رواية انت عشقي وقسوتي (كاملة جميع الفصول) حصريا عبر دليل الروايات بقلم دينا قدري
رواية انت عشقي وقسوتي الفصل العاشر 10
- بارت ١٠
سليم .. انتى عارفة ان الامتحانات بعد اسبوع والوقت مضغوط اوى فغصب عنى .. وعشان اثبتلك ان كل اللى فى دماغك ده غلط وانى بحبك غمضى عنيكى
سيرين .. ليه
سليم .. غمضى بس
اغمضت عيناها وهى تشعر بالقلق لا تعلم ما سيقدم عليه فى عدم وجود والدها بينما اخرج علبة من جيبه بها سلسال رقيق
اقترب منها كى يلبسها اياه ولكنه لم يستطع فاقترب منها اكثر فأكثر حتى كاد وجهه ان يلتصق بها
لم يستطع السيطرة على نفسه والتحكم باعصابه فكاد ان يلتهم شفتيها قبل ان يضع السلسال برقبتها
وفجأة شعر بمن يدفعه من الكرسى بعنف ملقيا به على الارض
سليم بتألم .... اااااه
فتحت عينيها لتتفاجئ به مكوما على الارض يمسك بقدمه متألما
........
عاليا .. يعنى اتصالحتو الحمدلله
ملك .. اه .. بس مكنتش اتخيل انه بالجراءة دى انه يجيلى تحت البيت .. لأ وكمان كان عايز يتعرف على اهلى
عاليا .. عمرى ما كنت اتخيل انه يطلع بالجنان ده .. اربع سنين معاه فى الكلية وكل اللى باين منه انه شديد ومعاملته جافة وجد اوى ملوش فى الهزار
ملك بابتسامة حالمة .. فعلا هو اتغير كتير اوى .. مبقاش ادم اللى نعرفه
عاليا بخبث .. البركة فيك يا جميل
ملك .. مقلتليش صحيح هو احمد هيرجع امتى من امريكا
عاليا .. ان شاء الله بعد اسبوع
ملك باستغراب .. ايه ده عالامتحانات علطول !!
عاليا .. اه شوفتى .. خلص رسالته خلاص وجاى
ملك .. طب وانتى هتعرفى تركزى فى امتحاناتك ازاى. ..ما تيجى تعدى معايا فترة الامتحانات دى
عاليا بخجل .. لا يا حبيبتى شكرا .. مش مستاهلة
ملك .. امال هتعملى ايه طيب .. هتعدى معاه وفى امتحانات اكيد مش هتعرفى تركزى .. هو جاى فى وقت رخم جدا ما كان يستنى اسبوع كمان
عاليا .. خالتو كانت لسة بتتكلم معايا فى الموضوع ده .. وبتقولى انه هينزل على خالتو منى اللى فى البلد هيعد معاها لحد ما اخلص امتحانات عشان ميعطلنيش
ملك .. وخالتك منى دى عندها بنات .. واكملت بخبث .. احسن تكون واحدة منهم حاطة عينها عليه وتخطفه منك يا موكوسة
عاليا .. ههههه هههههه مش قادرة يخربيتك هههههه
ملك .. اضحكى ياختى اضحكى لحد ما تيجى اللى تديكى على قفاكى
عاليا بضحك ... هههههه يابت بس باة .. ههههه بنتها متجوزة يا اختى وعايشة برة مع جوزها اطمنى .. وعندها ابنها فى ثانوى ده اللى احمد هيعد معاه
ملك .. ايوة كدة طمنى قلبى
عاليا .... هههههه انتى نيتك سودة اقسم بالله هههههه
......
خرج ادم للحديقة لاستنشاق الهواء النقى بعد مكالمته مع ملك .. فقد شعر بالسعادة الشديدة لاقتراب تحقق احلامه بها .. وايضا لانه تأكد انها سامحته معاهدا نفسه عدم تكرار ذلك الخطأ بحقها مرة اخرى
واثناء تجوله رأى سيرين تجلس مع سليم .. هم ان يبتعد عنهم حتى لا تضغط عليه سيرين بالجلوس معه
.. ولكنه لمح سليم يحاول الاقتراب منها وهى مغمضة العينين .. شعر بالدماء تفور بعروقه ليركض نحوهم بسرعة .. ود لو لكمه بوجهه لكمة مدمية حتى يبعده عن شقيقته .. ولكنه لا يريد ان يجرحها ويتسبب لها بالحرج او الحزن
لذا استغل انها مغمضة العينين و قام بدفع مقعد سليم بقدمه من الخلف بعنف حتى اسقطه ارضا سقطة عنيفة آلمته .
سليم بتألم ... ااااه
تفاجئ بوجود ادم امامه ينظر له بغضب وتوعد .. نظر له سليم بارتباك وخجل بعد ادراكه رؤية ادم له ومعرفة نيته وتسببه بسقوطه فحاول اخفاء ما بيده
انتفضت سيرين مفزوعة لتفتح عينيها بقلق ترى ماذا حدث وما ذلك الصوت لتجد سليم ملقى على الارض متألما
اسرعت تحاول مساعدته كى يستطيع الوقوف
سيرين بقلق .. مالك يا سليم ايه اللى وقعك ؟!
ادم بخبث .. حد يعد على كرسى رجله مكسورة برضو .. ثم اكمل بغيظ .. مش تاخد بالك !!
سليم ... اااااه رجلى اتلوت مش قادر اقف اااه
امسكت سيرين بذراعه محاولة مساعدته لتقول
سيرين .. اتسند عليا .. تعالى اعد .. تعالى
ازاح ادم يدها عنه بحده مستلما اياه ليستند اليه
ادم .. سيبيهولى انتى انا هسنده
سليم بغضب مكتوم وصوت غير مسموع .. انا توقعنى من عالكرسى يا ادم
ادم بابتسامة مستفزة وصوت اشبه بالهمس وهو يسنده .. ولو فكرت تقرب من اختى تانى مش هرحمك
سليم بغضب .. دى خطيبتى
ادم لسيرين .. روحى هاتى كريم ورباط ضاغط بسرعة .. ثم نظر اليه بتوعد مردفا بكلمات موحية .. كويس انها متكسرتش المرة دى مجرد التواء بس
اجلسه ادم على كرسى وذهبت سيرين لتحضر الكريم كما طلب ادم
ادم ممسكا بياقة قميصه ناظرا بعيونه بغضب وشر .. خطيبتك تعد معاها باحترامك وبلاش وساخة والا اقسم بالله المرة الجاية هكسرلك رجليك الاتنين .. انت اللى رحمك منى انها كانت اعدة وخوفت على زعلها .. بس لو محترمتهاش واحترمت المكان اللى انت فيه والثقة اللى احنا مدينهالك .. قسما بجلالة الله لهندمك ندم عمرك يا سليم .. انت سامع !!
لم يستطع سليم الرد بعد ارتعابه من تهديدات ادم الصريحة له فاكتفى بهز رأسه علامة الايجاب مطئطئا رأسه للارض بخجل
رأى سيرين تخرج للحديقة ومعها والدها
صلاح بقلق .. ايه يا سليم سلامتك ايه اللى حصل
نظر ادم لسليم بتوعد ليرد الثانى .. مفيش يا عمى اعدت على كرسى مكسور فوقعت من عليه ورجلى اتلوت .. ثم نظر لادم .. وكتر خيره ادم سندنى واعدنى على كرسى تانى
نظر صلاح لادم بشك .. فهو يعلم ان ادم لا يطيقه كى يساعده كما ان ليس هناك اى كرسى مكسور بالحديقة .. اذا هناك شئ ما يحدث
سيرين .. طيب اقلع الشوز عشان احطلك الكريم واربطهالك
سليم .. شكرا ملوش لزوم انا خلاص بقيت كويس .. ثم نهض سريعا .. عن اذنكم باة
صلاح .. هتمشى ليه ما انت سهران معانا وبكرة اجازة
سليم .. معلش يا عمى عندى شغل كتير وتحضير ملخصات
ادم .. سيبه على راحته يا بابا بلاش نعطله
سليم .. سلام عليكم
بعد ذهاب سليم
صلاح .. ادم .. تعالى عايزك
ادم .. خير يا بابا فى حاجة
صلاح .. انت وراك حاجة ؟؟
ادم .. لا بس كان يوم طويل ومعظمه برة فمرهق وعايز انام
صلاح .. منا عايز اعرف انت كنت فين كل ده .. وفيه حاجات مهمة عايز اتكلم معاك فيها
ادم .. حاضر يا بابا تحت امرك
سيرين .. تحبو اعملكم حاجة تشربوها ؟
ادم .. ده ايه الدلع ده بس .. والله انا بفتقد الدلع ده لما بتسافرو ما تخليكى معايا يا سيرى
احتضنت والدها من الخلف مقبلة وجنته .. وانا اقدر اسيب بابا حبيبى لوحده برضو .. ده هو اللى فى القلب
ادم .. يا سلام ياختى وانا ايه فى الطحال !
سيرين بتريقه .. لا انت كبد اختك يا اخويا
قبلها والدها واحتضنها بحنان الاب .. انا اللى مقدرش ابعد عنك يا روحى .. مش عارف هجوزك ازاى للواد سليم ده واسيبه ياخدك منى
ادم بسخافة .. خلاص متجوزهاش
سيرين .. بطل رخامة ياعم وخليك محضر خير.
ادم .. طب روحى اعمليلنا ٢ قهوة مظبوط باة من ايديكى الحلوين دول وسيبينى مع الحاج صلاح شوية
سيرين .. طيران هوا
ادم .. ادينى وزعتهالك اهو يا حج .. خير باة فيه ايه
صلاح .. تعالى نعد عشان فيه مواضيع كتير نتكلم فيها .. واعدتنا هتطول
.....
على الهاتف
سليم .. متنيلتش .. ملحقتش اعمل حاجة .. اخوها شافنا وكان يوم اسود
والد سليم .. وايه يعنى لما يشوفك وانت بتديها هدية
سليم .. لا منا كنت عايز البسهالها بطريقة رومانسية وقربت منها شوية و..... بس البيه طب علينا وبوظ كل حاجة
والد سليم .. الله يخربيتك رومانسية ايه وزفت ايه على دماغك .. انت كنت عايز تبوسها !!
سليم .. وفيها ايه ؟! مش خطيبتى ؟
والد سليم .. نهارك مهبب .. احمد ربنا ان ادم اللى شافك .. لو كان ابوها كان طردك وفسخ الخطوبة .. منك لله يا شيخ انا قلتلك تتنيل تقرب منها !!
سليم .. يووووه يا بابا اللى حصل باة .. ماهى قمر برضو والواحد بيضعف
والد سليم .. جتك خيبة فى خيبتك .. قبل ما تضعف ياخويا فكر ان لو قربتلها ابوها مش هيرحمنا وهيطردنا من كل حاجة .. وكل حاجة هتضيع لا شركات ولا فلوس ولا اى حاجة هنطولهم
سليم .. طيب يا بابا .. خلاص مش هقربلها تانى .. كفاية اللى ادم عمله معايا انا لحد دلوقتى مش عارف امشي كويس على رجلى
والد سليم .. احسن تستاهل .. اهو فوقك واداك انذار ياريت تعمل بيه
سليم بزهق .. يوووه ما خلاص باة .. انا وصلت .. سلام
......
صلاح .. مش هتقولى كنت فين طول اليوم وانت عارف ان خطيب اختك جاى ولازم تبقى موجود
ادم .. كان عندى مشكلة كدة وبحلها .. ولأ مكنتش اعرف ان البيه هيشرف
صلاح .. مشكلة ايه دى
فكر ادم ان يصارح والده بعلاقته مع ملك .. ولكنه وجد ان هذا ليس الوقت المناسب .. فلم يرد ان يعرف انه ظل عندها طوال اليوم خوفا من ان يظن بها والده ظن سئ .. او يشعر انها حقا سوف تتسبب بعطلته عن دراسته ومستقبله
لذا فضل ان يخترع سببا اخر ويترك موضوع ملك بعد الامتحانات
ادم .. عمر كان عنده مشكلة كدة وكان محتاجنى
صلاح .. اه .. هو باباه عامل ايه صحيح
ادم .. باة كويس الحمدلله
صلاح .. فتحت معاه موضوع الشركة ؟
ادم .. لأ لسة .. بصراحة خايف احرجه او احسسه انه هيشتغل عندى .. كمان هو حياته كلها فى الشرقية ومعتقدش هيوافق يسيبهم ويتنقل القاهرة
صلاح .. بس انا مقلتش يشتغل عندك .. انا قلت يمسك الشغل معاك وتبقو سوا
انت من كلامك عنه حسيت انه اكتر واحد هتقدر تشتغل معاه وتنسجمو فى الشغل مع بعض .. وبما انه صاحبك وبيحبك هيبقى قلبه عليك وعلى الشغل
فهو انسب حد خصوصا ان ثقتك فيه كبيرة
ادم .. اه جدا يا بابا وانا اتمنى انه يوافق .. ان شاء الله نخلص امتحانات وافاتحه
صلاح .. ولو على اهله ماينقلو القاهرة هما كمان ايه المشكلة ؟
ادم .. ازاى بس يا بابا .. ووالده ؟؟ هيعمل ايه فى شغله وبيته .. حياته كلها هناك
صلاح .. طيب فاتح انت عمر بس الاول واتأكد انه موافق وعنده رغبة انه يبقى معاك .. والباقى امره سهل
ادم .. خلاص حاضر
صلاح .. على فكرة انا روحت امبارح مضيت العقود وخلصت .. وبنعمل تعديلات بسيطة عالشركة وخلال شهر المبنى هيكون جاهز .. شد حيلك انت يا بطل واتخرج والشركة هتكون تحت امرك
ادم .. بجد يعنى خلاص .. الشركة بقت موجودة على ارض الواقع؟
صلاح .. طبعا يابنى امال انا بلعب .. ده انا نازل مخصوص عشان اخلص الموضوع ده
ادم .. طيب وشريك حضرتك نازل امتى ؟؟
صلاح .. الشركة تجهز بس وهو هييجى يظبط كل حاجة ويشغلها تحت التجربة لحد ما انت تخلص وتبدأ معاه
ادم .. مش متخيل سعادتى يا بابا .. وانا حاسس حلمى بيتحقق ادام عينيا
صلاح .. انا عايش عشان احقق احلامكم يا حبيبى .. بس خلى بالك .. انا ساعدتك كبداية بس .. يعنى مبنى ومكان وكدة تبدأ منه .. لكن انت بعد كدة المسئول عن كل حاجة .. لازم تتعب ويطلع عينك عشان تأسسها صح .. مسئول عن انك تكبرها وترسخها فى السوق وتخليها من اكبر الشركات
عشان كدة احنا مش هنحطها تبع سيرادم
ادم .. ايه ده ليه !!
صلاح .. اولا عشان دى شركة لسة بتبدأ وتعتبر تجريبية فوجودها ضمن مجموعة شركات سيرادم ممكن يأثر على اسهم سيرادم ومكانتها فى السوق
ثانيا عشان فى اسوأ الظروف لو الشركة منجحتش ووقعت .. متأثرش على باقى المجموعة ولا تهز سمعتنا فى السوق
فالشركة دى هتكون مستقلة وخاصة بيك فى البداية بس .. واللهى لو اثبتلى انك اد المسئولية وكبرتها ونجحتها وعليت اسهمها فى السوق .. ساعتها نندمج مع بعض وانا نفسي اللى هبقى عايز اندمج معاك
لكن استهونت وفشلت .. يبقى انت اللى هتتحمل كل العواقب .. انت اللى هتتحمل مسئوليتها يا ادم .. فاهمنى
ادم بحماس .. فاهمك .. واوعدك انى هبهرك وهخليك تفتخر بيا وهخليها من اكبر الشركات .. ثم اكمل بغيظ .. واكبر من سيرادم نفسها كمان
صلاح .. يا سلام .. وانا اطول ابنى يبقى انجح منى واعد انا باة ارتاح واسيبله هو المسئولية كلها
ادم مقبلا يد ابيه بحب .. انا مهما كبرت ونجحت هتفضل انت دايما الاصل والاساسى فى كل حاجة .. وجودك هو اللى بيقوينى ويطمنى يا بابا .. وهو اللى بيشجعنى اخد الريسك ومخافش
صلاح .. وانا واثق انك ادها
.....
حاول عمر الاتصال بعاليا مرارا ولكن لا يوجد رد
لا يدرى لما يريد دائما التحدث معها .. يريد ان يعرف عنها كل شئ .. فهى دائما بفكره ولا يستطيع التخلص من افكاره تلك
ظل يتذكر محادثته معها وكم شعرت بالراحة للتحدث معه .. كم كان سعيدا حينما قالت ذلك .. كم فرح لارتياحها بعد الحديث معه
كم هى بريئة ونقية وجميلة من داخلها
ظل يتخيلها برقتها وضحكتها وابتسامتها التى تزلزله
قاطعت والدته افكاره وقد احضرت له كوبا من الشاى الساخن
سعاد .. ايه يا حبيبى اعد لوحدك ليه
عمر .. ها .. مفيش يا ماما كان معايا مكالمة بس
سعاد .. طيب اشرب الشاى يدفيك شوية الجو برد انهاردة
ما تدخل جوة احسن من البرد ده
عمر .. حاضر يا ماما .. هكلم ادم بس وجاى
سعاد .. سلملى عليه .. ومتطولش عشان فادى جوة بملازم الرياضة ومستنيك
عمر .. ااااه كدة السهرة صباحى انهاردة
سعاد بطيبة .. معلش يا حبيبى متعشم فيك .. بيقول لمامته مبيفهمش الرياضة الا منك .. معلش ثواب
عمر .. لا انا معنديش مشاكل والله وبحب فادى .. بس كان نفسي انام
سعاد .. ما انت بعد كدة داخل على امتحانات ولسة ادامك عالاقل اسبوعين يكون الواد فشل
بص ذاكرله جزء انهاردة على اد مقدرتك وبكرة كملو
متضغطش على نفسك وتسهر
عمر مقبلا يدها .. انتى تؤمرى يا ست الكل .. انا داخل معاكى وابقى اكلم ادم بكرة احسن
سعاد .. اللى تشوفه يا حبيبى
.....
صلاح .. ادم عايز اسألك سؤال وترد عليا بصراحة
ادم بقلق .. خير يا بابا
صلاح .. هو ايه اللى حصل لسليم فى الجنينة .. وقلت بصراحة
ادم .. طب ماهو قالك بتسألنى انا ليه
صلاح .. احترم ذكائى شوية يا ادم انا مش صغير .. اولا احنا معندناش كراسى مكسورة فى الجنينة
ثانيا .. ازاى انت تسنده بنفسك لما يقع .. فيه حاجة مش مظبوطة وانا مش داخل دماغى انه وقع لوحده كدة من الكرسى
ادم .. هو حضرتك شاكك فى ايه ؟!
صلاح .. معرفش .. بس حاسس ان ليك ايد فى الحوار ده
ادم .. بص يا بابا .. بصراحة انا فعلا اللى وقعته .. بس ده ملوش علاقة بانى بكرهه ومش بطيقه .. الموضوع ليه ابعاد تانية .. بس اسمحلى متكلمش فيها
صلاح بدهشة .. انت الله وقعته !! ليه يابنى انت مجنون
ادم .. قلت لحضرتك مش هقدر اقول اسباب
صلاح بشك .. هو عمل حاجة لاختك ؟
ادم بحدة وغيرة على اخته .. انا وقفته عند حده .. واستحالة يفكر يعمل حاجة .. انسى باة الموضوع ده يا بابا موقف وعدى
صلاح بغضب .. ازاى يعنى .. يقرب لاختك وانا موجود !!
ادم .. لالا انت فاهم غلط يا بابا .. مفيش حاجة حصلت خيالك ميروحش لبعيد .. وعلى كل حال هو فهم الدرس خلاص
صلاح .. وازاى اختك تسمح بكدة
ادم .. سيرين ساذجة يا بابا وغلبانه .. من اطيب ما يكون ونيتها سليمة فى كل الناس .. وطبعا مخدتش بالها
صلاح .. من هنا ورايح مش هنسيبهم لوحدهم .. لو انا مش معاهم انت تعد
هم ادم ان يتحدث .. بس يا بابا ...
صلاح بعصبية .. هتعد يا ادم غصب عنك مش بمزاجك
ادم بهدوء .. حاضر يا بابا
........
انتهى يوم الجمعة بكل ما فيه و اشرقت شمس يوم جديد على ابطالنا
....
عمر .. ايه يا عم ادم انت نسيتنى ولا ايه
ادم .. وانا اقدر برضو ده انت اللى فى الحتة الشمال
عمر .. ممم شكلك فايق ورايق
ادم .. اه جدا بصراحة
عمر .. يبقى اتصالحتو انت وملك
ادم .. يا سلام عليك طول عمرك لماح
عمر بعتاب .. يعنى انت تطلع عليا عصبيتك كلها وتقلقنى كمان عليك .. ولما المشكلة تتحل وتتصالحو ميجيش فى بالك حتى تقولى
ادم .. غصب عنى والله يا عمر امبارح اصله كان يوم طويل ومرهق واحداثه كتير اوى
عمر بلوم .. اصلا انت من ساعة ما باباك رجع ورحت تعد معاه وانت نسيتنى
ادم بحزن .. ليه بتقول كدة بس .. والله انت ما عارف حاجة
انا يوم ما روحت معاك .. فى اليوم الاسود ده .. كنت فى قمة غضبى وانت عارفنى لما بتعصب والله كسرت اوضتى كلها ماخليت فيها حاجة سليمة
وفى الاخر قفلت موبايلى ونمت من التعب
وامبارح طول اليوم برة .. يادوب روحت كلت بس اتفاجأت بسليم الزفت فى وشى .. وقفلى اليوم بحركة قذرة من حركاته
عمر .. وطول اليوم برة ليه ده امبارح الجمعة
ادم .. كنت عند ملك
عمر بصدمة .. نعم ياخويا !! عندها ازاى
ادم .. روحتلها تحت البيت عشان اصالحها .. بس كانت خارجة مع اهلها على حظى الزفت .. واضطريت استناها لما ترجع
عمر .. طيب وهى سامحتك خلاص .. اصل عاليا كانت بتقولى انها مموتة نفسها من العياط من كتر الزعل
ادم بصدمة .. عاليا !! وهو كلمها امتى
ادم .. هو انت شوفت عاليا فين
عمر .. كلمتها فى التليفون
ادم وقد شعر بالقلق الشديد على صديقه .. ما يخشاه يحدث امام عيونه ولا يستطيع فعل شئ
ادم .. كلمتها ليه فى حاجة ولا ايه
شعر عمر انه بحاجة لان يبوح بكل ما يجول بقلبه وعقله لادم .. هو بحاجة لان يسمعه ويرتاح بالحديث معه
عمر .. بصراحة يا ادم مقدرتش مكلمهاش بعد ما روحت فى اليوم الاسود ده .. انا حسيت بيها حسيت انها حاسة بالذنب وكمان شوفت فى عينيها خوف وقلق وتوتر مكنتش على بعضها .. مش عارف ليه مرتحتش الا لما كلمتها ودى كانت اول مرة اكلمها ومش عارف جبت الجرأة دى منين
والمفاجأة انها فعلا كانت نفسيتها تعبانة وفعلا يا ادم كانت محتاجة تفضفض وفضفضت معايا وحكيتلى كل حاجة جواها ..
واردف بفرحة وامل .. تخيل ان احساسى بيها كان صح .. اتكلمت معايا وطلعت كل اللى جواها وقالتلى انها ارتاحت لما اتكلمت معايا
كان يستمع له بقلب منفطر على حال صديقه والجرح الذى ينتظر قلبه .. يشعر انه مكتوف اليدين .. ولا يعلم ماذا يفعل
لا يمكنه اخباره بالحقيقة فى هذا الوقت الحرج من قدوم الامتحانات
فهو بذلك سيدمره ويدمر مستقبله
عمر مردفا .. انا كنت فرحان اوى انها اتطمنتلى وفتحتلى انا قلبها .. قفلت معاها وانا هطير من السعادة ان قربنا من بعض كدة
لو تعرف اد ايه بريئة .. وطيبة ورقيقة
كلامنا مع بعض كان حلو اوى بجد بعد افتكر المكالمة واسرح فيها .. واتخيلها ادامى
ثم سمع ادم ما لم يتمنى ابدا ان يسمعه .. وشعر بأنه يكاد يختنق .. لا هو على وشك فقدان وعيه
عمر .. انا اتأكدت خلاص انى بحبها يا ادم .. بحبها اوى .. ومتأكد ان هيا كمان بتحبنى
ولازم اعترفلها فى اقرب وقت
ادم برعب .. لأ
......
مروة .. الحقيني يا رحاب .. شادى خلاص خلع ايده من الموضوع واستسلم وقرر يبعد عن ملك
رحاب .. انا قلتلك من الاول ان ده اللى هيحصل .. ريحى نفسك انتى كمان وانسى ادم وابعدى عنه
مروة .. انتى مجنونة .. اسيب مين .. انا لو كنت متمسكة بيه فى الاول ٥٠٪ فانا دلوقتى متمسكة بيه ١٠٠٪
ولو كنت بحبه قبل كدة شوية .. فانا دلوقتى بعشقه مش بحبه .استحاله اسيبه لا لملك ولا لأى حد
رحاب .. اشمعنى دلوقتى يعنى مش فاهمة
مروة بشرود وكأنها تحدث نفسها .. اسيبه بعد اللى عرفته عنه !!
رحاب .. بتقولى ايه ؟
مروة .. ها .. لا مبقولش .. هبقى افهمك بعدين
رحاب .. طب يا بنتى لو مش ناوية تبعدى وبتحبيه كدة .. لزومه ايه تعلقى واحد تانى بيكى وانتى مبتحبيهوش
مروة .. لا لزومه كتير .. مش شرط اكون بحبه وعايزاه عشان اعلقه بيا .. الموضوع اكبر من كدة بكتير
رحاب .. موضوع ايه .. انتى ليه كل كلامك بأة الغاز كدة ومبقتش فاهمة منك حاجة
مروة .. هفهمك كل حاجة يا بيرو فى الوقت المناسب .. يلا نروح نذاكر شوية الامتحانات قربت .. سلام
رحاب .. سلام يا مروة
وقامت بالاتصال بشخص اخر
- شكلى وحشتك زى ما وحشتينى .. مش هشوفك بأة
مروة .. انا كمان عايزة اشوفك
- بجد يا حبيبتى .. يعنى وحشتك فعلا
مروة .. مممم .. هنتقابل فين
- اى مكان تشاورى عليه والوقت اللى تحدديه
مروة .. خلاص نتقابل فى كافيه (...) كمان ساعة يناسبك
- ولو ميناسبنيش برضو هاجيلك
مروة .. مستنياك
....
ادم برعب وتسرع .. لأ .. اوعى .. اوعى تعمل كدة يا عمر
عمر باستغراب .. لأ !! ليه يا ادم مش فاهم
ادم محاولا ايجاد سبب ليخفى السبب الحقيقى خوفا على شعور صديقه
ادم بتفكير وارتباك .. مينفعش .. عشان عشان الامتحانات قربت وده مش الوقت المناسب انكم تتكلمو فى حاجة زى دى
والموضوع ده ممكن يعطلكم ويشغلكم
عمر باصرار .. بالعكس يا ادم .. انا مؤمن دايما ان الحب بيشجع ويدى دافعة لصاحبه مش بيأخره ولا يعطله .. وانا لو قلتلها هرتاح وهحس بفرحة محستهاش فى حياتى وده هيشجعنى عالمذاكرة
ادم باقناع .. غلط يا عمر .. صدقنى انا مجرب وانت شايف بعينك بكلم ملك اد ايه وفى الاول المكالمات بتبقى كتير عشان بتبقو عايزين تقربو من بعض وتعرفو كل حاجة عن بعض .. غصب عنك بتضعف ومشاعرك هيا اللى بتتحكم فيك
ده انت بتقولى اهو من دلوقتى مقدرتش تمسك نفسك الا لما تكلمها .. امال بعد كدة باة هتعمل ايه هتسيب امتحاناتك ومذاكرتك وتعد تحب فيها !!
عمر بتفكير بكلام ادم .. طب انت شايف ايه
ادم بتنهيدة ارتياح وقد شعر انه اقتنع بكلامه .. استنى نخلص امتحانات ونهدى كدة بعدين نعد مع بعض ونفكر بهدوء
عمر .. وليه .. انا اخر يوم بعد الامتحان اقولها كل اللى فى قلبى .. هستنى ليه اما نعد نتكلم ده انا هستنى الامتحانات تخلص بالعافية
ادم بحزن شديد .. لما نخلص يا عمر يبقى يعدلها ربنا
واغلق الهاتف معه بقلب منفطر يشعر بالقلق والخوف والحزن الشديد عليه .. اخذ يفكر كيف سيصارحه .. كيف سيستطيع ان يجرح قلبه .. كيف سيكون السبب بوجعه
أيتركه يواجه مصيره كى لا يكون السبب بألمه!! ام يوقفه عما يريد فعله ويتسبب هو بجرحه
يالله كيف سأخرج واخلصك معى من هذا المأذق .. لماذا وضعتنى عمر فى هذا الوضع الصعب .. لماذا تجبرنى ان اكون انا السبب بجرحك
ظل يفكر ويفكر حتى كاد ان يجن
ادم لنفسه .. طب اقول لملك ؟ واخليها تقول لصاحبتها تبعد عنه وتصده فيفهم من نفسه ويبعد وخلاص
طب ما كدة برضو هيتوجع .. وبعدين افرض اتمرد على تصرفاتها دى واصر يعترفلها ومهمهوش
ساعتها هيكون خسر كل حاجة .. هيتدمر نفسيا ويضيع مستقبله كمان
هيخسر اللى بيحبها وقلبه يتكسر .. وكمان هيخسر مستقبله لانه طبعا مش هيعرف يركز ولا يمتحن
وهيضيع
لالا يا ادم مينفعش يعرف اى حاجة دلوقتى بأى حال من الاحوال .. ولا ينفع انت تاخد اى خطوة فى الوقت ده
احسن حاجة انى اعمل اللى اقدر عليه عشان ابعده عنها ومخليهوش يعترفلها بحاجة .. لحد بس ما الامتحانات تخلص واقدر ساعتها اتصرف
صح ده اسلم حل
.....
فى منزل والدتها جلست تتجاذب الاحاديث معها حتى قالت ثريا
ثريا .. على فكرة محمد بيسلم عليكى يا ملك .. وزعل اوى انه ملحقش يشوفك
ملك بعدم اهتمام .. الله يسلمه
ثريا .. مش ناوية تسامح....
ملك مقاطعة ثريا بعصبية .. الموضوع ده خلص وانتهى من زمان يا ماما .. متحاولوش تفتحوه معايا تانى .. ومحمد اخ وبس بالنسبالى .. وانا مرضتش اعد امبارح رغم اصراركم عشان مشوفوش واديله اى امل تانى
ثريا .. بس هو ..
ملك .. عن اذنك يا ماما هروح اذاكر عشان الامتحانات الاسبوع الجاى .. اظن انا مستقبلى يهمك اكتر من محمد ولا ايه
ثريا بأسى .. ربنا يعلم ان ميهمنيش فى الدنيا غير سعادتك ومستقبلك
ملك مقبلة جبينها .. ربنا يخليكى ليا .. ثم قبلت يدها .. معلش متزعليش منى انا متوترة بس عشان الامتحانات قربت
ثريا .. انا مش زعلانة يا حبيبتى ربنا يكتبلك كل الخير
...
فى الكافيه .. جلست مروة على احدى الطاولات بمقابل شخص ما .. يبدو عليه الاعجاب الشديد بها
- ازيك يا مروة .. عاملة ايه
مروة .. الحمدلله .. انت عامل ايه
- الحمدلله .. ثم امسك يديها بعشق قائلا برقة .. بس انتى وحشانى اوى
نزعت يديها منه بحدة وقالت .. عملت اللى اتفقنا عليه ؟
شعر بالقلق والخوف من رده فقال بحذر .. لأ .. للأسف مقدرتش
مروة بحدة .. مقدرتش !! امال جاى تقابلنى ليه ؟!
- مروة انتى عارفة من الاول وضعى ومع ذلك كنتى بتتقربى منى دايما ودلوقتى لما اتعلقت بيكى واتخليت عن حاجات كتير عشانك بتعاملينى بالجفاء والبرود ده .. ليه ؟
مروة بتمثيل .. انت وعدتنى انك هتعمل اى حاجة علشانى وانا صدقتك .. وطلعت بتضحك عليا
- حاول مسك يدها مرة اخرى .. والله ابدا يا حبيبتى .. صدقينى غصب عنى .. هيا مسألة وقت بس .. مسألة وقت وكل اللى انتى عايزاه هعملهولك .. اصبرى عليا وبلاش تعاميلنى بقسوة كدة
لم تمنعه مروة هذه المرة قائلة .. يبقى متلومنيش باة انى زعلانة ومتضايقة منك .. لان ده غصب عنى
- طيب خلاص فكيها باة .. مقلتليش تشربى ايه
......
وجده يجلس وحيدا بحديقة المنزل ويبدو عليه الحزن فذهب اليه
سالم .. ايه يا شادى من ساعة ما جيت واعد لوحدك ليه .. ده احنا ماصدقنا رجعت تعيش معانا
شادى .. مفيش يا بابا مخنوق شوية بس
سالم .. مين اللى مزعلك وانا اربيهولك
شادى باستغراب .. تربيه !! تربيه ازاى يعنى ؟؟
سالم بقسوة .. اشدلك ودانه .. ولو حد فى الكلية انا هعرف شغلى معاه وارفدهولك خالص .
شادى .. ايه الكلام ده يا بابا .. يعنى انا ازعل مع حد او يحصل بيننا مشكلة .. تقوم حضرتك ترفده !! هى دى طريقة حل المشاكل بالنسبة لحضرتك !!
سالم .. يعنى الحق عليا انى عايز اقف جنبك ومش هاين عليا اشوفك تعبان كدة
شادى .. ليه !! هو انا لسة عيل صغير عشان اجرى اشتكيلك من اللى يزعلنى واستناك تجبلى حقى .. انا راجل واعرف احل مشاكلى بطريقتى ومن غير مساعدة حد
سالم .. خلاص انت حر .. المهم انا كلمت كامل ابو ماهيتاب وهو مستنينا بالليل عنده انهاردة
شادى .. انهاردة !! علطول كدة ؟! وبعدين مش انا قلت لحضرتك تبلغنى قبلها عشان اظبط امورى
سالم .. ما انت اعد معانا اهو موراكش اى حاجة .. فقولت خير البر عاجله هنأخر الموضوع ليه
شادى .. انا اعد عشان حابب ارتاح شوية وافصل من كل حاجة .. فترة نقاهة يعنى .. وحسيت انى محتاجكم جنبى الفترة دى .. لكن انا مش مستعد اقابل اى حد دلوقتى يا بابا ومش مستعد نفسيا للمقابلة دى
سالم .. طب اعمل ايه انا كلمت الراجل واديته كلمة خلاص .. عايزنى ارجع فى كلمتى وتطلعنى عيل ادامه
شادى رغما عنه .. لا طبعا انا اكيد مش هصغرك ادامه .. ثم اكمل باستسلام بعد تنهيدة طويلة .. خلاص انا جاى معاك انهاردة .
.....
فى الكافيه
مروة .. يعنى انت هتسافر فعلا
- مش عارف لسة بفكر .. هو انتى كلمتى خالك ولا لسة
مروة بكذب .. اه كلمته طبعا وهو وعدنى انه مش هيسيبك .. خلص انت بس وملكش دعوة
رد بقلق .. انتى متأكدة يا مروة ؟؟ يعنى ارفض العرض اللى جايلى ومسافرش ؟
مروة .. ايوة طبعا .. متقلقش خالص
- لو ده حصل فعلا ساعتها كل حاجة هتتحل وهعملك كل اللى انتى عايزاه من غير خوف
مروة بثقة .. هيحصل
.....
مساءا .. ئ
وصل شادى ووالده فيلا كامل الاسناوى .. والتى تقع فى ارقى الاحياء تحيطها مجموعة هائلة من الحراسة ورجال الامن .. والذى قام احدهم باصطحابهم الى داخل الفيلا حيث قابلهم كامل بترحاب وحفاوة شديدة
كامل .. اهلا وسهلا يا سالم .. نورتنى .. ازيك يا شادى اخبارك ايه
شادى بابتسامة مصطنعة .. الحمد لله تمام
كامل .. سالم بيقولى انك بتحضر رسالة الماجستير
شادى .. اه فعلا شغال عليها
كامل .. شد حيلك باة وخلصها بسرعة .. عشان انا محتاج حد بخبرتك معايا فى الشغل
شادى بعدم حماس ..ربنا يسهل ان شاء الله
سالم بثقة .. فعلا شادى بخبرته وذكاؤه لو مسك شركة من بتوعنا انا متأكد انه هينقلها نقلة تانية خالص ويخليها رقم ١ فى السوق
قسمت زوجة كامل .. والمدام مجتش مع حضرتك ليه .. كنت عايزة اتعرف عليها
سالم .. معلش كانت تعبانة شوية .. المرة الجاية باذن الله هجيبها هيا وبنتى الصغيرة اية
قسمت .. ما شاء الله هيا فى سنة كام ؟
سالم .. ٣ ثانوى خلاص داخلة الكلية السنة الجاية .. الاسرة هتزيد مهندسة جديدة
حزن شادى داخليا لعدم اهتمام والده برغبات اية واصراره على تنفيذ رغبته دون الرجوع لها .. فهو يعلم ان اية لا تحب الهندسة ولا تريد دخول تلك الكلية .. فهى رقيقة حالمة ومبدعة جدا فى الرسم والنحت .. حيث انها عاشقة للفنون بانواعها وتحلم بدخول كلية الفنون الجميلة
شادى بتسرع .. وممكن برضو تزيد فنانة .. اصلها بتحب الرسم اوى
نظر له ابيه نظرة تحذيرية
سالم مغيرا الحديث .. امال فين عروستنا الحلوة .. شادى نفسه يشوفها
صدم شادى من حديث والده .. فقد اتفق معه مؤكدا انها ستكون مجرد مقابلة تعارف فقط .. ولم يعده بأى شئ .. اذن لما يتحدث ابيه كما لو كانت عروسه فعلا .. وكأنه يضعه امام الامر الواقع
قسمت .. بتجيب القهوة وجاية .. احنا عندنا العروسة لازم تعمل القهوة وتقدمها بنفسها
ثم دخلت ماهيتاب بطلتها الساحرة ممسكة بصينية القهوة وقد كانت رقيقة للغاية .. تتسم ملامحها بالهدوء والخجل الشديد
لم يكذب ابيه حينما قال انها جميلة .. فهى حقا جميلة للغاية .. ترتدى فستان ازرق رقيق وبسيط للغاية من الشيفون .. تبدو غير متكلفة ابدا فى ملابسها او زينتها فقد اكتفت بسلسال رقيق وخاتم من نفس التصميم
تفاجأ شادى بها وبشكلها الخاطف للانظار .. فلم يتوقع ابدا ان تكون بذلك الجمال وتلك الرقة
تمنى لو شاهد صورتها حينما اعطاه اياها
فوقتها كان من الممكن لكل شئ مر به ان يتغير .. من الممكن ان يعيد حساباته ويقتنع ان ملك ليست له ويعطى فرصة لنفسه مع تلك الجميلة التى امامه
ولكنه لم يعط نفسه اى فرصة سوى مصارحة ملك وهو على علم انها تحب شخص اخر .. شعر انه حقا كان مغيب معميا قلبه
ماهيتاب برقة .. مساء الخير .. ثم توجهت لكامل كى تعطيه قهوته .. اتفضل يا اونكل
كامل باعجاب .. متشكر تسلم ايدك
ثم توجهت لشادى وهى ناظرة بعينيها لأسفل بخجل شديد .. اتفضل
شادى بابتسامة لم ترها .. شكرا
جلست بجانب والدها بمقابل شادى تنظر للارض بخجل واضح لم تستطع اخفاؤه
سالم .. ما شاء الله بنتك زى القمر يا كامل .. هيا فى سنة كام
كامل .. تالتة فنون جميلة
سالم .. تصدق بنتى كمان عايزة الكلية دى .. انا مش عارف ازاى يسيبو هندسة اللى كلها مستقبل ويدخلو كليات زى دى ملهاش مستقبل
كامل .. انا قلتلها كدة .. وبعدين سيبتها تختار براحتها احنا علينا النصيحة بس .. لكن هما اللى يحددو طريقهم
ماهيتاب .. بعد اذن حضرتك يا اونكل .. مين قال ان كليتنا ملهاش مستقبل .. الاعتقاد ده خاطئ .. فيه فنانين كتير مشهورين ولوحاتهم تقدر بالملايين .. زى ما العمارة او الفيلا اللى بتبنوها او حتى الاجهزة الالكترونية اللى بتعملوها كمهندسين ليها ثمن وليها سوق
احنا كمان لوحاتنا واعمالنا الفنية ليها ثمن ويمكن اغلى بكتير من اعمالكم .. وليها سوق برضو اللى بيفهم فى الرسم والفن بيقدر الاعمال دى بملايين
تفاجئ شادى برد ماهيتاب المفحم وشخصيتها المختبئة خلف تلك الملامح الهادئة الرقيقة .
كامل .. سبحان الله نفس كلام بنتى لما بتقنعنى بالكلية دى
ماهيتاب .. سيبها براحتها يا اونكل .. ماهى ممكن تدخل هندسة وتفشل فيها لانها مبتحبهاش ولا هتقدر تمشى فى المواد بتاعتها .. لكن لما تدخل حاجة بتحبها هتنجح فيها وده المهم انها تنجح ويبقى ليها كارير خاص بيها .. حتى لو بعيد عن كارير حضرتك
اعجب شادى بشخصية ماهيتاب المستقلة وافكارها وكيفية اقناعها لوالده بالعقل والاحترام .. وشعر انها فرصته كى يضغط على ابيه هو الاخر لتنفيذ رغبة اخته
شادى بحماس .. ياريت والله يا بابا واهى ماهيتاب هتبقى زميلتها فى الكلية ومش هتبقى لوحدها
نظر له سالم بغضب .. ثم ابتسم فى وجه ماهيتاب قائلا .. اوعدك هفكر عشان خاطرك
ماهيتاب بخجل .. ميرسى يا اونكل
كامل بمزح .. واضح كدة ان شادى وماهيتاب افكارهم واحدة وهيتفقو عليك يا سالم هههههه
سالم .. انا كمان شايف كدة
قسمت .. ما تطلعى يا حبيبتى تفرجى شادى على الجنينة بتاعتنا وتشمو هوا شوية
ماهيتاب بخجل لشادى .. تحب تخرج الجنينة شوية
شادى بحماس .. ياريت يلا .. عن اذنكم
......
ملك .. الو الو ... ممكن اعاكس
ادم بضحك .. هههههه طبعا ممكن ده انا بحب المعاكسات اوى
ملك .. ههههه ازيك .. انا كنت داخلة انام قلت اطمن عليك الاول
ادم .. هو علطول كدة قلبك بيحس بيا .. هتجنن انا كدة
ملك بقلق .. مالك فيه ايه .. انت تعبان
ادم بسعادة .. لا مبسوط .. ومبسوط اوى كمان
ملك .. طب ما تفرحنى معاك
ادم بفرحة وحماس .. خلاص يا ملك حلمى بيتحقق ادام عينيا .. باة واقع خلاص وكلها كام شهر همسكه بايديا
ملك .. براحة بس وفهمنى حلم ايه .. قصدك الشركة ؟؟
ادم .. ايوة طبعا .. وانا عندى غيرك انتى والحلم ده
ملك .. طب ايه اللى حصل
ادم بحماس وفرحة .. خلاص بابا لقى مقر مناسب وخلص كل اوراقه .. وكلها كام شهر والشركة هتكون جاهزة
يعنى بقت موجودة على ارض الواقع مش مجرد خطط وكلام على ورق .. بقت حقيقة ملموسة .. مش فاضل غير انى اخلص دراسة وامسكها واحقق فيها كل اللى بتمناه
ملك بسعادة .. ربنا يوفقك يا ادم .. انت تستاهل كل خير
ادم .. مش هنجح غير بيكى يا ملك .. وجودك فى حياتى هيبقى هو الحافز لنجاحى ونجاح شركتى .. مش بيقولو وراء كل عظيم امرأة .. انتى الامرأة العظيمة اللى بيكى هبقى شخص تانى ناجح ومسيطر عالسوق كله
ملك .. مممم ويا ترى الامرأة دى ليها وظيفة معاك فى شركتك الكبيرة دى .. ولا اشوفلى مكان تانى اشتغل فيه
ادم .. حبيبتى الشركة وصاحب الشركة ملكك انتى وبس
المهم قوليلى .. خلصتى التاسك بتاعة المشروع
ملك باحراج .. احم .. لأ ملحقتش
ادم .. على فكرة انا مبحبش الدلع فى الشغل .. ولو حد غيرك انا كنت سمعته كلام زى الزفت ومعدتهاش بالساهل .. بس حظك انك غير اى حد ومبقدرش على زعلك .. وانتى بتستغلى ده اسوأ استغلال بس ده مش حلو
ملك باحراج .. احم .. طب قوللى انت كنت هشتغل ازاى وامتى وانا مروحة يوم الخميس متنكدة وطول الليل مخنوقة بسببك .. ويوم الجمعة بابا سافر وباقى اليوم انت كنت مقيم تحت بيتنا وكنت تعبانة ونمت علطول
يعنى مفيش غير انهاردة واشتغلت فيه فعلا جزء بس ملحقتش اخلص
ادم بجدية ولوم .. طب وبعدين يا ملك .. التسليم يوم الاتنين ودى اخر تسليمة عشان الامتحانات خلاص
وبعدين فين ملك اللى كانت دايما عايزة تثبتلى انها قوية وناجحة فى كل شئ .. فين اللى كانت بتتحدانى دايما انها افضل منى وقدراتها تفوقنى بمراحل .. اللى كانت بتطبق باليومين وتضغط نفسها عشان متبانش مقصرة .. وتثبت انها اد اى حاجة .. راحت فين !!
شعرت ملك بالاحراج بسبب توبيخ ادم لها .. فهى حقا مقصرة .. ولم تكن ابدا متهاونة فى واجباتها هكذا .. ولكنه العشق .. هو من ابدلها وغيرها من حال الى حال
ملك .. انا اسفة يا ادم .. انا فعلا قصرت .. بس عموما متقلقش انا كلمت عاليا واديتها الجزء اللى خلصته وهيا قالتلى هتكمله مع عمر بكرة .. هيا كمان عندها تاسك مخلصتهاش وهيساعدها فيها
ادم بتسرع .. لأ ... عاليا وعمر لأ
ملك باندهاش .. لأ ليه مش فاهمة !!
ادم بارتباك .. ها .. لأ .. دى التاسك بتاعتك وانتى اللى تخلصيها .
ملك بعصبية وقد شعرت باصراره على ازعاجها والضغط عليها .. بل وتعجيزها دون سبب
ملك .. والله انت ليك ان التاسك تخلص يا بشمهندس .. وبعدين اعملك ايه وانا عندى بكرة سكاشن مراجعة مهمة لازم احضرها
ادم بحدة من طريقتها .. ما عاليا برضو عندها نفس السكاشن .. اشمعنى هيا هتشتغل وانتى لأ
ملك وقد شعرت باستفزازه الشديد لها .. والله عاليا حضرت سكاشنها خلاص وقالتلى عندها محاضرة واحدة
اما انا عندى ٣ سكاشن والمحاضرة .. فهحضر المحاضرة وهلخصهالها
وبعدين احنا تيم بنكمل بعض اللى ميقدرش يعمل حاجة التانى يعملها .. محدش مجبر على حاجة لوحده .. فبلاش طريقتك دى معايا
ادم بعصبية .. مالها طريقتى يا ملك .. هو لما اتضايق انك مقصرة فى شغلك ابقى وحش وطريقتى وحشة
ملك .. اعتذرت على تقصيرى .. وقلتلك حد هيشيل عنى .. ملكش باة انك ترفض او تجبرنى اعمله لوحدى .. خصوصا وانا بقولك ظروفى .. المفروض تقدر شوية مش اوامر وخلاص
سكت ادم قليلا .. فهو قد ازعجها حقا ولكن ذلك خارج عن ارادته .. فاقتراب عمر من عاليا يزداد يوما بعد يوم وهذا ما يثير جنونه لذلك لم يتمالك نفسه وتحدث بعصبية
حاول تهدئة الوضع وارضاءها
ادم .. ومين قال انى عايزك تعمليها لوحدك !! اللى يخلى عاليا وعمر يشتغلو سوا فى تاسك تخصك .. طب ما اشتغل انا معاكى فيها .. ولا مش حابة تشتغلى معايا
تفاجأت ملك من هدوءه المفاجئ و رده الغير متوقع .. والذى اثلج قلبها فى ثوانٕ بعد ان كان مشتعلا بنيران الغضب
ملك .. ...
ادم .. مردتيش يعنى .. خلاص يا ملك لو مش عايزة او معندكيش وقت .. انا هعمل الشغل كله ولا يهمك
ملك بدهشة .. تعمله كله !! ده بجد ؟ ولا بتتريق
ادم بحب .. لا طبعا بجد .. مش انا وانتى واحد ولا ايه .. انا او انتى نعمله مش هتفرق
ملك باندفاع عاشقة .. بحبك يا ادم
ادم .. وانا بموت فيكى يا روحى متحمليش هم اى حاجة طول منا موجود
ملك .. ربنا يخليك ليا .. بس مش هينفع تعمله لوحدك .. مش هرتاح انا كدة وهحس انى بسرق مجهودك
ادم .. طب ايه اللى يريحك ؟؟
ملك .. نعد نشتغله سوا
ادم بشقاوة .. دى هتبقى احلى اعدة وهنعمل احلى شغل
ملك .. متأكد ولا مش هنركز وتسوحنا
ادم .. ياستى ولو مركزناش ولا يهمك اشيل انا الشغل كله .. وهتبقى عملتى اللى عليكى واعدتى وحاولتى
ملك ... ههههههه مش عارفة يا ادم ساعات بحس ان عندك انفصام مش طبيعى
ادم رافعا حاجبيه باستغراب .. نعم ياختى!! انفصام ؟! ليه ؟؟
ملك .. يعنى كنت متعصب انى معملتش التاسك ومصمم اعملها لوحدى ومحدش يساعدنى .. ودلوقتى معداش دقايق وفجأة باة مش فارق معاك وكمان عايز تعمل شغلى بنفسك
ادم .. ده مش انفصام .. ده عشق .. العشق اللى بيخليكى الوحيدة اللى مقدرش ازعلها .. الوحيدة اللى بضعف ادامها واخاف على مصلحتها اكتر منها .. واللى ممكن اتغاضى عن اى تقصير منها واشيل انا نتيجته حتى من غير ما تطلب
اذابتها كلماته وزلزلت قلبها .. غير مصدقة ان ادمها يعشقها كل هذا العشق .. لا تريد شيئا من الدنيا غيره .. هو الوحيد القادر على سعادتها
ملك .. هو انت فعلا بتحبنى اوى كدة ؟؟ انا ساعات بحس ان اللى انا فيه ده حلم وهصحى منه .. عمرى ما تخيلت ولا فى احلامى حتى انى هلاقى حب بالطريقة دى .. حب مش كلام بس لأ وفعل كمان .. انت بتعمل كل حاجة فعلا تثبتلى بيها انى غالية عندك .. ومن غير فعلا ما اطلب
ادم .. وهفضل كدة طول العمر يا ملوكتى لان عشقك فى قلبى حقيقى اوى .. حقيقى لدرجة مجرد ما تيجى سيرتك ابتسم لوحدى وقلبى يدق بسرعة .. بحس ان قلبى عايش بيكى يا ملك
ملك .. كلامك جميل .. جميل اوى .. طيب قوللى هنشتغل بكرة امتى
ادم .. بكرة اليوم كله بتاعك
ملك باستغراب .. يعنى ايه ؟!
ادم .. مش بتقولى ان عاليا ولاول مرة مش هتحضر معاكى حاجة .. طبعا ده يوم تاريخى ولازم استغله عشان كدة هحضره كله معاكى .. وجنبك
ملك بخجل شديد .. جنبى !!
ادم .. ايوة .. بكرة هعد جنبك فى كل السكاشن والمحاضرة كمان .. خلاص انا مبقتش قادر ابعد عنك اكتر من كدة
ملك بخجل .. ازاى يا ادم هنحضر مع بعض كدة ادام الدفعة ؟ شكلنا هيبقى ايه .. وكله كمان اكيد هيلاحظو
ادم باندفاع .. يلاحظو .. مبقاش يهمنى . انا عايز الكلية كلها تعرف انك بتاعتى ومكتوبة على اسمى .. انا وبس
ملك .. بس ..
ادم .. مبسش يا ملك .. خلاص انا قررت .. بكرة هفضل لازقلك طول اليوم مش هتخلصى منى
كفاية انى مش هشوفك من يوم الاتنين لحد الامتحانات
ملك بخجل .. اللى تشوفه
ادم .. يلا روحى نامى عشان متتأخريش بكرة .. وتعالى بدرى انا من ٧ الصبح هستناكى فى الكلية
ملك .. هههه ٧ الصبح ليه بنبيع لبن !!
ادم .. لا وانتى الصادقة بنشتغل .. هنشتغل حبة قبل المحاضرات ونكمل بعد ما اليوم يخلص
ملك .. ماشى .. تصبح على خير
ادم .. تصبحى على كل حاجة جميلة
اغلق الهاتف معها وظل يفكر كيف سيبعد عمر عن عاليا لحين انتهاء الامتحانات
ادم فى نفسه .. طب التاسك الاولى اللى كانو هيعملوها خلصنا منها .. هعمل ايه فى التاسك بتاعتهم
منا مش هسيبهم يعدو مع بعض والواد يتعلق اكتر من كدة
ظل يفكر حتى وجد حلا .. هو الحل الوحيد لذلك المأذق
اتصل ب اسر صديقهم .. الو .. ازيك يا اسر
اسر .. اهلا يا ادم .. انا كويس الحمدلله
ادم .. معلش كنت عايز منك خدمة .. واتمنى متكسفنيش
اسر .. خير ؟
تجول شادى مع ماهيتاب فى حديقة الفيلا محاولا التعرف عليها والدخول اكثر فى تفاصيل حياتها .. فقد جذبته شخصيتها وطريقة تفكيرها
شادى .. على فكرة انا مديونلك بالشكر
ماهيتاب باستغراب .. شكر !! ليه انا معملتش حاجة تشكرنى عليها احنا يادوب لسة متعرفين
شادى .. عشان حاولتى تقنعى بابا بكلية الفنون .. اصل اية اختى هتموت عالكلية دى وبابا مصمم تبقى مهندسة زينا وتمشى فى نفس طريقنا وتمسك شركاته معايا .. بس واضح كدة انه لما لقاكى فيها وكمان محاولاتك لاقناعه هيخلوه يعيد نظر فى الموضوع ويوافق
ماهيتاب .. انا مقلتش غير اللى مقتنعة بيه واللى حاولت اقنع بابا بيه .. وبعدين هيا ممكن تبقى مهندسة ديكور او عمارة برضو لو دخلت فنون
للاسف الناس فاهمة كلية الفنون غلط
وانها كلية لعب وهزار وكلها رسم ونحت وبس وده اعتقاد خاطئ
احنا عندنا قسم جرافيك وديكور وعمارة وتصوير كمان
يعنى حاجات كلها مهمة ومستقبلها كبير
وانا رأيى ان مفيش مجال ملوش مستقبل ومفيش مجال هتجتهد وتخلص فيه الا وهيديلك اللى بتتمناه
شادى .. عندك حق .. يارب بابا يقتنع
ماهيتاب باهتمام .. وانت باة عايز تمسك شركاتهم عشان ترضى باباك بس ولا دى رغبتك الشخصية
سكت شادى قليلا يفكر فى ذلك السؤال الصعب .. فقد طرحت سؤالها ببساطة شديدة ولا تدرى ان اجابته من اصعب ما يكون
شادى .. والله انتى سألتى سؤال انا نفسي مش عارف اجابته
ماهيتاب .. ليه ؟! انت مش عارف انت عايز ايه ؟
....
ياريت يكون فيه تفاعل مع الاحداث والشخصيات لو الرواية عجباكم 😍
انا بحب القارئ يدخل جوة جو القصة ويقول توقعاته 😉 عشان كدة هنتظر اراءكم وتوقعاتكم
دمتم بالف خير ❤️
•تابع الفصل التالي "رواية انت عشقي وقسوتي" اضغط على اسم الرواية