رواية الحب الروحاني الفصل الثامن عشر 18 - بقلم يارا عبد السلام

  رواية الحب الروحاني كاملة بقلم يارا عبد السلام عبر مدونة دليل الروايات 

 رواية الحب الروحاني الفصل الثامن عشر 18

كانت في الاوضه رايحه جاية بتوتر بعد ما لبست وجهزت نفسها ..

_يا تري بيقولو اي برا …طب وانا مالي مش هديله اي اهتمام أنا اصلا مش بحبه..

عيونها دمعت:اسكتى أنا اصلا كنت مستنيه اليوم دا ييجي من زمان ..وقالت بتحدي :بس برضو مش هوافق بسهوله ولازم الففه حوالين نفسه…

سليم دخل :نور نور عمو يحيي جه برا وبيقول أن هوا عاوزك

نور ابتسمت ونزلت لمستواه:احكيلي يا حبيبي اي اللي حصل..

سليم :عمو يحيي قاعد مع جدو وبيقولو أنه عاوز يتجوزك وأنه مش هيزعلك وأنه عاوزك تكملى معاه حياته..

نور ابتسمت بسعاده وطلعت الشيكولاته اللي وعدت بيها سليم وادتهاله:خد يا حبيبي علشان طلعت شاطر وعملت اللي قولتلك عليه..

سليم ببراءه:هروح اسمعهم تاني وتديني شيكولاته

نور:لا يا حبيبي ومتعملش كدا تاني علشان عيب

_وانتى خلتيني اعمل كدا لى

_علشان علشان..

في الوقت دا جه ابوها..

_نور ..

نور وقفت وبصتله بتوتر:نعم

_اظن انك عارفه يحيي جه النهارده لى وبص عليها وعلى شكلها:ومن الواضح جدا انك موافقه ومرحبه …

نور بتوتر:أنا أنا لا أنا مش عارفه ومش موافقه

_من غير حتى ما تقعدي معاه ..

_انت عارف أنه كان بيحبها..

_عارف بس دا كان وهوا دلوقتي عاوز يبدأ حياته من جديد معاكى انتى كلنا اتظلمنا ومرينا بظروف صعبه واتخدعنا ف انتى متحكميش على الكتاب من غلافه مش يمكن فعلا نسيها وبيحبك..

_مش عارفه

_طالما مش عارفه يبقى تقعدى معاه وتسمعيه..

اتنهدت وبصتله وحست إنه عنده حق ولازم تقعد معاه وتسمعه الاول …

_حاضر هقعد معاه…

_عين العقل يا بنتى..

خرج وخرجت وراه

يحيي ابتسم لما شافها وهى كانت باصه في الارض وساكته…

ام يحيي ابتسمت لما شافتها :ما شاء الله زي القمر يا حبيبتي اخيرا هفرح بيحيي تعبنى اووي الولد دا فرحت اووي لما قالى ان في بنت عاوز يتقدملها كنت عوزا ازغرط من الفرحه..

الكل ابتسم ونور ارتاحت اووي لام يحيي ويحيي مبتسم ويوسف همسله..

:امك ناقص تقوم ترقص من فرحتها بيك دا لو أنا مش هتبقى فرحانه كدا يسهلو يا عم وشكل نور موافقه كمان..

_قر بقى والنبي يا يوسف أنا ملصم الدنيا بالعافيه متخربهاش يعنيك دي

_انا دانا غلبان

_منا عارف..

ام يحيي:نسيب بقى العرسان لوحدهم..

نور اتوترت ووشها احمر من الكسوف كانت نفسها تمسك ايد ابوها وتقولو لا متسبنيش معاه..

يحيي ضحك علشان عارف اللي بيدور في بالها

_احم ازيك يا انسه نور أنا يحيي..

نور بصتله بعصبية:والله انت بتهزر

_مهو انتى اللي ساكته قولت انكشك كدا..

_لى هوا أنا طفلة

_هوا أنا مقولتلكيش

_اي!؟

_انك اجمل وارق طفله شوفتها في حياتى..

بصتله بسخرية:ويا ترى كنت برضو بتقولها الكلام دا..

_اه كنت بقولهولها..

_وبتقولها في وشى

_اضلك يعنى

_لا

_امال عوزا اي

_مش عوزا

_بصي يا نور كل الناس واي حد كان عارف انى بحبها لانى فعلا كنت بحبها بس بعد اللى حصل وبعد ما عرفت اللي عملته واللى بتعمله رجعت وفوقت لنفسي وعرفت قد اي أنا كنت غبي لما رفضتك ولما رفضت حبك ليا لانك تستاهلى كل خير وتستاهلى انك تتحبي يا نور علشان انتى جميله اووي من جواكى وبتخافى على أهلك ومستعده تضحى بحياتك علشان اللى بتحبيهم وانتى بطيبتك وجمال روحك مستعدة تلينى اجدعها قلب وتخليه يحبك علشان انتى فعلا تتحبى يا نور..

نور كانت بصاله والدموع في عينيها:خايفه اصدقك وتجرحنى وخايفه لما هى ترجع في اي وقت تنسى كلامك دا وقلبك يلين ليها تاني خايفه انجرح..

_انا قلبي انجرح منها يا نور عمري ما اقدر اجرحك وأبقى حمار لو فكرت في يوم انك أحرج أو اكسر القلب دا علشان انتى جوهرة واوعدك انى مستحيل ااذيكي أو ازعلك أو اخليكي تفقدى ثقتك فيا..

نور ابتسمت وهوا بادلها الابتسامه وقال بمرح:ها نقول مبروك..

نور غيرت ملامحها:امممم هفكر..

_لا مفيش تفكير خلاص يوم الخميس الخطوبه وكتب الكتاب..

_نعم لا طبعا أنا عوزا أقضى فترة خطوبه..

غمزلها:مانتى هتقضيها بس وانتى مراتى

_لى بقى..قدر معجبتنيش

_نعم يختى

_انا بقولك قدر بس في اي انت هتتحول ولا اي..

_انا اتعرفت عليكى وتقريبا عارف عنك كل حاجه عاوز بقى اعرفك وانتى مراتى ..

_يا قليل الادب..

_على فكره انتى اللي دماغك بتروح بعيد أنا قصدى انى عاوز اخدك في اي وقت ونخرج امسك ايديكي براحتى كدا ..

_اه إذا كان كدا ماشي

_تمام يبقى كلها يومين وجهزى نفسك يا زوجتى العزيزه…

عدى اليومين والكل كان فرحان فيهم ومفيش اي مشاكل وكان كل كلام نور ويحيي هزار ساعات وخناق ساعات وغيره …

وبدأو في تحضيرات الخطوبه وكان مريم معاها وفرحانه بيها جدا انها اخيرا نور وافقت واخيرا يحيي اتحرك ..

_انا فرحانه اووي يا نور اخيرا هتتجوزي

_عارفه يا مريم أنا رغم فرحتى وسعادتى اللى متتوصفش الا انى خايفه اووي..

_يا نكدو خايفه من اى خلاص يحيي بقى بتاعك وكمان شكله بيحبك

_والله مش عارفه يا مريم خايفه أنه يكون بيملا فراغ في حياته خايفه ترجع في اي وقت ويروحلها تاني

_مستحيل يا نور يرجعلها مستحيل أنا عارفه يحيي اكيد مش هينخدع فيها تاني وكمان هى المفروض عليها أحكام..

_يوسف قالى ان جمال اعترف على نفسه بكل حاجه وشال ايديها من اي حاجه يعنى هى ممكن ترجع في اي وقت وهتدفع مبلغ وخلاص كدا..

_يسلام بالسهوله دي وجمال لى عمل كدا

._مهو دا اللى مخوفنى والكلام دا لسه عارفاه قريب من يوسف..

_طب ربنا يستر ..

_شوفتى انتى نفسك خوفتى أنا مش عارفه قلبي مقبوض لى..

_متخافيش كلنا معاكى يا حبيبتي افرحى بقى انتى النهارده عروسه..

في الوقت دا الباب خبط ومريم فتحت كان يحيي..

دخل وهوا في ايديه بوكيه ورد جميل وبص لنور واتفحصها بهيام..

_زي القمر يا عروستى

نور اتكسفت..

يحيي قرب منها وهمس:كلها خمس دقايق وتكونى مراتى يا نوري ..

نور بصتله وابتسمت وهوا بادلها النظرات وهو مبتسم وقلوبهم بتدق بعنف ..

يحيي كان حاسس أنه أول مرة تظهر المشاعر دي جواه واول مره يكون متلغبط كدا وجوا مشاعر متلغبطه كدا بس جميله وحاببها وحابب وجودها …

قاطع نظراتهم صوت مريم وهى بتقول:؛

_يلا علشان المأذون وصل..

الكل كان متجمع وفرحانين وبدأو يكتبوا الكتاب ونظرات نور ليحيي كلها حب وفرحه أن خلاص حلمها اتحقق وبقت مراته رسمى نظمى فهمى..

“بارك الله لكما وبارك عليكما وجمع بينكما في خير”

في الوقت دا دخل شخص تقريبا معظم اللي قاعدين عارفه..

_معقول تكتبوا الكتاب من غيري..

الكل أنصدم

ممدوح بصدمه:سارة

• يتبع الفصل التالي اضغط على ( رواية الحب الروحاني ) اسم الرواية