رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الواحد و الثلاثون 31
على / اختار
أية / انا مليش دعوه حرام عليك والله ما انا و الله يا عمر ما عملت حاجه و ربنا ما عملت حاجه … ابوس رجلك يا على ما تخربش عليا انا مليش غيره ابوس ايدك
على / جيتى ليه يا أية المحل مشكله ايه اللى عوزانى اساعدك فيها
أية / مفيش مشكله
عمر / مشكله ايه يا أية
أية تبص حواليها و عنيهم التلاته معاها و تعيط
أية / انا ما عملتش حاجه والله والله ما عملت حاجه انا تعبت
على / بطلى استعباط بقى عمر انا ماشى و زى ما قولت اللى هيخرج من الباب ده هيخرج للابد
عمر / استنى يا على
أية تبصله باستعطاف
عمر / أية عمرها ما تعمل كدا و انت عارف لو حد عمل كدا هيبقى سمر
سمر / انا ماشيه
على / منك لله
سمر / كلنا مننا لله ملناش غيره يا على ربنا واحده عارف مين كان بيفترى و مين كان بيدافع عن حقه ربنا وحده اللى يعلم وقفتك و انت بتخرب على اخوك لو كان عملها معاك كنت اتمسكت بست ندى و بعته لكن هو غبى
على / استفدتى ايه
سمر / لو عندك دليل واحد ان انا اللى صورتك ابقى تعال حاسبنى
أية / يارب اموت بقى
سمر / ايه اللى جابرك على الذل ده ايه اللى جابرك هو ده اللى بتحبيه هو ده اللى بتحاربينى عشانه فى اول موقف ما حاولش حتى ينصفك وقف فى صفه الكل هيستقوى عليكى الكل هيدوسك لو ما طلعلكيش انياب
عمر / اطلعى بره
سمر / يعنى هخرج من الجنه يا خى بلا قرف
سمر تمشى
عمر / انا هروح لندى و اشرحلها اللى حصل كلو انا متاكد
على / حسام فى ايده الصور يا عمر مسكنا من ايدنا اللى بتوجعنا لو انا قاوحت معاه هيكسرها هيكسر ندى
أية تلطم على وشها و تنهار من العياط
أية / يارب خدنى يارب خدنى
على / انا ماشى
على يمشى عمر يوطى يمسك أية و يقومها من الارض و يدخلها جوه
……………………………………….
فى المستشفى
حسام / ايه الاخبار
مصطفى يبصله
حسام / طولت اوى جوه
مصطفى / منك لله انت السبب
حسام / بكره تعرف يا عمى مين السبب
مصطفى / ندى عامله ايه
حسام / صحيت و لما شافتنى عيطت خرجت و سبتلها الاوضه يمكن اعصابها ترتاح
مصطفى / روح يا حسام
حسام / عيب يا عمى
مصطفى / العيب انك تفضل هنا بعد كل اللى انت عملته كان عقلى فين و انا بديهالك اول مره
حسام / كان عقلك فين و انت بتسلمها للكلب ده يعمل فيها و فيك و فينا كلنا كدا انت بجد مصدق انه بيحبها مروان ساب نور بعد قصه حب دامت سنين و جواز و عشره على شاف من ندى ايه عرفها قد ايه هى شافت منه ايه عشان يستحمل
مصطفى / انت عاوز منى ايه
حسام / عاوزك تفوق و تشوف مصلحتك يا عمى انا بحب ندى و لو لفيت الدنيا كلها مش هتلاقى حد يحبها قدى
مصطفى / روح لمراتك يا حسام ابعد عننا لو مش عاوزها تتجوز حد تانى خالص مش هجوزها خلاص بس ابوس ايدك سبها فى حالها بقى ارحمها
حسام / هى حبيبه فين ؟؟
مصطفى يبص لحسام و الاتنين على وشهم علامات الصدمه و فجاه الدكتور يخرج من العمليات يجروا عليه
مصطفى / طمنى يا دكتور
الدكتور / احنا عملنا اللى علينا … حضرتك راجل مؤمن البقاء لله
مصطفى يقع فى الارض مشلول و حسام و الدكتور يحاولوا يسندوه
………………………………..
فى شقه عمر
أية قاعده على السرير و واخده ركبها فى حضنها و بتعيط
///////////////////////////////////
أية / معقول ماما هى اللى تكون عملت فيا كدا ….. اكيد على ظالمها …. ازاى هطلب من على يساعدنى او يقف جنبى … عمره ما هيرضى … هيقولى امك اللى عملت فيكى كدا … اكيد ماما مظلومه مستحيل ماما تعمل فيا كدا …. هقول ايه لعمر …. ليه ماما ما دافعتش عن نفسها ليه سكتت …..اعمل ايه يا ربى بس اروح فين و لا لمين دا انا غلبانه و مليش حد اعمل ايه يارب اعمل ايه
/////////////////////////////////
عمر يدخل الاوضه و يعزم على أية بكباية عصير ليمون تهز راسه لا يحطها على الكومدينو و ياخد أية فى حضنه
أية / اوعى تسبنى يا عمر انا مليش فى الدنيا غيرك اقتلنى بس ما تسبنيش
عمر / اهدى خلاص
أية / انا تعبانه اوى انا عاوزه اموت
عمر / بعد الشر و اعيش ازاى من غيرك
أية / ليه ماما عملت كدا ؟؟؟؟ هى ماما فعلا عملت كدا ؟؟؟ طب ازاى عملت كدا ازاى
عمر / انا نفسى مش فاهم اى حاجه بس انتى مش متخيله الدنيا ولعت ازاى باللى حصل ده ندى و امها فى المستشفى امها دخلت العمليات و على مش عارف حتى يطمن عليهم و حبيبه جدتها كانت سيباها لجارتها على ما تروح المستشفى تطمن على ندى و لما ما رجعتش ادوها لعلى و يعالم ايه اللى هيحصل
أية / خليه يجيبها و يجى مش هيعرف يتصرف لوحده
عمر / قولتله كدا بس لا انا و لا انتى هنقدر ناخد بالنا منها فى ظروفنا دى
أية / انا هقدر خليه يجيبها خليه يفضل هنا
عمر / مالك يا أية
أية / تعبانه … تعبانه اوى انا ما عملتش حاجه وحشه فى حد … لا عملت اكيد ربنا بيعاقبنى على اللى عملته معاك اكيد
أية تعيط عمر ياخدها فى حضنه اكتر
أية / يارب ملناش غيرك يارب تعبت
عمر / اهدى خلاص اهدى
جرس الباب يضرب
عمر / دا اكيد على جايب حبيبه انا هقوم افتح
عمر يقوم يفتح و أية تمسح دموعها و تقوم تجرى وراه ليكون حد تانى عمر يفتح و على يدخل شايل حبيبه و شنطتها
على / انا ما كنتش ناوى اجى هنا تانى بس البنت دى ملهاش ذنب
عمر / كلنا ملناش ذنب اهدى و ادخل
على يدخل
على / ازيك يا أية
أية تهز راسها و تروح تاخد منه حبيبه و تدخل جوه
عمر / أية ما بطلتش عياط من ساعتها أية ما لهاش ذنب أية ما تعملش كدا
على يبصله و يدخل يقعد على اقرب كرسى
عمر / عامل ليمون اجيبلك كبايه
على يهز راسه لا
عمر / كلمت المحامى؟ انا قولتلك تكلم المحامى
على / مش مضمونه خصوصا لو استوطى و دخل الصحافه هتبقى فضيحه لندى
عمر / يعنى ايه هتسكت
على / ادينى بفكر … قال يعنى عارف افكر
عمر / بفكر اروح لسمر و اعرض عليها اى حاجه و تقولى ازاى عملت كدا
على / صعبه اوى يعنى
عمر / لا بس لو سمر شهدت ان حسام سلطها او ركبوا الصور
على / المحامى قالى ان حسام سهل اوى يرفع قضيه ضم و ياخد حبيبه بمنتهى البساطه بسبب ان الام مش امينه على البنت ندى من غير حبيبه تموت انا مش هقدر اعوضها عنها لو وقفت على شعر راسى مش هعرف مش كل الستات امى مش كل الستات ممكن تعيش من غير ضناها و اروى بنت حرام اصلا مش هتبقى حنان امك مش هتاخد بالها منها يعنى كل يوم سكينه جديده فى قلب ندى هعمل ايه
عمر / ندى هتعمل ايه
على / ندى فى المستشفى مدينها محاليل و مهدئات ما اعرفش اصلا فاقت و لا لا و امها كانت فى العمليات ما انا قولتلك
عمر يحط ايده على ضهر اخوه
على / انا قولتلها حسام مش هيقدر يعمل حاجه انا طمنتها انا ما صدقتهاش لما قالت انه مش هيسكت بس ما كنتش فاكر انه بالحقاره دى
عمر / بعد اللى عمله و مش فاكر دا حقير بالوراثه
على / منها لله منها لله ضيعت كل حاجه منها لله كسبت ايه بس لما عملت كدا
عمر / اللى زيها تصعب عليك ما لهاش حد و عايشه تاذى و خلاص الكل بيدعى عليها اللى زى دى ربنا يعينها بجد يعينها على نفسها
على / انا مصدع اوى انا هدخل انام يمكن لما اهدى اعرف افكر
عمر / عين العقل ادخل
على يدخل اوضه سمر و عمر يدخل لأية اوضته
……………………………..
فى شقه سمر
سمر تتصل بالتليفون ما يردش مره اتنين تلاته ما يردش
سمر / وربنا ما هسكت و هجيبك لتكون فاكر انك ضحكت عليا والله لجيبك
……………………………
فى المستشفى
محمد و نور و اروى و امانى يدخلوا يلاقوا حسام قاعد باصص فى الارض
محمد / ايه اللى حصل يا حسام طمنى
حسام / عمى اتصل بيا و قالى ان عمتى تعبانه جينا المستشفى دخلت العمليات و ما اعرفش فجاه ندى وقعت اغم عليها و عمى لما شاف كل ده حواليه وقع هو كمان
امانى / شوف ربنا لما بيجيب حقوق الناس
محمد / امانى
حسام / عمتى الله يرحمها بيغسلوها جوه انا لوحدى مش عارف اعمل ايه و لا ايه
اروى / ربنا يخليك يا حبيبى اصيل من يومك
حسام / نور حبيبه انا ما اعرفش هى فين نور ممكن تروحى تشوفيها فى البيت هناك و لا عند الجيران انا عقلى طاير عليها من الصبح
نور / حاضر حاضر هروح
نور تمشى جرى
حسام / عمرهم ما يسيبوها فى البيت لوحدها صح عمرهم مش كدا
اروى / اهدى انت بس و باذن الله حبيبه هتبقى زى الفل
حسام / يارب يا اروى يارب
امانى / الناس دى لو قاصده تموت فرحتنا مش هيظبطوا مواعيدهم كدا بوظوا الفرح و بوظوا المصيف
محمد / اتقى الله يا امانى هو الموت له مواعيد عشان يظبطها اروى خدى حماتك و روحى يلا مش عاوزين زحمه فى المستشفى
امانى / كدا يا محمد
حسام / ماما ابوس ايدك انتى مش حاسه باللى احنا فيه واحده ماتت و اتنين فى المستشفى و بنتى ما اعرفش هى فين مش وقت خناق روحوا
امانى / يلا يا اروى ادى اخره اللى يعمل الواجب
امانى و اروى يمشوا
محمد / ما تعرفش مها تعبت من ايه
حسام / ما اعرفش حاجه انا حتى ما كانش معايا عربيه اروحلهم انا بجد مش قادر استوعب اللى حصل
محمد / ربنا يستر انا هروح اشوف اخويا و اطمن عليه خليك هنا جنبها
حسام / معلش يا بابا هروح انا خليك انت هنا صدرى تعبنى من المكان و نفسى مقبوض
محمد / ماشى يابنى الله يعينك هنا من بدرى انا هخلينى
………………………………
قدام شقه ندى نور تضرب الجرس ما حدش بيفتح
نور / ايه الهبل ده ما طبيعى ما حدش يفتح
نور تروح تخبط على الجيران ست تفتح
نور / السلام عليكم انا بنت اخو الاستاذ مصطفى فى الشقه اللى قصادكوا
الست/ اهلا يا بنتى اتفضلى
نور / معلش فرصه تانيه بس هو انا كنت بسال عن حبيبه لو حد كان سابها معاكوا
الست / هى كانت معانا فعلا بس الاستاذ على اخدها
نور / استاذ على مين
الست / جارنا فى البيت اللى قصادنا كان معاهم طول الوقت الفتره اللى فاتت فا انا اديتهاله البت ما بتفصلش عياط
نور / طب يعنى انا اعمل ايه او اوصله ازاى
الست / اعمل ايه بس يا بنتى البنت كان ممكن يجرالها حاجه معايا و ما حدش فى البيت من الصبح و يا عالم راحوا فين
نور / طب خلاص شكرا
نور تمشى و تتصل بحسام
نور / ايوه يا حسام اللحقنى
حسام / حبيبه جرالها حاجه
نور / ما اعرفش بس الست جارتهم الهبله دى ادت البنت لواحد اسمه على بتقول كان معاهم الفتره اللى فاتت
حسام / اهدى اهدى خلاص عرفت هى فين
نور / بجد
حسام / ايوه يا ستى على ده يبقى اخو جوز صحبتها الانتيم و جارهم انا عارف عنوانها هروح اشوف يمكن تكون حبيبه عندها
نور / طب قولى العنوان و انا اروح انا
حسام / هى ما تعرفكيش يا نور مش هتديكى البنت طبعا بصى يا تروحى يا تيجى هنا عشان انا نازل اهو هركب هروح اجيبها
نور / لا انا هاجى المستشفى على الاقل بابا ما يبقاش لوحده
حسام / تمام انا بركب العربيه اهو سلام
نور / سلام
……………………….
فى شقه عمر
جرس الباب يضرب عمر يفتح
عمر / انت ليك عين تيجى لحد هنا دا انت جاى لقضاك يا جدع
حسام / اهدى كدا و قول هديت عشان لو انا مشيت هطلع على القسم و اعمل محضر فى اخوك انه خطف بنتى و بالمناسبه ما عدش فى حد يقفلى
عمر / فى ربنا اقوى من الكل يا اخى فى ربنا امشى يا ابنى من هنا
حسام / انت كدا بتاذى اخوك يا عمر ادينى البنت بالزوق بدل ما تزعل انا مش فايقلك
على يطلع من جوه يشوف حسام يمسك من رقبته
على / انت جاى لحد هنا برجليك يا ابن الكلب دا انا هطلع القديم و الجديد على جتتك
حسام / ندى فى المستشفى و عمى فى العنايه و عمتى ماتت هات حبيبه ندى محتاجاها
على يسيب رقبته
حسام / ندى محتاجه حبيبه الدكاتره عمالين يدوها فى منوم و مهدئات لحد ما تعدى المرحله هى محتاجه حبيبه
عمر / احنا هنوديهالها بنفسنا
حسام / اهلى هناك هتقول قدامهم ايه يا سى عمر هتقول ان كل ده حصل بسبب ان ندى اتصورت فى حضن اخوك
على يبص لحسام
حسام / ادينى البنت و لم الموضوع مش ناقصين فضايح ندى ما عادلهاش غيرى انا و اهلى خليها تدخل البيت وراسها مرفوعه ما حدش هيرحمها و هتبقى انت السبب
عمر / هو السبب و لا انت
أية تطلع من الاوضه شايله حبيبه
حسام / أية هاتى البنت
أية / هاجى معاك و اطمن على ندى بنفسى
حسام يبصلها
عمر / دا شرطنا مش هنسلم البنت غير لندى
حسام / ماشى أية صحبتها الانتيم و هى سابت معاها البنت تمام
أية / ماشى يلا يا على
حسام / متفقناش على كدا
أية / انا مامنلكش اجى معاك لوحدى عمر و على يجوا معايا رجليهم على رجلى
على / يلا بينا
حسام / ماشى يلا بينا
……………………………..
فى المستشفى
حسام يخبط على باب الاوضه و يفتح ندى نايمه و نور قاعده جنبها
حسام / اتفضلى
أية تدخل و وراها عمر و على يشوف نور
نور / على
على / انتى بتعملى ايه هنا
حسام / انتوا تعرفوا بعض
على / انا ازاى كنت بالغباء ده ازاى ما ربطتش الاحداث ازاى وثقت فيكى
نور / انا مش فاهمه انت بتتكلم عن ايه انت بتعمل ايه هنا ثوانى المحل ازاى ما اخدتش بالى
حسام / انا لو ما حدش فهمنى تعرفوا بعض منين انا ممكن ارتكب جنايه
على / مش مستاهله ما عدناش نعرف بعض
على يسيب الاوضه و يطلع و عمر يطلع وراه
حسام / ردى عليا تعرفى البتاع ده منين
نور / الحجه منال جارتى هو كان زى ابنهم و كان بيجى كتير و كان بيقف معايا فى مواقف كتير اوى
أية / انتى نور ؟؟؟
نور تبصلها
أية / انا فكراكى قابلتك عند الحجه منال معقول الدنيا صغيره اوى كدا
نور / ايوه فعلا و انتى أية مرات عمر
حسام / اتعرفنا الحمد لله ننسى بعض بقى عشان ما لكيش اى تعامل مع الجدع ده تانى انتى فاهمه
أية / صدقنى هو نفسه ما يشرفوش يتعامل معاك لا انت و لا اى حد من طرفك
حسام / اطمنتى على ندى هاتى البنت و امشى
أية / دا بعينك انا هفضل جنبها لحد ما تفوق و تاخد منى البنت انت فاهم
نور / انت تعرف على منين
حسام / وقته ده يعنى
نور / ما انا لازم افهم
أية / ما افتكرش كنت عامل حسابك على موقف زى ده و محضرله كدبه صح
حسام / ممكن تطلعى بره
أية / انا هقولك البيه حسام ما عرفش يلاقى نقطه ضعف لندى يمسكها منها عشان يجبرها ترجعله فقرر انه يكسرها
حسام / انا خلقى ضيق اتقى شرى
نور / سبها تكمل
أية / قولى امى هى اللى ساعدتك قولى الحقيقه وصلت للصور دى ازاى دخلت اوضه نومى ازاى
نور / صور ايه
حسام ينفخ و يمشى بعيد و يرجع
حسام / ما سالتيهاش ليه اه امك اللى ريلت على الفلوس اول ما عرضت عليها امك اللى باعتك انتى و هى اول ما اقترحت عليها امك
أية تعيط/ منكوا لله
نور / انت عملت ايه تانى يا حسام عملت ايه
أية / عملتها ازاى ازاى رد عليا
حسام / انا غلطان انى سمحتلك تيجى تبصى على ندى اصلا كان المفروض اخد منك حبيبه بالقوه و اسيبك زى الكلبه
أية / ابوس رجلك ريحنى قولى عملتها ازاى مين ساعدكوا ابوس ايدك انت هتخرب بيتى انا ما عملتلكش حاجه عملت معايا كدا ليه
حسام / انا ما عملتلكيش حاجه ماشى انا دفعت الفلوس و بس
نور / فلوس ايه فهمنى قوليلى انتى يا أية ايه اللى حصل عملت ايه يا حسام
حسام / ندى كانت بتروح كتير اوى عند أية بحكم انهم صحاب يعنى فعرضت على مامتها انها تظبطلى كام صوره لندى و هى فى الشقه عشان اعرف اضغط عليها
نور / صور ايه دى
حسام / صور ليها مع اى حد فى اى وضع
نور تلطم على وشها
حسام / اديتها حبوب مهدئه حطتها لندى فى العصير و لما داخت
أية / على سندها فانت اتهمتهم و ضغط على ندى لحد ما وصلتها للحاله دى
حسام / انا بحارب عشان عيلتى عشان بنتى تتربى فى حضن ابوها و امها دا حقى
أية / و عشان تبنى بيتك تهد بيتى ليه انا عملتلك ايه انا ذنبى ايه
حسام / انا مليش اى دخل بيكى كلامى اصلا لا كان معاكى و لا عليكى كلامى كان مع امك اى حاجه حصلت بقى تسالى عنها امك
أية تقعد على اقرب كرسى و تعيط
نور / انا تعبت انت ليه مصمم تدمر الصوره الحلوه اللى ليك عندى ليه مصمم تصدمنى كل صدمه اسوء من اللى قبلها رد عليا قولى
حسام / ما حدش له الحق انه يحاسبنى انتى فاهمه و لا لا
نور / ربنا هيحاسبك انت فرقت بينها و بين خطيبها و دلوقت حطيت على و اهله فى مشكله لمجرد ان ندى صاحبه أية و ما لقيتش مدخل تانى
حسام / و غيرها و غيرها عشان اجيبلكوا حقوقكوا لما الحق كان بتاعى المرادى بتتكلمى فى الصح و الغلط
نور / تقصد ايه
حسام / اقصد ان مروان كان معاه حق انا اللى رقيته عشان اعرف امسك عليه حاجه لو استوطى معاكى
نور / يعنى مروان ما كانش بيكدب
حسام / و لو ما كانش طلق البت دى ما كانش خرج منها
نور / انا مش قادره اصدق بجد انت ايه
أية / شيطان
نور / يا صدمه عمرى فيك يا خساره بجد يا خساره
نور تخرج من الاوضه و هى بتعيط تلاقى الممرضات معديين تمشى لحد ما تخرج بره المستشفى و تقعد على اقرب بنش
…………………………….
عند على و عمر فى الكافتريا
على / ازاى كنت بالغباء ده ازاى كنت بالهبل ده
عمر / يا ابنى اهدى هى كمان قالتلك اسمها غلط و بعدين
على / مش مساله اسم مش مساله اسم خالص دى كانت بتحكيلى كل حاجه اخويا هيتجوز اخويا عنده مشاكل مع مراته اخويا مراته الاولى عملاله مشاكل ازاى ما قدرتش اربط الاحداث بابا بيعمل عمليه عمى عمل عمليه فى نفس الوقت اللى ندى ابوها و عمها كانوا بيعملوا العمليه ازاى ما ربطتش الاحداث ازاى ما فهمتش و لو مره واحده ازاى
عمر / تفتكر كان باعتها عشان يعرف اخبارك تفتكر
على / ما عدتش عارف اى حاجه ما عدتش قادر افكر ايه كميه القرف اللى فى حياتى دى ايه كميه اللخبطه دى قوم قوم ناخد أية و نمشى ما ينفعش نسيبها معاه ما حدش عارف هياذيها ازاى
عمر / معاك حق يلا قوم
………………………..
فى اوضه ندى
حسام / انا اسف
أية تمسح دموعها و تبصله
حسام / انا ما كانش فى بينى و بينك اى حاجه اسف لو كنتى اتاذيتى فى الرجلين صدقينى ما كانش قصدى خالص
أية تبتسم بسخريه
أية / كل اللى اقدر اقولهولك ان نهايتك انت و اللى زيك اكيد سوده و بكره ربنا يظهر الحق
حسام / انا هقوم اطمن على عمى عن اذنك
حسام يفتح الباب عشان يخرج يلاقى على و عمر فى وشه يعدى من جنبهم و عمر ماسك على و يدخلوا جوه
عمر / يلا يا أية نروح
على / انا هخلينى لحد ما تفوق و اطمن عليها
أية / و انا كمان
نور تدخل الاوضه تلاقى على قاعد يبص الناحيه التانيه تروح تقعد بعيد
عمر / اخبار عمك ايه
نور تبصله
نور / الحمد لله الدكتور قال ان فى امل كبير انه يخف اهم حاجه انه يبعد عن الضغط النفسى و ينتظم فى العلاج
أية تقوم تقف جنب ندى
أية / هى عرفت
نور / ما عدتش عارفه حسام بيقول انها وقعت لما عمتى تعبت بس ما عدتش قادره اصدقه
على يبص لنور
أية / كلو سلف و دين و حق ناس هتخلصه ناس اللطف بعبيدك يارب لطفك يارب
على / الدفنه امتى
نور / هيصلوا الفجر و يدفنوها و العزا هيبقى عندنا فى البيت
على / الله يرحمها
نور / انت بتكلمنى كدا ليه
على / انا ما بكلمكيش اصلا ماشى فكك منى مش فايق لجر الشكل انا
نور / على
على / افندم اؤمرى فى عندى اى حاجه فاضله نفسكوا تدمروها
على يسيب المكان و يقوم و نور بتبص عليه لحد ما يطلع بره و ترجع تبص لعمر
عمر / هى مش هتفوق و لا ايه
نور / الدكتور هينيمها لحد ما الدفنه تخلص لو عاوز تمشى ممكن تسيبوا حبيبه معايا
عمر / دا فى المشمش تسمعى عنه
نور / هو فى ايه مالكوا
أية / بس بس احنا فى مستشفى انا هاخد حبيبه معايا و اروح و لما تفوق ابقى خلى البيه اخوكى يكلمنا و احنا هنجيبهالها
نور تبص الناحيه التانيه و أية و عمر يخرجوا من الاوضه نور تزق الكرسى تقلبه فى الارض
………………………………………….
فى شقه عمر
عمر / حسام ضرب ندى فى مقتل ابوها و امها و موضوع الصور هتعمل ايه المسكينه
على باصص فى الارض و ساكت
أية / حسام ما قالش لنور ان على كان خاطب ندى قالها انه دفع لماما فلوس عشان تصورها و جت فى على
على يسيب المكان و يقوم يطلع البلكونه عمر يقوم وراه
عمر / انا حاسس بيك
على / لا ما انتش حاسس انت مش حاسس انت لسه سايب بنت الجزمه دى على زمتك
عمر / على دى مراتى و ما اسمحلكش
على / و هى عملت اعتبار لده
عمر / ما تاخدهاش بذنب امها
على / غسلت دماغك زى ما امها غسلت دماغ ابوك زمان
عمر / انا مقدر موقفك و حقك مش انت لوحدك اللى اتاذيت ندى و باباها و ماماتها بس مش أية اللى عملت ده
على / لو ما كنتش انت اتجوزت أية ما كانتش سمر لقت مدخل فى حياتنا انت اللى اخترت ترمى نفسك فى جحر التعابين و ادينا كلنا اتلطينا بيهم
عمر / اهدى ماشى اهدى
على / لا بس ابن الكلب لعبها صح نور حسبو قال نور زفت
أية / نور كانت صدفه
على / و ايه كمان بقى يا عبقريه زمانك
أية / ايه كانت جاره الحج انور من سنين ما سكنتش هناك فجاه عشان خاطرك و انتوا اتعرفتوا عند الحج
على / تعرفى تسكتى
أية / طنط منال هى اللى قالتلى حكتلى عن نور كتير عشان كان نفسها تجوزهالك
على / ههههههههههههههههههههههههه و انا اهبل صح
أية / انا ساكته مش عشان انت صح مش عشان انا ما عنديش كرامه انا ساكته عشان مقدره ظروفك فراعى ده
على / اقسم بالله ما لاقى رد على بجاحتك
عمر / كفاياك بقى يا على
على / لو كنت انت اللى اتصورت كنت عملت ايه يا عمر لو كانت مراتك هى اللى هتتفضح بالصور دى كنت هتعمل ايه يا عمر رد عليا قولى
أية تبص لعمر و دموعها تنزل و عمر يبصلها
على / ما تبصلهاش و رد عليا لو كان فى حد صورك انت و مراتك و بيهددك بالصور دى هتعمل ايه يا عمر
أية / هتعمل ايه يا عمر
عمر / ما اعرفش انا ما اعرفش اهدوا بقى
على / عشان تعرف انك مش حاسس بيا عشان تعرف انك بق
عمر / انا عازرك خشى يا أية جوه و ما تطلعيش لو سمحتى
على / هاتى حبيبه
عمر / اديله البنت …. اهدى بس
أية تدى لعلى حبيبه و تدخل اوضتها و هى بتعيط
………………………………………..
فى المستشفى
ندى تفتح عنيها نور تقوم تجرى عليها
نور / صح النوم يا قلبى
ندى / ايه ده انا فين ؟؟؟ فين بابا؟؟
نور / يعنى هنكون فين عامله ايه دلوقت احسن انا هنادى الدكتور يبص عليكى
ندى تحاول تقوم من السرير
ندى / حبيبه فين انا بعمل ايه هنا
نور تمنعها تقوم
نور / اهدى بس يا قلبى اهدى و ارتاحى
ندى / بنتى فين بنتى فين
نور / مع صاحبتك أية و جوزها و اخوها خدوها من عند الجيران و ما رضيوش يدوهالنا قالوا هيدوهالك انتى بس
ندى / انا هروح اجيبها انا عاوزه بنتى بابا فين
نور / طب بصى انا معايا رقم على اخو جوزها هكلمه على التليفون يجيبها هقوله انك فوقتى ماشى
ندى / على ؟؟؟
نور / حسام حكالى على كل حاجه
ندى / حسام ؟؟؟ بابا فين انا عاوزه اروح انا لازم امشى اتصلى بماما قوليلها تروح تجيبها
نور / ندى ممكن تهدى
نور تدوس على الزرار
ندى / حسام حكالك ايه بالظبط قال عنى ايه تانى عاوز يدمرنى ازاى تانى
نور / حسام قال الحقيقه حسام اعترف بغلطته و قال انه اتفق مع مامه أية انهم يصوروكى فى اى وضع و انه اداكى مخدر و على لما حاول يساعدك لانك كنتى دايخه صوروكى معاه من غير ما تاخدوا بالكوا عشان ترجعيله حسام اعترفلى امبارح
ندى / انتى مش بتردى عليا ليه بابا فين انا موبايلى فين انا هكلمهم بنفسى اوعى
ندى تحاول تقوم الممرضه تدخل
ندى / لو سمحتى انا عاوزه امشى من هنا
الممرضه / الدكتور زمانه جاى يبص عليكى و باذن الله يكتبلك على خروج بس من فضلك لحد ما يجى ارتاحى فى السرير
ندى / نور لو سمحتى من فضلك اتصلى بماما انا مش عارفه ازاى بابا سايبنى هنا لوحدى
نور / حاضر ثوانى
نور تمسك التليفون و تتصل و الممرضه بتقيس الضغط لندى
حسام / الو
نور / ايوه ندى فاقت و بتسال عن باباها و ماماتها و انا مش عارفه اتصرف
حسام / احنا خلصنا و جايين عطليها بس على ما اوصل
نور / حاضر
حسام / خلى الدكتور يديها مهدئ و لا حاجه
نور / اتصل بعلى
حسام / لا مش وقته
نور / حاضر
حسام / لينا قاعده فى حوار سى على ده لما افوقلك على فكره
نور / لا يا حسام لينا قعدات كتير اوى بس لما ندى تفوق
حسام / مع السلامه
نور / سلام
ندى / كلمتى حد
نور / اه جايين فى السكه اهدى انتى بس … هى ما لهاش دوى لو سمحتى
الدكتور يدخل
الممرضه / الضغط ميه و خمسين على ميه و عشره
ندى / انا عاوزه اخرج لو سمحت
الدكتور يروح يكشف على ندى
……………………………………
فى شقه عمر
عمر يطلع من الاوضه يلاقى على قاعد على السفره و ما بيتكلمش يحط ايده على ضهره و يقعد جنبه
عمر / عامل ايه نمت كويس
على / و لا شوفته
عمر / و لا انا
على يبصله
عمر / هتروح لندى فى المستشفى
على / هستنى أية تصحى و نروح كلنا
عمر / أية ؟؟؟ ما بطلتش عياط طول الليل
على يبصله و يبتسم بسخريه
عمر / حرام عليك تاخدها بذنب امها حرام عليك تظلمها البت بتتنفض طول الليل خايفه منك
على / على اساس انك ما لكش شخصيه مثلا طور و انا ساحبه بحبل ورايا
عمر / لا بس هى عارفه غلاوتك عندى و انى لو خيرونى بينك و بين الدنيا كلها هختارك انت يا على
على / تبقى اهبل
عمر / الانسان ممكن يستحمل الاذى من اى حد لكن دى امها امها هى اللى عملت فيها كدا
على / اعملها ايه يعنى
عمر / ارحمها ما تبقاش انت و الدنيا كلها عليها
على / هو انا اذيتها فى ايه انا يابنى عمرى حاولت اوقع بينكوا عمرى حاولت ائذيها و فى الاخر خت ايه من وراها
عمر / انت خدت من ورايا انا عشان اللى حصل اى كان حصل ازاى حصل فى بيتى و فى وجودى انا اللى جبت أية و انا اللى جبت سمر لو هتلوم حد لومنى لكن أية لا
على / و هتفضل لحد امتى تنضف وراها
عمر/ طول ما انا واثق انها نضيفه يا على
على ينفخ
عمر / ما تخيرنيش بينك و بينها خصوصا لو هى فعلا ملهاش ذنب
على / خلاص يا عمر….. انا هقوم ابص على حبيبه
على يقوم
…………………………………..
فى المستشفى
ندى بتعيط
نور / وحدى الله يا ندى انتى مؤمنه و انا متاكده انها فى مكان احسن
ندى تبص لحسام و تعيط
نور / روح اطمن على عمى يا حسام
ندى / انا عاوزه ابقى جنبه هو محتاجنى انا متاكده انه محتاجنى اوى و انا كمان محتاجاه اوى اوى
نور / قومى تعالى هو فى الاوضه اللى جنبك
ندى / انتى كلمتى أية تجيب حبيبه كلميها شوفيها اتاخرت ليه لو سمحتى
نور / هوصلك لعمى و هكلمها حاضر
نور تسند ندى تعدى من قدام حسام يحاول يسندها تبعد ايدها و تبصله و هى بتعيط
…………………………..
فى شقه عمر
على / كل ده بتلبسوا خلصونا بقى
تليفون يرن على السفره على يروح يبص
على / غاده يا عمر
عمر يطلع من الاوضه و ياخد الموبايل و يرد
عمر / الو
غاده / فينك يا ابنى انت مش جاى و لا ايه
عمر / لا انا اتصلت بمعتز و قولتله يشيل مكانى عندى حاله وفاه و الدنيا ملخبطه
غاده / لا اله الا الله مين مات
عمر / حد ما تعرفيهوش بصى انا كدا كدا هحكيلك بس انا مشغول جدا دلوقت ممكن نتكلم بعدين
غاده / اكيد انا كنت حاسه ان في حاجه غلط لانك اختفيت فجاه امبارح
عمر / عدت عدت سلام
أية تطلع من الاوضه و عمر يقفل
على / اخيرا لبستى
أية تبصله و تمشى من سكات على يجيب حبيبه و يمشوا
………………………………….
فى المستشفى
ندى قاعده على كرسى جنب سرير ابوها و ماسكه ايده و بصاله و هو باصصلها
محمد / الدكتور قال ممكن نروح انتوا هتيجوا عندنا عشان ناخد بالنا منكوا
ندى / انا هعرف اخد بالى من بابا كويس شكرا
نور/ يا ندى انتى نفسك محتاجه رعايه و حبيبه محتاجه رعايه هتاخدى بالك من ايه و لا من ايه
ندى / احنا مش هنرتاح عندكوا و لا طنط امانى و لا اروى هيرتاحوا
حسام / خلاص خلاص سبيها على راحتها و احنا هنروح نطمن عليهم كل شويه
نور / بس يا حسام
حسام / مش وقت جدال يا نور
نور / سكت
الباب يخبط و أية تدخل
أية / السلام عليكم
ندى تقوم تجرى تاخد منها حبيبه
أية / انا سالت عليكى فى اوضتك الممرضه قالتلى انك هنا سلامتك يا عمى
مصطفى يبص الناحيه التانيه
أية / حقك .. حسبى الله و نعم الوكيل فى اللى كان السبب
ندى / أية
أية / انا ما رضيتش ادى حبيبه لحد غيرك ما عدتش عارفه مين حبيبك من عدوك
ندى / شكرا
أية تحضن ندى اوى
أية / انا اسفه سامحينى
ندى تهز راسها و أية تمشى و هى بتمسح دموعها و تخرج و تقفل الباب
على / هى عامله ايه
أية / كويسه فى راجل كمان جوه غير حسام و اخته
عمر / يمكن عمها
أية / يمكن
عمر / أية روحى انتى و انا هروح الشغل زميلى مش هينفع يشيلنى اليوم كله
أية / اروح لوحدى
على / خد العربيه وصلها
أية / عمر انت وعدتنى انك مش هتسبنى
عمر / يا ايه انا هروح الشغل مش مهاجر
أية / طب هروح المحل مع على
على / دا ايه الدلع ده ان شاء الله اقولك يا عمر وديها لامها
أية تبصله
عمر / فى ايه يا أية انا مش فاهمك بصراحه
أية / خلاص يا عمر روحنى خلاص
عمر / يلا بينا
…………………………………….
فى المستشفى
حسام / الدكتور كتب خروج لمى حاجتهم يا نور
ندى قاعده عند الشباك و سرحانه حسام يروح يقف جنبها و نور مشغوله بتلم الحاجات من الاوضه فى الشنطه
حسام / البقاء لله
ندى / تقتل القتيل و تمشى فى جنازته
حسام / حتى فدى كمان غلطتى
ندى / فاضل ايه جوايا تانى عاوز تكسره يا حسام
حسام / اخر حاجه اتمناها يا ندى انى اكسرك صدقينى انا بحبك و كل اللى بيحصل ده غصب عنى انا حذرتك و لو كنت حلفتلك على الميه تجمد ان على ما بيحبكيش و بينتقم منك عمرك ما كنتى هتصدقينى
ندى / ما عدليش حد ضهرى اتقطم خلاص
حسام / ما تقوليش كدا انا جنبك انا اتمنالك الرضا ترضى
ندى تبصله
حسام / والله ما عندى اغلى منك فى الدنيا دى والله ما يهمنى حد فى الدنيا قدك ابيع الدنيا و اشتريكى بس انتى شاورى و هتشوفى
ندى / تقدر ترجع ماما تقدر تخفف بابا
حسام / و ما اقدرش احببك فيا و لا اقدر اخليكى تسامحينى بس اقدر احاول اقدر احاول اعوضك عنهم انا مستعد اعمل اى حاجه عشان تسامحينى و تبدئى معايا صفحه جديده انتى بس قولى اه
نور من هناك / انا لميت كل حاجه
ندى / ياما قولت اه بس وجع مش رضا عن اذنك
ندى تشيل حبيبه و تقوم تخرج بره و مصطفى قاعد على كرسى محمد بيزقه و نور و حسام وراهم
…………………………….
فى شقه عمر
أية قاعده لوحدها فى البيت تسمع خبط على الباب كانه طبله تقرب بالراحه
الراجل / افتحى يا قطه انا عارف انك جوه انتى مش عاوزه صورك و فيديوهاتك و لا ايه …. امممم لا انا خلقى ضيق و صبرى قليل …. يعنى مش ناويه تفتحى …. ادوس شير يعنى
أية بتعيط
الراجل / هعد من واحد لتلاته و همشى …. واحد … اتنين
أية تحط ايدها على اكره الباب و هى بتعيط
الراجل / اتنين و نص …. تلاته الا ربع
أية تقعد و تدى ضهرها للباب و تعيط
الراجل / بقى هى كدا اشربى بقى ياختى بالاذن
الراجل يمشى و أية تنهار من العياط
……………………
فى شقه امانى
امانى / اهلا وسهلا اهلا و سهلا البقاء لله الميت ما تجوزش عليه الا الرحمه
ندى تبصلها
نور / انا هقوم احط حاجه عمى فى اوضه حسام و انتى يا نونو تنامى معايا هننبسط اوى سوا
امانى / ابعت هات دليفرى يا حسام عشان ما عملتش غدى ما ليش مزاج
حسام / حاضر تحبوا تاكلوا ايه
امانى / هاتلنا حاجه تفتح النفس لحسن الواحد نفسه مسدوده على الاخر
امانى تبص لندى
امانى / اديك شايف اللى احنا فيه منوره يا ندى
ندى تبصلها و تهز راسها
حسام / خش جوه يا عمى ارتاح و انتى يا ندى خشى ارتاحى انتوا تعبانين برده و انا لما الاكل يوصل هدخلهولكوا لحد جوه
امانى / اه خدمه خمس نجوم امال ايه
محمد / بقولك ايه يا امانى ما تشوفى اروى فين كدا لحسن مش شايفها
امانى / اروى عند امها
ندى / هى عمتى عرفت اللى حصل
امانى / اه عرفت امال هنخبى عليها
مصطفى يبص لندى تمسك ايده
ندى / تعال يا بابا ادخلك جوه
ندى تزق كرسى مصطفى و يدخلوا جوه
محمد / ايه اللى هببتيه ده كنتى قولتى انها ما تعرفش يعنى مش عيب تعرف ان اخوها تعبان كدا و ما تجيش تبص عليه
امانى / ما هو من اعمالكم سلط عليكم
محمد / اتقى الله بقى يا امانى و خلى يومك يعدى على خير انا مش ناقصك
امانى / ربنا يجعلنا من المتقين ياخويا انا داخله افرد ضهرى انا كمان لما الاكل يوصل يا سى حسام ابقى هاتهولى فى اوضتى انا كمان و لا احنا مش قد المقام
حسام / هجيبهولك يا ماما حاضر
امانى تدخل الاوضه و هى بتغنى
امانى / كايده العزاااااااااال انا من يومى ايوه اه
امانى ترزع الباب وراها و محمد ينفخ
……………………..
فى اوضه نور
نور / الحمد لله اخيرا نام انا هروح اسلقله فرخه و انتى يا نونو مش هتعوزى حاجه
نور تبص على ندى تلاقيها باصه بعيد و بتعيط تروح تقعد جنبها و تاخدها فى حضنها
نور / حقك عليا انا حاسه بيكى ربنا يصبرك
ندى / طب هى بتكرهنى اخوها ذنبه ايه ياترى حاسس بايه دلوقت
نور / انا متاكده انها هتيجى بالليل انا متاكده انها بس كانت مستنيه خروجه من المستشفى
ندى تمسح دموعها و تتنهد
نور / ندى انا عارفه ان اللى مريتى بيه ما كانش سهل بس عمى محتاجك قويه عشان يعرف يتسند عليكى و يرجع يقف على رجليه
ندى / قويه هه
ندى تبتسم بسخريه
نور/ قومى اتوضى و صلى ركعتين لله و امسكى المصحف و اقرى لعمتى و انا هخلص و اجى اقرا معاكى
ندى تهز راسها نور تقومها و تاخدها على الحمام
…………………………..
فى شقه حسام
حسام / ممكن افهم ايه قله الزوق اللى عملتيها انتى و امك دى
اروى / احترم نفسك ما اسمهاش امك
حسام / خالك فى المستشفى مشلول و انتى ما تعبريهوش كنت فى نص هدومى بسببك
اروى / نروحله بعد كل اللى عملوه فينا
حسام / يخربيتك و هو عمل فيكى ايه امال لو ما كنتيش انتى ياختى اللى عامله و مسويه انتى و امك سورى قصدى انتى و عمتى
اروى / طبعا ليك حق ما نعجبش ما الست هانم بقت تحت و ياترى بقى هتعيش هنا قد ايه
حسام / طول العمر
اروى / والله
حسام / ان كان عاجبك
اروى / حسام بلاش الاسلوب ده معايا
حسام / انا كنت فاكرك اصيله بس اللى شوفته منك النهرده خلانى اعيد حساباتى تانى
اروى / ازاى بقى
حسام / عن اذنك
حسام يسيب البيت و يمشى و يرزع الباب وراه
………………………………
فى شقه عمر بالليل
عمر يدخل مفيش اى صوت يدخل على أية الاوضه يلاقيها نايمه على السرير يحط ايده عليها بالراحه تفوق و تصرخ
عمر / دا انا دا انا
عمر ياخدها فى حضنه
أية / انا اسفه ما حستش بيك .. ينهار انا ما عملتش غدى
أية تيجى تقوم عمر يشدها يرجعها لحضنه تانى
عمر / مش مشكله مش جعان خليكى
أية / اتاخرت اوى
عمر / معلش الشغل كان بالكوم
أية / الله يعينك
عمر / ما لك يا أية فيكى ايه كل يوم بتبقى اسوء صارحينى ليكى غيرى
أية / انا …
عمر / انا عارف انتى حاسه بايه عارف والله و مقدر بس فى ايدى ايه اعمله ان كان على الكلام اللى على بيقوله بيقوله فى لحظه غضب هو ما يقصدوش على انجرح اوى من الى حصل و ندى كمان الله يعينها
أية تعيط
عمر / انا عارف انها فى الاول و الاخر امك و لعلمك انا والله مش مانعك عنها لو عاوزه تروحى تزوريها فى اى وقت روحى هى برده امك
أية / امى ؟؟ حسام قالى انها خدت منه فلوس على اللى عملته بس ما قاليش دفعلها كام ما قاليش باعتنى بكام اساوى عندها كام
عمر / تساوى عندى الدنيا و ما فيها يا أية
أية ترفع راسها و تبصله
أية / اوعدنى انك عمرك ما هتسيبنى اوعدنى ان مهما حصل هتفهم انه كان غصب عنى و انى عمرى ما اعمل كدا
عمر / انا عارف ان ما لكيش اى دخل فى الموضوع
أية/ على سالك لو انا اللى كنت اتصورت مش ندى هتعمل ايه ليه ما ردتش عليه
عمر / ارد عليه اقوله ايه بس ربنا ما يكتبها علينا
أية / ارجوك جاوبنى هتسبنى يا عمر هتطلقنى
عمر / أية لا انا و لا انتى فى المود اننا نقعد نتخيل حاجات يعنى ايه اللى هيحصل يعنى على هيحاول ينتقم
أية / الدنيا بقت وحشه اوى يا عمر غابه كلو بينهش فى كلو عشان مصلحته
عمر / على عمره ما يعمل كدا
أية / انا مالى و مال على انا امى عملت كدا امى عملت فيا و فيك و فى ندى و فى على كدا قصاد ملاليم مهما كانت الفلوس لو ملايين ملاليم جنب اللى دفعناه و اللى هندفعه
عمر يسكت
أية / هتطلقنى يا عمر و لا هتقف جنبى و تدافع عنى
عمر / انتى عبيطه يا أية انا و انتى لو لفينا الدنيا ما لناش الا بعض و انتى ما لكيش ذنب فى كل ده و لو كنت عاوز اطلقك كنت طلقتك ساعتها و صدقينى مفيش حاجه هتغير موقفى ناحيتك انتى ملكيش اى دعوه باللى عملته امك
أية / اوعدنى
عمر / اوعدك اهدى بقى و بطلى عياط
أية / عمر انا عاوزه اقولك حاجه عمر انا
تليفون عمر يرن أية تسكت و تبص عليه
عمر / دى غاده كملى كملى
أية / عمر انا ما اعرفش والله ده حصل ازاى بس انا كمان
تليفون عمر يرن تانى
عمر / يووووه ما انا لسه سايب الشركه ثوانى هرد و اركز معاكى ….. الو ايوه يا غاده … لا طبعا ما انا ماشى معاكى … ايه الهبل ده ازاى انا قافلها بنفسى قبل ما امشى …. قافلها قدامك يا بنتى …. لا طبعا مسافه السكه و اكون عندك هى سايبه و لا ايه سلام
عمر يقوم من السرير و أية بتبص عليه يجرى على باب الاوضه و يرجعلها
عمر / بصى خزنه الشركه اتفتحت ما حدش عارف اتفتحت ازاى انا هروح اشوف لانها عهدتى و انا قافلها بنفسى قبل ما امشى و هرجعلك و هنتكلم براحتنا ماشى
أية تبصله و تغمض عنيها و تهز راسها بالراحه عمر يبوس راسها و يمشى و هى عينها لسه عليه
…………………………………..
بعد يومين فى شقه امانى
تهانى / سلامتك ياخويا حقك عليا اتاخرت عليك
مصطفى يهز راسه
تهانى / والله ما حاشنى عنك غير انى مش قادره اشوفك فى الحاله دى منها لله بقى اللى كانت السبب
نور / و هى مين دى بقى يا عمتى
تهانى / اى كانت بقى امال ست ندى فين مستكبره تيجى تسلم على عمتها
نور / بترضع حبيبه جوه اعملك شاى
تهانى / لا تسلمى
الباب يتفتح و حسام يدخل
حسام / مساء الهنا منورين يا جماعه متجمعين عند النبى ان شاء الله
تهانى / كنت فين يا حسام جيتلك تقيسلى الضغط لقيت الصيدليه قافله
حسام / مالك سلامتك يا عمتى
تهانى / عالى يا حسام و له حق دا كل حاجه حوالينا بقت تعلى الضغط و تقرف
ندى تطلع من الاوضه و شايله حبيبه حسام يجرى يشيلها منها و يبوسها
حسام / حبيبه بابا وحشتينى
ندى / ازيك يا عمتى
تهانى / ما تكلمى اروى يا نور تشوفيها ما نزلتش ليه و لا تكونوش مش عاوزينها تنزل يعنى
نور / و احنا هنمنعها تنزل ليه ما البيت طول عمره بيتها
تهانى / بس ليها حق والله البيت اتخنق من كتر الزحمه دا بقى مروستان
ندى / ازيك يا عمتى
تهانى / اهلا ازيك يا ندى ما شوفتكيش عامله ايه يا حبيبتى
ندى / الحمد
تهانى / ما تقومى يا ندى تعمليلى كبايه شاى لحسن الصداع هيفرتكنى
ندى / حاضر
تهانى / ابقى افتحى الشباك ده يدخل هوا يا ندى فى طريقك لحسن الشقه كاتمه اوى و مكمكمه
حسام / ماما لو سمعتك تزعل يا عمتى
امانى تطلع من المطبخ شايله اطباق فاكهه
امانى / عمرى ما ازعل من عمتك ابدا
تهانى / هستنى الشاى كتير يا ندى
ندى تدخل المطبخ و هى بتعيط و تملا البويلر ميه و تجيب الكوبايات و تلقمها و تقفل السكريه و تحطها على الرخامه و تحاول تجيب الصينيه من الرشاقه ما تطولهاش تشب ايدها تخبط السكريه توقعها تتكسر و السكر يتشحطر ثوانى و الكل فى المطبخ
امانى / يخربيتك كسرتى السكريه
ندى / كنت بحاول اجيب الصينيه وقعت غصب عنى انا هنضفها
امانى / اوعى كدا تنضفى ايه اصلا ايه اللى انتى عملاه ده كل ده شاى ايه امك ما علمتكيش تعملى حتى كوبايه شاى
حسام / خشى اوضتك يا ندى فى ايه يا ماما مش مستاهله يعنى
ندى تجرى على اوضتها و امانى تتكلم بصوت عالى
امانى / هو انت غرمان حاجه ما هى طول اليوم اكل و مرعى و قله صانعه دا حتى هدمه ابوها انا اللى بغسلها
حسام / الصبح اجيبلك واحده تخدمك
امانى / و انا ادخل بيتى واحده غريبه ليه تسرقنى ما تجيبلها خدامه فى بيتها هناك هتقعد هنا لازم تعرف ان البيت ده له نظامه لازم تتعلم تخدم نفسها مش خدامين ابوها احنا
حسام / وطى صوتك بابا لو عرف
تهانى تدخل
تهانى / هدى اعصابك يا امانى مش مستاهله …. يا مصيبتى كسرت السكريه الكريستال
امانى / شوفتى الهم اللى انا فيه
تهانى /لا بقى دى قاصده تكسرها عشان انا اللى جيبتهالك هديه يوم خطوبه حسام و اروى
حسام / و هى كانت تعرف منين بقى ان شاء الله
تهانى / اصلا هى بتلقم منها ليه ما جنب علبه الشاى فى علبه السكر السكريه دى بتتحط على الصينيه تتقدم للضيوف المهمين
حسام / انتوا خلاص يعنى هى دى اللى فرقت معاكوا عمى اللى بره و سامعكوا ده مش فارق معاكوا ابويا لما يجى من بره و يعرف اللى بتعملوه ده مش فارق معاكوا
امانى / والله ما انا منضفاها و نادى الست المحروسه تيجى تنضف زى ما وسخت بلا قرف بقى تعالى يا تهانى اوضتى انا قرفت دا مش بيت ده
امانى و تهانى يدخلوا اوضه امانى و يقفلوا الباب و حسام يوطى يجيب الجاروف و يلم الازاز و السكر المتكسر و ينضف
………………………….
فى الصاله عند نور و مصطفى
مصطفى دموعه بتنزل على خده و باصص فى الارض نور تاخد منديل و تقومله تمسح خده و تقعد تحت رجليه
نور / حقك عليا انا ما تزعلش دموعك غاليه عندى اوى يا عمى والله حقك عليا انا
مصطفى يعدى ايده من على شعرها
نور / انا ما اعرفش هما بيعملوا كدا ليه والله ان كانت ماما و لا عمتى انا فعلا مش فاهمه بس انا متاكده انهم مش راضيين عن تصرفاتهم
مصطفى يحاول يحرك الكرسى نور تساعده
نور / لما بابا يجى انا هقوله على اللى حصل و هطلب منه ترجعوا بيتكوا انا بنفسى هاجى اخدمكوا و اشوف كل طلباتكوا
مصطفى يهز راسه لا نور تجرى تقعد تحت رجليه
نور / انتوا مش مرتاحين هنا لا حضرتك و لا ندى
حسام يطلع من المطبخ
حسام / انا لميت اللى قدرت عليه ممكن تعيدى على الحاجه عشان ماما ما تتكلمش
نور / حاضر
نور تدخل المطبخ و حسام يخبط على باب ندى و يفتح و يدخل مصطفى ندى تمسح دموعها
حسام / على فكره اللى حصل النهرده ده مش هيعدى على خير اقسم بالله ما هسكت
ندى / هى حبيبه بره لوحدها
حسام / ثوانى هجيبهالك
ندى / شكرا
ندى تروح تقعد تحت رجلين ابوها
ندى / حقك عليا ما تزعلش نفسك
مصطفى يعدى بايده على خدها
ندى / اجمد بقى و خف انا مليش غيرك و محتاجاك ما تخليهمش يكسروك عشان ضهرى ما يتكشفش
مصطفى يبتسم و عنيه كلها دموع
ندى / ما تخافش كلو سلف و دين و ربنا ما بيسبش حق مظلوم ابدا ما تخافش
حسام يدخل بحبيبه ندى تقوم تاخدها منه
ندى / شكرا …. صحيح يا حسام انا مش لاقيه موبايلى ما شوفتوش
حسام / لا ممكن تكونى سبتيه فى المستشفى
ندى / مش عارفه
حسام / على العموم و لا يهمك انا هجيبلك الاحسن منه و خط جديد كمان
ندى / شكرا
حسام / تحبى تيجى معايا تنقيه يعنى تخرجى تغيرى جو كدا يعنى
اروى تدخل
اروى / الله هو انا جيت فى وقت مش مناسب و لا ايه
حسام / لا ازاى تعالى
اروى / سمعت صوتكوا عالى لبست و نزلت ايه خير امال ماما و عمتى فين
نور تدخل
نور / ما انا قولتلك فى اوضه ماما
اروى / بجد ما اخدتش بالى صحيح يا نور احنا معزومين بكره على فرح واحده صحبتى تحبى تيجى معانا
نور / لا شكرا
اروى / يا بنتى غيرى جو بدل الخنقه اللى انتى فيها دى هتقعدى هنا مع مين
حسام / معانا انا و بابا و عمى و ندى و حبيبه
اروى / والله
حسام / اصل واضح انك ناسيه ان البيت ده فيه حاله وفاه ما عداش عليها اسبوع
اروى / ما اخدتش بالى اصلى ما شوفتش يعنى حد لابس اسود كلها ما شاء الله فواتح اهى
اروى تروح تمسك بجامه ندى ندى تزق ايدها
اروى / و دا من ايه ده بقى ان شاء الله
ندى / انا عاوزه انام ممكن
حسام / اروى
اروى / ما انتش شايف اسلوبها يعنى…. اسمعى فوقى لنفسك انتى هنا ضيفه لكن انا صاحبه بيت
حسام يشد اروى من ايدها يطلعها بره اروى تزعق
اروى / انت بتطردنى عشانها
امانى و تهانى يخرجوا جرى من الاوضه
امانى / فى ايه
حسام / انا اللى يصغرنى ما يلزمنيش انتى فاهمه
امانى / سيب ايدها هى عملت ايه يعنى ايه مش مستحملينها الخمس دقايق اللى نزلتهم
حسام / لو سمحتى يا ماما ما تدخليش بينى و بين مراتى ممكن
تهانى / و انت ياخويا خليت فيها مراتك
حسام / ده اللى عندى
امانى / لما يجى ابوك له كلام تانى معاك مدام ما بتكبرش لحد و لا هو البيت ده مفتوح لمزاجك تدخل فيه اللى تعجبك و تخرج منه اللى ما تعجبكش لا فوق دا بيتى انا و ان كنت عملت باصلى و فتحته مضيفه مش معناه انى ما اقدرش استقبل فيه اللى على مزاجى انت فاهم و لا لا
حسام يرفع حاجبه
اروى / ما لهاش لزمه يا عمتى انا طالعه فوق سيبهالك
تهانى / انا جايه معاكى تعالى يا امانى الشقه هنا بقت بتشغى حشرات
امانى و تهانى و اروى يطلعوا حسام يقفل الباب وراهم و ينفخ يبص وراه يلاقى ندى واقفه
………………….
- يتبع الفصل التالي اضغط على ( رواية سلف و دين ) اسم الرواية