رواية انت عشقي وقسوتي (كاملة جميع الفصول) حصريا عبر دليل الروايات بقلم دينا قدري
رواية انت عشقي وقسوتي الفصل التاسع عشر 19
#انت_عشقى_وقسوتى - بارت ١٩
وصلت الكافيه لتجد ادم يجلس وحيدا امام الحاسب الخاص به منهمكا فى العمل
لتقف امامه قائلة .. احم .. هو مفيش حد لسة جه ولا ايه
كانت ترتدى جيب ابيض انيق مع بلوزة زرقاء تظهر مدى انوثتها ورقتها وتناسق قوامها .. ليتفاجأ ادم بها امامه بكل تلك الرقة والجمال
ادم .. هو انتى علطول جميلة اوى كدة .. ارحمينى شوية انا مبقتش قادر وماسك نفسى بالعافية
ملك بخجل تنظر للارض .. ميرسى .. ثم حاولت تغيير مجرى الحديث لتتساءل
ملك .. مردتش عليا هما مش جايين ولا ايه
ادم .. لا جايين .. بس اسر بيجيب حاجة وجاى وعمر شكله نايم
ملك بتعجب .. نايم !!
ادم .. اه منا لو اعد معاه كنت صحيته وجبته من قفاه .. بس انتى عارفة انا اعد مع سيرين
ملك .. اه .. طب وكدة مش جاى ولا ايه
ادم .. لا منا اعد ارخم عليه بالتليفون كل شوية وهيزهق ويصحى دلوقتى .. والبيت قريب من هنا مش هيتأخر ان شاء الله
ملك .. وعاليا كمان جاية على فكرة
ادم .. ايه ده بجد هيا رجعت من السفر ؟
ملك .. اه رجعت وهتجيب اللاب توب بتاعها وتيجى
ادم .. طيب كويس .. فطرتى ولا لسة ؟
ملك .. لا لسة .. لما ييجو باة نفطر كلنا
كانت تتابعهم بعيون مشتعلة بالغضب والغيظ .. فما ان رأت ملك حتى بعثت برسالة لمحمد كى يأتى ويراهم ويفرق بينهم كما تمنت
ملك بخجل .. حلو القميص عليك اوى
ادم .. سيرى قالتلى انك انتى اللى نقيتيه وهيا بتجيبلى لبس .. ذوقك يجنن انا لبسته مخصوص عشانك
ملك بخجل .. اه فعلا حسيت اللون الازرق هيبقى جميل عليك وحبيت اشوفك فيه .. اصل انا بحب اللون ده اوى
ادم بعشق ناظرا لعيونها .. وانا عشقته من يوم ما توهت فى البحر اللى فى عنيكى .. غرقت فيه ومش عارف اخرج منه خلاص
لاحظت مروة قرب ادم من ملك وعيونه التى تكاد تلتهمها من شدة اعجابه بها .. فاستشاطت غضبا فوق غضبها تنتظر محمد بفروغ صبر املا ان يستطيع تدمير تلك العلاقة التى باتت تحرق قلبها كلما رأتهم سويا
ادم .. هقوم اكلم عمر اشوفه صحى ولا لسة
ملك .. ماشي وانا هشتغل شوية على ما تيجى
ظلت تعمل قليلا واذ بمحمد يدخل من باب الكافيه
ظل يبحث عنها حتى وجد مروة وبمقابلها طاولة ملك تجلس وحيدة فذهب اليها
تفاجأت ملك بوجوده امامها قائلة بارتباك
ملك .. محمد !! ايه اللى جابك هنا .. واكملت بانفعال : اكيد مش صدفة ولا ايه
محمد : لا يا ملك مش صدفة .. انا جاى هنا عشانك
جيت عشان اشوفك واتكلم معاكى انتى بجد وحشانى اوى وواحشنى الكلام معاكى ومش مديانى اى فرصة
ملك : اظن انا قلتلك قبل كدة ان موضوعنا خلاص خلص للابد ومش مسموح تتكلم فيه تانى
انتى بتكدبى على نفسك يا ملك .. قالها بثقة ثم اكمل .. انا متأكد انك لسة بتحبينى وعايزة ترجعى بس كبريائك اللى مانعك .. عايزة تعذبينى وتذلينى الاول عشان تنتقمى وتخلصى تارك
انت غلطان يا محمد .. قالتها بانفعال واكملت
انا اصلا عمرى ما حبيتك ولا اتمنيتك فى احلامى .. انا بس كنت عاملة حساب القرابة والعيش والملح اللى بينا مكنتش عايزة اجرحك وباللى انت عملته ريحتنى وشيلت من عليا حمل تقيل اوى انا كنت شايلاه على قلبى
محمد .. متضحكيش على نفسك يا ملك وتكدبى الكدبة وتصدقيها .. انا متأكد انك نفسك تنسينى ومنتيش قادرة بس بتكابرى وانا جيت اقولك اهو انى كنت غلطان لما بعدت عنك وانى فعلا مش هقدر اعيش او اتجوز واحدة غيرك انا حبك الاول زى ما انتى كمان حبى الاول استحالة ننسى بعض بسهولة كدة
ملك بانفعال شديد .. ده ايه الغرور والثقة اللى بتتكلم بيهم دول !! مش معنى انك اول واحد يدخل حياتى تبقى حبى الاول .. انت بالنسبة لى علاقة وانتهت وسعيدة جدا انها انتهت لانها زى ما قلتلك كانت حمل تقيل عليا وانزاح
كانت تتحدث بصوت مرتفع بعد ان فقدت اعصابها بسبب كلامه المستفز ونبرته الواثقة التى ازعجتها
لذا رآهم ادم من بعيد فذهب اليها قلقا
ادم .. مالك يا ملك فيه ايه صوتك عالى ليه .. ومين ده ؟!
رد عليه محمد منفعلا .. وانت مالك يافندى انت ماتخليك فى حالك .. واحد وبنت خالته بيتكلمو بتتحشر انت ليه
وجه حديثه لملك متجاهلا اياه .. انتى كويسة فى ايه طمنينى عليكى
ملك بتوتر تحاول ان تطمئنه .. مفيش حاجة يا ادم .. انا .. انا بس كنت بتناقش مع محمد وغصب عنى صوتى على .. متقلقش
ادم .. طيب هسيبكم تخلصو كلامكم على ما اروح اجيب حاجة نشربها وساندويتشات .. شكلنا مطولين فى الشغل انهاردة
ونظر اليه نظرة اربكته ثم انصرف
محمد بانفعال وعصبية .. مين ده عشان يتدخل فى حياتك وكلامنا بالطريقة دى !
ملك ببرود وقد اطمأنت لوجود عاشقها معها فى المكان والذى استمدت منه القوة والثقة .. اتدخل ازاى وهو سابنا اهو من نفسه عشان نخلص كلامنا
ثم اكملت .. وبعدين انت مالك اصلا مين ده لو سمحت متحاولش انت تدخل فى حياتى
محمد منفعلا .. ردى عليا يا ملك ايه اللى بينك وبين البنى ادم ده عشان يكلمك بالطريقة دى ويتلهف عليكى كدة !!
ملك .. قلتلك ملكش دعوة سواء فيه بيننا حاجة او لأ حاجة متخصكش ولو سمحت باة اتفضل من هنا عشان عندنا شغل وانت مأخرنا .. ثم تركته وذهبت للحمام كى تنهى الحديث معه
ذهب محمد لادم قائلا باستفزاز .. انت ياااا قلتلى اسمك ايه ؟؟
ادم بحدة وعيون قاسية .. بشمهندس ادم .. اسمى بشمهندس ادم .. نعم يا حضرت
محمد باستخفاف .. ادم اه .. بص بقى ملك تخصنى ومش مسموح لاى شخص يقرب منها يعنى لو فى دماغك اى حاجة تنساها تماما .. دى ملكى انا بس ومش عشان زعلانين شوية هييجى حتة عيل زيك يشغلها عنى
وحط فى دماغك ان حتى لو تجاوبت معاك شوية وحسستك انها بتحبك فده وهم هتعيشهولك وتعيش معاك فيه شوية عشان تنسانى مش اكتر وفى الاخر مش هتقدر تنسى وهترجعلى تانى وترميك .. انا حبها الاول واللى باقيلها فى الاخر
فنصيحة وفر وقتك ومجهودك لحد غيرها وبلاش تبص لحاجة مش بتاعتك عشان متزعلش
تأججت شرايين ادم لتشتعل بالنيران غضبا وشعر وكأن سكاكين تنهش بقلبه وتمزقه تمزيقا اثر كلام محمد .. مشاعر محرقة متداخلة بقلبه من غيرة وحقد وغضب وحزن وكره !
فلم يتحمل فكرة ان تكون ملك لغيره .. بل لم يتحمل فكرة انها عشقت غيره من قبل
ادم ببرود شديد وبعكس الاعاصير التى تجول بداخله
ادم .. عيل !! اسمع يابنى انا مش هرد عليك احتراما لملك وخالتها بس .. وياسيدى متشكرين على نصايحك الغالية بس متلزمنيش الحقيقة وفرها لنفسك
وتركه وانصرف وهو يغلى من شده انفعاله
توجه لملك وجدها جالسة بارتباك فتحدث اليها بحدة غير مصدقا ما سمعه يتمنى لو ان حبيبته تنفى كل ذلك الكلام المحرق لروحه
ادم .. ملك .. يبقى مين باة ده ؟!
ملك بتوتر .. م ما انت عارف انه .. انه محمد ابن خالتى
رد عليها متساءلا .. ابن خالتك وبس ؟!!
ملك .. قصدك ايه ؟!!
ادم .. اقصد فيه حاجة تانية بينكم غير انه ابن خالتك ولا لأ ؟؟
انعقد لسانها فلم تعرف بما تجيب
ادم بانفعال شديد .. ردى عليا
ملك بحزن ..كان فيه حاجة بس بالنسبة لى ملهاش اى لازمة او قيمة وعشان كدة مكلمتكش عليها
ادم بعصبية .. يا سلام .. انتى باة على اساس ايه حكمتى انها ملهاش لازمة !!
ملك .. على اساس ..
قاطعها قائلا .. ملهاش لازمة بالنسبة لك لكن مهمة جدا بالنسبة لى والمفروض كنتى عرفتينى كل حاجة من الاول
ملك .. مكنش فيه حاجة والله .. انا هحكيلك كل حاجة
ادم بحدة .. مش عايز اعرف حاجة خلاص انتى اتكشفتى على حقيقتك ادامى وجاية دلوقتى عايزة تتكلمى .. فات وقت الكلام
انتى غشتينى وخدعتينى بحبك وفهمتينى ان انا الوحيد اللى فى قلبك والحقيقة انى مجرد شخص بتنسى بيه حد تانى
ملك باندهاش .. ايه !! انت بتقول ايه !!
ادم انا عمرى فى حياتى ما حبيت غيرك .. انت وبس اللى اتمنيته فى حياتى
اسمعنى وانت هتعرف ان كل اللى فى دماغك ده ملوش اساس من الصحة
ادم .. كفاية باة كدب وتمثيل انا خلاص فوقت وعرفت ان عمرك ما حبتينى
وحتى لو كان كلامك ده صح وحبتينى
انا كرامتى متسمحليش اكون مع واحدة كانت بتحب حد غيرى وفى علاقة معاه ويا عالم ايه اللى حصل بينهم
ملك مقاطعة اياه بانفعال.. اخرس .. انا مسمحلكش انك تتكلم عليا نص كلمة انا اشرف منك ومن عشرة زيك ولايمكن اسمح لاى حد يمس سمعتى بكلمة
انا اللى غلطانة انى اعدة اتحايل وابرر لواحد هو اصلا معندوش ذرة ثقة فيا
ادم .. واجيب منين الثقة وانتى خبيتى عليا ومحكيتيليش حاجة مهمة زى دى هتخبى ليه الا لو كنتى خايفة من حاجة
ملك بحزن . . انا فعلا كنت خايفة .. خايفة على مشاعرك وقلبك اجرحهم بدون داعى ودون سبب
وبعدين انت مسألتنيش اصلا وانا كذبت عشان تقول الكلام ده
ادم بغضب .. لان للاسف متوقعتش ابدا حاجة زى دى .. انا كنت مسلم نفسي ليكى ومغمض عينيا ومطمنلك متوقعتش ابدا حاجة زى دى
ملك .. ما انت لو تدينى فرصة وتسمع هتفهم الموضوع صح وتفهمنى
ادم .. مش عايز افهم حاجة اعتبرى مفيش حاجة حصلت بيننا كل حاجة انتهت وبلا رجعة
انسينى يا ملك انا لا يمكن هقدر اكمل حياتى معاكى
ملك .. مقدرش انا بحبك .. قالتلها بدموع مترجية
ارجوك اسمعنى وخلينى اشرحلك الاول متدمرش كل حاجة بيننا بسهولة كدة
ادم .. للاسف خلاص مبقاش ينفع وحتى الكلام مش هيقدم ولا هيأخر شئ ولا هيمحى حقيقة علاقتك اللى كانت قبلى
سلام يا ملك
لمح الدموع بعيونها تتساقط بغزارة ولكنه
لم يبالى بها وتركها وانصرف متجاهلا دموعها المؤلمة
تركها باكية وحيدة معذبة لم تستطع تحمل فكرة انه تركها
شاهدتهم مروة وهى تضحك داخليا من شدة الفرح وقلبها يكاد يرقص من سعادته لنجاح خطتها والايقاع بينهم
تنظر لملك بشماته وفرحة عارمة تتمنى لو تنتهى من حياة ادم للابد وبلا رجعة
دخلت ملك المرحاض وانفجرت بالبكاء الحارق حيث كانت تبكى بهستيرية لتتذكر كلامه
أحقا يفكر بهذه الطريقة !!
احقا لم يسمعنى .. وقد تعاهدنا على التفاهم والتناقش
لم يعطنى اى فرصة للدفاع عن نفسي .. لما !!
أكان حبه لى ضعيفا لهذه الدرجة حتى يحطم كل شئ بيننا عند اقل مشكلة تواجهنا
أكان ما عشناه حقا وهم .. لا لا استحالة
فلقد احببته من صميم قلبى .. لا يمكنه ان يفعل هذا بى
فى هذه اللحظة وصلت عاليا الكافيه واتصلت هاتفيا بملك حين بحثت عنها ولم تجدها
ردت عليها ملك بانهيار .. الحقينى يا عاليا انا بمووووت
عاليا بقلق .. مالك يا ملك انتى فين انا مش لقياكم
ملك .. انا فى الحمام .. قالتها واغلقت الخط
اسرعت عاليا اليها لتدخل المرحاض حتى وجدتها تجلس القرفصاء على الارض منكمشة على نفسها وتغطى عيونها المليئة بالدموع بكفيها الصغيرين وهى تنتحب بشدة
عاليا مندفعة تجاه ملك محتضنة اياها .. مالك يا حبيبتى فى ايه
ملك بحسرة .. ادم سابنى يا عاليا .. تخيلى .. ادم يسيبنى بسهولة كدة بعد كل اللى كان بيننا والوعود اللى قطعناها على بعض والسعادة اللى كنا فيها
عاليا باندهاش .. يعنى ايه سابك ليه اتجنن ده ولا ايه .. ليه عمل كدة ؟
ملك بسخرية ودموع حارقة .. قال ايه ميقدرش يرتبط بواحدة كانت على علاقة بغيره
عاليا باستغراب .. علاقة !! وانتى فعلا كنتى على علاقة قبله ؟!
ملك .. متعتبرش علاقة والله بس هو حتى مسمعنيش اترجيته يسمعنى ويفهم وهو مرضيش حتى يسيبنى ادافع عن نفسي وده ابسط حقوقى
عاليا .. طب فهمينى بس ايه اللى حصل
ملك .. هحكيلك .. انا اساسا حاسة انى هموت
من وانا فى ثانوى واعدين يضغطو عليا عشان ابن خالتى يجى يخطبنى وانا كنت برفض
كنت شايفاه اخ كبير وبس وعمرى ما اتخيلته جوزى وعمرى ما قدرت احبه
بابا وماما حاولو معايا كتير وبالذات ماما عشان ترضى خالتو كانت ممكن تخاصمنى باليومين
المهم وانا فى ٣ ثانوى جت ماما وقالتلى ان محمد ابن خالتى عنده القلب وميستحملش اى حزن او زعل يتعرضله
وانه هيموت ويتجوزنى وانه بيحبنى ويتمنالى الرضا ارضى ومش هلاقى حد يحبنى اده والكلام ده
المهم قالتلى احنا لحد دلوقتى مقولنالهوش انك رفضاه عشان منوجعش قلبه ونتعبه اكتر ماهو موجوع
فحاولى تديله فرصة وتعدى معاه يمكن ترتاحيله وتبقى عملتى اللى عليكى ادام خالتك
انا طبعا زعلت اوى عشانه انا فعلا بحبه زى اخويا وتعبه ده وجعلى قلبى انا
ومقدرتش اتحمل فكرة ان ممكن يتأذى او يجراله حاجة بسببى لو وصله ان انا رفضاه
فكرت ان لو لا قدر الله جاتله ازمة او جراله حاجة مستحيل هقدر اسامح نفسي طول عمرى وهعيش بعقدة ذنبه
المهم قلت هسمع كلام ماما واديله فرصة عشان اسعده وافرح قلبه شوية وقررت انى هحاول اسعده على قد ما اقدر عشان تعبه ده
ماما فرحت اوى من قرارى بس قالتلى ان مجيبش سيرة مرضه ده لا ليه ولا لأهله ولا حتى خالتى عشان الموضوع بيزعلهم ويجرحهم وهو ممكن يحس انى بشفق عليه
بس جه بعدها اعد معايا واعد يقولى اد ايه هو بيحبنى ونفسه يتجوزنى وانه بيعشقنى من واحنا صغيرين وانى اغلى حاجة عنده
وانا كل اللى كنت بعمله انى كنت بستقبل كلامه وارحب بيه مكنتش بصده يعنى
لكن عمرى عمرى ما قلتله كلمة حب واحدة ولا وعدته بحاجة او وصلتله اى احساس
احنا ممكن نكدب فى تصرفاتنا يا عاليا انما هكدب فى مشاعرى واوهمه ازاى !!
المهم خد رقم موبايلى وبدأنا نتكلم ومن هنا بدأت المشاكل
هو كان فى جامعة خاصة وحواليه البنات بتلبس ضيق وقصير وسايبة شعرها وميكب ناس زى ما هو بيقول يعنى استايل وعالموضة
وانا باة بحجابى ولبسى المحتشم والتزامى بدأت معجبوش وعايزنى ابقى زيهم
مرة يقولى ما تقلعى الحجاب ده انتى لسة صغيرة افرحى بشبابك ده مكبرك اوى
ومرة يقولى البسي فساتين عشان ده اللى بيظهر الانوثة اقوله منا بلبس فساتين كتير فى المناسبات والخروجات يقوللى هو الشوال اللى بتلبسيه ده بتسميه فستان اللى مش باين منه غير وشك
انا عايز فساتين جامدة كدة ويعد يفرجنى على لبس صحابه اللى طبعا مينفعنيش ابدا
وانا طبعا كنت برفض كل كلامه ونتخانق وميعجبوش كلامى
مرتحناش وكمان هو قل من نظرى اوى لما لقيته مش غيران كدة على بنت خالته وجسمها وعايز الناس تشوفها بلبس متحرر كدة عادى
جه فى مرة وقاللى احنا مش شبه بعض ومش هينفع نكمل وان فيه واحدة فى الكلية عاجباه وهيا دى اللى شبهه وعايز يكمل معاها
انا يوميها متجرحتش ولا اتهز فيا شعرة بالعكس كنت فى منتهى السعادة انى خلاص اخيرا هخلص منه بارادته هو ومش هيحصله حاجة بسببى واتخلصت من عقدة الذنب
وقلتله فعلا احنا مش شبه بعض وانا بجد مبسوطالك اوى انك اخيرا لقيت اللى انت عايزه واللى انا عمرى ما كنت هقبله على نفسي
بس والموضوع انتهى وانا ارتحت نفسيا جدا واتكلمت مع ماما وبابا وقلتلهم ان هو اللى اختار وانى اصلا مكنتش مرتاحة وكويس انها جت منه
من فترة باة البيه ساب الهانم بتاعته وجاى عايز يرجع
وانا طبعا عمرى ما هرجعله فبيجرى ورايا باة فى كل حتة
وانهاردة جالى وادم سمعنا وللاسف راح اتكلم معاه وتقريبا هو قالله ان كان فيه حاجة بيننا
مش يستنى باة المحترم يسمعنى ويفهم طبيعة علاقتنا كانت ايه لأ اتنرفز واتعصب واتهمنى زور وسابنى مجروحة وبعيط وانا اول مرة اوريله دموعى انتى عارفة .. تجاهل كل ده ومهموش احساسى ومشى
عاليا ... ياااااه يا ملك
يا حبيبتى كل ده استحملتيه بس عشان متحسيش بالذنب
طب تحبى انا اكلم ادم وافهمه الموضوع ده
ملك .. اوعى يا عاليا اوعى
قالتها بتلقائية واكملت
مدام البيه مرضيش يسمعنى ولا ادانى فرصة ادافع عن نفسي يبقى انا مش هقوله ولا هعرفه حاجة ميستاهلش اصلا ابررله موقفى بعد اللى عمله
وانتى اوعى تقوليله او حتى تلمحى انتى كدة تبقى بتقللى منى يا عاليا وبترخصينى وانا اعلى من كدة
مش انا اللى اتحايل على واحد عشان يرجعلى
ده انا ادوس على قلبى بجزمتى ولا ان حد يذلنى كدة
عاليا .. تمام يا ملك اللى تشوفيه
بس انا صعبان عليا اوى حبكم يروح كدة
ملك بمرارة .. حبنا !! واضح انه كان مبنى على اساس مهزوز وعشان كدة اقل ريح وقعته وجابته الارض
انا اللى وهمت نفسي انه بيحبنى انا اللى استاهل بس ملحوقة انا هعرفه مين ملك
وزى ما البيه بيعايرنى بعلاقة قديمة انا كمان هعرف ماضيه وافضحه قدام نفسه
عاليا .. يعنى هتعملى ايه
ملك .. هتعرفى .. المهم انا عايزة اروح حالا
وبالفعل قامت عاليا بايصالها للمنزل وبعد وصولهم
عاليا .. الحمدلله انك هديتى واطمنت عليكى .. اطلعى باة وارتاحى شوية وان شاء الله كله هيتحل
ملك .. شكرا يا لولو تعبتك معايا .. سلام
بعد انصراف عاليا .. ظلت واقفة امام بناء منزلها
حتى قامت بالاتصال بأحدهم وجاءها الرد
ملك .. ايوة يا عمر .. ازيك
عمر .. الحمدلله .. معلش اتأخرت عليكم بس بلبس وجاى اهو
ملك .. خليك ملوش لزوم احنا مشينا اصلا .. لو سمحت يا عمر انا عايزة اسألك سؤال مهم جدا بالنسبة لى
عمر .. اتفضلى .. بس الاول فهمينى مشيتو ليه لحقتو تخلصو شغل ؟!
ملك وبدون مقدمات .. هو ادم كان ليه علاقة بواحدة تانية قبلى !!
عمر .. ايه السؤال الغريب ده ؟
ملك .. لو سمحت يا عمر ترد عليا من غير لف ودوران
عمر .. انا مبلفش وادور يا ملك .. بس دى حاجة انا مينفعش اتكلم فيها مش من حقى اصلا لانها حاجة متخصنيش
واكمل .. اظن انتى فاهمة ان مينفعش اخرج سر صديقى لاى سبب من الاسباب ولا يمكن هسمح لنفسي بده
هو بيأتمنى ويحكيلى عشان يفضفض معايا وهو واثق ومتأكد ان كلامه ده استحالة يخرج برة يبقى انا ازاى اخون الثقة دى .. انا اسف يا ملك معنديش رد
ملك .. تمام انا كدة وصلتنى الاجابة وعرفت ان البيه بيحاسبنى ويعاقبنى على حاجة هو نفسه عملها
بس انا هوريه مين هيا ملك السيوفى
عمر .. ايه اللى بتقوليه ده انا مش فاهم منك حاجة عقاب ايه اللى بتتكلمى عنه !
ملك .. البيه المحترم صاحبك بيعايرنى ويحاسبنى عشان فهم انى كنت فى علاقة قبله .. ورفض يسمعنى ولا يفهم منى اى حاجة
اتحايلت عليه واترجيته يسمع منى ويفهم الموضوع صح جرحنى واهاننى وقاللى كلام مينفعش يتقال
وسابنى وانا منهارة ومشى حتى مهانش عليه يستنى لما اهدى وفى الاخر طلع هو نفسه كان فى علاقة هو كمان وعايش حياته وجاى يحاسبنى انا ويعايرنى
عمر بانفعال .. حرام عليكى يا ملك انتى كدة بتظلميه ..
انا مينفعش اشوف صاحبى بيتظلم ادامى واسكت واتفرج عليه ورغم ان مش المفروض اتكلم فى اى حاجة تخصه بس انا مضطر ارفع عنه الظلم البيّن ده
ادم يا ملك عمره ما حب ولا قلبه دق لواحدة غيرك
تجمد جسدها عند سماعها لتلك الكلمات ليردف
عمر .. ادم من يوم ما شافك وهو مبيعرفش يشوف غيرك اصلا وياما بنات حاولو يقربو منه وانتى عارفة كويس ان بنات كتير هتموت عليه بحكم شخصيته والكاريزما اللى عنده ده غير مستواه طبعا
بس هو عمره حتى ما فكر فى واحدة غيرك
وكان هيتجنن عشان يقرب بس منك
ودخلك معانا المشروع على مسئوليته وتعب على ما اقنع الدكتور والمعيد .. طبعا هو مقالكيش كل ده عشان ميقلقكيش ولا يزعلك .. بس هو فعلا عمل كتير اوى عشانك يا ملك حرام تظلميه
كانت تستمع له وعلى وجهها علامات الاندهاش من حديثه وكأنه القى عليها بكتل ثلجية لتبرد من النار المشتعلة بقلبها
ظلت صامتة لفترة من شدة الاندهاش
واردف عمر .. وعشان تبقى عارفة باة .. هو مكنش ناوى يرتبط بيكى اصلا دلوقتى وكان المفروض بعد ما تخلصو هيعترفلك بحبه وييجى يتقدملك علطول
بس لما حصل موقف الولد اللى جاله فى الكافتيريا ده واتكلم ادامك ان فيه حاجة بينه وبين مروة خاف تصدقى وتتصدمى وتضيعى منه .. وخاف عليكى تتقهرى بسبب الكلام ده خصوصا انه كان حاسس انك بتحبيه زى ما هو بيحبك
فقرر يخالف قراره ويعجل فى اعترافه ليكى ومع اول اجازة ليه يفاتح اهله ويخطبوكى زى ما كنتم متفقين اول ما تخلصو
كانت تستمع لكلام عمر وعيناها مغرورقتين بالدموع تكاد تجن مما سمعته .. وقد عصف بقلبها مشاعر عديدة متناقضة تماما فهى سعيدة جدا لمعرفة هذه الحقيقة ولكن متألمة بشدة وقلبها ينزف دما لهجر حبيبها لها
لتحدث نفسها
أحقا يحبنى لهذه الدرجة وانا لا أعلم !
أحقا انتظرنى كل هذا وعشقنى بصمت حتى لا يؤذينى
كيف لى ان افكر ان حبنا كان ضعيفا ولهذا لم يصمد
لا يا ملك .. قلبك كان على حق العشق بينكم كبير حقا ولا تستطيع اى قوة ان تؤثر به
ولكن لما .. لما بعد كل هذا العشق الساكن بقلبك استطعت تركى بهذه السهولة ولم تعطنى الحق حتى فى الدفاع عن نفسي
لم تسمعنى .. لما لم تعط عشقنا فرصة كى يستمر .. وتنازلت عنه بسهولة
كيف لك ان تعشقنى لهذه الدرجة وتترك يدى بنصف الطريق دون ان تتمسك بها للنهاية
يا الله اكاد اجن منك ادم
قالت له بنبرة الم شديدة ودموعها ما زالت تنهمر على وجهها
ملك .. طب ليه مسمعنيش يا عمر ازاى بيحبنى اوى كدة زى ما بتقول وكان سهل عنده يسيبنى
ده انا اترجيته يسمعنى جرحنى بالكلام وسابنى منهارة فى عز احتياجى اليه
عمر .. اكيد ادم اتصدم ومكنش قادر يسمع منك حاجة ساعتها .. وممكن يكون خاف لو اعد اكتر يقول كلام يندم عليه بعد كدة من كتر عصبيته .. ادم لما بيخرج عن شعوره مبيعرفش هو بيقول ايه معلش استحمليه وسامحيه يا ملك هو أكيد ميقصدش انه يهينك ولا عايز يسيبك
وسكت قليلا ثم قال .. اكيد لما يعد مع نفسه ويهدى ويفكر كدة هيلاقى انه محتاج فعلا يسمعك
اديله فرصة بس يهدى يا ملك وبعدين اتكلمى معاه
اظنه يستاهل تستنيه وتتفهمى موقفه يومين بس
ردت عليه .. انا استناه العمر كله يا عمر بس ابقى متأكدة انه هيرجعلى وفعلا فيه امل
رد عمر .. ان شاء الله فيه امل بس اديله وقته وافهميه يا ملك ادم تفكيره صعب شوية وعزة نفسه وكرامته عنده فوق اى شئ
اغلقت الخط معه وقد شعرت براحة شديدة وكأن لفحتها نسمة هواء باردة فى نهار صيف حار
حقا مكالمة عمر فرقت معها كثيرا واضاءت شعاع الامل بداخلها من جديد
صعدت منزلها وسرعان ما غرقت بالنوم وكأنها تهرب من واقعها بالنوم
...
فى صباح اليوم التالى .. ارتدت ملك ملابسها بعد انتقاءها بعناية شديدة كى تظهر بكامل اناقتها وجمالها امام عاشق عيناها .. تمنت ان يحن قلبه ويرق لها ويذهب اليها حتى يعيدها لقلبه
ولكن هل الموضوع بتلك البساطة بالنسبة لادم
فهو فى النهاية رجل شرقى متمسك بمبادئه وتربيته القاسية مرسخة بداخله وللاسف لها تأثير شديد على كل افعاله وافكاره
دخلت المدرج تبحث عنه بعينيها بلهفة شديدة وشوق عارم كى تراه وتشبع عيونها منه
ولكنها لم تجده .. مر اليوم بأكمله دون ان تراه
فكرت فى مهاتفته كى تطمئن قلبها عليه .. ولكنها تذكرت حديث عمر وان عليها اعطاءه مدة كى يتقبل هذا الوضع
عادت منزلها وعلى وجهها يرتسم الحزن وكسرة النفس
القت ملابسها بلا مبالاة على السرير واخذت حماما سريعا ثم نامت
طرقت والدتها الباب .. افتحى يا ملك
فقد اغلقته ملك من الداخل حتى لا يزعجها احد .. فهى حقا لا تريد رؤية اى شخص او الحديث فى اى شئ تريد النوم والراحة فقط
فهذا هو الشئ الوحيد الذى يريح عقلها من التفكير وقلبها من الالم .. او هكذا تعتقد
فتحت لها ملك الباب متساءلة .. خير يا ماما فى حاجة
ثريا .. فيه حاجة !! انتى فين يا ملك جيتى دخلتى على اوضتك علطول من غير ما تسلمى عليا ولا حتى تاكلى
مالك يا حبيبتى فيكى ايه ؟!
ملك بدموع .. مفيش يا ماما مخنوقة شوية
ثريا .. مخنوقة من ايه يا حبيبتى قوليلى قلقتينى اوى
ملك .. هو محمد بأى صفة بيجيلى الكلية واماكن شغلى فى المشروع يا ماما .. هو مش خلاص موضوعنا انتهى من زمان وهو اللى نهاه بنفسه عايز منى ايه باة ؟!
ثريا .. انا معرفش انه لسة بيجيلك والله .. واكملت بخبث .. بس مدام بيجيلك فعلا يبقى مش قادر يبعد عنك وبيموت فيكى مش بيحبك بس
وانا مبحبوش . قالتها ملك بانفعال واكملت
وبعدين هو انا تحت امر سيادته لما يحب يرجعلى ارجع عادى كدة . ده بأحلامه انا استحالة هفكر بس فيه تانى
انتى عارفة ومتأكدة انى عمرى ما حبيته واديته فرصة بس عشان مرضه وعشانكم لكن بعد اللى عمله انا استحالة هاجى على نفسي وكرامتى تانى لو عمل ايه ووصلى لاختك الكلام ده خليه يحل عنى باة
ثريا .. طب اهدى بس وفهمينى ايه دخل ده بدموعك دى معقولة بتعيطى وقافلة على نفسك عشان محمد بيجيلك لأ طبعا استحالة
ردت ملك بضعف .. عشان ضيع منى حلم عمرى يا ماما .. ضيع منى ادم عشقى وفرحة عمرى اللى استنيته سنين لقيت توأم روحى اللى اعدت ادور عليه طول عمرى ولما لقيته ملحقتش اتهنى بيه
جه البيه المحترم ابن اختك وهد كل حاجة فوق دماغى ودمرنى وكسر قلبى
ثريا .. وهو عرف ادم منين !!! وبعدين مكنتش اعرف انك بتحبى ادم اوى كدة
ملك .. انا بعشقه يا ماما مش بحبه .. وكنا هنتخطب بعد الامتحانات علطول وكنت هفرحكم بيا
واكملت بحزن .. او كنت فاكراكم هتفرحولى
ثريا بحنان أم ورأفة بقلب ابنتها .. اكيد هنفرح بيكى يا ملك لما نلاقيكى سعيدة ومرتاحة مع شخص كويس ومحترم وقلبك اللى اختاره
طيب معلش يا حبيبتى متعيطيش وفهمينى بالراحة بس حصل ايه يمكن اقدر اساعدك
اخذت ملك تقص لوالدتها ما حدث فى الكافيتيريا بداية من ظهور محمد امامها ونقاشهم المنفعل سويا حتى وصل ادم ورأه وحدث ما حدث
تألمت ثريا كثيرا لقلب ابنتها الممزق واحتضنتها بشدة .. هيرجعلك يا ملك .. لو بيحبك هيرجعلك .. اى واحد مكانه هيسمع الكلام ده اكيد هيبعد شوية وهيفكر ينهى الموضوع خالص
بس لو بيحب من قلبه بجد مش هيقدر على البعد وهيرجع تانى
ملك .. تفتكرى يا ماما .. ده رافض يسمعنى .. ومجاش حتى الكلية انهاردة
ثريا .. معذور يا ملك .. اكيد مصدوم ومجروح .. اكيد اعد يتخيل طريقتك وتصرفاتك معاه وكل حاجة هيتخيلها مع حد غيره هتخلى قلبه يولع من الغيرة
انتى مجربتيش نار الغيرة وعذابها يا ملك ربنا ما يوريكى
اكيد هو دلوقتى فى صراع مع نفسه عايز يرجع بس كرامته وجعاه
ملك .. ما هو لو يسمعنى هيعرف ان كل اللى فى دماغه وتخيلاته دى كلها مجرد اوهام فى دماغه هو وبس وملهاش اى اساس من الصحة
ثريا .. طب مجربتيش تكلميه فى التليفون
ملك .. عمر صاحبه قاللى استنى لما يهدأ ويسمعك ومتضغطيش عليه
وانا هموت واطمن عليه بس خايفة اكون بضغط عليه وبصراحة اكتر مش عايزاه يحس انى بجرى وراه .. انا كرامتى فوق كل شئ يا ماما
وان كنت عايزة احكيله فده مش عشان يرجعلى بس لأ ده عشان يشيل الاوهام اللى فى دماغه دى ويعرف ان هو الوحيد اللى قلبى دقله وكمان شكلى ادامه ميبقاش وحش .. لكن هو بعد ما يسمع ويعرف الحقيقة لو تمسك بقراره مش هتحايل عليه انا .. ساعتها هيبقى فعلا نهى كل حاجة بيننا
ثريا .. خلاص يا حبيبتى استنى لما يظهر فى الكلية هيكون راق وهدى وساعتها اتكلمو وصفو اللى بينكم
ودلوقتى تعالى كليلك لقمة انتى مكلتيش حاجة من ساعة ما جيتى
ملك .. صدقينى يا روحى مش قادرة
ثريا. . لا هتاكلى انا اعدة من الصبح مستنياكى ومش عايزة اكل من غيرك
يلا يا حبيبتى تعالى وفكرى كدة اعدتك هنا مش هتحل حاجة هتتعبى وتعذبى قلبك عالفاضى
وبعد محايلات استسلمت ملك لامر والدتها
.....
كان ادم مكتئبا بحجرته يتمدد على سريره واضعا سماعات الاذن يستمع لبعض لاغانى ظنا منه انها تستطيع ان تشتت تفكيره
ولكن هيهات .. فقد كان ينظر امامه بشرود وما زال عقله لا يستوعب ما حدث
أيعقل ان تكون تلك المدة التى عشقتها بها لم تكن تشعر بى .. بل كانت على علاقة برجل غيرى !
فى الوقت الذى كان قلبى ينبض عشقا باسمها وعيونى لا ترى غيرها هى كانت تعشق شخصا اخر
كيف لكى ان تفعلى هذا بى ايتها الحقيرة !
كيف لم تشعرى بى وبمشاعرى تجاهك
أكنت غبى .. نعم كنت غبيا حين ظننت انها تشعر بى
كنت غبيا حينما توهمت ان عيونها تحدثنى عشقا
فقد خيل الى قلبى انها تعشقنى وعيونها تفضح هذا العشق ولكن لقد توهمت .. نعم لقد اوهمت قلبى بعشقها
ففى الوقت الذى كنت افكر بها ولا ارى بعيونى انثى غيرها .. كانت تسلم قلبها وروحها لشخص اخر
كم كنت غبيا ادم
تحدث اليه عمر .. ايه يا ابنى هتفضل مسهم وسرحان كدة كتير .. مش ناوى تتكلم معايا
ادم بصوت مختنق .. مش قادر اتكلم يا عمر ارجوك سيبنى
عمر .. هسيبك بس لازم تعرف ان ملك كلمتنى يا ادم
ادم بدهشة .. نعم !! كلمتك امتى وليه اصلا ؟!
عمر .. حكتلى على اللى حصل وكانت فاكرة انك كنت على علاقة قبلها .. واكمل بحذر
سامحنى يا ادم اضطريت اقولها انك محبتش غيرها .. واكمل مستعطفا اياه .. غصب عنى يا صاحبى مقدرتش اشوفها بتظلمك وتلوم عليك واقف ساكت وانا شاهد على عشقك ليها طول الفترة اللى فاتت
رد ادم بنبرة سخرية .. قال يعنى هتفرق معاها .. متفرقش يا عمر هيا مش هيفرقلها اصلا مشاعرى
واكمل بصوت مبحوح من الاختناق .. هى وقتها كانت غرقانة فى حب واحد غيرى اصلا عمرها ما هتفهم ولا هتقدر مشاعرى وقتها
عمر بحدة .. بس انت مسمعتهاش يا ادم
ادم .. اسمع ايه يا عمر .. اسمع ان وقت ما كنت بموت من عشقى ليها هيا كانت مع راجل تانى .. تفتكر هقبل على كرامتى ورجولتى وقلبى انى اسمع الكلام ده
هقبل انى كنت وقت ما بفكر انها بتحبنى وبتوصلى ده بعيونها كانت بتعشق غيرى
انا قلبى بيتقطع يا عمر
عمر .. بس انت وقتها مكنتش معاها ولا حتى حاولت تلمحلها بمشاعرك دى بأى حق بتعاقبها على الفترة دى من حياتها
طبيعى اى بنت فى سنها هترتبط وتعيش حياتها هيا هتعرف منين انك بتحبها
واكمل بلوم .. وانت يا ادم مفكرتش وقتها انها ممكن تحب حد ويخطفها منك .. ده انا كنت بتحايل عليك واقولك الحقها وانت ولا هنا
ادم .. مفكرتش يا عمر لانى كنت بلمح في عيونها شوقها ولهفتها عليا .. كنت بشوف عنيها بتقولى بحبك .. كنت بحس من نظراتها ليا انها بتعشقنى يا عمر
كنت موهوم للاسف وفاكر انها بتحبنى ومتطمن
معرفش ان عيونها كدبت عليا .. او انا اللى كان نفسي احس مشاعر وهمت نفسي بيها
عمر .. واهى بقت معاك وبتحبك مش تحمد ربنا انها مضاعتش وربنا شالهالك زى ما كنت بتتمنى .. ليه باة معذب نفسك كدة
ادم بعصبية .. مقالتليش ليه يا عمر !! خايفة من ايه عشان كدة خبت عنى
عمر .. انت مسمعتهاش عشان تعرف مديتهاش حق تتكلم وتفهم منها ليه
ادم .. فات وقت الكلام والشرح خلاص .. منا كنت معاها مفكرتش ولا مرة فى كلامنا تقولى وتحكيلى ليه مخافتش اعرف من برة وساعتها اكيد مش هكمل يوم واحد معاها
عمر .. عشان كدة مقالتش يا ادم ... واكمل
هيا عارفة انك راجل شرقى ومتزمت ولو قالتلك هتسيبها خافت تخسرك
ارحم ضعفها وارحمها واسمع منها
ادم .. كفاية كلام فى الموضوع ده لو سمحت يا عمر .. انا خلاص همسحها من حياتى
عمر .. تفتكر هتقدر !!
اغلق ادم النور وظلت كلمة عمر تتردد بذهنه (تفتكر هتقدر) لا يعرف للسؤال اجابة .. ولكنه سيحاول
نعم لابد له ان يحاول مهما كلفه اللمر
......
فى صباح اليوم التالى
خرجت ملك مسرعة من منزلها
فقد تأخرت على ميعاد المحاضرة الاولى
حيث ظلت طوال الليل تبكى وتنتحب بشدة على فراق عاشقها الغالى
ظلت تتذكر كلماته .. كيف وعدها بالحب والسعادة تحت جناحه .. كيف كانت عيونه تنطق عشقا من مجرد النظر اليها .. كيف كانت ترتجف بشدة حين يلمس يدها بالخطأ
يالله كم كان حبك جميل ادم .. كنت اشعر بحالى طائرة فى السماء بقلب هائم
كيف لك ان تتركنى بهذه السهولة .. ساعدنى يا الله
اخذت تفكر وتبكى حتى اتاها صوت اذان الفجر من الشرفة
تنبهت للوقت فقامت تتوضأ وتصلى فرضها ثم ذهبت للنوم .. حاولت باصرار الاستسلام للنوم حتى تستطيع قضاء يومها الدراسى ولكن مر وقتا طويلا حتى نامت ساعة واحدة قبل ميعاد جرس المنبه
لم تستطع النهوض سريعا واخذت تتململ بسريرها حتى فاتها ميعاد المحاضرة الاولى
ذهبت مسرعة للمدرج وجدته مغلق .. حزنت كثيرا ليس فقط بسبب المحاضرة ولكن تمنت رؤية حبيبها واشباع عيونها منه
لذا استجمعت شجاعتها وطرقت باب المدرج
فتح لها الدكتور فاعتذرت له متحججة بالمواصلات وزحمة الطرق .. فتقبل اعتذارها واذن لها بالدخول
دخلت متلهفة لرؤيته اخذت تبحث عنه بعيناها فى مكان جلوسه المعتاد حتى وجدته تلك المرة ولكن لم يكن ينظر اليها كعادته
فرح قلبها بشدة لرؤيته فقد كانت تشتاقه كثيرا ولكن سرعان ما ارتسم الحزن على وجهها حينما لم يعيرها اى اهتمام ولم ينظر اليها
ألم يشتاق الى مثلما اشتقت اليه !!
أحقا لم يعطنى فرصة لاكون معه !!
ظلت تنظر اليه بين الحين والاخر حتى تشبع روحها من وجوده بجانبها
فقد تعمدت الجلوس بمكان خلفه حتى تتمكن من استراق النظر اليه دون ان يراها
ولكن هل حقا لم يراها !!
فقد رأها تبحث عنه بعيونها منذ دخولها القاعة ولذلك تصنع اللا مبالاه والتجاهل تجاهها حتى يجرحها مثلما جرحته هي بعشقها غيره .. او هكذا يعتقد
وكان يلمح نظراتها اليه ويفرح لاشتياقها له
فهو قد اشتاقها كثيرا ولكن كبرياءه يمنعه عن التصريح بذلك حتى لنفسه
انتهت المحاضرة وخرج مسرعا فلحقته ملك منادية عليه
ملك .. ادم !!
لم يعيرها اهتمام واكمل طريقه
ذهبت تعترض طريقه قائلة
ملك .. ادم مش سامعنى !؟
رد عليها ببرود .. خير يا بشمهندسة فيه حاجة ؟
صعقت من طريقة معاملته ورده عليها فقالت
ملك .. ايه الطريقة دى يا ادم من امتى بتكلمنى بالرسمية دى ؟
لتردف .. احنا لازم نتكلم مش هينفع نفضل كدة
ادم ببرود مصطنع .. دى هتبقى طريقتنا من هنا ورايح
واكمل .. وبالنسبة للكلام اللى عايزة تتكلميه فالحقيقة انا مش فاضى ومعنديش وقت تانى اضيعه على تفاهات
ملك بصدمة .. تفاهات !
انت بتسمى علاقتنا وعشقنا تفاهات يا ادم ؟!
ادم بانفعال ونبرة قاسية .. ايوة تفاهات . عشق ايه اللى بتتكلمى عنه ده كان وهم .. اكبر وهم وهمت نفسي بيه
عيونى كانت بتنطق عشق ليكى وانتى بتحبى واحد تانى
مش صحيح .. قالتها ملك فجأة واكملت
انا عمرى ما حبيت غيرك .. ده كان ...
قاطعها ادم قائلا. . بطلى باة كذب وتمثيل .. انتى قايلالى بنفسك ان كان فيه علاقة .. وايا كانت طبيعتها مش عايز اعرفها خلاص .. انتى انتهيتى من حياتى
ملك .. مش بمزاجك .. انت مش لوحدك فى العلاقة دى ولا هتنهيها وقت ما انت عايز
انا من حقى عليك تسمعنى وتفهم موقفى وانت من حقك كمان تعرف كل حاجة
ادم .. ياستى انا متنازلك عن حقى ده مش عايزه .. واردف .. ولا عايز اسمع منك اى كلام
ردت عليه ملك بضعف .. هو ده وعدك ليا انك هتبقى امانى وحمايتى وعمرك ما هتسيبنى
ادم .. ده لما كنت فاكرك بتعشقى نفس عشقى. لما كنت فاكرك ملكى وبتاعتى انا بس
لكن للاسف طلعت غلطان
ملك .. يا ادم اسمعنى ولما تعرف الحقيقة صدقنى كل اللى فى دماغك ده هيتمسح بأستيكة
ادينى فرصة اشرحلك
محمد ده ابن خالتى وبس وانا....
قاطعها ادم قائلا بانفعال شديد .. قلتلك مش عايز اعرف حاجة انتى مبتفهميش
ملك .. بطل اسلوبك وطريقتك دى متنفعش معايا .. مش معنى انى عايزة اوضحلك حاجة انت فاهمها غلط انك تغلط فيا
ادم .. غلطت !! .. هو انا كدة غلطت .. بالعكس يا بشمهندسة ده انا كدة محافظ اوى على كلامى معاكى وماسك نفسي بالعافية عشان مغلطش زى ما انتى بتقولى
بس عشان تبقى عارفة ومن الاخر كدة .. انا مسحتك من حياتى وهشيلك من قلبى وهنسى كل حاجة بيننا وانتى كمان انسى انسينى يا ملك انا خلاص عمرى ما هكون ليكى حتى لو روحى فيكى معدش ينفع خلاص
ملك بضعف وانكسار لاول مرة يظهر عليها .. ليه يا ادم كل ده عشان علاقة ملهاش اى قيمة عندى حرام عليك تدمر حبنا عشان اوهام .. اسمعنى يا حبيبى ارجوك انا محبتوش .. اناااا
ادم بحدة .. مش بس كدة يا ملك .. للاسف معدش عندى ثقة فيكى .. بقيت خايف من اى حاجة تكونى مخبياها عليا .. خايف اكتشف كل يوم حاجة واتصدم فيكى اكتر
مش هعرف اصدق اى كلمة حب منك وانا عارف ان غيرى سمعها منك
مش هعرف احس كلامك يا ملك وانا عارف انه اتقال لغيرى
تذكرت ملك كلام والدتها وكيف حدثتها عن مشاعر ادم المتصارعة حاليا وانه فعلا يتخيلها مع شخص اخر ويغار
ولكن هي ايضا قالت لها اذا كان حبه قوى لن يستطيع البعد وسيعود
اذا فلتضغط بكل قوتها على تلك النقطة حتى تخرج مشاعره وتحنن قلبه عليها
قالت له باستفزاز .. انت محبتنيش يا ادم عشان كدة مش فارق معاك بعدنا وفراقنا .. وبما انك محبتنيش فانا اكيد مش هشحت منك الحب ده ولا هطلب تبقى معايا غصب عنك .
رد ادم بانفعال شديد .. انتى غبية
فعلا غبية واغبى انسانة عرفتها كمان
انا لو محبتكيش فعلا مش هيفرق معايا تعرفى واحد ولا عشرة حتى
مش هحس بنار كل ما اتخيلك بتعبرى لغيرى عن مشاعرك .. قلبى مش هيولع كل ما افتكر ان قلبك دق لغيرى .. انا لو محبتكيش يا ملك مكنتش هتجرح منك اوى كدة وادخل فى حرب بين قلبى وعقلى
قلبى اللى بيعشقك وبيطالبنى اجرى عليكى واخدك فى حضنى برغم انه مجروح وبينزف الم
وعقلى اللى خايف يأمنلك ويصدقك ويرجع يتصدم فيكى تانى .. عقلى اللى بيقولى كرامتك فوق كل شئ
ملك .. مفيش الكلام ده يا حبيبى صدقنى .. طمن قلبك وقولله انى معشقتش ولا قلبى دق لغيرك
وقول لعقلك انى استاهل تدينى ثقة لابعد الحدود وانى عمرى ما هخيب ظنك تانى فيا
ادم بضعف .. ياريت كان ينفع يا ملك .. صدقينى مش قادر
شعرت ملك بدموعها سوف تتساقط امامه مرة اخرى
فاعطت له ظهرها على الفور قائلة بمحاولة منها لاخفاء دموعها ونبرة صوتها الباكية متألمة من كلامه الجارح لقلبها
ملك .. اللى تشوفه يا ادم .. مش هضغط عليك اكتر من كدة .. طالما هترتاح فى بعدنا اكتر انت حر
وانطلقت مسرعة من امامه ذاهبة للحمام
دخلت الحمام واخذت تتذكر كلامه وتبكى
معقول يا ادم للدرجة دى شايفنى وحشة .. وكل ده ليه عشان علاقة انا مليش اى يد فيها ولا حتى عمرى كنت طرف فيها
اااااه لو تسمعنى بس وتفهم الحقيقة هترتاح وتريح قلبك ودماغك الناشفة دى
وظلت تبكى وقت ليس بقليل ثم غسلت وجهها جيدا واعدلت من هيئتها فقد كان شكلها مزريا للغاية لذا حاولت بقدر الامكان اخفاء تلك الهيئة البشعة واخذت تهندم من ملابسها وتضع بعض الكحل بعيونها كى تخفى اثار البكاء
ثم توجهت لقاعة المحاضرات لحضور المحاضرة التالية محاولة تجاهل ادم وعدم النظر اليه حتى لا تضعف وينزف قلبها الما وتبكى مجددا
بعد انتهاء اليوم الدراسى ذهبت للكافيتيريا بصحبة عاليا لتناول العصير وبعض الشطائر
عاليا .. ايه يا حبيبتى عيونك هتفضل حزينة كدة لامتى بجد انا قلقانة عليكى اوى
ملك .. للاسف يا عاليا انا تعبانة اوى .. واحشنى اوى وبجد هموت خلاص من بعده .. مش قادرة اتحمل
عاليا متسائلة متألمة داخليا لألم صديقتها .. محاولتيش تكلميه تانى ؟
ملك بالم .. كلمته انهاردة وياريتنى ما كلمته
تخيلى بيقول على حبنا وهم .. حبنا اللى كان مفضوح من اول يوم لكل الجامعة .. تخيلى شايفنى كدابة وغشاشة
ومعتقد انى مكنتش بحبه ولا كنت حاسة بيه غير بعد ما سبت محمد
حاولت كتير معاه يا عاليا لكن للاسف مفيش فايدة
عاليا .. معلش الموضوع لسة فى اوله وتلاقيه لسة منفعل ومتعصب استنى عليه يومين كدة يهدى وحاولى تانى
ملك .. عمر برضو قاللى كدة بس مقدرتش .. اول ما شوفته حسيت قلبى بيتنفض من مكانه عايز يجرى عليه .. حسيت برعشة فى جسمى كله وكل حاجة فيا عايزاه وبتناديه
انا بحبه اوى يا عاليا بحبه اوى
عاليا .. عارفة ياحبيبتى
ملك .. ياريتها خناقة بسيطة كانت تهون .. لو فعلا متأكدة اننا هنتصالح كنت صبرت وهونت على نفسي
ثم اجهشت بالبكاء قائلة .. لكن باللى سمعته انهاردة ده خلاص كل شئ انتهى
عاليا .. طب اهدى وامسحى دموعك مش عايزين حد يشوفك كدة لازم تبقى قوية
ملك مجففة لدموعها .. عندك حق
واخذت تتناول الشطائر متناسية مشكلتها
فى هذه اللحظة دلف مروان للكافيتيريا والذى نادرا ما يظهر بالكلية .. وجد عاليا وملك فذهب اليهم متحدثا بمرح
مروان .. يااااه عاش من شافكم . . ازيك يا عاليا .. ازيك يا ملك عاملين ايه
عاليا .. يا سلام احنا اللى المفروض نقول كدة .. انت بتختفى فين يابنى
جلس مروان بجانبهم قائلا
مروان .. والله مشاغل يا عاليا .. من السيشن ده للفرح ده لما مش لاحق حتى اشوف اهلى
ملك بسخرية .. ولا حتى لاحق تشتغل فى المشروع يا حرام
مروان بمزح .. شوفتى بتعب ازاى
ملك .. اه منا واخدة بالى .. ثم اكملت بجدية
ملك .. بجد يا مروان انت مهمل جدا فى دراستك والمشروع .. مبشوفكش بتحضر حاجة اصلا .. انا عارفة انه مش فارق معاك ومعتمد على مصدر تانى .. بس برضو لازم تهتم شوية وتجيب تقدير حتى تفرح اهلك اللى تعبانين عليك دول
مروان بابتسامة .. فكرتينى بأختى علطول تتكلم معايا كدة
ملك .. هيا اد ايه ؟
مروان .. ياسمين .. لا دى ياسمين متجوزة اصلا .. لسة فرحها كان السنة اللى فاتت .. بس علطول كانت تعد تقولى مذاكرتك وكليتك اهم من اى حاجة
ملك .. اسمع كلامها باة كلها ٣ شهور ونتخرج استحملهم
.. وبعدين تعالى هنا انا مش قلتلك قبل كدة تعلمنى موضوع التصوير ده
مروان .. وقلتلك انا جاهز .. انتى اللى مقولتيش تانى
ملك .. هو احنا بنشوفك خالص
مروان .. ااااه فى دى عندك حق .. طب خدى رقمى ونتفق
تبادلا الارقام تحت انظار ذلك المشتعل غضبا وقلبه يكاد يحترق من شدة غيرته حيث لم يستطع ازاحة نظره عنهم
لاحظت ملك تواجد ادم ونظرات عينيه المشتعلة بالغيرة ففرحت كثيرا وكاد قلبها يتراقص فرحا
أتغار على ادم .. اذا مازلت اعنى لك .. اذا ما زلت تحبنى
اراك تحترق من غيرتك .. اعجبتنى هيئتك تلك كثيرا فقد اشتقت لرؤية عشقى بعيونك
اذا فلنتسلى قليلا حبيبى حتى تدرك ان لا ملاذ لك منى
ملك .. طب ما تفرجنا شغلك فى الافراح كدة عامل ازاى
مروان جالسا بجانبها يمد بهاتفه امامها كى يتشاركا رؤية الصور معا
مروان .. بصى ده الفرح بتاع امبارح .. كان جامد اوى
عاليا .. المكان شكله حلو فعلا
مروان بحماس .. جدااا وفيه اماكن كتير حلوة للتصوير .. السيشن كانت كبيرة اوى
استرقت النظر لادم فوجدته ينظر اليها بنظرات متوعدة قاسية وبغيظ شديد
ضحكت داخليا ثم اكملت لعبتها
.......
ياترى ادم هيعمل ايه !! وهيقدر يبعد عنها فعلا ؟!
منتظرة اراءكم وتوقعاتكم
دمتم بالف خير 😍
•تابع الفصل التالي "رواية انت عشقي وقسوتي" اضغط على اسم الرواية