رواية اكليل الحياة الفصل الاول 1 - بقلم دودو احمد

  رواية اكليل الحياة كاملة بقلم دودو احمد عبر مدونة دليل الروايات 

رواية اكليل الحياة الفصل الاول 1

فى إحدى المنازل القديمه تعيش طفله صغيره مع جدتها المحببه لديها لقد أصبحت هى عائلتها وجميع ما تملك تستيقظ هذه الطفله المدلله من نومها و نهضت من على فراشها دلفت المرحاض ثم خرجت ارتدت ملابس المدرسه وخرجت من غرفتها بأبتسامه طفوليه بريئه وهى تنظر إلى جدتها قائله

ابرار:-صباح الخير يا تيتة

ابتسمت لها ابتسامه حنونه وقالت بحب

رجاء:-صباح النور يا روح قلب تيتة يلا يا حبيبتى اقعدي أفطرى علشان متتأخريش على المدرسه

نظرت إلى الطعام بتذمر وقالت

ابرار:-أيه ده يا تيتة ساندوتشات جبنة!! كام مره أقولك أنا مبحبش الجبنة مش حلوة عايزة لانشون عايزة أي حاجة تانية غير الجبنة دى

ردت عليها بنبره هادئه حنونه وقالت

رجاء:-يا حبيبتى دى نعمة ربنا حرام تقولى عليها مش حلوه ولا تقولى مش بحبها أحنا لازم نحمد ربنا على نعمة القوت فيه غيرنا كتير مش لاقي حتة الجبنه اللى مش عجباكي دى

تكلمت بضيق وقالت

ابرار:-الحمدللة على نعمة القوت

ربت على ظهرها بحنو وقالت

رجاء:-أيوه كده شطورة، كده ربنا يحبك

نظرت لها نظره مطوله وقالت بتساؤل

ابرار:-تيتة هما ليه بابا وماما مش عايشين معايا ؟

نظرت لها بحزن وقالت

رجاء:-بابا وماما مش هينفعوا يعيشوا مع بعض تانى وكل واحد فيهم عايش بمكان بعيد بس على طول بيسألوا عليكى يا حبيبتى

ردت عليها بنبره غاضبه وقالت

ابرار:-بس انا يا تيتة نفسي أعيش مع بابا وماما ويجوا كل يوم المدرسه يخدونى منها زى أصحابي

ابتسمت لها بتوتر وقالت بحزن

رجاء:-هو أنتي مش بتحبي تيتة ولا أيه و زهقتي من العيشه معاها !؟

تكلمت سريعا وقالت بحب

ابرار:-لا طبعا يا تيتة أنا بحبك أوى ومش عايزة أبعد عنك أبدآ، أنا كنت هخدك تعيشي معانا أنا وبابا وماما

نهضت سريعا من على مقعدها وقالت بحزن

رجاء:-يلا يا حبيبتى الباص مستني تحت أجري يلا

قبلت وجينتها سريعا وركضت إلى باب الشقه وهبطت سريعا إلى الأسفل

نظرت إلى أثرها بحزن وقالت بنبره مختنقه

رجاء:-حقك عليا يا بنتي ذنبك أنك جيتي من أب وأم مستهترين وكل واحد فيهم بيفكر فى مصلحته وبس.

……………………………………….

بعد مرور فتره من الزمن

دلفت هذه الجده العجوز غرفة هذه الفتاة الشابه وهى نائمه على فراشها جلست بجوارها على السرير وقالت بنفاذ صبر

رجاء:-أصحي يا بنتي حرام عليكي وجعتي قلبي معاكي أنا ست كبيره ومش حمل مناهده هتتأخري على الكليه

زفرت بضيق وقالت بتذمر

ابرار:-يووووه يا تيتة بقي أنا عايزة أنام سبيني نايمه شوية علشان خاطري يلا أطلعي من الأوضة وخدي الباب فى أيدك

ردت عليها بغضب وقالت

رجاء:-ولما أسيبك نايمة براحتك تصحي متأخر و تزعلي أن راح عليكي اليوم

نظرت لها بضيق واعتدلت على فراشها بغضب وقالت

ابرار:-أنا خلاص صحيت مبسوطة كده

تكلمت بضيق وهى تنهض من على السرير قائله

رجاء:-تصحي متصحيش أنتى حرة عندك الفطار متحضر بره أنا داخله أوضى

أمسكت يدها سريعا وقالت بابتسامه

ابرار:-أستني يا بطتي أنتي زعلتى مني صح ؟ طيب خلاص أنا اسفه متزعليش أنتي عارفه أنتي غالية عندي قد أيه ده أنتي العشق كله والله

نظرت لها بضيق وقالت

رجاء:-أيوه أيوه أبلفينى بشوية الحركات بتوعك دول، أنتى عايزة كسر رقبتك على أسلوبك معايا فى الكلام ده

تعالت ضحكاتها وقالت

ابرار:-طيب والله بحبك يا بطة بحبك

ابتسمت بحب وقالت

رجاء:-مشكلتي أن بضعف قصادك يا بكاشة أنتي

قبلت يدها بحب وقالت

ابرار:-ربنا يخليكي ليا وميحرمنيش من ضحكتك أبدآ يارب

ثم خرجت الجده من الغرفه ونهضت ابرار من على فراشها دلفت المرحاض توضأت وخرجت أدت فرضها وارتدت ملابسها وخرجت من غرفتها وجلست على المقعد وبدأت تتناول الطعام

نظرت لها بتوتر وقالت

رجاء:-أمك كلمتني النهارده

وقف الطعام بفمها ثم تكلمت بنبره مختنقه وقالت

ابرار:-مليش دعوه أذا كان كلمتك ولا لا أنا متأكدة أنها مسألتش عليا أصلا

ردت عليها سريعا محاوله أن تهداها قليلا قائله

رجاء:-معلش يا بنتي أديها عذرها جوزها طبعه وحش أوي وهي بتكلمني من وراه علشان منعها تكلمني أنا كمان

نهضت بغضب وقالت بنبره مختنقه

ابرار:-والله !! وأنا كمان مش بنتها عمرها ما كلمتني و أطمنت عليا زى أى أم ما بتعمل مع بنتها كأني أنا خطيئة فى حياتها مش جاية من جواز شرعي وعلى أيد مأذون أنا عمرى ما هنسي اللى هى وطليقها عملوه فيا وأنهم مفكروش يسألوا عليا ولا مرة، أنا أعتبرتهم ماتوا و خرجتوهم من حياتي زى ما هما رموني وأنا صغيره و خرجوني من حياتهم

ربت على ظهرها بحنو قائله

رجاء:-معلش يا حبيبتى خليكى أنتي الاحسن دول مهما كان أبوكى وأمك وربنا أمرك بالطاعه ليهم حتي لو عملوا فيكى أيه أنا مش هعيش ليكي العمر كله يا بنتي عايزه لما ربنا يسترد أمانته أبقي مطمنه عليكي

تكلمت بحب سريعا وقالت بنبره هادئه

ابرار:-ربنا يطول فى عمرك ويخليكي ليا متقوليش كده تاني ده أنا أموت لو حصلك حاجه

ابتسمت لها بحب وقالت

رجاء:-ربنا يحفظك يا بنتي لشبابك

نظرت بساعة يدها سريعا وجحظت عيناها بصدمه وقالت

ابرار:-يا لهوي أهو شوفتي مين اللى بيأخرني على الكليه ماشي يا بطوط هقول أيه

وقبلت وجينتها سريعا وامسكت حقيبة يدها وركضت بأتجاه الباب

نظرت لها بحب وقالت بنبره حنونه

رجاء:-ربنا يحميكي يا بنتى ويحرسك يارب.

…………………………………………..

وصلت ابرار الجامعه وركضت إلى الداخل سريعا ولكنها اصتدمت بإحدى الشباب دون أن تنظر له قالت بأسف

-انا اسفه مقصدش بس متاخره

وتركته واكملت ركض نظر إليها باستغراب وتحرك إلى الداخل

جلست ابرار بأنفاس لاهثه ونظرت إلى صديقتها وقالت بارتياح

-الحمدالله وصلت قبل الدكتور ما يجى أنا قولت أن اتأخرت وهسمع كلمتين فى جنابى منه

ابتسمت لها وقالت بنفاذ صبر

ولاء:- وايه الجديد فى كده ما حضرتك كل يوم بتتأخرى وبتخدى كلمتين فى جنابك من الدكتور ولا بيأثروا معاكى اساسا

نظرت لها بضيق وقالت

ابرار :- تصدقى انك عيله رخمه بدل ما ترفعى من روحى المعنوية تحبطينى بكلامك ده

ابتسمت لها بتهكم وقالت

ولاء :- قال يعنى البت عندها دم وبيأثر الكلام ده فيها اوى

ردت عليها بعدم اهتمام وقالت

ابرار:- لا مش بيأثر اصل جسمى نحس خلاص

وفى ذلك الوقت دلف الدكتور واغلق الباب خلفه نظرت ولاء إلى ابرار باستغراب وقالت

-ايه ده اومال فين دكتور حسن

حركت رأسها بعدم فهم وقالت

ابرار :- معرفش ممكن يكون مريض ولا حاجه اصبرى هنعرف دلوقتى

ونظروا إليه بأهتمام

تكلم بنبره جاده وقال

-انا دكتور سراج واللى هدرس ليكم الماده بعد كده لان استاذ حسن طلب نقله من هنا لمكان تانى وبتمنى أن نقضى الكام شهر الباقين كويسين مع بعض اهم حاجه عندى التركيز والنظام واحترام مواعيد الحضور

وفى ذلك الوقت نظر إلى ابرار بتهكم وقال

-مش لازم نيجى متأخر ونخبط فى الناس علشان نلحق، فيه حاجه اسمها صحيان بدرى وحضور فى الميعاد المحدد فاهمين أنا بتعامل مع شباب وعرايس كبار مش اطفال فى الروضه يعنى عايز كلامى ده يتنفذ بالحرف نبدأ بسم الله

اقتربت من صديقتها بعدم رضا وقالت

ابرار :- ده ماله ده عايش الدور علينا كده ليه شكل الايام الجايه هتبقى فله عليه

نظر لها بغضب وقال

سراج :- ممكن نسيب حكاوى القهاوى دى على جنب ونركز فى المحاضره يا انسه

نظرة حولها وقالت باستغراب

ابرار:- أنا!! حضرتك بتكلمنى أنا

عقد ذراعيه على صدره وقال بتهكم

سراج :- انتى شايفه ايه فيه حد غيرك بيتكلم

زفرت بضيق وقالت

ابرار:- اسفه يا دكتور

رد عليها بغضب وقال

سراج :- واضح كلمة اسفه دى فى بؤقك على طول بتقوليها من غير اقتناع بتخلصى نفسك بيها كده وخلاص

تنهدت بنفاذ صبر وقالت

ابرار :- شوف حضرتك الصح واعمله

نظر لها نظره مطوله وقال

سراج :- اتفضلى اقعدى ولو اتكررت تانى هيكون ليا تصرف معاكى

جلست بغضب على مقعدها وقالت

ابرار :- ضربه فى مصرينك

نظر لها بغضب وبدأ يتابع عمله

ظلت تنظر له بغضب حتى النهايه .

………………………………………………

بالشقه الخاصه بالجدة

هدر بها بغضب احدى أبنائها وقال برفض تام

ادهم:- مستحيل ده يحصل انتى شكلك كبرتى وخرفتى ازاى تفكرى تعملى كده شقة ايه دى اللى عايزه تكتبيها بأسم بنت بنتك دى ده حقنا احنا ولما نبيع الشقه نبقى ندى امها نصيبها منها شيلى الموضوع ده من دماغك نهائى فاهمه

نظرت له بحزن وقالت

رجاء :- ازاى يا ادهم تقول لامك كده دى شقتى أنا وانا حره فيها اديها للى أنا عايزاه

تعالت ضحكاته بغضب وقال

ادهم :- شقة مين كده سمعينى دى شقة ابونا بفلوسه ومش هسمح ابدا بالكلام ده وانا متاكد أن ابنك محمد رأيه من رأى

هدرت به بغضب وقالت

رجاء :- انت قلبك ايه يا شيخ ما انت عندك بيت طول بعرض وبسم الله ماشاءالله ظروفك زى الفل وعمرى ما طلبت منك جنيه جاى دلوقتى وبتحاسبنى على الشقه طيب ده اخر كلام عندى يا ادهم الشقه هكتبها بأسم ابرار أنا عايزه لما اموت اكون مطمنه عليها ويبقى فيه اربع حيطان وباب مقفول عليها ويحميها من كلاب الشوارع

نظر لها بغضب وقال بنبره تحذير

ادهم :- طيب فكرى تعملى كده يا اما وانا ومحمد هنرفع قضية حجر عليكى وهناخد الشقه منك برضاكى او غصب عنك

نهضت من على مقعدها بصدمه واقتربت منه وصفعته بقوه على وجينته وقالت بغضب

رجاء:-انت اتجننت ايه الكلام اللى بتقوله ده اطلع بره ومش عايزه اشوف وشك ده تانى قلبى وربى غضبانين عليك ليوم الدين بقى ده اخرتها عايز تحجر على امك علشان شقه بشوية ورق يا خسارة تعبى وتربيتى ليك اطلع بره بقولك

وضع يده على وجينته ونظر لها بغضب وقال

ادهم :- والله العظيم ما هعدى اللى حصل ده بالساهل واللى فى دماغك ده هتشيله برضاكى او غصب عنك

وتركها وغادر المكان

نظرت إلى أثره بدموع وجلست على مقعدها بحزن وشعرت بألم شديد بقلبها وضعت يدها عليه وفى ذلك الوقت فقدت الوعى وسقطت على الأرض.

……………………………………………..

جلست ابرار بالكافيه مع صديقتها ولاء وظلت تتكلم معها وتتعالى ضحكاتها ولكن فى ذلك الوقت شعرت بوخزه بقلبها نظرت إلى ولاء بقلق وقالت

-اللهم اجعله خير مش عارفه قلبى انقبض ليه مره واحده كده

نظرت لها بقلق وقالت

ولاء :- خير متقلقيش تلاقى بس اللى حصل من شويه مع الدكتور لسه مأثر عليكى

ردت عليها بغضب وقالت

ابرار:- دكتور مين ده اللى هشغل بالى بى بس أنا قلقانه لتكون تيته تعبانه ولا حاجه

ردت عليها سريعا وقالت

ولاء :- طيب ما تتصلى بيها اطمنى عليها

أمسكت الهاتف وقالت بتوتر

ابرار :- هتصل بيها ربنا يستر

وأجرت الاتصال وانتظرت الرد لكن لم تجيب عليها نظرت إلى ولاء بقلق وقالت

-مش بترد أنا كده قلقت اكتر

نهضت من على مقعدها وقالت

ولاء :- قومى بسرعه نروح نطمن عليها مستنيه ايه

هبت واقفه وتحركوا خارج الجامعه اوقفوا سيارة أجرة وصعدوا بها وذهبوا إلى المنزل وبعد عدة دقائق وقفت السياره أسفل العقار وهبطت ولاء وابرار منها ودفعت له الاجره وركضوا سريعا إلى الأعلى حتى وصلوا امام الباب أخرجت المفتاح من الحقيبه وفتحته ودلفوا إلى الداخل هتفت بقلق عليها قائله

ابرار :- بطه يا بطوط انتى فين بطه

تحركت بقدم مرتعشه إلى الداخل وقالت

-تيته يا تيت

وفى ذلك الوقت وقف الكلام بحلقها عندما وجدت جسد جدتها ملقى على الأرض ركضت إليها وجلست بجوارها وظلت تربت على وجهها قائله بدموع

-تيته يا تيته ردى عليا

ونظرت إلى ولاء وقالت بدموع

-تيته مش بترد عليا يا ولاء

ردت عليها سريعا وقالت

ولاء :- أهدى يا ابرار تلاقيها غيبوبة سكر ولا حاجه أنا هتصل بالاسعاف

وامسكت هاتفها واتصلت بهم ثم نظرت لها وقالت

-دقايق وهيكونوا هنا

احتضنتها بدموع وقالت بترجى

ابرار :- تيته ردى عليا ارجوكى اوعى تسبينى أنا أموت من بعدك مقدرش اعيش من غيرك والله يااااارب متوجعش قلبى عليها ولا تحرمنى منها انا مليش غيرها فى الدنيا دى

ودقائق معدوده وجاءت سيارة الإسعاف اخذت الجده وصعدت معها ابرار واتجهوا إلى المشفى.

……………………………………………

دخل الطبيب غرفة الفحص مع دموع ابرار المستمرة دون توقف نظر لها وقال بنبره هادئه

-ممكن تهدى يا انسه شويه علشان اعرف اشوف شغلى يا تتفضلى تستنى بره

وضعت يدها على فمها وظلت تتابع بقلق بالغ وعدة ثوانى انتهى من الفحص ونظر لها بأسف وقال

-البقاءلله الحاله متوفيه بقالها ساعه بسكته قلبيه بسبب انفعال زائد

نظرت له بصدمه وحركت رأسها بالرفض وقالت

ابرار :- لا يا دكتور انت غلطان تيته عايشه لسه مماتتش اكشف بس كويس عليها هتلاقيها فتحت عينيها دلوقتى أصلها مستحيل تموت وتسيبنى هى عارفه أن انا مليش حد غيرها

واقتربت منها سريعا وقالت

-تيته ردى عليا قومى قوليله أنه غلطان وانك عايشه ومستحيل تسبينى لوحدى قوم يا تيته بقى انتى عايزه تعرفى غلاوتك عندى صح انتى عارفه أنك كل حياتى انتى النفس اللى بتنفسه عارفه أن مقدرش اعيش حياتى من غيرك قومى بقى يا تيته

نظر إلى الممرضه وقال

-خديها اوضه تانيه واديها حقنه مهدأه بسرعه وخلى اللى معاها يخلصوا الإجراءات بتاعة المتوفيه

إجابة عليه بالطاعه قائله

-حاضر يا دكتور

وأخذت ابرار تحت صراخها المتواصل ورفضها ترك جدتها الغاليه واعطتها حقنة مهداه وقامت ولاء بإبلاغ أبناء رجاء حتى يحضروا سريعا إلى المشفى.

……………………………………………………

فى إحدى الاماكن الشعبيه يوجد منزل بحاله جيده إلى حدا ما به شقه تضم أفراد عائله متماسكه وسعيده رغم بساطة الحال تملئ الحب والحنان

وصل احدى أبناء هذا البيت وهو يشعر بالارهاق الشديد جلس على الاريكه بضيق وقال

سراج :- مساء الخير يا ماما

ربت على ظهره وقالت

اعتماد :- مساء الخير يا حبيبى طمنى عملت ايه فى أول يوم ليك فى الجامعه

زفر بضيق وقال بنبره مختنقه

سراج :- عادى يا ماما اهو يوم زى اى يوم مر والسلام

نظرت له بحزن وقالت

اعتماد :-, يا حبيبى انت ليه على طول متشائم كده نفسى بقى تفك شويه مش كل حاجه اخدها قفش

نظر لها بعدم اهتمام وقال

سراج :- وهتفرق ايه إذا كنت هاخد الحياه قفش ولا اخدها ضحك وهزار زى ابنك على كله محصل بعضه والنتيجه واحده

تكلمت بضيق وقالت

اعتماد :- انت لو تفك وتعدل اسلوبك الحاد ده مع الناس كنت شوفت ليك واحده وجوزتك يمكن الجواز يغيرك شويه بس خايفه اشوفلك واحده واظلمها معاك

نظر لها بأستغراب وقال

سراج :- لدرجاتى زهقتى منى

حركت رأسها سريعا وقالت

اعتماد :- مزهقتش منك يا ابنى بس خايفه تخسر كل الناس بطريقتك دى كام مره اجبلك عروسه وتطفشها بأسلوبك الحاد ده

نهض من على الأريكة وقال

سراج :- علشان موضوع الارتباط ده مش فى دماغى اصلا وانتى اللى مصممه تجيبى ليا عرايس، ريحى نفسك شويه وقت ما هحس أن عايزه ارتبط هبقى اقولك

وفى ذلك الوقت دلف شقيقه الاوسط من باب الشقه وقال بطريقه مرحه

على :- امى وسراج بيتكلموا على الجواز يبقى البيت هيتقلب خناق دلوقتى ليه بس ياربى جيت فى الوقت ده ، احسن حاجه الف وارجع تانى مكان ما جيت

نظر له بضيق وقال

سراج :- لا أنا اللى هسيب ليك المكان وادخل اوضى مش ناقص صداعك انت كمان

نظرت له بضيق وقالت

اعتماد :- قصدك ايه يا سراج قصدك أن انا صداع !! صداع علشان عايزه مصلحتك عايزاك تتجوز واشيلك حتة عيل

تكلم بصوت منخفض وقال

على :- ايوه بقى اديلوا شكلها هتشعلل وهتبقى انت يا واد يا على ابن البطه البيضه

ثم تكلم بصوت اعلى وقال

-لا ملكش حق يا سراج دى مهما كان دى امك لازم تسمع كلامها وتطيعها

نظر له بغضب وقال بتحذير

سراج :- بلاش تشعللها احسنلك

ردت عليه بغضب وقالت

اعتماد :- طيب تبقى تقربله يا سراج علشان احلف أن هسيب ليكم البيت وامشى ومحدش يعرف ليا طريق

نظر لهم بضيق وتركهم ودلف غرفته

جلس بجوار والدته وقال بطريقه مرحه

على :- أهدى يا حبيبتى إنبى ما لينا الا بعضينا قوليلى بقى عامله اكل ايه

نظرت له بضيق وقالت بنبره غاضيه

اعتماد :- جتك نيله انت كمان على طول فايق ورايق

وتركته ودلفت غرفتها

نظر إلى أثرها بضيق مزيف وقال

على :- ده ايه البيت المنخوليه ده

وفى ذلك الوقت وصلت وسام الشقيقه الصغيره من الخارج ونظرت له بأستغراب وقالت بتساؤل

وسام :- فيه ايه قاعد لوحدك كده ليه وفين الباقى

نظر لها بضيق مزيف وقال

على :- هيكون ايه اللى حصل وفرق كل واحد فى اوضه

ابتسمت بفهم وقالت سريعا

وسام :- ماما اتخانقت مع سراج علشان الجواز كالعاده صح

اومأ رأسه بالتأكيد وقال

على :- ايوا وسابو مصارين بطنى بتتخانق جوه من الجوع

تحركت بأتجاه غرفتها وقالت بثقه

وسام:- متقلقش مجرد ما بابا يجى من بره كله هيخرج من اوضه غصب عنه هدخل اغير هدومى لحد ما يوصل

نظر إلى أثر الجميع بضيق وقال

على :- الكل باعك ومشى وسابك ما بين اوجاعك واه اه اه

ثم قال بطريقه مرحه

-يا سلام عليك يا ولد يا لول عليك شويه كلام ينفع اغانى والله

ونهض ودلف غرفته وهو يهمهم بكلام غير مفهوم .

• يتبع الفصل التالي اضغط على ( رواية اكليل الحياة ) اسم الرواية