رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الواحد و الخمسون 51
على لابس الافارول و واقف قدام سيخ الشاورما بيعبى ساندوتشات و فى زحمه جامده تليفونه يرن يكنسل و يكمل شغل و فى وسط الزحمه يلمح ولد و بنت صغيرين واقفين بعيد بيبصوا على الاكل يفضل يشتغل و هو متابعهم واقفين يبصوا غلى الاكل على ينادى
على / احمد … احمد
احمد يعتزر للناس و يروح لعلى
على / الولدين اللى هناك دول
احمد / دول ولد و بنت يا رياسه
على / مش وقتك اخلص روح ناديهم و لو جعانهم دخلهم و اكلهم اللى يطلبوه
احمد / يجعله فى ميزان حسناتك يا رياسه
احمد يجرى يروح للاطفال و يوطى عليهم و على متابع احمد يرجع بيهم و يدخلوا المحل على يتنهد و يكمل شغل
………………….
فى شقه حسام
حسام واقف فى البلكونه بيتكلم فى التليفون
حسام / انتى عبيطه لا طبعا
هدايه / يا ابنى انت ما لكش دعوه بحاجه
حسام / انتى اصلا اش عرفك ان
حسام يبص حواليه مفيش حد
حسام / ما يمكن تليفوناتنا متراقبه
هدايه / ما قلبك خفيف كدا ليه هى اول مره
حسام / لا بقولك ايه مش لبانه هى
هدايه / ما تبقاش فقرى
حسام / ابقي فقرى احسن ما ابقي سوابق و بعدين ايه لحقوا يصرفوا البضاعه دى كلها امتى
هدايه / ههههههههههه صحيح ما يحسد المال الا صحابه يا قلبي انت ليه مش قادر تفهم ده رزق
حسام / اللهم قوى إيمانك
هدايه / انت خايف من ايه بس على العموم يا سيدى ما تقلقش المرادى هنغير الطريق هنقلب العربيه على الاوتوستراد و اولاد الحرام مفيش اكتر منهم
حسام / طب و الفلوس
هدايه / زى المره اللى فاتت بالظبط و الدفع برده مقدم بمجرد دخول البضاعه المخازن
حسام / و مين هيطلب الادويه دى هتحتاجى مشترى وهمى
هدايه / و هو فى مشترى وهمي يشترى الكميه دى كلها
حسام / امال هتطلعيها من المخازن ازاى
هدايه / لا لحد هنا و دورك خلص دا دور ناس تانيه
حسام / ازاى يعني
هدايه / انت شاغل نفسك ليه انت مش نسبتك ثابته و كدا كدا فى الامان
حسام / انا عارف ان اخرتى على ايدك
هدايه / عزك على ايدي عزك يا حسام عزك
حسام / هو انتى مش خايفه عدنان يفلس و نبقي فى الشارع
هدايه / عدنان مين اللى يفلس ههههههههههههه روح لمراتك يا حسام روح ضحكتنى و انا مش قادره خالص
حسام / صبرنى يارب
حسام يقفل يلاقى ندى وراه شايله مجين نسكافيه يتخض
حسام / انتى هنا من امتى
ندى / لسه داخله … ماله عدنان بيه
حسام / ماله عدنان بيه ؟؟
ندى / انت مش بتقول هيفلس و يطردكوا كلكوا
حسام / اااه اه .. مشاكل فى اسهم الشركه فى البرصه بعد الحادثه بتاعه السرقه … بس الحمد لله طمنونى يعني ان الموضوع تحت السيطره
ندى / الحمد لله … كنت بتكلم مين بقي … هدايه ؟
حسام / ايه ! اه … هدايه اصلها قريبه مستر عدنان يعني فبتبقي عارفه الزتونه المستخبيه و كدا
ندى / انا ما بحبهاش البنت دى بحس ان فيها حاجه غلط
حسام / و احنا مالنا بيها بس احنا يهمنا الشغل و بس و هو انا اللى بنقى زمايلى فى الشغل الواحد لازم يتعايش يعني
ندى / معاك حق … اشرب اشرب قبل ما يبرد
حسام / تسلم ايدك الواحد فعلا كان محتاجه
ندى / الف هنا
حسام و ندى يقعدوا يشربوا النسكافيه
…………………….
فى المكتب عند على
البنت نايمه على الكنبه و الولد قاعد جنبها على يدخل الولد يقوم يقف
على / ايه ده هى نامت
الولد يبص لعلى و يبص للبنت و يسكت
على / استنى انا عندى هنا بطانيه لوقت عوزه
على يفتح ضرفه و يطلع كيس و يطلع منه بطانيه قديمه و يلف بيها البنت و يشيلها
الولد / هو انت هتودينا ملجا
على / انت عاوز تروح ملجا
الولد يهز راسه لا بحزن
على/ طب تحب تيجي معايا البيت انا عندى اوضه فيها لعب كتير اوى
الولد / انت مش هتخطفنا صح
على / لا يا حبيبي مش هخطفك انت خايف منى
الولد / ماما قالتلى ما اتكلمش مع حد غريب و قالتلى اوعى اى حد يقولك هديك حاجه حلوه تروح معاه
على / لو تحب اوصلك لمامتك
الولد / ماما ماتت
على / و بابا
الولد يسكت
على / انت كنت عايش فين
الولد يسكت
على / انت مش عاوز ترجع صح
الولد يهز راسه لا
على / طب انا مش هاذيك لا انت و لا اختك تحب تيجي معايا
الولد يهز راسه اه
على يمسك ايد الولد و يمشوا سوا يفتح العربيه و ينيم البنت و الولد يركب و على يربطله الحزام و يلف الناحيه التانيه تليفونه يرن يبص فيه و يتنهد
على / انا اسف جدا اقسم بالله اتلخمت فى الشغل
نور / و لا يهمك يا حبيبي المهم انك بخير
على / الحمد لله النهرده ما كناش ملاحقين على الشغل و مصطفى كان عنده حوار كدا فمسكت مكانه و ما عرفتش اخلع والله على رجلى من ساعه ما سبتك
نور / احضرلك العشا على ما تيجي؟
على / حضريلى الحمام … مايه سخنه و اناااااام
نور / عنيا
على / تسلملى عنيكي
على يقفل و يركب يلاقي الولد نايم يتنهد و يسوق
…………………
فى شقه عمر
أية واقفه فى الحمام فى ايدها اختبار حمل و باين عليها التوتر
أية / نور بقى نور ارجوك
عمر يخبط على الباب أية ترمى التيست فى باسكت الزباله و تفتح الباب و هى مبتسمه
عمر / طولتى اوى فى حاجه و لا ايه
أية / لا عادى كنت طالعه اهو … انت عاوز الحمام و لا ايه
عمر / لو ما عندكيش مانع
أية تبتسم و تطلع عمر يدخل و يقفل الباب
………………
فى شقه على
على يغطى الولد و البنت و يطلع و يقفل الباب و نور واقفه و بصاله و ساكته
على / انا عارف انى كان المفروض استاذنك الاول بس
نور / شوفت فيهم نفسك و انت صغير
على / الولد مش بيتكلم ما فهمتش منه غير ان مامته متوفيه و كانوا جعانين و البنت زى ما انتى شايفه خفت عليهم من الشارع … لسه صغيرين اوى
نور / تمام
على / لو تحبى اشوفلهم مكان تانى
نور / انت عاوزهم يمشوا
على / على الاقل يكونوا فى مكان ابقي مطمن عليهم فيه خصوصا هى هو قالى انه مش عاوز يروح الملجا … تعرفى انه فضل صاحي جنبها و هى نايمه … كان خايف ينام
نور تبتسم
على / تقلت عليكي اوى انا
نور / يمكن ده مش وقته … بس انت مش هتصلح الكون
على / ما كانش ينفع اسيبهم
نور / فاهمه بس انت لو مشيت بنفس العقليه دى هتلم كل اطفال الشوارع عندنا هنا
على يبص لنور و صمت يكسره على بعد تفكير
على / طب كان المفروض اعمل ايه
نور / و لا حاجه انا لو مكانك كنت هعمل نفس اللى عملته بالظبط … ادخل خد حمامك … شكلك مرهق اوى … بكره لما تهدى و ترتاح نبقي نفكر بهدوء هنعمل معاهم ايه … بيتهيالى ان الولد … هو انت ما تعرفش اساميهم ؟
على يهز راسه لا بخجل نور تبتسم
نور / دول فى سن مدارس و مسؤليه كبيره و
نور تتنهد
نور / خليهم
على يبتسم
نور / خليهم لحد ما تلاقيلهم مكان مناسب او خليهم يملوا علينا البيت و نكسب فيهم ثواب عادى
على / بجد يا نور !! و لا بتقولى كدا عشان ترضيني و خلاص
نور / و انا ممكن اعوز ايه اكتر من انك تكون مرضي و سعيد
نور تحط ايديها على وش على و تبصله بحب
نور / دا غير انى اكيد بحب الاطفال اوى
على / يمكن يكون ربنا بعتهوملى مخصوص لسبب
نور / لانك عمرك ما هتغمض عينك عنهم و تعمل مش شايفهم
على يبص فى الارض نور تشاور على الحمام
نور / على الحمام
على يبصلها يلاقيها مبتسمه اوى يبتسم و يحيها ميرى
على / تمام يا فندم
على يروح الحمام و يقفل الباب نور تروح تفتح الباب و تبص على الاطفال نايمين دمعه تنزل من عنيها تمسحها و تقفل عليهم الباب و تروح اوضتها
…………………….
فى الشركه عند حسام
حسام / لا بقولك ايه انا اخر حاجه محتاجها فى حياتى ان مراتى تعرف اى حاجه
هدايه / هههههههههه هتبلغ عنك و لا ايه
حسام / لا بس هتزعل
هدايه / اوووووف هاو سويت … للدرجادى ما بتستحملش زعلها
حسام / انا و ندى حب من ايام الطفوله … انتى عرفتى منين ان فى بينا مشاكل
هدايه / اقولك ايه بس … قولتلك قبل كدا ان الهابى ايفر افتر دى فى الافلام بس … طول ما انت مش طايلها هتفضل تجرى وراها تجيب هدايا تفسحها تدلعها … بمجرد ما تشبع عينك هتدور على البديل
حسام / دا انتى متخزوقه لما بانلك صاحب … ما سمعتيش عن زوج مخلص ابدا .. عن راجل بيحب مراته … على فكره والدى كدا عمره ما بص لواحده غير امى و بيتمنالها الرضا ترضي
هدايه / يبقي اكيد مامتك مش مريحاه هههههههههههههه
حسام / على فكره ندى بتحبنى و بتهتم بيا جدا هى بس اتربت فى بيئه مقفوله و انا برده مش هنكر انى … المهم امممم
هدايه / المهم انك قدرت تسيطر فى الاخر
حسام / وحتى دلوقت برده بتمنالها الرضا ترضي و لو اطول اجبلها نجمه من السما هجيبها
هدايه / الكوفى بريك خلص المره الجايه ابقي احكيلى ليه سبتها فى الامارات و رجعت
حسام / كنت غبى اتخانقنا فتحت الباب و العربيه ماشيه وقفت نزلت روحت المطار استنتها ماجتش ركبت الطياره و رجعت
هدايه / ما قلقتش عليها
حسام / قولتلك كنت غبى بمجرد ما نزلت من العربيه الطلق اشتغل ما جاتش عشان بتولد و بعدين حصلت مضاعفات و شالت الرحم
هدايه / قمت انت متجوز
حسام / لا … انا اتجوزت … كانت ظروف خاصه و لما ندى رجعت طلقت مراتى و رجعت لندى
هدايه / طب و مراتك التانيه ذنبها ايه
حسام / قولتلك ظروف خاصه و صدقيني انا ما ظلمتهاش بالعكس انا كنت راجل معاها اوى … علاقتى بيها كانت عقاب من ربنا و تكفير عن اللى عملته فى ندى
هدايه / انا هروح اشوف شغلى لو حبيت تتكلم انت عارف انا بسهر فين
حسام / لو كان الكلام بيريح
هدايه / لو الكلام مش هيريحك انا متاكده انى … و لا بلاش انت راجل مخلص هههههههههههههههه
حسام يبصلها
هدايه / ما تقلقش سرك فى بير معايا … عارف ليه
حسام / ليه
هدايه / عشان فى بينا مصالح مشتركه هيكون ايه تانى هههههههههههه عن اذنك
هدايه تمشي و حسام واقف متابعها يروح على مكتبه يحط المج و يقعد
………………….
فى شقه على
الولد و البنت قاعدين بياكلوا على السفره باب الشقه يتفتح و على يدخل شايل شنط كتير
على / الله انتوا صحيتوا
نور تطلع من المطبخ شايله صينيه عليها كبايتين لبن تحطهم قدام الاولاد
نور / روحت فين بدرى كدا
على / اما جبتلكوا شويه هدوم
على يطلع فستان جميل من الكيسه البنت تقوم تجرى عليه
على / مش لما تقوليلى اسمك الاول
نور / اسمها نغم
على / الله اسم حلو اوى
الولد / و انا يس
على / احلى اسم ده و لا ايه … لما تخلصوا فطار تاخدوا غياراتكوا و تستحموا و تسرحوا و اخدكوا افسحكوا ايه رايكوا
على يسيب الاكياس و يشيل نغم و يروح يقعد و هى على رجله و يسقيها اللبن
نور / يس حكالى عن اهله
على يبص لنور
نور/ جوز عمته كان بيهدده انه يوديهم ملجا و يفرقه عن اخته فاخد اخته و هرب
على يبص ليس
يس / دا راجل شرير كان بيضربنا و يشد نغم من شعرها
نور / زمانهم بلغوا البوليس يا على و اكيد بيدوروا عليهم فى كل حته
على ساكت و بيسقى نغم اللبن
نور / زى ما قولتلك دول فى مدرسه حرام السنه تروح عليهم
نغم / انا فى الحضانه
نور تبصلها و تبتسم
نور / خدتى ايه فى الحضانه
نغم / اخدت اى بى سى و بعرف اعد من وان تو تن
نور / شطوره
نور تديها قطمه من ساندوتش
يس / و بتعرف بالعربى كمان
على / و انت يا وحش
يس / انا اخدت جدول التلاته
على يبصله باستغراب
نور / يقصد جدول التلاته
على / طب تلاته فى تسعه بكام
يس / سبعه و عشرين
على / لا دا احنا نروح الملاهى بقي … نروح الملاهى يا نغم
على يسقيها و هى مبسوطه يبص لنور
نور / هعملك شاى
نور تروح المطبخ على يبص للاولاد
على / انا عاوز الاكل ده كله يتمسح
نغم / هو انا ممكن اخد التيدي بير اللى جوه
على / هو مش بتاعى بس ايه رايك اجبلك واحد ليكي مخصوص
نغم تضحك
على / احلى دوبى لاحلى نغومى
نغم تخلص كبايه اللبن على يشيلها يحطها على الكرسي
على / هجهز الحمام كملوا فطاركوا
على يروح ناحيه الحمام يعدي على نور فى المطبخ يبصلها فى صمت و يتنهد و يروح الحمام و هى متبعاه فى صمت
………………………
فى شقه ندى
ندى بتسرح شعرها و تبص على حبيبه
ندى / طول عمرى نفسي اعمله اصفر تفتكرى هيليق عليا
حسام يفتح الباب و يدخل شايل علبه جاتو
حسام / قلبى انا جيت
ندى تشيل حبيبه و تطلعله حسام يبوس حبيبه على ايد ندى
حسام / قلب بابا صاحى … جبتلك جاتو زى ما بيقولوها و لقيت عندهم كبات فيها حاجات شيكولاته كدا قولت مصلحه تعدل مزاج حبيبي
ندى تاخد منه العلبه و تشيله حبيبه
ندى / والله انا عمرى ما هخس بالشكل ده
حسام / تخسي ايه دا انتى مزه يا شيخه كلى و انبسطى
ندى / انا عملالك فته
حسام / واو … امال مش شامم ريحه التقليه ليه
ندى / عشان حضرتك جاى متاخر كنت شغلت الشفاط و فتحت الشقه تتهوى و رشيت معطر و انا بروق
حسام / لا دا احنا اطورنا خالص
حسام يروح المطبخ و حبيبه على ايده يعرى الحلل فيهم طاسه جواها لحمه محمره يبص لندى بانبهار
ندى / لتكون فاكر
حسام / فاكر ايه انا عمرى ما شكيت فى قداراتك اصلا فاكره لما كنت بقولك بكره تتعلمى شوفتى بقي انى عارفك و عارف قدراتك اكتر منك
ندى تفتح التلاجه و تحط العلبه
ندى / وسع بقي اما اغرف عشان انا ما اتغديتش اكلت سلطه و خس على اساس دايت و كدا بس ما دام هنبوظ يبقي ادوس بقي
حسام يهشك حبيبه و يلاعبها
حسام / دا دا ده دا دا دايت وحشه دا دا قلب بابا امتى يكبر و ياكل فته
حسام / هروح اغير هدومى و ارجعلك
ندى تبتسم حسام ياخد حبيبه و يطلعوا بره المطبخ
……………………
فى شقه امانى
امانى / هو انت ايه حكايتك كل يومين نلاقيك جاى و ساحب حد فى ايدك هو الفراغ قاتلك للدرجادى
على / اطلعى مع يس و نغم يا نور لو سمحتى
امانى / يطلعوا فين … انت فاكر نور دى ايه هى عشان غلبانه و بتسكتلك
على / انا بحاول على قد ما اقدر اراعى ان حضرتك قد والدتى
امانى / طب امك و قولنا ماشي انما عيال من الشارع ليه
على / انا حر
امانى / حر على نفسك
نور / انا راضيه يا ماما لو سمحتى
امانى / ما يمكن العيال دول تبع تنظيم عصابى يفتحوا الباب للحراميه و انتوا نايمين
نور / لو سمحتى يا ماما لو سمحتى
امانى / طب ما انتى بتحاولى و بتتعالجى مش صابر عليكي ليه بيضغط عليكي ليه اكيد ده زن امك
على / لو سمحتى ما تدخليش ماما فى الموضوع
امانى / العيال دى ترجع مطرح ما جبتهم و قال على راى المثل يا مربى فى غير ولدك يا بانى فى غير ملكك
على / انا حر ان شالله احول شقتى لملجا انا حر
امانى / دى لما تبقي شقتك يا عنيا
نور / ماما
امانى / اسكتى انتى هو فاكرك ايه … روح افتح ملجا لعيال الشوارع و هات ناس و شغلهم انما بنتى لا … هو ابوكى اتاخر ليه
على / انا طالع ارتاح .. عن اذنكوا
امانى / انا قولت
على / عن اذنكوا
على يفتح باب الشقه و يشاور للاولاد يجروا على فوق على يبص لنور و يقفل الباب و يطلع
نور / ليه كدا يا ماما ليه
امانى / هتفضالى تتنازلى لحد امتى هتفضلى مطاطياله لحد امتى … هيفضل يضغط عليكي و فى الاخر
نور / هو عمل ايه غلط بس الحق عليه انه صعب عليه عيلين ايتام
امانى / دا دور الحكومه مش دورنا
نور / يعني يرميهم اهو فرحهم لحد ما يفكر بهدوء هيعمل معاهم ايه
امانى / بكره يجي يقولك العيال دخلوا قلبي و فتحوا نفسي على الخلفه … داهيه ليكونوا عياله من واحده متجوزها من ورانا
نور / انتى بتقولى ايه بس
امانى / شكلى غلطت لما اتسرعت و جوزتك ابن الشوارع ده
نور / عيب كدا يا ماما
امانى / اخوكى كان معاه حق انا اللى ما سمعتش كلامه
نور / انا طالعه عن اذنك
نور تفتح الباب و تطلع بره و تقفله وراها و تقعد على السلم تعيط قدام شقه ندى ثوانى و تلاقى على بيقعد جنبها تمسح دموعها ياخدها فى حضنه و يطبطب عليها تعيط تانى
…………………….
فى شقه حسام
حسام بيتكلم فى التليفون
حسام / مش هنخلص بقي من سى زقت و مواويله
امانى / يعني اعمل ايه اطق لا ابوك و لا اختك قادرين يقولوله كلمه و دا طايح مش عامل حساب لحد
حسام / والله انا فاكر انى قولت انه ربايه شوارع و كنت رافض الجوازه دى و حضرتك اللى كنتى بتقولى فيه شعر
امانى / انا عوزاك تكلم اختك
حسام / فات المعاد و البندقيه اتكلمت
امانى / يعني ايه
حسام / يعني دنجوان عصره و اوانه عمل لبنتك غسيل مخ
امانى / حقه طول عمرها هبله
حسام / و بعدين انا اصلا اقدر اعمل ايه فى حوار زى ده اساسا دى حياتهم و هم احرار فيها
امانى / يعني هتسكت انت كمان
حسام / اعمل ايه طيب قوليلى اقدر اعمل ايه و انا اعمل
امانى / كلم اختك
حسام / حاضر يا ماما عنيا انتى بس تؤمرى
امانى / خوفها … قولها ان العيال دى … اى حاجه انا عارفه انك هتعرف تتصرف
حسام / حاضر اقفلى هكلمها و اشوف
امانى / كلمنى تانى
حسام / حاضر يا ماما اقفلى بقي
امانى / سلام
حسام يقفل و ينفخ ندى تدخل الاوضه و تقف على الباب
حسام / الباشا راح جاب عيلين من الشارع و قرر يربيهم
ندى / مش مستغربه
حسام / ابو قلب حنين مش قادر يقعد كام شهر من غير خلفه
ندى / لا و انت الصادق مش قادر يشوف حد بيعيش اللى عاشه
ندى تمشي حسام ينفخ و يقوم وراها
حسام / انتى بتدافعى عنه على اساس ايه
ندى / على اساس انه طفل كان بيشتغل عشان يجيب مصاريفه و مصاريف اخته الصغيره اللى ماتت بدافع عنه لانه كان بينام على الارض
حسام / و ما دام هو جامد كدا و ما حصلش ما يروح يتبرع بفلوسه اللى ما تعبش فيها دى للجمعيات الخيريه و دور الايتام
ندى / ابقي روح قوله
حسام / طب ما تقوليله انتى اكيد الكلام منك هيبقى مختلف
ندى / انا مش هرد عليك عشان انت شكل الحاله جتلك و هتطلعها عليا
ندى تيجي تمشي حسام يمسكها من ايدها جامد
حسام / استنى هنا انا بكلمك
ندى تزقه
ندى / ايه هتضربنى هنا كمان … اضرب … يلا اضرب اهو هنا ما حدش هيحوش عنى … اضرب يمكن اموت فى ايدك المرادى و نرتاح كلنا … اضرب ساكت ليه اضرب
حسام / ما كنتش هضربك
ندى / لاخر مره اللى بيني و بين على انتهى … تلميحاتك دى تخليها لنفسك و لو حضرتك مش واثق فيا فياريت تتعالج لان زى ما انت وافقت و سكنته فوقى انا سبت البلد كلها و جيت معاك هنا … سبت ابويا العاجز و هربت معاك لهنا فارحمنى بقي
ندى تعيط يحاول يحضنها تزقه يحضنها تانى تسكت
حسام / انا بغير عليكي من حبى فيكي مش عشان مش واثق فيكى
ندى / انا تعبانه و داخله انام تصبح على خير
حسام / و انتى من اهله
ندى تدخل و حسام متابعها يتنهد
……………….
فى شقه على
نور تطلع من المطبخ تدخل اوضه الاطفال تلاقى على بيغطيهم يطلع و يوارب الباب و ياخد نور و يدخلوا اوضتهم و يقعدوا فى صمت
على / و لسه لما ماما تعرف
نور / افرض اهل العيال دى بلغوا البوليس يا على
على / انا لو سلمتهم هيرجعوهم ليهم و ساعتها العيال دى هتتاذى و يا عالم لو هربوا تانى يقعوا فى ايد مين
نور / و مدارسهم و حياتهم على الاقل حاول توصل لحل شوف المحامى او اسال حد
على / لو انتى مش عوزاهم
نور / انا يهمنى مستقبلهم العيال دول خسروا كل حاجه على الاقل ما يخسروش بكره … انا عوزاهم و هربيهم بس
على / حاضر يا نور
نور / ربنا وحده اللى يعلم انا اتعلقت بيهم قد ايه بس انا مش انانيه يا على
على / و لا انا انانى العيال دى اختارت الشارع على عيشه بتجبرونى ارجعهم ليها
نور / راجل غبى بيحاول يربى
على / دول كانوا بيضربوهم
نور / لو كل اب ضرب ابنه ابنه هرب البلد كلها هتبقي اطفال شوارع و بعدين ما احنا ياما اهالينا ضربونا
على / انتى بتقولى ايه
نور / انا مش ببرر للضرب لو عاوز تريح ضميرك دور على اهلهم و اسال عنهم لقيتهم قلقانين عليهم و خايفين و ندمانين يبقي رجعهم و اصلح بينهم و تابعهم لو طلعوا بقي
على يبصلها
نور / اسال محامى تقدر تعمل ايه بحيث ما تجبش لنفسك مشاكل
على / بشوف فيهم نفسي
نور / عارفه
على / مش عاوزهم يتوجعوا زيي بس
نور تحوط وش على بايديها و تقرب
نور/ عارفه و لما تسال عن اهلهم هروح معاك و استاذنهم نخليهم عندنا لو تحب … انا بحب الاطفال اصلا و العيال مش شاء الله قمرات و مؤدبين انا مش معترضه بس ساعتها يبقوا بيروحوا مدرستهم و نشوفلهم مدرسين يتابعوهم و اشتركلهم فى النادى يلعبوا رياضه و يبقوا ابطال بس نمشي صح … نعمل اللى علينا يا على
على يفك ايد نور و يبصلها و يروح ينام على طرف السرير و يديها ضهره تغطيه و تنام جنبه
……………………….
فى شقه عمر
جرس الباب يرن عمر يروح يفتح الباب يلاقى راجل واقف بعيد
الراجل / الزباله يا استاذ عمر
عمر / ثانيه واحده
عمر يروح المطبخ يفتح الباسكت وياخد كيس الزباله و يروح الحمام يفتح الباسكت و يطلع كيس الزباله و يجى يحطه فى الكيس الكبير بتاع المطبخ يلاقي حاجه جامده يفتحه و يشوف تست الحمل منور شرطه بسيطه و شرطه منوره يستغرب جرس الباب يرن يسيب التيست على الحوض و ياخد الكيس يديه للراجل
عمر / لا مؤاخذه على التاخير
الراجل / و لا يهمك
عمر يقفل الباب أية تطلع من جوه تبص من جنب
عمر / مشي
أية / مسيرى فى يوم هخلص من الخوف ده بقي
عمر / أية
أية / ايوه يا حبيبي
عمر / فى حاجه عاوزه تقوليهالى
أية / مش فاهمه
عمر / تحبى تتكلمى معايا فى اى موضوع تحبى تصارحيني باى حاجه مخبيه عليا اى حاجه
أية تبصله باستغراب و تهز راسها لا
عمر / طب معلش انا نسيت موبايلي فى الحمام ممكن تجبيهولى هتلاقيه على الحوض
أية / عنيا حاضر
أية تروح الحمام تبص تشوف التست تستغرب و تطلع لعمر
أية / بتاع مين ده
عمر / يا ترى اختبار حمل هيكون بتاع مين انا و لا انتى
أية / دا مش بتاعى
عمر / ازاى يعني انا مطلعه من كيس الزباله اللى فى الحمام
أية / بتاعى ما كانش فيه غير شرطه واحده والله العظيم ما كان فيه غير شرطه واحده
عمر / ما كانش فى غير ده فى الزباله يا أية
اية / و الله كان منور شرطه واحده هخبى عنك ليه
عمر / طب ايه نروح نعيد التيست فى معمل محترم و لا انزل اجيب تيست تانى من الصيدليه دلوقت و لا اعمل ايه
أية / مش عارفه انا اتوترت
عمر / تفتكرى ممكن يكون فى حمل
أية تبص لعمر و تهز كتافها مش عارفه عمر يهز راسه و يدخل الاوضه تدخل وراه تلاقيه بيطلع غيار من الدولاب
عمر / انا هلبس و انزل اجيب اتنين تلاته من الصيدليه هيكلفوا كام يعني و بكره نحجز نسا و نطمن
أية / تفتكر ممكن اكون حامل
عمر / مش عارف بس ياريت يعني اتمنى
أية / و لو مش حامل
عمر / عادى لو مش الشهر ده الشهر الجاى السنه الجايه لو عاوزه نكشف انا مش هتاخر
أية / طب حاول ما تتاخرش تمام
عمر / حاضر
………………………..
فى شقه ليلى
ليلى بتتكلم فى التليفون
امانى / ما هو ان ما كانش له كبير يشتريله كبير يعني انا تعبت
ليلى / والله انا كنت عارفه ان ده هيحصل من الاول و لما كلمته قال مش عاوز غير نور
امانى / و نور يا اختى لا كدبت عليه و لا غشته و دايخه معاه على الدكاتره دى عملاله خدها مداس عشان يرضي هو كان هيلاقي زى نور
ليلى / يا ستى نور زى الفل بس هو من حقه يبقي اب
امانى / يقوم يجيب عيال من الشارع
ليلى / انا قولتله اتجوز ما ارضيش
امانى / طبعا و انا مستنيه منك ايه قال و انا اللى قولت هتعقليه
ليلى / ما طبعا هعقله قال على راى المثل يا مربى فى غير ولدك يا بانى فى غير ملكك
امانى / عليكي نور و ان كان يا اختى على الخلفه فدى رزق و يا عالم ما يمكن ربنا يرزقهم لو صبروا على بعض ما الدكتوره شغاله معاهم اهو ما عملتش زى الدكاتره التانين و قالت مفيش امل و خلاص
ليلى / ما يمكن بتشتغلهم و بتقلبهم فى القرشين
امانى / اللهم طولك يا روح اولا دا مركز كبير و له سمعته ثانيا الطب كل يوم فى جديد و لتانى مره الحاجات دى رزق
ليلى / ماشي … ربنا يرزق الجميع
امانى / كلميه و عقليه قوليله يوديهم ملجا و لا يرجعهم لاهلهم
ليلى / بكره الصبح اكلمه
امانى / و دلوقت لا ليه
ليلى / اكون فكرت مع نفسي و رتبت الكلام اللى هقوله و يكون فايق مش تعبان و مرهق و مش قادر يتكلم
امانى / اعملى اللى تعمليه المهم العيال دول يغوروا من هنا
ليلى / قولت حاضر
امانى / ماشي اسيبك ترتاحى بقي و تفكرى سلام
ليلى / سلام
ليلى تقفل السكه
ليلى / و بعدين معاك بقي يا على
…………………….
فى شقه عمر
عمر و أية واقفين قدام الحوض و كل واحد فى ايده تيست
عمر / هو المفروض يغيب كدا
أية/ استنى استنى بدا ينور
عمر / ايوه صح و بتاعى انا كمان اهو
أية و عمر يبصوا لبعض
عمر / هو مش هيزيد عن كدا ؟
أية تبص على الكوفر بتاع التيست
أية / بص مرسوم هنا ويكلى بوزيتيف
عمر / يعني ايه
أية / مش عارفه تعال نسال
أية تبص لعمر بحزن
عمر / تعالى ندور فى جوجل و بكره نحجز و نكشف و نطمن لعله خير يا يويو لعله خير
أية / خايفه اعشم نفسي اوى
عمر / تفائلوا بالخير تجدوه ان شاء الله خير
أية تهز راسها و هى مبتسمه
…………………….
فى شقه نور
نور بتتكلم فى التليفون و هى شغاله فى المطبخ
نور / هو انا لحقت اروح يا بنتى
ندى / طب هتعملى ايه فى العيال اللى معاكى
نور / هعمل ايه يعني العيال اصلا لسه مش واخدين على المكان حتى يس يا قلبي بيتخض لو الباب خبط او اتفتح يمكن نغم اللى بتندمج مع الكارتون و بتنسي اى حاجه تانيه
ندى / يعني ممكن يفضلوا معاكى علاطول
نور / والله اتوقع من على اى حاجه … اصلا انا مشكلتى مش فيهم ما حدش قابلهم و الكل فى كفه و على فى كفه و انا فى النص بينهم
ندى / بس شكلهم ولاد ناس
نور / ايوه و فى مدارس خاصه لغات و مستواهم حلو جدا عشان كدا بقول لعلى ما ينفعش يسكت و السنه تروح عليهم
ندى / هو عارف ان اهلهم هياخدوهم
نور / بصراحه انا كمان حبيتهم و خدت عليهم اوى … ملو عليا البيت … تعرفى نغم الصبح جت ساعدتنى فى ترتيب السراير و سرحتلها شعرها و قعدت تغنيلى
ندى / يمكن ربنا بعتهالك لسبب
نور / مش عاوزه اعلق نفسي بيهم يروحوا منى مش بتوعى يا ندى … اقولك حاجه
ندى / قولى
نور / لما اخدتى حبيبه و سافرتى كنت بقف كتير فى اوضتها اللى عملاها عندى و ابص على اسمها على الحيطه و سريرها و افتكر ايام ما كنت بحلم ان … بس هى مش بنتى و ما كانش من الاول ارسم أحلام
ندى / بس انتى ليكي فيها زى ما ليا بالظبط انتى عمتها و خالتها
نور / صحيح ما كبرتش شويه البت دى
ندى / دى كبرت خالص هبعتلك كام فيديو هتموتى من الضحك
نور / و مش بتبعتيهم اول باول ليه يا رخمه
يس يدخل المطبخ و يقف ساكت
نور / ثوانى يا ندى … ايه يا حبيبي جوعت
يس يبتسم
نور / هغرفلهم يا نونو و اكلهم و ارجع اكلمك ممكن ؟
ندى / طبعا روحى ربنا معاكى و لو اتلخمتى مش مشكله كفايا اللى انتى فيه ربنا يعينك
نور / ميرسي يا قلبي سلام
نور تقفل و تبدا تغرف
نور / كنت بكلم خالتو ندى عندها بيبي زى القمر اسمها حبيبه لما تكبر هبقي اجوزهالك
يس يعمل قرفان
يس / يع
يس يطلع يجرى بره
نور / دى قمر ياله ههههههههههههههههه
……………………
فى شقه ليلى
على / انا روحت للمحامى و هيدور على اهلهم و اللى فيه الخير يقدمه ربنا
ليلي / طب ما تسلمهم فى القسم
على / مش حرام يعني عيلين قمر كدا يباتوا فى القسم و لا فى ملجا
ليلى / يا حبيبي انا مقدره انك
على يطلع موبايله و يورى صوره مع يس و نغم فى الملاهى
على / بصي ضحكتها حلوه ازاى
ليلى / يا ابنى قال على راى المثل يا مربى فى غير ولدك يا بانى فى غير ملكك
على عمال يقلب فى الصور و مبتسم
ليلى / على حبيبي
على يوريها صوره شايل فيها نغم على كتافه و بيضحكوا
ليلى / مش كانت فرحتك دى هتبقي اكبر لو كانت البنت دى بنتك
على / الضحكه دى ما بتفكركيش بحد
ليلى / الله يرحمها مفيش حد بيملا مكان حد يا ابنى
على / ما هو ده اللى بحاول اضمنه انها ما تبقاش مكانها … ماما … انا مقدر قلقكوا و خوفكوا و كل الحاجات الجميله دى بس انا مش هرمى العيال دى لا فى ملجا و لا هوديهم اقسام العيال دى يا هيفضلوا فى حضنى يا هرجعهم لاهلهم بعد ما اتاكد انهم فى امان
ليلى / انت مش مسؤل عنهم
على / ما كانش ربنا بعتهملى
ليلى / الشوارع مليانه الملاجئ مليانه
على / لو ربنا اراد و حطنى قدام حد تانى هعمل كدا برده
ليلى / هتلم عيال الشوارع فى بيتك يا على
على / مش كنت زيهم … عشت وجعهم و دوقت حرمانهم نمت على كرتونه على البلاط فى عز الشتا ينخر فى عضمى كنت بنام بالجاكيت بتاعى عشان البطانيه القديمه مش بتدفيني و وقتها كنت دكر طول بعرض انما دول ايه لحمه حمره ما يستحملوش
ليلى تبص لعلى بحزن
على / انا ابويا و امى كانوا عايشين و ساعدونى اعدى طفولتي بشكل او بالتانى لكن دول ابوهم و امهم ماتوا يا عالم كان ممكن كلب يعضهم و لا ابن كلب ياذيهم انا مش هرميهم و الموضوع ما لوش اى علاقه بالخلفه او باحتياجى للابوه الموضوع انى مش هسمح انهم يعيشوا اللى عشته و لو حضرتك يا للى عشتى معايا سنين طويله فى عذابى ما فهمتنيش يبقي استنى مين يفهمنى
ليلى/ هتعلق قلبك بيهم و هيجي اهلهم ياخدوهم فى الاخر انا بوفر عليك وجع كبير انت مش مقدر قيمته
على / يكفيني ابقي مطمن عليهم
ليلى / ماشي يا على اعمل اللى يريحك
على / هتيجي تتعرفى عليهم
ليلى / لا مش هاجى مش عاوزه احتك بحماتك … هاتهم و هات نور و تعالوا اتغدوا معايا
على / طب ايه رايك اكلم نور تلبس و تلبسهم و ناخدهم و نخرج نتفسح و نغير جو
ليلى / ماشي يا على
على / قشطه قومى اللبسي على ما اكلم نور
ليلى تبتسم و تقوم و على يطلع موبايله و يطلع البلكونه
……………………..
فى شقه ندى
ندى / جرد ايه هو مش بيتعمل فى اول الشهر باين
حسام / ايوه بس اصل من ساعه حكايه السرقه اللى حصلت دى
ندى / ايوه صحيح افتكرت انتوا مش جردتوا اصلا بعد السرقه عشان تشوفوا ايه اللى اتسرق
حسام / و جردنا تانى بعدها و هنفضل نجرد كل شويه لان الشغل كل يوم بيخرج و بيدخل شغل بداله فاول باول كدا بدل ما الراجل يجي يجرد يلاقي نفسه متخزوق فى مبلغ محترم
ندى / و جردكوا كل شويه هيخليه ما يتسرقش يعني
حسام / المال السايب يعلم السرقه و اللى هيسرق لما يلاقي حد بيعد كل شويه هيخاف و ان فلت مره تبقي كميه صغيره يتحقق فيها علاطول
ندى / انا ما بفهمش فى الحاجات دى على العموم ربنا يعينك هبقي اعملك الصبح اكل تاخده معاك
حسام / ما لوش لزوم هم كدا كدا بيجيبوا اكل و حاجات هبقي اكل معاهم و بعدين العين فلقت الحجر يقعدوا يقولوا مراته مهتميه بيه مراته بتدلعه تتقلبي عليا لا يا اختى انا ما صدقت
ندى / اللى تشوفه كلمت نور
حسام / ابدا و قفلت موبايلى عشان ماما ما تكلمنيش
ندى / انا كلمتها اتعلقت بالعيال اوى و شكلهم خلاص بقي امر واقع
حسام / مش ناوى اشغل بالى الصراحه
ندى / عملتلى ايه فى حوار الدكتوره اللى قولتلك عليها
حسام / بسال والله ان شاء الله على اخر الاسبوع اكون استقريت و احجز علاطول ما تنسيش انى ما اعرفش حد هنا لسه فمعلش
ندى / ما اى دكتوره و خلاص انت هتناسبها
حسام / حبيبتي انتى ما ينفعش تروحى لاى دكتوره لان ليكي ظروف خاصه انتى مش رايحه لدايه تتابع حمل و تولد و تمشي انتى محتاجه دكتوره شاطره و نضيفه اهم حاجه
ندى / تمام اللى تشوفه
حسام / ان شاء الله اخر الاسبوع اكون حجزت وعد اعدى بس بكره على خير و اوعدك اخلصلك الموضوع ده
ندى / باذن الله
………………
فى الملاهى
على بيتكلم فى التليفون و فرحان
على / طب والله فرحتنى جدا
عمر / الحمل لسه فى اوله اصلا و أية لما التيست اتاخر فى ايدها رمته و سكتت و هى حامل و ما تعرفش دا انا لقيته صدفه
على / يا عم كل ده تحصيل حاصل المهم انه حصل
عمر / المهم بقولك ايه لو فاضيين ما تيجى انت و نور نحتفل هنا مع بعض
على / مش هقدر اجى لوحدى للاسف معايا ضيفين هتحبهم اوى
عمر / خير ما حكتليش مين
على / يس ونغم هبعتلك صورهم تبروزها قدام سرير يويو عشان تتوحم عليهم
عمر / انت بتقول ايه يا عم
على / اقولك هى فكره فعلا انا هكلم نور و اشوف الظروف و لو كدا نجيلك ديتها ايه يعني
عمر / مصلحه يلا مستنيك
على / قشطه سلام
على يقفل و يروح يقف جنب ليلى و نور واقفين بيتفرجوا على يس و نغم بيلعبوا فى الملاهى
على / تيجوا نروح لعمر
ليلى / اسكندريه
على / أية حامل و هنروح نباركلها و نحتفل و كدا
ليلى تبص لنور
نور / الف مبروك
على / ايه رايك ناخد الاولاد و نروح
نور / دلوقت
على / اه دلوقت هنحتاج ايه يعني غيارين نجبهم فى السكه و لا يا ستى نروح البيت ساعه زمن نلم الشنطه و نسافر هتاخد وقت قد ايه يعني
نور / ههههههههههههههه انا عمرى ما شوفتك متحمس كدا
على / بصراحه و انا عمرى ما فرحت اوى كدا
ليلى/ عقبال فرحتك انت يا حبيبي اهى دى اللى هيبقالها طعم تانى
نور تبص لليلى تلاقيها بصالها يس و نغم يطلعوا من الملاهى
على / تيجوا نروح اسكندريه نكمل فسحتنا هناك
نغم / هنروح البحر ؟
على / لا معلش خلى البحر مره تانيه وعد على الاقل نكون اشترينا مايوهات
نغم / ماشي
على / هتيجي معانا يا ماما اروحك الاول تجهزى حاجتك و اعدى عليكي و احنا ماشيين
ليلي / لا مش قادره معلش روحنى فى طريقك و خلاص ما فييش حيل لا لسفر و لا لطريق
على / تمام يلا بينا
الكل يمشوا ناحيه العربيه
……………………
فى شقه ندى
ندى نايمه حسام يقرب اوى و يحضنها ندى تصحى و تحاول تبعد
ندى / حسام اوعى
حسام / هحضن بس
ندى / كنت نايمه يا حسام
حسام / و هو حضنى ليكي مش هيخليكي تنامى
ندى / انا مش واخده على النوم جنب حد و انت عارف
حسام / ابقي خدى على كدا عشان قفلت معايا ما هو مش بمزاجك هو لما تبقي الغزاله رايقه و طالبه معاكى تتمسحى فيا زى القطط
ندى / اخرس
حسام / لا مش هخرس انا ساكت بقالى كتير زى ما براعيكي وقت ضعفك و بكفيكي تراعيني و تكفيني زى ما ليكي احتياجات انا كمان ليا
ندى / اطلع بره
ندى تقوم و تزق حسام من على السرير بكل قوتها و هى بتصرخ فيه
ندى / اطلع بره اطلع اطلع
حسام / دا بيتي انا و انام مطرح ما يعجبنى مش عاجبك امشي
ندى تبصله و الاتنين متعصبين ندى تروح تفتح الدولاب حسام يروح يقفله
حسام / انا اللى جايبهملك لو هتمشي امشي باللى عليكى
ندى / تانى !!!
ندى عنيها تتملى دموع
حسام / انا هطلع انام بره
ندى / لا خليك
ندى تطلع بره و تفتح باب الشقه حسام يجرى يقفله
حسام / ما تضغطيش عليا و ترجعى تزعلى من رد فعلى
ندى / و انت ايه ؟ مش ضاغط عليا مش ضاغطنى
حسام / خشي نامى يا ندى خشي استهدى بالله انا اسف ما قصدتش
ندى / انت علاطول ما تقصدش علاطول غصب عنك علاطول مضغوط
حسام / انا كان قصدى تمشى بره الاوضه و لما لقيتك عاوزه تخرجى قولت كدا اعجزك اصلا هتروحى فين السعادى هتروحى فين اصلا
ندى / و ما دام عارف ان ما ليش مكان اروح بتخنقنى ليه بتكتم على نفسي ليه
حسام / كل ده عشان طلبت حضن كل ده عشان بحبك و محتاجك انا ما طلبتش حاجه عيب و لا حرام انا بطلب اقل من حقى كمان انتى فكرتى مره انتى ضغطانى قد ايه ندى انا بشوف كل يوم بنات بالهبل شعر و مكياج و لبس و ضحك و دلع
ندى / روحلهم
حسام / انا مش عاوزهم انا عاوزك انتى مش عاوز غير حلالى و بس
ندى / و انا مش قادره
حسام / امال اللى بيحصل بينا ده ايه
ندى / ما اعرفش و مش طبيعي
حسام / لا طبيعي و بمزاجك و بكيفك انتى بس اللى صعبان عليكي ترتاحى و تريحيني عجباكى حكايه انى اجرى وراكى فبتتقلى
ندى / انت مش فاهم حاجه مش فاهم اى حاجه
حسام / لا هو عيب و لا حرام عشان تكتميه جواكى لا هو عيب و لا حرام عشان تنكرى وجوده ما كل الستات كدا و كل المتجوزين كدا
ندى / اسكت بقي اسكت
حسام / ما انا بقالى كتير ساكت انتى اللى من كتر سكوتى صدقتى الاوهام اللى فى دماغك
ندى / مش هتسكت يعني صح مش هتسكت
حسام / سكت
حسام يفتح البلكونه و يقف فيها ندى تروح تقفل باب البلكونه يبص و يرجع يبص قدامه و يضحك و ندى واقفه جوه تبص عليه و بتعيط
…………………..
على الطريق
على سايق و نور جنبه و الاولاد ورا و على مشغل اغانى و الكل بيسقف و مبسوطين يدخلوا على منطقه زحمه و العربيات واقفه نور تطفى الكاست
نور / دى حادثه و لا ايه
على / شكله كمين باين
نور تشيك على حزامها
نور / طب اقعدوا حلوين يا ولاد
يس و نغم يقعدوا العربيات تمشى و الكمين بيعدى عربيات و يجي على عربيه على و يشاورله على يطلع الرخص و يديها للعسكرى الظابط يدخل
الظابط / مساء الخير على فين كدا ان شاء الله
على / اسكندريه
الظابط / حلو اوى و العيال اللى معاكوا دول تبعكوا و لا ايه
نور تبص لعلى
الظابط / اركنلى العربيه دى و انزلى
على يبص للظابط و يهز راسه و يروح يركن
نور / هنعمل ايه يا على
على / سبيها على الله
نور / و نعم بالله ادى اللى كنت خايفه منه
الظابط يخبط على الشباك
الظابط / انزلى
على ينزل
الظابط / ممكن بقي تفهمنى حضرتك واخد العيال دى كدا و رايح على فين … و حد يا ابنى يكشفلى على الاخت اللى معاه دى … انزليلى كدا يا استاذه
نور تفتح الباب
على / العيال دى مش مخطوفه و هى ما لهاش دعوه بحاجه
نور فى ايدها بطاقتها تديها للظابط
نور / والله العظيم مش مخطوفين و لا حاجه حتى اسالهم
نور تفتح الباب الورانى
الظابط / اسال مين يا … بقولكوا ايه احنا كدا كدا خلصنا شغلنا احنا نطلع مع بعض كدا على القسم و هناك نبقي نشوف الفيلم ده براحتنا
………………
فى شقه ندى
حسام قاعد فى البلكونه سرحان صوت كالون باب البلكونه بيتفتح يبص يلاقي ندى بتمشي بعيد يفضل قاعد مكانه
//////////////////
حسام / و اخرتها يا حسام … و اخرتها … اخرتها خير ان شاء الله كنا فين و بقينا فين … انت محتاج تبعد فتره و تسيبها تهدى شويه … بالعكس اضرب على الحديد و هو سخن… كتر الضغط بيولد الانفجار و دى على اخرها … ما يمكن تنفجر فى حضنك و تبقي جت منها … مش عاوزه دكتوره نسا … نجبلها دكتوره نسا
///////////////
حسام يقوم يدخل جوه و يقفل باب البلكونه وراه يلاقي باب اوضه ندى مقفول يروح الاوضه التانيه يلاقي هدومه مرميه هناك يضحك و يلم الهدوم على كرسي و ينام
حسام / متجوز عيله اقسم بالله … بس جنانها عسل ههههههههههههه
……………….
فى القسم
عمر يدخل بيجرى و معاه محامى يلاقي نور واقفه فى جنب يروحلها
عمر / ايه اللى حصل يا نور
نور / مش عارفه اقولك ايه
عمر / طب على فين ايه اللى حصل طيب
نور / على جوه بيحققوا معاه
عمر / انت هتقف تتفرج يا متر ما تدخل تشوف فى ايه
المحامى يطلع كارت و يديه للعسكرى يخبط و يدخل يدى الكارت للظابط
الظابط / خليه يدخل … يا استاذ على انا مقدر موقفك الانسانى النبيل بس فى حاجه اسمها قانون
المحامى يدخل
المحامى / الاستاذ شاكر ابو الفضل المحامى حاضر مع الاستاذ على حقى
الظابط / اتفضل اقعد يا استاذ
على / انا فعلا طلبت من المحامى بتاعى يتحرى عن اهل الاولاد دول و كنت ناوى ارجعهم بس لما اطمن انهم هيكونوا فى مكان امن يس كان خايف يروح ملجا و جوز عمته كان بيضربه
الظابط / يا استاذ على للمره المليون بقولك عمه الاولاد واصيه عليهم و عاملين بلاغ باختفاء الاطفال دى حضرتك كل اللى كان المفروض تعمله انك تبلغ انك لقيتهم مش تاخدهم و تفسحهم و تهننهم
على / طفل جعان فى الشارع اسيبه
الظابط / لا اله الا الله والله انا احترت معاك احبسك عشان تفهم انت متهم بخطف الطفلين دول انت متبلغ عنك
على / ايه !!
الظابط / حد شاف العيال معاك و كلم النجده انك طالع اسكندريه و على اساس البلاغ القوات اتحركت و نصبت الكمين
على يبص للمحامى ساكت و بيسمع
على / بس انا ما خطفتهمش
الظابط / عارف و العيال كمان اكدوا كلامك بس حضرتك بدل ما تقوم بدورك و تسلمهم خليت افراد الشرطه تستمر فى البحث عنهم و انت مخبيهم انا مش هعرف ابسطهالك اكتر من كدا
العسكرى يخبط و يدخل و يدى للظابط كرت تانى
الظابط/ دخلهم يا ابنى طبعا … و ادى اهل العيال شرفوا ادعى ربنا بقي ما يعملوش فيك محضر … ادى اخره الجدعنه العاميه
على / هو حضرتك بتقول حد كان مبلغ عنى صح
راجل و ست يدخلوا
الظابط / ايوه يا سيدى جالنا بلاغ برقم العربيه … اتفضل حضرتك اتفضلي يا هانم
الراجل و الست يقعدوا و تبادل نظرات
……………………
بره عند نور
نور / هم طولوا اوى كدا ليه
عمر / مش عارف و مش قادر اصدق انك طاوعتيه فى عمله زى دى
نور / ربنا وحده اللى يعلم كلمته قد ايه الموضوع بالنسبه لعلى ما كانش بيعدى لا على عقل و لا منطق
عمر / انا مش عارف المحامى اتاخر ليه
نور / محامى ايه امال اللى مع على جوه ده مين
عمر / انا كلمت محامى على و قال هيجي خفت يتاخر عديت على اقرب مكتب محامى و جبت اللى لقيته معايا و جيت
نور / استر يارب
باب الاوضه يتفتح و الكل يبدا يخرج من الاوضه بيضحكوا نور و عمر يبصوا باستغراب
الراجل / دا حضرتك تنور وقت ما تحب
الظابط / ارجو انك تكون اتعلمت من اللى حصل
على / هستاذنك اتكلم مع الاولاد و اسلم عليهم
الست / طبعا طبعا
الظابط / هاتلى يس و نغم من المكتب يا ابنى
العسكرى يمشي و نور تروح تمسك ايد على و تبصله يطبطب على ايدها
الراجل / انا احب اشكر مجهودات حضرتك فى الموضوع الحقيقه
الظابط / ازاى بس دا شغلنا
العسكرى يرجع ماسك ايد يس و نغم اول ما يشوفوا على يجرو عليه يحضنوه
على / عمتوا وعدتنى انها مش هتضربكوا تانى و لا تهددكوا توديكوا ملجا
يس يبص لعمته تلعب فى شعره يس يبص لعلى
على / انا هبقي اجى ازورك و اخدك افسحك زى ما وعدتك
نغم / مش هنروح اسكندريه ؟
الراجل / مره تانيه ان شاء الله
على / روحوا دلوقت مع عمتوا و ان شاء الله نرتب سوا و نسافر كلنا
الست / ايه يا حبيبي انت مش عاوز تروح معايا و لا ايه
يس / هتضربيني
الست تبص للظابط بحرج
الست / انا برضه اضربك يا حبيبي دا انا بحبك و بحب نغم هو احنا لينا الا بعض يا حبيبي
الظابط / ايه يا يس ناوى لما تكبر تبقي ظابط زى ما قولتلى و لا غيرت رايك لما دخلت القسم و كدا
نغم / انا عاوزه ابقي دكتوره
الظابط / و ماله بس لما اجيلك اكشف عندك ما تاخديش منى فلوس اتفقنا
نغم / اتفقنا
الكل يضحك الراجل يشيل نغم
الراجل / تعبناك يا باشا
الظابط / هبقي اجى بعد اذنك انا كمان اطمن على نغم و اشوفها شاطره و لا لا ما انا مش هكشف عند دكتوره خايبه
الراجل / ههههههههههههههه تنور يا باشا تنوروا كلكم … هستاذن انا لحسن سايبين الولاد عند الجيران والله والله يا باشا اول ما كلمتونا سبنا اللى ورانا و جينا جرى
الظابط / طبعا اتفضلوا
نور / و على كمان هيروح
الظابط / هيروح ما تقلقيش … عاوزين نشوفك و نشوف ناس زيك كتير بس بيتصرفوا صح
على / باذن الله
الظابط / تقدروا تتفضلوا
نور تمسك ايد على و يمشوا و عمر جنب على
على / انت لقيت المحامى ده فين
عمر / يا عم انت كنت لاقى يلا يلا زمان أية ماتت من الرعب
على / لا مره تانيه بس لازم
عمر / انسي يلا انجزوا يلا يا نور يلا
عمر يسبق نور تبص لعلى
نور / انت كويس
على / فى حد بلغ عنى … فى حد كان صعبان عليه يشوفنى مبسوط شويه
نور / و ما تنبسطش ليه العيال رجعوا لحياتهم الطبيعيه و هنروح كل فتره نطمن عليهم و نتاكد انهم بخير و مش ناقصهم حاجه هيرجعوا مدارسهم و ممكن نبقي نستاذن يجولنا خميس و جمعه عادى
عمر يرجع
عمر / ما تيلا يا جدعان انتوا استحليتوا القسم و لا ايه يلا
على يهز راسه و يمشي هو و نور
…………………..
فى الشركه عند حسام
حسام مندمج فى الشغل هدايه تدخل تحطله مج نسكافيه
هدايه / كوفى بريك
حسام / مش فاضي خالص ورايا شغل كتير جدا النهرده
هدايه / مالك النهرده فى ايه قفشت مع النونو تانى و لا ايه
هدايه / فى فيلم فى السينما نزل جديد انما ايه بيقولوا جامد
حسام / هدايه عندى شغل
هدايه / طب ما انا جيالك فى شغل
حسام / لا و لا يعني لا
هدايه / عاوزه اغير عربيتى يا حسام
حسام / و عشان تغيرى عربيتك تخربى بيتى انا
هدايه / براحتك .. بكره تجيلى
حسام يبصلها تشيل المج التانى و تمشي مقموصه يضحك و يكمل شغل
………………
فى شقه عمر
نور تصحي تلاقي على مش فى الاوضه تتمطع و تقوم تغير هدومها و تفتح الباب مفيش صوت تتمشي فى الشقه بالراحة مفيش صوت تطلع الصاله تلاقى أية داخله من البلكونه شايله طبق غسيل فاضي
أية / صح النوم
أية تحط طبق الغسيل على السفره و تقفل البلكونه و تقلع النقاب
نور / صباح النور امال هم فين
أية / نزلوا من بدرى و انا ما رضيتش اصحيكي صعبتى عليا الفطار جاهز اجبلك تاكلى
نور / تسلمى حبيبتي مش عاوزه اتعبك … انا هروح الحمام و اجى اساعدك
أية / انا خلصت عمر عازمنا على اكله سمك و جمبرى من اللى قلبك يحبها يعنى النهرده اكل و مرعى و قله صنعه لا طبيخ و لا مواعين هههههههههههه
نور / حجزتوا عند الدكتوره
……………………
- يتبع الفصل التالي اضغط على ( رواية سلف و دين ) اسم الرواية