ياعم مرعي هي ناقصه تريقه يا جدعان قولولي اعمل ايه اداري الجريمه دي ازاي😭
ريم ….انا بس عايزه اعرف هي ليه عملت كده بيتهيألي المكونات اللي حطتها متهليهاش تنشف كده وتقريبا دي نفس الحاجه اللي ريم بتحطها😂😂
سيف…انتي بتسأليني انا 😭
ريم…طيب اسأل مين مش انت اللي عملتها😂😂
مرعي….لاه وكمان في حاچه يابتي.
ريم….حاجه ايه😂
مرعي…طول عمري اعرف من واني عيل صغير أن المهلبيه دي حاچن إكده طريه كانوا بيعملوها للعيال الصغيره او الناس العواچيز اللي محداهمش سنان سيف عاملها كيف الجرص ماعتتحركش😂😂
ريم…بضحك والله انا عمد كلامي شبه الكاوتش او البلاستيك.
سيف…لا بقولكم ايه انتوا هتفوقوا عليا ما انتوا ساعدتوني
ريم….هو انا اتحركت ولا قادره اعمل حاجه بايدي المربوطه دي😂
مرعي….هو إكده يابتي عشان باظت منيه تعرفي لو كانت طلعت زينه كان وجتها فضح الدنيا و جال انه عملها بروحه ومحدش فينا ساعده😂
سيف…طيب كملوا جميلكم بقي وقولولي اتصرف في المصيبه دي ازاي لازم نخفيها قبل ما ما ناصر وعاليا يرجعوا ونقولهم كسلنا نعمل بعد ما فطرنا.
😭😭 انا عارف ايه اللي حصلها ناقصلها شويه حمص وتبقي شبه قرص الحمصيه انا لازم ارميها
مرعي….حرام يا ولدي نعمه ربنا سيبها نسجيها في شويه شاي يمكن تطري.
ريم…فضلت ريم تضحك وهي ماسه راسها.
سيف….بغيظ تسقيها في شويه شاي انت كده بتفرحني ولا بتضايقني اكتر يا عم مرعي و بش بقي هتروح مننا بسبب الضحك.
ريم….هتعمل ايه؟ انا رأيي سيبها وخلاص وبعدين عادي دي اول مره تجرب.
سيف….ولا يحصل والله لا هرميها واداري الجريمه دي حالا مسك الصنيه قلبها عالرخامه نزلت الكنافه واخده نفس شكل الصنيه لكن حطب🙈 اول ما عملت صوت مرعي وريم ضحكوا اكتر.
سيف….اتقلوا عليا اتخلص منها بس الاول وأرجعلكم
فتح الباسكت وكان صغير عن حجم الكنافه وطبعا ناشفه مش راضيه تدخل.
سيف…يالهوييييي دي مش بتترمي🤦
ريم…بضحك أضغط عليها طيب
سيف….مش موافقه والله حاولت بس واضح اني ضغط عليها اوي فا مش مستحمله ضغط اكتر من كده😂😂😂
ريم…اكسرها نصين.
سيف…مبتتكسرررررررش🤦
فضل مرعي يكح من كتر الضحك
وريم بتضحك وميته من الضحك لكن بصوت واطي عشان راسها عيونها دمعت وقدر سيف من غير ما يشعر يخرجهم من مود النكد شويه من اول الحادثه ما حصلت.
فضل سيف يضغط بايده عالباسكت ويدوس عالكنافه لحد ما دخلت جوه الباسكت رفع وشه بأنتصار.
سيف….😁😁😁😁خلصت من الجريمه اخيراً🙈🙈
فضلوا يضحكوا عليه وبدأ ينضف مكانه
……….
ناصر….ايه ياعاليا واقفه ليه يلا ادخلي هاتي انا مش عايز ادخل معاكي عشان تكوني براحتك هقفلك هنا.
عاليا….ياناصر ريحني عشان خاطري انا لا عارفه امشي ومجبش اللي احنا محتاجينه ضروري ولا عارفه اجيب ريحني وسبني انا اتعامل واشتري وتحاسب كأني لوحدي
ناصر…بحب خلصتي.
عاليا….يووووووووه يا نااااصر
ناصر…بأبتسامه يلا ادخلي هاتي كل حاجه نقصاكم ولو مدخلتيش هضطر ادخل انا و اجيب بنفسي و مليش دعوه بقي هتتحرجي او لا ذوقي هيعجبك او لأ فا الاحسن تدخلي و تجيبي أنتي ويلا بقي حرام عليكي انا مش قادر بفتح بالعافيه.
عاليا…بقله حيله ماشي يا ناصر انا هنزل و هشتري لريم وانا مش عايزه حاجه فتحت الباب وقبل ما تنزل مسك ناصر ايده بقوه رجعها مكانها تاني بصتله بفزع
عاليا…خضتني يا ناصر في ايه.
ناصر….بحاجب مرفوع بصلها انا مبحبش اعيد كلامي كتير يا عاليا مفهوم تجيبي كل اللي ناقصك انتي و اختك و أعتبري ان انهارده اخر مره تكلميني في اي حاجه ليها علاقه بالفلوس اللي يخصك ويخص ريم انا مسؤول منه
عاليا….بغضب ناقص تقولي لما تعوزي حاجه حطي ايدك في جيبي وخدي من غير ما تقوليلي.
أتمحت اثار الغضب و اترسمت بدالها ابتسامه.
ناصر…بالظبط لما تعوزي حاجه حطي ايدك في جيبي وخدي من غير ما تقولي حلو كده😉
أبتسمت عاليا وبسرعه فتحت الباب ونزلت دخلت علي المحل علي طول وهو و قفلها بره.
خلصت حاجتها واول ما شافها راحه عالكاشير دخل جوه المحل حاسب وخرجوا مع بعض وركبوا.
ناصر…سند راسه عالكرسي وخلاص عينه بتقفل ها اروح علي فين.
ضحكت عاليا علي شكله انا خلصت خلاص.
ناصر…خلصتي ايه انتي لحقتي.
عاليا….جبت كل اللي ناقصنا فاضل بس اروح اي صيدليه ويبقي كده خلاص.
ناصر…😴 سيف هيجيب علاج ريم وهو جاي بليل بس لو معاكي الروشته نجيبه بالمره.
عاليا…🤭انا عايزه اجيب حاجه ليا انا اصلا مجبتش روشته ريم عارفه ان سيف هيجيبها.
ناصر…وهو مغمض عينه 😴😴هتجيبي ايه؟
عاليا…🙄 هجيب حاجه يا ناصر
ناصر…ايوه حاجه ايه انتي تعبانه
عاليا….خلاص مش عايزه يلا روحني.
فتح ناصر نص عينه كده وبصلها.
هتجيبي ايه بقولك.
عاليا…وشها احمر وحست بالاحراج مش هجيب يا ناصر خلاص يلا بقي عشان منتأخرش.
فهم ناصر وحس هو كمان انه أحرجها طلع محفظته كلها ومدلها ايده. وهو مغمض انزلي بسرعه هاتي اللي عيزاه عشان ثانيه واحده وهقع منك😴
ابتسمت عاليا…ونزلت بسرعه عالصيدليه جابت اللي هي عيزاه🙄 ورجعت علي طول
عاليا…ناصر ممكن انا اسوق انت نايم خالص.
عاليا….انا بقالي كتير مسوقتش والسواقه وحشتني.
ناصر….لا😴
عاليا…طيب😒
بصلها ناصر وهو مش قادر
بجولك ايه تعالي سوجي انتي اني مش جادر أفتح عيني.
عاليا…بضحك ملبوس🙈
نزلت بسرعه وهو كمان نزل
و ركبوا مكان بعض و اتحركت عاليا عالبيت.
بعد وقت بسيط وصلوا
تحت البيت
- يتبع الفصل التالي اضغط على ( رواية سجينة مع وقف التنفيذ ) اسم الرواية