رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الخامس و الثلاثون 35
غاده / انت مضايق ليه مش احسن من مفيش
عمر / طولت اوى يا غاده و كل يوم بيفوت بخاف اكتر بخاف عليها
غاده / اسمع لو تكاليف المستشفى
عمر / لا لا لا الفلوس مش مهمه الحمد لله الحاله كويسه جدا و اى كانت مصاريف علاجها مستعدين نعمل اى حاجه عشان نوفرهالها
غاده / للدرجادى حاسس بالذنب نحيتها
عمر / فوق ما تتخيلى كل مره بحط راسى على المخده دماغى بتجيب الشريط من اوله كل حاجه وحشه عملتها فيها كل مره قلتلها كلمه تجرحها او احرجتها كل مره هنتها كل دمعه نزلت من عنيها كل كلمه قالتها و هى بتحاول تقولى الحقيقه و انا ما فهمتش قصدها او ما اديتهاش فرصه تتكلم صريخها و هى بتترجانى ما امشيش و انا بزقها على اخر دراعى فى الارض و برمى عليها اليمين لو قعدت عمرى كله اوصفلك مش هيكفى الوجع اللى حاسه
غاده / للدرجادى بتحبها
عمر / انا اللى مربيها على اديا ما كانتش عشره يوم دا عمرها كلو
غاده / ساعات كتير بحقد عليها حتى فى ظروفها دى اللى مستحيل حد يتمنى يكون مكانها كميه العذاب اللى شافته بحقد عليها لانها بالرغم من كل ده عندها الحب اللى مش موجود فى الافلام ههههههههههههههه انا عارفه انها انانيه منى انى ابص على الحاجه الحلوه الوحيده اللى فى حياتها بس يمكن لان دى الحاجه الوحيده اللى ناقصه فى حياتى يمكن
عمر يبص لغاده و مبتسم ابتسامه بسيطه و ساكت
غاده / و اخبار على ايه
عمر / ضايع بين عذابه فى حب ندى و بين عذابه فى تانيب ضميره ناحيه أية
غاده / و هو ذنبه ايه فى اللى حصل لأية
عمر / لا كتير اولا كل ده حصل بسبب علاقته بندى لو ما كانش على و ندى سوا ما كانش حاجه من دا كلو حصل و الاكتر انها راحت لجاتله و هو رفض يساعدها و اللى قتله بقى انه قالها تروح تموت نفسها ارحم من الفضيحه
غاده / لا اله الا الله
عمر / بيقولى بمجرد ما مشيت من عندى جريت وراها عشان اللحقها و على ما وصلت البيت لقيتها رمت نفسها فعلا بيقول انه ما كانش مصدق انها عملتها فعلا و بالسرعه دى اد ايه كانت ياسه و خايفه اد ايه كانت
غاده تمسك ايد عمر
عمر / ادعيلها يا غاده ارجوكى ادعيلها
غاده تهز راسها عمر يسحب ايده و يقوم يقف ناحيه الشباك و غاده بتبصله
………………………..
فى الشقه عند ندى
ندى بتفتح باب الشقه تلاقى حسام قدامها
حسام / على فين
ندى / هقابل على
حسام وشه يقلب و يزقها فى الحيطه و ايده مكتفاها
ندى / حاسب بتوجعنى
حسام / مش معنى انى بحبك انى هسمحلك تكسرينى انتى فاهمه
ندى / انا كان ممكن اكدب عليك كان ممكن نازله رايحه فى اى داهيه بس قولتلك الحقيقه ايدى بتوجعنى سبنى
حسام / دا على اساس انى اهبل و سهل تضحكى عليا يعنى
ندى / على غير اتفاقه و هيقول الحقيقه و هيوصل الموضوع للمحكمه عشان يحبسك بيقول حق
أية سبنى بقى سبنى
ندى تعيط حسام يسيبها
حسام / و انتى رايك ايه
ندى / انا لو الموضوع وصل قدام المحكمه و حلفت اليمين مش هقدر اقول غير الحقيقه يا حسام مش هقدر اكدب كل الناس هتعرف اللى انت عملته و الله اعلم هتتعاقب عليه ازاى و سمعتى و سمعه بنتى بسببك هتبقى فى الارض فى حاجه انا مليش فيها اى ذنب
حسام / و انتى متخيله انك هتقدرى تقنعيه مثلا
ندى / ما اعرفش بس اللى اعرفه انى هدافع عن مستقبل بنتى لاخر لحظه انا قولتلك الحقيقه لانى ما بحاولش اغشك و لا اكدب عليك كان ممكن اقولك وصلنى الكوافير مثلا و اول ما تمشى اخرج و اروح اقابله بس انا مش هعمل كدا عارف ليه
حسام / ليه
ندى / عشان انا بعاملك زى ما انا ما عوزاك تعاملنى انا مش هكدب عليك مش هخدعك مش هفقد ثقتك فيا بشرط انك تعمل معايا كدا
حسام / هتسيبى حبيبه فين
ندى / انا طلبت من نور تطلع تقعد معاها و …
نور تدخل
نور / اتاخرت و لا ايه … مالكوا
حسام / مفيش …. يلا يا نونو هوصلك
ندى / اوك تمام …. لو عوزتى اى حاجه كلمينى …. يلا يا حسام
حسام / سلام نور
نور / سلام
…………………………………..
فى كافيه فخم
ندى تدخل تلاقى على قاعد تهز راسها و تقعد و عنيها فى اى حته الا عليه
على / هو حسام وصلك بنفسه
ندى / امال فاكرنى هاجى من وراه
على / تعجبنى جرائته
ندى / بيقولك باختصار انه مش همه و اعلى ما فى خيلك اركبه تفتكر لو كنت تقدر تعمله اى حاجه كان سكت كدا
على / الكدب ما بيدمش مسيره يجيله يوم و ينكشف و ياخد جزاءه اكيد مش هيفضل مرتب ورقه كتير
ندى / هو انا ممكن اطلب عصير ريقى ناشف اوى بليز يعنى
على / اكيد
على يشاور الوايتر يجى
ندى / عصير فرش اى حاجه
على / قهوه مظبوطه من فضلك … شكرا
ندى / حلو المكان هنا اول مره اجى بس شكله كويس
على / الحمد لله انه عجبك
ندى / ادخل فى الموضوع
على / انتى ليه مش بتبصيلى
ندى / يمكن مش طايقه اشوفك مثلا ممكن تركز احنا هنا ليه
على / التسجيلات و مساعده سمر تثبت ان حسام له مصلحه فيها و لو انتى اتهمتيه انه ابتزك بالصور دى و سمر اتهمته انه المحرض و رامى اتهمه انه الممول كل ده عشان يبتزك بالصور حسام اكيد هيتحبس و ساعتها
ندى / و ساعتها
على يبص لندى يلاقيها مش مهتمه
على / انتى هتاخدى حريتك
ندى / ههههههههههههههههههههههههههههههههه هو البيه مش واخد باله و لا ايه انا مش محبوسه انا زى ما حضرتك شايف بلبس احسن لبس و باكل احسن اكل و بخرج و اتفسح و اه حسام كتبلى شقه باسمى كامله من كل حاجه و مخلى اخته داده لبنتى وقت ما احب انزل و بتاخد بالها من بابا و فى واحده بتيجى تنضف دا غير الدليفرى صدقنى لو ده سجن فاكيد نص الشعب نفسه يتسجن مكانى
على يبصلها باستغراب
ندى / جديده عليك ندى دى صح بس التغير مطلوب برده عشان الملل شوفت ندى الطفله الكيوته و شوفت ندى المكسوره الضعيفه اديك بتشوف ندى القويه اللى بايعاها انا عجبانى دى اكتر
الوايتر يدخل يحط الحاجه و يمشى
على / انتى عجبانى فى كل حالاتك
ندى / ليك حق انا اعجب فعلا مش شايف الدنيا بتتقلب ازاى عليا دا انا ما افتكرش ان مارلين مونروا بجلاله قدرها فى حد عمل عشانها كل ده
على / و التمن
ندى / دفعته مقدم و مش مره مرتين … ما تفكرش انا هفكرك المره الاولى لما انت دخلت حياتى و انا زى الهبله فرحت بالرومانسيه الهندى تفتكر لو ما كنتش انت فى حياتى مش كنت اديت حسام فرصه و كان زمانا عايشين منتهى السعاده هناك من بلد لبلد و من فسحه لفسحه و معايا حبيبه و اخواتها صبيان بقى على بنات صح
على يبصلها بحزن
ندى / اكيد طبعا مش هكون حققت كل ده دلوقت لا انا كنت هبقى مخطوبه بقى و دباديب و حركات و فى الكليه و لما نتجوز نبقى نعمل كل ده نستعجل ليه ما هو مفيش حد تانى فى حياتنا
على / انتى شايفه كدا
ندى / بلاش دى على الاقل كان زمانى بربى بنتى فى حالى وسط ابويا و امى و هما عايشين كويسين و ما كانش حسام لقى اى مبرر او سبب يجبرنى ارجعله لان ليا ضهر يدافع عنى و يحمينى ضهر ميت او مشلول
ندى عنيها تتملى دموع و على مبتسم بانكسار بس ندى ما تنزلش و لا دمعه
ندى / قولى خدت انتقامك شفيت غليلك لما شوفت ابويا بالمنظر ده حسيت ان كرامتك انهم رفضوك رجعتلك
على / انتى بتقولى ايه
ندى / لو كنت سبتنى فى حالى لما رجعت و انا فى قمه ضعفى فى قمه انكسارى لو كنت بس رحمتنى و خليتك بعيد و سبتنى اعيش كان زمانى قدرت اقف على رجلى تانى لكن انت عملت ايه استغليت ضعفى و استغلتنى و ادتنى امل و رفعتنى لسابع سما ما تخافيش ما تخافيش ما تخافيش و فى الاخر بايدك دى دخلتنى المصيده اللى رمتنى باقصى قوه لسابع ارض
على يمسك دموعه بالعافيه و هو بيبصلها و هى بتتظاهر بالقوه و نظره الكره ليه فى عنيها
ندى / بس انت بقى ايه ما بتكتفيش لسه فاضل حسام حقك منه و انا اصل غرورك لسه ما شبعش انتقام فقررت انك تعيد نفس السيناريو ثقى فيا فى امل اوعى تستلمى عشان خاطر حبيبه المحامى هيقول المحامى هيعيد اطلعى معايا يا ندى احلمى يا ندى اخسرى بنتك بقى المرادى يا ندى اخسرى اخر حاجه ممكن تعيشى عشانها عشان تموتى و ارتاح مش كدا دى خطتك الجديده صح
على / فى معاكى اى سكاكين تانيه عاوزه تغرزيها جوايا و لا كدا خلاص كفايا
ندى تمسك العصير و تقعد تشرب فيه بمنتهى البرود و على بيحرك عنيه يمين و شمال عشان يضيع دموعه و هو بيهز رجله على اخرها و بيعض فى شفايفه و ندى باصه تحت على العصير و ما بتبصش عليه اصلا تخلص العصير و تحطه مكانه و تعدل شعرها من على وشها و تبتسم
ندى / هو المحامى ده جاى بجد و لا انت قولت كدا عشان تخلينى اجى و خلاص
مجدى يدخل
على / الاستاذ مجدى عمران المحامى …. مدام ندى
مجدى / غنيه عن التعريف
مجدى يقعد و ندى تبتسمله
مجدى / طلبت انى اجى عشان تاخد استشارتى اتفضل ايه الجديد
على / دلوقت الصور اللى كانت مع حسام و بيهدد بيها ندى انه يرفع قضيه ضم و انها ست مش مسؤله و ياخد حضانه الطفله و قال انها اتبعتتله فى دليل ان هو اللى سهل تصويرها و شهود كمان
مجدى / و قولتلك ان شهاده سمر و رامى مجروحه قدام الشهود اللى معاه
على / لا بس دلوقت فى فيديو لازاى الصور اتاخدت و انها متساش لندى و دا بيدى
مجدى / و جود الدافع عند حسام بس برده ايه يثبت ان حسام اللى قام بالموضوع يعنى مفيش شهود انه دفع الفلوس لرامى و لا شهود لاتفاقه مع سمر الفكره كلها وجود الدافع
على / و شهاده ندى فى المحكمه انه حاول يبتزها
مجدى / بصور اتبعتتله
على / اكيد فى طريقه الظابط طلب من ندى انها تبلغ عن حسام اكيد فى مبرر لده
مجدى / لنفرض ان فى دليل على حسام و انى قدرت الاقى صغره فى التحقيقات نثبت بيها ارتكاب حسام للجريمه
على / تمام ده هيضمن لندى حضانه الطفله صح
مجدى / هو طبعا هيعرض حسام للعقوبه بس اهله برده من حقهم يطالبوا بحضانه الطفله فى حاله ان ندى اتجوزت
على ينفخ
ندى / ايه هى اقصى عقوبه ممكن تتفرض على حسام
مجدى / لو اثبتنا انه فعلا متهم فى انه سهل تصوير أية فعقوبتها ما بتزدش عن سنه لكن فى حاله ابتزاز أية اللى حصلت فالجريمه عقوبتها ما تزيدش عن سنتين او غرامه خمسميه جنيه او الاتنين سوا
على يحدف الفنجان على اخر دراعه و ندى بتضحك
مجدى / انا ما كملتش اللى حصل ده لان أية جريمتها اشد من محاوله ابتزازك انتى يا مدام فى حالتك انتى العقوبه اخف
على / اخف من كدا ايه
مجدى / فى حاله مدام ندى العقوبه ما تزيدش عن ست شهور او غرامه متين جنيه
ندى / والله يعنى ماكسمم كدا لو حطينا الجرايم دى كلها مع بعض اقصى حاجه سجن اربع سنين كدا توتال مثلا او سنه و سبعميه جنيه او يمكن سبعميه جنيه بس مش كدا
على يبص لندى بقهره
ندى / والله كويس
مجدى / القانون المصرى للاسف فيه قصور شديد فى الناحيه دى مع انها جريمه اخلاقيه بشعه لكن نقول ايه بقى
ندى / نقول كانت فرصه سعيده و ميرسى على العصير و ياريت بعد كدا تبقى تسال المحامى الاول و توفر على نفسك الاحراج و توفر عليا المشوره ….. اه كل العقوبات دى حتى لو قدمت بلاغ فى حاله انك اثبت فعلا انه عمل كدا دا لو بقى
على يبص لندى و هو بيجز على سنانه ندى تشاورلهم
ندى/ تشاااااو
ندى تمشى
مجدى / انا اسف اوى يا على بس صدقنى ده مش بايدى
على يهز راسه مجدى يقوم و يمشى و على قاعد هيموت
……………………………………
فى الشقه عند ندى
ندى تدخل تلاقى حسام قاعد مبتسم و شايل حبيبه بين ايديه
حسام / ما طولتيش ما كلمتنيش ليه اجى اجيبك
ندى / على فكره الكافيه ده بيعمل عصير و هم لازم نبقى نروح سوا مره
ندى تروح تقعد لزق فى حسام يحط ايده حواليها و ياخدها فى حضنه و تحط راسها على صدره و بايده التانيه شايل حبيبه
ندى / امال نور فين
حسام / نزلت ماما كانت عوزاها فطلعت انا اقعد اللعب شويه مع بيبوا بصى صاحيه و بتلاعبنى ازاى شكلها حفظتنى خلاص
ندى تبتسم
حسام / ها عملتوا ايه اقنعتيه
ندى / و لا ما يقتنعش اعلى ما فى خيله يركبه بقى ما يقرفنيش
حسام / شكلك مضايقه ايه فى ايه
ندى / مش حوار مضايقه انا مجرد انى ابصله بقت تخنقنى
حسام / دا يوم سعدى النهرده و لا ايه بتتكلمى جد
ندى / هو ليه مصمم يدمرلى حياتى هو عاوز منى ايه ما كفاهوش كل اللى حصل ما يخرجنى من نفوخه بقى
حسام / فكك منه قولتيلى ان العصير جامد
ندى / اه لازم تجربه الديكورات تحفه بجد بس فاكر الفندق اللى روحناه فى دبى
حسام / اكيد
ندى / لا دبى تكسب طبعا
حسام / عشان تعرفى بس
صوت جرس يضرب
ندى / هقوم اشوف بابا عاوز ايه اطلب دليفرى انا جعانه
حسام / حصل و فى الطريق
ندى تحدفله بوسه و تدخل جوه و حسام مبتسم
………………………………
فى المستشفى
عمر و على قاعدين بياكلوا من غير نفسك
عمر / انا متاكد ان كل ده من ورا قلبها
على / اخر امل طار
عمر / تعرف احنا ليه مؤدبين اوى كدا يا على
على / قصدك ايه
عمر / اقصد العين بالعين و السن بالسن و البادى اظلم
على / هتعمل ايه هتقلعه و تصوره
عمر / ايه القرف ده لا طبعا هضربه هاخده فى حته مقطوعه و انفخه لحد ما يبانله صاحب و هجيب شهود انى كنت فى اى حته زى ما بيعمل بالظبط
على / ههههههههههههههههههه
عمر / انا بقول نقتله اصلا المفروض الحكومه تدينا مكافاه اننا وسخنا ادينا بدمه النجس و عملنا فيهم جميله و خلصناهم منه
على / لو حسام مات اهله مش هيسيبونى اتجوزها برضه يا عمر هياخدوا حبيبه المحامى قالى ان حتى لو اتحبس لسه ممكن برده ندى تخسر حبيبه
عمر / مسكينه هتعيش مع البقف ده ازاى
على / انا هروح انام
عمر / بدرى كدا
على / مخنوق شويه لو فى جديد كلمنى سلام
عمر / سلام
……………..
تانى يوم الصبح
ندى بتلبس جرس الباب يضرب تروح تفتح تلاقى نور
نور / على فين العزم النهرده كمان
ندى / خشى و انا هقولك
نور / فى ايه بقى
ندى / انا هروح ازور سمر
نور / بتهزرى
ندى / لا ما بهزرش انا بجد عاوزه اعرف الحقيقه كامله
نور / و سمر الحيوانه دى هتقولك دى اكيد هتوديكى و تجيبك و تسرح بيكى
ندى / انا متاكده ان ده مش هيحصل خصوصا بعد اللى حصل لأية
نور / لا بس انا عارفه سمر دى كويس مش كويسه ابدا
ندى / و مين فى الدنيا كويس يا نور كلو بيجرى ورا مصلحته
نور / و هتعرفى تقابليها
ندى / قولى يارب
نور / يارب
……………………………
فى القسم
الظابط / اهلا مدام ندى …. ياريت تكونى احسن النهرده
ندى / الحمد لله
الظابط / لا امسك الخشب النهرده مش خايفه و لا بتعرقى و لا متوتره خالص
ندى / شكل رجلى خدت على المكان
الظابط / ههههههههههههههههههه لا ما اتمناهاش ابدا خير اؤمرى
ندى / انا كنت عاوزه اقابل مدام سمر وهدان
الظابط / هو حظك حلو هى فعلا لسه راجعه النهرده بس ياريت اعرف ليه
ندى / حضرتك انا الفتره اللى فاتت كنت بمر بظروف صعبه اوى طلاقى و حالتى الصحيه بعد الولاده و وفاه ماما و حاله بابا انا من حقى اعرف الحقيقه من حقى افهم ليه تعمل كدا
الظابط / ليه تصورك
ندى / انا لحد دلوقت ما اعرفش ان كنت اتصورت فعلا و لا لا
الظابط يبتسم
ندى / بس عاوزه اعرف ليه بتقول عنى انا و على و حسام كدا فى ايه بينها و بين حسام حضرتك حسام ابو بنتى و من حقى اعرف حقيقته قبل ما اكمل معاه حياتى
الظابط / تعرفى انا مش قادر افهمك بس هساعدك و هخليكى تقابلى سمر يمكن ده يريحك شويه و زى ما قولتلك انا ليا اخت فى سنك و اكيد ما اتمناش ابدا انها تعيش ربع اللى انتى عيشاه دلوقت و لازم تفهمى برده انى مش هتاخر ابدا عن اى مساعده اقدر اقدمهالك
ندى / حضرتك لو خلتنى اقابل مدام سمر هتبقى عملت فيا اكبر مساعده
الظابط / حاضر
……………………………….
فى البيت عند ندى
حسام يخبط نور تروح تفتح
حسام / ايه ده اتارى الدنيا منوره
نور / واو ريحه الاكل تهبل ايه ياعم هو انا مليش نصيب من الدلع دا كلو و لا انا الداده بتاعتكوا و خلاص
حسام / دا انتى ست الكل هاتى عنك العفريته دى و خدى منى الاكل ده
نور / اخد اوى ههههههههههههه
حسام يشيل حبيبه و نور تاخد منه الاكياس
حسام / بسم الله وحشتينى وحشتينى وحشتينى امال القمر بتاعى فين
نور / ندى ؟؟ خرجت من شويه
حسام / خرجت ؟؟ راحت فين
نور / راحت القسم قالت عاوزه تتكلم مع سمر و تعرف منها الحقيقه
حسام / حقيقه ايه
نور / بص انا دماغى ورمت من الموضوع ده و ما ببطلش تفكير فيه
حسام / بصى خدى بيبو و انا هنزل اشوف ندى و ارجعلك
نور / و الاكل
حسام / اتغدى انتى و اكلى عمى و ما تستنيناش
نور / يا حسام بس
حسام يقفل الباب و ينزل السلم يجرى
……………………..
فى القسم
ندى / حمد الله على السلامه الظابط قالى انك كنتى فى المستشفى
سمر / جايه ليه
ندى / انا عاوزه اعرف الحقيقه
سمر / و انا تحت امرك
ندى / انتى ساعدتى حسام و على ايه موقفه
سمر / انا اذيت على و اذيتك و اذيت حتى بنتى انا هقولك الحقيقه كامله و ربنا شاهد انى مش هكدب فى ولا حرف فيها
ندى / على ايه دوره فى كل ده على كان بجد بينتقم منى لان اهلى رفضوه على اخد فلوس من حسام
سمر / انا اخدت فلوس من حسام بعد ما وعدنى و ضحك عليا ان مفيش حد هيشوف الفيديوهات دى غيرى انا حطيتلك المنوم اللى اداهونى فى العصير بتاعك و لما دخلت الاوضه لقيتك نايمه على السرير حاولت اقلعك هدومك بس على دخل فجاه و انتى حاولتى تقومى فخرجت من الاوضه عشان اسيبكوا لوحدكو تتصوروا
ندى / يعنى على ما كانش يعرف ان فى كاميرا فى الاوضه
سمر / ما حدش كان يعرف غيرى انا و الكلاب رامى و حسام … ندى مفيش اخبار عن ايه
ندى / بيقولوا بربشت بعنيها بس ما اعرفش حاجه اكتر
سمر / ندى اسمعى كلامى و ما تسمحيش للكلب ده يبتزك
ندى / كان على عينى بس حتى لو قدرنا نثبتها عليه هيخرج منها بملاليم و هيرجع برضه يهددنى بحبيبه و ياخدها منى
سمر / يعنى ايه
ندى / يعنى اللى عاوزه ربنا بس هو اللى هيكون
سمر / لا يا ندى اللى زيه مالوش امان
ندى / الامان الوحيد منه هو حضنه و انا لو كنت لقيت اى حل تانى كنت اخترته بس هعمل ايه انا ما عنديش غير حبيبه و مش هقدر اخسرها حتى لو دفعت عمرى كلو التمن هعمل ايه
سمر / انا اللى عملت كدا انا اللى ساعدته كرهى لعلى عمانى غبائى صورلى انك لو خرجتى من حياتنا حياه بنتى هتبقى احسن لكن
ندى / حصل خير انا متاكده ان أية هتخف و تبقى كويسه بس بجد لو ندمانه ارجوكى ما تجيبيش سيرتى فى القضيه كدا كدا اتكلمت مع المحامى و قال مفيش فايده مش هيتعاقب
سمر / يعنى ايه
ندى / حسام مش هيتعاقب بالقانون حسام زى التعبان بيتلوى فى القانون و بيعرف يدخل منين و يخرج منين من غير ما حد يمسك عليه غلطه كلنا هنخسر و هو هيخرج منها زى ما خرج من كل حاجه عملها انتى ما تعرفيهوش قدى مش هيسكت و هيكمل ارجوكى
الباب يتفتح و الظابط يدخل
الظابط / اتمنى ان يكون عندكوا اخبار حلوه
ندى / أية بربشت امبارح
الظابط / مبروك
سمر / هو انا ممكن ارجع الزنزانه
الظابط / متاكده مش عاوزين تقولوا حاجه فى التحقيق ده
ندى / عن اذن حضرتك انا سايبه بنتى بترضع مع عمتها
الظابط / تقدرى تتفضلى
الظابط يرجع بضهره فى الكرسى و يرمى قلم كان فى ايده على المكتب و هو بينفخ و ندى تمشى و سمر العسكرى ياخدها
……………………………………..
قدام القسم
ندى خارجه بتعيط على يقابلها و هو داخل
على / ندى مالك
ندى تبصله و تبص فى الارض و تعيط
على / تحبى نروح نقعد فى حته
ندى / انا اسفه
على / على ايه
ندى / على كل اللى عملته الفتره اللى فاتت بس والله كان غصب عنى انت ما تعرفش اللى فيا ما تعرفش انا عايشه ازاى
على / انا مقدر اهدى بس
ندى / هما قالولى انك متفق معاهم قالولى انك كنت بتنتقم منى
على يبصلها بحزن
ندى / انا عرفت انهم كانوا بيكدبوا بس كان اهون عليا انك تكون وحش كان اهون عليا انى ادى لنفسى سبب اكرهك يمكن اقدر اشيلك من قلبى و اكمل حياتى
على / ندى اهدى على فكره انتى مش مجبره تكملى معاه
ندى / لا مجبره مفيش قوه فى الدنيا هتمنعه عنى مفيش حاجه هتقدر تنقذنى انا خلاص رضيت بمصيرى معاه
على / لسه فى وقت انا متاكد اننا هنلاقى حل
ندى / و هو كمان قدامه وقت انه يلاقى طرق يكتفنى بيها اكتر انا عايشه فى جحر التعابين من غير حد يحمينى فى روحين ملزمين منى ابويا و بنتى بنتى اللى ما هيصدقوا ياخدوها من حضنى و يرمونى انا ووالدى فى الشارع اعمل ايه
على يبصلها و يسكت
ندى / انا مش هقدر اخلى بنتى تشوف اللى انت او عبير شوفتوه مش هقدر اكون انانيه و اختار حبى على راحه بنتى عاوزنى ابيعها و اجيلك عاوزنى اعمل زى ما عملت مامتك زمان و اتخلى عن بنتى و هى لسه حته لحمه حمرا محتاجه اللى يحميها عاوزنى اسيبله حته من قلبى يعذب فيها و يعذبنى بيها ابعد عنى يا على ابعد و سبنى اعيش
على يسكت و ندى تمسح دموعها و تمشى حسام يفرمل قدامها تبصله و تلف و تركب و هى بتبص لعلى حسام يشاور لحد ورا على على يبص الناحيه التانيه يلاقى الظابط واقف مبتسم يشاور لحسام حسام يمشى و على يدخل القسم
الظابط / منور يا على بيه
على / بنورك يا باشا
الظابط / تعال عاوزك
الظابط يروح مكتبه و على وراه
……………………….
فى العربيه
حسام سايق و ندى جنبه
حسام / كنتى بتعملى ايه
ندى / انت خدت كل اللى انت عاوزه مش كدا
حسام / ما افتكرش ان انا اللى اخدت اللى انا عاوزه يا ندى
ندى / امال مين
حسام / انا لحد اللحظه دى بقدملك السبت بس احب افكرك ان قلبتى مش هتعجبك
ندى / هتعمل ايه اكتر من اللى عملته يعنى
حسام / انتى ناويه يعنى
ندى / ناويه على ايه
حسام / بصى يا بنت الناس من الاخر كدا عشان انا خلقى ضيق لو حضرتك فكرتى بس مجرد فكره انك تلعبى بيا او تخونينى ما ترجعيش تلومينى لانى ساعتها
ندى / ايه هتقتلنى تانى
حسام / لا الموت بالنسبالك هيكون رحمه مش هتطوليها
ندى / وقف العربيه
حسام / مش هوقف نطى
ندى تبصله
حسام / ايه خايفه افكلك الحزام عشان تعرفى تنطى عدل
ندى تفك الحزام و تفتح الباب حسام يفرمل فى ثانيه
ندى تنزل من العربيه و تمشى على رجليها حسام يقفل الباب و يطلع
/////////////////////////////////////
ندى / ايه البجاحه دى هو الحيوان ده فاكر نفسه ايه ازاى يكلمنى كدا يعنى مش كفايه انى عاصره على نفسى لمونه و حاطه الجزمه فى بقى عشان ابلعه كمان بيهددنى و امبارح كان عنيف اوى معايا هو فاكرنى جاريه عنده هو فاكر انى هسكت و لا ايه هو فاكر انى مليش ….. ايه بعنى لو مليش ضهر هو انا صغيره مش هعرف اربيه دا انا اربيه هو و اللى يتشددله فوقى يا ندى فوقى لمصلحتك و مصلحه بنتك ارجعى للطريق اللى كنتى رسماه سويه على الهادى خليه يعرف حجمه و مقامه جنبك ….. معاكى حق ندى الهبله دى مش لازم تظهر تانى على لازم يخرج من حياتى هو اللى بيضعفنى انا حققت جزء كبير من اللى كنت عوزاه ما تشمتيهمش فيكى ….. الكل مستنيلك غلط عمتك و بنتها و حماتك الكل عاوزك تقعى عشان يدوسوكى بالجزم فوقى لنفسك ….. يارب قوينى استحمل العذاب اللى انا فيه يارب
…………………………………….
فى القسم
الظابط / دا الاقبال على مدام سمر وهدان النهرده تاريخى بقى
على / انا بس كنت عاوز اطمنها على بنتها
الظابط / اه مدام ندى بلغتنا بالاخبار السعيده انها بربشت صدقنى فوقانها هيفرق كتير اوى فى القضيه و شهادتها كمان
على / انا اتكلمت مع المحامى و قالى العقوبه و بجد من ساعتها و انا مش طايق نفسى
الظابط / العقوبات بتتجمع يا استاذ على يعنى حتى لو القانون المصرى فيه قصور فى الناحيه دى فاحنا هنا عندنا بدل الجريمه اتنين و تلاته و خمسين و باذن الله على ما الهاردات دى كلها تتفرغ هنكون جمعنا بيانات كل الضحايا او على الاقل معظمهم و نوصلهم و يمكن ساعتها مدام أية تكون فاقت و تساعدنا اكتر
على / حضرتك متفائل اوى كام واحده من دول مستعده تفضح نفسها و تقدم بلاغ انا خلاص فقدت ثقتى فى القانون كله عمره ما جابلى حقى
الظابط / اسمع يا على انا لحد اللحظه دى متعاطف معاك انت و اخوك جدا و مستعد امشى فى القضيه دى للاخر بس للاسف لو عملت اى حاجه من دماغك من غير ما ترجعلى يا على انا مش هقدر اساعدك القانون فيه قصور و انا معترف بس النظام هو الحل
على / اكيد و فى الاول و الاخر لينا رب ما بتضيعش عنده الحقوق
الظابط / كنت عاوز مدام سمر مش كدا
على/ لو ده ما يضايقش حضرتك
الظابط / لا يضايقنى ليه
الظابط يتك على زرار العسكرى يدخل
الظابط / ناديلى مدام سمر وهدان من الحجز
العسكرى يمشى
الظابط / تحب تشرب ايه
…………………………..
فى شقه ندى
ندى تدخل ما تلاقيش حد تبص فى الاوض تلاقى ابوها نايم و نور قاعده بتقرا فى مجله
ندى / اتاخرت عليكى معلش
نور / ابدا انا والله خفت انزل و اسيبه يصحى يعوز حاجه
ندى / امال بيبو فين
نور / حسام جه خدها و قال عاوز يشتريلها حاجات
ندى / حاجات ايه
نور / ما اعرفش والله ما قاليش انا قولت انكوا اتقابلتوا و شوفتوا محل و بعتيه يجيبها انتى ما شوفتيهوش
ندى / ثوانى
ندى تطلع الموبايل و تتصل بحسام غير متاح
نور / هو فى ايه
ندى / مفيش حاجه تسلمى انتى
نور / طب انا هنزل بقى هتعوزى منى حاجه
ندى / لا شكرا تسلمى
نور / سلام
نور تمشى ندى تكتب رساله و تبعتها و تقعد على السرير تنفخ
ندى/ رسالتك وصلت بس افتكر ان البادى اظلم
ندى تقوم على اوضتها و تنزل شنطه من فوق الدولاب و بسرعه تحرك المرتبه و تشيل الملل و تفتح الشنطه تحت السرير و تجيب الهدوم و ترميها فيها و تجيب الدهب و تحطه فيها و تقفلها و تحط الملل مكانها و تعدل المرتبه و تمسك التليفون و تتصل بحسام تانى غير متاح تتصل بنمره تانيه
ندى / الو دكتور عمران …. ازى حضرتك انا مدام ندى زغلول بنت الاستاذ مصطفى زغلول …. اهلا بحضرتك معلش والدى كان عنده جلسه بعد بكره و انا مسافره و مش هيقدر يجى ينفع ياخدها دلوقت عشان ما تروحش عليه …. ميرسى اوى …. معلش هتعب حضرتك تبعت عربيه المركز تاخده عشان العربيه فى التوكيل عشان السفر …. الف شكر لحضرتك …. ميرسى جدا مع السلامه مع السلامه
ندى تروح اوضه باباها و تاخد شنطه صغيره تلم فيها كل ادويته و حاجته يصحى و يبصلها
ندى / يلا يا بابا هنروح الجلسه دلوقت قوم ساعدنى عشان نلحق قبل ما يجوا
ندى تسند مصطفى يقوم يقعد و تجيب طقم مالدولاب
ندى / المركز لسه مكلمنى و قايلين هيجوا ياخدونا عشان الجلسه حصلت لخبطه فى المواعيد باين يلا ساعدنى اللبسك يلا
……………………………….
فى المستشفى عند عمر
غاده تخبط و تدخل تلاقى عمر نايم على الكنبه و أية فى مكانها غاده تقرب بالراحه من عمر يصحى هى تتخض
غاده / خضيتنى
عمر / معلش حقك عليا … انتى بتعملى ايه هنا
غاده / وافقولك على الاجازه
عمر / اه الحمد لله و النهرده اول يوم
غاده / مبروك
عمر / اقعدى واقفه ليه
غاده / انا قولت اجى اطمن عليك عشان ما جتش الكليه و مش هتيجى الفتره الجايه و اكيد مش هتيجى الشركه برده
عمر / انا عارف والله انى مقصر معاكى جامد اوى بس والله اديكى شايفه هى ما لهاش حد و لا انا ليا
غاده / امال انا روحت فين
عمر / ربنا يخليكى يا غاده انتى فعلا و نعم الاخت
تليفون عمر يرن
عمر / ثوانى …. الو …. فى ايه يا على ايه اللى حصل …. انت فين ليه ايه اللى حصل …. انا هاجى حالا ما تتحركش من عندك انا جاى حالا
غاده / فى ايه يا عمر قلقتنى
عمر / انا لازم امشى على فى المستشفى نتكلم بعدين ممكن
غاده / انا ممكن اوصلك
عمر / ياريت اتفضلى
عمر و غاده يمشوا أية تحرك صوابعها
……………………………………….
فى شقه ندى
ندى تطلع باباها فى الصاله
ندى / خلى شنطتك معاك ثوانى هجيب شنطتى و جايه
ندى تدخل اوضه باباها و تعمل زى معملت فى اوضتها بالظبط و فجاه جرس الباب يضرب تتفزع و تجرى تشوف مين تلاقى اتنين رجاله
الاول / شقه الاستاذ مصطفى زغلول
ندى / ايوه
الاول / احنا من مركز الدكتور عمران سلامه جايين عشان ناخد الاستاذ المركز
ندى / اه اهلا وسهلا انا مستنياكوا من بدرى اتفضلوا بابا مستنيكوا بس ياريت بشويش و من غير صوت عشان الجيران عندهم حاله ولاده و مش عاوزين مشاكل معاهم
الاول / اكيد حضرتك
الرجاله ياخدوا مصطفى و ينزلوه بشويش و ندى نازله وراه و هى بتقفل الموبايل و تحطه فى شنطتها و مبتسمه اوى
…………………………………
فى المستشفى
عمر / و دا حصل ازاى
على / ما اعرفش العكسرى راح يناديها لقاها نايمه فى الارض ما بتردش عليه راح يزقها ما بتتحركش لقاها ميته
عمر / فجاه كدا من غير مقدمات هى مش لسه خارجه من المستشفى الصبح و رجعت الحجز و بقت كويسه
على / خالد باشا بيقول ان اى كان سبب الوفاه هيتعرف من تقرير الطب الشرعى
عمر / تفتكر يكون قتلها تفتكر يكون عمل كدا عشان يخلص منها و يبعد عنه التهمه
على / ايوه بس رامى لسه عايش
عمر / يا ميله بختك يا أية هنقولها الخبر ده ازاى
على / لما تفوق أية ابقى شيل الهم انا اصلا بفكر فى حاجه تانيه خالص
عمر / حاجه أية
على / الظابط خالد قالى ان ندى كانت جايه تزورها و انا فعلا قابلت ندى بتعيط و هى خارجه من عندها
عمر / لا وسعت منك دى ندى تقتل ازاى
على / لا تقتل ايه يابنى هى ممكن تكون قالتلها اللى المحامى قالهولنا او ما اعرفش ندى كانت بتعيط و هى خارجه و قالت انها عرفت الحقيقه انا ما عدتش فاهم حاجه
عمر / حسام ده ابن لذينه و انا متاكد ان له يد فى الموضوع
على / انا عمرى ما كنت اتخيل انى اقف الوقفه دى يوم موت سمر او حتى تفرق معايا بس صحيح سبحانه مفيش حاجه بتفضل على حالها
عمر / على رايك
…………………..
فى شقه ندى
حسام يدخل شايل حبيبه و شنط كتير اوى يحط الشنط فى الارض
حسام / احنا جينا
ما حدش بيرد حسام يدخل جوه يلاقى ضرف الدولاب مفتحه و فاضيه و الاوضه فاضيه يروح الاوضه التانيه نفس النظام يحط حبيبه على السرير و يروح يقف على السلم و هو بيتصل بالتليفون
حسام / نور … نور
التليفون / الهاتف اللذى طلبته غير متاح مؤقتا من فضلك حاول الاتصال فى وقت لاحق
حسام / نور … نور
نور تطلع تجرى
نور / فى ايه يا ابنى بتزعق كدا ليه
حسام / فين ندى و عمى
نور / يعنى ايه
حسام / يعنى مش موجودين و لا هما و لا حاجتهم
نور / مستحيل دا ما فاتش ساعه و كنت قاعده معاهم هنا راحوا فين
حسام / يعنى اختفوا اتبخروا نزلت بالشنط و بعمى ازاى لوحدها
نور / طب اهدى بس و فهمنى
حسام / خلى حبيبه معاكى و انا هاجى علاطول بصى حاولى تكلميها لو فتحت موبيلها او ردت عليكى ابقى كلمينى
نور / اوك اوك بس انا تحت
حسام يمشى و نور تقفل باب الشقه و تاخد حبيبه و تنزل تحت
…………………………
فى المركز
ندى كل شويه تبص فى الساعه فى ايدها
ندى / خليه يتحرق اعصابه شويه عشان يعرف يلويلى دراعى
………………………..
فى المطعم عند على
حسام يركن العربيه بسرعه و ينزل يدخل المحل احمد يقابله
احمد / على فين يا سى الدكتور
حسام / فينه اللى مشغلك
احمد / و انت مالك بيه
حسام / اقسم بالله لو ما اتصلت بيه حالا و خليته يقولى هو فين لتكون اخرتك انت و المحل ده و اخره سى زفت بتاعكوا على ايدى
احمد / اعلى ما فى خيلك اركبه انت جاى تهددنا و لا ايه هو فى ايه
واحد يدخل
الراجل / معلش يا احمد عندى المرادى تعال يا استاذ انا هتصلك بيه تعال بس اقعد ارتاح
……………………………………..
فى المستشفى
حسام يدخل يلاقى على و عمر واقفين يجرى يزق على يخبطه فى الحيطه عمر يحوش بينهم
حسام / هى فين
على / اقسم بالله لولا الموقف اللى احنا فيه كنت قتلتك…. هى مين ؟؟؟
حسام / انت هتستهبل يا روح امك
على / احترم نفسك ما تضيقش خلقى انت بتتكلم عن مين
حسام / عن ندى
على / ما اعرفش اخر مره كانت معاك لما ركبتوا العربيه
عمر / اسمع على خرج من القسم على هنا عشان سمر ماتت فهمت سمر ماتت
حسام / ماتت ؟؟؟ ازاى
على / هنعرف من تقرير الطبيب الشرعى لما يطلع اخر حد شافها كانت ندى اللى حضرتك جاى تسالنى عليها
حسام يسيبهم و يمشى
عمر / ايه ابن المجنونه ده احنا ناقصينه
على / تفتكر راحت فين
عمر / هى مين انت كمان … اه ندى و انا اش عرفنى اى حته ارحم من وش امه العكر
على يطلع موبايله و يحاول يتصل غير متاح
عمر / ما تحاولش مدام كولومبوا مش قادر يوصلها انت مش هتقدر الواد ده انا شاكك انه جاسوس فى الموساد اصل مش معقول دماغ المافيا دى انت يابنى سرحان فى ايه
على يتصل بحد تانى و يسيب عمر و يمشى
على / الو
نور / ازيك ما صدقتش لما شوفت رقمك
على / هو انا ممكن اشوفك
نور / اممم مش عارفه اه عادى امتى و فين
على / دلوقت لو امكن
نور / صعب اوى انا معايا حبيبه
على / و هو حسام و ندى فين
نور / خرجوا ما انا تقريبا البيبى سيتر بتاعتها اعمل ايه بس
على / طب ما تجيبيها معاكى انا بقالى ياما ما شوفتهاش ايه رايك نعدى على الحجه منال نتقابل هناك دلوقت
نور / اوك ماشى
على / انا فى الطريق يعنى حاولى ما تتاخريش
نور / بلبس اهو سلام
على / سلام
على يقفل
عمر / يا صلاه النبى و دا من ايه ان شاء الله
على / بص انا فى كلاب سعرانه فى مخى ماشى ما تحاولش تناقشنى فى اى حاجه دلوقت انا ماشى
عمر / طب و سمر
على / انت جنبها اهو لو فى جديد بلغنى
عمر / كنت عاوز اطمن على أية يا على
على / عمر اهدى شويه بص اى جديد فى حوار أية اكيد الممرصه هتبلغك
عمر / انا هتصرف روح شوف انت ناوى على انهى مصيبه جديده
على يبصله و يضرب كف على كف و يمشى عمر يطلع الموبايل و يتصل
عمر / ايوه يا غاده ازيك
غاده / تمام ايه الاخبار فى جديد
عمر / هو انا ممكن اطلب منك جميل
غاده / انت تؤمر يا عمر
عمر / هو انتى ممكن لو فاضيه يعنى تقعدى جنب أية فى المستشفى اصلى ما بحبش اسيبها لوحدها كتير و انا هنا مع سمر الله يرحمها لحد ما اشوف اخرتها
غاده / اوك بس هروح اعمل ايه جنب أية
عمر / هتلاقى كتب جنبها فيها قصص و روايات نقى واحده و اقريها بصوت عالى
غاده / انت بتتكلم جد
عمر / اكيد و دا وقت هزار يعنى
غاده / ما انا بقول برده بس ايه فايدته هى سمعاك
عمر / بحس بده بصى معلش ريحينى
غاده / اوك تمام انا فى الطريق
……………………………………
فى شقه ندى القديمه
حسام يروح يخبط على الباب و يرزع بكل قوه مفيش حد بيرد ثوانى و جاره يطلعله
الراجل/ اهلا يا حسام يا ابنى اخبارك و اخبار عمك ايه والله قطع بيا اوى
حسام / كويسين الحمد لله امال هو مفيش حد جوه و لا ايه
الراجل / ابدا يا ابنى من يوم ما الحجه مها اتوفت ما شوفناهومش و لا سمعنا حاجه عنهم الله هما مش عندكوا فى البيت
حسام / اه بس ندى كانت عاوزه تجيب شويه حاجات من هنا محتاجاها حضرتك ما شوفتهاش خالص
ست تنزل من فوق
الست / لا يا ابنى ما جاتش اصلا
حسام / يمكن راحت فى حته قبل ما تيجى هنا تليفونها غير متاح و انا قلقت عليها اوى ده رقمى لو شوفتوها بلغونى اطمن بس
حسام يدى لكل واحد فيهم كارت
الست / ما تقلقش يا ابنى لو جت هنبلغك بس امانه عليك تطمنا
حسام / اكيد عن اذنكوا
حسام يمشى
……………………………
فى السنتر
ندى / ايه رايك اخدك و نتفسح شويه
مصطفى يبصلها
ندى / ما ليش مزاج اروح تعال نروح السينما ايه رايك
مصطفى يمسك ايدها جامد
ندى / او نقعد فى كافيه او نشوف مطعم ناكل فيه تصدق انا جعانه اوى انا هشوف تاكس ثوانى
ندى تروح توقف تاكس يقف
ندى / فاضى ياسطى
الراجل/ على فين
ندى / بص انا هديك اللى انت عاوزه بس عاوزاك معايا طول اليوم قولت ايه
الراجل / اللى تؤمرى بيه
ندى / والدى زى ما انت شايف حالته الصحيه على قده و الدكتور قال محتاج تغير جو ممكن تساعدنى نفسحه و كدا و اللى انت عاوزه هتاخده ما تقلقش خالص
الراجل / تحت امرك يا ست الكل
الراجل ينزل و يساعد مصطفى يركب و يطبق الكرسى و يحطه فى شنطه العربيه و ندى تركب و يمشوا
……………………………..
فى شقه منال
جرس الباب يضرب على يروح يفتح يلاقى نور مبتسمه
على / اتفضلى
نور تدخل و شايله حبيبه و منال تطلع من المطبخ و شايله صينيه عليها كوبايتين شاى تحطها على الترابيزه و تروح تحضن منال
منال / بقى كدا يا وحشه ان ما كانش على ما تفكريش تجيلى
نور / والله يا طنط انتى ما عارفه انا الفتره اللى فاتت عامله ازاى ان ما كانتش فى الصيدليه ببقى قاعده مع حبيبه او عمى
على / اخباره ايه صحيح
نور / يعنى فى تحسن بسيط اوى بس ما يذكرش طمنى انت على أية
على / نفس الوضع تحسن ما يذكرش
منال/ انتوا الاتنين احمدوا ربنا على الاقل الحاله مش بتسوء
على / اكيد الحمد لله عندى خبر وحش
منال / يا ساتر يارب خير
على / سمر اتوفت النهرده
منال / لا اله الا الله
نور / يا حبيبتى يا أية ياترى هتستقبل الخبر ده ازاى دلوقت
على / والله نفس اللى قاله عمر اول ما سمع الخبر
منال / هى بس تفوق و بعدين يحلها حلال
نور / معاكى حق
منال / اخبار ندى ايه
نور / والله ما تعرفيلهاش حال بس غالبا كويسه حسام كتبلها الشقه باسمها و قايدلها صوابعه العشره شمع هى قالتله ان دى اخر فرصه ليه و هو بيحاول يستغلها كويس
منال / ربنا يهدى سرهم
نور / بس ما اعرفش ايه اللى حصل النهرده تعرف يا على انها راحت تشوف سمر النهرده
على / عارف شوفتها فى القسم
نور / بجد
على / اه كانت بتعيط على اخرها و غالبا الحوار اللى دار بينها و بين سمر مهم اوى خصوصا ان سمر ماتت بعديه علاطول
منال / تفتكر تكون قالتلها ايه
نور / ما اعرفش بس هى فعلا كانت متغيره اوى لما رجعت و بعدين لما طلعت تانى ما لقيتهاش و لقيت موبايلها مقفول
على / مش فاهم
نور / و لا انا و على فكره ندى الفتره دى ما تتفهمش لما تتكلم معاها تقول انها مش بتحب حسام بس بتديله فرصه عشان خاطر حبيبه لكن تشوفها معاه بوس ايادى و كلام عسل و دلع و خروجات و هدايا تقول دول قصه حب و لا بتاعه الافلام
منال / ربنا يهدى
نور / والله بقول كدا مدام هاديين و متفاهمين خلاص مليش دعوه
على / طب ما تجربى تكلميها كدا تطمنى عليها
نور / حاولت كتير يجى ستين مره غير متاح على العموم اهو
نور تطلع الموبايل و تحاول تانى غير متاح
نور / شوفت غير متاح
منال / ما يمكن فصل منها
نور / انا قولت كدا برضه
على / هو لو حسام وصلها هيطمنك ؟؟؟ حسام عارف ان تليفونها غير متاح و كدا صح
نور / اه عارف بس ما اعرش بقى هيكلمنى و لا لا
على / الله طب ما تكلميه تطمنى يا بنتى
نور / اوك
نور تتصل بحسام
نور / الو
حسام / فى اخبار يا بنتى رجعت
نور / لا انا خرجت انا و بيبو عند طنط منال فبطمن منك
حسام / انتى بتستعبطى يا نور يعنى اعرف منين انها روحت دلوقت و لا لا
نور تبتسم للى حواليها و تقوم تروح البلكونه
نور / انت بتزعقلى كدا ليه هو انا بشتغل عندك
حسام / انا اسف يا ستى بس قدرى موقفى
نور / و انا لو ما كنتش مقدره كنت اتصلت اطمن
حسام / بصى اقفلى اقفلى انا هتصل بماما على الله تفيدنى
نور / اوك
نور تقفل تلاقى على واقف وراها
على / فى اخبار
نور / لا بس لو فى جديد هيكلمنى
على يجى يمشى نور تمسك ايده
نور / على
على / نعم
نور / انت زعلان منى
على / لا
نور / والله يا على انا مليش اى دخل باللى حصل و انا بعترف ان حسام له اخطاء هو مش ملاك يعنى كلنا بنغلط
على / نور لو سمحتى خلاص اعتبريها فتره و عدت و انسى اى حاجه تمام
نور / يعنى …ياترى… هينفع نرجع زى زمان
على / مفيش حاجه بعيد عن ربنا
نور تبتسم و تدخل هى و على
…………………………………..
فى شقه تهانى
تهانى / انتى كمان جايه تغلطينى
امانى / حرام عليكى يا تهانى هى كانت عشره يوم
تهانى / كانت اللى كانت و كل واحد راح لحاله بقى
امانى / هو مش محمد عملك كل اللى انتى عوزاه و اخدتى الفلوس بدل الشبكه
تهانى / الشبكه اللى نقتها لبنتى حته حته و جرام جرام تلبسها ست الحسن و عوزانى اهدى
امانى / امال انا اعمل ايه دا انتى ادرى بيا منى قد ايه مش طيقاها دى مبهدلاه و مبهدلانا كلنا معاها
تهانى / احسن اللى يتلفح بالحيه يا اختى
امانى / دى خلت الواد يكتبلها الشقه بيع و شرى
تهانى / يا مصيبتى
امانى / هو اللى فيا دا شويه و مشغله نور عندها بالسخره تقعد بالبت شويه و تقعد بابوها شويه و الغندوره كل يوم فى مكان اشى كوافير اشى باديكير تفقع
تهانى / يلا هو اللى جابه لنفسه
امانى / امال حبيبه قلبى فين
تهانى / هتلاقيها فى اوضتها
امانى / ما تقسيش عليها يا تهانى البت
تهانى / بنتى و انا حره فيها اربيها زى ما انا عاوزه ماشى و ان كان ابنك ضحك عليها مره فانا مش هبله عشان اسيبها ينضحك عليها تانى
امانى / والله ما عارفه اقولك ايه عينى منك فى الارض
تهانى / البت غلطت اه بس عشان وثقت فى ابن عمها ما كانتش تعرف انه مسحورله و لا انه هيستوطى معاها كدا يلا منه لله
امانى / ما تدعيش على الواد اقسم بالله مظلوم العيب على الحربايه اللى مسخناه و ممشياه و انتى بنفسك قولتيها سحراله و مجرجراه قادره و تعملها
تليفون امانى يرن
امانى / دا حسام …. الو ازيك يا حبيبى
حسام / ازيك يا ماما بقولك هى ندى روحت و لا لسه
امانى / اوووووف و انا مالى انا لتكون فاكرنى السكرتيره بتاعتها
حسام / معلش يا ماما شوفيها بس عشان خاطرى عشان خاطرى
امانى / ما تكلمها ياخويا على الموبايل الغالى اللى جايبهولها
حسام / ماما مش وقته بالله عليكي٠،، يا ست الكل ريحينى و شوفيها بس
امانى / انا اصلا مش هناك انا عند عمتك براضيها الست مش طايقه تبص فى وشى من عمايلك السوده انت و الست بتاعتك
حسام / سلميلى عليها
امانى / و بعدين مالك كدا ملهوف على ايه ما تغور و لا تروح فى ستين داهيه تاخدها و تريحنا منها هى دى زوجه دى و لا تنفع حتى هو انا عمرى اقدر اكون فى مكان من غير علم ابوك دى فاجره بس اقول ايه انت اللى سايبلها الحبل على الغارب يا دلدول يا معفن
حسام / فى اى حاجه تانيه تحبى تقوليها و لا اقفل
امانى / اقفل يا خويا اقفل و اجرى اتسحل ورا السنيوره على الله نسمع خبرها قريب قادر يا كريم
حسام / سلام يا ماما
امانى / سلام يا حبيبى سلام
امانى تقفل و تنفخ
تهانى / ايه طفشت
امانى / من بقك لباب السما اياكش ننضف بقى من الارف ده يا باى تقيله على قلبى بشكل
تهانى / الخفيفه كانت عندك كنتى عملتيلها ايه
امانى / اخص عليكى يا تهانى لا والله اخص امال لو ما كانش كل حاجه على ايدك
تهانى /خلاص يا امانى فضيها سيره بقي انا هقوم اعملك شاى
امانى / لا كتر خيرك انا ماشيه سلام
تهانى / نورتى
امانى تقوم و تمشى و تهانى ما تقومش حتى توصلها للباب
……………………………..
فى كفايه
مصطفى يشاور لندى عاوز ينام
ندى / تعبت و لا ايه …. طيب ثوانى
ندى تقوم تفتح موبايلها يرن فى ساعتها ترد
ندى / الو
حسام / انتى فين
ندى / و انت مالك
حسام / اقسم بالله
ندى / ششششششششش اسكت خالص و اسمعنى عشان لو انا اتعصبت هقفل الموبايل و ارميه فى اقرب صفيحه زباله و ابقى قابلنى لو عرفتلى طريق جره
صمت
ندى / شاطر بتفهم ندى بتاعه زمان اللى كانت بتعيط جنب الحيطه خلاص انساها انا الايد اللى بتوجعنى بقطعها و لا يهمنى اصل عمرك ما هتاذى حبيبه مش عشان انت ابوها و لا حنيه الدنيا اللى بتشر من عنيك و لا عشان اى حاجه غير انك واثق و متاكد ان حبيبه هى الكارت الوحيد اللى فى ايدك عشان افضل معاك و انى لو مسكت عليك غلطه صغيره تخص حبيبه هتخسرنى نهائى تحب تخسرنى نهائى يا حسام
حسام / لا
ندى / اتفقنا نرجع بقى للاتفاق القديم انا ما بشتغلش عندك لا جريتك و لا خدامتك عاوز تعيش معايا بما يرضى الله تتعامل معايا بما يرضى الله لا فى بينا غش و لا كدب و لا تاليف و لا اى حركه من حركاتك الزباله انا عرفت الحقيقه و عرفت ان على ما كانلوش اى ذنب فى اللى حصل مش زى ما قولتلى
حسام / انتى فين يا ندى
ندى / هتعرف انا فين لما يجيلى مزاج اقولك انا فين دلوقت تعتزر عن اللى انت عملته و توعدنى انك زى الشاطر مش هتكرره تانى عشان اقسم بالله المره الجايه مش هكتفى بقرصه و دن يا حسام باشا المره الجايه هقطعهالك فاهم و لا لا
حسام / تعجبينى
ندى / انا اعجب المهم انا قدامى ساعه بالكتير اكون فى البيت الاقيك مستنينى مع حبيبه و عشوه حلوه و كادو لطيف كفايا ساعه و لا اتاخر شويه
حسام / كفايا اوى
ندى / اوك اتفقنا سلام
ندى تقفل و تشاور للسواق قاعد على ترابيزه تانيه و بياكل يروحلها جرى
ندى / بابا للاسف تعب كمل اكلك على ما احاسب عشان نروح
السواق / تحت امرك يا ست الكل
…………………………….
- يتبع الفصل التالي اضغط على ( رواية سلف و دين ) اسم الرواية