رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل التاسع و الاربعون 49
فى شقه ندى
ندى خارجه من الحمام لافه شعرها بفوطه تروح تقعد قدام التسريحه حسام يدخل الاوضه
حسام / مش هتكملى الفيلم
ندى / هو انت ما خلصتوش
حسام / لا مستنيكي
ندى / انا بجد اسفه اوى
حسام / هو فى حاجه ضايقتك انا قولت حاجه غلط مثلا
ندى / ابدا .. و فعلا اسفه انى قمت كدا فجاه بس انا مش حاسه انى مظبوطه خالص
حسام / مالك لو تعبانه اوديكي لدكتور او اجبلك دوا
ندى / مش عارفه بس هى مش حاجه خطيره يعني فمش مشكله
حسام يروح يقعد على السرير و يشد ندى بكرسي التسريحه
حسام / انا ما عنديش اهم منك اى حاجه مهما كانت بسيطه بالنسبالك ما دام تخصك تبقي مهمه اوى بالنسبالى
حسام يفك الفوطه و ينزل لندى شعرها على خدودها و يحط ايده بحنيه على رقبتها تقوم و تفتح الدولاب
ندى / ما تيجي نخرج
حسام يقوم يحضنها و يزنقها فى الدولاب
حسام / يا نونو يعني اليوم اليتيم اللى خدته اجازه مستخسره فيا انى اريح فى البيت حبه ايه يا نونو طب دا انا والله تعبت اوى الصبح فى توضيب كل الحاجات دى و بكره عندى شغل عشان خاطرى عشان خاطرى
حسام يحاول يبوسها من رقبتها تصرخ فيه و تزقه
ندى / ما تعملش كدا ما تعملش كدا
حسام / مالك يا ندى فى ايه هى اول مره و لا ايه و بعدين انا جوزك يعني لا عيب و لا حرام
ندى / انا …انا اسفه انا بجد … لو سمحت سيبني لوحدى شويه
حسام / ازاى يعني … من غير حتى ما افهم مالك
ندى / ماليش ماليش ابعد عنى بقي
ندى تروح تقعد فى جنب و تعيط حسام يبصلها و يروح يحضنها من ضهرها و انفاسه فى رقبتها و يفضل يحرك ايديه بحنيه على دراعاتها فوق و تحت
حسام / مالك يا نونو ايه مضايقك او كدا … انا زعلتك فى حاجه … لو عاوزه تخرجى تعالى نخرج انتى عارفه انى مش بقدر ارفضلك طلب … و ان كان على الفلوس ما يهمكيش الحمد لله معايا فمش عاوزك تشيلى هم حاجه … انا بس عاوزك مبسوطه و مرتاحه
ندى بصوت واطى و عنيها مغمضه
ندى / ابعد عنى
حسام ياخدها فى حضنه و يقومها
حسام / انتى شكلك ما نمتيش كويس اكيد حبيبه صحتك بالليل تعالى ارتاحى هنا
حسام يخلى ندى تفرد ضهرها على السرير و ياخدها فى حضنه و يفضل يحرك ايديه على رقبتها و ضهرها
حسام / انا ما بقدرش اشوفك كدا قلبي بيوجعنى هو انا بعمل كل ده ليه و لا انا اصلا عايش ليه مش عشان اريحك انا بحبك يا ندى بحبك اوى
حسام يبص لندى يلاقيها مغمضه يبوسها
…………………
فى كافيه
نور قاعده و على قدامها
على / بقالنا فوق النص ساعه قاعدين و ما اتكلمتيش برده طب انا ما رضيتش نتكلم فى البيت عشان تبقي على راحتك روحتى فين من ورايا و ليه ما اعرفش و ازاى تسمحى انى اعرف من بره نور انا بحاول على قد ما اقدر اتعمل بعقل مع الموقف و دا لانى واثق فيكي بس لو ما اتكلمتيش شيطانى مش هيسكت كتير
نور / انا ما كنتش بعمل حاجه غلط
على / انا متاكد من ده بس انتى مسؤله منى انا مش هسمح لحد يقولك كلمه و عشان ادافع عنك لما نروح لازم ابقي عارف كنتى فين
نور / طب ممكن … على انا مش بعمل حاجه غلط بس مش عاوزه اتكلم
على يعدل نفسه فى الكرسي و نور مانعه نفسها انها تعيط
على / يعني انا افهمك انى فى مكان و تكتشفي انى مش فيه و ما ارضاش اقولك انا كنت فين و تسمعى بقي كلام من نوع شوفى جوزك مخبى عنك ايه شوفى جوزك بيروح فين و اقولك انا مش بعمل حاجه غلط ثقى فيا و انتى هتتعاملى عادى لانى مش عاوز اتكلم صح
نور / هقولك بس … اسبوع واحد بس
على / اسبوع !!
على يبص الناحيه التانيه و يرجع يبصلها
على / انا كدا عملت اللى عليا قومى اروحك
نور / انت زعلان منى صح
على / ازعل من ايه يا ماما انتى عملتى حاجه
نور / والله العظيم ما عملت حاجه انا بس
على / ما عدتش عاوز اعرف ما عادش فارق معايا اعرف و لما تبقي تيجي بقي تحكيلى بعد اسبوع برده مش هيبقي فارق معايا اعرف بس تعملى حسابك ان كنت عديتها المرادى عشان بثق فيكي مش هيكون ليكي عندى فرصه تانيه اتفقنا
نور / طب انا هقولك
على / قولتلك مش عاوز اعرف
نور تطلع ورقتين من شنطتها و تزقهم على الترابيزه قدام على و هو مش باصص
نور / ما كنتش عاوزه اعلق نفسي و اعلقك بامل كداب
على يبصلها تشيل ايدها من تذكره كشف العياده و وصل معمل التحاليل
نور / كنت بكشف نسا
على ينتبه نور تعيط
نور / انا مش قادره اكون سبب فى حرمانك من الخلفه
على / هو حد قالك حاجه امى قالتلك
نور / لا ما حصلش انا بس
على / امال ايه اللى جد و ايه اللى هيفرق بعد اسبوع
نور / ما اعرفش بس الدكتوره هتكلمنى و اعرف ان كان فى جديد فى حالتى و لا لا انا هتعلق بكل قشايه امل بس انا مش … انا كنت خايفه انت كمان تتعلق كنت خايفه
على / ليه اصلا من البدايه ما انا واخدك كدا و راضي و عمرى ما اتكلمت و عمرى ما كنت هتكلم
نور / و اوضه حبيبه اللى عملتها عندنا و محل ملابس الاطفال اللى عمرى ما هشترى منه الا لو بجامل واحده صاحبتى او قريبتي مثلا
على / امال افتحه حريمي عشان كل يومين تجيبيلك طقم و تخربى بيتى
نور تبصله
على / كنت بحاول اهزر
على ينقل فى الكرسي اللى لازق فى نور
على / لو عاوزه تمشي فى السكه دى انا مش همنعك همشي معاكى للاخر بس ما تمشيش فيها عشانى و لا عشان اى حد قالك اى حاجه انا راضي بيكي فى اى وضع … نور انا مش هكدب عليكي انا لما اتقدمتلك ما كنتش بحبك … على الاقل مش زى دلوقت … كنت محتاجك اه بس بحبك … مش … بصي يا نور انا كل يوم بعيشه معاكى … انا بخاف اخسرك مجرد فكره انك ما تكونيش موجوده ما تعمليش اللى بتعمليه معايا دلوقت ما تحبينيش كدا فكره انك تبعدى بقي بالنسبالى كابوس … حبيتك و كل يوم بعيشه معاكى بحبك اكتر تمام … بتخلفى بقي ما تخليفيش انا مش هقدر اخسرك
نور / بس الشرع
على / الشرع حلل بس انا مش هقدر اظلم واحده تانيه معايا
نور / ما يمكن تحبها بعد الجواز و العشره زى ما حبيتني
على / عمرى ما هنسي البصه اللى كانت فى عين ماما حنان الله يرحمها لما بابا جابلها ضره انا عمرى ما هقبل انى اكون السبب فى انك تعيشي لحظه واحده من اللى هى عاشتها انا وعدتك انى هتقى ربنا فيكي
نور / بس جوازك مش هيظلمنى دا حلال و حقك
على / ممكن ناجل الكلام فى الحكايه دى لما التحاليل تبان لان مهما قولت انتى مش هتصدقي انا راضي بيكي من غير خلفه انا اساسا من قبل ما ارتبط بيكي كنت شايل حكايه الخلفه من دماغى و الله و كنت راضي
نور / يعني عاوز تقنعنى انك عمرك ما اتمنيت انك تكون اب
على / زمان عشان ما اكدبش زمان لما ما كانش حيلتى غير الهدمه اللى عليا … كان نفسي اوى
نور تبص فى الارض و تعيط على يرفع عينها ليه و يمسح دموعها
على / عشان اثبت لبابا انى احسن منه و انى هكون اب احسن منه بس هو مات و ما عادتش تفرق انا مش ناوى اكون زيه مش ناوى اقهر بنت الناس اللى اهلها استامنونى عليها مش ناوى اجازف بالانسانه الوحيده اللى حسستنى انى عايش انا بحبك يا نور
نور تهز راسها
على / هتقوليلى بقي ايه اللى جد خلاكى تفكرى فى الموضوع ده تانى
نور / مفيش هو انا يعني ما نفسيش اكون ام طب دا انا من و انا نونو كدا ما حلمتش بحاجه تانيه غير انى اكون ام … بس ربنا بقي … بس انا راضيه والله … هو بس … اسعى بس والله اسعى
على / اجبلك شيكولاته
نور تبصله يمسح دموعها
على / اجبلك شيكولاته تغير مودك ده و تروق دمك و ما نفتحش الموضوع ده تانى لحد ما التحاليل تبان و همشي معاكى السكه لاخرها و اى كانت النتيجه اوعدك انها مش هتاثر على اللى بينا تمام … وعد
نور تهز راسها بابتسامه على يبتسم و يشاور للمتر
……………………….
فى شقه ندى
حسام نايم على ضهره باصص للسقف و مبتسم و سعيد و ندى فى الارض على ركبها بترجع فى باسكت الزباله و تعيط حبيبه تعيط ندى تبصلها تلاقي حسام بيشيل الغطا من عليه و يقوم يشيلها و يهزها
حسام / انتى صحيتي حبيبه بابا قلب بابا حب بابا
حسام يبص لندى بتبصله باستغراب
حسام/ تحبى على ما تستحمى اعملك مع رضعه بيبو يانسون عشان معدتك
ندى / انت ازاى بارد كدا
حسام / مش فاهم
ندى تقعد و تسند ضهرها على الحيطه و تعيط
حسام / هعمل لبيبو رضعه و بعدين ارجع اشوف مالك عشان هى مش هتصبر
حسام يحط حبيبه فى السرير و يطلع بره الاوضه
ندى / طب ازاى يعني… ازاى
ندى تقوم و تبص على حبيبه و تدخل الحمام حسام يطلع من المطبخ يبص عليها و يروح يشيل الكيس من باسكت الزباله و هو مقروف
حسام / كل حاجه فى اولها صعبه اما نشوف اخرتها معاكى
…………………….
فى شقه على
على / يعنى زى ما قولت انا اتكلمت مع نور و الموضوع انتهى
ليلى / طب مش اطمن انا كمان و لا انا عادى اقعد قلقانه عليها و لما تيجي عادى كدا عادى
على / اهى كويسه اهى راحت مشوار و رجعت الحمد لله
ليلى / عادى يعني
على / موضوع و خلص يا ماما خلاص ما تكبريهوش بقي و على العموم عشان ترتاحى مش هيتكرر
ليلى / و لا يتكرر مش انت راضي انا مالى احرق دمى ليه و لا اقلق ليه ما تروح و لا ما تروحش اقولك انا داخله انام
ليلى تدخل اوضتها تعدى على اوضه نور مقفوله تقف و تبص لعلى
ليلى / اقولك انا هشوفلى شقه صغيره اوضه و صاله و لا اياكش ارجع الدار و اريحك انت و المدام منى يمكن ترضي
على / يا سلام و دا من ايه بقي ان شاء الله
ليلى / شوف انتى بقي
ليلى تدخل اوضتها و ترزع الباب على يروح يفتح الباب
على / هو فى ايه يا ماما
ليلى / ما فيش يا على انا مش مرتاحه هنا
على / و ايه اللى تاعبك بقي
ليلى / ما بحبش الحال المايل كل يوم حوار و فيلم هو فى ايه
على / حوار ايه و فيلم ايه راحت مشوار و رجعت و عرفت كانت فين و اتكلمنا و اتفقنا انها ما تتكررش و الموضوع خلص حضرتك ليه مصره تعملى منه مشكله
ليلى / انا !! لا يا حبيبي مش انا الست ما ينفعش تروح فى حته من ورا جوزها
على / تمام و مش هتتكرر و كان غصب عنها و بعدين انا بثق فى نور هى بنت محترمه و متربيه و عمرها ما هتعمل حاجه غلط و ياريت حضرتك تكونى واثقه من ده
ليلى / انا بتكلم فى الاصول
على / ماما ممكن اسالك سؤال
ليلى / اتفضل اسال
على / هو حضرتك اتكلمتى مع نور فى حكايه الخلفه
ليلى / دى شحناك ضدى بقي
على / و لا اتكلمت و لا فتحت سيره انا اللى بسال
ليلى / و انا المفروض اصدق
على / و انا هكدب ليه
ليلى / عشان عيون الست هانم اللى جاى تتكلم مع امك بالشكل ده عشانها
على / ايه !!!
ليلى / ما هو طبيعي مش عايش فى بيتها يبقي لازم تكون دى النتيجه
على / هو فى ايه حضرتك بتدخلى الدنيا فى بعض ليه كدا انا بس سالتك حصل و لا لا
ليلى / هى مش الست نور قالت حصل يبقي حصل
على / ما قالتش اقسم بالله ما قالت
ليلى / امال يعني انت بتغطى على حوار خروجها من وراك بحوار انها ما بتخلقش و لا ايه
على / ما فيش داعى للكلام ده على فكره
ليلى / هو ما فيش داعى للكلام خالص و لو سمحت اطلع بره
على واقف باصص لامه
ليلى / هتطلع بره و لا الم الهدمتين بتوعى و اغور فى ستين داهيه
جرس الباب يضرب على يبص على الباب و يبص لامه
على / هطلع لما حضرتك تهدى نبقي نتكلم بهدوء
على يروح يفتح الباب يلاقي امانى
امانى / ايه يا على في ايه صوتكوا جايب لاخر الشارع هو فى ايه
على يغمض عينه و يحاول يهدى امانى تدخل
امانى / امال نور فين داهيه لتكون امك كل ده بتزعق لبنتي
نور تطلع من الاوضه و ليلى تطلع
ليلى / هو انتى ربيتي بنتك انها تخرج من ورا جوزها
امانى / انا ربيت بنتى احسن تربيه و مش انتى اللى هتحاسبيها
نور / ماما لو سمحتى
امانى / اسمع يا على .. انت لما جيت تطلب بنتى ما كانلكش ام و ما اتفقناش ان امك هتظهر من العدم و تعيش مع بنتى
نور / ماما بس
ليلى / الشقه مبنيه بفلوس ابنى و لا نسيتي
امانى / ما اعترضناش و ما اتكلمناش لما جيتي تعيشي معاها بالعكس البنت شالتك من على الارض شيل بس شكلك كدا فهمتى غلط انا بنتى مش لوحدها و لا هفيه و لا هسكتلك لما تقلى منها و لا صوتك يعلا عليها طول ما انا عايشه و لا بعد ما اموت
نور / والله ما قالتلى حاجه و لا وجهتلى ربع كلمه
ليلى / هتفضل واقف ساكت كدا عادى يعني امك يتقالها الكلام ده و انت ساكت
على / معاها حق
ليلى / نعم !!!
امانى تبص لليلى بنظره شماته
على / الوضع اللى احنا فيه ده غلط انا هاخد لحضرتك شقه تانيه
ليلى / بجد والله !!!
امانى / ما تقلقيش هنبقي رايحيين جايين عليكي
على / حضرتك تنورى فى اى وقت كان من الغلط انى اخلى امى تعيش فى شقه باسم نور عشان كدا هاخد لامى شقه باسمها حبت تعيش فيها براحتها حبت تعيش معانا هنا براحتها برده حبت تبقي بين هنا و هناك براحتها
امانى تبص لعلى
على / و على فكره ما حدش يقدر يوجه كلمه لنور مش عشان حضرتك امها .. عشان انا جوزها … عن اذنكوا هعملكوا ليمون عشان تروقوا دمكوا كلكوا
على يدخل المطبخ و نور واقفه بين الاتنين تبص لدى و تبص لدى و الاتنين بيبصوا لبعض بغل
…………………….
فى شقه عمر
عمر / يعنى الراجل كتر خيره بيعزمنا على فرح اقوم اروح اتخانق معاه
أية / يعني عادى يخبط على الباب و انت مش موجود
عمر / و هو يعرف منين انى مش موجود هو معاه دفتر الحضور و الانصراف بتاعى دا انا حتى ما اعرفش اسمه
أية / مش مرتاحاله و خلاص و لو سمحت يا عمر تتكلم معاه بقي و ما تخليهوش يخبط عليا تانى
عمر / طب اكلمه اقوله ايه
أية / قوله ما يخبطش عليا تانى انت ما بتغيرش عليا و لا ايه
عمر / و دا ايه علاقته باى حاجه
أية / يوووووه انا داخله انام
أية تدخل الاوضه و عمر بيضرب كف على كف
……………………
فى شقه على
على قاعد على طرف السرير بيفكر نور تروح تقعد وراه و تعمله مساج فى رقبته يبصلها
نور / شكلك مشدود
نور تكمل مساج
على / كان ممكن كل ده ما يحصلش لو كنتى قولتيلى هتروحى فين
نور / حقك عليا والله ما هكررها
على / بس كدا احسن للكل مش هينفع مامتك و مامتى يحتكوا ببعض كتير اوى كدا
صمت
على / تعرفى انها ما سلمتش عليها فى الافتتاح
نور / مين
على / مامتك ما سلمتش على ماما … غالبا لسه الافكار العبيطه دى فى دماغها … و دا سبب اهم ان امى تبعد عن هنا … هشوفلها شقه جنب المحل
نور / تمام
على / و هبقي اروح اشوف طلباتها و اقعد معاها زى ما بعمل مع الحجه
نور / و انا
على / و انتى ايه دا بيتك
نور / اقصد اروحلها انا كمان
على / هى ماما قالتلك ايه على حوار الخلفه
نور / قولتلك ما قالتش حاجه
على / انا مش فاهم ليه عمر يطاوع أية و يروح اسكندريه يعني لما احتاج اقعد معاه دلوقت اعمل ايه
نور / انت اللى شجعته
على يتنهد و يقوم يروح ينام فى السرير نور تروح تنام جنبه ياخدها فى حضنه و يبوس راسها و يناموا
………………..
فى شقه ندى
ندى نايمه فى وضع الجنين و بتتنفض حسام ينام جنبها و يحضنها تتخض
حسام / ايه ايه دا انا
ندى / والله ما قادره يا حسام بالله عليك
حسام / اهدى اهدى خلاص مره فى اليوم كفايا اوى
ندى / حسام
حسام/ يا ستى فى الاسبوع كل ما يجيلك الشوق انا راضي اهدى بقي انتى مافوره كدا ليه … اقولك نامى انا هنام فى الصاله
ندى تهز راسها حسام يقوم و يمشي
………………..
بعد فتره
ليلى بتتفرج على شقه مفروشه و على قاعد فى جنب تروح تقعد جنبه
على / فى اى حاجه ناقصه
ليلى / بالعكس فيها كل حاجه بس هعيش فيها لوحدى
على/ انا مش هينفع اعيش فى حته و مراتى فى حته و بعديه حضرتك هتبقي معظم الوقت فى المحل و هتروحى محتاجه ترتاحى و انا باذن الله هجيلك كل يوم اشوف طلباتك و اقعد معاكى شويه و خلاص … و مكانك فى شقتنا محفوظ لو حبيتي تيجي فى اى وقت تنورى بيتك
ليلى / ما اقدرش اتكلم بصراحه عداك العيب و ازح مش عارفه اقولك ايه
على / طب فين المشكله طيب
ليلى / ربنا ما يجيب مشاكل
على / بجد يا ماما قولى انا مش هعرف لوحدى
ليلى / اخاف الدنيا تلهيك عنى و اصحى الاقى نفسي فى الدنيا بطولى
على / لو فى يوم حصل دا لو فى يوم حصل اللفتى بس انتباهى لانه اكيد هيكون غصب عنى
ليلى تهز راسها على يبوس راسها و يقوم
ليلى / على فين
على / والله يا ماما عندى مشوار مهم اوى و يا دوب اللحقه دعواتك
ليلى / و انا حلتى غيرك ادعيله
على يبتسم و يمشي و ليلى بتلف بعينها فى الشقه
……………………..
فى شقه ندى
جرس الباب يضرب تروح تفتح تلاقى زياد واقف بعيد ندى تستغرب
زياد / انا اسف جدا لجرئتي بس انتى من اخر مره خدتى منى الكتب لا طلعتى البلكونه و لا خرجتى انا قلقت
ندى / مش فاهمه … هو حسام مش وصلك الكتب
زياد / انا عارف انى بتطفل و انى مش من حق اسال اصلا … بصى الحمد لله اطمنت عليكي … عن اذنك
زياد ينزل السلم جرى و ندى مصدومه تدخل تقعد جنب حبيبه و تفكر ثوانى و تتصل ماسنجر بنور تتاخر فى الرد ندى تقفل موبايل ندى يرن ترد
نور / سورى كنت فى المطبخ اخبارك يا قلبي
ندى / انا كويسه بقولك فاضيه ارغى معاكى و لا
نور / افضالك خير فى حاجه حصلت و لا ايه
ندى / بصراحه فى حاجه غريبه اوى حصلت و بصراحه ما افنكرش انها فكره كويسه انى احكى لحسام عليها
نور / خير قلقتيني
ندى / فاكره زياد بتاع الكافيه
نور / كنت فاكره الحوار ده اتقفل
ندى / انا سمعت بنصيحتك و بعتله الكتب مع حسام و من يومها ما طلعتش البلكونه تخيلى … لقيته بيخبط عليا
نور بعصبيه
نور / ازاى يعني طلعلك الشقه طلعلك فوق
صوت على / هو مين اللى طلعلها
ندى / هو على عندك سورى كنت فكراه فى الشغل سورى هبقي اكلمك بعدين سلام سلام
نور / استنى يا
ندى تقفل نور تتصل مره ندى تكنسل تتصل تانى تكنسل تتصل نالت ترد
نور / ما تكبرى بقي هو في ايه … احكيلى بسرعه هتجنن
ندى / مفيش بيقول قلق عليا
نور / قلب امه … شوفتى بقي حسام كان ليه نظره ازاى على فكره انتى لازم تقولى لحسام يشرشحه دا حيوان
ندى / خايفه يعمل مشكله
نور / انتى مجنونه ما لازم يعمل مشكله اذا كنت انا اتعصبت المهم عمل ايه تانى
ندى / ما عملش هو اول ما شافنى قالى الحمد لله اطمنت و نزل
على / هو ايه اللى نزل و انتى ما شرشحتيش امه ليه
ندى / انت بتكلمنى كدا ليه و ايه اللى دخلك فى كلامنا اصلا
على / يعني ايه ايه اللى دخلنى البتاع ده لازم يتلم و يعرف حدوده و ان ما كانش حسام هيعرفهاله قسما بالله اجيله
ندى / و انت مالك بيا طب عند فيك بقي هنزل اقعد فى الكافيه
على / طب اعمليها وانا قسما بالله
ندى / انا اللى استاهل ضرب الجزمه انى بحكى لنور حاجه اصلا
على / ما تبقيش تحكى انتى بتتصلى تحرقى دمنا و خلاص
ندى / مش هتصل تانى ربنا ياخدك
ندى تقفل التليفون يرن تقفل النت و تقعد متعصبه
…………….
فى شقه على
نور و على بيتخانقوا
نور / انت ازاى تخطف منى الموبيل ندى ما بتجيش بالطريقه دى
على / و انتى عاجبك عمايلها
نور / انت كدا كبرت الموضوع
على / لانه كبير و الباشا ما خبطش و جوزها موجود ليه المرادى نزل المره الجايه هيدخل
نور / ندى بنت محترمه و متربيه
على / على عيني و ايدي و اعرفها زى ما اعرف نفسي بس ابن الكلب ده لو ما لقاش دكر يقفله هيسوق فيها و ما حدش هيعرف يلمه
نور / و انت بقي اللى هتلمه هتسافر لبنان تتخانق معاه مثلا
على يبصلها و يدخل يجيب موبايله
نور / على … على بكلمك
على بيتكلم فى التليفون
على / ايوه يا حسام
نور / اسكت مش هتحكيلى تانى
على / بس
حسام / فى ايه يا على بتتخانقوا و لا ايه
على / الكلب زياد ده لازم يتلم
حسام / انت بتقول ايه
على / ندى كلمت نور
نور / اسكت يا على اسكت
على / قولت بس
حسام / هو فى ايه ما حد يفهمنى بدل ما ارتكب جنايه هنا فى ايه
على / طلع لندى قال ايه بيطمن عليها
حسام / و ندى عملت ايه
على / هتعمل ايه يعني … هو ما اقدرش على الحمار و لا ايه ما تتشطر على ابن الكلب ده
حسام / خلاص تمام اقفل
على / سلام
على يقفل نور واقفه مربعه ايديها
نور / برافو حقيقي برافو
على / عوزانى ارفع الاريال يعني دى واحده متجوزه دا انا ما اجرؤش اخبط عليها و حسام مش موجود
نور / مش هتحكيلى تانى … ليها مين غيرى ما فيش … اشرب بقي
نور تسيب على و تدخل الاوضه و ترزع الباب ثوانى و تسمع باب الشقه بيترزع
……………..
فى شقه امانى
امانى بتكلم تهانى فى التليفون
امانى / لا ما قالوش لحد حتى ابوها ما يعرفش بس انا قولت اقولك تدعيلها
تهانى / دعيالها طيبه و غلبانه و ما لهاش ذنب فى حاجه المهم طمنيني فى امل
امانى / هيروحوا بكره يعملوا الاشعه بتاعه الصبغه دى و على هيستلم تحاليله و ربنا يسهل دعواتك
تهانى / بس انا مش فاهمه هو مش كان واخدها و عارف انها لا مؤاخذه ما بتخلفش ايه اللى جد و فتح السيره تانى تلاقيها الوليه حماتها ادتها كلمتين صنف واطى انا عرفاه
امانى / اهى غارت فى ستين داهيه جابلها شقه ملك جنب المحل و فرشهالها على الشعره
تهانى / شوفتيها ؟
امانى / لا بس هروح بكره اباركلها و اتفرج
تهانى / ما تروحيش بايدك فاضيه هاتى حاجه تليق بمقامك
امانى / جبتلها تابلوه سيرما هاند ميد ايه الكرسي اياكش تولع لما تقراها
تهانى / ههههههههههههههههه
امانى / دا انا طهقت قولت هخلص من عمر و الحربايه مراته تطلعلى ام على
تهانى / اهدى اهدى غارت
امانى / الواد دخل علينا بطوله و كل يوم و التانى نلاقيه ساحب فى ديله و جاى
تهانى / اهو فضيلك خلى البت تتجدعن بقي و تلفه
امانى / مين ؟؟ نور !! هو انا اللى هقولك على خيبتها
تهانى / مفيش اخبار عن الخايب الكبير
امانى / مفيش جديد
تهانى / ما طول ما هو قافش ف بوز الفقر دى عمره ما هيكسب ابدا
امانى / عشان تعرفى بعانى قد ايه دا انا متحاصره
تهانى / الله يعينك يا اختى دعيالك والله دعيالك
……………….
فى كافيه مرسال
حسام يدخل و يقعد على ترابيزه فاضيه زياد يروحله
زياد / اهلا اهلا دكتور حسام الكافيه نور تشرب ايه
حسام / اقعد تعال
زياد يقعد
حسام / انا بطبعى انسان مسالم ما ليش فى المشاكل بس دا مش معناه انى ضعيف
زياد / حضرتك
حسام / ما لكش دعوه بمراتى تانى عشان رد فعلى هيزعلك
زياد / انا مقدر
حسام / انا المرادى بكلمك راجل لراجل بالادب لو الموقف العبيط بتاع النهرده اتكرر بشكل او غيره
زياد / حضرتك فاهم الموضوع غلط
حسام / مش مهم … انا مش مهم افهم خالص … المهم انت تفهم … لو كررتها هتزعل
حسام يقوم يقف زياد يقف
حسام / ابقي دور فى الكتب دى كلها عن الاصول عشان واضح ان التوبيك ده شاحح من عندكوا عن اذنك
حسام يمشي و زياد متابعه فى صمت
…………………
فى شقه نور
على يدخل شايل اكل البيت هادى يدخل الاوضه يلاقي نور ماسكه التليفون تبصله
على / جبت عشا
نور / عملتلى بلوك و عملت اكونت تانى و لما عرفت ان انا عملتلى بلوك برده ياريت تكون مبسوط
على / اكيد مش مبسوط يعني
نور تبص فى الموبايل و تقوم تاخد منه الكيس و تطلع بره على يطلع وراها يلاقيها بترتب السفره
نور / حسام اتكلم مع زياد و حل الموضوع هدده طبعا لو عمل كدا تانى هيزعله و المفروض انه اتكلم مع ندى بس ندى مش طيقانى و الصراحه حقها
على / اديها وقتها هتروق لوحدها
نور / بتتكلم بثقه اوى
على / ما لهاش غيرك اصلا
نور / و ده اللى راعبنى ما لهاش حد … عنيده و ممكن تاذى نفسها دى ممكن تروح هى لمجرد العند للى اسمه زياد ده انت ما تعرفهاش
على / مش هتعمل كدا عمرها ما هتعمل كدا
…………………
فى بلكونه ندى
ندى واقفه باصه على الكافيه و زياد واقف الناحيه التانيه و الاتنين باصين لبعض و ندى باين عليها الغضب تغمض و تدخل تلاقى حسام فى المطبخ بيعمل اكل تسند على الباب
حسام / ريحه الاكل جوعتك طبعا
ندى / كلمت نور
حسام يبصلها و يرجع يكمل
ندى / نور بتدخل على فى حياتنا مش هنخلص كدا ما اضيف على بقي و ابقي احكى معاه
حسام / هكلمها حاضر
ندى / انا اصلا مش شايفه ان فى حاجه تستاهل كل الاوفر ده انا اصلا الغلطانه انى بحكيلها اى حاجه او حتى بدخلها فى حياتى
حسام / بتتعلمى بسرعه … الصح ايه بقي ؟؟؟ انك تحكيلى انا … انا و انتى و بس … حياتنا احنا الاتنين و بس
ندى / و انا بيبي ما اقدرش اخد قرار ما اقدرش اتصرف ما اقدرش احمى نفسي يعني
حسام / تقدرى طبعا و اتصرفتى صح على فكره معاه … بس ده واد بجح … لو ما لقاش راجل يقفله من اول مره كان هيفهم ان اللى عمله عجبك و المره الجايه هيزود
ندى / على اساس انى هسمحله
حسام / دا انتى تفلقى امه بس على ايه نستنى ننهى الفيلم بدرى بدرى و نرتاح كلنا … خلصت … احلى شيكن وينجز هتاكليها فى حياتك
ندى تبص لحسام مبتسم بهدوء و هى مضايقه
…………………..
فى هايبر فى اسكندريه
أية بتزق عربيه مليانه حاجات تقف تبص على اسعار حاجات و هى بتلف بعينها تشوف غاده بتتمشي فى اخر الممر تفضل متبعاها و تبص الناحيه التانيه عمر يدخل شايل مسحوق اوتوماتيك
عمر / اديني يا ستى روحت بدلته قال يعني لو كنا روحنا بالعربيه سوا
أية / غاده هنا
أية تشاور لعمر شاب يدخل يقف جنب غاده
أية / هو احنا المفروض نروح نسلم عليها
عمر / لو تحبى
أية / بقول بلاش ما تنساش انها عارفه
غاده و اللى معاها يدخلوا
غاده / ايه الصدف السعيده دى
عمر / اهلا يا غاده ازيك
غاده / انا تمام … أية ؟
أية / ازيك يا غاده ليكي وحشه
غاده / اعرفكوا عبد الله المنوفى خطيبي
عمر / اهلا و سهلا اتقابلنا قبل كدا لو حضرتك تفتكر
عبد الله / تقريبا كانت مناقصه الوادى الجديد بيتهيالي
غاده / عمر كان معيد معايا فى الكليه و بيشتغل معايا فى الشركه بس لظروف ما
غاده تبص لأية
غاده / رمى كل ده ورا ضهره
عمر / فتحت محل موبايلات هنا فى اسكندريه فرع تانى للمحل اللى فى مصر
عبد الله / العمل الحر احسن حاجه و التوسع كمان خطوه حلوه احييك عليها
عمر / عبد الله بيه يا أية يبقي واحد من اكبر رجال الاعمال فى مصر صاحب مجموعه المنوفى لو تسمعى عنها
أية تهز راسها لا
غاده / معلش اصل أية ما لهاش فى البيزنيس دى اساسا لسه بتدرس … عامله ايه فى دراستك
أية / الحمد لله ماشيه
غاده / لو احتاجتى حاجه كلميني علاطول
عمر / سعيد انى شوفتك
غاده / و انا كمان هنستاذن بقي عشان ما نعطلكوش
عبد الله / فرصه سعيده
عمر / انا اسعد
عبد الله و غاده يمشوا
أية / شوفت كانت بتبصلى ازاى
عمر / مشيو خلاص و مش هنشوفهم تانى
أية / لو سمحت ممكن نروح
عمر / ممكن يلا نحاسب عشان نمشي
أية و عمر يمشوا
……………………
فى سوبر ماركت فى شارع ندى
ندى شايله حبيبه فى الشياله على صدرها و شايله بسكت فى ايد و بتعبى فيه حلويات
ندى / ايه رايك اجيب عصير و لا ساقع اممم
ندى تروح تفتح تلاجه العصير زياد يدخل السوبر ماركت
الراجل / اهلين زياد ابنى كيفك
زياد / يا صباح الشحروره اخبارك
الراجل / بتعرف شو متل ما بتقولوا بالمصرى حماتك بتحبك لساتنى لهلا ما اتروقت تعا حدى جوه نفتح نفس بعض
زياد / لا سبقتك من بدرى الف هنا عليك .. بقولك كنت عاوز كيس سكر بسرعه الواد الجديد ده هيخرب بيتي
الراجل / و لو كافيه من غير سكر
زياد / تخيل
الراجل / تانى رف جوه خش هات اللى بدك اياه و لا كنت دقيتلى على التليفون كنت … لا والله ما كنت عرفت ابعتلك ما فى حدا هون غيرى
زياد / و لا يهمك ثوانى اجيب السكر
زياد يجي يدخل يشوف ندى خارجه يقفوا يبصوا لبعض ندى تروح للراجل
ندى / لو سمحت ممكن احاسب على دول
زياد متابعها ندى تحط الحاجه على الترابيزه
الراجل / يؤبرنى هالجمال ما شالله عليها
ندى تبتسم
الراجل / تكرملى عيون هالصغيره … صباح الخير يا زيزو ما بدك السكر و لا شو
زياد يبتسم و ندى مش بتبص زياد يدخل المحل ندى تحاسب و تمشي ثوانى و زياد يطلع يجرى وراها
زياد / ندى .. ندى .. مدام ندى
ندى تقف و تتنهد
زياد / اولا انا بعتزر عن انى وقفتك فى الشارع بس انا كان لازم اعتزر عن اللى انا عملته انا و الله ما كانش فى نيتي اى حاجه انا اتصرفت بتلقائيه مش محسوبه و اسف لو كنت اتسببتلك فى اى مشاكل بس اقسملك انى كنت قلقان عليكي
ندى / ليه بقي ان شاء الله … بص حضرتك انا مقدره جدا وقفتك جنبى يوم ما نسيت المفاتيح بس دا مش معناه اننا صحاب
زياد / على الاقل جيران
ندى / و حضرتك بتطلع تخبط على كل جاراتك تطمن عليهم
زياد / انا قولتلك قبل كدا انى دارس بدى لانجوتش و
ندى / انا ما اعرفش النظام هنا فى لبنان ايه بس اى كان
زياد / انا عارف انك مش سعيده
ندى / ما يخصكش انا جايه فى بلد غريب
زياد / على الاقل لما جوزك هيدخل عليكي مكان هتبتسمى الشخص الوحيد اللى تعرفيه فى الغربه ملامحك بتقلب بمجرد ما بتشوفيه
ندى / و انت بقي فاكر ان عشان كان فى مشكله بينى و بين جوزى لسبب شخصي ما لكش اى دخل بيه فانا هاجى اترمى فى حضنك مش كدا
زياد / لا طبعا استغفر الله انا بس كنت خايف … انتى عارفه احصائيات العنف الاسرى ضد المراه وصلت كام
ندى / عنف اسرى ايه
زياد / تسعين فى الميه من الرجاله فى مصر مؤمنين ان الست لازم تستحمل الضرب و الاهانه عشان تحافظ على بيتها انا شوفتكوا اول يوم ليكي هنا و انتوا طالعين بالشنط
ندى / كنت مجهده من السفر
زياد / تمام …انا اسف … انا قدرت الموقف غلط
ندى تبص لزياد فى صمت
زياد / بس لو حصل
ندى / انا جوزى دكتور محترم و بيعاملنى كانى ملكه و ياريت تراجع نقسك و تبطل تحشر نفسك فى اللى ما لكش فيه
زياد يبصلها و يبص فى الارض و يهز راسه موافق ندى تسيبه و تمشي
زياد / انكار المشكله ما بيحلهاش بيكبرها
ندى تبصله بغضب و ترجعله
ندى / لو قربت منى تانى
زياد / اقسم بالله ما ليا اى غرض غير انى اساعدك
ندى / ما لكش دعوه بيا
زياد / لو مش عشانك عشان البيبي الجميل دى
ندى / اصوت و اللم عليك خلقه
زياد يرفع ايديه و يرجع خطوتين لورا ندى تبصله بغضب و تمشي و هو متابعها
……………………..
فى كافيه فخم فى اسكندريه
عبد الله / لا بس هو كان شاطر فعلا انا فاكره انتى نفسك كنتى بتشكرى فيه اوى
غاده / دا كان قبل الست هانم ما تسيطر عليه
عبد الله / تسيطر عليه !!
غاده / تخيل ده واحد رمى مستقبله كله ورا ضهره عشان واحده ما شافش منها غير مشاكل و قرف
عبد الله / بيحبها … المستقبل من غير اللى بنحبهم ما لوش لزمه … و انه يتحمل المشاكل و القرف دليل اكبر على حبه ليها … واضح انها شخصيه مميزه
غاده / مميزه ايه … انت اصلا ما تعرفش عملت ايه
عبد الله / انتى بنفسك قولتيها رمى كل حاجه ورا ضهره عشانها يبقي اكيد تستاهل
غاده / انت ما تعرفش حاجه انا اعرف عمر من سنين و البنت دى دمرت مستقبله حرفيا و مش عشان الجامعه و الشركه بس … اقولك ايه بس عمرك ما هتفهم
عبد الله / انا مش شايف ان مستقبله مدمر على كلامه عنده محل فى القاهره و التانى فى اسكندريه اى كان مرتبه من الحكومه انا و انتى عارفين انه ما يجيش حاجه جنب العمل الحر و دول فرعين يعني عمره ما هيفتح فرع تانى لو ما كانش الاولانى بيكسب كويس
غاده / بالعقل مش كان اولى يفتح الفرع التانى فى القاهره برده بدل شحطته بين مصر و اسكندريه الا اذا كان وجوده فى اسكندريه وراه حاجه تانيه
عبد الله / اكيد ليه اسبابه … بس انا شايف انه
غاده / انه يهرب من الناس … هى دى اسبابه انه يبعد عن كل اللى يعرفوه … امال انت فاكرها اتنقبت ليه
عبد الله / عادى فى ستات كتير منتقبات فى مصر يعنى
غاده / بقولك ايه غير السيره مش عاوزه اتكلم فى اعراض حد
عبد الله / اعراض !!
غاده / بجد مش قادره اصدق انه لسه مكمل معاها
عبد الله / انا برده شايف اننا نغير السيره احسن
غاده / ياريت … انا هطلب ديزرت اطلبلك حاجه
عبد الله / لا قهوه مظبوط كفايا
غاده تهز راسها و تفر فى المنيو
…………………….
فى الشركه عند حسام
هدايه تدخل تقعد قدامه على المكتب
حسام / انا مشغول جدا دلوقت يا هدايه بعد اذنك
هدايه / انا لاخر مره بكلمك ودى عشره فى الميه مش شويه
حسام / و لاخر مره بقولك انا فى السليم و اعلى ما فى خيلكوا اركبوه
هدايه / عملت ايه مع مراتك
حسام / اللزمى حدودك و الافضل تقومى تشوفى شغلك احسنلك
هدايه تقوم و تسند على المكتب
هدايه / خمستاشر فى الميه ما تبقاش طماع الناس دى لو ما اشترتش مننا هتشترى من غيرنا السوق مش واقف علينا المصلحه بس اللى هتطير
حسام / رقبتى هى اللى هتطير لو مشيت وراكى فى السكه دى
هدايه / ما تخافش وقت الجد عندنا اللى بيشيلها و مش اول مره يعني
حسام / يا سلام و انا ايه يضمنلى ان الحد ده مش هيكون انا
هدايه / انا اضمنلك
حسام / و انتى مين يضمنك
هدايه / هههههههههههههه
حسام / ايه ايه احنا فى الشركه
هدايه / قولتلك نتكلم بره على راحتنا انت اللى عايشلى فى دور الزوج المخلص
حسام / غصب عنك مخلص
هدايه / بقولك ايه انا جتلك دوغرى قدامك يومين تفكر و لعلمك انا ممكن اطلع الحاجه من تحت مناخيرك و اطلعك من المولد بلا حمص زى ما بتقولوا و مش بعيد اشيلهالك كمان
حسام / ما بتهددش
هدايه / على العموم قدامك يومين و براحتك بقي
هدايه تقوم و حسام متابعها و مضايق تليفونه يرن ندى
حسام / ايوه يا قلبي
ندى / انت فين
حسام / فى الشغل
ندى / ممكن اجيلك انا مش طايقه البيت
حسام يبص حواليه
حسام / تعالى
ندى / مسافه السكه سلام
ندى تقفل و حسام بيفكر
حسام / هى مالها مقفله معايا كدا ليه
حسام يبص لهدايه بتضحك مع بنت تانيه
…………………….
فى المحل عند على
على قاعد على الكاشير زعلان بيبص على شقه ندى فاضيه احمد يدخل شايل شاى
احمد / احلى شاى للرياسه
على يبص لاحمد و يبتسم
احمد / و الله انا ما فاهمك
على / ليه
احمد / ربنا كرمك و عشتك بقت فل ليه لسه بتبص على اللى فات ما اللى فات مات و اللى جاى مفيش احلى منه و لا انت غاوى وجع
على / انت هتعملى فيلم انا كنت سرحان
احمد / يعني ما بتفكرش فيها
على يبص لاحمد بحزن
احمد / انا مش صبى من صبيان المحل انا صاحبك دا كان اخوك فوق و انا تحت لو ما كنتش انا افهمك مين يفهمك
على / صدقنى كنت سرحان عادى الشغل خفيف النهرده
احمد / لا دى ساعه كدا و تلاقيه شد تانى انت هتوه عن الليله بقولك ايه ما تفكك من القاعده دى و تروح تبص بصه على المحل التانى و لا اللفلك لقمه حلوه تروح بيها احسن
على / انت بتوزعنى و لا ايه
احمد / الصراحه اه الكرسي وحشنى
على يضحك و يقومله احمد يقعد
احمد / يلا هوينا … ما تيلا يا عم
على يضحك و يمشي و احمد متابعه و مبتسم يبص على بلكونه ندى
احمد / يقطع الحب و اللى بيعمله فى الرجاله صحيح السنجله جنتله
……………………
فى الشركه عند حسام
ندى تدخل شايله حبيبه حسام يشوفها يروحلها
حسام / فى كافتريا قدام الشركه ممكن تستنيني فيها ساعتين بس و اخلص
حسام يديها فلوس ندى تاخدها
حسام / اطلبى اكل و اتغدى
ندى / انا محتاجه اتكلم معاك
حسام / مش هعرف ازوغ عنيهم عليا و الكل واقفلى على غلطه
هدايه تدخل
هدايه / الله دا الشركه نورت
ندى / شكرا .. هستناك بقي لما تخلص سلام
هدايه / على فين بالسرعه دى
ندى / عن اذنك
ندى تمشي و حسام يبص لهدايه
هدايه / شكلها مضايقه اوى خير يا ترى
حسام / ارفعى مناخيرك النونو دى من حياتى
هدايه / مناخيرى النونو دى تعرف لبنان من كبيرها لصغيرها مناخيرى النونو دى تقدر تخدمك صح
حسام / الله الغنى فكك منى بقي
هدايه / هتجينى يا سمسم هههههههههههههههه
هدايه تسيبه و تمشي
حسام / دى مش شركه اقسم بالله ما شركه
………………
فى شقه ليلى
نور قاعده بتفرط بسله مع ليلى
نور / على كلامه لبنان مرتبها اكبر بس منصب اقل ده اللى فهمته
ليلى / بس لبنان على ما اسمع كلها مشاكل و فساد و قرف
نور / ما الفساد فى كل حته و بعدين دى مرحله فى حياته اكيد على ما يشوف مكان تانى
ليلى / الامارات هى المستقبل
نور / ما هو خد نصيبه فيها بقي و مش هينفع يرجعلها تانى و الله لو عليا كان فضل فى مصر و اهى الصيدليه شغاله اهى الحمد لله بلا غربه بلا شحطته
ليلى / انتى هتجيبى فلوس هنا لفلوس بره
نور / و الله يا ماما قاعدتك وسط اهلك بالدنيا و ما فيها
ليلى / معاكى حق
نور / انا خلصت هقوم اعلق على الأكل
ليلى / انا هقوم اللبس و اروح المحل شويه اطفى على النار و قفلى الشقه و انتى نازله
نور / عنيا حاضر و هحطلك الاكل فى الحافظه عشان ترجعى تلاقيه سخن باذن الله
ليلى / عملتى اكل لجوزك
نور / اه تبلت فراخ هروح بقي اعمل عليها بطاطس و رز معمر
ليلى / على بيحبها نشفه متصيصيهاش
نور / ما تخفيش يا ماما هو انا اول مره اعملها
ليلى / الحق عليا بقولك
نور / لا يا ماما تسلميلى
نور تدخل المطبخ و ليلى تقوم تدخل الاوضه تليفون نور يرن تروح تبص فيه تلاقى مامتها
نور / ايوه يا ماما
امانى / انتى فين يا نور نزلت الصيدليه ما لقيتكيش انتى روحتى للدكتوره تانى من غيرى
نور / لا يا ماما ما انتى عارفه ان الاعاده مش النهرده
امانى / امال انتى فين لو على جه و ما لقاكيش
نور / انا عند ماما ليلى
امانى / و بتعملى ايه هناك لتكون عيانه
نور / لا كويسه الحمد لله بس كنت بشوف لو ناقصها حاجه
امانى / و هى حاجتها واقفه عليكي ما البركه فى ابنها
نور / ربنا يعينه فى شغله بقي
ليلى تدخل
ليلى / انا نازله يا نور معلش افتكرت فى غسيل من امبارح فى الغساله سهى عليا انشره اللحقيه قبل ما يكمكم
نور / عيني حاضر هعلق على الاكل و انشره علاطول
ليلى / بتكلمى مين؟ على ؟
نور / دى ماما
ليلى/ سلميلى عليها
نور / حاضر
ليلى تشاور لنور و تمشي
نور / ماما ليلى بتسلم عليكي يا ماما
امانى / ربنا ياخدنى و يريحنى من قرفكوا
نور / ليه بس كدا يا ماما
امانى / بقي انتى رايحه تطبخيلها و تنشرياها ما ناقص تمسحيلها الشقه بالمره
نور / لا والله يا ماما الشقه ما شاء الله فله اهى هو بس كام طبق فى الحوض
امانى / انتى عاوزه تنقطيني يا بنت الجزمه هو انا خلفتك عشان تخدمى فى البيوت
نور / هى ماما ليلى بيوت يا ماما و بعدين انا بنت اصول و حضرتك مربيانى على كدا
امانى / بنت اصول !! انا كلامى مش معاكى … مع البتاع اللى افتكرته عوض من ربنا و هينصفك سلام
امانى تقفل و نور تنفخ
نور / والله لو قدت صوابعى العشره شمع ما هعجبها برده
نور تعلق على حله و هى مخنوقه
……………………
فى الكافيه
ندى / انا مش بحكيلك عشان تروح تتخانق معاه و تضربوا بعض
حسام يبتسم
حسام / لا لا لا دا مش اسلوبى خالص بس على العموم انا سعيد انك اتكلمتى معايا صدقيني يا ندى ما فيش حد هيهتم بيكي و يحميكي قدى
ندى / يعني ناوى تعمل ايه
حسام / هو فعلا الافضل اننا نشوف شقه تانيه و اهو تكون اقرب للشركه صحيح اكيد هتكون اعلى فى الايجار بس ارحم بكتير من العته ده … بصي هو انا المفروض ما اعملش كدا بس الحقيقه مش قادر … مش انا قولتلك من الاول
ندى / بالرغم من انه ما يعرفش حاجه عننا بس قدر يفهم … عمر حياتنا سوا ما هتكون طبيعيه ابدا
حسام / انا مش شايف كدا ابدا بالعكس انتى بداتى اهو تتاقلمى بدليل اللى حصل بينا
ندى تبصله فى صمت
حسام / كل حاجه بتبقي صعبه فى اولها بس مره فى مره الحياه بتمشي مش كنا بناخد باين مش فاكر ايه كدا الانسان يعيش و يتعايش عادى الوقت كفيل اننا نتاقلم و نصلح الشرخ اللى بينا و بكره حبيبه تكبر و تقربنا من بعض اكتر و اكتر كل ده هيروح مع الايام صدقيني
ندى تبص فى الارض
حسام / كل يوم هيثبتلك ان زى ما انا ما ليش غيرك انتى كمان ما لكيش غيرى زى ما بحبك هتحبيني
ندى / اللى حصل بينا كان غصب عنى ما تصدقش ان
حسام / تمام تمام انا اسف لا كان قصدى احرجك و لا اضايقك و بعدين احنا متجوزين لا هو عيب و لا حرام
ندى / بقولك كان غصب عنى
حسام / نغير الموضوع … نغير الموضوع … قوليلى طلبتى ايه بقي و انا فوق و عجبك
ندى تبص لحسام حسام يقلب فى المنيو
……………………
فى شقه امانى
امانى / لا ما انت مش فقير عشان تخلى بنتى تخدم عند امك
على / هى عملت ده من نفسها و بعدين حضرتك محسسانى انها شالت الشقه و فرشتها من اول و جديد دى حياله حله بسله و صينيه رز معمر
امانى / انا بنتى تكفى نفسها و بس
على / و بنتك عملت ده من نفسها و بعدين هو لو حضرتك طلبتى منى حاجه المفروض امى تعمل معاكى كدا و تقول ابنى يكفى نفسه و بس
امانى / كتر خيرك انا ما بطلبش من حد حاجه و بعدين انت مش بتلف على الدكاتره عشان تخلف يا على يعني واحده زى دى المفروض ترتاح فى سريرها
على / انا واخد نور و عارف ظروفها و راضي و ما طلبتش منها تروح لامى و لا امى كانت مستنيه من نور حاجه مش عاوزه تعمل ما تعملش عاوزه ترتاح فى سريرها تخليها و انا كفيل بيهم الاتنين بس لو هى عملت ده من نفسها هشيلهالها على راسي
امانى / المفروض تمنعها هى بتعمل ده عشانك عشان بتحبك و خايفه تخسرك
على / انا مش همنع نور تروح لامى و مش هطلب منها و ما طلبتش القرار لنور
امانى / و هى نور من ساعه ما عرفتك بتاخد قرار فى حاجه
على يبص فى الساعه و يقوم يقف
على / انا مضطر استاذن عشان ورايا حوار كدا … عن اذنك ان شاء الله نبقي نكمل كلامنا مره تانيه عن اذنك
على يروح ناحيه الباب يفتحه و يطلع بره و امانى بصاله و مستغربه يقفل الباب و يطلع شقته يفتح الباب و يدخل
على / دا انتى ولي
نور تطلع من جوه
على / والعه
نور تبتسم
نور / ايه !!!
على / ايه القمر ده فينك من بدرى
نور / انا هنا انت اللى فينك
على يشمشم
على / حد بيدلعنى النهرده
نور / و انا عندى اغلى منك ادلعه ادخل غير و اغسل ايدك و وشك على ما اغرف
على يعدى يبوس راسها و يدخل جوه و هى مبتسمه
………………
فى بلكونه حسام
حسام واقف فى البلكونه بيتكلم فى التليفون و باصص على زياد واقف بيضحك و يهزر مع اتنين شباب
حسام / اعتبريه اختبار مش بتقولى انك تسلكى فى الحديد و معارف و بتاع وريني
هدايه / مش محتاجه معارف
حسام / الواد نضيف وانا سائل عليه و مش عاوز شغل بلطجيه الواد برده ما لوش اعداء فمش هيتهم غيرى
هدايه / انت فاهمنى غلط انا ما ليش فى العنف و ان كان هو نضيف فالف قول مليون موظف فى البلد دى فاسد و مرتشى نشوفله حد يظبطه و يقفله الكافيه كام يوم و لحد ما يفتحه يكون غرمله مبلغ كبير و اتربى
حسام / كنت بفكر فى حاجه تانيه بس ماشي
هدايه / بتقولوا فى مصر شيل ده من دا يرتاح هيدا عن دا
حسام / اعزل يعني
هدايه / شقه اكبر و اوسع و بفيو احلى و اجمل انت بس تؤمر
حسام / علاطول كدا طب ما اعلق على صدرى يافطة مكتوب عليها حرامى اسهل
هدايه / زى ما تحب و اوعدك بكره هتصحى على اخبار حلوه
حسام / اما نشوف
ندى تدخل
ندى / لبن حبيبه هيخلص … سورى بتتكلم فى التليفون
حسام / تمام سلام دلوقت و هبقي اشوف الموضوع ده بكره فى الشركه
هدايه / هههههههههههه سلام
هدايه تقفل
حسام / حاجه تانيه غير اللبن اجبهالك
ندى / لو عديت على السوبرماركت هات شيكولاته و شيبسي
حسام / اعديلك مخصوص تؤمرى
حسام يبوسها من خدها و يعديها و يدخل ندى تروق البلكونه تبص على زياد يشوفها يدخل الكافيه تدخل جوه
…………………….
فى الصيدليه تانى يوم
نور واقفه و شاب واقف يدخل شاب مبرشم يحط شريط فاضي على الكونتر
الشاب / لا مؤاخذه ادكتور عاوز شريط
الصيدلى / معاك روجته
الشاب / جرا ايه يا دكتور ما تصحى معايا كدا عشان اظبطك
الصيدلى / لازم روجته انا اسف
الشاب / يا فتاح يا عليم يا رزاق يا كريم عالصبح بقولك ايه انا خرمان و طالع عين امى اصرفنى بدل ما اطلعهم عليك
نور / انا هطلب البوليس
الشاب / بوليس ايه اللى تطلبيه يا حلوه دا انا اعملها معاكى وقتى
نور بتتصل بالموبايل
الشاب / هى كدا طب اهو
الشاب يبدا يكسر فى الصيدليه و يحدف الاستاندات على نور و الصيدلى و يطلع يجرى
……………………
فى شقه ندى
ندى واقفه فى البلكونه زحمه كتير قدام الكافيه و زياد واقف مع ظابط بيتكلموا فى جنب و الكافيه يتقفل ندى تدخل جوه تمسك التليفون
ندى / ايوه يا حسام انت فين
حسام / فى الشركه يا نونو خير فى حاجه
ندى / قفلوا كافيه مرسال
ندى / ما اعرفش … حسام انت ما لكش
حسام / اللطم يا ندى اللطم
ندى / انا بطمن بس
حسام / هعملها ازاى طيب دى اعرف مين هنا و لا اعملها ازاى فهميني و بعدين بدل ما تجرى تتهمى جوزك ما تفكرى واحد زى ده ممكن يكون عمل ايه ما اكيد نيل حاجه هو من الاول شكله مش سالك و انا قولتلك
ندى / تمام تمام
حسام / انا اصلا كنت ناوى ادور على شقه تانيه بعيد عن المنطقه الزباله دى كدا لازم اسرع فى الموضوع
ندى / معاك حق
حسام / بقولك يا بيبي انا اسف انا عندى شغل كتير و
ندى / تمام يا حسام ربنا يعينك مش هعطلك سلام
ندى تقفل و تطلع البلكونه تلاقي زياد واقف مع اتنين شباب بيضحك و مش هامه و الكافيه مقفول
……………….
- يتبع الفصل التالي اضغط على ( رواية سلف و دين ) اسم الرواية