رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الخمسون 50
ندى / ايوه يا حسام انت فين
حسام / فى الشركه يا نونو خير فى حاجه
ندى / قفلوا كافيه مرسال
حسام / ليه خير
ندى / ما اعرفش … حسام انت ما لكش
حسام / اللطم يا ندى اللطم
ندى / انا بطمن بس
حسام / هعملها ازاى طيب دى اعرف مين هنا و لا اعملها ازاى فهميني و بعدين بدل ما تجرى تتهمى جوزك ما تفكرى واحد زى ده ممكن يكون عمل ايه ما اكيد نيل حاجه هو من الاول شكله مش سالك و انا قولتلك
ندى / تمام تمام
حسام / انا اصلا كنت ناوى ادور على شقه تانيه بعيد عن المنطقه الزباله دى كدا لازم اسرع فى الموضوع
ندى / معاك حق
حسام / بقولك يا بيبي انا اسف انا عندى شغل كتير و
ندى / تمام يا حسام ربنا يعينك مش هعطلك سلام
ندى تقفل و تطلع البلكونه تلاقي زياد واقف مع اتنين شباب بيضحك و مش هامه و الكافيه مقفول ندى تستغرب شاب يوصل بعربيه زياد يركب جنبه العربيه تمشي و ندى متابعه
ندى / ايه بلد المجانين اللى جيت فيها دى
……………………..
فى شقه امانى
نور بتعيط و تتنفض و امانى وخداها فى حضنها الباب يخبط امانى تقوم تفتح تلاقى على يدخل يجرى على نور
نور / شوفت اللى حصلى يا على
على ياخدها فى حضنه
نور / انا مش نازله الصيدليه تانى
على / منهم لله بتوع البرشام لحسوا دماغ البلد .. عملتى محضر
امانى / محضر ايه انت كمان انت عاوزهم يحطوا البت فى دماغهم
على / امال يستهفئوها و ينطولها كل شويه
نور منهاره من العياط
نور / انا مش هقف فيها تانى اصلا
على / المهم عندى سلامتك الباقي يتعوض
محمد يفتح الباب و يدخل
محمد / نور فين … انتى كويسه يا بنتى
امانى / كل ده فى الطريق يا محمد
محمد / اقسم بالله نزلت من الميكروباص و كملت باقى السكه جرى الطريق واقف
امانى / و عربيتك فين
محمد / ما انتى عارفه انها من امبارح عند السمكرى و بعدين احنا فى ايه و لا فى ايه بلغتوا البوليس
امانى / يووووه بقي مش هنخلص النهرده
محمد / هو ايه اللى مش هنخلص هى مش الصيدليه دى متامن عليها هتاخدى فلوس التامين ازاى من غير ما تعملى محضر
امانى / تغور الفلوس و تغور الصيدليه انت عاوز تجبلنا الغم لحد بيتنا
على / امال نسكتلهم ينطولنا كل يوم
امانى تشد نور من حضن على
امانى / و انت خسران ايه دى بنتى انا بنتى
على يبص لامانى نور تسيبهم و تدخل الحمام و هى بتعيط على يقف قصاد امانى
على / دى مراتى على فكره يعني بخاف عليها
امانى / هى مش نازله الصيدليه دى تانى و اقولكوا حاجه انا هنقل الصيدليه من تحت البيت خالص
محمد / و هو ده حل يعني
على / اعملوا اللى تعملوه
على يروح الحمام يلاقي نور سانده على الحوض و الحنفيه مفتوحه يدخل يبوس راسها
نور / انا مش مصدقه انه عدى على خير دا كان زى المجنون طايح فى الكل
على / ما دام ما حدش اتعور خلاص الباقي يتعوض
على يبل ايده و يمسح خد نور و يحضنها
على / تحبى نطلع شقتنا
باب الشقه يخبط نور تتخض
على / هشوف مين
على يطلع بره يلاقي امانى فتحت و الصيدلى على الباب
الصيدلى / مش فاضل غير ياخدوا اقوال مدام نور
امانى / و انت ايه اللى خلاك تتصرف من دماغك و تكلم البوليس بس
على / خير ما عملت نور بتغسل وشها و نازلين
امانى / انت عاوز تنقطنى
محمد / ما تهدى بقي يا امانى خلينا نخلص
نور تطلع من الحمام
على / البوليس عاوز ياخد اقوالك … انا هبقي معاكى
نور تبص لعلى و تهز راسها و تمشى يمشي وراها امانى تبص لمحمد
امانى / و انت هتقعدلى كدا ما تفز تطمن على بنتك
محمد / و انتوا خليتوا فيا اعصاب اقف على رجلى
محمد يقوم بالعافيه و ينزل وراهم
……………………
فى الشركه
حسام و هدايه واقفين يضحكوا فى التراس
هدايه / عشان تبقي تصدقنى
حسام / قال يعني مش هيفتحه تانى
هدايه / هيغرمله شى مبلغ و يفتحه و نقفلهوله تانى لحد ما يزهق او يفلس
حسام / ماشي
هدايه / و بخصوص النقل
حسام / لا معلش سبيلى انا الحكايه دى
هدايه / تمام .. نتكلم فى المهم .. هتخرج الشغل امتى و ازاى
حسام / هاخد خمسه و عشرين فى الميه
هدايه / كتير يا حسام انت مش لوحدك فى اللعبه دى
حسام / و انا صاحب الكوره من غيرى مفيش لعب خالص
هدايه / خليها عشرين
حسام / خمسه و عشرين
هدايه / القرار مش بايدي انا كنت متفقه انك خمستاشر و انا خمستاشر قولت اراضيك بخمسه من عندى بس مش هقدر اديك اكتر
حسام / و انا ما يخلصنيش خسارتك كلمى الحبايب و ظبطى و من هنا لوقتها يحلها حلال
هدايه / طب ايه رايك عشان نختصر الوقت اعرفك عليهم هنسهر النهرده فى بار جامد هيعجبك موت
حسام / انتى عارفه انه مش جوى
هدايه / و انت جربت عشان تعرف جوك و لا لا تعال وعد مش هتندم
حسام / مش هقدر ندى و حبيبه هعمل فيهم ايه
هدايه / عشا عمل و بعدين ما تشربش فى عصير و كوفى و اى حاجه تانيه تحبها
حسام / مش هينفع
هدايه / هههههههه اسمحلى المرادى اقول كلمتك باقي دقيقتين على البريك ما يخلص فكر و هستناك بالليل هبعتلك اللوكيشن و متاكده انك مش هتتاخر
حسام / انا قولت اللى عندى اكتر من كدا
هدايه / هستناك
هدايه تمشي و حسام متابعها
/////////////////////
حسام / هتعمل ايه يا حسام هتدخل اللعبه بدرى اوى كدا … دا انت حتى معكش ولا ورقه تلعب بيها … مجازفه يا ترفعك يا تدفنك فى سابع ارض … مره واحده بس … ما تضحكش على نفسك انت عارف ان عمرها ما بتكون مره واحده … اللى بيدخل اللعبه عمره ما بيخرج منها … لازم ارتب اوراقى بسرعه … لازم اركز … منك لله يا ندى على اللى عملاه فيا ده
////////////////
حسام يتنهد و يروح يقعد على مكتبه
…………………..
فى شقه نور
تهانى و امانى و منال و ليلى قاعدين مع على و محمد و نور واقفه فى جنب بتتكلم فى التليفون تقفل و تروح تقعد معاهم
على / أية ؟
نور / ايوه و عمر كمان كلمنى من شويه
على / ما هو كلمنى انا كمان
تهانى / بس انا سمعت ان الحكومه بيسربوا بيانات اللى بيعملوا محاضر و المجرمين بيروحوا ينتقموا
على / طب دكر يهوب هنا تانى
امانى / طب ما هو هوب يا خويا كنت فين ساعتها و لا انت فاكر انه هيجي و انت موجود و لا يكونش هيستاذنك قبل ما يجي
على / لا يا ست الكل بس فى الاول و الاخر ده مكان مفتوح و الواحد ياما بيشوف و اكيد يعني الصيدليه دى مش اول صيدليه يحصل معاها موقف زى ده
منال / حقه دا الحج كان بيحكيلى بلاوى
على / عشتها معاه والله يا حجه
تهانى / يعني هو حد خالص ما احنا بنحتك بيهم فى المواصلات و الشوارع المخدرات لحست مخهم
نور / انا كدا كدا مش هنزل الصيدليه تانى
امانى / احسن و ان كان على الصيدليه فشركه التامين بقي تبقي تصلحها و لا ايه يا محمد
محمد / فكرتيني عاوز اكلم حسام لحسن بيقولوا لازم يخلص الاجراءات بنفسه
على / اشمعن يعني
محمد / اهو … اما اقوم اكلمه
محمد يقوم يدخل البلكونه و الكل ملموم حوالين نور
…………………………
فى بار بالليل
شباب و بنات بيرقصوا حسام يدخل هدايه تشاورله يروحلها
حسام / قاعده لوحدك يعني كنت فاكرك هتعرفيني على الباقيين
هدايه / حبيت استفرد بيك شويه ايه بلاش
حسام / ديما بتسقطى انى متجوز
هدايه / جواز ايه و قرف ايه روتين و ملل و قرف
حسام / طب و الحب
هدايه / اهو الجواز ده هو الرصاصه اللى بتضرب الحب فى مقتل
حسام / طب و الحل
هدايه / عيش انبسط و عيش
حسام يهز راسه مع ابتسامه خفيفه
هدايه / تشرب ايه
حسام / انا عمرى ما شربت و خلى اليوم يعدى على خير خلينا فايقين كدا و مصحصحين كدا احسن
هدايه / تؤ … انا هشرب خليك انت صاحى لوحدك
حسام / احنا جاين هنا نتكلم فى الشغل
هدايه / بقولك ايه انا حاجزه اوضه فى الفندق اللى فوق البار ما تيجي نطلع نتكلم فيها على رواقه
حسام / لا دا انتى جايه جاهزه ما شاء الله
هدايه/ ما تخافش ما حدش هيقول لندى
حسام / الوقت بيعدى و لحد دلوقت ما اتكلمناش فى الشغل
هدايه تنفخ و تفتح شنطتها و تطلع ورقه تديها لحسام
هدايه / دى لسته بالادويه و قدام كل واحد الكميه اللى هتطلع المطلوب منك انك توفرها بالمخزن قبل يوم تمنتاشر الشهر ده
حسام / اشمعن
هدايه / عشان المخزن هيتسرق
حسام يبص فى الورقه و يفكر
حسام / و دى انتوا محتاجينى فيها فى ايه ما اى صيدليه تعمل اوردر وهمى و البضاعه هتيجي اوتوماتيك و البضاعه تتسرق قبل التسليم
هدايه / انت محتاج كام صيدليه بقي عشان توفر الكميه دى
حسام يبص فى الورقه
حسام / كميه كبيره فعلا
هدايه / شغلانه سهله اصناف ناقصه من المخزن و انت طلبت توفيرها و بالصدفه يوم استلامها المخزن يتسرق كام عامل يتخرشم … ما تقلقش ما حدش هيموت البوليس هيجي يحقق و يدور على الحراميه و احنا هنجيب بوبكورن و نقعد نتفرج من بعيد
حسام/ و ان قدروا يوصلولهم
هدايه/ يبقي فلوس مستر عدنان حلال و رجعتله احنا مالنا
حسام / الا هو مش انتى كنتى متجوزه عدنان ده برده و لا انا معلوماتى غلط
هدايه / اووووه قلبت عليا المواجع … عيله صغيره و حلوه بتتمرن فى الشركه دخل عليا بجو الحب الاهبل و هدايه و وعود هوب لقيتني حامل طبعا وشه الحقيقي بان ساعتها بس الحق يتقال دفعلى تمن عمليه الاجهاض
هدايه تشرب
هدايه / المهم انا زعلت شويه بس بالصدفه فى الفتره اللى كنا فيها سوا كنت اتعرفت على مستر ناجى الغدى
حسام / العضو المنتدب
هدايه / راجل سكره اتجوزنى شهرين بس ايه جنه عدنان بقي ما سكتش و اتقمص ناجى طبعا ما خلصوش
حسام / طلقك
هدايه / و اتجوزت عدنان
حسام / دا انتى ما بتضيعيش وقت بقي
هدايه / هههههههههههه الطلب عليا عالى اوى و زى اى حاجه فى الدنيا لما بيزيد الطلب
حسام / بيعلى السعر
هدايه / بالظبط
حسام / و اطلقتوا ليه بقي
هدايه / زهقت
حسام / زهقتى !!!
هدايه / اتعين فى الشركه واد مز زيك كدا طب انا ايه اللى يخليني فى حضن الراجل العجوز ده و فى الصاروخ ده قدامى طول الوقت … أطلقت من هنا و ابن الكلب خلع من هنا
حسام / هههههههههههههه
هدايه تشرب و هى بتضحك
هدايه / اكتشفت ان الحب ده مقلب كبير اوى و قررت انى ارجع للعب تانى اتجوزت مرتين تانين و بعدين قررت ما اربطش نفسي بحد
حسام / احسن برده … بس انا مش فاهم ليه عدنان متمسك بيكي اوى كدا
هدايه / و ما يقدرش يستغنى عنى … اقولك حاجه كتير من الاخوه الزملاء حاولوا يوقعوا بينا
هدايه تشرب
حسام/ بالراحه يا بنتى انا مش هعرف اتعامل لو سكرتى
هدايه تفتح الشنطه و تديله مفتاح باب على شكل كارت
هدايه / اوضه تلتميه و تسعه … انا متاكده انك هتعرف تتعامل كويس
حسام يفتح بقه هدايه تكمل شرب
هدايه / على فكره انا و عدنان علاقتنا لسه مستمره لحد دلوقت … اصل انا زى المخدرات اللى يجربنى مره ههههههههههههههههه
حسام / ليلتنا عنب
هدايه / قولى بقي … هتفضل مؤدب كدا كتير
حسام / مش احسن ما ادمن
هدايه / ههههههههههههههه جرب كاس صدقنى هيفكك على الاخر
حسام / مره تانيه ان شاء الله … انا ايه اللى جابنى
هدايه / هههههههههههههههههه
……………………….
فى شقه ندى
ندى تطلع البلكونه الشوارع فاضيه تدخل و تقفل باب البلكونه و تروح تقفل باب الشقه بالترباس
ندى / بات فى الشارع بقي قال عشا عمل قال
ندى تفتح الترباس تانى
ندى / بدل ما يطلع جنونته عليا
ندى تدخل الاوضه و تقفل الباب بالمفتاح
ندى / ابوكى ده راجل يقرف
ندى تروح تنام جنب حبيبه نايمه
ندى / جايبني هنا عشان يتسرمح بره للفجر يعني ما كان سابنى اعيش بقي و لا هو ايه حكايته يعني انا اساسا مش عوزاه
ندى تقوم تجيب التليفون و تطلع نمره حسام و لسه هتطلب تقفل التليفون و تنام تنانى
ندى / اصلا اريح بلا هم اياكش يولع انا هتعب قلبي ليه
ندى تقرب من حبيبه اكتر و تاخدها فى حضنها و تنام
………………….
فى شقه على
على نايم و واخد نور فى حضنه
على / يووووه دا مره المحل ده اطربق فوق نفوخنا و كانت معجنه
نور / يا خبر
على / لا بس احنا ايه ظبطناهم … انا فاكر اول مره شوفت خناقه من النوع ده جريت استخبيت فى الحمام
نور / ههههههههههه كان عندك قد ايه
على / مش فاكر يمكن اتناشر سنه مثلا
نور / مش صغير اوى يعني
على / و انا اجى ايه جنبهم و لا هعمل ايه فى وسط الكراسي و الترابيزات اللى بتطير و كمان انا لو اتعورت و لا حصلى حاجه هفرق مع مين و عبير هعمل فيها ايه
نور / معاك حق
على / بس لما عبير ماتت بقي قلبي مات معاها كنت بدخل فى الخناقات دى بقلب جامد دا انا مره عرفت ان الواد احمد رايح يتخانق روحت معاه و لا كنت اعرف هيتخانق مع مين و لا مين الغلطان اياكش اموت و اخلص
نور / بعد الشر عنك
على / و بقيت اروح مع احمد جيم و اعمل عضلات بقي بس ما طولتش عمر جه و اتلخمت فيه بس عمر كان رياضي خليته يعلمنى و اهو سكه نقرب بيها من بعض
نور / طب و دلوقت
على / انا مش بتاع مشاكل بس خلى حد يقرب من حبايبي كدا
نور / يعني لو كنت موجود النهرده
على / اكيد ما كنتش هسيبه يعني … بصي ما تفكريش فى الموضوع كتير عشان انتى لسه نازله الشارع قريب الحاجات دى عادى بتحصل و هتحصل
نور / الله الغنى
على / براحتك
نور / اصلا الصيدليه مش واقفه عليا افهم فيها ايه يعني
على / اهو كانت بتسليكي
نور / والله مش هنكر بس
على / بصي هى مش هتقف عليكي و بيتك اولى بيكي فى اى وقت حبيتي تنزلى اهى تحت البيت مش بعيد
نور / معاك حق
على / صحيح ابوكى عمل ايه مع حسام
نور / كالعاده قاله ما تشغلش بالك و هيكلم واحد صاحبه هيخلص الدنيا هنا والله وفر على بابا مشوره و روتين و هم ما يتلم
على / و مفيش اخبار عن الوله بتاع الكافتريا
نور / اسكت مش نسيت اقولك
على / خير
نور / البوليس جه قفله الكافيه بتاعه ندى حكتلى الصبح بس اتلخمت فى اللى حصل
على / سريع اوى ما شاء الله
نور / انا اصلا قولتلها الواد ده شكله مش سالك
على / انا بتكلم عن حسام عاوزه تقنعيني ان اللى حصل ده صدفه
نور / نام يا على بنظريه المؤامره بتاعتك دى
نور تلف و تديله ضهرها
على / قفوشه اوى
نور تبصله تلاقيه بيضحك تبتسم ياخدها فى حضنه
…………………….
فى شقه ندى
ندى تفتح الباب تلاقي حسام نايم على الكنبه
ندى / احسن
ندى تدخل الحمام المنبه فى موبايل حسام يرن يتقلب يقع فى الارض يصحى يلاقي باب الاوضه مفتوح يتمطع و يدخل ما ميلاقيش ندى يفتح الدولاب ياخد غيار ندى تدخل الاوضه
ندى / على الله تكون انبسطت امبارح
حسام / و لا انبسطت و لا نيله لحد الصبح و احنا بنتخانق عالم ولاد كلب حراميه عاوزين يكلونى بيتكاتروا عليا ولاد الكلب
ندى / اتصلت بيك اكتر من مره غير متاح
حسام / شبكه حقك عليا انا اصلا مش هروح المكان ده تانى انا كنت فاكر اننا هنروح مكان فى فندق خمس نجوم مثلا طلع ربع نجمه دا الامارات برقبتهم
ندى / هروح اعمل فطار
حسام / زعلانه منى
ندى / انا استنيتك كتير و خفت انام و الباب مفتوح و خفت اقفل الباب تنام فى الشارع
حسام يبوس راسها
حسام / حقك عليا
ندى تهز راسها و تروح المطبخ حسام يدخل الحمام
………………….
قدام بيت نور
محمد ينزل يلاقى على واقف مع عمال
محمد / بتعمل ايه يا على
على / بصلح الصيدليه يا عمى
محمد / مش تستنى يا ابنى تشوف الناس بتوع التامين
على / يعني هنوقف الصيدليه لما يبقوا يتحركوا و فى الاخر هتاخد منهم ايه يعني
محمد / اللى تشوفه يا ابنى هستاذنك هروح شغلى
على / اتفضل يا عمى اتفضل
محمد يمشي تليفون على يرن على يطلعه يبتسم
على / صباح الخير يا قلبي صحيتي
نور / انت بتعمل ايه تحت و سايبني هنا لوحدى
على يبص لفوق يلاقي نور واقفه فى البلكونه
على / احلى صباح ده و لا ايه
نور / لو ما فطرتش اطلع افطر معايا نفتح نفس بعض
على / انا لو طلعت ما اضمنش اقدر انزل تانى
نور / وراك حاجه مهمه يعني … حاجه اهم منى
على / ما عنديش اهم منك … طالع
نور تبتسم و تدخل جوه و على يحط الموبايل فى جيبه و يطلع يقابل امانى على السلم
امانى / برده مشيت اللى فى دماغك
على / صباح الخير يا طنط
اماني/ صباح الخير يا خويا ممكن تفهمنى انت بتعمل ايه
على / هفطر كنت طالع افطر دا بعد اذنك يعني … فطرتى … انا هطلع اخلى نور وحضر لحضرتك صينيه فطار انما ايه
امانى / يا على
على / مش هتاخر خمسه بس و هبعتلك الفطار مع نور عن اذنك
على يسيب امانى و يطلع يجرى و امانى واقفه بتنفخ
……………………….
فى الشركه عند حسام
حسام / انا مش طايقك
هدايه / هههههههههههههه و انت ايه اللى خلاك تستنى جنبى ما كنت روحت
حسام / اسيبك لوحدك فى مكان زى ده و امشي
هدايه / يقبرنى ها الزلمه كتير رجال
حسام / ابو شكلك عالصبح
هدايه / هههههههههه بعشق اباحه المصرين المهم
حسام / ايوه المهم ابوس ايدك خلينا فى المهم
هدايه / فكرت فى اللى اتكلمنا فيه امبارح
حسام / اه بس ما اتفقناش هستلم الفلوس ازاى و امتى
هدايه / بعد التسليم انا هديهالك بنفسي
حسام / هو بعد العيد بيتفت الكحك
هدايه / شو
حسام/ انتى هتعملى فيها لبنانيه ما تظبطى الاريال كدا و تتعدلى
هدايه / يا لهوى
حسام / ايوه كدا اتعدلى يا فتكات اتعدلى
هدايه / ههههههههههههه خلاص ما تزعلش نفسك نص قبل و نص بعد
حسام / نص دلوقت و نص لما البضاعه تدخل المخزن انا كدا كدا هبقي خلصت دورى ما ليش فيه بقي لو حد غيرى قصر فى دوره
هدايه / ماشي بس ما تاخدش على كدا دى بس ضمانه مننا عشان اول مره
حسام / لا هتبقي كدا كل مره و سيستم من الاول نمشي عليه نريح و نستريح ايه رايك
هدايه / و انا اقدر اقولك لا
…………………
فى شقه نور
على / والله انا تعبتلها سلف الفراغ القاتل اللى هى عايشه فيه تاعبها بجد
نور / هى بس بتحب تمشي زى ما الكتاب ما بيقول
على / و الكتاب ده لا مؤاخذه مكتوب بالعربى يعني اجيب نسخه يمكن افهمها
نور / لا فرنساوى
على / ياختااااااااى اتارى لا كدا معزوره بقي
نور / هههههههههههههه بقولك ايه ما تحطهاش فى دماغك
على / لا انا دماغى مش فضيالها دلوقت انا بفكر فى حاجه تانيه خالص
نور / خير
على / هدخل شقتى ازاى بعيد عن السلم
نور / صبرنى يارب
نور تقوم و على بيضحك
……………….
فى شقه ندى
ندى واقفه فى البلكونه و الكافيه مفتوح و شغال عادى و ندى واقفه مستغربه حسام يدخل
صوت حسام / نونو نونو انا جيت
حسام يدخل البلكونه
حسام / انتى هنا يا نونو جبتلك معايا بقي
ندى / فتحوها تانى
حسام / عادى فين المشكله
ندى / يمكن كانت مشكله فى العدادات او صيانه مثلا
حسام / احنا مالنا شاغله نفسك ليه ما يمكن حاجه كبيره و كيشله كام حد فى الحكومه فسابوه يفتح تانى
ندى / بالسرعه دى
حسام / تحبى انزل اسالهولك
ندى / اكيد لا طبعا بس انا مستغربه
حسام / نسيب بقي غدوه السي فود اللى دافع فيها دم قلبي و نقعد نتباحث فى قضيه سي زياد و كافيه مرسال بتاعه
ندى / خلاص خلاص انا داخله اوضب
حسام / كدا احبك يا قلب سمسم انتى
ندى تبصله و تدخل يدخل وراها
حسام / خليني اساعدك
…………………….
فى شقه عمر
أية عماله تزاكر عمر يدخل
عمر / السلام عليكم
أية / هو انا ما ينفعش احول اونلاين
عمر / خير فى حاجه و لا ايه
أية / ازاى هنزل الكليه و اروح امتحن يا عمر ما اسمى و صورتى هيبقوا فى الكارنيه و اكيد هكشف وشي و اكيد فى فى الدفعه حد
عمر / هاجى معاكى
أية / يا سلام
عمر / هاجى معاكى و هستناكى تخلصي و اروحك و اطلع على المحل اللى هناك بقالنا ياما ما بصيناش عليه
أية / و هتقابل زمايلك كدا عادى
عمر / اه عادى فرصه سعيده بقالنا ياما ما اتقابلناش عادى و اسلم على دكاترتى و الطلبه بتوعى عادى جدا
أية / ازاى هتعمل كدا
عمر / عادى هنزل مصر و اروح عند بيتنا القديم كمان لو حكمت و هقعد على القهوة و اطلب شاى عادى اقولك هطلب سحلب
أية / يا برودك يا عمر
عمر / انا ما غلطتش و ما عملتش اى حاجه ادارى منها هم اللى تتبعوا عورات الناس و ارتكبوا معصيه هم اللى يداروا هم اللى رموكى بالباطل و بلطجوا عليكي هم المجرمين هم اللى يستخبوا مش أنا
أية / بالبساطه دى
عمر / و ابسط كمان بقولك ايه انتى تعملى اللى عليكي و تزاكرى و الباقي ما لكيش دعوه بيه ممكن
أية / انا قايمه اوضب العشا
عمر / احسن برده
أية تبص لعمر و تقوم عمر يتابعها بحزن
………………..
فى شقه على
على بيتكلم فى التليفون و نور قاعده جنيه بتقطع تفاح
على / مش حوار يعني عشان اجرى اقولك عادى
عمر / برده يا على المهم طمنى نور عامله ايه
على / مخضوضه شويه بس انا متاكد انها هتقدر تعديها يعني
نور تحطله حته تفاحه فى بقه
على / صحيح هتيجوا امتى
عمر / يوم الجمعه ان شاء الله هنقعد فى شقه بابا الاسبوعين دول
على / و أية عامله ايه
عمر / كل ما اقول طلعنا خطوه لقدام بلاقينا بنرجع عشره لورا
على / اصبر عليها واحده واحده كل ده هيعدى
عمر / قول يارب
على / خليها بس تخلص امتحانات و انا ابعتها تتفسح فى المكان اللى تحبه
نور تغمز على فى كوعه يضحك
على / و نور معاكوا
عمر / يا عم و هى الفسحه تحلى من غير نور
على يبص لنور
على / بيقولك الفسحه ما تحلاش من غيرك
نور / عم الناس والله
على / هههههههههه … بقولك يا اسطى ما تحاولوا تنزلوا بدرى شويه الاربع و لا الخميس
عمر / ما اوعدكش دى كانت عاوزه تنزل على الامتحان علاطول قولتلها ما اضمنش الطريق
على / حاول بس
عمر / هكلمها بس قولتلك ما اوعدكش … بقولك يا اسطى انا هقفل لحسن بتزغرلى
على / هههههههههههههه سلم على الشهدا اللى هناك
عمر / مردودالك يلا سلام
على / سلام
على يقفل نور تديله طبق التفاح
نور / لما ينزلوا ان شاء الله هبقي اعملهم اكل على التسخين اكيد أية هتبقي مشغوله فى مزاكرتها و مش هتبقي فاضيه تعمل حاجه
على / ان كان على الاكل مقدور عليه … كويس انى افتكرت اما اقوم اكلم الوليه تروح تنضف الشقه و تهويها
نور / تحب اروح اقف على ايدها و اساعدها
على / عشان امك تعلقنى … مودى بنتى تنضف شقه اخوك مش كفايا عليا امك
نور / يا دى ماما اللى انت حاطتها فى دماغك
على يحشر تفاح فى بقه و يبصلها تضحك
نور / هقوم اعملك شاى
نور تقوم و على يكمل اكل
…………………
فى شقه ندى
ندى بترجع فى الحمام حسام يدخل يسندها و يغسلها وشها
ندى / ابعد عنى
حسام / ايه !!!
ندى / لو سمحت يا حسام مش قادره لو سمحت
حسام / مش احسن ما تقعى فى الحمام
ندى / اطلع بره عاوزه استحمى
حسام / طب ما تيجي نجرب مره نستحمى سوا
ندى / انت هتستهبل
حسام / لا والله مش انا اللى بستهبل دا انتى … انتى و نص كمان
ندى / اطلع بره
حسام / هتطرديني من الجنه يعني … مش فاهم انا الجنان ده اخرته ايه
حسام يطلع و ندى تقفل الباب وراه و تقع فى الارض مش قادره تاخد نفسها
……………………
فى شقه أية
نور بتساعد أية يحطوا علب تلاجه مليانه اكل
نور / يومين كدا و لا حاجه اعملك غيرهم
أية / ما فيش لازمه لتعبك ده الاكل ده مفيش اسهل منه
نور / اديكي قولتيها مفيش اسهل منه ياريتني كنت اقدر اساعدك باكتر من كدا كنت عملت
نور تطلع اطباق فويل متغطيه باستريتش تفتح الفريزر و تحطها
نور / مكرونه بشاميل و كفته تطلعيها تحطيها فى الفرن و تاكلى بالهنا و الشفا تنفع فى يوم زنقه او راجعه من امتحان
أية / هو مش انتى المفروض تكونى بترتاحى دلوقت
نور تبص لأية
أية / انا اسفه انا سمعت عمر بيكلم على فى التليفون
نور / لا ما فيش حاجه عادى مش سر
أية / هى الدكتوره قالتلك ايه
نور / انا باخد منشطات و ادويه و
أية / هو مش الدكاتره كانوا قالوا مفيش امل
نور تبص لأية بحزن
أية / انا اسفه انا عارفه انى طربش بس انا افتكرت ان فى امل او علاج او اى حاجه
نور / هى قالتلى ان مستحيل يحصل حمل طبيعي بس ممكن نعمل حقن مجهرى بس طبعا قبل كل ده لازم كورس علاج و حقن و كدا … الحمد لله على مش مقصر خالص و انا كمان محوشه قرشين و ماما قالت لو احتاجتوا هتساعدنا بس الحمد لله على مش مخلينا محتاجين خالص
أية / ربنا يعملك اللى فيه الخير
نور / اقولك حاجه انا عاوزه بس مش معشمه نفسي اوى مش حاسه انها هتجيب نتيجه
أية / احسن حتى ما تتصدميش … يووووووه بقولك ايه انا ما بعرفش اتنيل اتكلم
نور / ههههههههههههههه بالعكس انتى سكر
أية / ما تيجي نطلع نقعد معاهم بره احنا تقريبا خلصنا كل حاجه هنا
نور / تعرفى لو ربنا كرمنى ببنت هسميها أية
أية / انتى بتحاولى تخليني احبك
نور / ياريت
أية / بصي يا نور اولا انا اسفه انا قولتلك انى طربش انا بحبك انتى طيبه و بنت حلال و ما لكيش دعوه بابن …. باخوكى بس انا مش قادره اسامح … صريحه و صراحتى تجرح … بس انا كمان تعبانه
نور / صدقيني هو
أية / ما تدافعيش عنه
نور / كنت هقول … على فكره فهماكى جدا و حاسه بيكي كمان بس على الاقل خليكي زى على و عمر افصلى انا ما عملتلكيش حاجه
أية / هم ما اتاذوش زيي
نور / غلطانه .. هم بس اقوى منك شويه … كلنا بنحاول نبان اقويا و ما بنتهزش بنخبى وجعنا و حزننا جوانا و نبان عادى … انتى بس عشان صغيره مش قادره تعملى ده … زى ندى بالظبط
أية / ندى .. ايوه ندى … هو مش حرام عيشتها دى
نور / دا قرارها
أية / مغصوبه عليه عشان بنتها و عشان الصور
نور / و هو عوضها … بقولك ايه مش قولنا ما ادافعش عنه طب ما ندى بتكلمنى و بتحبني و معتبرانى اختها الكبيره انتى ليه بقي ما تعمليش زيها
أية / ما اعرفش سبيها لله … بصي اوعى تزعلى منى انا اتربيت مقفول عليا ما احتكتش بالناس و صحابى كانوا زمايل دراسه علاقتنا محدوده ما بعرفش اتعامل ما بعرفش اتكلم سامحيني ماشي
نور / على فكره دى مش عيوب و انا يا ستى عمرى ما هزعل منك بس بشرط تعتبريني اختك الكبيره و ما تتكسفيش منى فى اى طلب او اى حاجه تحتاجيها حتى يا ستى لو لقيتي عندك وقت فاضي و حبيتي ترغى ايه رايك
أية / ماشي
نور / يلا هاتى الكيكه بقي و تعالى نقعد معاهم بره شويه
أية / هعملهم شاى الاول
نور / اعملى يا ستى الشاى
أية تبص لنور تلاقيها مبتسمه تبتسم و تروح تعلق على الكاتل
……………….
فى الشركه عند حسام بعد فتره بسيطه
الشركه مقلوبه و ناس بتجرى فى كل حته هدايه واقفه فى البلكونه هدايه بتشرب قهوه حسام يدخل
حسام / كنت متخيل انك اذكى من كدا
هدايه / مش فاهمه
حسام / الشركه مقلوبه و انتى واققه هاديه كدا شيفاه عادى
هدايه / سورى يا حسام اصلي كنت سهرانه طول الليل ما نمتش غير ساعه و نص بس
حسام / خير كان فى حاجه و لا ايه
هدايه تبتسم و تبص الناحيه التانيه عدنان يدخل الشركه و هو متعفرت و بيزعق و فى اتنين موظفين بيجروا وراه حسام و هدايه بيتابعوا
حسام / على ما افتكر يجي
هدايه / على ما عرفوا يوصلوله
حسام / ليه هو كان فين
هدايه / كنا فى فيلته اللى بالزيتونه
حسام / كنا !!!
هدايه / الراجل هيغرم كتير على الاقل نخفف عنه شوى يا حسام
حسام / نخفف عنه … لا ما ليكي حق ما تناميش الا ساعه و نص بس بتشقى والله يا بنتى
هدايه / ما حدش يعرف عدنان قدى كان لازم حد يلهيه لما بيبقي فى شغل تقيل فى المخازن بيتابع الكاميرات بنفسه عملتله موبايله صامت و فضلت فاتحه مليون اب لحد ما فصل و رميته تحت التخت السرير اقصد
حسام / و ما كانش فى حد طبعا يعرف انه هناك
هدايه / لا طبعا انا و هو بس مشيت قبله اكيد على ما لقي الموبايل و فتحه
حسام / ظلمتك طلعتى سهونه
هدايه / تراهن انه هيناديني اخد بخاطره
حسام / مش عارف اقولك ايه
بنت تدخل
البنت / انتى هون و انا قالبه الشركه عليكي
هدايه تبص لحسام
البنت / مستر عدنان طالبك فى مكتبه حالا
هدايه / استر يارب … هيطلع فيا خلقه بقي
البنت تهز كتافها هدايه تدى لحسام المج و تمشي
حسام / بتشقي
البنت / شو
حسام يديها المج
حسام / عن اذنك
حسام يمشي و البنت شايله المج و مستغربه
……………………..
فى شقه ندى
ندى ماسكه الموبايل على السرير و بتكتب على الفايس
ندى / صباح الخير يا بنات انا عارفه ان الاكونت فايك بس انا محتاجه اسال عن حاجه و مش هينفع باكونتى
ندى تمسح و تفكر و تكتب تانى
ندى / صباح الخير يا بنات انا والدتى متوفيه و ما عنديش حد اساله ممكن تساعدونى فى حاجه
ندى تمسح و تكتب
ندى / ممكن اسال البنات المتجوزين على حاجه انا عروسه جديده و ما عنديش حد اساله
ندى تمسح و تحط الموبايل و تقوم تقف فى البلكونه تبص على كافيه زياد تلاقي الحكومه بتقفلهاله تانى تستغرب و تدخل جوه تقعد على السرير تانى
ندى / ما انا اكيد ما كنتش هنزل اطلب منه كتاب فى الموضوع يعني
ندى تمسك الموبايل بسرعه و تفتح جوجل و تكتب كتاب عن و تقف
ندى / طب هو انا بدور على ايه اصلا … يارب بقي
تليفون ندى يرن نور ندى ترد
ندى / ازيك
نور / مال صوتك
ندى / ما فيش حاجه كويسه انتى عامله ايه
نور / لا فى مالك يا نونو
ندى / خلاص بقي يا نور عشان خاطرى
نور / حسام زعلك فى حاجه
ندى تسكت
نور / حبيبتي انا بخاف عليكي من سكوتك ده ليكى مين تحكيله غيرى بس
ندى تعيط
ندى / ما ليش والله العظيم ما ليا
نور / يا قلبي ليه كدا بس … والله كان قلبي حاسس … طب احكيلى فيكي ايه
ندى / عيب
نور / هو ايه اللى عيب
ندى / هو عيب و خلاص
نور / ما انا مش فاهمه … حاجه بينك و بين حسام يعني مكسوفه تحكيها
ندى / هتقولى لعلى
نور / والله ما هقول لحد حتى على مش هنا والله لوحدى تحبى افتحلك الكاميره
ندى / لا مصدقاكى
نور / طب احكى فى ايه
ندى تسكت بتردد
نور / طب هى حاجه فى العلاقه بينكوا يعني
ندى تسكت
نور / ما هى الحاجات دى ما بتتحكيش فعلا يا ندى بس ممكن تتكلمى مع حسام فى اللى مضايقك و انا متاكده انكوا هتلاقوا طريقه … هتوصلوا لحل يعني
ندى / انتى مش فاهمه حاجه
نور / طب احكى … قوليلى يمكن اقدر اساعدك و اقسم بالله ما هيطلع بينا احنا الاتنين
ندى / احلفى
نور / والله العظيم ما هيطلع قولى يا بنتى
ندى تمسح دموعها و تاخد نفس عميق
……………………
فى الصيدليه تحت بيت نور
على مركب باب حديد فيه شباك و فى ناس شغالين جوه بيرصوا الادويه مع الدكتور
الدكتور / الله ينور يا استاذ على
على / بيتهيالى كدا امان الامان لا حد يدخل و لا تحتكوا بحد
الدكتور/ بس افرض حد محتاج حقنه و لا حاجه
على / بصراحه ما اعرفش بقي انت و خيالك بقي انا اكتر من كدا عقلى مش جايبنى
الدكتور / نصرف ادويه و خلاص بقي
على / انت كدا ناقصك اى حاجه
الدكتور / لا احنا هنخلص و من بكره نشتغل عادى ان شاء الله
على / على خيره الله هستاذنك عشان ورايا مشاوير كتير اوى
الدكتور / بالتوفيق ان شاء الله
على يفتح الباب و يطلع يلاقي عمر بيركن العربيه و ينزل هو و أية
على / ايه النور ده
عمر / انتوا عملتوا كدا ليه فى الصيدليه شكلها بقي وحش اوى
على / يا عم مش حاكيلك بقولك ايه خد أية و اطلعوا فوق و انا ساعه زمن هروح مشوار كدا
أية / هو احنا جينا فى وقت مش مناسب … قولتك كلمه قبل ما نيجي
على / انتوا تنوروا فى اى وقت انا بس هوصل حاجات لماما و راجع علاطول و بعدين نور فوق دى هتفرح اوى بمجيتكوا دى
عمر / طب اروح اوديهالها انا عادى
على / قشطه تعال معايا اطلعى يا يويو انتى اقعدى شويه مع نور و احنا ان شاء الله مسافه السكه وراجعين علاطول
أية / اوك تمام
أية تدخل العماره و على و عمر يركبوا العربيه و يطلعوا
……………………..
فى شقه نور
نور بتضحك
ندى / انتى بتضحكى
نور / يا بنتى احلفلك بايه انها حاجه عاديه جدا و بعدين دا جوزك يا بنتى ربنا يعينك يا حسام
ندى / ربنا يعينه هو
نور / امال انتى فاكره الجواز ايه و بعدين يا بنتى انتى ليه معقده الدنيا كدا
ندى / بقولك حاجات غريبه بقولك
نور / انتى بس معقده المواضيع
ندى / برده ما فيش حد بيصدقنى تانى برده ما حدش بيصدقنى
نور / يا ندى اصدقك فى ايه ما انا كمان بيحصلى كدا و كل البنات و الستات بيحصلهم كدا تغير هرمونات و بعدين الحاجات دى مش مقتصره على الرجاله بس ما احنا كمان لينا متطلبات يعني
ندى / ايوه بس انا مختلفه انا مش زيك
نور / قصدك عشان الرحم و كدا … ما فى ستات كتير وصلوا لسن الياس و حياتهم الطبيعيه مستمره و بعدين اللى اعرفه اصلا ان الهرمونات دى بتتفرز من المخ مش من الرحم
ندى / انا بتكلم فى حاجه تانيه خالص انا ما بحبوش
نور / لا اله الا الله بعد كل ده
ندى / هو الحب بالعافيه
نور / انا ما ينفعش اسال فى حاجه زى دى … الموضوع ده حساس اوى … اوووف … ندى هو حسام عنيف معاكى بيضايقك يعني و انتوا سوا
ندى / لا
نور / طب بيضايقك بوجه عام فى مشكله فى الموضوع
ندى / هقول من الاول تانى انا بحس انه غصب عنى
نور / انتى مش قولتى انه بيبقي بمزاجك و برضاكى يبقي غصب عنك ازاى حبيبتي دى هرمونات بس طالبه معاكى شويه نكد كلنا كدا
ندى / عمرك ما هتفهميني و لا تحسي بيا
نور / طب كلمتى حسام
ندى / لا
نور / طب ما تكلميه خليه يجبلك كتب عن الهرمونات و العلاقه و الحاجات دى
ندى / انا حاولت ادور بس مش عارفه ادور على ايه بالظبط
نور / لا ما تدواريش لوحدك فى معلومات كتير مغلوطه فى الحاجات دى خليه يدور معاكى هو كمان دكتور و فاهم روحى لدكتوره نسا و اتكلمى معاها
ندى / هقولها ايه
نور / ما تقوليش خليها هى اللى تتكلم و تشرحلك الموضوع من وجهه نظر طبيه تحبى اسالك الدكتوره بتاعتى
ندى / ازاى يعني و على بيبقي معاكى
نور / لو عاوزه هتصرف هوزع على و اتكلم معاها شويه بس لازم انتى تاذنيلى
ندى / ينفع ؟
نور/ هحاول بس اى كان اللى الدكتوره هتقوله هتصدقيه تمام
ندى / تمام
نور / و انتى كمان ممكن تطلبى من حسام يشوفلك دكتوره عندك قال يعني كشف عادى و اتكلمى معاها
ندى / هحاول
نور / اهدى يا حبيبتي والله عادى انتى بس عشان الحاجات دى جديده عليكي فاتخاضيتي بس
ندى / يمكن … نور بيبو صحيت هروح ابص عليها تمام
نور / تمام يا قلبي هكلمك بكره تانى اطمن عليكي
ندى / ياريت
نور / تمام يا قلبي يلا سلام
نور تقفل
نور / الواحد بيشوف العجب فى العيله دى والله الله يرحمك يا طنط مها
نور تقوم تروح المطبخ
…………………..
على السلم
أية طالعه امانى تفتح الباب و تتخض
امانى / بسم الله الحفيظ خضيتيني
أية تبصلها من فوق لتحت و تطلع
امانى / و دا من ايه ان شاء الله
أية تقف و ترفع النقاب و تبصلها
أية / طالعه اجبلك طاسه الخضه يا طنط
امانى / لا يا اختى كتر خيرك نورتى مصر اسكندريه ضلمت
أية / طب ما تروحى تنوريها لحد ما ارجع و هو اكيد نورك هيبقي اقوى من نورى
امانى / ما ليش تقل عليها مايه مالحه و وشوش كالحه
أية / ما هى المايه المالحه دى بتبقي مليانه يود مفيده … بتنضف الواحد من جوه
أية تشاور على صدرها طالع نازل
أية / و هو تغيرى جو بدل قعدتك فى البيت فاضيه كدا تجرى تفتحى الباب كل ما تحسي بحركه على السلم
مانى / لا و انتى الصادقه كنت طالعه ارمى الزباله
أية / امال انا مش شايفه فى ايدك كيس زباله ليه و لا انتوا الزباله اللى عندكوا مش لاقيين كيس يلمها
امانى / صحيح و انا هستنى ايه من واحده زيك … لا يا اختى كنت فكراكى الزبال قولت اطلع اوقفه لحد ما ادخل اجبله الزباله من جوه
أية / و هو الزبال لما بيجي بيطلع يلم الزباله من الشقق اللى فوق و ما يخبطش عليكي ليه بيقرف من زبالتكوا مثلا … خدى بالك انا طنشت كلمه واحده زيك بمزاجى اصلي مش هبقي انا و الزباله عليكي … عن اذنك
أية تطلع
امانى / ربنا يتوب علينا
أية / ايوه كدا ادعى معايا بدل ما انا بدعى لوحدى
امانى تدخل و ترزع الباب و أية تخبط على شقه نور
……………………….
فى شقه حسام
ندى و حسام قاعدين بياكلوا
حسام / يقفلوها و لا يدعقوها انا كدا كدا بكره كنت ناوى اخدك و نشوف شقه تانيه اوضتين على الاقل يبقي فى اوضه لبيبو مش هتنام جنبنا طول عمرها
ندى / حسام
حسام / قلبي … انا مش عاوزك تقلقي انا حتى مش هجيب سرير بيبي بيبو هتفضل تنام فى حضنك بس اكيد هيجي وقت و تفصليها و مش هنقعد كل يوم ننقل يعني و لا ايه
ندى / لا انا كنت عوزاك … فى حاجه تانيه
حسام / خير يا قلبي
ندى / كنت عاوزه اروح لدكتوره نسا
حسام / نسا !!!
ندى / لو ما عندكش مانع
حسام / ابدا بالعكس اى حاجه تحتاجيها انتى عارفه ما اتاخرش بس انا مش فاهم انتى فى حاجه تعباكى
ندى / ما انت عارف
حسام / لا مش فاهم … فى ايه
ندى / اللى بيحصل بينا يا حسام
حسام / امممم تمام انا اصلا بقيت استتقل حكايه الترجيع اللى بتجيلك دى اخاف على معدتك تتاثر
ندى / مش بتكلم عن ده
حسام / بس دى مش محتاجه دكتوره نسا … ممكن باطنه
ندى / حسام انا بتكلم عن … انت فاهم انا الموضوع نفسه مضايقنى
حسام / مش فاهم
ندى / و عمرك ما هتفهم
ندى تبص الناحيه التانيه
حسام / انتى بجد بتتكلمى فى الحكايه دى … دا على اساس انى بسقيكي حاجه اصفره مثلا و لا اكون بغتصبك و انا مش واخد بالى … ما تبطلى مكابره بقي
ندى / انا مش بكابر انا ليه ما بفكرش فى الحكايه دى نهائي و نفره منها الا فى الوقت ده
حسام / هههههههههههه و هو المفروض الانسان المفروض يبقي بيفكر فى الحاجات دى طول الوقت .. لا لو رايحه للدكتوره عشان كدا يبقي بلاش احسن اجبلك صحه منين انا هههههههههههههه
ندى / انا ما بهزرش
ندى تخبط على الترابيزه و تقوم
حسام / خلاص نروح هنخسر ايه يعني
صوت ندى / مش عاوزه منك حاجه
حسام يقوم يدخل الاوضه ندى تبص الناحيه التانيه
حسام / خلاص بقي ما تزعليش على فكره انا جوزك يعني عادى لما نهزر و نقبح مع بعض
ندى / و انا ما بحبش القباحه
حسام / و انا بحبك فى كل الحالات … انا واقع و النهرده كان يوم صعب فى الشركه و تعبان جدا
ندى تبصله
ندى / خير
حسام / مخزن الشركه اتسرق
ندى / يا خبر و انت عملت ايه
حسام يروح يقعد جنبها
حسام / حققوا معانا كلنا و انا بالاخص لانى لجل بختى الاسود كنت عامل طلبيه محترمه و وصلت قبل السرقه بيومين و لاسف ما اتسلمتش فى معادها و اتسرقت
ندى / و ما اتسلمتش ليه
حسام / هو انا هعمل كل حاجه لوحدى انا طلعت اذن الصرف بس العربيه اللى كانت هتنقل الادويه اتاخرت بسبب حادثه على الطريق فالعمال كانوا مشيوا و تانى يوم كان اجازه الويك ايند بس
ندى / طب انت ايه موقفك من اللى حصل ده
حسام / مش عارف انا المفروض عملت اللى عليا بس انتى عارفه احنا فى الاول و الاخر شويه موظفين القرارات دى بياخدها الناس اللى بتنام فى بيوتها
ندى / ان شاء الله ربنا هيكرمك انت بتتعب فى الشغل و اكيد بتتقى ربنا عشان حبيبه
حسام يبوس ايدها
حسام / اهو ثقتك فيا دى و الكلمتين الحلوين دول ضيعوا تعب اليوم كله تحبى تخرجى
ندى تهز راسها لا
حسام / طب تحبى اشغل فيلم و اعمل فشار و نقعد انا و انتى شويه مع بعض و بيبو نايمه
ندى / انا مش جعانه
حسام / على الاقل نشرب نسكافيه فى البلكونه الجو حلو اوى ما تبقيش قفيله كدا
ندى / اوك تمام
ندى تقوم
حسام / خليكي انا اللى هعملك
ندى / هروح اشيل الاكل و اجى اساعدك
حسام يبتسم و يقوموا هم الاتنين و يطلعوا بره
……………………
فى شقه نور
نور / طب الحمد لله ادى اللى كنتى خايفه منه
أية / الحمد لله عدت الماديه الجايه بقي انا مزكراها كويس اوى
نور / برده اوعى تتغرى لازم تعملى اللى عليكي
أية / ايوه انا نفسي اوى اجيب تقدير و افرح عمر
نور / ان شاء الله هتجيبي ما دام بتزاكرى و تعملى اللى عليكي اكيد هتجيبي
أية / على فكره انا جبتلك العلب الفاضيه بس نسيتها فى العربيه مع عمر راح مع على لطنط ليلى
نور / كويس بكره ان شاء الله اتبلك
أية / لا يا نور كفايا تعبك معايا و بعدين دى اخر ماده و انا مزكراها كويس و ان عصلجت يعني ابقي اطلب دليفرى
نور / يا ستى ابقي خديهم معاكى اسكندريه
أية / انا والله لسه عندى اطباق كتير من الفويل فى الفريزر بالله عليكي ما تتعبى نفسك
نور / و لا تعب و لا حاجه اقولك انا كدا كدا متبله فراخ جوه خديها و انتى مروحه و ابقي اعملى غيرها
أية / عمرى والله ما هاخد حاجه كتر خيرك اوى لحد كدا كفايا جيبالك الحلل و العلب فاضيه
نور / كتر خيرك انك غسلتيها دى عندى بالدنيا حكم انا و المواعين بينا مشاكل وصلت للمحاكم
أية / ههههههههههههههه حاسه بيكي اوى
نور / هقوم ابص على المفروم فك و لا لا اصبعها و اعمل كفته نتعشي سوا
أية / اراهنك انهم هيجيبوا اكل معاهم
نور / و ماله دوقى بقي اكلى و اكل بره و احكمى بنفسك
أية / انتى تكسبى طبعا
نور / حبيبي يا يويو
نور تقوم ثوانى و أية تقوم وراها
………………….
فى شقه جديده فى لبنان بعد فتره بسيطه
ندى بتفرش الهدوم فى الدولاب حسام يدخل
حسام / كدا المطبخ اخر حلاوه كامل من كله و الحمام شرحه
ندى / انا حطيت كل حاجه مكانها فاضل بس الكام حته دول
حسام / حلو اوى انجزى بقي عشان ننزل نستكشف المنطقه و بقولك ايه انا مش هقضي عمرى فى لبنان تنطيط اديكي عرفتى بنفسك انا ليه اتعصبت من حوار زياد مش هنكرره
ندى / اللى تشوفه
حسام / مش اللى اشوفه الصح … انا عشت فى الغربه عمرى كله و عاشرت ناس الحيوانات اشرف منهم و انتى يا قلبي لسه نونو ما بتعرفيش تتعاملى مع الاشكال دى و لا تفهميهم
ندى / كدا كدا مش ناويه اتعرف على حد انا نزلت ابليكاشن عليه كتب كتير هبقي اتسلى
حسام / حلو القرايه و الثقافه حلوين … القرايه احسن حاجه تشغلى بيها وقتك و عاوز اقولك حاجه
ندى تبصله
حسام / على ناصيه الشارع فوق الصيدليه فى جيم حلو اوى انا سالت عليه … هو صحيح مشترك بس انتى ممكن تحجزى مدربه برايفت و تعيشي و ان كان على بيبو مش عاوزك يكون عندك فكر … فى حضانه
ندى / حبيبه مش هتفارقني
حسام / ما هى مسيرها فى يوم هتروح حضانه و بعدين دول ساعتين زمن تفكى فيها عضلاتك هو انتى هتسبيها اليوم بطوله … يا ستى بلاها الحضانه وفرتى المصاريف هبقي اقعدلك انا بيها
ندى / هو انا طخنت اوى كدا
حسام / لا اله الا الله مش انتى اللى كنتى عاوزه تنزلى جيم و عماله ترقصي زومبا و بومبا فى البيت بالنسبال انتى الانثى كما يجب ان تكون
ندى تبص لحسام بطرف عينها
حسام / انا عاوزك تدلعى انبسطى شوفى نفسك فى ايه و اعمليه كوافير سبا جيم جاكوزى شوبينج قوليلى ايه اللى يسعدك و انا هعمله
ندى / هو انت اترقيت و انا ما اعرفش و لا سرقت بنك و لا انت ايه حكايتك
حسام / سرقت بنك !!! يا بنتى انا مرتبى معروف و على يدك بينزل فى الفيزا اوتوماتيك … الحكايه و ما فيها انى دخلت جمعيه مع زمايلى فى الشركه و قبضتها الاول … و بعدين الحق عليا يعنى انى عاوز ابسطك يا ندى انا ما عنديش اغلى منك
ندى / بس احنا لسه ناقلين و اكيد الشقه دى كلفتك مبلغ محترم
حسام / يا ستى ما تشغليش انتى بالك الحمد لله الصيدليه فى مصر كمان بتجيب و الدنيا ماشيه
ندى / بتجيب ايه مش كان فى حوار و الصيدليه اتكسرت و لا انت مش ناوى ترجع لعلى فلوسه
حسام / والله ما حدش قاله يدفع من جيبه مش كفايا ضيع عليا فلوس التامين و بعدين ما هو بياخد من وراها قد كدا كل شهر و لا هى نور بتشتغل ببلاش
ندى / بس على ما بياخدش من نور جنيه و اللى اعرفه كمان انه بيديها كل اللى بتطلبه و بزياده
حسام / الا هو على ده تعب فى الفلوس دى على كسب فلوسه فى بنك الحظ راجل اهبل خرف فى اخر ايامه او على بقي بطريقه ما غسله مخه
ندى / على
حسام يحط صابعه على بق ندى تسكت و تبصله تلاقيه مبرقلها تخاف
حسام / ان كان هو بيقدم لنور جنيه ما تعبش فيه انا بحط تحت رجليكي الف طافح فيهم الدم
ندى تبص لحسام
حسام / انا بتمنالك الرضا ترضي انا اللى مستعد ادفع عمرى كله عشان بس نظره و لا ابتسامه و لا حتى لحظه صفا لو هتدافعى عن حد يبقي انا
ندى / احنا كنا بنتكلم عادى
حسام / الكلام عادى بس لما بيبقي طالع من شفايف الحلوه دى ما بيبقاش عادى النار بتقيد جوايا
ندى / انا … انا خلصت هجهز شنطه حبيبه و نخرج ايه رايك
حسام / تمام هروح اقفل الشبابيك و ارجعلك
ندى تهز راسها حسام يطلع بره ندى تقعد و تاخد نفسها
…………………………
فى المحل عند على بعد فتره
على لابس الافارول و واقف قدام سيخ الشاورما بيعبى ساندوتشات و فى زحمه جامده تليفونه يرن يكنسل و يكمل شغل و فى وسط الزحمه يلمح ولد و بنت صغيرين واقفين بعيد بيبصوا على الاكل يفضل يشتغل و هو متابعهم واقفين يبصوا غلى الاكل على ينادى
على / احمد … احمد
احمد يعتزر للناس و يروح لعلى
على / الولدين اللى هناك دول
احمد / دول ولد و بنت يا رياسه
على / مش وقتك اخلص روح ناديهم و لو جعانهم دخلهم و اكلهم اللى يطلبوه
احمد / يجعله فى ميزان حسناتك يا رياسه
احمد يجرى يروح للاطفال و يوطى عليهم و على متابع احمد يرجع بيهم و يدخلوا المحل على يتنهد و يكمل شغل
………………….
- يتبع الفصل التالي اضغط على ( رواية سلف و دين ) اسم الرواية