رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثالث و الثلاثون 33
فى الشارع عند أية
على ينزل من العربيه يلاقى زحمه قدام بيت أية يجرى و يزق فى الناس لحد ما يوصل لعربيه سقفها مطبق و أية نايمه عليه و فاقده الوعى يبص فوق يلاقى الشباك مفتوح
على / أية أية
راجل / يلا خدت الشر وراحت خلى المنطقه تنضف
على يمسكه من هدومه
على / انت بتقول ايه انت دى اشرف منك انت فاهم قطع لسانك و لسان اللى يتكلم عنها نص كلمه
على يلف و يروح ناحيه أية و يمسك ايدها
على / قومى قومى يا أية قومى
صوت عربيه البوليس ووراها عربيه الاسعاف و يقفوا و ينزل من عربيه البوليس ظابط و عساكر
الظابط / لملى يا ابنى العيال دى على البوكس شقه مين دى يابنى
على / شقتى
الظابط / احنا جالنا بلاغ ان فى ناس بتتهجم على شقتك
الراجل الكبير / انا يا حضره الظابط اللى اتصلت بيكوا
على / انا لسه واصل ما اعرفش تفاصيل بس دى مرات اخويا و اهم حاجه عندى دلوقت انى اطمن عليها
الراجل الكبير / يا باشا انا هحكيلك كل حاجه
الاسعاف تنقل أية العربيه على يجرى عليهم
على / هى لسه عايشه صح
المسعف / النبض ضعيف و فى نزيف حاد و لازم تتنقل المستشفى حالا
على يبص للظابط يشاورله يركب معاها
الظابط / معلش يا حج لازم تتفضل معانا على القسم عشان نكمل المحضر بس الاول لازم نعاين مكان الواقعه
الراجل الكبير / تحت امرك يا باشا
…………………………………
فى المستشفى
على واقف على باب اوضه العمليات متوتر جدا يجيله تليفون
على / الو ازيك يا حجه
منال / وحشتنى اوى يا على فينك مختفى خالص و لا بتكلمنى و لا بتطمن عليا زى الاول قلقت جدا عليك
على / حقك عليا انا فعلا مقصر فى حقك بس والله غصب عنى انا مش عارف اقولك ايه بس
منال / باين من صوتك يا حبيبى فى ايه احكيلى احكى لامك مش انا زى امك برده
على يعيط و يحاول يمسك دموعه
منال / انا جيالك هركب اول قطر و اجى
على / ياريت انا فعلا محتاجك اوى و محتاج الحج انور اوى
منال / امسك نفسك يا ابنى كان قلبى حاسس والله بس اهدى كدا ووحد ربنا
على / لا اله الا الله
منال / اخبار ندى ايه
صمت
منال / للدرجادى طب اخبار نور ايه هى كمان اخبارها انقطعت عنى خالص
على / لو سمحتى ما تجيبليش سيرتها
منال / لا معقول
على / انتى ما تعرفيش حاجه يا حجه انا بجد اتصدمت فيها صدمه عمرى
منال / لا لا ما تحكيش حاجه الا لما اجيلك انا بكره الصبح هكون عندك سلام
على / تنورى يا حجه
……………………………..
فى شقه امانى
حسام يدخل و يقفل الباب و يروح يقعد على الكنبه جنب ابوه بيقرا كتاب يسيبه و يبص لحسام
محمد / مالك اتخانقتوا و لا ايه
حسام / بالعكس انبسطنا جدا
محمد / امال مالك
حسام / بابا هو انا ممكن اتكلم معاك فى موضوع حساس شويه
محمد يتعدل فى القاعده و يركز
حسام / بابا لما انا رجعت من السفر اول مره حضرتك ما كنتش بنيت شقتى فوق و لا وضبت المحل تحت
محمد / حصل و انت ادتنى فلوس عشان ابنيلك و اوضبلك الصيدليه عشان لما ترجع تبقى متشطبه
حسام / ليه حضرتك ما كتبتليش الشقه ساعتها
محمد / امممم انت ما طلبتش و بعدين ما الكل عارف انها شقتك
حسام / اه بس
محمد / انت عاوز تكتبها باسمك هكتبها باسمك دى حقك
حسام / بجد
محمد / ايوه طبعا اللى انت عاوزه انت ما اتكلمتش فانا ما حطتش الموضوع فى دماغى
حسام / ربنا يخليك ليا يا بابا
محمد / ندى اللى طلبت منك تكتب الشقه باسمك
حسام / ندى ملهاش دعوه باى حاجه ليه كل صغيره و كبيره تقولوا ندى
محمد / عشان انا اول مره اخاف عليك بالشكل ده من ساعه رجوع ندى لحياتك
حسام / انا عارف انت شايفها ازاى بس والله هى ملهاش اى ذنب انا اللى كنت وحش طول الفتره اللى فاتت انا اذيتها كتير و غلطت كتير و اكبر غلطه انى صورتهالكوا بصوره وحشه عشان ابرر عمايلى بس هى ما كانتش كدا والله انا اللى غلطت
محمد / و مش يمكن بتعمل نفس الموضوع مع اروى
حسام / اروى الوضع مختلف اوى يا بابا
محمد / بس اروى ليها حقوق و مش معنى انها سكته لحد دلوقت انها مش هيجى يوم و تطلبها زى ما انت سكت عن الشقه و جيت النهرده بعد كاااااام سنه تطلبها
حسام / لو على الكوليه انا بس اللم نفسى و هجيبلها بداله انا بعت شبكه ندى و انا بفرش الصيدليه يا بابا على يدك و عشان فلوس الجواز و كدا
محمد / بس اروى ما لهاش ذنب
حسام / اعمل ايه طيب
محمد / رجع لاروى شبكتها
حسام / ما اقدرش اخدها من ندى يمكن لو كنت فكرت ساعتها كنت خدتها بس دلوقت صعب اوى ندى لبستها خلاص و هقولها ايه
محمد / قولها دى مش بتاعتنا قولها ترجعها لصحبتها
حسام / طب و حق ندى و شبكتها هعمل ايه بص انا ممكن ادبر لحضرتك مبلغ بدل الشبكه تاخد حقها فلوس لاروى يعنى لو ده مش هيضايق حضرتك
محمد / والله ما اعرفش هما هيقولوا ايه بس لازم تبقى عامل حسابك انها لو رفضت حقها هيكون فى الدهب
حسام / بسيطه بسيطه تاهت و لقيتها لو رفضت انا هصور الدهب و هنروح الصاغه نشترى اخوه او نعمله و برده هنراضيها من غير ما ندى تزعل او احرج نفسى قدامها
محمد / اممممم اللى تشوفه بس صحيح انت اتكلمت فى الشقه و ما اتكلمتش فى الصيدليه مع انك وضبتها من ساعه ما كانت على الاحمر زمان على حسابك و دلوقت بيضتها و فرشتها على حسابك ايه مش هتقولى اكتبلك نصيبك خصوصا انك بتقول انك حطيت شبكه ندى فيها
حسام يبتسم و يسكت
محمد / بص يا حسام انا جايلى فلوس كمان تلت شهور هبنى شقه فوقك و انت لما ربنا يكرمك ابقى شطبها و خليها كمان باسمك ده حقك كلو ايه رايك
حسام / انا
محمد / كدا فاضل الصيدليه و الشقه دى و الرخصه لسه فيها دور كمان فى العماره صح
حسام / اه مالهم
محمد / المحل بشقتين بتاعك و الشقه دى بتاعه امك و نور و الدور اللى لسه متبناش هيبقى بتاع نور لو ربنا كرمنى و بنيتهولها هبه منى ليها ما كرمنيش امك او جوزها او هى لو ربنا كرمها تبنيه المهم ان فى شقه فى البيت باسم نور فوق الشقتين بتوعك
حسام / يا بابا انا ما كا نش قصدى
محمد / انا مش بقسم ورثى و انا عايش انا بحط النقط على الحروف عشان انا ما عادش عندى حاجه اديهالكوا و اللى يضيع حاجته بعد كدا هو حر
حسام / انا مش فاهم ايه لزمته الكلام ده
محمد / لزمته انى بديك حقك عشان تفك الكلاكيع اللى فى حياتك عاوز تبدا حياه جديده مع ندى حقك بس حياتك القديمه لازم تنضفها اروى لازم تتراضى انت فاهم
حسام توصله رساله على موبايله يفتحها يلاقى ندى نايمه على السرير كتافها باينه فى الصوره و بشعرها و حبيبه جنبها
محمد / حسام
حسام / ايوه يا بابا حاضر طبعا اللى تشوفه عن اذنك
حسام يقوم و يدخل اوضته جرى و يقفل الباب
…………………………………
فى المستشفى
على بيتصل بحد فى التليفون
صوت / الهاتف الذى طلبته غير متاح من فضلك حاول الاتصال فى وقت لاحق
على / افتح بقى يا اخى افتح اووووف
الدكتور يطلع على يجرى عليه
على / طمنى يا دكتور ارجوك مالها
الدكتور / الحقيقه الوضع مش مستقر خالص و لازم تفضل فى العنايه تحت الملاحظه لحد ما نشوف و يارب الاربعه و عشرين ساعه اللى جايين يعدوا على خير
على / للدرجادى
الدكتور يحط ايده على كتف على و يمشى خطوه و يرجع
الدكتور / صحيح انا اسف على البيبى
على عينه تنور
على / هى كانت
الدكتور / كان فى جنين عمره ست اسابيع انا اسف عن اذنك
على الدموع تنزل من عينه و يقعد فى الارض و هو بيعيط
…………………………….
فى اوضه حسام
حسام يتصل بندى بالتليفون ترد
ندى / لحقت اوحشك
حسام / فوق ما تتخيلى
ندى / ههههههههههههههههه
حسام / ايه الصوره الحلوه دى هاخد على كدا
ندى / يا سيدى النهرده صوره بكره تاخدها فى حضنك و تهشكها و تلاعبها زى ما انت عاوز انا لقيتها صاحيه و بتلعب قولت اصورهالك حلوه اوى صح
حسام / قمر طالعه لامها
ندى / هههههههههههههههههههههههههههههه
حسام / بس انا ما كنتش بتكلم عن حبيبه كان فى نور كدا فى الصوره مغطى عليها خالص
ندى / لا نور ايه
حسام / انتى انتى لابسه ايه
ندى / انت بتعاكس و لا ايه
حسام / ههههههههههههههه لا بجد عاوز اعرف
ندى / بجامه اوف شولدر كدا لونها احمر منقط باسود و برمودا اسود
حسام / يعنى مش قميص نوم زى ما قولتى
ندى / انت قليل الادب على فكره و انا مش هبعتلك صور تانى اقفل بقى
حسام / خلاص خلاص حقك عليا ايه ههههههههههههههههههههه دا انتى كلها تكه و تبقى مراتى
ندى / لا انا بجد اضايقت انا غلطت لما بعتلك الصوره كان المفروض اطلع بيبو بس
حسام / دى اكتر حاجه صح عملتيها فى حياتك و على فكره انا بكره عاملك مفاجاه استاهل عليها بوسه
ندى / بجد انا فعلا نفسيتى محتاجه مفاجاه قولى بقى قول
حسام / لا مش هقول حاجه الا لما اخد البوسه بتاعتى
ندى / تصدق فعلا انت قليل الادب مفيش بوس الا لما نكتب الكتاب انا غلطت لما بعتلك الصوره انت فاكرنى شمال و لا ايه لا فوق
حسام / بس بس بس انا بهزر بالراحه
ندى / لا مش بالراحه انا اصلا المفروض اتغير بقى و اكبر هبلى و سذاجتى بتخلينى اعمل تصرفات اندم عليها الواحد المفروض يتعلم من اخطاءه
حسام / اهدى يا ندى انا اسف والله كنت بهزر بس بجد عاملك بكره مفاجاه حلوه بس مش هقدر احرقهالك
ندى / عشان خاطرى يا حسام هو انا مليش خاطر عندك
حسام / انا بحبك اوى يا ندى و بكره هتتاكدى انى مستعد اعمل اى حاجه عشان اسمع منك الكلمه دى
ندى / عاوز تسمعها و لا تحسها ما انا سهل اوى اضحك عليك و اقولك انى بحبك بس انت عارف انى هبقى بكدب انا مش بغشك و لا بخدعك انا كنت صريحه معاك من الاول انى صعب اوى انسى اللى فات بس انت كمان لازم تقدر المجهود اللى ببذله عشان افتح معاك صفحه جديده لازم تقدر ده و تعرف انى بحاول على قد ما اقدر اديك الفرصه اللى انت تستحقها يمكن لو كنت اديتهالك زمان كان زمان ماما لسه عايشه و حياتى اسعد انا بحاول اصلح اخطاء زمان بس والله مش سهل
حسام / انا عارف و مقدر و فرحان جدا باللى احنا فيه و اقسم بالله انا بعمل كل اللى اقدر عليه و اكتر عشان بس استغل الفرصه دى و بكره هثبتلك كلامى
ندى / انا هقفل بقى عشان ارضع بيبو عشان بدات تاريف
حسام / اوك لو فضيتى يعنى فى اى وقت و حبيتى تكلمينى براحتك
ندى / اكيد يلا سلام
حسام / سلام
حسام يقفل التليفون و يتصل بحد تانى
حسام / ايوه يا متر ازيك …. الحمد لله تمام …. انت عندك نسخه من ورق البيت بتاعنا صح …. طب تمام عاوز منك الصبح عقد بيع شقتى اللى فى التانى علوى …..اه بابا هيبيعها ….. لا مش فلوس هو هينفل ملكيتها بس ….. تمام تمام ……… الف شكر هستناكوا …. الف شكر الف شكر سلام
………………………..
فى المستشفى
على قاعد بره العنايه و سمر تدخل تجرى
سمر / ايه اللى حصل أية مالها انا جيت على ملا وشى لما انت كلمتنى ايه اللى حصل انطق
على / اسالى نفسك ايه اللى حصل ايه ملهوفه عليها اوى كنتى فين الفتره اللى فاتت من حياتها كنتى فين
سمر / انت اللى خرجتنى من حياتها
على / ياريتنى خرجتك بدرى ما كنتيش اذيتيها بالشكل ده
سمر / انطق قولى بنتى مالها انطق
على/ أية رمت نفسها من الشباك عشان الناس حاولوا ياذوها بعد ما صورها و فيديوهاتها مع عمر بقت على موبايلات المنطقه كلها
سمر / انت بتقول ايه انت بتقول ايه انت
على / بقول اللى حصل بنتك كانت متغيره فى الفتره الاخيره عشان تقريبا كان فى حد بيبتزها هى كانت عارفه انها اتصورت او حاسه ما اعرفش
سمر تتصدم
سمر / يا ابن الكلب يا حسام يا ابن الكلب
على / اللى يتلفح بالحيه يستحمل اذاها ذنبها ايه المسكينه دى ذنبه ايه عمر ذنبه ايه الجنين اللى فى بطنها يموت بالطريقه دى
سمر تعيط على اخرها
على / بتعيطى انتى بتعرفى تعيطى لسه بتحسى
سمر / انا عمرى ما فكرت
على / صح انتى ما بتفكريش انتى بتاذى و بس اذيتى كل الناس اللى حواليكى حتى بنتك ما سلمتش منك انتى ايه ايه قوليلى ايه
سمر / طب هى عامله ايه دلوقت
على / ما اعرفش بيقولوا هنعرف بعد اربعه و عشرين ساعه انا اتصلت بيكى قولت حقك تعرفى مع انك والله ما ليكى اى حقوق لا عندى و لا عندها
سمر / بس انا مش هسكت انا مش هسكت وربنا
على / هتعملى ايه هتروحى البوليس و تقولى انا اللى صورت بنتى و اديت الصور لواحد ابن كلب نشرها مقابل فلوس انتى عبيطه و لا ايه
سمر / مش انا اللى صورت انا بس ساعدتهم يركبوا الكاميرا
على يتعدل فى وقفته و هو مش عارف يرد من الصدمه
سمر / حسام قالى ان كل الفيديوهات هتبقى عندى و انا بس هديلوا الجزء اللى يخص ندى هو قالى انها مراته و انهم متخانقين و ان كل همه بنته و مراته
على / و انتى كان كل همك الفلوس صح انهى مخ ده انهى غباء ده
سمر / انا كان كل همى ان البنت تتربى فى حضن ابوها انا
على / كان كل همك انك تفرقى بينا تاذينى و خلاص صح
سمر / انا غلطت انا عارفه بس أية ملهاش ذنب أية
على / أية اللى دفعت التمن أية اكتر واحده دفعت التمن تمن انك تكونى امها مين اللى ركبوا الكاميرا و ركبوها فين و ازاى انتى هتسكتى على حق بنتك
سمر / لا مش هسكت والله ما هسكت دا انا لو هيعدمونى فيها لازم الكلاب دى تتحاسب و تاخد عقابها انا هروح القسم و احكيلهم على كل حاجه هقولهم ان بنتى ملهاش ذنب هقولهم ان حسام و الواد اللى معاه هما اللى ركبوا الكاميرا انا هقول على كل حاجه هفضحه فى كل حته هقول على كل حاجه
على يبصلها و ساكت
سمر / انت بتبصلى كدا ليه
على / هديكى عنوان المحامى بتاعى راجل كويس روحيله و احكيله و شوفى رايه
سمر / انا مش هسيب بنتى الا لما اطمن عليها و بعدين انا مش خايفه
على / انتى ما تفرقيش معايا انا بس مش عاوز أية تتاذى اكتر من كدا مش عاوزها تتفضح بيكى اكتر من كدا البوليس كان فى الشقه و اكيد هيجوا هنا و ياخدوا اقوالنا و طبعا حادثه زى دى هتولع الجرايد و النت و الوحيده اللى هتدفع التمن هى أية و بس
سمر / انا لسه معايا صور ندى زى ما فضح بنتى هفضح مراته
على / ما كفاكيش كل الناس اللى اتاذت بسببك لسه عندك استعداد تاخدى ناس تانيه ملهاش ذنب فى رجليكى صح
سمر تبصله و تسكت
على / روحى للمحامى و احكيله كل حاجه و خليه يكلمنى و نشوف رايه ايه
سمر تبصله
على/ انتى لحد دلوقت بعيده عن الصوره و انا ما اعرفش حاجه و عمر تليفونه مقفول و برده ما يعرفش حاجه اللحقى روحى للمحامى و شوفى اقل حل فى الخساير دا شرف بنت اللى بنتكلم عنه شرف اسره و عيله
سمر / ماشى هات العنوان
………………………..
فى الصيدليه عند حسام
تليفون حسام يرن رقم غريب يرد
سمر / بتعرف ترد يعنى
حسام / مين معايا
سمر / لحقت تنسى صوتى و لا ايه
حسام / سمر
سمر / عليك نور و اوعى تقفل السكه تخسر كتير اوى حتى حبيبه القلب هتخسرها
حسام / والله ازاى بقى
سمر / على
حسام / ماله
سمر / لو مش عاوز على يطلعلك زى الخازوق و يبوظ كل اللى عملناه لازم اقابلك و اتكلم معاك و كلو بتمنوا
حسام / على ما يقدرش يعمل اى حاجه
سمر / خلاص اعتبر انى ما كلمتكش و جازف بقى بس المره الجايه انا مش هقدر اساعدك عشان انا بقيت كرت محروق انت عارف رقمى سلام
حسام / استنى اقابلك فين
سمر / ايوه كدا شاطر مكان ما تحب
حسام / خلاص هقابلك مكان كل مره
سمر / و ماله امتى
حسام / كمان ساعه كويس
سمر / هكون هناك من دلوقت سلام
حسام / سلام
حسام يقفل الخط و يسند بايده عالكونتر قدامه و هو مخنوق
حسام / مش هخلص منك يا على يعنى مش هتسكت و ترتاح و تريحنى ماشى اما نشوف اخرتها معاك هوووووووووووووووووووووووف
……………………………….
فى شقه ندى
نور / جبتلك الكريمات اللى طلبتيها
ندى / تعالى بقى نعمل زى زمان فاكره اول مره علمتينى احط ماسك على وشى انا تقريبا مش فاكره اخر مره اهتميت بنفسى كانت امتى بجد حسه انى كبرت خمسين سنه السنه اللى فاتت دى
نور / انتى ناويه على ايه يا ندى
ندى / فى ايه
نور / انا و انتى عارفين الحقيقه كامله
ندى / ههههههههههههههههههههه مفيش حاجه اسمها حقيقه كامله لا انا اعرف و لا حتى حسام يعرف مفيش حد عنده الحقيقه كامله غير ربنا
نور / قصدك ايه
ندى / بصى يا نور انا تعبت السنه اللى فاتت علمتنى انى اللحق اعيش الموت ما بيستناش ماما اتخطفت منى فى لحظه حياتى كلها ملهاش اى قيمه انا عندى سبب اعيش عشانه بنتى و مش هسمح لاى حاجه تمنعنى انى اوفرلها احسن حاجه ليها
نور / ايوه بس
ندى / حسام بيحبنى اوى و انا عارفه من زمان بس طريقته كانت غلط فى انه يعبر عن الحب ده بعدنى عنه و انا كمان كنت طايشه و راسمه للدنيا شكل و طعم فى خيالى فتعبت و تعبته و تعبت كل اللى حوالينا بعد ما كنا عيله سعيده كلنا اتفرقنا و كلنا تعسا كسبنا ايه يا نور
نور تهز راسها
ندى / يمكن ربنا ادانى الفرصه انى اصلح اللى فات
نور / عاوزه تفهمينى انك قدرتى تسامحى حسام على كل اللى عمله
ندى / لا طبعا و هو عارف ده على فكره بس دا ما يمنعش انى اتعايش مع الماضى كام ست يعنى جوزها ضربها و كام ست جوزها خانها و كملت عشان خاطر العيال فرصه تانيه مش هتخسر يمكن تكون دى النقطه الصح فى حياتى و ابدا منها
نور / طب و خطيبك
ندى / ما عادلوش وجود فى حياتى انا حاولت بس الظاهر ان كل الطرق اللى مشيت فيها سكتها كانت غلط و دفعت التمن
نور / ربنا يعملك اللى فيه الخير ندى ممكن اسالك سؤال
ندى / اكيد
نور / انتى تعرفى على من امتى
ندى / المفروض انا اللى اسالك السؤال ده
نور / فاكره جارتى اللى فى الشقه اللى جنبى لما كنت متجوزه
ندى / اه انتى بتحبيها اوى و كنتى بتتكلمى عنها طول الوقت لدرجه ان عمتى كانت بتغير منها جدا
نور / اه هى دى على طلع شغال عند جوزها و كان بيجى كتير و كان فى صدف كتير بنا و اتكلمنا فى التليفون فتره خصوصا لما اطلقت
ندى / اه كنتوا بتتكلموا فى ايه
نور / مش حاجه محدده بس كنت برتاح اوى فى الكلام معاه
ندى / كنتى ؟؟؟
نور / هو انشغل فى الفتره اللى فاتت فالمكالمات بينا قلت شويه
ندى / يعنى اخر مره كلمتيه امتى
نور / مش فاكره بالظبط بس اللخبطه اللى حصلت الفتره اللى فاتت انا نفسى كنت مشغوله
ندى / اه فهمت
نور / هههههههههههههههههههههههههههه انا كنت بسالك و سبحان الله بقيت انا اللى بجاوب
ندى تبتسم من ورا قلبها
نور / قوليلى بقى تعرفوا بعض منين انا عارفه ان أية صحبتك و عمر كان المعيد بتاعك و انه جارك بس اكيد اتعاملتى معاه اكيد يعنى تعرفى تفاصيل عنه اكتر من اللى انا اعرفها
ندى / انتى مهتميه بيه اوى كدا ليه
نور / اهو بدل ما تجاوبى بتسالى
ندى / ما انا لازم افهم انتى بتدورى على ايه بالظبط عشان اعرف اجاوبك
نور / امممم مش عارفه بس انتى اختى و مش هكدب عليكى انا كنت برتاح اوى لما بنتكلم بجد ساب فراغ كبير فى حياتى
ندى / بتحبيه
نور / ههههههههههههههه حب ايه يا بنتى لا طبعا ما ينفعش
ندى / ليه
نور / انتى عارفه ظروفى يا ندى انا مطلقه و ما بخلفش اكيد عمره ما هيبصلى
ندى / انا بسال عنك انتى بتحبيه
نور / يا بنتى احب واحد خاطب ازاى بس
ندى / هو حكالك عن خطيبته
نور / ما كانش بيحب يتكلم عنها يمكن قال اسمها مره فى وسط الكلام تصدقى اسمها ندى
ندى / والله ؟؟؟
نور / هههههههههههه يا بت بطلى بقى اسلوب الدحلبه ده
ندى / انا مش بدحلبك انتى اللى عاوزه تتكلمى
نور / بصراحه اه
ندى / و ناويه تعملى ايه
نور / الموقف الاخير اللى حصل بينه و بين حسام بسبب مرات ابوه ده بوظ كل حاجه و هو ما بيردش عليا من ساعتها قد ايه الدنيا دى صغيره
ندى / اوى
نور / على زيى شاف كتير حتى خطيبته دى سابته و اتجوزت غيره و اهلها هانوه جامد اوى ما كانش بيحكى تفاصيل بس كان دايما يقول انها وجعته فى قلبه اوى وجع مش عارف هيعالجه ازاى و لا هينساه ازاى
ندى / امال خطبها ازاى يعنى
نور / بقولك ما كانش بيحكى تفاصيل بس اللى فكراه انه كان مسافر يدور عليها و رجعت و انشغل و انا انشغلت مش فاكره اوى بس
ندى / هو حسام عارف انك تعرفى على
نور / عرف فى المستشفى لما أية جابت حبيبه و اتخانقوا و ما قولكيش ولعوا الدنيا بس بابا و ماما عارفين و هو قابل ماما كذا مره و حتى أية و عمر انا قابلتهم و اتغديت معاهم و عارفين بعض
ندى / للدرجادى
نور / ايوه يا بنتى والله ماما كانت معايا حتى يوم ما اتعرفت على أية اول مره
ندى / حقيقى دنيا صغيره اوى
نور / هههههههههههههههههههههههههه فعلا حكايه و لا فى الاحلام بس الغريب اوى ان عمر سالنى عن اسمى بالكامل فى مره و قولتهوله ازاى ما اخدش باله اننا ممكن نكون قرايب و يقولى انك صاحبه مراته مثلا يمكن ما كانش اتجوز ساعتها مش فاكره تصدقى
ندى / هو احنا هنقضى اليوم كلو رغى ما تفكك من السيره دى و تيجى نعمل حاجه مفيده
نور / تصدقى عندك حق تعالى المسك ده جامد و بيجيب نتيجه من اول مره تعالى اما احطهولك
ندى / يلا
ندى تغمض عنيها بحزن و نور تحطلها الكريم على وشها
…………………………..
فى الكافيه
سمر قاعده قدامها كبايه قهوه حسام يدخل و يقعد
حسام / خير قولى اللى انتى عوزاه و بسرعه عشان انا مستعجل جدا
سمر / انت عارف انا جايه منين دلوقت
حسام / و هعرف منين يعنى براقبك مثلا
سمر / من المستشفى
حسام / انهى مستشفى خير فى ايه
سمر / أية بنتى رمت نفسها من الشباك لما صورها و فيديوهاتها اتنشرت فى الشارع
حسام / ايه !!
سمر / زى ما سمعت انا و انت اتفقنا اتفاق انا وفيت و انت لا
حسام / بصى قبل اى حاجه انا مليش اى دخل فى اللى حصل كل حاجه كانت عندك ماشى
سمر / انا عاوزه طريق ابن الكلب التانى
حسام / هديهولك
حسام يفتح الموبايل و يدور على نمره و يطلع من جيبه نوته صغيره و قلم و يكتب
حسام / دا اسمه و رقم تليفونه و عنوانه ما اعرفش عنه اكتر من كدا
سمر / شكرا
سمر تقوم تقف حسام يقوم يقف
حسام / كنتى ناويه تحكيلى حاجه عن على
سمر / اه قرب شويه عشان ما حدش يسمع
حسام يستغرب و يقرب ترفع ايدها بسكينه و تحاول تغرزها فى قلبه يتحرك تيجى فى كتفه و هو بيصرخ من الالم و الناس تتلم و تمسك سمر
سمر / موت يا ابن الكلب مووووووووت ……… سيبونى سيبونى اموته سيبونى
………………………………….
فى القسم
على / هو ده اللى اتفقنا عليه
سمر / انا ام كنت مستنى منى ايه اروح ارغى مع المحامى انا خدت حقى و حق بنتى المفروض تشكرنى انى خلصتك انت و ندى منه و من قرفه
على / والله انتى مجنونه حد عاقل يعمل كدا اصلا حسام ما ماتش حسام فى المستشفى
سمر / انا غرزت السكينه فى قلبه
على / المحامى قالى جت فى كتفه بس فى الحالتين الجريمه شروع فى قتل
سمر / يعنى مش هيموت
على / صبرنى يارب
سمر / لازم يموت يا على لازم يموت زى ما قتلنى انت فاهم لازم يموت
على / انا مش مصدقك بصراحه بصى خلى دول معاكى و المحامى هيتابع القضيه انا هخلينى جنب أية فى المستشفى يمكن تفوق
سمر / خد بالك منها يا على هى ملهاش ذنب ملهاش اى ذنب
على / عارف سلام
سمر / مع السلامه
……………………………
فى المستشفى عند حسام
ندى / سلامتك يا حبيبى مالك الف سلامه
حسام / انا كويس كويس مفيش حاجه ما تقلقيش
امانى / مين الست اللى عملت فيك كدا و ليه
حسام / جت بسيطه يا جماعه الدكتور طمنى مش محتاجه القلق ده كلوا
نور / حسام هى الست دى ليها اى علاقه بعمتى او اروى
حسام / لا طبعا
امانى / انتى بتقولى ايه يا نور عمتك و اروى مش بلطجيه عشان يعملوا كدا فى حسام
حسام / ماما لو سمحتى الموضوع مش مستاهل والله انا كويس
ندى / الحمد لله
امانى / انت عملت محضر صح اتصل بالمحامى يتابع الموضوع الست دى لازم تتعدم
ندى / مين دى يا حسام و ليه تعمل فيك كدا
حسام / نونو حبيبتى انا لو عليا ادى للست دى فلوس عشان خلتنى اشوف اللهفه دى فى عنيكى
ندى تبتسم و امانى تنفخ
امانى / هو ابوكى فين يا نور لحسن هتنقط
نور / ما اعرفش
امانى / عن اذنكوا
امانى تخرج من الاوضه
نور / انا بجد قلبى مش مرتاح للى حصل ده
حسام / سمر اللى عملت كدا يا ندى بس ما رضتش اتكلم قدام ماما
نور / سمر مامه أية
حسام / اه
نور / انا عارفه انها ست مجنونه و مش كويسه بس لدرجه انها تحاول تقتلك
حسام / أية حاولت تنتحر باين ما استحملتش الضغط العصبى بعد اللى حصل
نور / فعلا كان شكلها مش طبيعى خالص فى المستشفى
ندى تفتح الباب و تطلع بره
حسام / اللحقيها يا نور ارجوكى
نور تجرى ورا ندى تلاقيها بتعيط
نور / اهدى يا ندى ما يصحش كدا
ندى / انا مش عارفه اعمل ايه انا تعبت بجد تعبت
نور / تحبى نروح نزورها نطمن عليها انا متاكده ان ده هيريحك
ندى / نطمن على حسام الاول
محمد يدخل
محمد / مالك يا ندى بتعيطى كدا ليه يا بنتى
نور / متاثره عشان حسام يا بابا طبعا
محمد / حسام كويس يا بنتى و الحمد لله جت سليمه تعالى يا بنتى تعالى
محمد ياخد ندى فى حضنه و يدخلوا لحسام الاوضه
………………………….
فى المستشفى عند أية تانى يوم
على / يعنى ايه
الدكتور / يعنى كومه يا استاذ على يعنى فاقده الوعى لفتره طويله
على / و هتصحى امتى
الدكتور / والله الحالات دى بتختلف من واحد للتانى فى ناس بتقعد معاها ايام و ناس بتقعد معاها شهور و ناس سنين
على / لا اكيد فى حل لو هتسافر بره انا مستعد انا ممكن ابيع اللى ورايا و اللى قدامى بس هى تخف انا مش فقير على فكره انا … انا عندى محل كبير تمليك وواحد اكبر منه ايجار و… شقتين تمليك و ….محل صغير و …عربيه و
الدكتور / ربنا يوسع عليك بس صدقنى مفيش فايده هما مش هيعملولها حاجه اكتر من اللى احنا بنعمله احنا نقلناها اوضه لوحدها و تقدر تطمن عليها عن اذنك
على واقف مسهم
……………………………….
فى المستشفى عند حسام
حسام فى الاوضه لوحده يتكلم فى التليفون
حسام / مش هتاخد حاجه الا لما اطمن انك نفذت
الراجل / طب اى حاجه تحت الحساب تصبيره طيب دا انا حبيبك
حسام / بص انا لسه ما حاسبتكش على الكلب اللى انتى جبتهولى و حسابى معاك و معاه لما اخرج من هنا
الراجل / رامى ؟؟ يا باشا قشر بس و انا اجيبهولك فى شوال زعلك فى ايه الكلب ده
حسام / لا خلينا احنا فى الحوار التانى الاول و بعدين لما اخرج من المستشفى هشوف ده بنفسى
الراجل / طب يا باشا هى مش الست الدكتوره اخت حضرتك بتقف فى الصيدليه اصل الحوار صعب اوى و السوق نايم
حسام / اقسم بالله لو هوبتوا ناحيه الصيدليه او اختى انا مش هقتلك لا انا هخليك تتمنى تموت على اللى هتشوفه على ايدى
الراجل / و انت قد كلمتك يا باشا
امانى تطلع من الحمام
حسام / خلص و كلمنى سلام
حسام يقفل السكه
امانى / كنت بتكلم مين
حسام / شركه ادويه كنت بفكرهم يبعتوا الحاجه عشان مش هعرف اروح استلمها
امانى / اه انت لازم ترتاح
حسام / هو انا هخرج من هنا امتى
امانى/ لما اطمن عليك الاول
حسام / ما انا زى الفل اهو دول حياله كام غرزه فى كتفى يعنى مش مستاهله
امانى / طبعا عاوز تلحق تروح لحبيبه القلب عشان تسحلك وراها
حسام / و هو انا هنا بعيد عنها يعنى
امانى / اعرف بس فيها ايه يعنى هاه
حسام / عاجبنى فيها انى بحبها و عجبانى
امانى / اشبع بيها هقوم اصلى
…………………………
فى المستشفى فى اوضه أية
على قاعد على كرسى تحت رجلين أية و بيعيط و هو حاطت ايده على رجلها
على / من امتى بتسمعى كلامى يعنى خلاص يعنى لو قولتلك ارمى نفسك فى البحر ترمى نفسك فى البحر …. انا اسف اوى ما كنتش فى وعيى انا مش عارف طلبت منك ازاى كدا …. اصلا بتروحى ليه انا قولتلك روحى لامك ما روحتيلهاش ليه بترجعيلهم ليه …. انا مش هقدر اعيش بذنبك كفايا ذنب النونو كفيا ابن اخويا اللى راح بسببى انا عمرى ما هسامح نفسى …. عارفه لما تفوقى انا هعملك فرح ما حصلش و مش زى كل مره كلام و نجهز كل حاجه و فى الاخر ما يتعملش دا انتى هتخرجى من المستشفى فى زفه توصلك لحد البيت ….. هفرشلك الشارع ورد و نور و هجيب دى جاى و ساقع و افرق على الناس كلها ….. تعرفى مش هخليكى تعيشى فى الشقه القديمه انا هفرشلك بيت بابا من الاول و جديد و هبيضه و هخليه جنه …. و فرحك بقى هيبقى فى احسن فندق و تلبسى احلى فستان …. و لو عاوزه مغنين معينين هجيبهم … خفى انتى بس و قومى …. تعرفى لو عوزانى اوطى على رجل امك و ابوسها هبوسها و انتى عارفه ان دى اصعب حاجه ممكن اعملها بس عشانك هعملها بس انتى تفوقى بقى فوقى و حياه عمر و غلاوته عندك انا عارف انه غالى فوقى بصى قومى اضربينى بالجزمه بس قومى قومى و لو زعلتك تانى يبقى ليكى حق بس ابوس رجلك قومى بقى
الباب يتفتح و منال تدخل تبص على على و هو بيعيط تروحله يقوم و يمسح دموعه
منال / ايه اللى حصل مالها أية
على / انا مش راجل يا حجه أية اول حد يثبتلى انى مش راجل و لا استاهل اللى الحج عمله معايا و لا استاهل حتى ان اعيش أية قالتلى بابشع صوره انت كل اللى بيحصل فيك حلال كل اللى شوفته فى حياتك حلال فيك
منال / ليه بس كدا ايه اللى حصل
على / انا هحكيلك كل حاجه اقعدى
منال تقعد
………………………………..
فى الشقه عند ندى
نور / ما هو ما بيردش عليا كلميه انتى
ندى / حسام يزعل
نور / انا هقوله يابنتى ما هو لازم تكلميه عشان تعرفى أية فى انهى مستشفى و تروحى تطمنى عليها هى مش صحبتك
ندى / انا اصلا مش مرتاحه لفكره اننا نروح بابا اصلا هيبقى لوحده لو احتاج حاجه
نور / باباكى مش ناقصه حاجه و جنبه الاكل و الميه و الجرنال و الكتب لو حب يقرا اى حاجه و احنا اصلا مش هنتاخر يلا يا ندى بقى عشان خاطرى
ندى / للدرجادى مستعجله تصالحيه
نور تبصلها و تبص فى الارض
ندى / هوووووووووف حاضر هاتى الموبايل
ندى تتصل
نور / ايه ده انتى حافظه نمرته
ندى ترتبك
ندى / ايوه اصل انا كنت بطلب دليفرى كتير و كنت بتصل عليه انتى عارفه قد ايه بحب الشاورما اقصد يعنى
نور / تصدقى صح ما جاتش فى بالى
على يرد
على / الو
ندى / الو
على / ندى ؟؟؟ عامله ايه اخبارك و حبيبه و بابا
ندى / انا عرفت ان أية فى المستشفى و كنت يعنى لو …مش هيضايقك .. اجى انا و نور يعنى … نطمن عليها
على / اه
ندى / ممكن تدينى اسم المستشفى و رقم الاوضه
على / اكيد هبعتهملك فى رساله
ندى / شكرا احنا لابسين مسافه السكه مش هنعطلك كتير
على / لا و لا يهمك طبعا
ندى / سلام
على / مع السلامه
ندى تقفل و هى بتعيط
نور / انتى بتعيطى و لا ايه قالك ايه البت جرالها حاجه
ندى / لا انا بس يعنى
نور/ خلاص خلاص
رساله توصل لموبايل ندى
نور / بعت العنوان ؟؟؟؟طب يلا
……………………..
فى المستشفى عند على
منال / الله يعينك و يعينها و يعين الغلبانه دى
على / انا تعبت يا حجه
منال / يا ابنى الدنيا كدا ياما دقت على الراس طبول و لسه ياما هتدق الضربه اللى ما تموتكش تقويك يا على
على / و نور
منال / هى كمان ما لهاش ذنب انت غلطت لما قسيت على أية و خدتها بذنب امها كمان ما ينفعش تقسى على نور و تاخدها بذنب اخوها انت ما شوفتش منها اى حاجه وحشه يا ابنى
على / ازاى يعنى
منال / انت مش قولت ان نور ما تعرفش حاجه عن اللى بينك و بين ندى
على / ايوه بس اكيد حسام بيستغلها
منال / ما انت برده قولت ان حسام ما كانش يعرف حاجه عن اللى بينك و بين نور
على / ده اللى هو قاله لأية بس الحقيقه ربنا وحده اللى يعلم بيها
منال / امممممم انت ايه مشكلتك مع نور دلوقت
الباب يخبط و ندى تدخل شايله حبيبه و نور وراها على و منال يقفوا و على ما بيشلش عينه من على ندى و هى باصه لمنال و مبتسمه ابتسامه مصطنعه
ندى / الف سلامه
نور تجرى على منال تحضنها
منال / لا زعلانه منك
نور / ندى بنت عمى و مرات اخويا و حبيبه بنتها حكيتلك عنها كتير لو فاكره
منال / بسم الله ما شاء الله احلى بكتير من ما بتوصفيها ورينى النونو ….. بسم الله ما شاء الله شبهك بالحته ما خادتش حاجه من باباها
على / الحمد لله
نور/ ازيك يا على
على يهز راسه و يبص الناحيه التانيه
نور / اتصلت عليك كتير ما ردتش عليا
ندى / اخبار أية ايه
على / الدكتور قال كومه و يعالم هتفوق منها امتى
ندى تروح جنب أية و تمسك ايدها و توشوشها
ندى / ياترى اللى حصلك كان بسببى و لا اللى حصلى كان بسببك و لا مين السبب بالظبط قومى عشان تاخدى حقك قومى
نور / بتقوليلها ايه ؟؟؟؟
ندى / بقولها تفوق بقى
منال/ اقعدوا يا بنات واقفين ليه
ندى / بيتهيالى لازم نمشى بابا لوحده فى البيت
منال / انتوا لحقتوا تقعدوا
نور / والله يا طنط ظروفنا زى الزفت حسام فى المستشفى و عمى تعبان و احنا بين هنا و هناك قولنا نخطف رجلنا و نبص على أية
على / تحبوا اوصلكوا
ندى و نور فى نفس الوقت
نور / اوك
ندى / لا
ندى و نور يبصوا لبعض و ندى بتبص لعلى
ندى / مش عاوزين نتعبك عن اذنكوا
ندى تمشى و نور وراها
على / شوفتى
منال / شوفت ايه يابنى
على / و لا حاجه و لا حاجه
منال / انت متحامل على نور اوى يا ابنى
على / انا تعبت خلااااااااااص تعبت
تليفون على يرن رقم غريب يرد
على / الو
غاده / الو على حقى
على / ايوه مين
غاده / انا غاده زميله عمر
على / اه اهلا وسهلا
غاده / هو عمر فين ما جاش الشركه و لا الكليه من امبارح و تليفونه مقفول
على / معلش يا غاده عمر بيمر بظروف صعبه اوى الفتره دى و سافر
غاده / ظروف ايه خير فى ايه ماله
على / اعزرينى انا ما اقدرش احكيلك حاجه
غاده / بس حتى انت ما تعرفش عنوانه و لا رقم تليفونه افرض لا قدر الله جراله حاجه نطمن عليه ازاى
على / لا معايا عنوانه و رقم تليفون البواب … البواب انا معايا رقم تليفون البواب
غاده / ايه ؟؟؟
على / هههههههههههه معلش اصلى كنت ناسى خالص حوار البواب و انا برده كنت محتاجه بس مش عارف اوصله و ما ينفعش اسافرله
غاده / طب هو انا هبقى بتقل عليك لو اديتنى العنوان و رقم التليفون اصلى فعلا محتاجاه ضرورى
على / انا مش عارف ينفع و لا لا الصراحه
غاده / ارجوك يا على ارجوك
على يبص لمنال تهز راسها اه
على / حاضر هبعتهملك فى رساله
غاده / شكرا سلام
على / سلام
على يقفل و يتصل بحد تانى
على / الو … ازيك يا عم فرج …. اه انا على اخو الاستاذ عمر اللى ماجر فى الرابع مظبوط …. هو عامل ايه ….. اه … طيب …. معلش اطلع خبط عليه و قوله انى عاوزه ضرورى حياه او موت موضوع ما يتحكيش فى التليفون و لازم ينزل مصر فورا …. شكرا … سلام
على يقفل
على / انا اتصلت عليه يجى مليون مره من امبارح غير متاح مش عارف نسيت ازاى ان رقم البواب معايا تاهت عن بالى خالص
منال / بتحصل يا ابنى ربنا يعينك
…………………………..
فى المستشفى عند حسام
حسام / و ايه اللى يوديكوا هناك اصلا
نور / بنعمل الواجب يا حسام ما تنساش انها صاحبه ندى اصلا
حسام / و ندى ما جاتش معاكى ليه
نور / روحت عشان عمى لوحده فى البيت و انت كدا كدا خارج يعنى مش مستاهله
حسام / ماشى
نور / حسام ندى ما كانتش عاوزه تيجى معايا عشان انت هتزعل و انا اللى اتحايلت عليها عشان ما كانش ينفع اروح لوحدى
حسام / والله كمان و انتى اصلا تروحى هناك ليه بقى ان شاء الله
نور / ما تقولى حاجه يا ماما
امانى / ما هو انا لو افهم اقول
نور / تعرفى كان مين هناك طنط منال و على
امانى / على ؟؟؟ طب مش كنتى قولتى كنت جيت معاكى
حسام / والله
امانى / والله يا حسام انت لو شوفت على ده هتحبه لله فى لله دا سكره
حسام / اكيد طبعا مدام انتى حبتيه يا ماما هيكون سكره امال هيكون سم مثلا
نور / و بعدين زياره المريض واجب
حسام / اقفلى السيره بترفعيلى ضغطى صبرنى يارب
امانى / تعالى يا نور احكيلى عامل ايه و اخباره ما شوفتوش من يوم العزا بتاع الحج
نور / احنا ما قعدناش اصلا اول ما روحنا …..
امانى / اقعدى اقعدى احكيلى احكيلى
حسام / صبرنى يارب
……………………………..
فى اسكندريه عند عمر بالليل
جرس الباب يضرب عمر يروح يفتح يلاقى غاده
عمر / غاده ؟؟؟ عرفتى مكانى ازاى … على صح
غاده / انا هستناك فى العربيه اللبس و انزلى
عمر / حاضر
……………………………
فى البيت عند امانى
محمد / انت متاكد من اللى بتعمله ده
حسام / اه متاكد و خصوصا بعد اللى حصل
محمد / ايوه بس
حسام / انا اتفقت مع المقاول هيجيب الحاجه و يشتغل فى الشقه اللى فوق و لو ربنا كرمنا بفلوس لحد ما يخلص هخليه يعمل الشقه بتاعه نور كمان
محمد / يا ابنى انا مبتكلمش عن كدا
حسام / بنتى و مراتى لازم ما يتبهدلوش من بعدى
امانى / و مين اللى هيبهدلهم ان شاء الله احنا
اوحسام / ما قولتش كدا بس انا هرتاح كدا اكتر و بعدين ماشى نعمل عقدين واحد من بابا ليا و التانى منى لندى هو فى ايه يا بابا هو حضرتك بتندمنى انى جيتلك دغرى
محمد / لا طبعا بس
حسام / ده هيريحنى من فضلك
محمد يمضى و امانى بتفرك
امانى / الف مبروك يا دلدول انا داخله انام تصبحوا على خير
……………………………
فى كافيه فى اسكندريه
غاده / انا مش قادره افهمك يا عمر انت بجد مش متخيل القلق الرهيب اللى كنت فيه لحد ما جبت العنوان
عمر / انا فعلا محتاج فتره
غاده / طب على الاقل بلغ حد من زمايلك يقدملك اجازه يعنى هتفرح لما تعب السنين اللى فاتت دى كلها يروح هدر و تتفصل
عمر / انتى عمرك ما هتفهمى اللى انا فيه
غاده / انا فعلا مش فاهمه فى ايه فى الدنيا يخليك تعمل كدا
عمر / ظروف يا غاده لو سمحتى
غاده / من امتى بتخبى عنى يا عمر دا حتى على ما رضيش يقولى حاجه انا ضربت المشوار ده كلو عشان اطمن عليك
عمر / الموضوع كبير و وحش و انا مش ناقص يمكن وقت تانى اقدر احكيلك
غاده / على العموم احنا يادوب نروح تلم حاجتك و ترجع معايا مصر عشان بكره الصبح لو ما روحتش الكليه هيبقى فى مشكله كبيره جدا انت فاهم
عمر / طظ
غاده / يعنى ايه طظ
عمر/ بصى انا هريح انا هتصل بمدام يسريه تحاول تعملى اجازه ماشى
غاده تنفخ عمر يفتح موبايله و لسه هيتصل توصله رسالتين يفتح الاولى لقد تجاوزت الحد الاقصى للمكالمات التى لم يرد عليها احد التانيه
أية / اللحقنى هيموتونى
تليفون عمر يرن
عمر / الو
على / هو انت مش البواب طلعلك و قالك تفتح موبايلك عاوزك ضرورى
عمر / هو فى ايه ايه اللى حصل
على / لازم تنزل مصر حالا انت فاهم حالا
عمر / على ما تخبيش عليا فى ايه أية جرالها حاجه
غاده / مالها أية
على / لما تنزل مصر هتعرف
عمر / رد عليا فى ايه
على / أية رمت نفسها من البلكونه عشان الاهالى اتجمعوا و حاولوا ياذوها
عمر يقوم يقف و هو ساكت و يسيب غاده و يجرى تطلع فلوس و تحاسب و تجرى وراه عمر بيحاول يوقف تاكس
غاده / عربيتى هناك فى ايه
عمر يمسك ايد غاده و يجروا ناحيه العربيه و يركبوا
عمر / تعرفى تطيرى
غاده / حاضر طيب بالراحه طب افهم
عمر / هقولك كل حاجه فى السكه بس اطلعى يلا
غاده تسوق بسرعه
………………………………..
فى البيت عند ندى
حسام يخبط على الباب ندى تروح تفتح تشوفه تفتح الباب
حسام / الله دا انا امى دعيالى النهرده
ندى / انت تعبان و ما ينفعش تفضل واقف
حسام / مالك فى ايه
ندى / تعبانه شويه
حسام / سلامتك نروح لدكتور
ندى / مش هيعملى حاجه
حسام / انا كنت عاملك مفاجاه امبارح بس ما ظبطتش بس احنا فيها
ندى / فى ايه يا حسام
حسام / اتفضلى يا ستى
حسام يدى لندى العقد
ندى / ايه ده يعنى
حسام / دا يا ستى عقد تمليك باسمك للشقه دى عشان تشغلى التكييف و تتصرفى براحتك الشقه من النهرده بقت بتاعتك
ندى / انت بتتكلم جد
حسام / انا وعدتك انتى بس اشرى و انا انفذ
ندى / بس دى كتير اوى يا حسام كتير اوى بجد
حسام / مفيش حاجه فى الدنيا تغلى عليكى يا قمر
ندى / ربنا يخليك ليا يارب و ما يحرمنيش منك ابدا
حسام / امين يا ستى المهم ايه مفيش مكافاه على المفاجاه الحلوه دى
ندى / ايه انت هتنهب ما انا لسه دعيالك
حسام / يا ساتر دا انا حتى عيان و متعور و عندى واوا ايه مفيش بوس الواوا طيب
ندى / اطلع بره يا حسام
حسام / هههههههههههههههههه خلاص خلاص كنت بهزر
ندى / اخبار نور ايه
حسام / غريبه انك بتسالى دى طول الوقت معاكى
ندى / لا عادى كنت بحاول افتح كلام بس واضح انى فاشله هههههههههههههههههههههههه
تليفون حسام يرن
حسام / يووووه لازم انزل هتعوزى حاجه
ندى / سلامتك سلام
ندى تقوم تقفل الباب ورا حسام و تدخل اوضه ابوها قاعد بيقرا الجرنال
ندى / سيب ده و اقرا ده احلى
مصطفى يبصلها
ندى/ دا عقد تمليك الشقه دى باسمى
مصطفى يبص فى الارض
ندى / عارفه انه مش كفايا بس ما تخافش بكره هاخد باقى حقى من حبابى عنيهم بكره يندموا على كل اللى عملوه فيا
مصطفى يبص فى الجرنال
ندى / و تعرف انا حقى مش مع حسام و مامته و عمتى و بس لا دا الراس الكبيره على دوره لسه جاى
مصطفى يقفل الجرنال و يبصلها
ندى / هردله الوجع اللى حطه فى قلبى اضعاف هخليه يندم على اللى عمله معايا شوفت اللى كان بيقولى استنيتك و كنت تعبان فى بعدك و مش عاوز من الدنيا غيرك كان طول الفتره اللى فاتت دى مع نور تفتكر حسام اللى …. لا حسام كان معايا هناك و هما اتعرفوا صدفه عند جارتها ……هههههههههههههههههه طب يعنى ما لوش عزر يعنى البيه ما صدق لقى واحده غيرى ……. تفتكر كان عارف انها اخت حسام و بيحاول ينتقم منه زى ما انتقم منى تفتكر ………… بعد اللى شوفته فى حياتى بقيت اتوقع اى حاجه من اى حد ……. ما تبصليش كدا اشمعن هو اللى قام دخل الاوضه قال يعنى بيساعدنى كان اولى بعمر يقوم ده بيته أية مثلا ….. أية … بيقولوا اتصورت و صورها اتنشرت فى كل حته و حاولت تنتحر عشان تغطى على الفضيحه ………. دا انتقام ربنا ليا بس من مين مستحيل تكون بتصورنى و تصور نفسها اكيد ما كانتش تعرف ان فى كاميرا او ان فى تصوير اكيد حسام بيقول انه اتفق مع سمر مامتها و برده مستحيل مامتها تعمل كدا فى بنتها …… تعرف يا بابا على بيكره أية و امها جدا حتى لو انكر ده هو اللى عمل كدا حسام كان معاه حق فى اللى قالهولنا ان على هو اللى متفق معاه لكن قال انها سمر قدام نور و أية عشان نور ما تعرفش انى كنت مخطوبه لعلى بس ليه ايه مصلحه حسام ان العلاقه بين على و نور تستمر …………. هيبان مع الوقت هيبان
……………………………..
فى القسم عند سمر
سمر قاعده فى ركن فى حالها تيجى اتنين ستات جتت و يقعدوا جنبها
الاولى / ما تستاخرى يا شابه هو فى ايه
سمر تستاخر
التانيه / هى ما رادتش عليكى ليه الوليه دى لتكون مش محترمانا
التانيه تمسك سمر من وشها سمر تزق ايدها
سمر / ممكن تسيبونى فى حالى انا اللى فيا مكفينى
الاولى / و احنا يعنى فاضين بروح امك
الاتنين الستات يجيبوا سمر فى الارض و ينزلوا فيها ضرب
………………………………
فى عربيه غاده فى الطريق
عمر / انا عمرى ما تخيلت انها ممكن تحاول تنتحر
غاده / انت اصلا كان المطلوب منك تعمل ايه الموضوع صعب اوى فعلا
عمر / بس انا جوزها كان المفروض اقف جنبها
غاده / تسمع عن حادثه الافك
عمر / طبعا
غاده / سيدنا على بن ابى طالب اقترح على الرسول صلى الله عليه و سلم انه يطلقها يعنى اكيد انت مش اول واحد يتصرف بالطريقه دى
عمر / بس الرسول صلى الله عليه و سلم ما طلقهاش ووقف جنبها لحد ما بانت براءتها
غاده / انت مش هو و عمرك ما هتكون هو و بعدين ربنا اللى براءها انت هتثبت براءه أية ازاى و بعدين انت نفسك فى مشكله لو الفيديوهات دى اتنشرت اكتر من كدا ايه اللى هيحصل مش بعيد ابدا بعد سنه و لا اتنين تلاقى نفسك بتتخانق مع طالب فى سيكشن عشان بيورى صحابه صورك انت و أية
عمر / اكيد فى حل تانى
غاده / انت اصلا المفروض تروح القسم و تعمل محضر المفروض تكون عملى اكتر من كدا
عمر / محضر فى مين يا غاده
غاده / ما اعرفش فى امها مش بتقول هى اللى صورتكوا
عمر / ما دا اللى هيجننى ازاى الست دى تبقى بالتخلف ده عشان تفضح بنتها يعنى
غاده / لا انا متاكده انها هتوصلكوا للى عمل كدا ما هى ما عملتش ده لوحدها يعنى
عمر / ممكن تسوقى اسرع شويه
غاده / اسرع من كدا ايه انت مش شايف الطريق اطير يعنى
عمر / خلاص خلاص
………………………………….
فى الشارع عند حسام
حسام يسلم على واحد
الراجل / المصلحه تمت يا كبير
حسام / فى نفس المكان هتلاقى كرتونه فيها تلاتين علبه
الراجل / بس دا كتير اوى
حسام / ركز بروح امك انا مش بديهملك لسواد عيونك انا عاوزك تصرفهم
الراجل / اعتبره حصل
حسام / يلا غور
الراجل / عشت
………………………………….
- يتبع الفصل التالي اضغط على ( رواية سلف و دين ) اسم الرواية