رواية جمر وورد كاملة بقلم ايمان الخيال عبر مدونة دليل الروايات
رواية جمر وورد الفصل الاول 1
كنتي فين من تسع سنين لما مشيتي ومسألتيش ؟!
هبه بدموع : يا بنتي انا غلطت وكل انسان بيغلط
ساره بانفعال : وانتي شايفه ان أم تتخلي عن ولادها بعد ما ابوهم ما*ت بشهرين وتروح تتجوز عشان هي لسه صغيرة و حلوة دا مجرد غلط وممكن يتغفر؟!
هبه : احنا ملناش الا بعض يا ساره وانتي واختك اللي ليا في الدنيا
ساره : احنا فعلا ملناش الا بعض بس انتي مش منا ولا عمرك هتكوني
هبه بمسكنه : يا بنتي انا كبرت ومليش حد ولا بيت اقعد فيه
ساره بحزم : اوعي تيجي هنا تاني وانا هنبه علي الحراس انهم لما يشوفوكي ميدخلوكيش
خرجت هبه من عند بنتها وهي بتعيط وآمالها محطم*ة لأنها كانت فاكره ان ساره هتحن اول ما تشوف دموعها .
صوت طرق علي الباب
ساره : ادخلي يا عطر
عطر : الست اللي كانت عندك دي انا حاسة اني شوفتها قبل كدا بس مش قادرة افتكر فين
ساره بتهكم : حقك تنسيها ما انتي كان عمرك يدوب ست سنين
عطر : دي ماما يا ساره ،صح ؟
ساره بانفعال : ايوا يا عطر دي الأم اللي اتخلت عنا وسابتنا من غير بيت ولا اهل ولا اكل
عطر : بس اهي رجعت
ساره : لو قدرت ترجع الزمن وتصلح كل اللي حصل ساعتها تقدر ترجع
عطر بدموع : يعني انتي مش هتسامحيها ؟
قعدت ساره علي الكرسي وبصت للا شيء وسرحت وبدأت تتكلم
ساره : كان عندي ١٧ سنة وانتي ٦ سنين يعني كنا لسه صغيرين لما بابا ما*ت بسبب سكته قلبية او هو دا اللي الدكتور قاله وبعدها بشهر بدأت امك تخرج من الصبح مترجعش الا اخر الليل وغيرت من شكلها من مكياچ وشعر ولبس ضيق وعريا*ن بس كنت مطمنة علي الاقل ان عندنا حد لممنا في بيت وبيصرف علينا وبعد حوالي شهر من الحال دا جات وقالتلنا الخبر اللي قلب حياتنا .
من تسع سنين في شقة ايجار في حي شعبي
هبه : تعالي يا ساره عاوزة اتكلم معاكي شوية
ساره : حاضر يا ماما هخلص نشر الغسيل
هبه بزعيق : تعالي دلوقت بقولك
ساره : خير يا ماما ، انا عارفة ان المصاريف زيادة عليكي واديني قعدت من المدرسة وقلت كفايه مدرسة عطر و كمان بحاول اعمل كل حاجة في البيت عشان متتعبيش وانا والله لو كنت بعرف اشتغل اي حاجة كنت نزلت اشتغلت وساعدتك بس بابا الله يرحمه مكنش معتلنا هم حاجة
هبه بغضب : تاني هتقوليلي بابا بابا وهو ما*ت وارتاح من قرفك*وا
ساره بدموع : كنتي عاوزه تقولي ايه
هبه : انا هتجوز
ساره بصدمة : ايه ؟!
هبه : فيه ايه بقولك هتجوز ، انا لسه صغيرة وحلوة والف مين يتمني التراب اللي بمشي عليه
ساره : طيب و احنا ، انا وعطر ملناش غيرك
هبه : الراجل اللي هتجوزه متريش وفرصة مش هتتعوض بس هو شرطه انه عاوزني لوحدي من غير عيال
ساره بدموع : انتي اكيد مش هتتخلي عنا و اكيد رفضتي طلبه ، صح ؟
هبه : لأ طبعا وافقت وحاجة تانية دا اخر شهر هدفع فيه الايجار وطبعا …
ساره بقهر : وطبعا ايه انتي بتتكلمي بجد والنبي والله مش هنطلب منك حاجة تاني وكمان عطر ممكن تقعد من المدرسة ومش مهم ناكل تلات وجبات كفاية وجبه واحدة وانا ممكن اشتغل اي حاجة عشان اساعدك في المصاريف بس والنبي ماتسيبنا لوحدنا احنا ملناش حد غيرك والنبي يا ماما ما تسيبينا
هبه بجحود : بطلي شغل الشحاته دا كان ابوكي برضوا عامل زيك كدا فقري وبعدين ملكوش حد ازاي ، روحوا عند اهل ابوكوا مش ليكوا عم روحوا عيشوا معاه
عطر بدموع : كفاية يا ساره مش قادرة اسمع كمان
ساره بدموع : مش قادرة تسمعي ايه انتي لسه سمعتي حاجة
كملت ساره حكي
ساره : ولما امك اتجوزت ومشيت قعدت انا وانتي في الشقة لوحدنا حوالي اسبوع وبعدها الاكل خلص والفلوس خلصت وامك ما دفعتش الايجار وصاحب الشقة جه يطردنا فلميت هدومنا وروحنا لعمك بشير .
في بيت العم بشير في سوهاج
- يتبع الفصل التالي اضغط على ( رواية جمر وورد ) اسم الرواية