رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثاني و الخمسون 52
نور تصحي تلاقي على مش فى الاوضه تتمطع و تقوم تغير هدومها و تفتح الباب مفيش صوت تتمشي فى الشقه بالراحة مفيش صوت تطلع الصاله تلاقى أية داخله من البلكونه شايله طبق غسيل فاضي
أية / صح النوم
أية تحط طبق الغسيل على السفره و تقفل البلكونه و تقلع النقاب
نور / صباح النور امال هم فين
أية / نزلوا من بدرى و انا ما رضيتش اصحيكي صعبتى عليا الفطار جاهز اجبلك تاكلى
نور / تسلمى حبيبتي مش عاوزه اتعبك … انا هروح الحمام و اجى اساعدك
أية / انا خلصت عمر عازمنا على اكله سمك و جمبرى من اللى قلبك يحبها يعنى النهرده اكل و مرعى و قله صنعه لا طبيخ و لا مواعين هههههههههههه
نور / حجزتوا عند الدكتوره
أية / اه بالليل الساعه عشره مش فاهمه انا ما تجبنا الفجر احسن
نور / معلش يا حبيبتي هم مواعيدهم كدا قعدتهم طويله و ممله المهم تكمل على خير باذن الله
أية / خشي الحمام و انا هعملنا كبايتين نسكافيه نشربهم و احنا بنتفرج على التليفزيون
نور / تمام يا قلبي
نور تدخل الحمام و أية تشيل طبق الغسيل و تروح المطبخ
………………..
فى المحل عند عمر
عمر / مش هتهدى انت يعني
على / ههدى لو طلع اللى فى بالى غلط
عمر / و ان طلع صح و طلعت حماتك فعلا هتعمل ايه
على / هطربق البيت على دماغها
عمر / و نور هتسكتلك
على / يعني عاجبك اللى حصل كان افرض اتحبست الا حتى ما عملت حساب ان نور معايا
عمر / ما انت اللى غلطان من الاول يا على و قال على راى المثل امشي عدل يحتار عدوك فيك
على / يعني كنت ارجعهم لاهلهم من غير ما اطمن عليهم
عمر / و اديهم رجعوا … دا مكانهم الطبيعي … على … انت لازم تفصل بين حياتك الشخصيه و ماضيك و بين العيال دى
على / لو كانوا واخدين بالهم منهم ما كانوش هربوا
عمر / انت اصلا كان المفروض تعقل يس ده و تقوله ان الهروب مش حل و ان الشارع خطر عليه و على اخته مش تشجعه و تفسحه و تجبله لبس كدا كل ما حد هينفخ فيه بس هيهرب
على / انت اصلك ما شوفتش منظرهم لما لقيتهم دول كانوا بيبصوا للاكل يا عيني
عمر / الهروب من البيت عمره ما كان حل يا على مهما كان اللى فى البيت اهون مليون مره من الشارع و اللى بيحصل فيه و انا و انت جربنا الشارع و عارفين
على / و جربنا البيت و عارفين البلاوى اللى بتحصل فيه
عمر / هنتابعهم و تروح تزورهم كل شويه و لو لقيت اى حاجه غريبه
على / بصفتى ايه يا عمر افرض منعوهم عنى
عمر / يا عم اسال الجيران نسال فى المدرسه احنا هنغلب و بعدين انت فى جميع الأحوال هتبقي عملت اللى عليك قدام ربنا الباقي مش دورك
على / لو ما كانش دورى ما كانش ربنا حطهم فى طريقي
عمر / ما يمكن دى سكه تمشي فيها و انت اللى فهمت الاشاره غلط
على / مش فاهم
عمر / يعني تروح تشوفلك ملجا و تبص على العيال اللى فيه اكيد هتلاقي فيهم و لو عيل واحد ناقصه حاجات تجبهاله
على / و هو انا ما بعملش كدا يعني يا عمر
عمر / عاوزنى اعملك ايه يعني يا على من الفراغ اللى انت عايش فيه يعني عمال تدور على بلاوى تشيلها على ضهرك ما تهدى بقي يا جدع تعبتنى الله
عمر يقوم و يطلع يقف عند الباب و على متابعه يتنهد
…………………….
فى شقه ندى
صوت حبيبه بتصرخ و ندى بتجرى على المطبخ الاكل شاط تطفى على البوتجاز و تشيل الحله ترميها فى الحوض و تفتح المايه الدخان يملا المطبخ تفضل تكح و تعيط حسام يفتح باب الشقه يرمى الشنطه و يجرى على المطبخ يفتح الشباك و يطلع ندى بره و يجرى يفتح باب البلكونه و شبابيك البيت و يروح يشيل حبيبه و يطبطب عليها و يهزها تسكت يشيلها و يرجع لندى قاعده تعيط فى الارض ياخدها فى حضنه
حسام / تمام تمام خلاص اهدى
ندى / الاكل كان على النار دخلت ارضع حبيبه نمت جنبها صحيت على صوت صريخها و ريحه الشياط
حسام / اهدى مش مشكله حصل خير ياما احسن و اشطر منك و حصلت معاهم
ندى تعيط اكتر
ندى / انا عاوزه ماما
حسام / قومى قومى اغسلى وشك و اللبسي و تعالى نخرج نروح نشوف جنينه نقعد فيها و نجيب اكل و نتفسح الجو حلو النهرده قومى
ندى / انا عاوزه اروح لماما
حسام / بعد الشر عنك يا قلبي طب و بيبو السكر دى تسبيها لمين بس ينفع الكلام ده طب والله بتحصل اهدى انتى بس و قومى … قومى يا قلبي استهدى بالله قومى
حسام يقوم و يقوم ندى و ياخدها على الاوضه يقعدها على السرير و يحط حبيبه جنبها و يقفل الستاره و يروح يفتح الدولاب و يطلع طقم لحبيبه
حسام / طقم بيبو اهو هلبسهولها
حسام يقلب فى الدولاب و يطلع بنطلون ندى تقوم تاخده منه و تحشره تانى
حسام / ماله ما انتى بتحبيه
ندى / ما عدش بيقفل طخنت
حسام / بس كدا … طب ايه رايك هاخدك و اشتريلك عشر بناطيل و سبيه مرزوع زى الكلب كدا عشان يتربى
ندى تبصله و ما تقدرش تكتم الضحكه حسام يبتسم
حسام / ايه ده ايه ده ايوه ايوه الله اكبر النونو يكبر النونو يكبر
ندى / بس بقي يا حسام
حسام / كدا يا قلبي تخضيني عليكي بالمنظر ده يلا اللبسي و انا هغير لبيبو و اجهز الحاجه يلا
ندى تهز راسها و تروح تقلب فى الدلاب حسام يروح يقعد قدام حبيبه ندى تبصله
ندى / حسام
حسام يبصلها
ندى / شكرا
حسام يبتسم
حسام / عفوا
ندى تطلع طقم و تقفل الدولاب
…………………
فى شقه أية
عمر يفتح باب الشقه
أية / مع نفسكوا بقي انا خلاص عفوا لقد نفذت بطاريتكم يرجى التوجه للسرير
على / هههههههههههههه و مين سمعك مش عارف الواد ده بيضرب منشطات و لا حكايته ايه
عمر / خلاص يبقي تخليكوا معانا بكره كمان … ما لحقتش اشبع منكوا يا جدعان هو انتوا بتيجوا كل يوم
نور / الدور عليكوا انتوا تيجوا بقي
على / لا سفر و طريق يويو محتاجه راحه
أية / قول لاخوك بقي من النهرده لا فى مواعين و لا غسيل و لا طبيخ
عمر / الله الله ناقص تصلى و انتى قاعده كمان
على / براحتها يا عم بقولك ايه من بكره واحده تيجي تشوف شغل البيت
عمر / بس تكون حلوه بالله عليك
أية تزغد عمر و الكل يضحك و نور مبتسمه ابتسامه خفيفه و باصه لعلى بحزن تليفون على يرن يطلعه من جيبه
على / دا المحامى اكيد عرفلى مين اللى بلغ
على يروح البلكونه و الكل مترقب و على اعصابه
………………….
فى شركه حسام
هدايه / غيرت رايك بسرعه
حسام / تصدقى انا غلطان
هدايه / استنى بس طب افهم فضول والله مش اكتر
حسام / انتى مش عاوزه فلوس تغيرى عربيتك انا كمان محتاج فلوس
هدايه / و ماله قابلنى بالليل
حسام / النهرده لا بكره هقولها فى جرد عشان انتى ما تنضمنيش
هدايه / طب ما تقولها مسافر مؤتمر كام يوم
حسام / ما تتهدى بقي يا بنتى انا تعبتلك سلف
هدايه / هههههههههههههه امبارح قولتلك هتجيلى و جيتلى و دلوقت بقولك هتجيلى و هتيجي
حسام / و اسمك هدايه طب ازاى
هدايه / ههههههههههه بكره فى نفس المكان
حسام / لا هتسكرى و تقرفيني
هدايه / و المفروض انك جنتل مان
حسام / لا جنتل مان اوى و اسمحيلى بقي اثبتلك
هدايه / اتفقنا
………………….
فى شقه ليلى
على قاعد فى الصاله بيهز رجله ليلى تدخل شايله صينيه عليها شاى و كيك تحط الصينيه و تقعد
ليلي / بس الحمد لله العيال رجعت لاهلها
على يبتسم بصعوبة و يهز راسه
ليلى / و اخبار أية ايه سلمتلى عليها و لا لا
على / وصل
ليلى بتبتسم و تبص لعلى على يتعدل فى قعدته
على / انا عارف ان انا و حضرتك كنا ابعد ما نكون عن بعض و اننا افترقنا فترات طويله
الابتسامه تروح من وش ليلى
على / انا طول الطريق و انا راجع بسال نفسي انا غلطت معاكى فى ايه
ليلى / انت بتقول ايه يا على
على / ليه ؟
ليلى تتعدل فى قعدتها و تبلع ريقها
على / كان ممكن اتحبس نور راحت القسم و اتبهدلنا و العيال اترعبوا
ليلى / كان ممكن يحصل بيا او من غيرى كان هيحصل
على / فبيدى لا بيد عمر مش كدا
ليلى / و انت بتسمع لحد كلنا حذرناك سمعت لحد
على / تقومى تبلغى عنى
ليلى / كنت متاكده انك هتخرج منها انت لسه بتدور على اهلهم انما لو كنت اتمسكت بعدين
على / انا كنت متخيل انها هتطلع حماتى و ناويلها لما عرفت انها انتى … والله ما عارف اقولك ايه
ليلى / انا امك و ما حدش هيخاف عليك قدى
على / و ما حدش هيخاف على العيال دى قدى
ليلى / مش عيالك
على / طب و انتى عملتى ايه لعيالك
ليلى تبص لعلى
ليلى / عملت كل اللى اقدر عليه و يمكن اكتر بكتير كمان انت تعرف ايه انت تعرف ايه عن الضنا عشان تتكلم اصلا انا عملت عشانك انت و اختك اللى ابوك ما عملوش انا اتزليت و اتمرمطت و طلعت عيني و روحى عشانكوا اوعى تحاسبنى اوعى
على / ما اقدرش
ليلى / لما اشوف ابنى بيغلط لازم امنعه لو ما سمعش بالكلام يبقي بالضرب حتى لو هحبسه فى اوضه و اقفل عليه المهم احميه ده دورى كام اللى انت بتهرب منه
على / افندم
ليلى / انا ليه اخلف و اجيب عيال اتحاسب عليهم ما اخد عيال من الشارع مش ملزم ناحيتهم باى حاجه اى حاجه هعملها عشانهم هتبقي سوبر و اهو ان قصرت فى يوم ما حدش يقدر يلومنى بالظبط اختيارك لواحده مطلقه ما بتخلفش
على يتعدل فى قعدته
ليلى / واحده مطلقه ما بتخلفش هترضي بكل عيوبك و اضطراباتك النفسيه
على / اضطرابات نفسيه !!
ليلى/ لا و هتبوس ايدها وش وضهر هى كانت لاقيه لا هتقدر تقول لا و لا تعترض
على يبص لليلى و يبتسم و يقوم يقف
على / على فكره انا ما كنتش جاى احاسبك انا بس كنت عاوز افهم ليه و فهمت و على فكره حضرتك عندك حق فى كل اللى قولتيه كل دى احتمالات وارده جدا انا فعلا اللى عشته اثر عليا و سببلى اضطرابات نفسيه و اكيد حضرتك عملتى اكتر من اللى عليكى معايا و مع عبير الله يرحمها بس الظروف كانت اقوى منك
ليلى تقف قدامه
ليلى / ايوه كانت اقوى منى تفتكر لو كان فى ايدى اى حاجه تانيه كنت اتاخرت
على / هو بس حضرتك غلطانه فى حاجه واحده بس
ليلى تتعدل فى وقفتها و تنتبه
على / نور الف من يتمناها و انا اللى بحمد ربنا كل يوم انها وافقت على واحد زيي
ليلى / و انت مالك يعني
على / لا اهل و لا عيله و مضطرب نفسيا
ليلى / كانت هتوافق عليك و انت فقير ؟
على يضحك
على / بيقولوا القرد فى عين امه غزال دا انا طلعت اقل حتى من القرد
على يبوس راس ليلى و يمشي ليلى تقعد و تمسح دموعها
……………………
فى شقه حسام
ندى بتكلم نور فى التليفون
ندى / طب عرفتوا مين اللى بلغ
نور / ما رضيش يقول و طلع من البلكونه لمى حاجتك يا نور و رجعنا فى صمت تام طلعلى الشنطه و نزل
ندى / و انتى ساكته
نور / بكلم حيطه عارفه لو حيطه كانت ردت عليا بقولك صمت تام
ندى / هو زعل على العيال دى اوى كدا ليه
نور / ما انا قولتلك هو خايف على البنت اوى كانه بيعوض فيها عبير الله يرحمها
ندى / مش للدرجادى يعني برضه
نور / انا بقيت بخاف عليه اوى و المشكله ان ما حدش فاهمنى دا انا ما قدرتش احكى لماما اللى حصل قولتلها سمع بنصيحتك و رجعهم لاهلهم
ندى / ههههههههههه حقه كان زمانها مستنياه على السلم و هاتك يا تنبيط
نور / دا ان قدرت تستناه يرجع و ما كانتش كلمته يجيلها مخصوص بسرعه
ندى / ههههههههههههههههه ما حدش مرتاح
نور / لا ما حدش بس تصدقى لو قولتلك البيت ساكت اوى من غيرهم برضه
ندى / بالسرعه دى
نور / كانوا عساسيل اوى ما شاء الله يتحبوا فعلا باباهم ميت من زمان و مامتهم ماتت من كام شهر و عمتهم خدتهم و كل شويه يتخانقوا مع ولاد عمتهم يقوموا ضربينهم هم حتى لو مش هم الغلطانين و جوز عمتهم كان كل شويه يهدد يس انه يودى كل واحد فيهم فى ملجا لوحده
ندى / دا تخلف ازاى يعني
نور / خاف يا قلبي يبعدوه عن اخته خدها و هرب لما ناموا
ندى / ازاى هو على
نور / على لقاهم تانى يوم اول يوم بيقولى باتوا فى مدخل عماره تانى يوم حد من السكان لقاهم جبلهم ساندوتشات و مشاهم بعيد
ندى / بس ما وداهمش قسم و لا بلغ و لا اى حاجه
نور / فضلوا يتمشوا فى الشوارع لحد ما جاعوا وقفوا قدام محل على معاهمش فلوس و خايفين يدخلوا يطردوهم زى ما حصل فى محلين قبل كدا
ندى / ما ليه حق على يخاف عليهم بقي دول اتبهدلوا خالص يا قلبي
نور / تصدقى ان الحاجات اللى على جبهالهم لسه عندى هنا
ندى / طب ما دى فكره كويسه لميهم فى كيس و كلمى على و اتحججوا و روحوا اطمنوا عليهم
نور / تليفونه مقفول
ندى / جربى تانى خليكى وراه اكيد هيرد
نور / هجرب
ندى / ابقي طمنيني
نور / تمام حاضر
ندى تقفل و تبص لحبيبه
ندى / ما حدش بيربى عيال حد ما حدش بيستحمل عيال حد
ندى تقوم تروح الحمام
………………
فى شقه منال
ليلى قاعده بتعيط منال تدخل شايله عصير ليمون
منال / اشربى روقى دمك ما فيش حاجه مستاهله دلوقت يروق و تلاقيه بيكلمك يراضيكي
ليلى / انا مش امه عشان يراضيني امه ماتت و اسمها كان حنان انا حياله مرات الراجل اللى قتل اخته
منال / حرام عليكى يا ليلى بعد كل اللى عمله
ليلى / هرجعله شقته و فلوسه و هرجع مكان ما جيت لا ائذى حد و لا حد يأذيني
منال / لا اله الا الله الموضوع مش مستاهل كل ده هو غلط و انتى غلطتى و مهما جرا بينكوا انتوا اهل
ليلى / هو انا بكره نور انا ما بكرههاش بس انا ام و نفسي افرح بابنى الوحيد نفسي اشيل عياله بدل ما شيفاه يا قلبي متشحتف على عيال الناس ما شوفتيش فرحته بحمل أية مرات اخوه
منال / هى أية حملت يا فرج الله شوفى العيال و عمايلهم الا ما حد فيهم عبرنى و قالى
ليلى / يمكن كانوا مستنين يتاكدوا اصلها هتروح لسه للدكتوره النهرده ما اعرفش راحت و لا لا
منال / خير باذن الله انتى عارفه يا ست ليلى شويه غلابه و اتلموا على بعض أية و لا نور و لا على و لا عمر الدنيا ما رحمتش حد فيهم بس والله نور دى نسمه تتحط على الجرح يطيب
ليلى / اقسم بالله بحبها بس الشرع حلل اربعه و لو بتحبه مش هتمنعه و هو هيعدل
منال / رحم الله امرئ عرف قدر نفسه و انتى مش هتتحاسبى مكانه و بعدين البت بتسعى اهى
ليلى / لو كان فيه الخير ما كان رماه الطير يا اختى
منال / لا بقي اعزوريني الطب كل يوم بيتقدم و لا تقنطوا من رحمه الله هو الطب دلوقت زى على ايامى و ايامك و بعدين دا رزق مش بايد حد
ليلى / و نعم بالله عارفه بس نسعى
منال / ما تضغطيش عليه سيبى الدنيا تمشي طبيعي و هم لسه صغيرين و العمر لسه قدامهم
ليلى / ربنا يديهم طوله العمر يا منال بس انا يا اختى ان عشت النهرده مش هعيش بكره
جرس الباب يضرب
منال / استني اما اشوف مين و بعدين اجى اشوف انا حوار الكلام السخيف بتاعك ده
منال تقوم تفتح تلاقى على
منال/ اهلا انت شرفت
على / انا اسف انى جيت من غير معاد بس
منال / مزعل امك منك ليه يا وله
على يستغرب
منال / ادخل … ادخل اما اشبشبلك
على يدخل يلاقي امه قاعده يبتسم و يدخل يقعد قدامها و يبصلها و يضحك
على / ضربنى و بكى و سبقنى و اشتكى
منال / اخرس يا واد
على / شوفتيني و انا متجرجر على القسم زى المجرمين
منال / امك و تربيك على كيف كيفها
على / لا ما انا اتربيت
ليلى / على فكره انا هرجعلك كل اللى اخدته منك
على / بس انا ما اديتش لحضرتك حاجه عشان اخودها … صحيح أية حامل لسه خارجين من عند الدكتور دلوقت قولت اجى افرحك
منال / ربنا يتملها على خير قوم بوس راس امك و راضيها
على / بس كدا
على يقوم يبوس راس ليلى
على / حقك عليا
ليلي / انا عملت كدا لمصلحتك
على / تمام
منال / انتوا الاتنين غلطتوا انت كمان يا على غلطان امشي يا ابنى عدل يحتار عدوك فيك
على / معلش ما حضرتك ما شوفتيهمش
منال / ما انت واطى ما تعرفش يعني بحب العيال قد ايه دا انت حتى روحت جبتلهم لبس من بره ما هانش عليك تنفعنى
على يضحك
منال / برده كنت تمشي صح
على / طب و ايه الصح
منال / الصح انهم يكونوا مع اهلهم يا ابنى
على / حتى لو بياذوهم
منال / نتابعهم و لو حصل تانى
على / مش كل مره تسلم الجره
منال / اعمل اللى عليك و الباقي على ربنا
على يطلع من جيبه موبايله فاصل
على / معلش كويس انى افتكرت فصل منى و انا بكلم عمر معلش تشحنيهولى
منال / هات
منال تاخده و تقوم تدخل جوه
على / قررت اروح لدكتور نفسي عشان أعالج اضطراباتى
ليلى / احجزلى معاك
على يضحك و يبص الناحيه التانيه
ليلى / عملت كدا من خوفى عليك وربنا اللى يعلم انا كنت خايفه عليك قد ايه بس انت ما سبتليش حل تانى
على يهز راسه مع ابتسامه خفيفه
…………………
فى شقه حسام
ندى / و لو الموضوع مفيد اوى كدا رفضت ليه
حسام / عشان ما اقدرش اسيبك لوحدك و ما اقدرش اخدك انتى و حبيبه معايا
ندى / ان كان على اللى حصل فى المطبخ
حسام / لا يا قلبي عشان انا مش برتاح بعيد عنكوا مش هعرف اشتغل و بالى مشغول عليكوا انا ليا مين غيرك اخاف عليه يعني
ندى / بس انت كنت بتهتم اوى بالمؤتمرات دى حتى فى الامارات سافرت لبنان فاكر
حسام / و قطعت المؤتمر و جيتلك جرى لما دخلتى المستشفي
ندى / خلاص توكل على الله و روح
حسام / و انتى
ندى / البيت فيه كل حاجه تقريبا و انا معايا فلوس و ما تقلقش ان شاء الله خير
حسام / متاكده
ندى / ايوه على ما ترتب شنطتك هعمل شيك على المطبخ و حاجه ملك و لو فى حاجه ناقصه هاتها قبل ما تسافر
حسام / تمام و كدا كدا مش هتاخر ان شاء الله
ندى / تمام
حسام يمسك ايد ندى و يبوسها تسحبها بسرعه يبصلها
ندى / مش عاوزين الوقت يسرقنا يادوب نلحق عن اذنك
ندى تقوم تجرى على المطبخ
…………………
فى شقه نور
على يدخل نور تقوم تجرى عليه
نور / يعني ينفع كدا انا عملت ايه تعاقبنى عليه بالشكل ده
على / يا لهوى انتى قاعده مستنيه تعاتبيني من ساعتها
نور / ايوه انا زعلانه
على يبتسم
نور / ما تهزرش
على / هو انا فتحت بقي
نور تبصله و تروح تقعد مقموصه و مربعه ايدها على يروح يقعد جنبها
على / كنت مخنوق و من كتر اتصالاتك فصل
نور/ يا سلام
على / روحت شحنته و كلمتك
نور / ماشي
على / كنت مخنوق والله و مش طايق نفسي
نور / و يا ترى بقي مين اللى قدرت تفك خنقتك
على / روحت للحجه منال
نور تبصله
على / مش سامع صوتك يعني
نور / خلاص الرساله وصلت شكرا
على / رساله ايه بقي
نور/ انك لما تبقي مخنوق هلاقيك عند طنط منال ان طنط منال بتعرف تحتويك اكتر منى
على / مين قال كدا بس
نور / ما حدش قال انا اللى بقول
على / هتغيرى من واحده قد مامتك يعني
نور / و اغير من امى نفسها فيها ايه يعني انا مراتك وده حقى
على يبتسم اوى
نور / ما بهزرش
على / انا اسف
نور تهز راسها على يقرب و يبوس راسها تهز راسها تانى يبوس راسها تانى
نور / خلاص يا على مش زعلانه
على / طب فى غدى انا جعان
نور تبص لعلى تلاقيه بيضحك
نور / فى … ثوانى اغرفلك
نور تقوم تدخل المطبخ على يقوم يدخل وراها
……………..
فى شقه مفروشه
حسام بيتمشي لوحده و يبص على المكان جرس الباب يضرب يروح يفتح الباب يلاقي شاب شايل كرتونتين يفتحله الباب الشاب يدخل
الشاب / مسا الخير استاذ
حسام / جبت الحاجات كلها و لا نسيت حاجه
الشاب / و من افخم الانواع استاذ
حسام يطلع فلوس يديله
الشاب / تكرملى استاذ بدك اى شى انا فى الخدمه بس دقلى على التليفون
حسام يبتسم و يهز راسه الشاب يمشي و حسام يقفل الباب و يروح يفتح الكرتونه الاولى يلاقي بقاله و اكل ينزلها على الارض و يفتح التانيه مليانه ازايز خمور يقفل الكرتونتين و يحطهم فوق بعض و يشيلهم يدخلهم المطبخ و يبدا يفضيهم تليفونه يرن يروح يجيبه يلاقي ندى
حسام / حب حياتى
ندى / وصلت بالسلامه؟
حسام / لسه ما فضيتش الشنطه والله
ندى/ تمام هسيبك ترتاح قولت اطمن عليك قبل ما انام
حسام / قفلتى الباب و طفيتي البوتجاز
ندى / ايوه ما تقلقش
حسام / لو حصل اى حاجه كلميني فى اى وقت تمام
ندى / تمام
حسام / سلام يا قلبي
ندى / سلام
حسام يقفل و يروح يجيب كيس فيه كاميرات صغيره و يصور فيديو للصاله و يشوفه و يهز راسه
حسام / لا شغل عالى فعلا شغل سيما بصحيح … طب هنيلكوا فين بقي … اممم
حسام يقعد يتحرك فى الشقه و يجرب اكتر من مكان و يصور و يقعد يتنقل من مكان لمكان و يرجع يبص فى الكاميره و يشوف الاماكن اللى ظهرت و يعدل وضع الكاميره و يكرر الموضوع
………………….
فى شقه على
على / مش حاسس انها فكره كويسه
نور / كنت فكراك هتتحمس للموضوع دا انا اتعلقت بيهم
على / و انا كمان … اتعلقت بيهم جدا … بس مش معقول كلهم غلط و انا الوحيد اللى صح
نور / انا معاك
على / و ده اللى مخوفنى مش عاوز ابهدلك تانى مش عاوز اعرضك لموقف انتى فى غنا عنه
نور / ليه بس المرادى هنمشي صح هنروح و تزورهم و تديهم الحاجات اللى جبتها و نطمن عليهم و نتكلم مع عمتهم
على / و لو لقيت فى حاجه غلط لو ما ارتاحتش لو ما اطمنتش
نور / نبلغ البوليس مش هنسكت طبعا
على / و ان ما قدرتش اعمل حاجه احيانا الجهل بيكون نعمه تغمض عنيك عن المشكله ارحم من احساس العجز عن حلها
نور / دا اكتئاب ده و لا ايه طب على فكره بقي انا قررت و لميت حاجتهم فعلا و هروح حبيت تيجي معايا و تسندنى و تبقي فى ضهرى و تحميني كدا اهلا و سهلا حبيت تخلع بقي … براحتك
على يضحك و يبص الناحيه التانيه
نور / ما بهزرش
على / ماشي كلامك يا رياسه
نور تمسك ايد على يعدى ايده على شعرها
على / بيقولولى انى باجى عليكي عشان غلبانه و عاوزه تعيشي
نور / مين دى اللى غلبانه ربنا ما يغلبنى ابدا
على يضحك بصوت عالى
نور/ انا اه عاوزه اعيش بس عاوزه اعيش معاك انت
على / هو انا عملت ايه حلو فى حياتى عشان ربنا يعوضنى بيكي
نور تبتسم بخجل
نور / اكيد حاجه حلوه اوى هههههه
على يركب نور الهوا
على / حلوه جدا
نور / الله
على يكررها
على / حلوه اوى
نور / بس يا على و الا
على / هى فيها و الا دا يبقي حلالى الله اكبر بقي
على يزغزغ نور و هى تسخسه من الضحك
…………..
فى شقه حسام تانى يوم بالليل
جرس الباب يضرب حسام يروح يفتح يلاقي هدايه واقفه مستغربه
هدايه / شقه !!
حسام يبتسم و يسيبها و يدخل هدايه تدخل و تقفل الباب بالراحه
هدايه / ما جيتش الشغل ليه
صوت حسام / فى المطبخ
هدايه / ايه ؟
صوت حسام/ تعالى المطبخ
هدايه تتمشي فى الشقه تلاقي حسام بيطلع صينيه متغطيه فويل من الفرن
حسام / ورقه لحمه انما ايه عجب
هدايه/ بتعرف تطبخ
حسام / لا دا انا هبهرك
حسام يشيل الفويل
هدايه / انبهرت اولردى
حسام / عشر دقايق و السفره تكون جاهزه
هدايه / تعرف ان عمر ما راجل طبخلى قبل كدا
حسام / ممكن اجيب دليفرى لو
هدايه / بالعكس دى لفته حلوه اوى … اساعد ازاى
حسام / ممكن ترتبى السفره على ما اغرف الرز
هدايه / تمام
هدايه تاخد صينيه ورقه اللحمه و تطلع بره حسام يطلع كاسين بسرعه و يطلع ورقه من جيبه جواها بودره يفضيها فى كاسه منهم و يرمى الورقه فى الزباله و يصب فيها ريد واين هدايه تدخل
هدايه / واو
حسام / انا ما بفهمش فيه بس قالولى ان ده احسن حاجه و الحقيقه اتمنى انهم ما يكونوش نصبوا عليا عشان غالى جدا
هدايه تشمها و تاخد شفطه
هدايه / لا ممتاز ما تقلقش ما نصبوش عليك هههههههههه
حسام يطلع ازازه عصير من التلاجه و يصب فى الكاسه التانيه هدايه ترفع حاجبها
حسام / اوعى تفهميني صح
هدايه / ههههههههههه
حسام/ انا عمرى ما شربت و انا محتاج النهرده اكون فايق
هدايه / و محتاجنى اكون سكرانه
حسام / بالعكس عشان كدا مش هصبلك غير كاسه واحده انا بس بحاول اثبتلك انى جنتل مان
هدايه تشد الازازه و الكاسه
هدايه / قال كاسه واحده قال ههههههههههههههه حصلنى عشان ريحه الاكل جوعتنى اوى
حسام يبتسم و يهز راسه هدايه تطلع بره و هى بتشرب من الازازه نفسها
………………….
فى شقه عمر
أية بتكلم فى التليفون و هى قاعده على السرير
أية / طب والله خفت اقولك قبل ما اتاكد
منال / دا على اساس انك لسه خارجه من عند الدكتوره دلوقت
أية / ما هو على ما احتفلنا و كنا بنشترى شويه حاجات كدا يعني
منال / ماشي يا اختى ابقي خلى الحاجات تنفعك
أية / لا ما فيناش من قمص اجيلك وقتى
منال / تيجي فين مفيش حركه دلوقت خالص و الحمد لله انك خلصتى امتحانات على خير انا هبقي اجيلك
أية / بجد هتيجي ؟ امتى
عمر يدخل الاوضه و معاه صينيه عليها طبق كبير مليان فاكهه يقعد و يحطه جنبه على السرير
منال / قريب هظبط شويه حاجات هنا و اجى اتقل عليكي يومين
أية / العمر كله طب والله وحشانى و هفرح بوجودك
منال / و انتى كمان وحشانى و هاجى فعلا بس فى الأواخر هاجى ان شاء الله عشان ابقي جنبك فى الولاده … هو صحيح انا ما افهمش اوى فى الحاجات دى
أية / على الاقل تبقي جنبى انا ما ليش غيرك
منال / ربنا ما يحرمنى منك يا أية امال عمر فين
أية / جنبى اهو اتفضلي … طنط منال
عمر ياخد الموبايل
عمر / ستى و ست الناس
منال / الف مبروك يا حبيبي ربنا يتملكوا على خير و يرزقكوا بطفل صحى معافى باذن الله
عمر / امين دعواتك
منال / ريحها يا عمر و خد بالك من نفسيتها على الاقل الكام شهر الاولانيين لحد ما الحمل يثبت و غذيها كويس
عمر / دا انا اشتريت الفاكهه اللى فى السوق كلها و اهو بتتكلمى و طبق الفاكهه بتاع ابو لهب جنبى على السرير اهو
منال / ههههههههههههه اعمل ايه فى خفه دمك دى بقولك ايه روح كل و اكل مراتك و ان عوزتنى فى اى وقت كلمنى
عمر / ما اتحرمش منك
منال / سلام يا حبيبي
عمر / سلام
عمر يقفل و يحط الموبايل جنبه
عمر / قالتلى اغذيكي فعاوزك تاكلى الطبق ده كله و مش عاوز بقي الحركتين بتوع مش قادره يا عمر شبعت يا عمر انا عاوز واد دكر كدا عاوزه ينزل بمجانصه و ترابيسه انتى فاهمه
أية / هههههههههه انت بتقول ايه
عمر يقشر موزايه و ياكل قطمه
عمر / مسكره و مستويه و بتدوب فى البق دوقى كدا
أية تقطم عمر يعزم عليها مره تانيه تبتسم
أية / هاخد على كدا
عمر / و انا عمرى ما دلعتك يعني اول مره اكلك فى بقك ؟!
أية / فرحان يا عمر
عمر / هتمنى اكتر من كدا ايه ربنا بس يقومك بالسلامه و انا مش هعوز اى حاجه تانى من الدنيا
أية / ربنا يخليك ليا يا عمر
عمر / و يخليكي ليا يا احلى أية فى الدنيا
……………………..
فى شقه حسام
هدايه/ شقه حلوه و عاملى الاكل بايدك و جايبلى واين و مصمم تتكلم فى الشغل
حسام / امممم تحبى تتكلمى فى ايه تانى
هدايه / كلمنى عنك عاوزه اقرب منك عاوزه افهمك
حسام / عاوزه تفهمى ايه
هدايه / غامض كدا و مش مفهوم تبان غلبان و طيب و انت يتخاف منك ههههههههه الراجل الغامض بسلامته
هدايه تغنيها و فجاه تحط الكاسه و تقوم ترقص حسام يشدها يقعدها
حسام / ههههههههههههه اسكرتى و لا ايه
هدايه / انا بعرف ارقص حلو اوى
حسام / ما انا شوفت
هدايه / ايه ده امتى
حسام / يوم عيد ميلادك
هدايه / امال قعدتنى ليه مش عاوز تشوفنى برقص تانى
حسام / انتى مش المفروض جايه عشان العمليه الجديده
هدايه / تعرف كل الرجاله اللى عرفتهم متجوزين بس كلهم بيحبونى انا بيجروا ورايا انا انما انت لا … و لا كانك شايفني و انا اللى بجرى وراك بقي فى جنتل مان يخلى مزه حلوه كدا تجرى وراه
هدايه تقوم و تفضل تستعرض نفسها حسام يشدها و يقعدها
حسام / قولتلك كاس واحد كفايا خلينا نتكلم فى الشغل
هدايه / انت عارف انت لو اخدت شفطه واحده صغيوره هتنسي الشغل اللى تعبك ده
حسام / نخلص شغل و اوعدك نقضي باقي اليوم زى ما انتى عاوزه رقص و دلع و كل اللى انتى عوزاه
هدايه / هترقصني
حسام/ و ارقص معاكى كمان بس اخلصي
هدايه / عاوز تعرف ايه
حسام / بتعملى كدا ليه انتى بتاخدى من الراجل اللى انتى عوزاه بتسرقيه ليه
هدايه / عشان هو ابن كلب يستاهل يتسرق
حسام / افندم
هدايه / هو انا مش حكيتلك عمل فيا ايه
حسام / و انتى يعني سبتيه
هدايه / اسيبه و اروح فين بس … واحده جميله زيي لوحدها دا الديابه تاكلها اكل
حسام / اخص عليهم حيوانات متوحشه
هدايه / ههههههههههههه
حسام / بس اكيد برده واحده جميله زيك ما بتمشيش الليله دى كلها لوحدها اكيد فى حد اكبر منك بيحركك
هدايه / انا ده اللى بيحركنى
هدايه تشاور على قلبها
هدايه / تحب تشوف
هدايه تفك زراير القميص حسام يمنعها
حسام / ابوس ايدك ما انتى مكمله هى خربانه خلقه
هدايه / هوريك قلبي
حسام / و قلبي انا اعمل فيه ايه اهدى شويه
هدايه / سلامه قلبك وريني كدا
هدايه تحاول تفك زراير حسام يمسك ايدها
حسام / اثبت
هدايه / ايه ؟ مالك ؟
حسام / انا ماسك نفسي بالعافيه اقسم بالله
هدايه / و ماسكها ليه هو حد معانا
حسام يبص حواليه و يبلع ريقه
حسام / تصدقى صح
هدايه تضحك بمياصه
حسام / حسبى الله و نعم الوكيل
……………….
فى شقه عمه يس
على و نور قاعدين و قدامهم اكياس كتير جدا و يس و نغم قاعدين و عمتهم و جوزها و ٣ اولاد صغيرين
نور / يعنى بجد حضرتك موافقه نكرر الزياره
الست / حبيبتي تنورى فى اى وقت كفايا اللى عملتوه مع يس و نغم انا مش عارفه اوصفلكوا كنا ميتين عليهم ازاى
على / الحمد لله عدوا
الراجل / والله يا استاذ على انا كنت بقوله كدا كنوع من التهديد مش اكتر حضرتك عارف العيال و شقاوتهم و دول ما شاء الله خمسه يعني مورستان
نور / لا هم وعدونى هيسمعوا الكلام و يبقوا شاطرين مش كدا يا يس مش كدا يا نغم
نغم / جبتيلى المايوه
على يبص لنغم
الست / مايوه ايه فى الجو ده
على / هبقي اجبهولك يا حبيبتي وعد
الراجل / يا استاذ على ما تكلفش نفسك دا شنطه الصيفي عندها جوه مليانه مايوهات
الست / الله يرحمه اخويا ما كانش حارمهم من حاجه الله يرحمه
على / الله يرحمه
نور / انا عارفه انه طلب سخيف بس انا مش قادره امسك نفسي هو احنا ينفع نبقي ناخدهم نخرجهم كل فتره خصوصا اننا فى الاجازه اهو و ما وراهمش مدرسه و لا اى حاجه
الراجل / احنا مش عاوزين نتعبكوا
على / ما فيهاش تعب و لا حاجه
نور / احنا ما عندناش اولاد و اخدنا عليهم اوى و حبيناهم و هم كمان حبونا
الست / اسمعى يا استاذه انا مقدره جدا موقفكوا بس ولاد اخويا الله يرحمه مش تقال عليا
على / نور ما تقصدش حاجه زى دى ابدا
نور / ابدا والله انا عارفه انه طلب سخيف و قولت ده فى اول كلامى بس انا اقصد اساعدك فى تربيتهم حضرتك ما شاء الله عندك ٣ اولاد
الست / خمسه فى عين العدو
الراجل / اهدى يا سحر الست ما تقصدش
على / احنا اسفين على كل حال
الراجل / بص يا استاذ على انا قلبي ارتاحلك من اول ما شوفتك و عرفت انك راجل ابن ناس و متربى بس دول أمانه فى رقبتى انا و سحر و مسؤليه
نور / و احنا مش هناذيهم احنا بس هنساعدكوا
سحر / يا ستى كتر خيرك عملتى الواجب و زياده
الراجل / استنى بس يا سحر
سحر / استنى ايه
الراجل / استنى نسمع للاخر مش يمكن فعلا قصدهم خير
سحر / قصدهم باين على وشهم عاوزين ياخدوا يس و نغم
يس / عشان خاطرى يا عمتوا عشان خاطرى عشان خاطرى
سحر / بس يا يس ادخل اوضتك يلا … يلا يا اولاد معاد النوم جه يلا كلو على جوه يلا
العيال كلها تدخل جوه و نغم لا
سحر / خشى جوه يا نغم
نغم تروح تحضن نور و تدخل جوه و نور و على متابعينها
على / هم فى تجريبى و لا خاص
الراجل / انا عيالى فى تجريبى و يس و نغم فى خاصه بس بدورلهم على واسطه تنقلهم فى نفس المدرسه مع اخواتهم و اهى جنب البيت
نور / طب احنا نقدر نساعد ازاى
سحر / كتر خيرك انتى كفايا تيجي كل ما تحبى تنورينا و تطمنى عليهم و لما تبقي تلاقى حاجه نقصاهم ابقي اتكلمى
على / استغفر الله احنا عارفين انكوا قايمين بالواجب و زياده احنا بس
سحر / اسمع يا استاذ انتوا كتر خيركوا على اللى عملتوه معانا بس العيال دى ولاد اخويا انا و انا كفيله بيهم و ان كان ربنا ما كرمكوش و نفسكوا فى عيل تربوه فالملاجئ مليانه ما وقفتش على العيلين اللى عندى
نور تبصلها و تبتسم ابتسامه كلها وجع و تبص لعلى على يقف
على / عن اذنكوا
نور تقف الكل يقف
الراجل / حقكوا عليا هى سحر كدا مندفعه شويه بس دا من حبها فى اخوها الله يرحمه و اولاده
على / ربنا يقدركوا و يجعله فى ميزان حسناتكوا عن اذنكوا
على يمسك ايد نور و يمشوا الراجل يقفل الباب
الراجل / ليه كدا يا سحر ليه كدا
سحر / مش هدى ولاد اخويا لغرب يربوهم انت فاهم
الراجل / ناس محترمين و باين عليهم العز ترفصى النعمه برجلك ليه
سحر / نعمه ايه دى انت عاوز تجننى
الراجل / طبعا ما انتى مش حاسه بحاجه و لا فارق معاكى مصاريف و ان كانت مصاريف السنادى مدفوعه فالسنه الجايه هتدفعى مصاريف خمس عيال بكتبهم بشنطهم باليونيفورم غير الدروس و الاكل و الشرب و الفواتير هو انا قادر على تلاته لما تخليهم خمسه
سحر / بتتكلم على اساس ان ابوهم ما سابلهمش شئ و شويات يصرف عليهم
الراجل / ساب ايه ساب شقتين و عربيه و حته ارض و مجلس حسبى بيحاسبنى بالجنيه و السحتوت
سحر / مجلس حسبى يحاسبك احسن ما ربنا يحاسبك … انا داخله انام تصبح على خير
الراجل / و انتى من اهله نوم الظالم عباده
سحر تبصله و تدخل جوه و الراجل ينفخ
………………….
فى شقه حسام
هدايه نايمه فى السرير و حسام بيقلب فى موبايلها تصحى
هدايه / موبايلي ده
حسام / اه كنت بتفرج على صورك لو مش عندك مانع
هدايه تتمطع
هدايه / تؤ خد راحتك … انا جعانه
حسام / تحبى تفطرى ايه
هدايه / قهوه
حسام/ تحت امر جناب الكونتيس
حسام يحط الموبايل فى الشاحن و يقوم يدخل المطبخ ثوانى يسمع صوت باب بيتقفل يطلع يبص يلاقي هدايه فى الحمام و صوت المايه يرجع المطبخ تليفون يرن يروح يرد يلاقي ندى ياخد الموبايل و يروح البلكونه و يقفل عليه الباب
حسام / قلبي
ندى / بعطلك
حسام / بالعكس انا اللى كنت خايف اكلمك اصحيكي عامله ايه وحشانى اوى
ندى / انا تمام الحمد لله اخبار المؤتمر ايه
حسام / والله لحد دلوقت ما فيش جديد بس شغال يعني بدات اتعرف على ناس جديده و ربنا يسهل
ندى / ربنا يوفقك فطرت
حسام / لسه والله الاكل كتير بس النفس بقي
ندى / ليه مالك
حسام / بقول كنت جبتك معايا بوفر لمين
ندى / خلاص هانت ترجع بالسلامه
حسام / من قلبك يا ندى .. من قلبك عوزانى ارجع ؟ مش بتقولى داهيه لا ترجعه
ندى / لا بقول ترجع بالسلامه لبنتك مهما كان الخلاف اللى بينا … احنا ما لناش غيرك
حسام / هاين عليا اسيب كل حاجه و ارجع
ندى / روح افطر و انا هروح اشوف اللى ورايا
حسام / هتكلميني تانى ؟
ندى / انا فاضيه طول الوقت انت لو فضيت كلمنى
حسام / تمام حاضر
ندى / سلام
حسام / سلام
حسام يقفل و يفتح البلكونه و يدخل يلاقي هدايه واقفه فى المطبخ لابسه قميصه و لافه شعرها بفوطه و بتعمل قهوه
حسام / بشبه على القميص
هدايه / لو محتاجه اقلعهولك هههههههههه
حسام / لا و على ايه خليه
هدايه / انت لسه هتكمل ما خلاص بقي
هدايه تصب القهوه
هدايه / مراتك ؟
حسام يبصلها
هدايه / كنت بتكلم حد فى التليفون .. مراتك ؟
حسام / اه ندى انتى ما طولتيش فى الحمام يعني
هدايه / ما انا هدخله تانى و لا انت مش ناوى تستحمى
حسام ياخد القهوه و يشرب بق
هدايه/ و رجع ابو الهول للتقل تانى مش هنخلص احنا بقي
حسام ما يقدرش يمسك نفسه و يضحك
هدايه تروح تبص فى الصاله تلاقى شنطتها على الكنبه تروح تقعد و تحط القهوه قدامها على الترابيزه و تفتح الشنطه و تطلع ورقه تمسكها ناحيه حسام حسام يروح ياخدها و يقعد
حسام / الكميه المرادى اكبر و الريسك اعلى
هدايه/ و الكوميشن كمان اعلى
حسام / انا عرفت ليه ما حدش بيعمر فى الشغلانه دى
هدايه / ما تبقاش جبان
حسام / ما هو ما ينفعش نفس الراجل يتسرق تلت مرات فى وقت قليل جدا ما نسلم روحنا احسن
هدايه / امال انت جبتنى هنا ليه ما دام هنعيد الفيلم من اوله
حسام / كان نفسي اشرب القهوه من ايدك
هدايه تبص الناحيه التانيه و تنفخ
حسام / فى جوه ازازه تانيه من اللى قربعتيها امبارح
هدايه / ما بشربش بالنهار
حسام / احسن برده و ياريت تبطلى شرب خالص و تفوقى لنفسك كدا
هدايه تفك الفوطه و تنزل شعرها المبلول على ضهرها و تتمطع
هدايه / خلينا فى الشغل
حسام / انا غيرت رايي انا عاوز قميصي
هدايه / ههههههههههههههههه
………………….
فى شقه على
نور واقفه فى المطبخ لوحدها بتعمل اكل جرس الباب يضرب تروح تغسل ايدها و تروح تفتح تلاقي مندوب توصيل معاه ورد
الشاب / مدام نور زغلول
نور / انا
الشاب / الورد ده عشان حضرتك ممكن تمضيلى هنا
نور تمضي على الوصل و تاخد الورد
نور / ميرسي
الشاب يمشي و نور تاخد الورد و تحطه على الترابيزه و تاخد الكارت تقرأه
نور / مش بعرف اكتب كلام حلو بس متاكد ان الرساله وصلت .. على
نور تبتسم و تروح تجيب التليفون و تتصل على يرد
على / وصل مش كدا
نور / بحبك
على / و انا كمان
نور / كنت بعملك حمام كداب
على / اى حاجه من ايديكى حلوه
نور / هتتاخر
على / ان شاء الله لا هتنزلى الصيدليه
نور / لا بس هنزل لعمى اروق الدنيا بقالى ياما مقصره معاه اوى
على / تمام يا حوبى لو تحبى تستنى اجى اساعدك
نور / لا مش مستاهله شيلاك للتقيله
على / و انا عيونى ليكي
نور / تسلملى احلى عيون … انا هقفل بقي عشان ما اعطلكش
على / سلام
نور / سلام
نور تقفل و تبص للورد بحب و تقعد تصوره و تقوم تدخل المطبخ و هى مبسوطه
………………..
فى المحل عند على
على قاعد فى المكتب مع جوز عمه يس
الراجل / انا اهم حاجه عندى انكوا ما تكونوش زعلانين
على / انا مقدر جدا موقفها و بحترمه بالعكس اى رد فعل تانى ما كانش هيبقي طبيعي
الراجل / يا استاذ على انت راجل محترم بس انت اصلك ما تعرفش اخو مراتى كان عايش بره و بيقبض بالدولار و بيبعت لحماتى الله يرحمها فلوس كل شهر مصاريف علاجها و كدا و بعدين عمل حادثه و اتوفى و مراته الله يرحمها رفضت تبيع شقه من الشقتين اللى ورثوهم عشان تسيل فلوس لحماتى مصاريف العلاج مع ان حماتى وارثه
على / معلش ما تاخذنيش
الراجل / حماتى بحكم الشرع ليها سدس الشقتين و العربيه اللى سايبهم جوز اختى الله يرحمه و الباقي يتوزع على مراته و عياله مراته بقي ما رضيتش تبيع شقه و تسيل لحماتى نصيبها و الست ماتت ما هو علاجها كان غالي و احنا على يدك اللى جاى على قد اللى رايح و انا عندى عيال و المصاريف مش هقولك عليها
على / الله يكون فى العون
الراجل / سحر بقي رفعت قضيه ضم عشان تسحب الحضانه من مرات اخوها و القضيه دى اخدت فى المحاكم سنين
على / ازاى يعني هى مش الحضانه من حق الام
الراجل / كيد نسا بعيد عنك المهم الست ما طولتش و ربنا انتقم منها و طلع عندها المرض الوحش و ما استحملتش كام جلسه كيماوى و ماتت هى كمان طبعا انا مراتى ورثت من نصيب امها قولنا نخصخص نصيبنا ان شالله حتى فى العربيه و اهو ترحمنى من بهدله المواصلات لقيت مجلس حسبى و فيلم و اشي محامين و ما ادراك ما لفه المحامين و كل واحد يسوحك شويه
على / هو حضرتك بتقولى الكلام ده ليه
الراجل / يا باشا انا بوريك انى مش طالع من ورا تربيه العيال دى بحاجه دا حتى الشقتين اجرناهم بطلوع الروح و الاتنين على بعض ما بيجيبوش قسط واحد من مصاريف مدرسه العيال دول و مع كدا شايلهم على راسي و فى عنيا
على / ربنا يجعله فى ميزان حسناتك
الراجل / انا عارف انك راجل محترم اصل ما يعملش اللى انت عملته مع العيال دول فى الزمن ده غير واحد محترم زى سعادتك
على / ربنا يكرم اصلك
الراجل / انا بس مش صعبان عليا غير الواد يس اللى اتعلق بيك و بالمدام خالص دا حتى البت نغم لسه متخانقه مع سحر مراتى عشان عوزاها تسرحلها شعرها زى ما المدام بتاعتك كانت عملاهولها
على / و الله و احنا كمان اتعلقنا بيهم
الراجل / يا باشا خلينا منطقيين دول خمس عيال و انا الشقه ٣ اوض بما فيها اوضتى و البت مسيرها تكبر و هتحتاج اوضه لوحدها و ما تقوليش زى سحر ساعتها بيت ابوهم مفتوح ما هو الواد و البت مش هيروحوا يعيشوا فيه لوحدهم و كمان ساعتها هيبقي فى ايجار شقه واحده و هيكونوا لسه بيدرسوا ما البت مش هتفضل تنام مع اخوها فى نفس الاوضه لحد ما هو يتخرج
على / معاك حق فى كل اللى قولته
الراجل / الحريم ما بتفهمش الحاجات دى بتبص تحت رجليها و كمان مش قادره تفهم ان عيالي صبيان و بكره يكبروا هم كمان و يدخلوا فى مرحله مراهقه و قله ادب
على / طب انا اقدر اقدم ايه
الراجل / لا انت فهمت ايه انت كتر خيرك انا بس بفك معاك بكلمتين اصل سحر لما بقولها الكلام ده ما بتسمعش و مع اول حرفين تتعصب و تتقمص و عيال اخويا عيال اخويا هو انا عاوز ارميهم فى الشارع ما انا لو عليا اشيلهم على راسي بس اديني شرحتلك الظروف
على يهز راسه
الراجل / انا لو قولت الكلمتين دول حتى لزمايلى فى الشغل او صحابى على القهوه بسمع كلام ربنا ما يكتبه على مسامعك بس هعمل ايه و عندك السنه الجايه هضطر انقل العيال من مدارسهم الخاصه الغاليه لمدارس تجريبى حكومى و بعد ما كان الفصل فيه بالكتير خمسه و عشرين عيل هيبقوا فى فصل ميه عيل و طبعا عشان العدد مش هودى و هجيب مدرسين فى البيت ده مش هياثر عليهم ما هو هياثر العيال مش بس ابوهم و امهم ماتوا واحد ورا التانى لا دول كمان سابو بيتهم بعد ما كل واحد كان له اوضه بقوا متكربسين فوق بعض بس انا اقدر اعمل ايه ما حضرتك شايف الدنيا و الاسعار
على / طب انا ممكن اخصص ليهم مبلغ كل شهر
الراجل/ اخص عليك يا استاذ بقي انا بقولك كدا عشان تقولى كدا ما هو عشان كدا الواحد ما بيتكلمش على اخر الزمن هشحت على عيالي
على / ابدا والله انا ما اقصدش كدا ابدا بص حضرتك انا مش هقول اخد العيال علاطول لان المدام عندها حق فى الاول و الاخر دول ولاد اخوها انا بس ممكن استاذنك اخدهم خميس و جمعه افسحهم اغيرلهم جو كدا يعني و ان كان على الدروس انا اعرف مدرسين كويسين اوى حبايبي و يتمنوا يخدمونى هياخدوا بالهم من العيال و يجاملونى
الراجل / طب والله تبقي عملت فيا جميله دا انا المدرسين بتوع عيالي مطلعين عين اهلى
على / لا ما تقلقش من الحكايه دى انا هظبطهالك
الراجل / على العموم انا هتكلم تانى مع سحر و بيتهيالى المرادى مش هتقدر تقول لا
على / على خيره الله
……………
فى شقه حسام
حسام نايم فى السريرو هدايه فى حضنه
هدايه / اخص عليك بقي بعد كل اللى حصل بينا و برده عمال تزن تشتغل مع غيرى
حسام / مش ابقي عارف مين حبيبي من عدوى
هدايه / طول ما انا معاك انت فى الامان
حسام / تؤ
هدايه / ما مليتش عينك انا يعني
حسام / دا انتى تملى عين الباشا بس لامؤاخذه انا راجل شرقى الحريم تتسند عليا ما اتسندش عليهم
هدايه / ما اعتمدتش على راجل و سندنى كلو وقت الجد بيخلع
حسام / بس ما تقوليش رجاله
هدايه / ههههههههههههههه الا اخبار الراجل المخلص اللى بيحب مراته ايه
حسام / بعشقها بس مش عارف اعمل معاها ايه اتربت ان جسمها عيب حد يشوفه او يلمسه و بعدين احنا خلفنا خلاص و كمان شالت الرحم فمش هتخلف تانى فايه لزمته بقي
هدايه / هو فى حد لسه بالعقليه دى
حسام يبصلها
حسام / و هو الطبيعى عقليتك يعني
هدايه/ لا انا عاطله عادى ههههههههههههه
حسام يضحك
هدايه / غير كدا بتحبها
حسام / بعشقها بعشق كل حاجه فيها حتى خيابتها و نكدها
هدايه / طب ما تخلى حد يتكلم معها
حسام / مامتها متوفيه و الحاجات دى فى مصر منطقه محظوره ممنوع الكلام فيها تعرفى انها حتى لو حصل بينا حاجه بتقعد تعيط و ترجع كانها عملت جريمه
هدايه / دى محتاجه سيكايتريست
حسام / ما احنا كمصرين عندنا مشكله تانى اكبر ان اللى بيروح للدكتور النفسي مجنون فاكيد مجرد انى اقترح عليها حاجه زى دى يعنى ايام طويله من النكد
هدايه / و كنت صابر ازاى طول الفتره اللى فاتت
حسام / و لو ما كنتيش ظهرتى بزنك و قرفك كنت هفضل صابر برده و عمرى ما كنت خنتها
هدايه / لو ما كانش انا كان غيرى انت بس كنت محتاج الليتل بوش
حسام يضحك
هدايه / كان نفسك انت بس كنت مكسوف شويه يعني زى ما بتقولوا مش اول ما تشطح تنطح بتاخد السلم بالتدريج
حسام / بس ما تنكريش انى طموح
هدايه / مش دايما ميزه ممكن طموحك يوقعك مع ناس انت مش قدهم
حسام / و عشان كدا عاوز اعرف انا بلعب مع مين مسنود على مين هو انتى بعد كل ده مش بتثقى فيا
هدايه / ههههههههههههه بعد كل ده !!!
حسام / دا انتى طماعه بقي عاوزه اكتر من كدا ايه
هدايه / و انا كنت خدت ايه اصلا
حسام / على فين
هدايه / بيتهيالى تروح لمراتك و كفايا مؤتمرات لحد كدا
حسام / انا مش هيبقي عندى مؤتمر كل يوم ما تبقيش رخمه بقي
هدايه / لازم تتعلم ان لما تبقي فى فى ايدك نعمه تقدرها مش تحاول تستغلها انك توصل لنعم تانيه … النعم بتزول يا سمسم
حسام / بسم الله ما شاء الله دا عرق النكد الحريمي واصل حتى للبنانيات
هدايه تبصله و تضحك و تروح تعدل مكياجها
…………………
- يتبع الفصل التالي اضغط على ( رواية سلف و دين ) اسم الرواية