رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الخامس و الاربعون 45
فى شقه ليلى
جرس الباب يضرب تروح تفتح تلاقى امانى
ليلى / اهلا وسهلا اهلا و سهلا اتفضلى
امانى / انا قولت اطلع اطمن انك مش ناقصك حاجه انتى لوحدك برده
ليلى / فيكي الخير كلمتى نور
امانى / طبعا دى كل شويه تبعتلى صورهم على الواتس
ليلى / ربنا يهنيهم تحبى تشربى ايه
امانى / و لا اى حاجه ما تتعبيش نفسك تعالى اقعدى
ليلى / هجيب عصير ثوانى و ارجع
ليلى تدخل المطبخ و امانى قاعده تبص على الشقه و تمسح ايدها على العفش تتاكد انه نضيف ليلى ترجع شايله صينيه عليها كبايتين عصير تحطهم و تعزم على امانى تبتسم و تاخد الكبايه و تحطها على الترابيزه
امانى / اكيد طبعا عمر و أية هيبقوا يجوا و يروحوا عليكي لحد ما على و نور يرجعوا و لا ايه
ليلى / بيتهم يجوا وقت ما يحبوا طبعا
امانى / على كدا علاقتك بأية كويسه
ليلى / انا لسه متعرفه عليها من كام يوم بس ان شاء الله نقرب من بعض مع الوقت
امانى / كام يوم ايه … اااااه صح صح ما كان فى حنان باين صح
ليلى / مش فاهمه
امانى / اقصد ان طليقك كان متجوز واحده بعدك اسمها حنان مامه عمر
ليلى / الله يرحمها دى كانت ملاك على رجلين
امانى / الله يرحمها دى بقي اللى تلاقيها تعرف مامه أية
ليلى تبصلها بعدم فهم
امانى / أية تبقي بنت مرات ابو على
ليلى / سمر
امانى / الله يحرقها وليه مجنونه دى حاولت تقتل حسام ابنى بس الحمد لله ربنا جابلنا حقنا منها و خدها جهنم و بأس المصير
ليلى / ربنا يرحمها
امانى / ربنا ما يريحها فى تربه
ليلى / لا اله الا الله ليه كدا ماتت خلاص
امانى / اسمع انها عذبت على جامد يا قلبي و نور بتقول لسه اثار التعذيب على جسم على لحد دلوقت
ليلى / ربنا يرحمها ماتت خلاص ما لوش لزوم نجيب فى سيرتها
امانى / يعني مسمحاها على اللى عملته فى ابنك
ليلى / ما قولتلك هى عند ربنا خلاص
امانى / انا مش مسمحاها و لعلمك بنتها كمان مش سهله ما شوفتيهاش فى فرح نور قفيله كدا و شغل سلايف و بكره توقع بين الاخوات و تقولى امانى قالت
ليلى / ربنا يهدى الجميع
امانى / انا مش عارفه عمر شايف فيها ايه تلاقى امها كانت سحراله و لا حاجه تعرفى ان البت بتروح لدكتور نفسانى هو ما حدش بيقول بس انا سمعت طراطيش كلام و لما اطقست عرفت كل حاجه
ليلى / و مين فينا مش محتاج دكتور نفسي يعالجه من قرف الدنيا اللى حطت علينا يلا دع الخلق للخالق
امانى / يا خبر دا الوقت اتاخر اوى و تلاقيكي عاوزه ترتاحى ما تاخذينيش يعني خدت و اديت و نسيت روحى اصلى ارتحتلك اوى
ليلى / لا ابدا انا سعيده جدا انك طلعتيلى
امانى / احنا اهل دلوقت
ليلى / اكيد
امانى / هستاذن انا بقي عن اذنك
ليلى / ما لسه بدرى انتى حتى ما شربتيش العصير
امانى / الجايات اكتر
ليلى / اكيد ان شاء الله نورتى
امانى تنزل و ليلى تقفل الباب و تروح تمسك الموبايل و تيجي تكتب حاجه تمسحها و تقوم تدخل العصير
…………………
على البحر تانى يوم
نور بتعوم فى الميه و على قاعد على الشط متابعها و مفيش ناس على الشط نور تطلع يناولها البشكير تتنشف
نور / الميه منعشه جدا ما تنزل يا ابنى
على / شويه كدا
نور / بصراحه مش مصدقاك فى حد يبقي قدامه بحر بالجمال ده و يقعد على الشط
على / طب اقعدى كدا
على يشد نور جنبه
على / بصي كدا فى البحر مع السما بصي لتدريجات الالوان و السحاب بصي على الموج اللى بيترقص قدامك
نور / سبحان الله
على / سبحان الله … شمى بقي ريحه اليود و عبى صدرك اسمعى الهدوء
نور / ههههههههه اسمع الهدوء ازاى يعني
على / استمتعى بيه يعني بعيد عن دوشه العربيات و خناقات الناس فى الشارع هدوء ممتع
نور / طب ما الميه ممتعه برده و لا انت ما بتعرفش تعوم و مكسوف تقولى فبتغطى بشويه العمق اللى فى كلامك دول
على / انا عمرى ما ضربت بنت بس شكلك نفسك فى واحده على قفاكى
نور / ما اهونش عليك
على / عمرك … بعرف اعوم و بعرف اعوم كويس اوى كمان
نور / اتعلمت ازاى و فين
على / بابا زمان كان بيعلمنا كان بيجبنا اسكندريه شهر كل يوم نصحى من طلوع الشمس لغروبها منقوعين فى الميه و الشمس نرجع فحمه
نور / هههههههههههههههههه
على / انا كنت ابيض زمان
نور / ما انت لسه ابيض يا على
على / لا كنت ابيض من كدا كمان
نور / و بعدين كنتوا بتعملوا ايه تانى
على / عادى و لا حاجه بنروح مهلوكين نستحمى و ناكل لقمه و ننام لتانى يوم الصبح عادى جدا نادرا ما نعدى يوم مثلا استثناء نخرج فيه و نروح ملاهى و لا اى حاجه اصل الحاجات التانيه ممكن نعملها فى مصر انما البحر هنجيبه منين تانى
نور / كنتوا اسره سعيده
على / بس زى كل حاجه فى الدنيا ما فيش حاجه بتدوم
نور / بس على الاقل عرفت الحقيقه
على / الحقيقه عمرها ما هتبقي كامله
نور / قصدك ايه
على / يعني انا الاول كنت عارفها من وجهه نظرى دلوقت عرفت من وجهه نظر ماما مش يمكن بابا الله يرحمه كان ليه وجهه نظر تانيه
نور / ممكن بس انا رايي ان اللى وصلتله كفايا انه يريحك نفسيا مامتك ما باعتكش بالعكس اتظلمت و اتحرمت منكوا
على / صدقيني صعبت عليا بس … ما ارتحتش
نور / ليه يا على كان بايدها ايه تعمله
على / فى اطفال صغيره دفعت التمن … و دا اللى ندى بتعانى مع اخوكى عشان حبيبه ما تعيشهوش
نور / لفيت لفيت و اتكلمت عن حسام
نور تبص على البحر بقمصه
على / بابا ما قدرش يستحمل يعرف ان مراته بتحب واحد تانى و اخوكى اخد ندى غصب و هو عارف انها بتحب واحد تانى و مش مره مرتين
نور تبص لعلى و تقوم تقف
نور / انا مش هسمحلك تجرنى اقول كلام اجرحك بيه و لا اتكلم عن ابوك الله يرحمه بس الفرق اللى بين باباك و اخويا لو فكرت فيه مش ديما فى صالح باباك على الاقل اخويا بيعمل كل اللى يقدر عليه عشان يوفر لحبيبه بيت هادى مستقر
على يبتسم بسخريه
على / جدا … مستقر و هادى جدا بدليل دخلتنا التاريخيه مش كدا
نور تقعد قدام على
نور / ما حدش فينا كامل انت نفسك عملت حاجات ندمان عليها و كل ما بتفتكرها بتندم اكتر بس ما تقدرش تصلح اللى فات
على / بس بعوضها ما بتطلبش حاجه ما بعملهاش انا عملت لأية اكتر من اللى
نور / وحسام كمان بيحاول و كلنا بنحاول … بص احنا فى كل مره بنتكلم عن حسام بنتخانق لانك بتنسي انه اخويا و ان فى يوم انت طلقتنى هو مش هينفع يطلقنى ابدا
على / يعني لو خيروكى بينا هتختاريه
نور / و انت ناوى تحطنى فى الموقف ده يا على
على / افرضي حصل
نور / انا نازله الميه عن اذنك
نور تسيب البشكير و تدخل البحر و على متابعها و باين عليه الضيق ينفخ و يقوم يجرى وراها و يشيلها يحدفها فى الميه و هم بيضحكوا
نور / ههههههههههههههههه يا مجنون
………………………
فى الشركه عند حسام
حسام / انتى بتضربى منشطات ولا ايه
هدايه / ههههههههههههههه اشمعن
حسام / انا قولت هتيجي على الاقل مصدعه دا ان قدرتة تيجي
هدايه / و انت صدمتنى لما مشيت بدرى
حسام / المدام و النونو انتى عارفه بقي
هدايه / يعني كنت هتنبسط اكتر لو كنت لوحدك
حسام / ما افتكرش الواحد لازم يراعى اللى معاه برده
هدايه / كل يوم بتكبر فى نظرى معظم المصريين لما بيجوا هنا بيبقوا فاكرين لبنان بقي و بنات و كدا بس اكيد احنا مش كدا خالص
حسام / لا ما انا شوفت امبارح
هدايه / لا امبارح دا يوم فى السنه
حسام / كل سنه و انتى طيبه
حسام يبص فى الساعه
حسام / فاضل دقيقتين و الكوفى برايك تخلص بيتهيالى كل واحد يرجع مكتبه احسن
هدايه / ايه الالتزام ده بتحسبها بالدقيقه
حسام / ههههههههههه عن اذنك
حسام يرجع مكتبه بنت تانيه تدخل
البنت / عن شو عم تحكوا
هدايه / روقى على حالك
هدايه تمشي على مكتبها و عينها على حسام يبتسملها و يبص فى ملف قدامه
……………………
فى شقه أية
منال / و انتى ما حاولتيش تصلحى اللى حصل من يوميها
أية / و دا يتصلح ازاى يعني
منال / باى حاجه يا أية ما هو مش عشان عمر سكت و لم الموقف يبقي مش مضايق دى مش حاجه سهله على اى راجل يا بنتى
أية / و انا فى ايدي ايه اعمله بس
منال / فى ايدك ايه ؟ دا كل حاجه فى ايدك يا أية يا بنتى
أية / مش عارفه بقي
منال / اخبار المزاكره ايه
أية / زى الفل دى الحاجه الوحيده اللى ماشيه زى الفل معايا اساسا
منال / هههههههههههههههه طب قومى اللبسي
أية تبص على نفسها
منال / هنخرج يا أية
أية / اااه تمام تمام … هنروح فين
منال / هنروح للست ليلى نبص عليها دى لوحدها برده يكون ناقصها حاجه كدا حاجه كدا ما يصحش
أية / بس ما نعديش على الوليه امانى دى
منال / ياربى يا أية قومى يا بنتى ربنا يهديكي قومى قومى
أية / حاضر
أية تقوم و تدخل الاوضه و منال قاعده
…………………
فى اوضه نور
ندى بتتكلم فيديو كول مع نور
ندى / و الله زى ما بقولك قمصان نوم و اكسجين و مكياج و هئ و مئ
نور / اوروبا العرب
ندى / ما انبسطش خالص والله … بس مش هنكر انا اصلا بقالى ياما الشيطان بيلعب فى دماغى
نور / بترضعى
ندى / يوووووه بقي هادمه الملزات
نور / ههههههههههه معلش هانت
ندى / سيبك منى اخبار المالديف ايه
نور / جميله هدوء و ميه و خضره هنعوز اكتر من كدا ايه
ندى / حسام قالى اننا فى الاجازه هنطلع الجبل و نتفسح بس انا مش متحمسه خالص عشان حبيبه و كدا
نور / يا بنتى الدنيا متمهده مش هتتسلقوا افرست يعني روحى و استمتعى بالطبيعه
على يدخل
على / اتصلوا بيقولوا العربيه فاضلها نص ساعه
نور / تمام يا حبيبي انا جاهزه اصلا هخلص التليفون اللى معايا و ننزل
على يروح يقعد جنبها ندى تحط الموبايل على السرير بسرعه عند نور يبان السقف ف الموبايل
نور / روحتى فين يا بنتى
ندى / معلش بعدل حبيبه قبل ما تصحي … بصي روحى انتى شوفى بتعملى ايه عشان ايدي مش فاضيه خالص معلش
نور / تمام يا حبيبتي هكلمك بعدين
ندى / سلام اقفلى انتى ايدي مش فاضيه
نور / سلام
نور تقفل
على / ايه الاخبار
نور / تصادم ثقافات كانوا فى عيد ميلاد إمبارح و ما انبسطتش
على / سريع اوى حسام ما شاء الله لحق يتعزم على عيد ميلاد دول لسه واصلين
نور / اهى دى حاجه ما تعرفهاش عن اخويا اولا حسام مجامل جدا و علاقاته حلوه اوى مع الناس كلها
على / طب يلا يلا عشان ما نلطعش الناس خلينا نتفسح
نور / يلا يا حبيبي
نور و على يمشوا و على يقفل الباب وراه
…………………..
فى شقه ليلى
ليلي داخله شايله صينيه عليها عصير
ليلى / اهلا اهلا البيت نور
منال / احنا قولنا نيجي نسليكي شويه
ليلى / خير ما عملتى الواحد من الاوضه للبلكونه للصاله للمطبخ
منال / طب ما تخرجى يا ست ليلى اتمشي و غيرى جو قاعده البيت وحشه بتجيب المرض
ليلى / اروح فين بس الواحد لا له اهل و لا صحاب
منال / اخص عليكي امال احنا روحنا فين
أية / فى نادى قريب هنا ابقي خلى على يشتركلك فيه
ليلى / ههههههههههه و هعمل ايه فى النادى يا أية فى السن ده
منال / اقعدى فوسط الخضره و الشجر اتعرفى على ناس جديده و غيرى جو قاعده البيت وحشه
ليلى / ان شاء الله … و انتى عامله ايه يا أية اخبار دراستك ايه شكلك صغير قولت اكيد لسه بتدرسي
أية / الحمد لله انا اصلا انتساب مش بروح بس عمر كان معيد يعني و بيكلملى زمايله يجيب المناهج و يزاكرهالى
ليلى / كان معيد كان
منال / هو شغل الحكومه بيفتح بيت يا ست ام على اهو مسك محل ابوه الله يرحمه و بيسترزق منه
ليلى / ربنا يرزق الجميع … الا انتى ايه علاقتك بالست ام نور يا حجه
أية ملامحها يبان عليها القرف و ليلى تاخد بالها
منال / كل خير ان شاء الله دا انا اعرفهم من سنين من ايام ما كانت نور متجوزه فى الشقه اللى جنبى ناس طيبين اوى و ابوها طيب و البت بلسم اقسم بالله
ليلى/ الحمد لله
منال / هو فى حاجه حصلت يا ست ليلى
ليلى / لا والله ابدا ما تحطيش فى بالك
أية / انا ما بحبهاش
منال / أية
أية / سكت
ليلى / ما بتحبيهاش ليه يا أية
منال / يا اختى حوارات تافهه كدا
أية / مش تافهه و المفروض طنط تعرف كل حاجه
منال / انا الغلطانه اقسم بالله
ليلى / هو فى ايه يا ست منال
منال / ما فيش والله هو بس اكمن أية و الست امانى مش متفقين و كدا
أية / لا عشان ابنها واطى و ابن كلب بس هى ما بتغلطوش بالعكس بتفترى على الناس و بناتهم انما بنتها لازم تتشال على الراس
منال / ما بناخدش نور بذنب اخوها نور كويسه و بنت حلال و لا لا
أية / امها مين و اخوها مين هتطلع عدله لمين يعني
ليلى / و انتى مامتك مين يا أية
أية / انا امى ماتت حتى الرحمه ما بترحمهاش عليها عن اذنكوا
أية تقوم تعدل نقابها و تفتح باب الشقه و منال تقوم وراها أية تبصلهم
أية / و دا برده بسبب ابن الكلب اللى هى مربياه
منال / استنى يا أية انا جايه معاكى … حقك علينا يا ست ليلى عن اذنك
منال تاخد أية و تمشي و تقفل الباب و ليلى واقفه مش فاهمه حاجه
………………
فى شقه امانى
امانى واقفه تتسنط
صوت منال / اخص عليكي و الله اخص
صوت أية / انا اللى جوايا قولته
صوت منال / لينا بيت نتكلم فيه امشي امشي
امانى / طوبه على طوبه خلى العركه منصوبه
امانى تجرى تمسك التليفون
امانى / ايوه يا تهانى ازيك …. ايوه لسه نازلين حالا ….حصل زى ما قولتيلى بالظبط
…………………
فى اوضه على
على واقف فى التيراس بيتكلم فى التليفون
على / الناس دى سريعه اوى ما شاء الله
عمر / انا قولت اقولك قبل ما الحوار يوصلك بصوره تانيه
على / و لا كانه وصل اصلا
عمر / ههههههههه يا راجل
على / بص منهم لبعض يصطفوا
عمر/ انت ادرى
على / أية عامله ايه
عمر / من ساعه ما رجعت و هى بتعيط
على / خليك جنبها و احتويها و قولها ما تشغلش بالها باى حاجه و لا اى حد
عمر / تمام … هسيبك بقي عشان ما بقاش عازول اكتر من كدا
على / سلام
على يقفل و يدخل يلاقي نور قاعده على السرير بتقلب فى التليفزيون يقعد جنبها
على / مش هنخرج و لا ايه
نور / تمام هقوم اللبس
نور تقوم تفتح الدولاب
نور / خير فى حاجه حصلت و لا ايه
على / لسه والله كنت هستغرب و اقول معقول فى بنت فى الدنيا مش فضوليه
نور / لو مش عاوز تقول ما تقولش انا بطمن بس ان كل حاجه تمام
على / احنا جايين هنا ننبسط
نور / تمام يا على
على يحدفلها بوسه تقفل الدولاب و هى بتضحك
……………………
فى اوضه عمر
عمر واخد أية فى حضنوا و نايمين
أية / انا كلمت ندى على فكره
عمر / اخبارها ايه
أية / بتقول كويسه بلد جميله و ناس جديده بس ما حستهاش مبسوطه يعني بتقول مبسوطه و بتضحك و عامله عادى بس انا مش مصدقاها خالص
عمر / ما يمكن فعلا عادى و انتى اللى رافضه تصدقى
أية / يمكن … يمكن لما بعدت ارتاحت … عملت ايه فى حوار اسكندريه
عمر / شغال عليه والله مش ساكت
أية / ان شاء الله خير
عمر / فكرتى كويس فى الموضوع ده هنا فى ناس تغيرى جو معاهم و عندهم هناك مفيش انا فى المحل و انتى طول الوقت لوحدك
أية / لا … هناك ناس ما تعرفنيش هتعرف على ناس و هبدا حياه جديده
عمر يبصلها و يسكت
أية / مستحيل يكون الفيديوهات وصلت لاسكندريه صح
عمر يحاول يلم الموقف
عمر / طبعا طبعا ازاى يعني اكيد ما وصلتش احنا لمينا الليله بسرعه اصلا و اكيد الموضوع انتهى خالص
أية / صح مش كدا
عمر / اكيد طبعا ان شاء الله
أية / اكيد طبعا و لا ان شاء الله
عمر / ما هو كل حاجه لازم تبقي بمشيئه الله يا يويو في ايه مالك فكى كدا و نامى و ما تفكريش فى الحاجات دى تمام
أية / صح معاك حق
عمر / تصبحى على خير يا حبيبتي
…………………..
فى شقه ليلى
ليلى بتتكلم فى التليفون
ليلى / لا طبعا ما زعلتش … انا بصراحه مش هخبى عليكي بس انا اضايقت لما عرفت ان أية فعلا بنت سمر
منال / ايوه بنتها بس اكتر واحده اتاذت من امها دى بت غلبانه لا ليها فى الطور و لا فى الطحين كل همها انها تعيش مع عمر اللى بتحبه من و هى عيله صغيره و للاسف امها بقي ربنا يسامحها عملتلها مشاكل كتير اوى يلا بقي الميت ما تجوزش عليه الا الرحمه
ليلى / و ايه اللى كان بين اخو نور و سمر ام أية
منال / كتير مواقف كتير انتهت بان سمر كانت هتموته و دخلت السجن و ماتت فيه
ليلى / و ازاى على يحشر نفسه فى عيله زى دى
منال / نور غير اخوها خالص و بتحب على و هو كمان بيحبها تعرفى من فتره قبل ما يتخطبوا كانوا بيتحججوا يكلموا بعض باى حجه و لما نور حاولت تبعد على طلب منى اعزمها بما انها حبيبتى و عملها كمين عندى و رجعت تكلمه تانى ههههههههههههه
ليلى / حاسه انى غريبه مش عارفه حاجه و كلمه بتوديني و كلمه بتجيبنى
منال / انتى ليكي بابنك و سعادته و نور لو لفيتي الدنيا لا هتلاقي اطيب و لا احن منها دى بتحب على اكتر من روحها
ليلى / ما تاخذينيش يا اختى بس ايه اللى يخلى على و هو يا قلبي فى عز شبابه يتجوز واحده مطلقه و ما بتخلفش
منال / الحب يا ست الكل طب على فكره انا كمان ما بخلفش و الحج الله يرحمه عاش معايا سنين عمره لا عمره حسسنى انى ما بخلفش و لا قالى و لا سمح لحد يقولى كلمه تجرحنى و لما كبرنا سوا و شاف على و اخلاقه و جدعنته حبه و خدناه ابن لينا و الحمد لله عمل عشانا اللى يمكن ابننا اللى من صلبنا ما كانش عمله
ليلى / يكرم اصلك يا غاليه
منال / اسمعى يا ست ليلى انتى شوفتى كتير و ضاع من عمرك بعيد عن ابنك كتير استمتعى بالجزء اللى باقي اسعديه و انسي اى حاجه ممكن تجيب مشاكل
ليلى / يعني انا مش من حقى اشيل عياله يعني
منال / اللى ليه نصيب فى حاجه هيشوفها سبيها على الله يرزق النمله فى بطن الحجر مش هيرزق ابنك
ليلى / و نعم بالله بس نسعى
منال / سبيها لله بقولك
ليلى / و نعم بالله و نعم بالله
…………………..
بعد كام يوم فى شقه نور
عمر و منال و ليلى و امانى و محمد و مصطفى و أية و على و نور قاعدين هلكانين ضحك
نور / قرا القران كله و قعد يدعى بكل الادعيه اللى حافظها
على / كنت متاكد انك مش هتسترى والله
نور / ما فيهاش ستر دى تخيل يا عمر طول الرحله شايل هم ركوب الطياره فى الرجوع دا كان خايف اكتر
على / و احنا رايحين كان فى حتت فيها مطبات هوائيه باين صح ؟
نور / هههههههههههه اه الطياره تنط كدا و دا الله اكبر لا اله الا الله اشهد ان لا اله الا الله
على / و دى هلكانه ضحك جنبى
نور / غصب عنى والله و دا يتعصب ما تنرفزنيش يا نور مش ناقصك
عمر / ههههههههههههه كفايا والله مش قادر
ليلى / المهم رجعتوا بالسلامه
على / و مش هنكر ان بغض النظر عن الطياره الرحله كانت جميله اوى
منال / ميه و خضره و وجه حسن ما تنبسطش ازاى
نور / حبيبي انت
امانى / و هتنزل الشغل من امتى يا على
على / بكره الصبح ان شاء الله انا تقلت على الشباب اوى الفتره اللى فاتت
امانى / و انتى كمان يا نور لازم تنزلى الصيدليه المال السايب يعلم السرقه يا بنتى
نور / اكيد باذن الله احنا اصلا متفقين على كدا
منال تبص لليلى
منال / اقول انا و لا تقولى انتى
على يبص باهتمام
ليلى/ الست منال ناويه تفتح محل ملابس اطفال و عوزانى اساعدها
على / هى فكره حلوه و كل حاجه بس هتقدرى يا ماما على الوقفه دى
منال / و هى فين الوقفه احنا هنقعد نتابع و هجيب بنتين و لا حاجه يقفوا فى المحل
امانى / طب ما أية تساعد
أية / احنا مسافرين اسكندريه
على / علاطول كدا
عمر / انا ماشي فى الموضوع السمسار جابلى كذا حاجه و هنسافر بعد بكره صد رد نتفرج و نشوف
على / ربنا يقدم اللى فيه الخير … تمام … و انا كمان هشوف سمسار يستلقطلنا محل كويس تبداو فيه و كمان هشوف كدا لو حد يعرف يخدمنى فى الحكايه دى اصلي ما ليش خبره خالص فى حكايه الملابس دى بصراحه يعني بس ان شاء الله خير يعني
امانى/ ما تشوفوا حسام حسام يعرف ناس فى كل حته و ممكن كمان يعرفكوا على مستوردين من بره
نور / و حسام هيعرف ناس فى الملابس منين بس يا ماما
امانى / اكيد بتوع الجمارك اللى بيستوردوا الادويه يعرفوا ناس تانيه بتستورد ملابس انتوا بس كلموا حسام وانا متاكده انه فى ظرف اربعه و عشرين ساعه هيكون مخلصلكوا الليله دى ابنى و انا عرفاه
نور / تمام … انا بقول المحل يبقي فى منطقه حيويه احسن من انه يبقى فى المنطقه هنا و لا ايه يا على
عمر / بالعكس طب ما المحل بتاعنا مش فى منطقه حيويه و لا فى المناطق بتاعه الموبايلات لكن بيخدم سكان منطقته كروت شحن كفرات شواحن حاجات من دى فلما المحل يبقي فى منطقه مفيهاش محلات ملابس هيخدم سكان المنطقه الناس هتستقربه و خصوصا لو بيقدم منتج منافس فى السعر و الجوده
على / و هنا بقي العلم بيتكلم
عمر / لا يفتى و مالك فى المدينه
على / ماشي يا عم مالك هههههههههههه … بس هو من باب الفضول يعني بغض النظر انى سعيد جدا بفكرتكوا دى بس الحكايه دى جتلكوا منين
ليلى / انا كنت بدور على شغل فالست منال ربنا يسترها قالت تفتح محل و اساعدها فيه و لما اتكلمنا كذا مره اخر كلام كان محل اطفال
عمر / على فكره دى فكره ممتازه لان الناس بتصرف كتير جدا على لبس الاطفال خصوصا ان الاطفال جسمهم بيتغير بسرعه فبيحتاجوا لبس كتير فى السنه و لو رضع بقي دا بيبقي لبس جديد كل كام شهر
امانى / شكلك دارس الموضوع اوى يا عمر
عمر / انا عدى عليا دراسات جدوى لمشاريع كتير اوى سواء فى الكليه او مشاريع طلبه لما بقيت معيد
ليلى / و مش حرام يا ابنى تسيب كل ده كدا مش ندمان يا ابنى
أية تبص لعمر
عمر / زمان كان نفسي ابقي مهندس و ربنا ما كتبهاليش على قالى اكيد ربنا شايلك حاجه احسن وفعلا بقيت معيد بس انا متاكد ان ربنا شايلي حاجه احسن كمان من كدا
على / ربنا يعملك الخير كله يا عمر انت جدع و ابن حلال و بعدين المحل كمان كان محتاج اللى يديره
امانى / و هو هيسيبه و يسافر
عمر / لا يا طنط انا هبقي بين هنا و هناك و هجيب حد يقف فيه
امانى / ربنا يعملك اللى فيه الخير يا ابنى مع انى مش شايفه اى سبب للشحطته دى
أية / احنا بنحب اسكندريه و من و احنا صغيرين نفسنا نعيش هناك
امانى تتكلم باسطناع
امانى / بس هتوحشونا و الله
أية / لا ما تقلقيش حضرتك زى ما عمر قال هنبقي بين هنا و هناك
امانى / ما تعمليلنا شاى و لا نسكافيه و لا شوفى عندك ايه جوه يا نونو
ليلى / فى كل حاجه ربنا يباركله عمر جاب حاجات كتير امبارح استنى هقوم اوريكي
على / هاجى اساعدك خليكي يا نونو
نور تبصله يغمزلها تقعد و ليلى و على يدخلوا المطبخ
………………..
فى الشركه عند حسام
هدايه / انا متاكده ان التقارير الشهر ده هتبقي عاليه جدا انت فرقت جامد فى الشركه
حسام / مجامله لطيفه منك انا بقالى قد ايه هنا
هدايه / صدقنى جه مكانك هنا كتير و كانوا متخصصين عنك كمان و خربوها
حسام / انتى قديمه هنا بقي
هدايه / من يوم ما اتخرجت و تصدق انا و انا فى الكليه كمان كنت باجى اتمرن هنا
حسام / شاطره
حسام توصله رساله يبص فيها
هدايه / مراتك
حسام / ايوه عاوزين بامبرز
هدايه / بنوتك حلوه اوى حبيتها على فكره
حسام / شكرا اسمها حبيبه
هدايه / شبهك
حسام / بالعكس دى نسخه من مامتها ما خادتش منى اى حاجه … و على فكره فاضل دقيقتين فى الكوفى بريك
هدايه / انت كل مره تطردنى كدا
حسام / ما الاوقات الحلوه بتعدى بسرعه و اخاف الوقت يسرقنا
هدايه / فدى معاك حق هههههههههه عن اذنك
هدايه تمشي و حسام يقعد عدل على مكتبه شاب يروح يحطله ملف
الشاب / الطلبيات كلها اتسلمت بالكامل استاذ حسام
حسام يبص فى الملف
حسام / بالسرعه دى ما شاء الله عليك ان شاء الله هكلم مستر عدنان على مكافاه حلوه ليك
الشاب / نصيحه من اخ هدايه بتقرب مستر عدنان و عزيزه عليه
حسام / مش فاهم قصدك
الشاب / باختصار هدايه بنت عاطله
حسام / على فكره انت فاهم غلط انا راجل متجوز و هى مجرد زميله شغل
الشاب / كيب ايت ذات واى ( حافظ على العلاقه فى المستوى ده )
الشاب يبتسم و يمشي
حسام/ دا ايه البلاوى اللى بتتحدف علينا على الصبح كدا
حسام يبص على هدايه يلاقيها مركزه معاه و مبتسمه يبص فى الشغل
…………………..
فى مطبخ على
على / يعني مش ناقصك حاجه
ليلى / و هو الواحد ما يشتغلش الا لو ناقصه حاجه انا بقالى سنين بين اربع حيطان يا على لما جاتلى امراض الدنيا
على / و ماله يا ماما اخرجى و اتفسحى و لو تحبى اشوفلك نادى كويس تقعدى فيه
ليلى / مع مين يا على انت فى شغلك ونور فى شغلها اعرف مين تانى انا
على / انا مش ضد الشغل على فكره انا بس مش عاوزكوا ترهقوا نفسكوا انتوا حقكوا ترتاحوا فى السن ده
ليلى / سن مين يا وله دا انا اللى يشوفنى جنبك يقول اختك الصغيره
على / هههههههههههه و حد يقدر يقول غير كدا يا قمر انت
ليلى تبتسم
على / بس برده فكرى تانى انا ممكن اكلملك نور تنزلى معاها الصيدليه و اهى تحت البيت
ليلى / بقولك ايه الناس بره و احنا طولنا هنا اوى و دا عيب نتكلم فى الموضوع ده بعدين
على / انا مش هتكلم فيه تانى اصلا فكرى و اى كان قرارك انا معاكى فيه حتى بعد كدا لو حبيتي تغيرى رايك برده هبقي معاكى و جنبك
ليلى / ربنا ما يحرمنى منك … انا اكيد عملت حاجه حلوه اوى فى حياتى عشان ربنا يرزقنى بينك
على يبتسم ليلى تعدى ايدها على وشه و تيجي تشيل الصينيه على يسبقها
على / و هو بعد الكلمتين الحلوين دول هخليكي تشيلى انتى برده
على يشيل و يسبق وليلى وراه مبتسمه
………………….
فى شقه ندى
ندى نايمه على السرير و حبيبه فى حضنها حسام يدخل شايل اكياس يحطها فى الارض و يبص مفيش صوت يقفل الباب و يدخل يلاقيهم نايمين يبتسم و يروح يبص فى المطبخ و يفتح فى الحلل ندى تدخل
ندى / حمد الله على السلامه اخبار الشغل ايه
حسام / واقع من الجوع
ندى / غير هدومك و اغسل ايديك على ما اغرف
حسام يبوسها من خدها و يطلع بره و هى تبدا تغرف و هى بتدعك فى عنيها حسام يرجع تانى
حسام / انا جبتلك كل الحاجات اللى طلبتيها بره
ندى / شكرا
حسام / هى بيبو نايمه من امتى
ندى / لسه من مفيش كنت بنيمها غفلت جنبها
حسام / تحبى تخرجى بالليل
ندى / بكره اجازه و لا ايه
حسام / لا يعني ساعتين تلاته يعني نغير جو نتعشي فى اى حته
ندى / ما لهاش لازمه لو عاوز تخرج مع صحابك
حسام / انا ما ليش هنا غيرك
ندى / معقول كل ده و ما اتصاحبتش على حد
حسام / اتعرفت عليهم بس انا عاوز اقضى وقتى معاكى انتى انتى اللى تفرقى معايا
ندى / بس حبيبه مش هتريح انت عارف بقت بتزن و تقريف
حسام / هشيلها انا و هناخد معانا حاجتها و على فكره فى بيبي سيتر
ندى / لا انا ما سبش بنتى مع حد غريب
حسام / دا شغلهم يا نونو متخصصين فيه
ندى / قولت لا ممكن بقي تروح تغير على ما اغرف
حسام / اموت فيك و انت متزرزر يا نرف انت يا خطر
ندى تبصله باستغراب يحدفلها بوسه و يمشي
ندى / صبرنى يارب
ندى تغرف
………………..
بعد فتره فى الشركه عند حسام
حسام قاعد على مكتبه بيبص فى ورق هدايه تدخل تحط بوكس هديه على مكتبه حسام يبصلها
هدايه / كل سنه و انت طيب
حسام يبتسم
حسام / ميرسي عرفتى منين
هدايه / هو سر يعني … مش بنقول فى مصر اللى يسال ما يتوهش … قولى بقي هتعمل ايه النهرده اكيد المدام محضرالك سهره حلوه اوى
حسام يبتسم
هدايه / على العموم انا سمحت لنفسي انى اعزمك على الغدى النهرده
حسام / دا كرم اخلاق منك بس مضطر اعتزر
هدايه / احنا زمايل فى الشغل دى حاجه ما تضايقش مراتك خالص
حسام / لا مش الفكره بس انا النهرده اصلا نص يوم فهخلص شويه حاجات وامشي
هدايه / اكيد طبعا عاوزين تاخدوا اليوم من اوله
حسام / لا و الله بس حبيبه كانت دافيه شويه و اديتها خافض و حجزتلها عند دكتور
هدايه / قلبي دى صغنتوته خالص بليز ابقي طمنى عليها
حسام / باذن الله
هدايه / مش هعطلك بقي يلا هابى بيرث داى تو يو
حسام / شكرا
هدايه تمشي حسام يشد البوكس يحطه تحت المكتب و يكمل شغل
………………
فى شقه ندى
ندى بتتكلم فيديو كول
ندى / يا بنتى مستفز جدا البنت تعبانه و هو سايبني هنا و راح الشغل
نور / يا بنتى مش قيستيلها الحراره دلوقت و كانت كويسه
ندى / ايوه عشان بديها الخافض اللى هو جايبه
نور / على فكره حسام صيدلى و فاهم بيديها ايه يعني اطمنى
ندى / ايوه بس مش دكتور و مش دكتور اطفال
نور / حبيبتي هو حجز و الدكتور ليه معاد اكيد هيجى قبل المعاد ده ما تقلقيش
ندى / انا خايفه عليها اوى
نور / اهدى يا نونو ان شاء الله خير انتى بس اللبسي و جهزيها
ندى / لابسين اهو و مجهزه شنطتها و ملبساها و مجهزه طقم احتياطى يمكن توسخ ده قبل ما ننزل و جهزت الغدى و كل حاجه
نور / جهزتى الغدا !!!
ندى / يوووووه بقي ايوه يا ستى سلقت فرخه و حمرت لسان عصفور ايه الصعب فى كدا يعني
نور / حبيبتي مفيش حاجه صعبه عليكي … هتاكلى معاها ايه بقي
ندى / لما نرجع هبقي اعمل شربه هى مش حبيبه عيانه
نور / ههههههههههههههه حبيبه اللى عيانه انتوا تاكلوا كدا ليه
ندى / يووووه بقي يبقي يعمل شويه مكرونه و لا رز و لا يغمس انا فى ايه و لا فى ايه
نور / اهدى يا قلبي بس
ندى تعيط
نور / نونو حبيبتي البنت كويسه و حسام هيجي فى اى وقت اهدى
ندى / ياريتني فضلت فى مصر كنت جريت بيها انا على اى مستشفي انا ما اعرفش حد هنا و خايفه انزل اتوه
نور / طب كلميه تانى تحبى اكلمهولك انا
ندى / انا ما عنديش غيرها و حسام زى ما انتى عارفه
نور / ربنا يباركلكوا فيها بس حسام مش مهمل فيكوا انتى اللى ما بتثقيش فيه
ندى / مش وقته الكلام ده
باب الشقه يتفتح و حسام يدخل
صوت حسام / نونو انا جيت
نور / الحمد لله شوفتى بقي
حسام يدخل الاوضه
حسام / جاهزين يا قلبي … مالك يا ندى
حسام يجرى على حبيبه يبص عليها
حسام / الحمد لله كويسه امال بتعيطي ليه
ندى / دى مواعيد دى انت عاوز تجننى
حسام / قلبي اهدى .. لسه فاضل ساعتين اصلا على معاد الدكتور
ندى / و مفيش مستشفي مفيش طوارئ لبنان كلها ما فيهاش الا الدكتور ده
حسام / تمام انا مقدر قلقك انا كمان قلقان بس حبيبه كويسه فممكن تهدى
ندى / لا مش ههدى
نور / ندى اهدى جه خلاص يلا انزلوا احسن ما تضيعي وقت فى خناق
ندى تبص فى الموبايل
ندى / سلام دلوقت يا نور سلام
نور / ابقي طمنيني
ندى / اوك سلام
ندى تقفل حسام يشيل حبيبه
حسام / يلا
ندى / اتفضل
حسام و ندى يمشوا و يقفلوا الباب
………………
فى شقه نور
ليلى / الضنا غالي برده و دى اول بيبي و لوحدها طبيعي تكون كدا
نور / هى كمان يا ماما ليها ظروفها … اصلها شالت الرحم و هى بتولدها
ليلى / مفيش عيل بيعوض عيل بس طبعا حقها تكون كدا و اكتر طبعا
نور / بس حسام صيدلى و فاهم يعني
ليلى / ربنا يشفيهالهم و يباركلهم فيها … شكلها غاليه عليكوا اوى انتوا عاملينلها سرير و الحيطه
نور / ايوه فعلا
ليلى / و دى بقي كانت فكرتك و لا فكره على
نور / بصراحه فكره على اصل كان ليه فلوس عند واحد فخلاه يعمله السرير ده تخليص حق
ليلى / سرير بيبي تخليص حق !!! ازاى و هو عارف انك لا مؤاخذه يعني مش بتخلفى ما كان عمله مكتب و لا كنبه و لا حتى كام كرسي و ترابيزه للمحل مش كان اولى
نور / ما اعرفش و وقتها ما كناش عارفين ان حسام هيسافر لبنان اصلا فعادى
ليلى / و هو فى حد بيربى عيال حد اساليني انا
نور / اجبلك حاجه تشربيها
ليلى / تسلمى ما تتعبيش نفسك لما اعوز هقوم اجيب انا
نور تبص لليلى و تسكت
………………….
فى اسكندريه
أية قاعده بتتفرج على التليفزيون و هى بتعمل سلطه تليفونها يرن تقوم تمسح ايدها فى فوطه جنبها و ترد
أية / حبيبي ازيك
عمر / وحشانى
أية / طب ما تيجي انا خلاص بفنش فى الغدى اهو
عمر / على عيني بس النهرده الحمد لله مرزقين فهتاخر شويه
أية / ربنا يديم عليك الرزق يا رب طب خلاص هخلص و اجبهولك و اجى اقف جنبك و اساعدك
عمر / تمام يا حب … هسيبك بقي عشان فى زبون
أية / وشي حلو عليك سلام
عمر / سلام
أية تقفل تليفونها يرن تانى
أية / السلام عليكم
على / و عليكم السلام اخباركوا ايه كلمت جوزك مرتين ما ردش
أية / مشغول شويه النهرده ادعيله
على / علاطول والله … المهم انكوا بخير
أية / الحمد لله تمام مش هتيجوا زى ما قولت
على / هنيجي على اخر الاسبوع
أية / تنوروا الاوضه اللى جوه
على / لا مش هينفع ماما هتيجي معايا هخلى عمر يشوف
أية / لا لا لا مش مستاهله الكنبه هنا بتتفتح سرير و مريحه اوى صدقنى هتنبسط فى النوم عليها و لو مش عاجباك ابقي انام انا عليها دا انا بتلكك اصلا
على / مزاجك رايق … هواكى جه على المالح و لا ايه
أية / جدا صدقنى كنت محتاجه ابعد اوى بدات ارجع لنفسي تانى
على / الحمد لله احنا هنعوذ ايه من الدنيا اكتر من كدا
أية / انا هقوم اروح لعمر اوديله الغدى هخليه يكلمك
على / تمام … سلام
أية تقفل و تلم الحاجه و تدخل المطبخ
………………..
فى العياده
ندى و حسام خارجين
حسام / ما انا لو خريج مسمط حلويات ابو فخده يبقي ليكي حق انما نقول ايه
ندى / خلاص بقي
حسام / المهم اطمنتى وان شاء الله مع العلاج هتبقي احسن
ندى / يارب يا حسام يارب انا بجد كنت هموت عليها ما نمتش من امبارح
حسام / خلاص بقي اهدى هنروح ترتاحى وانا يا ستى مفضيلك نفسي على الاخر و هقعدلك بيها لحد ما ترتاحى ايه رايك بقي
ندى / و لا هشوف راحه الا اما تخف خالص
حسام / طب تعالى اركبى خلينا نروح و انتى اول ما هتلمسي السرير هتنامى على نفسك اركبى اركبى
حسام يفتح باب العربيه ندى تركب و هو يلف يركب تليفونه يرن
حسام / السلام عليكم
هدايه/ ما طمنتنيش انا هموت من القلق
حسام / كويسه الحمد لله
هدايه / الحمد لله الدكتور طمنكوا يعني اداها علاج ايه
حسام يستغرب و يبتسم و ندى باصه من الشباك
حسام / اداها مضاد حيوى و خافض و جبته من الصيدليه و مروح اهو
هدايه / جبته من صيدليه و انت شغال فى اكبر شركه ادويه يا حبيبي هنا هتاخد بخصم جامد جدا دا احنا بنطلع ادويه مجاملات لمعارفنا مش هنطلع لحسام باشا
حسام / ما فرقتش مره تانيه
هدايه / تمام هسيبك ترتاح لو غيرت رايك و حبيت تحتفل بعيد ميلادك انا سهرانه بالليل فى اللوكيشان اللى بعتهولك على الواتس سلام
حسام يقفل و هو مستغرب و يبص لندى باصه لحبيبه و كل شويه تجس حرارتها
حسام / ندى
ندى تبصله
حسام / ايه رايك نعدى نجيب تورتايه صغيره النهرده عيد ميلادى و كدا
ندى / وقته فعلا … صبرنى يا رب
حسام يبتسم و يسوق
ندى / و لا نعملك عيد ميلاد زى بتاع زميلتك فى الشركه و كمان اتحزم و ارقص على كتف كل راجل شويه .. فى قميص نوم حلو اوى كنت جايبه انت الاسود ده هلبسه و هشرفك
حسام / الا هو انتى ما بتلبسيهوش ليه صحيح
ندى / انت بتتكلم جد يا حسام انا هموت على البنت و انت بتفكر فى عيد ميلادك و قميص النوم الاسود
حسام / خلاص يا ندى انا اسف
ندى / انا اللى اسفه انا ما نمتش من امبارح و اعصابى تعبانه اوى و مش قادره كل سنه و انت طيب
حسام / كل سنه وانتى معايا
ندى تبصله و تبتسم بمعاناه و الدموع ماليه عنيها تهز راسها و تبص الناحيه التانيه و حسام مكمل سواقه
حسام / عارفه مين كانت بتكلمنى
ندى / نور ؟ سمعاك بتكلمها عن حبيبه و الدكتور
حسام / لا دى هدايه اللى معايا فى الشركه
ندى تبصله باستغراب
حسام / جيبالى هديه عيد ميلاد و لما عرفت ان بيبو تعبانه بتتصل تطمن
ندى / فيها الخير والله صاحبه واجب ابوس ايدك روحنى
حسام / انا سايق اهو هطير يعني
ندى / ركز بس فى الطريق و اسكت انا بجد مصدعه و تعبانه جدا
حسام / سلامتك
ندى تهز راسها و تسند راسها لورا و تغمض
……………………..
فى شقه مصطفى
نور بترص هدوم فى الدولاب و مصطفى نايم على السرير
نور / انا كدا خلصت الحمد لله ها اجبلك حاجه تاكلها و لا اطلعك بره تتفرج على التليفزيون
مصطفى يكتب ندى فى ورقه تحت ايده
نور / كويسه الحمد لله معلش هى بس حبيبه كانت دافيه شويه امبارح فمنيمتهاش طول الليل فزمانها نايمه دلوقت
مصطفى يزوم نور تقعد جنبه و تمسك ايده
نور / حبيبه كويسه و زى الفل كشفوا عليها اطمن
مصطفى يغمض عينه
نور / قولى بس مالك
مصطفى يبصلها بحزن
نور / تحب تخرج تلف شويه بالعربيه و لا نروح جنينه و لا اى حته
مصطفى يهز راسه لا نور تتنهد
نور / طب تحب اقعد اقرالك الجرنان
مصطفى يكتب على الورقه على
نور / فى الشغل لما يجي هخليه يعدى على حضرتك … هو حضرتك عاوز على فى ايه
مصطفى يهز راسه لا
نور / طب اناديلك بابا … هو جه من الشغل خلاص زمانه بيريح شويه بعد الغدى لو عاوز
مصطفى يهز راسه لا
نور / طب اعملك ايه طيب
مصطفى يبتسم ويطبطب بالراحه على ايدها
نور / طب انا هنزل ابص على الصيدليه شويه لو عزت حاجه رنلى تمام ؟
مصطفى يبتسم و يهز راسه اه نور تبتسم و تمشي
………………….
فى شقه ندى
ندى نايمه و واخده حبيبه فى حضنها حسام يدخل و هو بينشف ايده فى فوطه يحطها على كرسي و ينام و ياخدهم فى حضنه ندى تفتح و تبصله
حسام / نامى نامى انا كمان هنام شويه
ندى / لو وراك شغل
حسام / لا موراييش و حتى المطبخ شطبته و عقمت الببرونات و مفيش فى الشقه اى حاجه تتعمل فخدى راحتك و ارتاحى
ندى تتقلب و تبقي بتبص لحسام يعدى ايده على شعرها و يبعده عن وشها و هو مبتسم
ندى / كل سنه و انت طيب
حسام يبتسم اكتر
حسام / من قلبك .. بتدعيلى من قلبك
ندى / ربنا وحده عالم باللى بيا و قد ايه بحاول معاك
حسام / عارف و مقدر و بحاول على قد ما اقدر ما اضغطش عليكي
ندى / و انا مقدره ده
حسام / تفتكرى فى امل يعني .. احم .. تحنى عليا و تديني اى هديه فى عيد ميلادى
ندى / ما كفايا عليك هديه صحبتك
حسام يبتسم و يبص الناحيه التانيه و يرجع يبصلها
حسام / انا حتى ما اعرفش جابت ايه و مش فارق معايا اعرف
ندى / على فكره انت لو عاوز تتجوز
حسام / انا متجوز
ندى / مش شرط هى يعني انا بقول تتجوز واحده تانيه و انا كدا كدا معاك
حسام / ااااه انتى قصدك تخلصي منى نص الاسبوع يعني … لا فكره عبقريه … بس للاسف انا مش ناوى اظلم بنات تانى فى حياتى لانى و انا فى حضنها مش هبقي بفكر غير فيكي هبقي معاها بس كل اللى هعوزه انى ارجعلك باقصى سرعه
ندى / فيا ايه عشان تتمسك بيا اوى كدا
حسام / و انا فيا ايه عشان تبعديني عنك بالشكل ده … تمام تمام انا عارف انى غلطت معاكى كتير بس معقول كل اللى بعمله ده ما شفعليش عندك خالص … لو ما كانش على
ندى / على يحرم عليا العمر كله لو ده هيريحك … على اتجوز اختى و انا مستحيل اخرب عليها او ائذيها او اجرحها … ربنا يهنيهم سوا انا مش عاوزه غير حبيبه هعيشلها من سكات هربيها … هنا جنبك مش هنزل مصر و مش هبعد عن عنيك و لا هكون لغيرك بس انا مش قادره اكون معاك
حسام يبتسم بحزن و يقوم يقعد
ندى / حاولت والله حاولت و على يدك بدل المره عشره مش قادره
حسام / و انا ما ضغطش عليكي
ندى / امال حضنك ليا بتسميه ايه
حسام يبصلها باستغراب
حسام / حتى الحضن !!!
ندى / حتى نفسك اللى بتتنفسه لما بيلمسنى بيخنقنى
حسام تخرج منه ضحكه صغيره مليانه وجع
ندى / ان كلامى واجعك فصدقنى هو واجعنى اكتر
حسام / نامى يا ندى … انا خارج
حسام يقوم يطلع هدوم من الدولاب و يطلع بره ندى تبص على الباب بحزن دقيقه و تسمع صوت الباب تنام على ضهرها
ندى / لا حقيقي جدعه .. استحملى بقي اللى هيعمله
ندى تتنهد و تبص على حبيبه و تقوم تطلع بره
…………………..
فى اسكندريه بعد يومين
ليلى و نور يدخلوا شقه عمر و على وراها شايل شنطتين عمر يستقبلهم
عمر / اهلا اهلا اسكندريه نورت
على / نورت باهلها
نور / امال يويو فين
عمر / فى المطبخ بتفنش الغدى ثوانى و تطلع ارتاحوا ارتاحوا
نور / هستاذنك هدخل اساعدها
عمر / تستاذنى ايه البيت بيتك برطعى
نور تضحك و تدخل جوه و عمر و ليلى وعلى يقعدوا
على / اخبار الدنيا عنا ايه
عمر / احسن بكتير مما توقعت بصراحه يعنى حتى المحل ما شاء الله يعني شغال كويس
على / الحمد لله و انا مخلى واحد من عندنا يتابع مع السيد عندك و كلو الحمد لله تمام
عمر / صحيح اتعرفت على واحد هيجبلى سيستم و هربط المحلين ببعض بويب سايت و يعملى صفحه فايس و يديرها و هيبقي عندى شحن لكل المحافظات
على / دى فكره كويسه جدا ربنا يفتحها عليك
عمر / لو جابت النتيجه اللى قالى عليها تبقي رضا اوى
على / ان شاء الله تبقي فتحه خير عليك
ليلى / ما تخليهم يعملولك واحده للمحلات يا على
على / عندى يا ست الكل دا من ايام الحج الله يرحمه كان جايب واحد و لسه شغالين معاه دا بياخد منى الف جنيه كل شهر عشان ينزل كام بوست كل شهر و يرد على الرسايل
ليلى / ربنا يفتحها عليك يا ابنى
على / هم دخلوا ناموا جوه و لا ايه
نور تطلع شايله سرفيس محاشي
نور / جينا جينا عرفه انك جعان
على / واقع و بصراحه اكل أية واحشنى اوى
أية تطلع شايله سرفيس فراخ
أية / طب والله من امبارح بعملك كل الاكل اللى انت بتحبه حتى اسال عمر
على / مرزق انا مرزق
على يقوم و يقعد على السفره اول واحد
عمر / ما تفرحش اوى كدا مفيش حاجه ببلاش
على / لا يا راجل طب ناكل الاول و ننكد على بعض بعدين
أية / اخص عليك يا على
على / طب ايه هتقعدوا و لا فى اكل تانى هيجي و لا ايه اقسم بالله واقع
نور / هدخل اجيب الباقي لياكلنا
نور تدخل و عمر يعدل لليلى الكرسي تقعد جنب على و أية تقعد جنبها نور تطلع بسرفيس فيه محاشي نوع تانى و تقعد قدام على و عمر يقعد جنب على على راس الترابيزه
عمر / بسم الله يا جماعه البيت بيتكوا مش محتاجين عزومه
على يمد ايده و نور تساعده هى و عمر يحطلها و أية تحط لليلى
ليلى / كلى انتى يا حبيبتي انا طايله كل حاجه … شكلك تعبتى فى الاكل ده اوى
نور / امال لو شفتى الحلو دا أية مدلعانا على الاخر
على / استر يا رب انا كدا بدات اقلق ايه يا بنت الناس ناويه على ايه
أية / ايه اتكلم و لا بعد ما تاكل احسن
على / لا دلوقت بطنى بدات تكركب اقسم بالله
عمر / هههههههههه لا مش للدرجادى اطمن هو بس أية قررت تقلع النقاب
نور / دى فكره كويسه جدا
على / ازاى يعني … أية احنا متفقين لو لبستيه مش هتقلعيه
عمر / انت عارف انها لبسته لظروف معينه
على / و الظروف دى ما اتغيرتش الا لو ماشيه بمبدا المكان اللى ما حدش يعرفك فيه شلح واجرى فيه
عمر / ايه يا عم حسن ملافظك
على / لا مؤاخذه بس هى ما لهاش عندى وصف تانى
نور / بس القرار ده قرارها هى و جوزها و هم موافقين
على / قشطه و مدام كدا هى لسه لابسه النقاب ليه ما تسمع كلام جوزها رايي لزمته ايه
أية / عشان انت اخويا الكبير
على يحط الربع فرخه من ايده و يبص لعمر
على / هو انا كدا اتثبت و كل حاجه … بس برده لا … بصي يا أية النقاب ده مش حاجه سهله و ربنا يرزقك الثبات احتسبيه عند ربنا عشان ربنا يفتحها عليكوا
نور / طب و انا
على / مالك
نور / انت مش بتطلبه منى ليه
على / عشان دا كان قرارها هى اختارته بنفسها و انا قولتلها لو لبستيه مش هتقلعيه
نور / بس هى مش لبساه عن اقتناع دى كانت ظروف و راحت لحالها الحمد لله
على / انا قولت رايي و مش بفرضه عليها تعمل اللى يريحها بس رايي مش هغيره
نور تبص لأية بتبص لعمر
عمر / انتى سمعتى كل الاراء و اعملى اللى يريحك
أية / ما انا لو عارفه اللى يريحنى ما كنتش اترددت كل ده
على / ما حدش بيوصل للقمه و يتنازل عنها بالسهوله دى ما تخليش حاجه تزحلقك انا اصلا مش مصدق ان عمر شجعك تقلعيه اصلا
أية / بالعكس .. عمر هو سبب حيرتى … عمر بيقول انه سعيد انى بتاعته لوحده و ما حدش بيشوفنى غيره بس هو معايا اى كان اللى هيريحنى
ليلى / ينفع اقول رايي
أية / اكيد اتفضلى
ليلى / انا ما اعرفش انتى لبستيه ليه بس اى كان السبب كانت خطوه كبيره و اخدتيها كتير ما يقدروش عليها حرام ترجعى صلى استخاره و اكيد ربنا هيدلك على الصح
أية / تمام … اكيد هعمل كدا ان شاء الله
على / حلو اوى ندخل على الحلو بقي و لا ايه
نور / حلو ايه احنا لسه ما اكلناش
عمر / صحيح احنا اتلهينا فى الكلام و هو مركز فى الاكل لما خلص نصه لوحده
الكل يضحك و يكملوا اكل
حسام يفتح الباب و يدخل شايل اكياس كتير ندى تطلع تجرى من جوه
ندى / على ما افتكرت
حسام يبصلها و يدخل الاكياس المطبخ تجرى وراه
ندى / كنت فين
حسام / كنت مكان ما كنت هو مش ده اللى انتى عوزاه توزعيني نص الاسبوع
ندى / طب ما بتردش على التليفون ليه
حسام / عشان ما ارجعش عشان لا قادر ارجع و لا عاوز ارجع
ندى / امال ايه اللى رجعك
حسام / بجيب طلبات للبيت
ندى / بمزاجك هو مش يمكن كنت محتاجه حاجه
حسام / كنتى محتاجه ايه البيت و مليان اكل و بامبرز و لبن و كل اللى محتاجاه عندك و بزياده واتحدى ان يكون ناقصك حاجه اصلا ومع كدا جبت
……………………
- يتبع الفصل التالي اضغط على ( رواية سلف و دين ) اسم الرواية